Ukuqhuba Izifundo Zebhayibhile Zamakhaya Ezinenkqubela
1 Yintoni abafana ngayo umongikazi waseTanzania, oselula waseArgentina, nomama waseLatvia? Incwadi Yonyaka Yowe-1997 (iphe. 8, 46, nelama-56) inikela ingxelo yokuba aba bantu bobathathu benza inkqubela ekhawulezileyo kwizifundo zabo zeBhayibhile zamakhaya, ngenxa yokukulungela ukuqhutyelwa isifundo izihlandlo eziliqela evekini kwincwadi ethi Ulwazi. Kuye kwacetyiswa ukuba nanini na kunokwenzeka, abavakalisi bafanele bazabalazele ukuxubusha isahluko esinye sale ncwadi ebudeni besifundo ngasinye. Phofu ke, bambi bakufumanisa kulucelomngeni ukwenjenjalo. Nangona okuninzi kuya kuxhomekeka kwiimeko nengqondo yomfundi lowo, abafundisi abanamava baye bafumana impumelelo ekusebenziseni la macebiso alandelayo.
2 Njengoko kwaxutyushwayo kwisihlomelo soBulungiseleli Bethu BoBukumkani bukaJuni 1996, kufuneka uqeqeshe abafundi bakho basilungiselele isifundo. Kwasekuqaleni, kuya kuba kuhle ukubacacisela nokubabonisa indlela ekwenziwa ngayo oku. Babonise incwadi yakho ethi Ulwazi. Lungiselelani isifundo sokuqala kunye. Mncede umfundi afumane amazwi okanye amabinzana aziintloko awuphendula ngokuthe ngqo umbuzo osencwadini aze awakrwelele okanye awaphawule. Bambi abavakalisi baye banika abafundi babo into yokuphawula iimpendulo. Bakhuthaze bajonge zonke izibhalo xa belungiselela isifundo. Ngokwenjenjalo, uya kuba ubaqeqeshela ukulungiselela iSifundo Sencwadi Sebandla neSifundo seMboniselo.—Luka 6:40.
3 Umfundisi olichule uya kumvumela athethe umfundi angantyuntyi nje yedwa. Uyakuphepha ukuphum’ emxholweni ngenxa nje yeengongoma ezincinane. Akayi kusoloko efakelela umbandela ongangeni ndawo. Kunoko, ubalaselisa iingongoma eziphambili zesifundo. Bambi baye banika abafundi uncwadi olungakumbi ukubanceda bafumane iimpendulo kwimibuzo ethile. Ngaphezu koko, abantu abanomdla baya kufumana inkcazelo eyongezelelekileyo eneenkcukacha ngokuya kwiintlanganiso zebandla.
4 Kusenokungabi yimfuneko ukujonga zonke izibhalo ezibonisiweyo ezikwisifundo. Ezinye iingongoma zisenokucaciswa ngokuphuma kwizibhalo ezicatshuliweyo kwisiqendu. Ebudeni bempinda, balaselisa izibhalo eziphambili eniye nazixubusha uze ukhuthaze umfundi angazilibali.
5 Isifundo Sifanele Sithabathe Ixesha Elingakanani?: Akuyomfuneko ukuba isifundo siqhutywe nje iyure enye kuphela. Bambi abaninimzi banexesha elininzi yaye basenokunqwenela ukufunda ixesha elidana. Okanye umfundi usenokunqwenela ukufunda izihlandlo eziliqela ngeveki. Oku kuya kuba yingenelo kwabo bakwaziyo ukwenjenjalo.
6 Kunjengokuba uIsaya 60:8 esitsho, namhlanje amakhulu amawaka abadumisi bakaYehova abasebatsha “beza bebaleka njengelifu, njengamavukuthu esiza emakrobeni awo” besiza kumabandla abantu bakhe. Sonke masenze eyethu indima ekusebenzeni ngaxhatha linye noYehova njengoko ekhawulezisa ukuhlanganisa abantu abanjengezimvu.—Isa. 60:22.