Isahluko 8
Kutheni UThixo Evumela Ukubandezeleka?
1, 2. Ngokufuthi abantu basabela njani ekubandezelekeni kwabantu?
XA KUSEHLA iintlekele, zitshabalalise izinto zize zisube ubomi babantu, abaninzi abakwazi kusiqonda isizathu sokuba izinto ezimbi ngolo hlobo zenzeke. Abanye bakhathazwa bubungakanani, yinkohlakalo nakukungabi yomfuneko kolwaphulo-mthetho nogonyamelo. Nawe usenokuba ukhe wazibuza, ‘Kutheni uThixo evumela ukubandezeleka?’
2 Ngenxa yokuba bengafumananga mpendulo yanelisayo kulo mbuzo, abaninzi baphelelwe lukholo kuThixo. Bavakalelwa kukuba akalukhathalele uluntu. Abanye abakwamkela njengenxalenye yobomi ukubandezeleka baba nomsindo baze bambeke ityala uThixo ngabo bonke ububi obukhoyo kwibutho labantu. Ukuba wakha wavakalelwa ngaloo ndlela, ngokungathandabuzekiyo uya kuba nomdla koko iBhayibhile ikutshoyo ngalo mcimbi.
UKUBANDEZELEKA AKUVELI KUTHIXO
3, 4. Kutheni sinokuqiniseka ngokuba ububi nokubandezeleka akuveli kuYehova?
3 IBhayibhile isiqinisekisa ukuba ukubandezeleka esikubona kusijikelezile akubangelwa nguYehova uThixo. Ngokomzekelo, umfundi ongumKristu uYakobi wabhala: “Makungabikho namnye utshoyo akuhendwa ukuthi, Ndihendwa kwaThixo; kuba uThixo akanakuhendeka kokubi, akahendi namnye ke yena.” (Yakobi 1:13) Ekubeni kunjalo, uThixo akanakuba wabangela iinzima ezininzi ezithwaxa uluntu. Akabalingi abantu ukuze abenze bafanelekele ubomi basezulwini, yaye akababandezeli abantu ngenxa yezenzo ezibi ekuthiwa bazenza kubomi bangaphambili.—Roma 6:7.
4 Ukongezelela, nangona kuye kwenziwa izinto ezininzi ezimbi egameni likaThixo okanye likaKristu, akukho nento le eBhayibhileni ebonisa ukuba omnye wabo wakha wazamkela izenzo ezinjalo. UThixo noKristu abananto yakwenza nabo bazibanga bebakhonza kodwa abaqhathayo nabakhohlisayo, ababulalayo nabaphangayo, nabenza ezinye izinto ezininzi ezibangela abantu babandezeleke. Eneneni, “ilisikizi kuYehova indlela yongendawo.” UThixo “ukude nabangendawo.”—IMizekeliso 15:9, 29.
5. Ziziphi ezinye zeempawu zikaYehova, ibe uvakalelwa njani ngezidalwa zakhe?
5 IBhayibhile ichaza uYehova njengalowo ‘unemfesane enkulu, nenceba.’ (Yakobi 5:11) Ithi “uYehova uthanda okusesikweni.” (INdumiso 37:28; Isaya 61:8) Akananqala. Ngemfesane uyazinyamekela izidalwa zakhe aze zonke azinike okona kulungele intlalo-ntle yazo. (IZenzo 14:16, 17) UYehova ebesenjenjalo kususela ekuqaliseni kobomi apha emhlabeni.
ISIQALO ESIGQIBELELEYO
6. Ezinye zeentsomi zamandulo zibhekisela njani kwimeko yembali yabantu yamandulo?
6 Sonke siqhelene nokubona nokuva iintlungu nokubandezeleka. Ngoko ke kusenokuba nzima ukuthelekelela ixesha ekuya kuba kungekho kubandezeleka ngalo, kodwa kwakunjalo ekuqaliseni kwembali yabantu. Kwaneentsomi zeentlanga ezithile ziyathetha ngeso siqalo sonwabisayo. Kwiintsomi zamaGrike, elokuqala “kumaXesha amaHlanu aBantu” lalibizwa ngokuba “liXesha Lolonwabo.” Ebudeni balo abantu babephila ubomi obonwabisayo, bengabulaleki, kungekho zintlungu, okanye iingxaki zokwaluphala. AmaTshayina athi ebudeni bolawulo loMlawuli oGwangqa wasentsomini (uHuang-Ti), abantu babehlala ngoxolo, benandipha imvisiswano kwanayo nemozulu namarhamncwa asendle. Abantu basePersi, eYiputa, eTibet, ePeru naseMexico bonke baneentsomi ezithetha ngexesha lolonwabo nemfezeko ekuqaleni kwembali yabantu.
7. Yayiyintoni injongo kaThixo yokudala umhlaba nabantu?
7 Iintsomi zeentlanga kuphela nje zivakalisa oko kubhalwe kweyona ngxelo indala yembali yabantu, iBhayibhile. Isixelela ukuba uThixo wabeka isibini sokuqala esingabantu, uAdam noEva, kwiparadisi eyayibizwa ngokuba ngumyezo wase-Eden waza wasiyalela oku: “Qhamani, nande, niwuzalise umhlaba niweyise.” (Genesis 1:28) Abazali bethu bokuqala babenandipha imfezeko yaye babenethemba lokubona umhlaba wonke usiba yiparadisi emiwe yintsapho yabantu efezekileyo ehleli eluxolweni naselonwabeni ngonaphakade. Leyo yayiyinjongo kaThixo xa wayedala umhlaba noluntu.—Isaya 45:18.
UCELOMNGENI LWENKOHLAKALO
8. UAdam noEva kwakulindeleke ukuba bathobele wuphi umyalelo, kodwa kwenzeka ntoni?
8 Ukuze baqhubeke benenkoliseko kaThixo, uAdam noEva kwakuya kufuneka bangawudli “umthi wokwazi okulungileyo nokubi.” (Genesis 2:16, 17) Ukuba babewuthobele umthetho kaYehova, ubomi babantu babungayi kuphazanyiswa kukubandezeleka. Ngokuthobela umthetho kaThixo, babeya kuba babonisa uthando lwabo ngoYehova nokunyaniseka kwabo kuye. (1 Yohane 5:3) Kodwa njengoko sibonile kwiSahluko 6, akuzange kube njalo. Ebongozwa nguSathana, uEva wasidla isiqhamo saloo mthi. Kamva, uAdam naye wasidla eso siqhamo salelweyo.
9. Yiyiphi imbambano ebandakanya uYehova uSathana awayiphakamisayo?
9 Ngaba uyabubona ubunzulu boko kwenzekayo? USathana wayehlasela isikhundla sikaYehova njengOsenyangweni. Ngokuthi, “Anisayi kufa,” uMtyholi wayephikisa amazwi kaThixo athi, “Uya kufa.” Amazwi abhekele phaya kaSathana abonisa ukuba uYehova wayegcina uAdam noEva bengazi ukuba babenako ukufana noThixo, ngaloo ndlela kungabi yomfuneko ukuba abagqibele ngokulungileyo nokubi. Ngoko ke ucelomngeni lukaSathana lwaphakamisa amathandabuzo ngokufaneleka kwesikhundla sikaYehova njengoMongami Wendalo Iphela.—Genesis 2:17; 3:1-6.
10. Yintoni eyathethwa nguSathana ngabantu?
10 Kwakhona uSathana uMtyholi wabonisa ukuba abantu babeya kuhlala bemthobela uYehova logama nje bengenelwa ngokuthobela uThixo. Ngamanye amazwi, kwathandatyuzwa ingqibelelo yabantu. USathana wathi akukho mntu wayenokuhlala enyanisekile kuThixo ngokuzithandela. Eli bango lenkohlakalo lenziwa nguSathana lityhilwe ngokucacileyo kwingxelo yeBhayibhile engoYobhi, umkhonzi kaYehova othembekileyo owavavanywa kakhulu ngaphambi kowe-1600 B.C.E. Xa ufunda izahluko ezibini zokuqala zencwadi kaYobhi, unokuqonda isizathu sokubandezeleka kwabantu nesizathu sokuba uThixo akuvumele.
11. Wayeyindoda enjani uYobhi, kodwa uSathana wamtyhola ngantoni?
11 UYobhi, “indoda egqibeleleyo, ethe tye,” wahlaselwa nguSathana. Okokuqala, uSathana wathi uYobhi wayeneentshukumisa ezimbi ngokuphakamisa lo mbuzo, “UYobhi lo ufumana emoyikela ilize na uThixo?” Wandula ke, uMtyholi ngobuqhophololo wabanyelisa bobabini uThixo noYobhi ngokutyhola uYehova ngokuba wayemnyobile uYobhi ukuze anyaniseke ngokumkhusela nokumsikelela. USathana wacela uYehova umngeni esithi: “Kodwa ke khawuse isandla sakho ngoku, uchukumise into yonke anayo, ukuba akayi kukulahla na nawe lo, akwenze oko ebusweni bakho.”—Yobhi 1:8-11.
12. (a) Yiyiphi imibuzo eyayinokuphendulwa kuphela ukuba uThixo wayemvumela uSathana avavanye uYobhi? (b) Uvavanyo lukaYobhi lwaphumela kwintoni?
12 Ngaba uYobhi wayekhonza uYehova kuphela nje ngenxa yezinto ezilungileyo awayezifumene kuThixo? Ngaba ingqibelelo kaYobhi yayinokumelana nokuvavanywa? Kwelinye icala, ngaba uYehova wayemthembe ngokwaneleyo umkhonzi wakhe ukuba angamvumela avavanywe? Le mibuzo yayinokuphendulwa ukuba uYehova wayenokuvumela uSathana amvavanye ngokuqatha kangangoko uYobhi. Ikhondo likaYobhi lokuthembeka ngaphantsi kokuvavanywa okuvunyelwe nguThixo, njengokuba kubaliswa ngalo kwincwadi kaYobhi, langqineka libuthethelela ubulungisa bukaYehova nengqibelelo yomntu.—Yobhi 42:1, 2, 12.
13. Sibandakanyeke njani koko kwenzeka e-Eden nakuYobhi?
13 Noko ke, oko kwenzeka kumyezo wase-Eden nakwindoda enguYobhi, kunentsingiselo enzulu ngakumbi. Iimbambano ezaphakanyiswa nguSathana zibandakanya lonke uluntu, kuquka nathi namhlanje. Igama likaThixo lanyeliswa, yaye ulongamo lwakhe lwacelwa umngeni. Ukuthi tye kwendalo kaThixo, umntu, kwathandatyuzwa. Ezi mbambano kwakufuneka zizinziswe.
INDLELA YOKUZINZISA EZI MBAMBANO
14. Xa ejamelene nocelomngeni lwenkohlakalo, umntu otyholwayo unokwenza ntoni?
14 Ngokomzekelo, masithi ungumzali onothando onabantwana abaliqela kwintsapho eyonwabileyo. Kwenzeke omnye wabamelwane bakho asasaze ubuxoki, ekutyhola wena ngelithi ungumzali ongalunganga. Kuthekani ukuba lo mmelwane uthi abantwana bakho abakuthandi, bahlala nawe nje kuba bengenakwenza ngakumbi, yaye bangakushiya ukuba nje kunokubakho umntu onokubavulela elo thuba. Usenokuthi, ‘Bubuvuvu obo!’ Kulungile ke, kodwa ubuya kukungqina njani oko? Bambi abazali basenokuba nomsindo. Phezu kwazo nje iingxaki ezingakumbi eziya kubangelwa koku, ukusabela ngogonyamelo ngolo hlobo kuya kuxhasa obo buxoki. Indlela eyanelisayo yokusingatha ingxaki enjalo ibiya kuba kukuvula ithuba lokuba lowo ukutyholayo alingqine ibango lakhe nelokuba abantwana bakho bangqine ukuba bakuthanda ngokungazenzisiyo.
15. UYehova wakhetha ukulusingatha njani ucelomngeni lukaSathana?
15 UYehova unjengaloo mzali unothando. UAdam noEva banokufaniswa nabantwana, yaye uSathana uyafaneleka kwindawo yommelwane oxokayo. Ngobulumko uThixo akazange amtshabalalise ngoko nangoko uSathana, uAdam, noEva kodwa wavumela aba benzi bobubi baqhubeke bephila okwethutyana. Oku kwavumela abazali bethu bokuqala ithuba lokuqalisa intsapho yabantu, ibe kuye kwanika uMtyholi ithuba lokungqina enoba ibango lakhe laliyinyaniso kusini na ukuze ezi mbambano zizinziswe. Noko ke, kwasekuqaleni uThixo wayesazi ukuba abantu abathile babeya kunyaniseka kuye baze ngaloo ndlela bamngqine uSathana elixoki. Hayi indlela esinombulelo ngayo kuba uYehova eye waqhubeka esikelela yaye enceda abo bamthandayo!—2 Kronike 16:9; IMizekeliso 15:3.
KUNGQINEKE NTONI?
16. Ihlabathi liye laba semandleni kaSathana njani?
16 Phantse ebudeni bayo yonke imbali yabantu, uSathana ebekhululekile ukuqulunqa amaqhinga akhe okulawula abantu. Phakathi kwezinye izinto, ebenempembelelo kumagunya obupolitika yaye ebekhuthaza iinkonzo ngokuchuliweyo ezinqula yena kungekhona uYehova. Ngaloo ndlela uMtyholi uye waba ‘nguthixo weli phakade,’ yaye ubizwa ngokuba ‘ngumphathi walo eli hlabathi.’ (2 Korinte 4:4; Yohane 12:31) Eneneni, “ihlabathi liphela lilele kongendawo.” (1 Yohane 5:19) Ngaba oku kuthetha ukuba uSathana uye walingqina ibango lakhe lokuba angabakhukulisa bonke abantu bamshiye uYehova uThixo? Ngokuqinisekileyo akalingqinanga! Ngoxa evumele uSathana waqhubeka ephila, uYehova uye waqhubeka ezalisekisa injongo yakhe. Ngoko, iBhayibhile ityhila ntoni ngokuvumela kukaThixo ubungendawo?
17. Yintoni esifanele siyikhumbule ngokuphathelele unobangela wobungendawo nokubandezeleka?
17 Ubungendawo nokubandezeleka akubangelwa nguYehova. Ekubeni uSathana engumlawuli weli hlabathi nothixo wale nkqubo yezinto, nguye nabo bakwicala lakhe ababangele imeko elikuyo ibutho labantu nako konke ukubandezeleka abantu abaye bajamelana nako. Akukho namnye ngokufanelekileyo onokuthi uThixo ungunobangela wobunzima obunjalo.—Roma 9:14.
18. Ukuvumela kukaYehova ubungendawo nokubandezeleka kungqine ntoni ngengcamango yokuzimela geqe kuThixo?
18 Ukuvumela kukaYehova ubungendawo nokubandezeleka kuye kwangqina ukuba ukuzimela geqe kuThixo akuzisanga ihlabathi elilunge ngakumbi. Ngokungathandabuzekiyo, imbali ibizaliswe ziintlekele umhla nezolo. Isizathu soku kukuba abantu bakhethe ukusukela elabo ikhondo lokuzimela geqe yaye ababonisanga kulikhathalela ngokwenene iLizwi likaThixo nokuthanda kwakhe. Xa abantu bakaYehova bamandulo neenkokeli zabo ngokungathembeki basukela “ikhondo elithandwayo” baza balityeshela ilizwi lakhe, imiphumo yaba yintlekele. Ngomprofeti wakhe uYeremiya, uThixo wabaxelela oku: “Zidanile izilumko, ziqhiphuke umbilini, zibanjisiwe; yabona, ziyalicekisa ilizwi likaYehova; zinobulumko bukabani na ke?” (Yeremiya 8:5, 6, 9) Ekubeni uluntu ngokubanzi luye lwasilela ukulandela imilinganiselo kaYehova, lufana nenqanawa engenamphini wakuyiqhuba, elatyuziswa lulwandle olungazolanga.
19. Bubuphi ubungqina esinabo bokuba uSathana akanakukhukulisa bonke abantu bamshiye uThixo?
19 Kwakhona ukuvumela kukaThixo ubungendawo nokubandezeleka kuye kwangqina ukuba uSathana akakwazanga ukukhukulisa lonke uluntu lumshiye uYehova. Imbali ibonisa ukuba ngalo lonke ixesha bekukho abantu abaye bahlala bethembekile kuThixo kungakhathaliseki ukuba bebefikelwa zezinjani izihendo okanye iinkxwaleko. Ukutyhubela iinkulungwane, amandla kaYehova ebebonakaliswa ngenxa yabakhonzi bakhe, yaye igama lakhe liye lavakaliswa emhlabeni wonke. (Eksodus 9:16; 1 Samuweli 12:22) AmaHebhere isahluko 11 asixelela ngoludwe lwabantu abathembekileyo, kuquka uAbheli, uEnoki, uNowa, uAbraham, noMoses. AmaHebhere 12:1 ababiza ngokuthi ‘lilifu lamangqina.’ Babeyimizekelo yokholo olungaxengaxengiyo kuYehova. Nakula maxesha anamhlanje, abaninzi baye banikela ngobomi babo ngenxa yokubonakalisa ingqibelelo ngokungaxengaxengiyo kuThixo. Ngokholo nothando lwabo, abantu abanjalo bangqina ngokupheleleyo ukuba uSathana akanakukhukulisa bonke abantu bamshiye uThixo.
20. Ukuvumela kukaYehova ubungendawo nokubandezeleka kuqhubeke kungqine ntoni ngoThixo noluntu?
20 Okokugqibela, ukuvumela kukaYehova ubungendawo nokubandezeleka kuqhubeke kuye kwanikela ubungqina bokuba nguYehova, uMdali, kuphela onamandla nelungelo lokulawula uluntu ukuze lufumane iintsikelelo nolonwabo ngonaphakade. Kangangeenkulungwane, uluntu luye lwazama iintlobo ezininzi zoorhulumente. Kodwa uye waba yintoni umphumo? Iingxaki ezintsonkothileyo izizwe ezijamelene nazo namhlanje zibubungqina obaneleyo bokuba ngokwenene, njengokuba iBhayibhile ibonisa, ‘umntu uye wagunyazela umntu, kwaba kubi kuye.’ (INtshumayeli 8:9) NguYehova kuphela onokusihlangula aze aphumeze injongo yakhe yantlandlolo. Uya kukwenza njani oku, yaye nini?
21. Uya kwenziwa ntoni uSathana, yaye kuya kusetyenziswa bani ukuphumeza oku?
21 Kanye nje emva kokuba uAdam noEva baye bangamaxhoba eqhinga likaSathana, uThixo wavakalisa injongo Yakhe ngokuphathelele indlela yokusindisa. Wavakalisa oku uYehova ngoSathana: “Ndiya kumisa ubutshaba phakathi kwakho nomfazi, naphakathi kwembewu yakho nembewu yakhe; yona iya kukutyumza intloko, wena uya kuyityumza isithende.” (Genesis 3:15) Eso saziso saqinisekisa ukuba uMtyholi wayengayi kuvunyelwa enze izenzo zakhe ezibi ngonaphakade. NjengoKumkani woBukumkani obungoMesiya, iMbewu eThenjisiweyo, uYesu Kristu, iya ‘kutyumza intloko kaSathana.’ Ewe, “kamsinya,” uYesu uya kumtyumza umvukeli onguSathana!—Roma 16:20.
UYA KWENZA NTONI WENA?
22. (a) Yiyiphi imibuzo omele ujamelane nayo? (b) Nangona uSathana ekhuphela umsindo wakhe kwabo bathembekileyo kuThixo, banokuqiniseka ngantoni?
22 Ekubeni uzazi iimbambano ezibandakanyekileyo, uya kuma kwelikabani icala? Ngaba ngezenzo zakho uya kungqina ukuba ungumxhasi onyanisekileyo kaYehova? Ekubeni uSathana esazi ukuba ixesha lakhe lifutshane, uya kwenza konke okusemandleni akhe ukukhuphela umsindo wakhe kwabo bafuna ukugcina ingqibelelo kuThixo. (ISityhilelo 12:12) Kodwa unokufuna uncedo kuThixo ngenxa yokuba “iyakwazi iNkosi ukubahlangula ekuhendweni abahlonela uThixo.” (2 Petros 2:9) Akayi kuvumela ulingwe ngaphezu koko unokukunyamezela, ibe uya kukuvulela ithuba ukuze ukwazi ukunyamezela izilingo.—1 Korinte 10:13.
23. Yintoni esinokukhangela phambili kuyo ngolweyiseko?
23 Ngolweyiseko, masikhangele phambili kwixesha laxa uKumkani uYesu Kristu eya kuthabatha inyathelo nxamnye noSathana nabo bonke abamlandelayo. (ISityhilelo 20:1-3) UYesu uya kuphelisa bonke abo babekek’ ityala ngeenkxwaleko neziphithiphithi eziye zabandezela uluntu. De kufike elo xesha, enye indlela esibandezeleka kabuhlungu ngokukhethekileyo ngayo kukufelwa ngabantu esibathandayo. Funda isahluko esilandelayo ukuze ufumanise oko kwenzekayo kubo.
HLOLA ULWAZI LWAKHO
Sazi njani ukuba uYehova akabangeli ukubandezeleka kwabantu?
Ziziphi iimbambano ezaphakanyiswa nguSathana e-Eden zaza zenziwa zacaca ngomhla kaYobhi?
Ukuvumela kukaThixo ukubandezeleka kungqine ntoni?