Ukukhumbula Iintsuku ZikaYesu Zokugqibela Emhlabeni

LUSUKU lwesixhenxe lwenyanga yamaYuda uNisan ngonyaka wama-33 C.E. Yiba nomfanekiso-ngqondweni ubukele iziganeko kwiphondo laseRoma kwaYuda. Enduluka eYeriko indawo echumileyo, uYesu Kristu nabafundi bakhe bagangatha kulo ndlela yomhlaba, nenamajiko-jiko. Nabanye abahambi abaninzi basendleleni eya eYerusalem ukuya kubhiyozela iPasika yaminyaka le. Noko ke, kukho okuninzi abakucingayo abafundi bakaKristu ngaphandle kwale ndlela ingumnqantsa nedinisayo.

AmaYuda ngolangazelelo ebelindele uMesiya onokuwakhulula kwidyokhwe yamaRoma. Uninzi lukholelwa ukuba uYesu waseNazerete nguMsindisi ebekudala bemlindele. Kangangeminyaka emithathu enesiqingatha, ebethetha ngoBukumkani bukaThixo. Uphilise abagulayo waza wondla abalambileyo. Ewe, uye wabathuthuzela abantu. Kodwa iinkokeli zonqulo ziba nomsindo xa uYesu ezigxeka aze azitshabhise yaye zizimisele ukumbulala. Sekunjalo, uhamba phambi kwabafundi esiya ndaweni ithile kuloo ndlela yomileyo.—Marko 10:32.

Njengokuba ilanga litshonela ngaphaya kweNtaba yemiNquma, uYesu namaqabane akhe bafika kwisixeko saseBhetani, apho baza kuchitha iintsuku ezintandathu ezilandelayo nobusuku bazo. Abantu abaza kubamkela apho ngabahlobo babo abasenyongweni uLazaro, uMariya noMarta. Ingokuhlwa ibangela kubethe impepho emva kohambo olushushu yaye kuqalisa iSabatha kaNisan 8.—Yohane 12:1, 2.

NgoNisan 9

Emva kweSabatha, kuyanyakazela eYerusalem. Amawaka eendwendwe sele ethontelene esixekweni elungiselela iPasika. Kodwa ingxolo evakalayo ingaphezu kwaleyo iqhelekileyo ebudeni beli xesha lonyaka. Izihlwele ezinomdla wokwazi ziyagxalathelana zisihla kwizitrato ezimxinwa zisiya esixekweni. Njengoko zityhalana ukuphuma kuloo masango amxinwa, zithi ntlaa ngombono omhle! Abantu abaninzi abanemincili bayehla besiya eNtabeni yemiNquma kwindlela esuka eBhethefage. (Luka 19:37) Yintoni kanye le iqhubekayo?

Khangela! UYesu waseNazarete uza ekhwele kwinkonyana le-esile. Abantu bondlala izambatho endleleni phambi kwakhe. Abanye bawangazelisa amasebe omthi wesundu yaye bevuya bakhwaza besithi: “Usikelelwe lowo uza egameni likaYehova, nokwangukumkani kaSirayeli!”—Yohane 12:12-15.

Njengokuba isihlwele sikufuphi neYerusalem, uYesu ukhangela isixeko yaye uchukumiseka gqitha. Uqalisa ngokulila, yaye simva exela kwangaphambili ukuba esi sixeko siya kutshatyalaliswa. Xa uYesu efika etempileni kamva, ufundisa izihlwele aze aphilise abantu abaziimfama neziqhwala eziza kuye.—Mateyu 21:14; Luka 19:41-44, 47.

Konke oku kujongiwe ngababingeleli abakhulu nababhali. Hayi indlela abakhathazeka ngayo xa babebona izinto ezimangalisayo ezenziwa nguYesu nokuba nemincili kwezihlwele! Bengakwazi ukufihla indlela abacaphuka ngayo, abaFarisi bathi: “Mfundisi, khalimela abafundi bakho.” UYesu uyaphendula: “Ndiyanixelela ukuba, Ukuba aba bangahlala bethe cwaka, amatye ebeya kudanduluka ngamandla.” Ngaphambi kokuba ahambe, uYesu uphawula ukuba kukho abo barhwebayo etempileni.—Luka 19:39, 40; Mateyu 21:15, 16; Marko 11:11.

NgoNisan 10

UYesu ufika etempileni kuselithuba. Ngezolo, ebengakwazi ukuzibamba enomsindo ngenxa yorhwebo olwenziwa kunqulo lukaYise, uYehova uThixo. Ngoko ke, ejwaqeka ngumsindo uqalisa ukubakhuphela ngaphandle abo bathengayo nabo bathengisela etempileni. Emva koko ubhukuqa iitafile zabantu ababawayo abatshintsha imali nezihlalo zabo bathengisa amahobe. UYesu uyadanduluka: “Kubhaliwe kwathiwa, ‘Indlu yam iya kubizwa ngokuba yindlu yomthandazo,’ kodwa nina niyenza umqolomba wabaphangi.”—Mateyu 21:12, 13.

Ababingeleli abakhulu, ababhali namadoda abalulekileyo akanakukwazi ukumelana nezenzo zikaYesu nokushumayela kwakhe ekuhleni. Hayi indlela ebabekufuna ngayo ukumbulala! Kodwa isihlwele siyabathintela ekwenzeni oko ngenxa yokuba abantu bamangalisiwe yimfundiso kaYesu yaye “bahlala bethene nca naye ukuze bamve.” (Luka 19:47, 48) Njengoko kurhatyela, uYesu namaqabane akhe bathi chu kuhle ukubuyela eBhetani ukuze baphumle.

NgoNisan 11

Kuxa kumpondo zankomo, yaye uYesu nabafundi sele besendleleni benyuka iNtaba yemiNquma besiya eYerusalem. Njengokuba befika etempileni, ababingeleli abaziintloko namadoda amakhulu ngokukhawuleza aza kuYesu aze amxine. Owona mbandela ucacileyo ezingqondweni zawo sisenzo sakhe kwabo babetshintshisa ngemali nababethengisa etempileni. Iintshaba zakhe zicaphuka zathi: “Uzenza ngagunya liphi na ezi zinto? Yaye ngubani na okunike eli gunya?” “Nam, ndiza kunibuza into enye,” uYesu uyaphendula. “Ukuba niyandixelela, nam ndiza kunixelela ukuba ndizenza ngagunya liphi na ezi zinto: Ubhaptizo lukaYohane, lwaluvela kuwuphi umthombo? Ezulwini okanye ebantwini?” Bebuthelene ndawonye, aba bachasi baqiqa ngelithi: “Ukuba sithi, ‘Lwaluvela ezulwini,’ uya kuthi kuthi, ‘Kutheni, ke ngoko, ningazange nimkholelwe?’ Ukuba, ngoko, sithi, ‘Lwaluvela ebantwini,’ soyika isihlwele, kuba bonke babambe ukuthi uYohane ngumprofeti.” Bematshekile, baphendula bedanile: “Asazi.” UYesu ubaphendula ngokuzolileyo esithi: “Nam andinixeleli ukuba ndizenza ngagunya liphi na ezi zinto.”—Mateyu 21:23-27.

Iintshaba zikaYesu ngoku zizama ukumlinga ngokuthetha into enokumenza abanjwe. Ziyabuza: “Kusemthethweni na ukuhlawula irhafu yentloko kuKesare okanye akunjalo?” Ephendula uYesu uthi: “Ndiboniseni ingqekembe yerhafu yentloko.” Uyababuza: “Ngumfanekiso nombhalo kabani na lo?” Bathi: “NgokaKesare.” Efuna badideke, uYesu ngokucacileyo uthi kubo: “Ngoko ke, buyiselani izinto zikaKesare kuKesare, kodwa izinto zikaThixo kuThixo.”—Mateyu 22:15-22.

Emva kokuba ezithulisile iintshaba zakhe ngengxoxo engenakuphikiswa, ngoku uYesu uyazihlasela phambi kwezihlwele nabafundi bakhe. Phulaphula njengoko ngokungenaluvalo egxeka ababhali nabaFarisi. Uthi: “Ningenzi ngokwezenzo zabo, kuba bayathetha kodwa bangenzi.” Ngesibindi, uvakalisa ooyeha abaninzi kubo, ebafanisa nabakhokeli abaziimfama nabahanahanisi. UYesu uthi: “Zinyokandini, nzalandini yamarhamba, niza kuwusaba njani umgwebo weGehena?”—Mateyu 23:1-33.

Ezi zityholo zibukhali azithethi ukuba uYesu akaziqondi iimpawu ezintle ezikwabanye. Kamva, ubona abantu bephosa imali kwizikhongozelo zobuncwane. Hayi indlela ekwakuchukumisa ngayo ukubona umhlolokazi osweleyo ephosa konke ebenako ekuphileni kwakhe—iingqekembe ezimbini ezincinane ezinexabiso elincinane kakhulu! Ezele luxabiso, uYesu utyhila ukuba, eneneni, uphose ngaphezu kwabo bonke abo banikele kakhulu “ngokuphuma kwintsalela yabo.” Ngenxa yovelwano, uYesu ukuxabisa kakhulu konke oko umntu anokukwenza.—Luka 21:1-4.

Ngoku uYesu ushiya itempile okwesihlandlo sokugqibela. Abanye abafundi bakhe bancoma ubuhle bayo, besithi ‘ihonjiswe ngamatye amahle nezinto ezinikelweyo.’ Bengalindelanga, uYesu uphendula esithi: “Kuya kufika imihla ngayo ekungekho litye phezu kwelitye eliya kushiywa apha lize lingadilizwa.” (Luka 21:5, 6) Njengokuba abapostile belandela uYesu ukuphuma kweso sixeko sasixinene, babecinga oko wayesenokuba wayebhekisela kuko.

Kaloku, kwithutyana nje emva koko uYesu nabapostile bakhe bayahlala baze banandiphe uxolo nenzolo kwiNtaba yemiNquma. Njengokuba beqwalasele ubuhle beYerusalem netempile, uPetros, uYakobi, uYohane noAndreya bafuna uYesu abacacisele ngesiprofeto sakhe esothusayo. Bathi: “Sixelele, Ziya kubakho nini na ezi zinto, kwaye uya kuba yintoni na umqondiso wobukho bakho nowokuqosheliswa kwenkqubo yezinto?”—Mateyu 24:3; Marko 13:3, 4.

Ekuphenduleni uMfundisi Omkhulu ubaxelela isiprofeto esimangalisa ngokwenene. Uthi kuza kubakho iimfazwe ezinkulu, iinyikima zomhlaba, ukunqongophala kokutya neendyikitya zokufa. Kwakhona uYesu uxela kusengaphambili ukuba iindaba ezilungileyo zoBukumkani ziya kuvakaliswa emhlabeni wonke. Ulumkisa ngelithi: “Kuya kwandula kubekho imbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona.”—Mateyu 24:7, 14, 21; Luka 21:10, 11.

Aba bapostile bane baphulaphula ngenyameko njengoko uYesu exubusha ezinye iinkalo ‘zemiqondiso yobukho bakhe.’ Ugxininisa imfuneko ‘yokuhlala belindile.’ Ngoba? Uthi: “Ngenxa yokuba aniwazi umhla eza ngawo iNkosi yenu.”—Mateyu 24:42; Marko 13:33, 35, 37.

Le yimini engakhange ilibaleke kuYesu nakubapostile bakhe. Eneneni, yimini yokugqibela yobulungiseleli bukaYesu basesidlangalaleni ngaphambi kokuba abanjwe, alingwe aze abulawe. Ekubeni kurhatyela, baqalisa ukuhamba umgama omfutshane benyuka induli ukubuyela eBhetani.

NgoNisan 12 No-13

UYesu uchitha uNisan 12 ezolile nabafundi bakhe. Uyaqonda ukuba iinkokeli zonqulo zimfuna ngamehlo abomvu zifuna ukumbulala, yaye akafuni ukuba ziphazamisane nokubhiyozela kwakhe iPasika ngengokuhlwa elandelayo. (Marko 14:1, 2) Ngosuku olulandelayo, uNisan 13, abantu baxakekile besenza amalungiselelo okugqibela ePasika. Ngenjikalanga, uYesu uthumela uPetros noYohane ukuba baye kulungiselela iPasika kwigumbi eliphezulu eYerusalem. (Marko 14:12-16; Luka 22:8) Ngaphambi nje kokuba litshone ilanga, uYesu nabanye abapostile badibana ukuze babhiyozele iPasika yokugqibela.

NgoNisan 14, Emva Kokutshona Kwelanga

EYerusalem kuqalisa ukurhatyela njengoko inyanga epheleleyo iphuma ngaphaya kweNtaba yemiNquma. Ekwigumbi elilungisiweyo, uYesu nabafundi bakhe abali-12 bangqendeve kwitafile esele ilungisiwe. Uthi: “Ndikunqwenele kakhulu ukuyidla kunye nani le pasika ngaphambi kokuba ndibandezeleke.” (Luka 22:14, 15) Emva kwethutyana abapostile bayamangaliswa kukubona uYesu ephakama aze abeke ecaleni izambatho zakhe zangaphandle. Ethabatha itawuli nesitya esinamanzi, uhlamba iinyawo zabo. Esinjani sona ukungalibaleki isifundo esingokwenza inkonzo yokuthobeka!—Yohane 13:2-15.

Noko ke, uYesu uyazi ukuba enye kula madoda—uYudas Skariyoti—sele ilungiselele ukumnikezela kwiinkokeli zonqulo. Ngokucacileyo, unxunguphala gqitha. Ubachazela oku: “Omnye wenu uya kundingcatsha.” Abapostile babuhlungu gqitha ngenxa yoku. (Mateyu 26:21, 22) Emva kokubhiyozela iPasika, uYesu uthi kuYudas: “Oko ukwenzayo kwenze ngokukhawuleza ngakumbi.”—Yohane 13:27.

Emva kokuba uYudas emkile, uYesu umisela isidlo sokukhumbula ukufa kwakhe okusondelayo. Uthabatha isonka esingenagwele, aze abulele, asiqhekeze, aze ayalele abali-11 ukuba badle. Uthi: “Oku kuthetha umzimba wam oza kunikelwa ngenxa yenu. Hlalani nisenza oku nindikhumbula.” Emva koko uthabatha indebe yewayini ebomvu. Emva kokubulela, udlulisela indebe kubo, ebaxelela ukuba bayisele. UYesu wongezelela esithi: “Oku kuthetha ‘igazi lam lomnqophiso,’ eliza kuphalala ngenxa yabaninzi ukuze kuxolelwe izono.”—Luka 22:19, 20; Mateyu 26:26-28.

Ebudeni bobo busuku bubalulekileyo, uYesu ufundisa abapostile bakhe abathembekileyo izifundo ezibalulekileyo nezininzi, yaye phakathi kwezi ubafundisa ukubaluleka kothando lobuzalwana. (Yohane 13:34, 35) Ubaqinisekisa ngelithi baya kufumana “umncedi,” umoya oyingcwele. Uya kubanceda bakhumbule zonke izinto abaxelele zona. (Yohane 14:26) Ezinzulwini zobo busuku, kumele ukuba bakhuthazeka gqitha kukuva ukuba uYesu wabathandazela ngokunyanisekileyo. (Yohane, isahluko 17) Emva kokucula iingoma zokudumisa, bayaphuma kwigumbi eliphezulu baze balandele uYesu njengoko ephumela kwimpepho ebandayo yasebusuku.

Bewela iNtlambo iKidron, uYesu nabapostile bakhe baya kwenye yeendawo abazithandayo, umyezo waseGetsemane. (Yohane 18:1, 2) Ngoxa abapostile bakhe belindile, uYesu uhamba umgama nje omfutshane ukuze athandaze. Wayexinezeleke ngendlela engathethekiyo ngokweemvakalelo njengoko wayembongoza ngokunyanisekileyo uThixo ukuba amncede. (Luka 22:44) Kwaukucinga nje ngogculelo olwaluza kuziswa kuYise amthandayo wasezulwini xa engaphumeleli kumngcungcuthekisa gqitha.

UYesu akakagqibi ukuthandaza xa uYudas Skariyoti efika nehlokondiba bephethe amakrele, amagqudu nezikhanyiso. Esanga uYesu ngobubele, uYudas uthi: “Bhota, Rabhi!” Lo ngumqondiso awenzela amadoda aza kubamba uYesu. Ngequbuliso, uPetros uthi rhuthu ikrele lakhe aze asuse indlebe yekhoboka lombingeleli omkhulu. “Buyisela ikrele lakho endaweni yalo,” utsho uYesu njengoko ephilisa indlebe yale ndoda. “Kuba bonke abo bathabatha ikrele baya kutshabalala ngekrele.”—Mateyu 26:47-52.

Yonke into yenzeka ngokukhawuleza! UYesu uyabanjwa aze abotshelelwe. Ngenxa yokoyika nokudideka, abapostile bayayilahla iNkosi yabo baze babaleke. UYesu usiwa kuAnas, owayesakuba ngumbingeleli omkhulu. Emva koko usiwa kuKayafa, owayengumbingeleli omkhulu ngelo xesha, ukuze avavanywe. Ekuseni, iSanhedrin ngobuxoki ityhola uYesu ngokunyelisa. Emva koko, uKayafa uyalela ukuba asiwe kwirhuluneli yamaRoma uPontiyo Pilato. Uthumela uYesu kuHerode Antipas, umlawuli waseGalili. UHerode namaphakathi akhe bagculela uYesu. Emva koko ubuyiselwa kuPilato. UPilato uyaqiniseka ukuba uYesu umsulwa. Kodwa iinkokeli zonqulo zamaYuda zimnyanzela ukuba amgwebele ukufa uYesu. Emva kokuthukwa nokubethwa, uYesu usiwa eGolgotha apho abethelelwa ngokungenanceba kwisibonda sentuthumbo aze afumane ukufa okungcungcuthekisayo.—Marko 14:50–15:39; Luka 23:4-25.

Yayinokuba yeyona nto ibuhlungu embalini ukuba ukufa kukaYesu kwakusisiphelo sobomi bakhe. Okuvuyisayo kukuba, akuzange kube njalo. NgoNisan 16, 33 C.E., abafundi bakhe bamangaliswa kukufumanisa ukuba wayevusiwe kwelabafileyo. Ekuhambeni kwexesha, abantu abangaphezu kwama-500 bakwazi ukuzibonela ngawabo amehlo ukuba uYesu wayephila kwakhona. Yaye emva kweentsuku ezingama-40 emva kokuvuka kwakhe, iqela labalandeli bakhe abathembekileyo lambona enyukela ezulwini.—IZenzo 1:9-11; 1 Korinte 15:3-8.

Ubomi BukaYesu Nawe

Kukuchaphazela njani oku—eneneni, thina sonke? Kaloku, ubulungiseleli bukaYesu, ukufa nokuvuka kwakhe zidumisa uYehova uThixo yaye zibalulekile ekuphumezeni injongo Yakhe ezukileyo. (Kolose 1:18-20) Zibaluleke ngakumbi kuthi kuba izono zethu zinokuxolelwa ngenxa yedini likaYesu yaye ngaloo ndlela sinokuba nolwalamano olusondeleyo noYehova uThixo.—Yohane 14:6; 1 Yohane 2:1, 2.

Kwanabantu abafileyo bayachaphazeleka. Uvuko lukaYesu luvulela ithuba lokubabuyisela ebomini kwakhona kwihlabathi eliyiParadesi elithenjiswe nguThixo. (Luka 23:39-43; 1 Korinte 15:20-22) Ukuba ufuna ukwazi okungakumbi ngemibandela enjalo, siyakumema ukuba ubekho kwiSikhumbuzo sokufa kukaKristu ngoAprili 11, 1998, kwiHolo yoBukumkani yamaNgqina kaYehova esekuhlaleni.

[Ibhokisi ekwiphepha 6]

“Umqolomba Wabaphangi”

UYESU wayenezizathu ezininzi zokuthi abathengisi abanyolukileyo baye bayijika itempile kaThixo yaba ‘ngumqolomba wabaphangi.’ (Mateyu 21:12, 13) Ukuze akwazi ukuhlawula irhafu yasetempileni, amaYuda nabangene ebuYudeni ababesuka kwamanye amazwe kwakufuneka batshintshe imali yamazwe abo ukuze bafumane imali eyamkelekileyo apho. Kwincwadi yakhe ethi The Life and Times of Jesus the Messiah, uAlfred Edersheim uthi abatshintshi bemali babedla ngokulungiselela amashishini abo kwizixeko ezithile ngoAdar 15, inyanga engaphambi kwePasika. Ukususela ngoAdar 25, besiya ngasetempileni eYerusalem ukuze bafumane ingeniso ngokuthontelana kwamaYuda nabangene ebuYudeni . Abo bathengisi babeqhuba ishishini elichumileyo, befuna umrhumo ngayo yonke imali etshintshwayo kubo. Ukubhekisela kukaYesu kubo njengabaphangi kwakubonisa ukuba babebiza inkuntyula yemali kangangokuba, eneneni, babeyiphanga imali yamahlwempu.

Abanye babengakwazi nokuzisa izilwanyana zabo zokwenza idini. Nabani na okwenzileyo oko kwakufuneka eso silwanyana sihlolwe ngumhloli owayesetempileni—ngomrhumo othile. Bengafuni ukuzifaka engozini yokuba isilwanyana singamkelwa emva kokuba behambe naso umgama omde, abaninzi babethenga ezo “zazinconyelwe” ngabaLevi ezazifumaneka kubathengisi abanamaqhetseba etempileni. Omnye umphengululi uthi: “Uninzi lwamahlwempu lwaluqongqotha neyokugqibela isenti.”

Kukho ubungqina bokuba ngesinye isihlandlo umbingeleli omkhulu uAnas nentsapho yakhe bafumana ingeniso engathethekiyo kubarhwebi basetempileni. Imibhalo yooRabhi ithetha “ngeeNtengiso [zasetempileni] zoonyana baka-Anas.” Ingeniso efunyenwe kwaba babetshintsha imali nasekuthengisweni kwezilwanyana etempileni yayiyenye yezona ndlela zabo ziphambili zokufumana imali. Omnye umphengululi uthi isenzo sikaYesu sokugxotha abarhwebi “sasingajoliswanga kudumo lwababingeleli kuphela kodwa kwiingxowa zabo.” Enoba siyintoni na isizathu, iintshaba zakhe ngokuqinisekileyo zazifuna ukumbulala!—Luka 19:45-48.

[Isicangca esikwiphepha 4]

Iintsuku Zokugqibela Zobomi BukaYesu Bobuntu

NgoNisan 33 C.E. Iziganeko Oyena Mntu Ubalaseleyo*

NgoMgqibelo YiSabatha (NgoMvulo, ngoAprili 6, 1998) 101, isiqe. 4

16 NgeCawa UYesu uvusiwe 128

* Apha kudweliswe amanani achaza izahluko kwincwadi ethi Oyena Mntu Ubalaseleyo Wakha Waphila. Ukuze ubone isicangca esineembekiselo ezingokweZibhalo ezicacileyo zobulungiseleli bukaYesu bokugqibela, bona incwadi ethi “Sonke ISibhalo Siphefumlelwe NguThixo Kwaye Siyingenelo,” iphepha 290. Ezi ncwadi zipapashwe yiWatchtower Bible and Tract Society of New York, Inc.