Isahluko 1
Unokuba Nekamva Elonwabisayo!
1, 2. UMdali wakho ufuna ufumane ntoni?
UKWANGIWA ngobubele ngumntu omthandayo. Ukuhleka kube buhlungu iintumbu ebudeni besidlo esimnandi nabahlobo abasenyongweni. Uyolo lokubukela abantwana bakho bedlala bonwabile. Amathuba afana nala enza ubomi bube myoli. Noko ke, kwabaninzi ubomi bubonakala busizisa iingxaki ezinkulu umhla nezolo. Ukuba nakuwe kunjalo, ungalahli ithemba.
2 Ukuthanda kukaThixo kukuba unandiphe ulonwabo olungapheliyo ngaphantsi kwezona meko zilungileyo kwimeko-bume entle. Eli asilophupha nje, kuba uThixo ukunika isitshixo sekamva elonwabisayo elinjalo. Eso sitshixo lulwazi.
3. Luluphi ulwazi olusisitshixo solonwabo, ibe kutheni sinokuqiniseka ukuba uThixo unokusinika olo lwazi?
3 Sithetha ngolwazi olukhethekileyo olubalasele ngakumbi kunobulumko babantu. Olo lwazi ‘kukumazi uThixo.’ (IMizekeliso 2:5) Phantse kwiminyaka engama-2 000 eyadlulayo, umbhali weBhayibhile wathi: “Yonke into eyindlu inoyakhayo; ke lowo wazakhayo zonke izinto nguThixo.” (Hebhere 3:4) Khawucinge ngolwazi amele ukuba uMenzi wezinto zonke unalo! IBhayibhile ithi uThixo ubala aze abize ngamagama zonke iinkwenkwezi. Enjani ukothusa ingcamango, ekubeni kukho amakhulu amawaka ezigidi zeenkwenkwezi kumnyele wethu kuphela, ibe izazi ngeenkwenkwezi zithi kukho eminye iminyele emalunga nekhulu lamawaka ezigidi! (INdumiso 147:4) Kwakhona uThixo wazi yonke into ngathi, ngoko ngubani omnye onokunikela iimpendulo ezilunge ngakumbi ngemibuzo ebalulekileyo ngobomi?—Mateyu 10:30.
4. Kutheni sifanele silindele ukuba uThixo asinike imiyalelo yokusikhokela, yaye yiyiphi incwadi eyanelisa loo ntswelo?
4 Khawube nomfanekiso-ngqondweni wamadoda amabini ezama ukulungisa iinqwelo-mafutha zawo. Icaphuka, enye indoda ilahla phantsi izixhobo zayo zokulungisa. Enye izolile iyayilungisa ingxaki, ijike isitshixo, ize incume njengoko injini isabela ize idume kamnandi. Akunakuba nzima ukuthelekelela ukuba yiyiphi kula madoda mabini ebinencwadi yokulungisa loo nqwelo-mafutha evela kumenzi wayo. Ngaba akukho ngqiqweni ukuba uThixo ebeya kulungiselela imiyalelo yokusikhokela ebomini? Njengokuba usenokuba uyazi, iBhayibhile izibanga injalo—iyincwadi yemiyalelo nokhokelo evela kuMdali wethu, eyenzelwe ukusinika ulwazi ngoThixo.—2 Timoti 3:16.
5. Luxabiseke kangakanani ulwazi oluseBhayibhileni?
5 Ukuba eli bango leBhayibhile liyinyaniso, cinga ngobutyebi bolwazi loo ncwadi emele ukuba inabo! KwiMizekeliso 2:1-5, isibongoza ukuba sifune ubulumko, sibumbe njengokuba besiya kwenza xa besifuna ubutyebi obufihliweyo—kungekhona emhlabeni oziingcinga zabantu, kodwa eLizwini likaThixo. Ukuba sikhangela apho, siya ‘kufumana ukumazi uThixo.’ Ekubeni uThixo eziqonda iintsilelo neentswelo zethu, usinika imiyalelo eya kusinceda siphile ubomi ngoxolo, sonwabile. (INdumiso 103:14; Isaya 48:17) Ukongezelela, ulwazi ngoThixo lusinika iindaba ezilungileyo ezichulumancisayo.
UBOMI OBUNGUNAPHAKADE!
6. Sisiphi isiqinisekiso uYesu Kristu awasinikelayo ngokuphathelele ulwazi ngoThixo?
6 Umntu odumileyo embalini uYesu Kristu wayichaza ngokucacileyo le nkalo yokwazi uThixo. Wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” (Yohane 17:3, akekeliswe sithi.) Khawufan’ ucinge—ulwazi olukhokelela kubomi obungunaphakade!
7. Bubuphi ubungqina obukhoyo bokuba uThixo wayengenanjongo yokuba sife?
7 Ungakhawulezi ubugatye ubomi obungunaphakade ngelithi liphupha nje. Kunoko, khangela indlela umzimba womntu owenziwe ngayo. Uyilwe ngendlela ebalaseleyo ukuba ukwazi ukungcamla, ukuva, ukujoja, ukubona, nokuchukumisa. Zininzi gqitha emhlabeni izinto ezivuyisayo kwizivamvo zethu—ukudla okuluncuthu, iingoma ezimyoli zeentaka, iintyatyambo ezinevumba elimnandi, iindawo ezibukekayo, ubuqabane obonwabisayo! Yaye ingqondo yethu emangalisayo igqwesa neyona khompyutha ibalaseleyo, kuba isinceda siziqonde size sizinandiphe zonke ezo zinto. Ngaba ucinga ukuba uMdali wethu ufuna sife size silahlekelwe kuko konke oku? Ngaba bekungayi kuba sengqiqweni ngakumbi ukugqiba kwelokuba ufuna siphile ngolonwabo size sinandiphe ubomi ngonaphakade? Kaloku, ezo zizinto onokuzifumana ngokwazi uThixo.
UBOMI EPARADISI
8. Ithini iBhayibhile ngekamva loluntu?
8 Okuthethwa yiBhayibhile ngekamva lomhlaba noluntu kunokushwankathelwa ngegama elinye—iParadisi! UYesu Kristu wathetha ngayo xa waxelela indoda eyayisifa oku: “Uya kuba nam eParadisi.” (Luka 23:43) Ukukhankanywa kweParadisi ngokungathandabuzekiyo kwakhumbuza loo ndoda ngendlela ababonwabe ngayo abazali bethu bokuqala, uAdam noEva. Xa uThixo wabadalayo, babefezekile yaye bephila kwipaki efana nomyezo eyayiyilwe nguMdali waza wayityala. Ngokufanelekileyo yayibizwa ngokuba ngumyezo wase-Eden, gama elo elithetha uyolo.
9. Kwakunjani ukuphila kwiParadisi yantlandlolo?
9 Hayi indlela ekwakumnandi ngayo kuloo myezo! Wawuyiparadisi yokwenene. Phakathi kwemithi yawo emihle kwakukho leyo yayithwala iziqhamo ezimnandi. Njengoko uAdam noEva babehlola umhlaba ababewunikiwe, besela amanzi awo amnandi, yaye bevuna iziqhamo emithini yawo, babengenasizathu sakuxhalaba okanye sakoyika. Kwanezilwanyana zazingeyongozi, kuba uThixo wayebeke indoda nomfazi ukuba bazilawule ngothando zonke. Ukongezelela, isibini sokuqala esingabantu sasingabikwa hlaba. Ukuba nje sasiya kuhlala sithobela uThixo, sasiya kufumana ikamva elingunaphakade nelonwabisayo. Sasinikwe umsebenzi owanelisayo wokunyamekela ikhaya laso elihle eliyiParadisi. Ngaphezu koko, uThixo wanika uAdam noEva igunya ‘lokuzalisa umhlaba baweyise.’ Bona nenzala yabo babemele bandise imida yeParadisi de isijikelezi-langa sethu siphela sibe yindawo entle neyolonwabo.—Genesis 1:28.
10. Xa uYesu wayethetha ngeParadisi, wayecinga ngantoni?
10 Noko ke, xa uYesu wayekhankanya iParadisi, wayengathi loo ndoda yayisifa mayicinge ngezinto zamandulo. Kunoko, uYesu wayethetha ngekamva! Wayesazi ukuba ikhaya lethu elingumhlaba lonke laliya kuba yiparadisi. Ngaloo ndlela uThixo wayeya kuyizalisekisa injongo yakhe yantlandlolo ngoluntu nangomhlaba wethu. (Isaya 55:10, 11) Ewe, iParadisi iya kubuyiselwa! Yaye iya kuba njani? Masivumele iLizwi likaThixo, iBhayibhile Engcwele, liphendule.
UBOMI KWIPARADISI EBUYISELWEYO
11. KwiParadisi ebuyiselweyo, kuya kwenzeka ntoni kwezi zinto, ukugula, ukwaluphala nokufa?
11 Ukugula, ukwaluphala, nokufa akusayi kubakho. “Aya kuvulwa amehlo eemfama, zivulwe iindlebe zezithulu; size sitsibe njengexhama isiqhwala, lumemelele ulwimi lwesidenge.” (Isaya 35:5, 6) “UThixo abe [nabantu], . . . azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”—ISityhilelo 21:3, 4.
12. Kutheni sinokuqiniseka ukuba aluyi kubakho ulwaphulo-mthetho, ugonyamelo nobungendawo kwiParadisi ezayo?
12 Ulwaphulo-mthetho, ugonyamelo nobungendawo buya kuphela ngonaphakade. “Abenzi bobubi baya kunqunyulwa . . . Kusaya kuba mzuzwana, angabikho ongendawo . . . angabikho. Ke bona abalulamileyo baya kulidla ilifa ilizwe.” (INdumiso 37:9-11) “Banqunyulwe ezweni abangendawo, abanginizayo bancothulwe kulo.”—IMizekeliso 2:22.
13. UThixo uya kuluzisa njani uxolo?
13 Kuya kugquba uxolo emhlabeni wonke. “[UThixo] ulophelisa iimfazwe kude kuse eziphelweni zehlabathi; waphula isaphetha, angqumze umkhonto.” (INdumiso 46:9) “Malityatyambe ngemihla yakhe ilungisa, nobuninzi boxolo, ide ingabi sabakho inyanga.”—INdumiso 72:7.
14, 15. Ithini iBhayibhile ngezindlu, umsebenzi nokudla kwiParadisi ebuyiselweyo?
14 Izindlu ngokuqinisekileyo ziya kufumaneka nemisebenzi yanelise. “Baya kwakha izindlu, bazihlale . . . Abayi kwakha, kuhlale bambi; abayi kutyala, kudle bambi; kuba iya kuba njengemihla yomthi imihla yabantu bam, badle into esetyenzwe zizandla zabo abanyulwa bam. Abayi kuzixhamla ngokulambathayo, bazalele ukhwankqiso.”—Isaya 65:21-23.
15 Kuya kubakho intabalala yokudla okusempilweni. “Makubekho intabalala yengqolowa ezweni, ise encotsheni yeentaba.” (INdumiso 72:16) “Umhlaba uyivelisile indyebo yawo; uya kusisikelela uThixo, uThixo wethu.”—INdumiso 67:6.
16. Kutheni ubomi buya kuba mnandi eParadisi?
16 Ubomi obungunaphakade kumhlaba oyiparadisi buya kuchulumancisa. “Amalungisa aya kulidla ilifa ilizwe, ahlale kulo ngonaphakade.” (INdumiso 37:29) “Inemihlali intlango nomqwebedu; iyagcoba inkqantosi, iyadubula njengomfiyo.”—Isaya 35:1.
ULWAZI NEKAMVA LAKHO
17. (a) Ufanele wenze ntoni ukuba unomdla kubomi eParadisi? (b) Sazi njani ukuba uThixo uya kwenza iinguqu eziphawulekayo emhlabeni?
17 Ukuba unomdla kubomi eParadisi, musa ukuvumela nantoni na ikuthintele ekufumaneni ulwazi ngoThixo. Uyaluthanda uluntu ibe uya kuzisa iinguqulelo ezifunekayo ukuze umhlaba ube yiparadisi. Ngapha koko, ukuba ubunamandla okuphelisa intlupheko nokungabikho kokusesikweni okuxhaphakileyo kweli hlabathi, ngaba ubungayi kwenjenjalo? Ngaba besingayi kulindela ukuba uThixo enjenjalo? Eneneni, iBhayibhile ilichaza ngokucacileyo ixesha laxa uThixo eya kuyiphelisa le nkqubo izaliswe lukruthakruthwano aze ayithabathele indawo ngolawulo olugqibeleleyo nolobulungisa. (Daniyeli 2:44) Kodwa iBhayibhile ayipheleli nje ngokusixelela ngoku. Isibonisa indlela esinokusindela ngayo kwihlabathi likaThixo elitsha elithenjisiweyo.—2 Petros 3:13; 1 Yohane 2:17.
18. Ulwazi ngoThixo lunokukwenzela ntoni ngoku?
18 Ulwazi ngoThixo lunokukwenzela lukhulu kwanangoku. IBhayibhile inikela iimpendulo kweyona mibuzo inzulu nekhathazayo ngobomi. Ukwamkela ukhokelo lwayo kuya kukunceda wakhe ubuhlobo noThixo. Elinjani lona ukuzuka ilungelo! Ibe oku kuya kukunceda unandiphe uxolo olufumaneka kuThixo kuphela. (Roma 15:13, 33) Njengoko uqalisa ukungenisa olu lwazi lubalulekileyo, uqalisa owona mzamo ubalulekileyo nonomvuzo ebomini bakho. Akusayi kuze uzisole ngokuzuza ulwazi ngoThixo olukhokelela kubomi obungunaphakade.
19. Nguwuphi umbuzo esiza kuwuqwalasela kwisahluko esilandelayo?
19 Siye sabhekisela eBhayibhileni njengencwadi equlethe ulwazi ngoThixo. Kodwa, sazi njani ukuba asiyoncwadi yobulumko babantu, kodwa ivela kumthombo ongentla kunabo? Kwisahluko esilandelayo siza kuqwalasela lo mbuzo.
HLOLA ULWAZI LWAKHO
Kutheni ulwazi ngoThixo lunokukukhokelela kulonwabo olungunaphakade?
Buya kuba njani ubomi kwiParadisi yasemhlabeni ezayo?
Kutheni uya kungenelwa ngokungenisa ulwazi ngoThixo ngoku?