Izimvu ZikaYehova Zifuna Ukuthantanyiswa
“Yazini ukuba uYehova nguThixo yena; . . . Singabantu bakhe nezimvu ezaluswa nguye.”—INDUMISO 100:3.
1. UYehova ubaphatha njani abakhonzi bakhe?
UYEHOVA nguMalusi Omkhulu. Ukuba singabakhonzi bakhe, usigqala njengezimvu zakhe yaye uyasithantamisa. UBawo wethu wasezulwini uyasithuthuzela yaye uyasihlaziya aze asikhokelele “ezindleleni zobulungisa ngenxa yegama lakhe.” (INdumiso 23:1-4) UMalusi Olungileyo, uYesu Kristu, usithanda kangangokuba wancama ubomi bakhe ngenxa yethu.—Yohane 10:7-15.
2. Abantu bakaThixo bakweyiphi imeko?
2 Ekubeni sithantanyiswa, ndawonye nomdumisi sinokuthi: “Mkhonzeni uYehova nivuya; yizani phambi kwakhe nimemelela. Yazini ukuba uYehova nguThixo yena; wasenza yena, asisithi; singabantu bakhe nezimvu ezaluswa nguye.” (INdumiso 100:2, 3) Ewe, siyavuya yaye sinqabisekile. Siziva ngathi sikubuhlanti obubiyelwe ngeendonga zamatye ezomeleleyo yaye sikhuselekile kumarhamncwa angendawo.—Numeri 32:16; 1 Samuweli 24:3; Zefaniya 2:6.
Abalusi Bomhlambi Abawalusa Ngokuzithandela
3. Abadala abamiselweyo abangamaKristu bawuphatha njani umhlambi kaThixo?
3 Akungomnqa ukuba kusivuyise ukuba zizimvu zikaThixo! Sikhokelwa ngabadala abamiselweyo. ‘Abazenzi abaphathi,’ basigagamele, okanye bazame ukuzenza iinkosi elukholweni lwethu. (Numeri 16:13; Mateyu 20:25-28; 2 Korinte 1:24; Hebhere 13:7) Kunoko, bangabalusi abanothando abasebenzisa isiluleko sompostile uPetros: “Waluseni umhlambi kaThixo ophakathi kwenu, niwuvelela, kungengakunyanzelwa, makube ngokokuzithandela; kungengenxa yenzuzo embi, makube ngokuthumekelela; kungabi njengabazigagamelayo izahlulo zawo, yibani yimizekelo kumhlambi.” (1 Petros 5:2, 3) Umpostile uPawulos wabaxelela oku abadala awayekhonza kunye nabo: “Zilumkeleni ngoko, nawo wonke umhlambi, athe uMoya oyiNgcwele wanimisa ukuba ngabaveleli bawo, ukuba nilaluse ibandla likaThixo, awazizuzelayo ngelilelakhe igazi.” Yaye hayi indlela ezinombulelo ngayo izimvu kukuba la madoda amiselwe ngomoya oyingcwele ‘ewuphatha ngofefe umhlambi’!—IZenzo 20:28-30, NW.
4. UCharles T. Russell wayesaziwa njengonaluphi ulwalamano nomhlambi?
4 UYesu walipha ibandla ‘izipho ezingabantu,’ abanye ‘njengee-pastor,’ okanye abalusi, abawuthantamisayo umhlambi kaYehova. (Efese 4:8, 11; King James Version) Enye yala madoda yayinguCharles T. Russell, umongameli wokuqala weWatch Tower Society. Wayebizwa ngokuthi Pastor Russell ngenxa yothando nemfesane awayeyibonakalisa kumsebenzi wokwalusa umhlambi ngaphantsi koMalusi Oyintloko, uYesu Kristu. Namhlanje, abadala abangamaKristu bamiselwa liQumrhu Elilawulayo lamaNgqina kaYehova, yaye amagama anjengala athi “pastor,” “mdala,” okanye “mfundisi” ngenyameko akasetyenziswa njengezibizo. (Mateyu 23:8-12) Ukanti, abadala banamhlanje benza umsebenzi weepastor, okanye wokwalusa, ukuze kungenelwe izimvu zedlelo likaYehova.
5. Kutheni abasebatsha befanele bazame ukuqhelana nabadala abamiselweyo kwibandla lamaKristu?
5 Njengabalusi, abadala baphumeza inxalenye ebalulekileyo kwinkqubela yokomoya yabasebatsha. Ngoko, incwadi entsha ethi Ulwazi Olukhokelela Kubomi Obungunaphakade ithi kwiphepha 168: “Zama ukuqhelana nabadala abamiselweyo ebandleni. Banamava kakhulu ekusebenziseni ulwazi ngoThixo, kuba baye bafikelela iimfaneleko zabaveleli ezichazwe eBhayibhileni. (1 Timoti 3:1-7; Tito 1:5-9) Musa ukuba madolw’ anzima ukuya kubo ukuba ufuna uncedo ngokomoya lokoyisa umkhwa okanye utyekelo olungqubanayo noko kufunwa nguThixo. Uya kufumanisa ukuba abadala balandela isiluleko sikaPawulos: ‘Nibakhuthaze abatyhafileyo, nibasekele ababuthathaka, nibaphathe ngomonde xa bebonke.’—1 Tesalonika 2:7, 8; 5:14, TE.”
Xa Abasebatsha Befuna Ukushumayela
6. Nguwuphi umgaqo olandelwayo ukuba umfundi weBhayibhile ufuna ukuba ngumvakalisi woBukumkani?
6 Emva kokuba umfundi weBhayibhile ezondlile ngolwazi yaye esiza kwiintlanganiso kangangethuba elithile, usenokufuna ukuba ngumvakalisi woBukumkani, umshumayeli weendaba ezilungileyo. (Marko 13:10) Ukuba kunjalo, iNgqina elimqhubela isifundo seBhayibhile lifanele lithethe nomveleli owongamelayo, oya kulungiselela ukuba umdala omnye okwiKomiti Yenkonzo Yebandla nomnye umdala badibane naloo mfundi weBhayibhile nalowo umfundisayo. Ingxubusho yabo iya kusekelwa kwincwadi ethi Ukulungelelaniselwa Ukufeza Ubulungiseleli Bethu, iphepha 98 nelama-99. Ukuba aba badala babini bayabona ukuba lo usemtsha uyazikholelwa iimfundiso zeBhayibhile ezisisiseko yaye ubomi bakhe ubuvisisanise nemigaqo kaThixo, baya kumxelela ukuba uyakufanelekela ukuba nesabelo kubulungiseleli basesidlangalaleni.a Xa enikela ingxelo yobulungiseleli bakhe ngokufaka ingxelo yenkonzo yasentsimini, iya kufakwa kwiqweqwe lakhe leNgxelo Yomvakalisi Webandla. Ngoku osemtsha unokufaka ingxelo yomsebenzi wakhe wokunikela ubungqina ndawonye nezinye izigidi ‘ezishumayela ilizwi likaThixo’ ngovuyo. (IZenzo 13:5) Kuya kwenziwa isaziso ebandleni sokuba ungumvakalisi ongabhaptizwanga.
7, 8. Umvakalisi ongabhaptizwanga unokuncedwa ngaziphi iindlela kubulungiseleli?
7 Umvakalisi ongabhaptizwanga ufuna uncedo lwabadala nolwamanye amaKristu aqolileyo. Ngokomzekelo, umqhubi weSifundo Sencwadi Sebandla aya kuso unomdla kwinkqubela yakhe yokomoya. Lo mvakalisi mtsha usenokukufumanisa kunzima ukuthetha ngokuphumelelayo kumsebenzi wendlu ngendlu. (IZenzo 20:20) Ngoko unokuluvuyela uncedo, ngokukodwa oluvela kumntu obemqhubela isifundo seBhayibhile kwincwadi ethi Ulwazi. Olo ncedo lusebenzisekayo luyafuneka, kuba uYesu Kristu wabenza babulungela ubulungiseleli abafundi bakhe.—Marko 6:7-13; Luka 10:1-22.
8 Ukuba ubulungiseleli bethu buza kuphumelela, kufuneka silungiselele kakuhle kusengaphambili. Ngoko ke, aba bavakalisi babini basenokuqala badibane ukuze baqhelisele iintshumayelo ezicetyisiweyo kwiinkupho zanyanga zonke zoBulungiseleli Bethu BoBukumkani. Xa beqalisa kwinkonzo yasentsimini, onamava ngakumbi usenokuthetha kwindlu yokuqala neyesibini. Emva kwentshayelelo yobuhlobo, aba bavakalisi banokubolekisana ngokunikela ubungqina. Ukusebenza kunye kubulungiseleli kangangeeveki ezimbalwa kusenokukhokelela kumabuyelo amahle kwanakwisifundo seBhayibhile sekhaya kwincwadi ethi Ulwazi Olukhokelela Kubomi Obungunaphakade. Umvakalisi onamava ngakumbi usenokusiqhuba okwexeshana eso sifundo aze emva koko asinikele kumvakalisi woBukumkani osemtsha. Hayi indlela abaya kuvuya ngayo aba bavakalisi ukuba loo mfundi weBhayibhile ubonakalisa uxabiso ngolwazi ngoThixo!
9. Ngawaphi amalungiselelo enziwayo xa umvakalisi enqwenela ukubhaptizwa?
9 Njengoko umvakalisi ongabhaptizwanga esenza inkqubela ngokomoya, usenokuzahlulela kuThixo ngomthandazo aze afune ukubhaptizwa. (Thelekisa uMarko 1:9-11.) Ufanele awuchaze umnqweno wakhe wokubhaptizwa kumveleli owongamelayo webandla, oya kwenza amalungiselelo okuba abadala bahlolisise naye imibuzo ekwiphepha 175 ukusa kwelama-218 kwincwadi ethi Ukulungelelaniselwa Ukufeza Ubulungiseleli Bethu. Iinxalenye ezine ezinale mibuzo zisenokugutyungelwa ngokweenxalenye ezintathu ngabadala abathathu abahlukahlukeneyo ukuba kunokwenzeka. Ukuba bayavumelana ukuba lo mvakalisi ungabhaptizwanga ngokusengqiqweni uyaziqonda iimfundiso zeBhayibhile yaye uyafaneleka nangezinye iindlela, baya kumchazela ukuba angabhaptizwa. Ngenxa yozahlulelo nobhaptizo lwakhe, ‘uphawulelwa’ ukusinda.—Hezekile 9:4-6.
Ukuhlangabezana Neentswelo Ezikhethekileyo
10. Emva kokuba esigqibile isifundo sakhe kwincwadi ethi Ulwazi waza wabhaptizwa, umntu uya kulwandisa njani ulwazi lwakhe lweZibhalo?
10 Emva kokuba umntu esigqibile isifundo sakhe seBhayibhile kwincwadi ethi Ulwazi waza wabhaptizwa, kusenokungabi yomfuneko ukuba aphinde aqhutyelwe isifundo esicwangcisiweyo kwenye incwadi, enjengethi Ukumanyana Ekunquleni Okuphela KoThixo Oyinyaniso.b Kakade ke, umntu osandul’ ukubhaptizwa uya kufunda lukhulu xa elungiselela iintlanganiso zamaKristu aze abekho rhoqo kuzo. Kwakhona uya kufumana ulwazi olungakumbi njengoko ukunxanelwa kwakhe inyaniso kumshukumisela ukuba afunde aze afundisise iimpapasho zamaKristu ngasese aze axubushe imibandela eseZibhalweni namanye amakholwa. Kodwa kuthekani xa kuvela intswelo ekhethekileyo?
11. (a) UApolo wancedwa njani nguPrisila noAkwila? (b) Luluphi uncedo olusenokunikwa umntu oselula osandul’ ukubhaptizwa nocinga ngomtshato?
11 KwanoApolo, ‘owayenobunkunkqele ezibhalweni’ nowayefundisa ngokucokisekileyo ngoYesu, wangenelwa xa amaKristu anamava uPrisila noAkwila “bamthabathela kubo, bamtyhilela ngokucokisekileyo ngakumbi indlela kaThixo.” (IZenzo 18:24-26; thelekisa IZenzo 19:1-7.) Ngoko ke, masithi umzalwana oselula osandul’ ukubhaptizwa ucinga ngokuthandana phambi komtshato nangokutshata. UmKristu onamava ngakumbi usenokumnceda afumane inkcazelo ephathelele oku kwiimpapasho zeWatch Tower. Ngokomzekelo, inkcazelo eluncedo ephathelele oku iyafumaneka kwincwadi ethi Imibuzo Yabantu Abaselula—Iimpendulo Eziluncedo, Icandelo 7.c Umvakalisi owayemqhubela isifundo seBhayibhile usenokuxubusha le nkcazelo nosemtsha, nangona engasayi kumqhubela isifundo rhoqo.
12. Sinokuncedwa njani isibini esitshatileyo esisandul’ ukubhaptizwa esineengxaki?
12 Cinga ngomnye umzekelo. Masithi isibini esitshatileyo esisandul’ ukubhaptizwa sinengxaki ekusebenziseni imigaqo yobuthixo. Sisenokuya kumdala, onokuchitha iingokuhlwa ezimbalwa exubusha iZibhalo naso aze alathisele ingqalelo yaso kwinkcazelo efumanekayo kwiimpapasho zeWatch Tower. Noko ke, loo mdala akayi kusiqhubela isifundo seBhayibhile rhoqo eso sibini.
Ukuba Osemtsha Uyona
13. Kutheni abadala befanele bamenzele inceba umntu osandul’ ukubhaptizwa owenze isono wabuya waguquka?
13 Abadala baxelisa uMalusi Omkhulu, uYehova, othi: “Mna ndiya kuwalusa umhlambi wam, . . . ndibophe ezaphukileyo, ndizomeleze ezifayo.” (Hezekile 34:15, 16; Efese 5:1) Enaloo ngcamango, umfundi uYuda wabongoza ukuba enzelwe inceba amaKristu athanjisiweyo awayenamathandabuzo okanye awayewele esonweni. (Yuda 22, 23) Ekubeni kufanelekile ukuba silindele okungakumbi kumaKristu anamava, ngokuqinisekileyo ufanele enzelwe inceba umntu osandul’ ukubhaptizwa—imvu encinane—owenze isono wabuya waguquka. (Luka 12:48; 15:1-7) Ngoko ke, abadala, ‘abagwebela uYehova,’ bayazithantamisa izimvu ezinjalo baze bazilungise ngomoya wobulali.—2 Kronike 19:6; IZenzo 20:28, 29; Galati 6:1.d
14. Kufanele kwenziwe ntoni xa umvakalisi osandul’ ukubhaptizwa esenza isono esinzulu, yaye unokuncedwa njani?
14 Noko ke, masithi umvakalisi osandul’ ukubhaptizwa wayenengxaki yotywala ngaphambili waza wawela ekuzintyintyeni ngabo kwakhona isihlandlo esinye okanye ezibini. Okanye mhlawumbi wayenexesha elide etshaya waza wawoyisa loo mkhwa kodwa wawela kwisilingo sokutshaya ngasese isihlandlo esinye okanye ezibini. Nakuba umzalwana wethu osemtsha eye wathandaza ecela uThixo ukuba amxolele, ufanele afune uncedo lomdala ukuze isono sakhe singabi ngumkhwa. (INdumiso 32:1-5; Yakobi 5:14, 15) Xa echaza isono sakhe komnye wabadala, loo mdala ufanele azame ukumlungisa ebonakalisa inceba. (INdumiso 130:3) Isiluleko esisekelwe eZibhalweni sinokwanela ukumnceda alungelelanise umendo weenyawo zakhe. (Hebhere 12:12, 13) Lo mdala uya kukuxubusha oku nomveleli owongamelayo webandla ukuze babone ukuba banganikela luphi uncedo olungakumbi.
15. Kwezinye iimeko, yintoni esenokuba yimfuneko xa umntu osandul’ ukubhaptizwa esona?
15 Kwezinye iimeko kusenokufuneka okungakumbi. Ukuba umcimbi wakhe ungundaba-mlonyeni, ubeka umhlambi engozini, okanye kubandakanyeke nezinye iingxaki, iqumrhu labadala liya kwabela abadala ababini ukuba bawuphande loo mcimbi. Ukuba aba badala bafumanisa ukuba lo mbandela unzulu ngokwaneleyo kangangokuba ufuna ikomiti egwebayo, bafanele banikele ingxelo kwiqumrhu labadala. Emva koko iqumrhu labadala liya kumisela ikomiti egwebayo ukuze incede owonileyo. Ikomiti egwebayo ifanele imthantamise. Ifanele izabalazele ukumlungisa ngeZibhalo. Ukuba usabela kakuhle kwimigudu yekomiti egwebayo, ngoko banokugqiba enoba bekuya kuba luncedo kusini na ukuba angazinikwa izabelo zaseqongeni kwiintlanganiso eziqhutywa kwiHolo yoBukumkani okanye enoba ufanele avunyelwe ukuba agqabaze ezintlanganisweni.
16. Banokwenza ntoni abadala ukunceda owonileyo?
16 Ukuba owonileyo uyasabela, umdala omnye okanye ababini abakwikomiti egwebayo banokulungiselela ukwenza amatyelelo okwalusa ngenjongo yokomeleza ukholo lwakhe nokwakha uxabiso lwakhe ngemilinganiselo kaThixo yobulungisa. Ngamnye kubo unokusebenza naye kubulungiseleli basentsimini ngamaxesha athile. Basenokuba neengxubusho ezimbalwa ezisekelwe eZibhalweni naye, mhlawumbi besebenzisa amanqaku afanelekileyo eMboniselo noVukani! kodwa bangamqhubeli isifundo seBhayibhile rhoqo. Ngokuthantanyiswa ngolo hlobo, owonileyo usenokomelezwa ukuze abuxhathise ubuthathaka benyama kwixa elizayo.
17. Ngawaphi amanyathelo athatyathwayo ukuba umenzi wobubi obhaptiziweyo akaguquki aze alishiye ikhondo lakhe lesono?
17 Kakade ke, isibakala sokuba umntu esandul’ ukubhaptizwa asikuthetheleli ukwenziwa kwesono ngokungenanguquko. (Hebhere 10:26, 27; Yuda 4) Nawuphi na umenzi wobubi obhaptiziweyo ongaguqukiyo aze alishiye ikhondo lakhe lesono, uya kugxothwa ebandleni. (1 Korinte 5:6, 11-13; 2 Tesalonika 2:11, 12; 2 Yohane 9-11) Xa sibonakala siyimfuneko isenzo esinjalo, iqumrhu labadala liya kukhetha ikomiti egwebayo. Ukuba uyagxothwa, kuya kwenziwa esi saziso sifutshane: “U . . . ususiwe kubudlelane.”e
Ukubanceda ‘Baqhubele Kwelokukhula’
18. Kutheni sinokuqiniseka ukuba amaKristu asandul’ ukubhaptizwa namanye aya kuhlala enokuninzi anokukufunda ngoYehova nangokuthanda kwakhe?
18 Inkoliso yabakhonzi bakaThixo iya kuhlala iyinxalenye yomhlambi. Kwakhona, okuvuyisayo kukuba, sonke siya kuba nako ukusondela ngakumbi kuBawo wethu wasezulwini ngenxa yokuba siya kuhlala sikwazi ukufunda okungakumbi ngaye nokuthanda kwakhe. (INtshumayeli 3:11; Yakobi 4:8) Amawaka awabhaptizwa ngePentekoste yowama-33 C.E. ayesamele afunde izinto ezininzi. (IZenzo 2:5, 37-41; 4:4) Kwakunjalo nangabeeNtlanga, ababengazazi iZibhalo. Ngokomzekelo, kwakunjalo ngabo babhaptizwa emva kwentetho kaPawulos eAreyopago eAtene. (IZenzo 17:33, 34) Nanamhlanje, kusekuninzi ekufuneka bakufunde abasandul’ ukubhaptizwa yaye bafuna ixesha noncedo ukubomeleza kwisigqibo abasenzileyo sokuhlala besenza okulungileyo emehlweni kaThixo.—Galati 6:9; 2 Tesalonika 3:13.
19. Abo babhaptizwayo banokuncedwa njani ukuze ‘baqhubele kwelokukhula’?
19 Nyaka ngamnye amawaka ayabhaptizwa yaye kufuneka ancedwe ukuze ‘aqhubele kwelokukhula.’ (Hebhere 6:1-3) Ngokuthetha nabo, ngomzekelo nangokunceda ngokoqobo kubulungiseleli, usenokukwazi ukunceda abathile bambathe umntu omtsha baze baqhubeke ‘behamba enyanisweni.’ (3 Yohane 4; Kolose 3:9, 10) Ukuba ungumvakalisi onamava, abadala basenokukucela ukuba uncede elinye ikholwa eliselitsha kwinkonzo yasentsimini okanye uxubushe iingongoma ezithile zeZibhalo nalo kangangeeveki ezimbalwa ukuze womeleze ukholo lwalo kuThixo, uxabiso lwalo ngeentlanganiso zamaKristu, njalo njalo. Ulwalamano oluphakathi kwabalusi nomhlambi lufana noloyise oyala abantwana bakhe nolomama ebathantamisa. (1 Tesalonika 2:7, 8, 11) Kodwa, abadala abambalwa nezicaka zolungiselelo abanakuzinyamekela zonke izinto ezifunekayo ebandleni. Sonke sifana nentsapho eyilwe ngamalungu ancedanayo. Ngamnye wethu unokwenza okuthile ukunceda amanye amakholwa akunye nathi. Nawe unokukwazi ukubakhuthaza abanye, uthuthuzele abadandathekileyo, womeleze ababuthathaka.—1 Tesalonika 5:14, 15.
20. Yintoni onokuyenza ukusasaza ulwazi oluvela kuThixo nasekuthantamiseni izimvu zedlelo likaYehova?
20 Uluntu kufuneka lufumane ulwazi ngoThixo, yaye njengeNgqina likaYehova, unokufumana uvuyo lokuba nesabelo ekulusasazeni. Izimvu zikaYehova kufuneka zithantanyiswe, yaye unokuphumeza indima yothando ngokuncedisa ukuphumeza oku. Ngamana uYehova angabusikelela ubulungiseleli bakho, yaye ngamana angakuvuza ngemigudu oyenza ngokusuka entliziyweni ukunceda izimvu zedlelo lakhe.
[Imibhalo esemazantsi]
a Kweli nqanaba, osemtsha usenokufumana umbhalo wencwadi ethi Ukulungelelaniselwa Ukufeza Ubulungiseleli Bethu.
b Ipapashwe yiWatchtower Bible and Tract Society of New York, Inc.
c Ipapashwe yiWatchtower Bible and Tract Society of New York, Inc.
d Ilungiselelo elinjalo ngokuphathelele abavakalisi abangabhaptizwanga lachazwa kwinqaku elithi “Ukunceda Abanye Banqule UThixo,” kwiMboniselo kaNovemba 15, 1988, iphepha 15-20.
e Ukuba kufikelelwe kwisigqibo sokususa kubudlelane yaye kukho isibheno, esi saziso siya kuxhonywa. Bona iphepha 147-8 lencwadi ethi Ukulungelelaniselwa Ukufeza Ubulungiseleli Bethu.
Ubuya Kuphendula Uthini?
◻ UYehova uziphatha njani izimvu zakhe?
◻ Kwenziwa ntoni xa abasebatsha befuna ukushumayela?
◻ Amanye amakholwa anokubanceda njani abasebatsha abaneentswelo ezikhethekileyo?
◻ Luluphi uncedo olunokunikelwa ngabadala kwabaye bona kodwa abaguqukileyo?
◻ Unokumnceda njani umntu osandul’ ukubhaptizwa ukuba ‘aqhubele kwelokukhula’?
[Umfanekiso okwiphepha 16]
UCharles T. Russell wayesaziwa njengomalusi womhlambi onothando
[Umfanekiso okwiphepha 18]
Abalusi abanemfesane bayawuthantamisa umhlambi kaThixo