Isifundo Sentsapho Esizisa Uvuyo

IBhayibhile ithi: “Ngokwazi kuzaliswa amaqonga bubuncwane bonke obunqabileyo nobumnandi.” (IMizekeliso 24:4) Ezi zinto zibubuncwane obunqabileyo asibobutyebi bezinto eziphathekayo kodwa ziquka uthando lokwenene, ukoyika uThixo, nokholo olomeleleyo. Enyanisweni ezo mpawu zinjalo zomeleza ubomi bentsapho. (IMizekeliso 15:16, 17; 1 Petros 1:7) Noko ke, ukuze sizifumane kufuneka singenise ulwazi ngoThixo ezindlwini zethu.

INTLOKO-NTSAPHO inembopheleleko yokubethelela olu lwazi kumalungu entsapho yayo. (Duteronomi 6:6, 7; Efese 5:25, 26; 6:4) Enye yezona ndlela zintle zokwenza oku kungesifundo sentsapho esithe rhoqo. Hayi indlela abanokuvuya ngayo abo banenxaxheba xa isifundo siqhutywa ngendlela efundisayo nenandiphekayo! Ngoko ke, makhe siqwalasele ezinye iindlela ezisisiseko ezibalulekileyo zokuqhuba isifundo sentsapho esinempumelelo.a

Isifundo sentsapho siba nempumelelo ngakumbi ukuba siqhutywa rhoqo. Ukuba akukho xesha limisiweyo okanye siqhutywa nje xa kuvela ithuba, kunokwenzeka ukuba siqhutywe manqaphanqapha. Ngoko umele ‘uzithengele ixesha’ lesifundo. (Efese 5:15-17) Ukukhetha ixesha lesifundo elivumelana neemeko zabo bonke nako kusenokuba lucelomngeni. Enye intloko-ntsapho yavuma isithi: “Kwakunzima ukuba nesifundo sentsapho esithe rhoqo. Sazama amaxesha awahlukahlukeneyo de ekugqibeleni safumana ixesha langokuhlwa elathi layingenelo kuthi sonke. Ngoku isifundo sethu sentsapho sisiqhuba rhoqo.”

Emva kokuba ufumene ixesha elifanelekileyo, kufuneka ulumke ungavumeli izinto eziphazamisayo ziphazamisane nesifundo. UMaria,b ngoku oneminyaka engama-33 ubudala, ukhumbula oku: “Ukuba kwakufika iindwendwe ngoxa kuqhutywa isifundo, uTata wayezicela ukuba zilinde de kugqitywe isifundo. Kwanaxa kukho umntu otsala umnxeba, wayemxelela loo mntu ukuba uza kumtsalela umnxeba ngelinye ixesha.”

Noko ke, oku akuthethi ukuba akuyi kuba bhetye-bhetye. Iimeko zongxamiseko okanye iimeko ezingalindelekanga zisenokuvela, yaye kusenokuba yimfuneko ukusirhoxisa isifundo ngamathuba athile. (INtshumayeli 9:11) Kodwa nilumke ningavumeli nanye kwezi ukuba iphazamisane nocwangciso lwenu.—Filipi 3:16.

Isifundo simele sithabathe ixesha elide kangakanani? URobert, owaba nempumelelo ekukhuliseni intombi nonyana, uthi: “Ngokuqhelekileyo izifundo zethu zazithabatha iyure. Xa abantwana babeselula, sasizama ukubagcina benomdla ebudeni baloo yure ngokuqwalasela izinto ezahlukahlukeneyo, ezinjengeziqendu ezimbalwa kwisifundo seMboniselo, sicaphula iindinyana eBhayibhileni, nakwezinye iimpapasho.” UMaria ukhumbula oku: “Xa mna noodadewethu ababini sasisebancinane, isifundo sethu sasithabatha imizuzu engama-20 kabini okanye kathathu ngeveki. Njengoko sasikhula, isifundo sethu sentsapho seveki ngeeveki sasithabatha ithuba elingangeyure.”

Yintoni Esifanele Siyifunde?

Ukucinga ngalo mbuzo ngoxa bonke abantu belindele isifundo kunokuphumela ekudimazekeni kulahleke nexesha elibalulekileyo lesifundo. Ukuba kunjalo, abantwana abayi kuba nanto ingqalileyo abanokukhangela phambili kuyo yaye ngokukhawuleza baphelelwa ngumdla. Ngoko khetha kusengaphambili enye yeempapasho zoMbutho eniza kuyifunda.

“Ikhoboka elithembekileyo neliyingqondi” lilungiselele intabalala yeempapasho onokukhetha kuzo. (Mateyu 24:45-47) Mhlawumbi usenokusebenzisa incwadi engekafundwa yintsapho. Yaye hayi indlela ekuvuyisa ngayo ukuqwalasela iziqendu ezithile kwincwadi ethi Insight on the Scriptures ukuba le miqulu ikho ngolwimi lwakho! Ngokomzekelo, nisenokwenza impinda yenqaku elithi iSidlo seNkosi Sangokuhlwa ebudeni beeveki ezingaphambi kweSikhumbuzo. Iintsapho ezininzi ziyakunandipha ukulungiselela iSifundo seMboniselo seveki. Kodwa amanye amanqaku eMboniselo nawo anokuba yingenelo esifundweni. Intloko-ntsapho, ezaziyo iimfuno zokomoya zentsapho, yiyo ekwimeko entle yokugqiba ngeempapasho ezimele zifundwe.

UMaria ukhumbula oku: “Sasisoloko sifunda impapasho ekhethwe kuselithuba. Kodwa xa kukho umbuzo okanye kukho ingxaki ethile esikolweni, sasiye sisebenzise inkcazelo evisisana nayo.” Kuye kuvele izinto ezithile ezixhalabisa ngokukhethekileyo, ezinjengeengxaki ulutsha olujamelana nazo esikolweni, ukwenza amadinga, nemicimbi yasemva kweeyure zesikolo, nezinye ezinjalo. Xa oku kusenzeka, tshintshela kumanqaku okanye iimpapasho ezixubusha ngengxaki leyo. Ukuba ubona inkcazelo kwinkupho yakutshanje yeMboniselo okanye uVukani! onomdla wokuyixubusha nentsapho ngoko nangoko, musa ukuba mathidala ukukulungiselela oko. Kakade ke, kusenokufuneka uwazise amalungu entsapho ngolo tshintsho kuselithuba. Kodwa qiniseka ukuba ubuyela kumbandela obukucwangciso emva kokuba oko ukwenzile.

Gcina Imeko Izolile

Kufundwa kakuhle ngakumbi ukuba kukho uxolo. (Yakobi 3:18) Ngoko hlakulela imeko ekhululekileyo, kodwa enesidima. Enye intloko-ntsapho yaseUnited States ithi: “Enoba sifundela kwigumbi lokuhlala okanye kwiveranda, sizama ukuhlala sisondelelene kunokuba sihlale sithe qelele endlwini enkulu. Kuthi, oku kubangela ubudlelane obuhle.” Yaye ekhumbula loo mathuba amyoli, uMaria uthi: “Mna nodade wethu sasivunyelwa sikhethe indawo esiza kuqhutyelwa kuyo isifundo ngaloo veki. Oku kwakusonwabisa.” Khumbula ukuba ukukhanya okufanelekileyo, nendawo efanelekileyo yokuhlala, indawo ekhangeleka kakuhle nengenabuxhakaxhaka buninzi inegalelo kwimeko ezolileyo. Ukufumana okuthile okuhlaziyayo emva kwesifundo kwenza ingokuhlwa inandipheke.

Zimbi iintsapho zide zikhethe ukuquka ezinye iintsapho esifundweni sazo ngezinye izihlandlo, nto leyo ebangela umdla ongakumbi namagqabaza awahlukahlukeneyo. Xa abo basebatsha enyanisweni bemenywa ukuba babekho, banokungenelwa ngokubona intloko-ntsapho enamava iqhuba isifundo sentsapho.

Yenza IBhayibhile Iphile

Amaxesha okufunda wenze abe nganomdla ebantwaneni, yaye baya kukhangela phambili kuwo. Unokukwenza oku ngokukhuthaza abantwana abancinane ukuba bazobe imifanekiso yezinto ekuthethwa ngazo eBhayibhileni. Xa kufanelekile, abantwana mabenze umboniso weziganeko zeBhayibhile baze benze nemidlalo. Xa ufunda nabantwana abaselula akuyomfuneko ukunamathela kwinkqubo yemibuzo neempendulo. Ukufunda okanye ukubalisa amabali ngabalinganiswa beBhayibhile yindlela enandiphekayo yokubethelela imigaqo kaThixo. URobert, ekuthethwe ngaye ekuqaleni, ukhumbula oku: “Maxa wambi sasiye sifunde iindinyana zeBhayibhile, sitshintshisana, sifunda ‘amazwi’ awahlukahlukeneyo ngokwezabelo zethu.” Abantwana basenokukhuthazwa ukuba bakhethe umlinganiswa abathanda ukuba nguye xa befunda.

Ukusebenzisa iimaphu neetshati kuya kubanceda abantwana esele bekhulile babe nomfanekiso-ngqondweni wemimandla neenkalo ezithile zamazwe ezenzeka kuwo iziganeko ekuthethwa ngazo. Ngokucacileyo, ngenxa yokuba nomfanekiso ngqondweni nje omncinane, isifundo sentsapho sinokwenziwa sibe nomdla yaye singabi yindinisa. Yaye abantwana baya kulilangazelela iLizwi likaThixo.—1 Petros 2:2, 3.

Bancede Bonke Babe Nesabelo

Ukuze abantwana basinandiphe isifundo, kufuneka bazive bebandakanyekile. Noko ke, ukuzama ukuba abantwana abaneminyaka eyahlukahlukeneyo babe nesabelo, kusenokuba lucelomngeni. Kodwa umgaqo weBhayibhile uthi: “Lowo wongamelayo, makenjenjalo ngokunyameke ngokwenene.” (Roma 12:8) Ukuba nehlombe kuyanceda, kuba ihlombe liyosulela.

URonald ubandakanya intombi yakhe eneminyaka emihlanu ubudala, uDina, ngokumenza afunde imixholwana koko kuza kufundwa nangokumcela ukuba agqabaze ngemifanekiso. Njengoko iSikhumbuzo sokufa kukaKristu sasisondela kunyaka ophelileyo, wagxininisa kwimifanekiso eyayiphathelele oko kwincwadi ethi Oyena Mntu Ubalaseleyo Wakha Waphila.c Uthi: “Oku kwamnceda waqonda ukubaluleka kweso sihlandlo.”

Ekunye nentombazana yakhe eneminyaka elishumi ubudala, uMisha, uRonald wongezelela enye ingongoma. URonald uthi: “UMisha uye wanenkqubela yaye akaqondi nje imifanekiso kuphela kodwa nentsingiselo yayo. Ngoko xa sasifunda incwadi ethi ISityhilelo—Incopho Yaso Ezukileyo Isondele!,d sasigxininisa ngakumbi koko kwakuthethwa yimifanekiso, yaye oku kwamnceda.”

Njengokuba abantwana befikelela kwishumi elivisayo, mabachaze indlela ekusebenza ngayo oko kufundwayo. Xa kuphakama imibuzo ngexesha lesifundo, babele umbandela abafanele bawuphande. URobert wakwenza oko xa unyana wakhe oneminyaka eli-12 ubudala, uPaul, wabuza ngeqela elitsha lasesikolweni elaliquka umdlalo ekuthiwa yiDungeons and Dragons. UPaul nabanye entsatsheni bayikhangela loo nkcazelo besebenzisa iWatchtower Publications Index, yaye benza impinda yayo kwisifundo sabo sentsapho. URobert uthi: “Ngenxa yoko, uPaul ngokukhawuleza waqonda ukuba loo mdlalo wawungawafanele amaKristu.”

Kwakhona nangamanye amaxesha uRobert wayesabela umbandela ofanele uphandwe. Umfazi wakhe, uNancy, ukhumbula oku: “Xa sasiphanda ngabapostile bakaYesu, ngamnye wethu wayephanda ngompostile omnye veki nganye. Hayi indlela ekwakuvuyisa ngayo ukubona abantwana benikela ingxelo yabo ngehlombe kwisifundo sentsapho!” Ukuzenzela uphando baze babelane nentsapho ngaloo nkcazelo kunceda abantwana ‘bakhule noYehova.’—1 Samuweli 2:20, 21.

Ukubuza imibuzo—iimbono zabo kwanemibuzo ekhokelayo—nako kuyindlela elungileyo yokubandakanya abantwana. UMfundisi Omkhulu, uYesu, wabuza imibuzo engeembono zabo, enjengethi, “Ucinga ntoni?” (Mateyu 17:25) UMaria ekhumbula uthi: “Xa omnye wethu enombuzo, abazali bethu babengaze basiphendule ngokuthe ngqo. Babesoloko bebuza imibuzo ekhokelayo, besinceda siqiqe ngaloo mbandela.”

Dlulisela Inkcazelo—Musa Ukucaphukisa!

Isifundo sentsapho sibangela umdla ngakumbi ukuba abo bakhoyo bonke banokudlulisela iimbono neemvakalelo zabo bengoyiki ukuba baza kugxekwa. Kodwa omnye ubawo uthi: “Lunokubakho unxibelelwano oluhle ebudeni besifundo sentsapho ukuba kuphela abakho amathuba okuncokola ngezinye izihlandlo. Akunako ukuqalisa nje ngexesha lesifundo.” Ngandlela zonke, waphephe amazwi angenangqiqo, ahlabayo anjengokuthi, ‘Ngaba kuphelele apho? Bendicinga ukuba le yinto ebalulekileyo’; ‘Yambi ke loo nto’; ‘Kaloku, bendilindele oko kakade? Phofu ke, usengumntwana.’ (IMizekeliso 12:18) Yiba nobubele nenceba ebantwaneni bakho. (INdumiso 103:13; Malaki 3:17) Yoliswa ngabo, uze ubaxhase njengoko bezama ukusebenzisa oko bakufundayo.

Umoya wesifundo sentsapho ufanele ubangele ingqondo yomntwana ibe nomdla koko kufundiswayo. Omnye umzali owaba nempumelelo ekukhuliseni abantwana abane uthi: “Xa uqalisa ukulungisa abantwana, baye bavakalelwe kukuba akunabubele.” Kwimeko enjalo, mhlawumbi loo nkcazelo ayiyi kubetheleleka. Ngoko kuphephe ukwenza amathuba okufunda ibe ngawoqeqesho nesohlwayo. Ukuba oko kuyimfuneko, kwenze ngelinye ixesha yaye kumntu ngamnye.

Kuwufanele Umgudu

Ukwakha intsapho eyondlekileyo ngokomoya kuthabatha ixesha nomgudu. Kodwa umdumisi wavakalisa: “Uyabona, ilifa likaYehova ngoonyana, umvuzo sisiqhamo sesizalo.” (INdumiso 127:3) Yaye abazali banembopheleleko ‘yokukhulisela [abantwana] kwingqeqesho nasekweyiselweni kwengqondo kuYehova.’ (Efese 6:4) Ngoko khulisa ubuchule bokuqhuba isifundo sentsapho esinempumelelo nesinandiphekayo. Yenza konke okusemandleni akho unikele ‘ubisi olungangxengwanga lwelizwi,’ ukuze abantwana bakho ‘bakhulele elusindisweni.’—1 Petros 2:2; Yohane 17:3.

[Imibhalo esemazantsi]