Qhubeka Usenza Inkqubela Ngokomoya!

Usuku Lokubhaptizwa Kwethu Lusuku Esifanele Sisoloko Siluxabisa Yaye Silukhumbula. Ngapha Koko, Lusuku Esilubonisa Ngayo Ekuhleni Uzahlulelo Lwethu Esilwenzileyo Lokukhonza Uthixo.

KUBANTU abaninzi kungumgudu omkhulu ukufikelela kwesi sigqibo—ukwahlukana nemikhuba emibi ekudala ikho, ukuzikhwebula kunxulumano olubi, ukuguqula ngokupheleleyo iindlela ezendeleyo zokucinga nezokuziphatha.

Nakuba kunjalo, ngoxa ubhaptizo isisiganeko esivuyisayo nesibalulekileyo kubomi bomKristu, lusisiqalo nje. Umpostile uPawulos waxelela amaKristu abhaptiziweyo kwelakwaYuda: “Ekubeni ngoku siyishiyile imfundiso esisiqalelo engoKristu, masixhinele ekuqoleni.” (Hebhere 6:1) Ewe, onke amaKristu kufuneka ‘afikelele kubunye bokholo nakulwazi oluchanileyo loNyana kaThixo, ekukhuleleni ebudodeni obupheleleyo, kumlinganiselo wobukhulu bokuzala kukaKristu.’ (Efese 4:13) Kuphela yinkqubela ukusa kumkhamo wokuqola ‘esingazinziswa ngayo ngokwenene elukholweni.’—Kolose 2:7.

Kwiminyaka embalwa edluleyo, amakhulu amawaka abakhonzi abasandul’ ukuzahlulela aye eza kwibandla lamaKristu. Mhlawumbi ungomnye wawo. Njengabazalwana bakho bekhulu lokuqala, awufuni ukuhlala uyimveku ngokomoya. Ufuna ukukhula, ukuhambela phambili! Kodwa njani? Yaye kungaziphi iindlela onokwenza ngayo inkqubela enjalo?

Ukwenza Inkqubela Ngofundisiso Lobuqu

UPawulos waxelela amaKristu aseFilipi: “Oku koko ndiqhubeka ndikuthandazela, ukuba ngamana uthando lwenu lungaphuphuma ngakumbi nangakumbi lulwazi oluchanileyo nokuqonda okuzeleyo.” (Filipi 1:9) Ukukhula ‘kulwazi oluchanileyo’ kubalulekile kwinkqubela yakho yokomoya. ‘Ukungenisa ulwazi ngoYehova uThixo noYesu Kristu’ kuyinto eqhubekayo, asinto ephela emva kokubhaptizwa.—Yohane 17:3.

Udade othile ongumKristu esiza kumbiza ngokuba nguAlexandra, wakuqonda oku kwiminyaka elishumi emva kokuba ebhaptiziwe eneminyaka eli-16 ubudala. Wakhulela enyanisweni yaye wayesoloko esiza rhoqo kwiintlanganiso zamaKristu yaye enesabelo kumsebenzi wokushumayela. Ubhala oku: “Kwiinyanga ezimbalwa ezidlulileyo, ndaqonda ukuba kukho into ephosakeleyo. Ndagqiba kwelokuba ndizihlolisise kakuhle nangokunyanisekileyo indlela endivakalelwa ngayo ngenyaniso, nesizathu sokuba ndisesenyanisweni.” Wenza ntoni? Uqhubeka esithi: “Ndafumanisa ukuba izizathu zokuba senyanisweni ziyandiphazamisa. Ndikhumbula ukuba ngoxa ndandisakhula, kwakugxininiswa kwiintlanganiso nakwinkonzo yasentsimini. Kwakungathi imikhwa yofundisiso lobuqu nokuthandaza yayiza kusuka nje izenzekele. Kodwa njengokuba ndandihlola imeko yam, ndaqonda ukuba oku akwenzekanga.”

Umpostile uPawulos ubongoza esithi: “Ngokwenqanaba esiye senza inkqubela ukusa kulo, masiqhubeke sihamba ngokulungeleleneyo kulo mzila mnye.” (Filipi 3:16) Umzila unokumisela ikhondo lokuhambela phambili. Ngaphambi kokuba ubhaptizwe, alithandabuzeki elokuba wawunomzila weveki wokufundisisa iBhayibhile nomfundisi ofanelekileyo. Njengokuba wawusiya usiba noxabiso olungakumbi, kulo mzila waquka ukusilungiselela kusengaphambili isifundo seeveki ngeeveki, ujonga izibhalo ezicatshuliweyo eBhayibhileni, njalo njalo. Ngoku ekubeni ubhaptiziwe, ngaba uye waqhubeka ‘uhamba kulaa mzila mnye’?

Ukuba akunjalo, kusenokufuneka uphinde uhlolisise izinto eziza kuqala kuwe, ‘uqiniseka ngezinto ezibaluleke ngakumbi.’ (Filipi 1:10 ) Kubomi bethu obuxakekileyo, kufuna ukuzeyisa ukubekel’ ecaleni ixesha lobuqu lokufunda iBhayibhile nokufundisisa. Kodwa iingenelo ezibakho zibonisa ukuba oku akuyonkcitha xesha. Khawuphinde ucinge ngamava ka-Alexandra. “Ndimele nditsho ukuba bekumnandi ukuba senyanisweni kwiminyaka enokuba ngama-20 edlulileyo ngokuya nje kwiintlanganiso nokuba nesabelo kwinkonzo yasentsimini,” uvuma esitsho. Noko ke, waleka umsundulu esenjenje: “Ndiye ndagqiba kwelokuba nangona ezi zinto zibalulekile, zona zodwa azinakundigcina xa izinto ziqalisa ukuba nzima. Zonke ezi zinto ziye zabangelwa kukuba andilwenzi ufundisiso lobuqu, yaye imithandazo yam ayizinzanga yaye ayikho nzulu. Ndiye ndaqonda ukuba ngoku kufanele ndihlengahlengise indlela endicinga ngayo ndize ndiqalise ukuba nocwangciso lofundisiso olunentsingiselo ukuze ndikwazi ukumazi ngokwenene uYehova ndize ndimthande yaye ndikuxabise oko uNyana wakhe asinike kona.”

Ukuba ufuna uncedo ngokumisela umzila oyingenelo wofundisiso lobuqu, abadala namanye amaKristu aqolileyo ebandleni lakho bangakuvuyela ukukunceda. Ukongezelela, amanqaku enkupho yeMboniselo kaMeyi 1, 1995; Agasti 15, 1993 nekaMeyi 15, 1986, anamacebiso aliqela aluncedo.

Imfuneko Yokusondela KuThixo

Enye inkalo apho ufanele ulwele ukwenza inkqubela kuyo lulwalamano lwakho noThixo. Kwezinye iimeko kusenokuba kukho imfuneko enkulu kulo mbandela. Khawucinge ngoAnthony, owabhaptizwa eselula ngeminyaka. Ubalisa esithi: “Ndandingumntwana wokuqala ukubhaptizwa ekhaya. Emva kokubhaptizwa kwam, umama wandiwola ngokufudumeleyo. Andizange ndimbone onwabe ngolwa hlobo. Ndandivuye gqitha yaye ndandiziva ndimkhulu.” Phofu ke, kwakukho enye into ebandakanyekileyo. UAnthony uthi: “Kangangethuba, kwakungekho bantu baselula abakhe babhaptizwa ebandleni. Ngoko ndaziva ndinekratshi. Ndandizingomb’ isifuba xa ndandigqabaza naxa ndinikela iintetho ebandleni. Kwakubaluleke kakhulu kum ukunconywa ngabantu kunokuba ndidumise uYehova. Ngokwenene ndandingenalwalamano olusenyongweni naye.”

NjengoAnthony, kusenokwenzeka ukuba abanye baye bazahlulela ngenxa yokunqwenela ukukholisa abanye kunokunqwenela ukukholisa uYehova. Nokuba kunjalo, uThixo ulindele ukuba abanjalo baphile ngokwesithembiso sabo sokumkhonza. (Thelekisa INtshumayeli 5:4.) Noko ke, ngaphandle kobuhlobo obufudumeleyo bobuqu noThixo, ngokufuthi kuba nzima kubo ukwenjenjalo. UAnthony ukhumbula oku: “Uvuyo endandinalo xa ndandibhaptizwa lahlala nje okwethutyana. Ndandingekawugqibi nonyaka xa ndagaxeleka kwisono esinzulu yaye kwafuneka ndohlwaywe ngabadala bebandla. Ukuqhubeka kwam nehambo engafanelekanga kwandikhokelela ukuba ndisuswe kubudlelane bebandla. Emva kweminyaka emithandathu ndizahlulele kuYehova, ndabanjwa ndaza ndafakwa entolongweni ngenxa yokubulala.”

Ukwakha Ulwalamano Olusondeleyo NoYehova

Enoba injani na imeko yakho, onke amaKristu anokusabela kwisimemo seBhayibhile: “Sondelani kuThixo, yaye uya kusondela kuni.” (Yakobi 4:8) Alithandabuzeki elokuba wahlakulela umlinganiselo othile wolwalamano noThixo xa wafundisisa iBhayibhile okokuqala. Wafunda ukuba uThixo akasosithixo esingengomntu esinqulwa yiNgqobhoko, kodwa ngumntu onegama, uYehova. Kwakhona wafunda ukuba uneempawu ezintle, kuba ‘unguThixo onemfesane, onobabalo, ozeka kade umsindo, omninzi ngenceba nenyaniso.’—Eksodus 34:6.

Noko ke, ukuze uphile ngozahlulelo lwakho lokukhonza uThixo, umele usondele ngakumbi kuye! Njani? Umdumisi wathandaza: “Ndazise iindlela zakho, Yehova; ndifundise umendo wakho.” (INdumiso 25:4) Ufundisiso lobuqu lweBhayibhile kwaneempapasho zoMbutho zisenokukunceda umazi ngakumbi uYehova. Ukuthandaza ngokuthe rhoqo nako kubalulekile. Umdumisi uyabongoza: “Phalazani intliziyo yenu phambi kwakhe.” (INdumiso 62:8) Njengoko ubona imithandazo yakho iphendulwa, uya kuwubona umdla uThixo anawo kuwe. Oku kuya kukunceda uzive usondele kuye.

Izilingo neengxaki zibangela elinye ithuba lokusondela kuThixo. Usenokujamelana nocelomngeni novavanyo lokholo, njengokugula, ingcinezelo esikolweni nasemsebenzini, okanye ubunzima bezoqoqosho. Kusenokwenzeka ukuba kunzima ukulandela umzila oqhelekileyo wobuthixo wokuba nesabelo kubulungiseleli, ukuya ezintlanganisweni, okanye ukufundisisa iBhayibhile nabantwana bakho. Musa ukujamelana wedwa neengxaki ezinjalo! Cela uncedo kuThixo, ufune ukhokelo nolwalathiso lwakhe. (IMizekeliso 3:5, 6) Thandazela umoya wakhe oyingcwele! (Luka 11:13) Njengokuba ubona uThixo ekunceda ngothando, uya kusondela nangakumbi kuye. Njengokuba umdumisi uDavide eyibeka, “yivani, nibone ukuba ulungile uYehova. Hayi, uyolo lomfo ozimela ngaye!”—INdumiso 34:8.

Kwenzeka ntoni ngoAnthony? Ukhumbula oku: “Ndaqalisa ukucinga ngexesha laxa ndandizibekela usukelo lokomoya olwalujoliswe ekwenzeni ukuthanda kukaYehova. Kwakubuhlungu. Kodwa kuyo yonke le ntlungu nokudana, ndalukhumbula uthando lukaYehova. Kwathabatha ithuba ngaphambi kokuba ndikwazi ukuthandaza kuYehova, kodwa ndathandaza, ndaza ndaziphalaza zonke iinyembezi kuye, ndicela uxolo. Kwakhona ndaqalisa ukufunda iBhayibhile yaye ndamangaliswa yindlela okuninzi ngayo oko ndandisele ndikulibele nendlela endandinolwazi oluncinane ngayo ngoYehova.” Nangona uAnthony kusafanele agqibe isigwebo sakhe solwaphulo-mthetho entolongweni, ufumana uncedo kumaNgqina asekuhlaleni yaye uyachacha ngokomoya. Ngombulelo uAnthony uthi: “Ndibulela uYehova nentlangano yakhe, ndiye ndakwazi ukubulahla ubuntu obudala, yaye ndizabalazela ukwambatha obutsha suku ngalunye. Ulwalamano lwam noYehova lubaluleke kakhulu kum ngoku.”

Inkqubela Yokomoya Kubulungiseleli Bakho

UYesu Kristu wayalela abalandeli bakhe ukuba babe ngabashumayeli ‘beendaba ezilungileyo zobukumkani.’ (Mateyu 24:14) Njengomvakalisi omtsha weendaba ezilungileyo, usenokungabi namava angako kubulungiseleli. Ngoko ke, unokuyenza njani inkqubela ukuze ‘ubufeze ngokuzeleyo ubulungiseleli bakho’?—2 Timoti 4:5.

Enye indlela kukuba nesimo sengqondo esihle. Funda ukuwujonga umsebenzi wokushumayela ‘njengobuncwane,’ ilungelo. (2 Korinte 4:7) Ilungelo lokubonisa uthando, ukunyaniseka nengqibelelo yethu kuYehova. Kwakhona ukwasivumela ukuba sibonise inkxalabo ngommelwane wethu. Ukuzinikela ngokungazingci kulo mba kusenokuba ngumthombo wolonwabo lokwenene.—IZenzo 20:35.

UYesu wayenembono entle ngomsebenzi wokushumayela. Ukwabelana ngeenyaniso zeBhayibhile nabanye ‘kwakunjengokutya’ kuye. (Yohane 4:34) Ngoko into eyayimshukumisa ukuba ancede abanye ingashwankathelwa ngamazwi akhe athi, “Ndiyafuna.” (Mateyu 8:3) UYesu wayenemfesane ngabantu, ingakumbi kwabo ‘bahlinzekileyo nabalahliweyo’ lihlabathi likaSathana. (Mateyu 9:35, 36) Ngaba nawe ngokufanayo ‘ufuna’ ukunceda abo basebumnyameni ngokomoya nabafuna ukhanyiselo lweLizwi likaThixo? Ngoko uya kuziva unyanzelekile ukusabela kumyalelo kaYesu othi: “Hambani ke ngoko nize nenze abafundi abantu beentlanga zonke.” (Mateyu 28:19) Eneneni, oku kuya kukukhuthaza ukuba ube nesabelo ngokuzeleyo kulo msebenzi kangangoko impilo neemeko zakho zikuvumela.

Esinye isikhokelo sokwenza inkqubela kukuba nesabelo ngokuthe rhoqo kubulungiseleli—veki nganye ukuba kunokwenzeka. Ukwenjenjalo kusenokunceda ukuphelisa ubuphakuphaku noloyiko olunokuthintela ubani oshumayela ngamaxesha athile kuphela. Ukuba nenxaxheba ngokuthe rhoqo kwinkonzo yasentsimini kuya kuba yingenelo kuwe nangezinye iindlela. Kuya kukhulisa uxabiso lwakho ngenyaniso, kulondoloze uthando lwakho ngoYehova nommelwane, kuze kukuncede unikel’ ingqalelo kwithemba loBukumkani.

Noko ke, kuthekani ukuba imeko yakho ayikuvumeli ukuba ube nesabelo esingako kumsebenzi wokushumayela? Ukuba akunakwenziwa hlengahlengiso, ngoko thuthuzelwa kukwazi ukuba uThixo uyaneliswa kuko nakuphi na okwaziyo ukukwenza, logama nje usebenza ngomphefumlo uphela enkonzweni. (Mateyu 13:23) Mhlawumbi ungenza inkqubela ngezinye iindlela, njengokuphucula ubuchule bakho bokushumayela. Ebandleni, iSikolo Sobulungiseleli Sobuthixo neNtlanganiso Yenkonzo zinikela uqeqesho olufanelekileyo kulo mba. Ngokuqhelekileyo, okukhona sisiba nobuchule kubulungiseleli, kokukhona siya kubunandipha size sibone imiphumo.

Ngoko, kuyacaca ukuba ubani akamele ayeke ukwenza inkqubela ngokomoya ngemini abhaptizwa ngayo. Umpostile uPawulos wabhala ngokuphathelele ithemba lakhe lokufumana ubomi bokungafi ezulwini: “Bazalwana, andizigqali njengosele elubambile; kodwa kukho into enye ngalo: Ndiyazilibala izinto ezingasemva ndize ndolulele phambili kwizinto ezingaphambili, ndisukela umvuzo wobizo lwaphezulu lukaThixo ngoKristu Yesu. Masithi ke, ngoko, ngangobuninzi bethu thina baqolileyo, sibe nesi simo sengqondo; yaye ukuba ngokwengqondo nityekele ngenye indlela nakuyiphi na inkalo, uThixo uya kunityhilela esi simo sengqondo singasentla.”—Filipi 3:13-15.

Ewe, onke amaKristu, enoba anethemba lokungafi emazulwini okanye ubomi obungunaphakade kwiParadesi esemhlabeni, amele ‘alulele phambili’—azibhokoxe, ngokungathi kunjalo, ukufumana usukelo lobomi! Ubhaptizo lwakho lwalusisiqalo esihle, kodwa lusisiqalo nje. Qhubeka ulwela ukwenza inkqubela ngokomoya. Ngeentlanganiso nangofundisiso lobuqu, ‘yiba ngokhule ngokupheleleyo emandleni okuqonda.’ (1 Korinte 14:20) Yiba ‘ngocacelwayo engqondweni . . . bububanzi nobude nokuphakama nobunzulu’ benyaniso. (Efese 3:18) Inkqubela oyenzayo iya kukunceda kungekuphela nje ekugcineni uvuyo nolonwabo ngoku kodwa kwakhona ekufumaneni indawo enqabisekileyo kwihlabathi elitsha likaThixo, apho phantsi kolawulo loBukumkani bakhe basezulwini, uya kukwazi ukwenza inkqubela ngonaphakade!

[Umfanekiso okwiphepha 29]

Kufuna ukuziqeqesha ukuzibekela ixesha lofundisiso lobuqu

[Umfanekiso okwiphepha 31]

Ukuba nesimo sengqondo esihle kusenokusinceda sifumane uvuyo kubulungiseleli