Ngaba Uthixo Ngumntu Wokwenene Kuwe?

XA UXINWE ziingxaki, ngaba ukhawuleza uthethe noThixo ngomthandazo? Ukuba uyakwenza oko, ngaba uziva uthetha nomntu wokwenene?

Ethetha ngoYise osemazulwini, uYesu Kristu wathi: “Lowo undithumileyo uyinene.” (Yohane 7:28) Ewe, uYehova uThixo ungumntu wokwenene, yaye ukuthandaza kuye kufana nqwa nokucel’ uncedo okanye icebiso kumhlobo osenyongweni. Kambe ke ukuze uThixo ayive imithandazo yethu ifanele ihambisane noko zithi iZibhalo kumele kwenziwe ukuze umthandazo wamkelwe. Ngokomzekelo, simele sithandaze ngokuthobekileyo ‘kumphulaphuli wemithandazo’ ngegama loNyana wakhe, uYesu Kristu.—INdumiso 65:2; 138:6; Yohane 14:6.

Bambi basenokuthi uThixo akangomntu wokwenene, kuba engabonakali. Kubo uThixo yinto nje ecingelwayo. Kwanamanye amaKristu, azifundileyo iimpawu zikaThixo ezintle, maxa wambi isenokungena nzima ezingqondweni zawo into yokuba ungumntu wokwenene. Ngaba nawe unaloo ngxaki? Ukuba unayo, yintoni engakunceda umjonge uYehova uThixo njengomntu wokwenene?

Fundisisa IZibhalo

Ngaba uzifundisisa rhoqo iZibhalo Ezingcwele? Xa ufundisiso lwakho lweBhayibhile luthe rhoqo yaye umilisel’ ingqondo, kuya kusithi thaa kuwe ukuba uYehova uThixo ngumntu wokwenene. Loo nto iya komeleza ukholo lwakho, ngokungathi kunjalo ikwenze ‘umbone Lowo ungenakubonwa.’ (Hebhere 11:6, 27) Kwelinye icala, ukunqaphaza ukufundisisa iBhayibhile akunakufane kulomeleze ngokucacileyo ukholo lwakho.

Masizekelise senjenje: Masithi ugqirha wakho uthe umele uthambise amafutha athile kabini ngeveki ukuze uphelise ikhuphu elikuthe name. Ngaba elo khuphu beliya kuphela ukuba ubuwathambisa loo mafutha kanye okanye kabini ngenyanga? Yintsomi leyo. Ngokufanayo ke, umdumisi usichazela “iyeza” esimele silisebenzise ukuze siphile ngokomoya. Funda iLizwi likaThixo ‘ucamngce ngalo imini nobusuku.’ (INdumiso 1:1, 2) Ukuze siphile qete, kufuneka silisebenzise kakuhle eli “yeza”—sihlolisise iLizwi likaThixo yonke imihla sincedwa ziimpapasho zamaKristu.—Yoshuwa 1:8.

Ngaba uyafuna ukuthi xa ufundisisa lomelezeke ukholo lwakho? Nali ke icebiso: Emva kokufunda isahluko kwiNew World Translation of the Holy Scriptures okanye kwenye iBhayibhile eneembekiselo, khetha indinyana ebangel’ umdla uze uhlole iimbekiselo zezibhalo ezihambisana nayo. Oku kuya kwenza into oyifundayo ibe nomhluzi, yaye alithandabuzeki elokuba uya kuchukunyiswa yindlela iBhayibhile evisisana ngayo. Ngenxa yoko, uMbhali, onguYehova uThixo, uya kuba ngumntu wokwenene kuwe.

Ukujonga iimbekiselo kunokukwenza uzazi kakuhle iziprofeto zeBhayibhile nenzaliseko yazo. Mhlawumbi uyazazi iziprofeto zeBhayibhile, ezinjengokutshatyalaliswa kweYerusalem ngamaBhabhiloni. Ukanti, iBhayibhile iqulethe iziprofeto ezininzi ezivisisanayo nezinenzaliseko efanayo. Zimbi kuzo azaziwa ngokubanzi.

Ngokomzekelo, funda isiprofeto esithetha ngesohlwayo esiya kufunyanwa ngumntu ophinda akhe iYeriko. UYoshuwa 6:26 uthi: “Wafunga uYoshuwa ngelo xesha, esithi, Uqalekisiwe phambi koYehova umntu oya kusuka awakhe lomzi, iYeriko le; wowuseka ngowamazibulo akhe azimise iingcango zawo ngowamathumbu akhe.” Kwiminyaka engama-500 kamva sazaliseka, kuba kweyoku-1 yooKumkani 16:34 sifunda oku: “Ngeemini zakhe [uKumkani uAhabhi] wayakha uHiyeli waseBheteli iYeriko; wayiseka ngoAbhiram, amazibulo akhe, wawamisa amasango ayo ngoSegubhi, owamathumbu akhe, ngokwelizwi likaYehova, awalithethayo ngoYoshuwa unyana kaNun.”a NguThixo ongumntu wokwenene onokuphefumlela iziprofeto ezinjalo aze aqiniseke ukuba ziyazaliseka.

Ngoxa usafunda iBhayibhile, usenokuthinjwa ingqondo yingongoma ethile. Ngokomzekelo, usenokuba uyazibuza ukuba kwadlula iminyaka emingaphi ngaphambi kokuba esi siprofeto sizaliseke. Kunokusuka uye kubuza komnye umntu, kutheni ungakhe uziphandele ngokwakho? Xa usebenzisa izicangca ezikwiincwadi zokufundisisa iBhayibhile, khangela le mpendulo wenze umgudu njengokuba ubuya kwenza xa ulandela imaphu echaza indawo obukuyo ubutyebi. (IMizekeliso 2:4, 5) Ukufumana iimpendulo kuya kulutsho lube luqilima ukholo lwakho yaye kuya kumenza uYehova uThixo abe ngumntu wokwenene kuwe.

Thandaza Rhoqo Ungayeki

Ungaze uwudelele umthandazo nokholo. Abafundi bakaYesu benza esi sicelo: “Sinike ukholo olungakumbi.” (Luka 17:5) Ukuba uYehova akakabi ngumntu wokwenene kuwe, kutheni ungathandazi kuye ucele ukholo olungakumbi? Cela uYihlo osemazulwini unentembelo yokuba uya kukunceda umjonge njengomntu wokwenene.

Ukuba unengxaki ethe zinzi kuwe, ziphe ixesha wanek’ imbilini yakho phambi koMhlobo wakho wasezulwini. Xa kwakusondela ixesha lokufa kwakhe, uYesu wathandaza ngokusuk’ emazantsi entliziyo. Nangona wayezigxeke kanobom iinkokeli zonqulo ngendebelefele yemithandazo engapheliyo zisenzela nje ukuqhayisa, wachitha ubusuku bonke ethandaza eyedwa ngaphambi kokuba anyule abapostile abali-12. (Marko 12:38-40; Luka 6:12-16) Kwakhona sinokufunda okuthile kuHana, owazala umprofeti uSamuweli. Xa wayefuna umntwana oyinkwenkwe, ‘wathandaza uzungu phambi koYehova.’—1 Samuweli 1:12.

Yintoni esiyifundayo kuko konke oku? Ukuba unethemba lokuba iphendulwe imithandazo yakho, umele uthandaze ngokunyamekileyo, ngokuzingisileyo, ngokungapheziyo—kakade ke, ukwenze oko ngokuvisisana nokuthanda kukaThixo. (Luka 22:44; Roma 12:12; 1 Tesalonika 5:17; 1 Yohane 5:13-15) Ukwenza ukuthanda kwakhe kuya kumenza uThixo abe ngumntu wokwenene kuwe.

Jonga Indalo

Umzobo udiza ubuntu bomzobi wawo. Ngokufanayo, ‘iimpawu ezingabonakaliyo’ zikaYehova, uMyili noMdali wendalo iphela, zibonakaliswa kakuhle kwindalo yakhe. (Roma 1:20) Ukuba sibujongisisa kakuhle ubuchule bukaYehova, sikhanyelwa ngakumbi bubuntu bakhe, yiloo nto ke emenza abe ngumntu wokwenene kuthi.

Ukuba akuziwalazi nje izinto ezidalwe nguThixo, usenokubamb’ ongezantsi wakuphawula ukuba uneempawu zomntu wokwenene. Ngokomzekelo, inkcazelo engobuchule bentaka bokubhabha ijikeleza umhlaba ingakwenza ubuqonde bhetele ubulumko bukaYehova. Xa ufunda ngendalo yakhe, usenokufunda ngomnyele oyiMilky Way, onokuthabatha iminyaka eli-100 000 ukuwunqumla uhamba ngesantya sombane, ngomnye weminyele eqikelelwa kumawaka ezigidi kwesesibhakabhakeni. Ngaba oko akukubonisi ubulumko anabo uMdali?

Ngokuqinisekileyo, ubulumko bukaYehova bobomntu wokwenene! Kodwa oko kuthetha ntoni kuwe? Kaloku, akanakuze adidwe yiyo nayiphi na ingxaki esiyithi thaca phambi kwakhe ngomthandazo. Ewe, kwanocuntsu nje wolwazi ngendalo unokwenza uYehova abe ngumntu wokwenene kuwe.

Hamba NoYehova

Ngaba ungakwazi ukuzibonela ukuba uYehova ungumntu wokwenene? Ewe, ukuba ufana nosolusapho othembekileyo uNowa. Wayesoloko ethobela uYehova, kangangokuba kwakunokuthethwa oku: “UNowa wahamba noThixo.” (Genesis 6:9) UNowa wayephila ngokungathi uYehova wayethe chu apha ecaleni kwakhe. UThixo angangumntu wokwenene kuwe ngolo hlobo kanye.

Ukuba uhamba noThixo, uqamela ngezithembiso zeZibhalo uze uphile ngokuvisisana nazo. Ngokomzekelo, uyawakholelwa amazwi kaYesu athi: “Qhubekani, . . . nifuna kuqala ubukumkani nobulungisa [bukaThixo], yaye zonke ezinye izinto [eziphathekayo] ziya kongezelelwa kuni.” (Mateyu 6:25-33) Liyinyaniso elokuba, uYehova akanakusoloko ekunika izinto ngale ndlela wena ufuna ngayo. Ukanti, xa uthandaza aze uThixo akuncede, uya kuba ngathi ngumntu olapha ecaleni kwakho.

Ulwalamano olusondele ngolo hlobo noYehova luya lukhula njengokuba uhamba noThixo. Khawucinge nje ngoManuela, iNgqina elithetha iSpanish, eliye lanyamezela iimvavanyo ezininzi. Uthi: “Nanini na ndinengxaki okanye ndiswele, ndisebenzisa umgaqo okwiMizekeliso 18:10. Ndibalekela kuYehova. Ebesoloko ‘eyinqaba eliqele’ kum.” UManuela usakuthetha oku emva kweminyaka engama-36 ekholose ngoYehova yaye exhaswa nguye.

Ngaba usandul’ ukuqala ukuthembela kuYehova? Ungatyhafi ukuba akukabi nolu lwalamano ulufunayo naye. Mihla le phila njengomntu ohamba noThixo. Njengokuba uzabalazela ukuthembeka, uya kuba nolwamano olusondele ngakumbi kuYehova.—INdumiso 25:14; IMizekeliso 3:26, 32.

Enye indlela yokuhamba noThixo kukuzixakekisa ngenkonzo yakhe. Xa uxakeke kumsebenzi wokushumayela uBukumkani, usebenza noYehova. (1 Korinte 3:9) Ukwazi oku kwenza uThixo abe ngumntu wokwenene kuwe.

Umdumisi usibongoza esithi: “Yiyekele kuYehova indlela yakho, ukholose ngaye; wokwenzela.” (INdumiso 37:5) Ungaze uyeke ukuyekela nawuphi umthwalo okanye iingxaki onazo kuThixo. Hlala ucela ukhokelo lwakhe. Ukuba ngomthandazo ukholose ngoYehova uThixo uze uhlale uthembele kuye ngokupheleleyo, uya kuziva ukhuselekile ngenxa yokuba uyazi ukuba akayi kukushiya enyanyeni. Ngaba xa uthetha noYehova ngezinto ezikuxhalabisileyo uthetha naye unentembelo? Uya kuba njalo—xa uThixo engumntu wokwenene kuwe.

[Imibhalo esemazantsi]

[Umfanekiso okwiphepha 21]

Ufundisiso lwakho malomeleze ukholo

[Umfanekiso okwiphepha 22]

Ziphe ixesha lokuthandaza rhoqo, nangokusuk’ entliziyweni

[Umfanekiso okwiphepha 23]

Buka indlela iimpawu zikaThixo ezibonakala ngayo endalweni

[Inkcazelo]

Hummingbird: U.S. Fish and Wildlife Service, Washington, D.C./Dean Biggins; stars: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands