Indlela Yokufumana Uvuyo Ekwenzeni Abafundi
OLUNYE lolona vuyo lukhulu lunokufunyanwa ngumntu kukusebenza noThixo. Namhlanje, umsebenzi kaThixo uquka ukuhlanganisela abantu abaneentliziyo ezilungileyo kwibandla lamaKristu nokubaqeqesha ukuze baphile njengamaKristu ngoku kwanokuze basindele kwihlabathi elitsha.—Mika 4:1-4; Mateyu 28:19, 20; 2 Petros 3:13.
Kube ngunobangela wovuyo olukhulu kumaNgqina kaYehova aseMzantsi Merika ukubona abantu abasisigidi besiba ngabafundi bakaYesu Kristu ukususela ngowe-1980. Kule ntsimi ichumileyo, enabantu abaninzi abayihlonelayo nabayikholelwayo iBhayibhile, bambi abalungiseleli bexesha elizeleyo baye bakwazi ukunceda abaninzi bahlulele ubomi babo kuYehova. Ngenxa yokuba namava angako, mhlawumbi banokusixelela okuthile ngovuyo lokwenza abafundi. Wambi amacebiso abo asenokukunceda ufumane uvuyo ekwenzeni abafundi kwindawo ohlala kuyo.
Ukubona Osenokuba “Yimvu”
Xa wayethuma abapostile bakhe ukuya kushumayela, uYesu wathi: “Emzini ke enithe nangena kuwo, nokuba kusemzaneni, ize nibuzise ukuba ngubani na kuwo ofanelekileyo.” (Mateyu 10:11) Xa utyelela abantu, unokubabona njani abo banokuncedwa ngokomoya? UEdward, oneminyaka engaphezu kwama-50 engumlungiseleli wexesha elizeleyo, uthi: “Babonakala ngemibuzo yabo esuka entliziyweni nangokwaneliseka xa befumana iimpendulo eziphuma eZibhalweni.” UCarol wongezelela ngelithi: “Ukuba umntu undichazela ingxaki yobuqu okanye into emkhathazayo, eneneni ucela uncedo. Ndiye ndizame ukufumana inkcazelo enokumnceda kwiimpapasho zeWatch Tower Society. Ukubonakalisa umdla onjalo kuye kudla ngokukhokelela kwisifundo seBhayibhile.” Ukanti, akusoloko kulula ukubabona abanyanisekileyo. ULuis uthi: “Abathile ababebonakala benomdla kakhulu baye bangabi namdla konke konke ekugqibeleni, kodwa abanye ababebonakala bechasa ekuqaleni bayaguquka xa besiva oko ngenene kuthethwa yiBhayibhile.” Ekubeni inkoliso yabemi baseMzantsi Merika beyihlonela iBhayibhile, wongezelela ngelithi, “Abo banokuncedwa ngokomoya ndibabona ngokukwamkela ngoko nangoko oko kufundiswa yiBhayibhile emva kokuba ndibabonisile.” Ukunceda ‘abafanelekileyo’ abanjalo ukuba benze inkqubela ngokomoya kuzisa uvuyo nolwaneliseko lokwenene. Unokukwenza njani oku?
Ukuqalisa Isifundo SeBhayibhile
Ukusebenzisa iimpapasho zokufundisisa iBhayibhile ‘zomkhonzi othembekileyo noqondayo’ ngokuqhelekileyo yeyona ndlela iphumelelayo yokunceda abantu baqonde inyaniso yeBhayibhile. (Mateyu 24:45) Unokulwakha njani uxabiso ngokubaluleka kwezo mpapasho zokufundisisa iBhayibhile? UEdward uthi: “Ekubeni iimeko, ubuntu neembono zabantu zingafani, ndiye ndizame ukuba bhetyebhetye xa ndiqalisa isifundo.” Akunakusebenzisa indlela enye kumntu wonke.
Kwabathile, kusenokufuneka iingxubusho zeZibhalo eziliqela ezingacwangciswanga ngaphambi kokubanika impapasho yokufundisisa iBhayibhile. Noko ke, esinye isibini esitshatileyo esingabavangeli basemazweni siyabalisa: “Ngokuqhelekileyo siye sicele isifundo kutyelelo lokuqala.” Ngokufanayo, elinye iNgqina elincede abantu abangama-55 bafikelele kwinqanaba lokuzahlulela lithi: “Eyona ndlela ndiziqalisa ngayo izifundo zeBhayibhile kukusebenzisa incwadi ethi Unokuphila Ngonaphakade KwiParadisi Esemhlabeni zisuka nje.” Nangona bambi bengakuthandi ukufundisisa, abanye bayakulangazelela ukufundisisa nantoni na abakholelwa ukuba iya kubanceda ebomini. Isicelo sesifundo seBhayibhile sesisa kumakhaya abo ngokufuthi siba nomtsalane kwabanjalo. Abanye abavangeli basemazweni baye bachaze izinto ezithile ngesi sifundo baze bathi: “Ndingathanda ukukubonisa indlela esisiqhuba ngayo. Ukuba uyathanda, usenokuqhubeka. Ukuba akuthandi, ixhomekeke kuwe loo nto.” Xa kubekwe ngolo hlobo, abantu abakoyiki ukusamkela.
Elinye iNgqina, elincede abaninzi abasweleyo nabangafundanga kangako, lithi: “Ndikufumanise kuluncedo kakhulu ukusebenzisa amaphecana ukuqalisa izifundo zeBhayibhile.” Enoba basebenzisa yiphi impapasho, abafundisi bexesha elizeleyo ngokuyintloko baye bazame ukugxininisa kwiBhayibhile. UCarola uthi: “Kwisifundo sokuqala, ndiye ndisebenzise imifanekiso nezibhalo ezimalunga nesihlanu kuphela, ukuze iingongoma eziziintloko zicace nokuze iBhayibhile ingabonakali inzima.”
Ukugcina Umntu Enomdla
Abantu bayakuthanda ukubona ukuba benza inkqubela, ngoko uJennifer ucebisa oku: “Senze sibangele umdla isifundo. Musa ukuma ndawonye.” Ukusiqhuba rhoqo isifundo yaye ungaqakathi veki kuyabanceda bavakalelwe kukuba abamanga ndawonye. Uvulindlela okhethekileyo owakhulela emaphandleni uchaza indlela ekubaluleke ngayo ukusebenzisa iingcaciso ezilula nokunamathela kwiingongoma eziziintloko, ukuze nabo bangafundanga kangako benze inkqubela. Uthi: “Kwilali yam, kwakufuneka siwufefe ngamanzi umhlaba emva kokutyala imbewu. Ukuba sasinokunkcenkceshela kakhulu, umhlaba wawunokugangatheka ide imbewu ingakwazi ukuntshula, ize ife. Ngokufanayo, ukuba umdidiyela ngeengongoma ezininzi osandul’ ukuba nomdla, kusenokubonakala kunzima gqitha kuye aze anikezele.” Kwanabantu abathanda ukubuza kufuneka bafunde ukunamathela kumbandela omnye ngexesha ukuba baza kwenza inkqubela elwazini. UYesu wathi kubapostile bakhe: “Ndisenezinto ezininzi zokuthetha kuni, kodwa aninako ukuzithwala ngoku.”—Yohane 16:12.
Enye indlela yokugcina umntu enomdla kukumkhuthaza ukuba aqhubeke ecinga ngeLizwi likaThixo kwanasemva kokuba umkile. UYolanda ucebisa oku: “Bashiye nombuzo ojingayo. Bashiyele umsebenzi abafanele bawenze ngoxa ungekho, njengokufunda inxalenye ethile yeBhayibhile okanye ukuphanda umbandela onokuthanani nabo.”
Ukuhlakulela Uthando NgoYehova
Uvuyo lwakho luya kukhula xa ubanceda abantu obafundisayo babe ‘ngabenzi belizwi, bangabi ngabaphulaphuli kodwa.’ (Yakobi 1:22) Unokukwenza njani oko? AmaKristu okwenyaniso aqhutywa luthando ngoYehova. UPedro, waseMexico, uyachaza: “Abantu abakwazi kumthanda umntu abangamaziyo, ngoko kwasekuqaleni kwesifundo sethu, ndibafundisa igama likaThixo ngokusuka eBhayibhileni, yaye ndiye ndifune amathuba okugxininisa iimpawu zikaYehova.” Ebudeni bencoko, unokwakha uxabiso ngoYehova ngokubonakalisa indlela ovakalelwa ngayo ngaye. UElizabeth uthi: “Maxa onke ndiye ndizame ukukukhankanya ukulunga kukaYehova. Ebudeni besifundo, ukuba ndibona intyatyambo entle, intaka entle, okanye intshontsho lekati elidlalayo, ndisoloko ndikukhankanya ukuba oko kungumsebenzi kaYehova.” UJennifer ucebisa oku: “Thetha ngehlabathi likaThixo elitsha alithembisileyo njengento yokoqobo ngokolwazi lwakho. Babuze izinto abangathanda ukuzenza kwihlabathi elitsha.”
Xa umntu ecamngca enoxabiso ngoko akufundayo ngoYehova, kungena nzulu entliziyweni yakhe kuze kumshukumisele ekwenzeni okuthile. Kodwa akanako ukucamngca ngaphandle kokuba unokuthile akukhumbulayo. Ukwenza impinda emfutshane ngeengongoma eziziintloko ezintathu okanye ezine emva kwesifundo ngasinye kuya kumnceda angalibali. Abafundisi beBhayibhile abaninzi baye babakhuthaze abasebatsha ukuba bazibhale phantsi izibhalo eziziintloko kunye nenkcazelo ngasemva kwiiBhayibhile zabo. Umvangeli wasemazweni waseNgilani uchaza enye ingenelo yokwenza impinda: “Ndiye ndibabuze indlela ebancede ngayo inkcazelo leyo. Oku kubenza bacamngce benoxabiso ngeendlela nemithetho kaYehova.”
Elinye iNgqina elithembekileyo elaphumelela kwiklasi yesithathu yaseGiliyadi lithi: “Kufuneka sibe nenzondelelo. Abantu esibafundisayo bamele bazibonele ukuba siyakukholelwa oko sikufundisayo.” Ukholo olukwenze waba “ngumenzi womsebenzi” owonwabileyo unokulwasulela kwabanye ukuba uyalubonakalisa.—Yakobi 1:25.
Elinye iNgqina elincede abaninzi banqule uYehova lithi: “Ndifumanisa ukuba abantu baziva besondele kuThixo ukuba ndiyabanceda babone ukuba imithandazo yabo iyaphendulwa. Ndiye ndibazekelisele ngamava am obuqu, njengala athi: Ekufikeni kwam neqabane lam kwisabelo sethu esitsha njengoovulindlela, sasinemifuno engephi, ibhotolo, yaye singenamali. Sakugqibezela oko kutya kwisidlo sethu sangokuhlwa saza sathi, ‘Ngoku asizokuba nanto yakutya ngomso.’ Sakuthandazela oku, saza salala. Ekuseni ngentsasa elandelayo kwafika elinye iNgqina lasekuhlaleni laza lazazisa, lisithi, ‘Bendithandazela ukuba uYehova asithumelele oovulindlela. Ngoku ndinokuhamba nani phantse imini yonke, kodwa ekubeni ndihlala emaphandleni, kuza kufuneka ndisidle kunye nani isidlo sasemini, ngoko ndiziphathele ukutya okunokusanela sonke.’ Kwakukho inyama eninzi nemifuno. Ndisoloko ndibaxelela abantu endifunda nabo ukuba uYehova akaze asilahle ukuba sifuna uBukumkani bakhe kuqala.”—Mateyu 6:33.
Nikela Uncedo Olusebenzisekayo
Ukwenza abafundi bakaKristu akuphelelanga nje ekuqhubeni izifundo zeBhayibhile. Umvangeli wasemazweni owakhonza iminyaka emininzi njengomveleli ohambahambayo uthi: “Chitha ixesha kunye nabo. Musa ukukhawuleza uhambe emva kokuqhuba isifundo. Ukuba iimeko ziyavuma, hlala uze uncokole okwethutyana.” UElizabeth uthi: “Ndibonakalisa umdla kubo kuba ubomi babo bubandakanyekile. Amaxesha amaninzi ndiyazikhathaza ngabo ngokungathi ngabantwana bam.” Amanye amaNgqina anikela la macebiso: “Batyelele xa begula.” “Xa uselumelwaneni, ngokomzekelo kubulungiseleli basentsimini, batyelele ngokufutshane ukuze ubazise kwamanye amaNgqina.” UEva uthi: “Phulaphula ngenyameko ukuze uyiqonde imvelaphi nemeko yobomi yaloo mntu. Ezo zinto ziyayichaphazela indlela abantu abasabela ngayo kwinyaniso yaye zinokubathintela ekwenzeni inkqubela. Yiba ngumhlobo wabo, ukuze bakwazi ukukuthemba ukuba bangathetha nawe ngeengxaki zabo.” UCarol wongezelela ngelithi: “Umdla wokwenene kuloo mntu ubalulekile ekubeni iinguqulelo eziya kubangelwa yinyaniso ebomini bakhe maxa wambi ziya kumenza aphulukane namalungu entsapho nabahlobo. Ngokuqhelekile, kuhle ukuba lowo ufundelwayo ayazi indawo esihlala kuyo yaye angoyiki ukuza kuthi nanini na.” Mncede aligqale ibandla njengentsapho yakhe entsha.—Mateyu 10:35; Marko 10:29, 30.
UYolanda uthi: “Kuphaphele ukubanika uncedo olusebenzisekayo. Hlala kunye nabo kwiintlanganiso, uze ubancede ngabantwana babo.” Ukubonisa abasebatsha indlela yokuqeqesha abantwana babo, ukuphucula imilinganiselo yabo yococeko, ukulungiselela amagqabaza asezintlanganisweni, nokunikela iintetho kwiSikolo Sobulungiseleli Sobuthixo konke oku kuyinxalenye yomsebenzi wokwenza abafundi. Omnye udade wongezelela ngelithi: “Kubalulekile ukubaqeqeshela ubulungiseleli abasebatsha. Xa ityeshelwa le nkalo yoqeqesho, bambi bahlala bewoyika umsebenzi wokushumayela, baphulukane novuyo lwabo enkonzweni kaYehova, baze bangakwazi ukunyamezela.” Ngoko baqeqeshe kakuhle kumsebenzi wendlu ngendlu, ekwenzeni amabuyelo, nasekuqaliseni izifundo zeBhayibhile. Uvuyo lwakho luya kuba lukhulu xa ubona lowo ufunda naye esenza inkqubela ngoncedo nokhokelo lwakho.
Bomeleze Ukuze Banyamezele
Omnye umenzi wabafundi onamava ulumkisa ngelithi: “Kukho utyekelo lokungafundisisi xa umfundi ebhaptiziwe.” Umfundisi nomfundi bamele bakhumbule ukuba umKristu osandul’ ukubhaptizwa akakakhuli ngokomoya. Kusafuneka akhulise ukholo lwakhe, uxabiso lwakhe ngemithetho kaThixo nothando lwakhe ngoYehova. Kubalulekile ukumkhuthaza ukuba ahlakulele umkhwa omhle wofundisiso lobuqu ukuze aqhubeke esenza inkqubela.—1 Timoti 4:15.
Osemtsha usenokufuna uncedo ukuze enze inkqubela nokuze abe lilungu elinomoya wokubuk’ iindwendwe kumanyano lobuzalwana. Usenokufuna ukhokelo ekuhlangabezaneni nokungafezeki kwabazalwana njengoko esondelelana ngakumbi nabo. (Mateyu 18:15-35) Usenokufuna uncedo lokuba ngumfundisi onobuchule, akwazi ukuzenzela uphando. Omnye umvangeli wasemazweni uyabalisa: “Emva kokuba ebhaptiziwe omnye umfundi wayefuna ukuphucula ubuchule bakhe bokufundisa, ngoko wathi kum, ‘Kufuneka ndiqhube isifundo esitsha kule veki izayo, kodwa kufuneka ndizikhumbuze ngezahluko zokuqala endandizifundisisile. Ngaba ungandinceda ngokufundisisa ezi zahluko kunye nam kwakhona, sibe sinye ngexesha, ukuze ndizibhale phantsi iinkcazelo zezibhalo nemizekeliso, ndize ndikwazi ukuzisebenzisa xa ndisiya kumntu endifunda naye?’ Sithetha nje ungumfundisi osemagqabini, abantu abane abefunda nabo baye babhaptizwa kwenye indibano.”
Kutheni Ukwenza Abafundi Kufuna Umgudu
UPamela uthi: “Ukwenza abafundi kuthetha ukwenza abadumisi bakaYehova abangakumbi. Kuthetha ubomi kwabo bayamkelayo inyaniso. Ndikuthanda gqitha ukufundisa abanye inyaniso—kumnandi gqitha! Uye ubabone abafundi bekhula ngokuthe ngcembe, besenza iinguqulelo ebomini babo yaye besoyisa imiqobo ebinokubonakala ingenakushenxa ngaphandle koncedo lomoya kaYehova. Inkoliso yabo baye bamthanda uYehova baye bangabahlobo bam abasenyongweni.”
Omnye umvangeli wasemazweni waseJamani uthi: “Xa ndicinga ngabo ndiye ndabanceda baba ngabafundi, ndiye ndibone abantu abaneentloni abaye benza inkqubela engathethekiyo njengabalungiseleli bakaThixo kangangokuba akukholeleki. Ndiye ndibone abantu aboyise imiqobo enzima, ngokucacileyo ngoncedo lukaYehova. Ndiye ndibone iintsapho ezazikade ziqhekekile kodwa ezimanyeneyo sithetha nje—abantwana abonwabileyo nabazali abanenkathalo. Ndiye ndibone abantu benandipha ubomi obunentsingiselo, bedumisa uYehova. Olu luvuyo lokwenza abafundi.”
Ewe, ukusebenza kunye noYehova uThixo kumsebenzi wokwenza abafundi kungumthombo wovuyo olungenakuthelekiswa nanto. Amava abavangeli basemazweni nawoovulindlela akungqinile oku. Nawe unokulufumana olo vuyo nolwaneliseko ukuba uyawasebenzisa la macebiso uze uzibhokoxe ngomphefumlo uphela. Ngentsikelelo kaYehova, uvuyo lwakho luya kufezeka.—IMizekeliso 10:22; 1 Korinte 15:58.