“Nambathe Ubuntu Obutsha”
1 AmaKristu ayakuxabisa ukwazi inyaniso! Siye safunda ngendlela yokuphila ukuze siphephe ikhondo labo basehlabathini. Ekubeni ‘behlukanisiwe nobomi bukaThixo, basebumnyameni ngengqondo.’ (Efe. 4:18) Sifundiswe ukuba zahluke iingcinga zethu kwindlela yehlabathi yokucinga ngokuhluba ubuntu obudala sambathe obutsha.—Efe. 4:22-24.
2 Ubuntu obudala bukhokelela kwikhondo eliqhubekayo neliwohlokileyo lemilinganiselo yokuziphatha, nto leyo ephumela ekungcoleni nasekufeni. Ngoko ke, sihlab’ ikhwelo kwabo baphulaphula isigidimi soBukumkani ukuba bakhwelele ingqumbo, umsindo, ububi, intetho etshabhisayo, nentetho engamanyala. Abo banqwenela inkoloseko kaThixo bamele babulahle kude ubuntu obudala ngokusisigxina nangokupheleleyo—ngendlela ebebeya kusikhulula ngayo isambatho esimdaka.—Kol. 3:8, 9.
3 Amandla Amatsha Aqhuba Ingqondo: Ukwambatha ubuntu obutsha kubandakanya ukwenziwa mtsha kumandla aqhuba ingqondo yethu. (Efe. 4:23) Ubani uwafumana njani loo mandla, okanye isimo sengqondo, esitsha ukuze atyekele kwicala elilungileyo? Oku kwenziwa ngokufundisisa iLizwi likaThixo rhoqo ngenkuthalo nangokucamgca ngoko likuthethayo. Ngaloo ndlela, umntu ucinga ngenye indlela, abone izinto ngendlela kaThixo noKristu. Ubomi bukabani buyaguquka njengokuba ezambathisa ngobuntu obuneempawu zikaKristu, eziquka imfesane, ububele, ukuthobeka kwengqondo, ubulali, ukuzeka kade umsindo, nothando.—Kol. 3:10, 12-14.
4 Ngokwambatha ubuntu obutsha, siyazahlula ehlabathini. Indlela esiphila ngayo isenza sahluke. Sithetha inyaniso yaye sisebenzisa intetho eyakhayo ukuze sakhe abanye. Siyawulawula umsindo, ubukrakra bolunya, nokungxola, intetho etshabhisayo, nabo bonke ububi kuze konke oko kuthatyathelw’ indawo ziimpawu zobuthixo, ezinobulungisa. Sidlulela ngaphaya koko kufunwayo kuthi ngokuba ngabaxolelayo. Konke oku kwenziwa ngokusuka entliziyweni.—Efe. 4:25-32.
5 Ungaze ubulahle ubuntu obutsha. Asinakuze simkhonze ngokwamkelekileyo uYehova ngaphandle kwabo. Buvumele buncede abantu ngokubatsalela enyanisweni, yaye ubuvumele buzukise uYehova, uMdali wobuntu bethu obutsha obumangalisayo.—Efe. 4:24.