Jonga Okungaphaya Koko Ukubonayo!
UKUBONA kakuhle ngamehlo okwenyama kuyintsikelelo. Eneneni, inkoliso yabantu inokukuxelela ukuba zimbalwa izinto enazo ezixabiseke ngaphezu kokubona. Noko ke, kumaKristu kukho uhlobo oluthile lokubona athetha ngalo umpostile uPawulos oluxabiseke ngaphezu kokubona kakuhle ngamehlo okwenyama. UPawulos wabhala: “Asixuneli ezintweni ezibonwayo, sixunela kwezingabonwayo.” (2 Korinte 4:18) Kumele ukuba luhlobo olukhetheke gqitha lokubona olwenza umntu abone izinto ezingabonwayo! Sisenokulubiza ngokuthi kukubona okuncamisileyo kokomoya.
Kutheni Kuyimfuneko?
AmaKristu enkulungwane yokuqala ayeluswele ngokwenene olu hlobo lwamehlo okomoya. Ubulungiseleli bawo bamaKristu ayebuphumeza ephantsi kobunzima obukhulu. UPawulos wayichaza ngolu hlobo: “Siyabandezelwa ngeenxa zonke, singaxineki; siyathingaza, singancami; sitshutshiswa, asiyekelwa; sikhahlelwa phantsi, asitshatyalaliswa.”—2 Korinte 4:8, 9.
Phezu kwazo nje ezo meko, abafundi abathembekileyo bahlala beqinile. Benokholo olomeleleyo kuThixo, njengoPawulos babenokuthi: “Kungoko singethi mandla; kuba nokuba umntu wethu wangaphandle uya esonakala, usuka yena owangaphakathi aye ehlaziyeka imihla ngemihla.” Noko ke, yintoni eyayibangela oku kuhlaziyeka kwemihla ngemihla? UPawulos wahlabela mgama esithi: “Kuba ubukhaphukhaphu bembandezelo yethu eyeyomzuzwana busisebenzela ngokuncamise kwaphela ubuqaqawuli obukhulukazi obungunaphakade sakubon’ ukuba asixuneli ezintweni ezibonwayo, sixunela kwezingabonwayo. Kuba ezibonwayo zezomzuzwana, ke zona ezingabonwayo zezonaphakade.”—2 Korinte 4:16-18.
UPawulos wayekhuthaza abazalwana bakhe bokomoya ukuba bangavumeli iingxaki, ubunzima, iintshutshiso—naziphi na iimbandezelo—zisithe umvuzo wabo ozukileyo obekwe phambi kwabo. Babefanele bajonge ngaphaya kweemeko ezaziphambi kwabo, begcine amehlo abo kumphumo ovuyisayo wekhondo lobuKristu. Yiloo nto eyayibanceda basihlaziye imihla ngemihla isigqibo sabo sokuqhubeka nedabi. Ngendlela efanayo namhlanje amaKristu afanele abone kakuhle ngamehlo okomoya.
Jonga Iimbandezelo Zangoku Njengezexeshana!
Sithanda singathandi, mihla le sibona izinto ebesingethandi kuzibona. Xa sizijonga esipilini ngokungaphephekiyo sibona iziphako zomzimba wenyama, ezibonakalisa ukungafezeki kwenyama. Xa sizijonga kwisipili seLizwi likaThixo, sibona iziphako zokomoya, kuthi nakwabanye. (Yakobi 1:22-25) Kwaye xa sijonga kwiphephandaba lemihla ngemihla okanye kumabonwakude, siva iingxelo zokungabikho kokusesikweni, inkohlakalo nentlekele size sibe buhlungu.
USathana angakuvuyela ukusenza sibe lusizi ngenxa yezinto esizibonayo okanye siphume endleleni size siqalise ukululahla ukholo. Sinokukuthintela njani oku ukuze kungenzeki? Sifanele silandele umzekelo owamiselwa nguYesu Kristu, njengoko wanconyelwa ngumpostile uPetros xa wathi: “Kuba nabizelwa oko; ngokuba noKristu weva ubunzima ngenxa yethu, esishiya nomzekelo, ukuze silandele emkhondweni wakhe.” (1 Petros 2:21) Kuzo zonke iinkalo zobomi bamaKristu, uYesu wayengumzekelo ogqibeleleyo.
Xa wayesalatha kuYesu njengomzekelo wethu, uPetros wakhankanya ngokukhethekileyo ukuba uYesu wabandezeleka. Eneneni, uYesu wabandezeleka gqitha xa wayesemhlabeni. ‘Njengengcibi yomsebenzi’ kaYehova eyayikho xa kwakudalwa uluntu, wayeyazi kakuhle into uThixo afuna abantu babe yiyo. (IMizekeliso 8:30, 31) Kodwa ngoku wazibonela ngokwakhe oko isono nokungafezeki zibenze bakuko. Mihla le wayebona aze ahlangabezane nokungafezeki nobuthathaka babantu. Oko kumele ukuba kwakuluvavanyo kuye.—Mateyu 9:36; Marko 6:34.
Ngaphandle kweembandezelo zabanye, kwakhona uYesu wafumana ezakhe iimbandezelo. (Hebhere 5:7, 8) Kodwa ngamehlo okomoya afezekileyo, wajonga ngaphaya kwazo ukuze abone umvuzo wokuphakanyiselwa kubomi bokungafi ngenxa yekhondo lakhe lengqibelelo. NjengoKumkani onguMesiya, wayeya kwandula ke abe nelungelo lokukhupha uluntu olucinezelekileyo kwimeko yalo ephantsi alubuyisele kwimfezeko eyayiyinjongo kaYehova yantlandlolo. Ukugcina iliso lakhe lijonge kula mathemba angabonakaliyo exesha elizayo kwamnceda wahlala enovuyo enkonzweni yobuthixo phezu kwazo nje iimbandezelo awayeqhubeka ezibona. UPawulos kamva wabhala: “Ngenxa yovuyo olwalubekwe phambi kwakhe, wawunyamezela [isibonda sentuthumbo, NW], elidelile ihlazo, waza wahlala phantsi ngasekunene kwetrone kaThixo.”—Hebhere 12:2.
UYesu akazange avumele ubunzima neemeko ezivavanyayo ukuba zimenze abe lusizi, aphume endleleni, okanye axengaxenge elukholweni. Njengabafundi bakhe, sifanele silandele ngokusondeleyo kumzekelo wakhe obalaseleyo.—Mateyu 16:24.
Nikela Ingqalelo Kwizinto Ezingabonakaliyo Ezingunaphakade!
Ethetha ngento eyenza uYesu akwazi ukunyamezela, uPawulos wakwalatha kwikhondo esimele silithabathe xa wabhala esithi: “Silubaleke ngomonde ugqatso olubekwe phambi kwethu; sise amehlo kuyo iMbangi noMgqibelelisi wokholo lwethu, uYesu.” (Hebhere 12:1, 2) Ewe, ukuze silubaleke ngempumelelo nangovuyo ugqatso lobuKristu, sifanele sijonge ngaphaya kwezinto ezikufutshane nathi. Kodwa ‘siwasa njani amehlo’ ethu kuYesu, yaye kuya kusenzela ntoni oko?
Ngokomzekelo, ngowe-1914, uYesu wabekwa njengoKumkani woBukumkani bukaThixo, ibe ulawula esezulwini. Kakade ke, yonke loo nto ayibonakali kumehlo ethu enyama. Kanti, ukuba ‘sisa amehlo’ ethu kuYesu, amehlo ethu okomoya aya kusinceda sibone ukuba ngoku ulungele ukuthabatha inyathelo lokuphelisa le nkqubo yezinto ingendawo aze afake uSathana nemikhosi yakhe yeedemon kwimixokelelwano yokungasebenzi. Xa sijonga phambilana, amehlo ethu okomoya aya kusibonisa ihlabathi elitsha elingummangaliso apho kungayi kuba sabakho “kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”—ISityhilelo 19:11-16; 20:1-3; 21:4.
Ngoko ke, kunokusindwa ziimbandezelo zexeshana esinokujamelana nazo suku ngalunye, kutheni singajongi kwizinto ezingunaphakade? Ngamehlo okholo, kutheni singajongi ngaphaya kokugula nokubawa okukhoyo kulo mhlaba ungcolileyo size sibone iparadisi ezaliswe ngabantu abaphilileyo, abonwabileyo nabanenkathalo? Kutheni singajongi ngaphaya kweziphako zethu, ezokwenyama nezokomoya, size sizibone sikhululeke ngokusisigxina kuzo ngedini lentlawulelo likaKristu? Kutheni singajongi ngaphaya kobutyobo obubangelwe yimfazwe, ulwaphulo-mthetho nogonyamelo size sibone abantu abasandul’ ukuvuswa befundiswa ngoxolo nobulungisa bukaYehova?
Ukongezelela koko, ‘ukusa amehlo’ kuYesu kwakhona bekuya kuquka ukujolisa amehlo ethu okomoya koko uBukumkani, nangona bungabonakali, sele bukuphumezile kubantu bakaThixo emhlabeni: umanyano, uxolo, uthando, umsa wobuzalwana nokukhula ngokomoya. Elinye ibhinqa elingumKristu laseJamani, emva kokubona ividiyo ethi United by Divine Teaching, labhala: “Le vidiyo iza kundinceda kakhulu ukuze ndikhumbule ukuba ndithetha nje kukho abazalwana noodade abangamaKristu abaninzi gqitha ehlabathini lonke abakhonza uYehova benyanisekile—ibe bakwenza oko phezu kwako nje ukuchaswa. Hayi indlela oluxabiseke ngayo umanyano lwethu lobuzalwana kwihlabathi elinogonyamelo nentiyo!”
Ngaba nawe “uyambona” uYehova, uYesu, izithunywa zezulu ezinyanisekileyo nezigidi zamaKristu okhonza kunye nawo emi ngakwicala lakho? Ukuba kunjalo, awuyi kuzikhathaza ngokugqithiseleyo ‘ngexhala leli phakade’ elinokukunxunguphalisa uze utyhafe lize likwenze ‘ungabi nasiqhamo’ kwinkonzo yobuKristu. (Mateyu 13:22) Ngoko ‘yisa amehlo’ akho kuYesu ngokujolisa amehlo akho okomoya kuBukumkani bukaThixo obusekiweyo nakwiintsikelelo zabo, ezangoku nezexesha elizayo.
Philela Ukubona Oko Kungabonakaliyo!
Sakuba siwubonile umahluko omkhulu phakathi kwehlabathi likaThixo elitsha elingunaphakade nehlabathi eliwohlokayo nelidala lanamhlanje, sifanele sishukunyiselwe ukuba siziphathe ngendlela yokuba sibalwe njengabafanelekele ukuzibona ngokoqobo izinto esinokuzibona ngamehlo okholo kuphela namhlanje. Izihlwele zabavusiweyo ziya kukufumanisa kunzima ukukholelwa oko zikubonayo xa zivuka zize zibone umhlaba oyiparadisi yobulungisa owahluke gqitha kwihlabathi ezalibonayo ngaphambi kokuba zife. Khawuthelekelele uvuyo esiya kuba nalo ngenxa yokuba siphila ukuze sizihlangabeze size sizicacisele oko uThixo akwenzileyo!—Thelekisa uYoweli 2:21-27.
Ewe, hayi indlela axabiseke ngayo amehlo okomoya, ibe hayi indlela ekubaluleke ngayo ukuwagcina ebukhali! Oku sinokukwenza ngokuba nesifundo sobuqu seBhayibhile esithe rhoqo, ngokuya kwiintlanganiso zamaKristu, ngokuthetha nabanye ngethemba lethu elisekelwe eBhayibhileni, yaye ngaphezu kwako konke, ngokuthandaza ukuze sifumane ukhokelo kuThixo. Oku kuya kuwagcina ebukhali yaye eqaqambile amehlo ethu okomoya, kusenza sikwazi ukujonga ngaphaya kwezinto esizibonayo!