Isahluko 16
Indlela Onokusondela Ngayo KuThixo
1. Zizinto zini ezifana ngazo iinkonzo ezininzi?
UMKHENKETHI owayetyelele ilizwe laseMpuma wamangaliswa zizithethe zonqulo awazibona kwitempile yamaBhuda. Nangona imifanekiso eyayilapho yayingeyiyo ekaMariya okanye kaKristu, izithethe ezininzi zazifana nezo zecawa yakhe kwilizwe lakowabo. Ngokomzekelo, waphawula ukusetyenziswa kwerosari nokucengcelezwa kwemithandazo. Nabanye baye bakubona oku kufana. Enoba useMpuma okanye useNtshona, iindlela abanquli abazama ngazo ukusondela kuThixo okanye kwizinto abazinqulayo zifana ngendlela emangalisayo.
2. Uchazwa njani umthandazo, yaye kutheni abantu abaninzi bethandaza?
2 Abaninzi bazama ngokukhethekileyo ukusondela kuThixo ngokuthandaza kuye. Umthandazo uye wachazwa ngokuthi “sisenzo sokunxibelelana komntu nokungcwele—uThixo, oothixo, ummandla ongabonakaliyo okanye amandla angaphaya kwawemvelo.” (The New Encyclopædia Britannica) Noko ke, xa besondela kuThixo ngomthandazo, abanye bacinga ngeengenelo abanokuzifumana kuphela. Ngokomzekelo, indoda ethile yakha yabuza omnye wamaNgqina kaYehova: “Ukuba unokundithandazela, ngaba iingxaki endinazo entsatsheni yam, emsebenzini, nasempilweni ziya kuconjululwa?” Kubonakala ukuba le ndoda yayicinga njalo, kodwa abaninzi bayathandaza baze bafumanise ukuba iingxaki zabo azipheli. Ngoko sisenokubuza, ‘Siyintoni kanye isizathu sokuba sisondele kuThixo?’
ISIZATHU SOKUBA SISONDELE KUTHIXO
3. Imithandazo yethu ifanele ibhekiswe kubani, ibe ngoba?
3 Umthandazo awusosithethe singenantsingiselo, ungeyiyo nendlela nje yokuzuza okuthile. Isizathu esiyintloko sokusondela kuThixo kukuze sibe nolwalamano olusenyongweni naye. Ngoko ke imithandazo yethu ifanele ibhekiswe kuYehova uThixo. Umdumisi uDavide wathi: “Usondele uYehova kubo bonke abamnqulayo [“abambizayo,” NW].” (INdumiso 145:18) UYehova uyasimema ukuba sibe nolwalamano loxolo naye. (Isaya 1:18) Abo basabelayo kwesi simemo bayavumelana nomdumisi owathi: “Mna ke, ukusondela kuThixo kulungile kum.” Ngoba? Ngenxa yokuba abo basondela kuYehova uThixo baya kunandipha ulonwabo lokwenyaniso noxolo lwengqondo.—INdumiso 73:28.
4, 5. (a) Kutheni kubalulekile ukuthandaza kuThixo? (b) Lulwalamano olunjani esinokulwakha noThixo ngomthandazo?
4 Kutheni sifanele sithandazele uncedo lukaThixo ukuba ‘uyakwazi esikusweleyo, singekamceli’? (Mateyu 6:8; INdumiso 139:4) Umthandazo ubonisa ukuba sinokholo kuThixo yaye simgqala njengoMthombo waso “sonke isipho esilungileyo, naso sonke isipho esigqibeleleyo.” (Yakobi 1:17; Hebhere 11:6) UYehova uyakholiswa yimithandazo yethu. (IMizekeliso 15:8) Uyakuvuyela ukuva amazwi ethu anentsingiselo oxabiso nendumiso, kanye njengokuba ubawo ekuvuyela ukuva umntwana wakhe omncinane evakalisa amazwi anyanisekileyo ombulelo. (INdumiso 119:108) Apho kukho ulwalamano oluhle phakathi kotata nomntwana, kubakho unxibelelwano lobuhlobo. Umntwana othandwayo ufuna ukuthetha noyise. Kunjalo nangolwalamano lwethu noThixo. Ukuba sikuxabisa ngokwenene oko sikufundayo ngoYehova nothando alubonakalisileyo ngathi, siya kuba nomnqweno onamandla wokuthetha naye ngomthandazo.—1 Yohane 4:16-18.
5 Xa sisondela kuThixo Osenyangweni, sifanele sibe nentlonelo, nangona kungekho sizathu sakuxhalaba ngokugqithiseleyo ngamazwi esiwasebenzisayo. (Hebhere 4:16) Sisoloko sinako ukusondela kuYehova. Yaye elinjani lona ilungelo esinalo lokuba ‘singaphalaza intliziyo yethu’ kuThixo ngomthandazo! (INdumiso 62:8) Uxabiso ngoYehova lukhokelela kulwalamano lobuhlobo naye, njengolo indoda ethembekileyo uAbraham yayilunandipha njengomhlobo kaThixo. (Yakobi 2:23) Kodwa xa sithandaza kwiNkosi enguMongami wendalo iphela, simele sizivisisanise noko akufunayo ukuze sisondele kuye.
OKO KUFUNEKAYO UKUZE SISONDELE KUTHIXO
6, 7. Nangona uThixo engafuni kuhlawulwa ukuze aphulaphule imithandazo yethu, yintoni ayifunayo kuthi xa sithandaza?
6 Ngaba imali iyafuneka ukuze sisondele kuThixo? Abantu abaninzi bahlawula abefundisi ukuba babathandazele. Bambi bade bakholelwe kwelokuba imithandazo yabo iya kuviwa ngokobungakanani bomnikelo abawenzileyo. Noko ke, iLizwi likaThixo alithi kufuneka umnikelo wemali ukuze sisondele kuYehova ngomthandazo. Amalungiselelo akhe neentsikelelo zolwalamano naye ngomthandazo zifumaneka ngaphandle kwentlawulo.—Isaya 55:1, 2.
7 Ngoko ke, kufuneka ntoni? Isimo esifanelekileyo sentliziyo yenye yezinto ezifunekayo. (2 Kronike 6:29, 30; IMizekeliso 15:11) Entliziyweni yethu simele sibe nokholo kuYehova uThixo ‘njengomphulaphuli wemithandazo’ nalowo “ungumvuzi wabo bamfunayo.” (INdumiso 65:2; Hebhere 11:6) Kwakhona simele sibe nentliziyo ethobekileyo. (2 Kumkani 22:19; INdumiso 51:17) Komnye wemizekeliso yakhe, uYesu Kristu wabonisa ukuba xa wayesondela kuThixo umbuthi werhafu othobekileyo nowayenesimo sentliziyo esithobekileyo wangqineka elilungisa ngaphezu komFarisi owayezikhukhumalisa. (Luka 18:10-14) Njengoko sisondela kuThixo ngomthandazo, masikhumbule ukuba “balisikizi kuYehova bonke abantliziyo izidlayo.”—IMizekeliso 16:5.
8. Ukuba sinqwenela ukuba uThixo ayiphendule imithandazo yethu, simele sizihlambulule kwintoni?
8 Ukuba sinqwenela ukuba uThixo aphendule imithandazo yethu, kufuneka sizihlambulule kwihambo yesono. Xa umfundi uYakobi wayekhuthaza abanye ukuba basondele kuThixo, wongezelela wathi: “Hlambululani izandla, boni, nenze nyulu iintliziyo, nina bamphefumlo umbaxa.” (Yakobi 4:8) Kwanabenzi bobubi banokuba nolwalamano loxolo noYehova ukuba bayaguquka baze bayishiye indlela yabo yangaphambili yobomi. (IMizekeliso 28:13) Asinakuthetha noYehova ukuba kuphela nje senza ngathi siyihlambulule indlela yethu. ILizwi likaThixo lithi: “Amehlo eNkosi aphezu kwamalungisa, neendlebe zayo zisingisele esikhungweni sawo; ke ubuso beNkosi buphezu kwabenza okubi.”—1 Petros 3:12.
9. Sifanele sisondele kuYehova ngabani, ibe ngoba?
9 IBhayibhile ithi: “Akukho mntu ulilungisa ehlabathini, wenza okulungileyo, angoni.” (INtshumayeli 7:20) Ngoko ke usenokubuza: ‘Ngoko ke, sinokusondela njani kuYehova uThixo?’ IBhayibhile iyaphendula: “Ukuba kukho othe wona, sinoMthetheleli kuye uYise, uYesu Kristu ilungisa.” (1 Yohane 2:1) Nangona singaboni, sinokusondela kuThixo ngokungafihlisi ngoYesu Kristu, owafa njengentlawulelo yokukhulula thina. (Mateyu 20:28) Nguye kuphela ijelo esinokusondela ngalo kuYehova uThixo. (Yohane 14:6) Asimele sicinge ukuba ixabiso ledini lentlawulelo likaYesu liya kuzigubungela ngokuzenzekelayo izono zethu size siqhelisele isono ngabom. (Hebhere 10:26) Noko ke, ukuba senza okusemandleni ethu ukukuphepha okubi size sekunjalo siphazame ngamaxesha athile, sinokuguquka size sicele uThixo asixolele. Xa sisondela kuye ngentliziyo ethobekileyo, uya kusiva.—Luka 11:4.
AMATHUBA OKUTHETHA NOTHIXO
10. Kumbandela womthandazo, sinokumxelisa njani uYesu, yaye ziziphi ezinye zezihlandlo zokuthandaza uwedwa?
10 UYesu Kristu wayeluxabisa kakhulu ulwalamano lwakhe noYehova. Ngenxa yoko, uYesu wayebekela bucala ixesha lokuthetha noThixo ngasese emthandazweni. (Marko 1:35; Luka 22:40-46) Senza kakuhle ukuxelisa umzekelo kaYesu size sithandaze kuThixo rhoqo. (Roma 12:12) Kufanelekile ukuqalisa usuku ngamazwi omthandazo, yaye ngaphambi kokungena ezingubeni, ngokufanelekileyo sinokumbulela uYehova ngoko sikwenzileyo ebudeni bemini. Ebudeni bemini, zimisele ukusondela kuThixo “amaxesha onke.” (Efese 6:18) Sinokude sithandazele ngaphakathi ezintliziyweni zethu, sisazi ukuba uYehova unokusiva. Ukuthetha noThixo ngasese kusinceda siqinise ulwalamano lwethu naye, yaye ukuthandaza kuYehova rhoqo kusinceda sisondele ngakumbi kuye.
11. (a) Kutheni iintsapho zifanele zithandaze kunye? (b) Kuthetha ukuthini ukuthi “Amen” ekupheleni komthandazo?
11 UYehova uyayiphulaphula nemithandazo eyenzelwa amaqela abantu. (1 Kumkani 8:22-53) Sinokusondela kuThixo njengentsapho, intloko-ntsapho ikhokele. Oku kuyaliqinisa iqhina lentsapho, yaye uYehova uba ngumntu wokwenene kubantwana njengoko besiva abazali babo bethandaza kuThixo ngokuthobeka. Kuthekani ukuba othile umela iqela ngomthandazo, mhlawumbi kwintlanganiso yamaNgqina kaYehova? Ukuba siphulaphule, masiphulaphule ngenyameko ukuze ekupheleni komthandazo, sikwazi ukuthi “Amen” ngentliziyo iphela, okuthetha ukuthi “Makube njalo.”—1 Korinte 14:16.
IMITHANDAZO AYIVAYO UYEHOVA
12. (a) Kutheni uThixo engayiphenduli imithandazo ethile? (b) Kutheni singafanele sigxininise kwiintswelo zobuqu kuphela kwimithandazo yethu?
12 Bambi basenokuvakalelwa kukuba uThixo akayiphenduli imithandazo yabo kwanaxa bethandaza kuye egameni likaKristu. Noko ke, umpostile uYohane wathi: “Ukuba sithi sicele into ngokokuthanda [kukaThixo], uyasiva.” (1 Yohane 5:14) Ngoko ke, kufuneka sicele ngokuvumelana nokuthanda kukaThixo. Ekubeni enomdla kwimpilo-ntle yethu yokomoya, nantoni na echaphazela imeko yethu yokomoya ifanelekile ukuba singayithandazela. Simele sikuphephe ukufuna ukugxininisa kwizinto zokwenyama kuphela. Ngokomzekelo, ngoxa kufanelekile ukuthandazela ukuqonda namandla okuhlangabezana nokugula, ukuxhalabela impilo akufanele kuzigqumelele izilangazelelo zokomoya. (INdumiso 41:1-3) Lakuqonda ukuba laliyixhalabele ngokugqithiseleyo impilo yalo, elinye ibhinqa elingumKristu lacela uncedo kuYehova lokuba libe nembono efanelekileyo ngokugula kwalo. Ngenxa yoko, alizange libe sazixhalabisa kangako ngeengxaki zalo zempilo, yaye lavakalelwa ngathi lalinikwe “incamisa yamandla.” (2 Korinte 4:7) Umnqweno walo wokunceda abanye ngokomoya wakhula, laza laba ngumvakalisi woBukumkani wexesha elizeleyo.
13. Njengoko kuboniswe kuMateyu 6:9-13, yiyiphi eminye imibandela efanelekileyo esinokuyiquka emithandazweni yethu?
13 Sinokuquka ntoni emithandazweni yethu ukuze uYehova akholiswe kukuyiva? UYesu Kristu wafundisa abafundi bakhe indlela yokuthandaza. Kumthandazo ongumzekelo obhalwe kuMateyu 6:9-13, wachaza umzekelo wezinto esinokuzithandazela ngokufanelekileyo. Yintoni efanele ibe yeyona nto iphambili kwimithandazo yethu? Igama likaYehova uThixo noBukumkani bakhe bumele buze kuqala. Ukucelela iintswelo zethu zokuphathekayo kufanelekile. Kukwabalulekile ukucela ukuxolelwa izono zethu nokukhululwa ekuhendweni nakongendawo, uSathana uMtyholi. UYesu wayengafuni ukuba siwucule lo mthandazo okanye siwuphindaphinde, siwucengceleza singacingi ngentsingiselo yawo. (Mateyu 6:7) Bekuya kubakho ulwalamano olunjani ukuba umntwana ebesebenzisa amazwi afanayo ngalo lonke ixesha ethetha noyise?
14. Ngaphandle kwezicelo, yiyiphi imithandazo esifanele siyenze?
14 Ngaphandle kwezicelo nezibongozo ezisuka entliziyweni, sifanele sinikele imithandazo yendumiso nemibulelo. (INdumiso 34:1; 92:1; 1 Tesalonika 5:18) Sisenokuthandazela nabanye. Ukuthandazela abazalwana noodade bokomoya abahluphekayo okanye abatshutshiswayo kubonisa umdla wethu kubo, yaye uYehova uyavuyiswa kukusiva sivakalisa inkxalabo enjalo. (Luka 22:32; Yohane 17:20; 1 Tesalonika 5:25) Eneneni, umpostile uPawulos wabhala: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:6, 7.
ZINGISANI EMTHANDAZWENI
15. Yintoni esifanele siyikhumbule ukuba imithandazo yethu ibonakala ingaphendulwa?
15 Nangona uzuza ulwazi ngoThixo, usenokuvakalelwa kukuba maxa wambi imithandazo yakho ayiphendulwa. Oku kusenokuba njalo ngenxa yokuba kusenokwenzeka ukuba ixesha likaThixo lokuphendula umthandazo othile alikafiki. (INtshumayeli 3:1-9) UYehova usenokuyivumela imeko iqhubeke okwethuba elithile, kodwa uyayiphendula imithandazo yaye uyalazi elona xesha lifanelekileyo lokwenjenjalo.—2 Korinte 12:7-9.
16. Kutheni sifanele sizingise emthandazweni, ibe ukwenjenjalo kunokuluchaphazela njani ulwalamano lwethu noThixo?
16 Ukuzingisa kwethu emthandazweni kutyhila umdla wethu osuka entliziyweni koko sikuthethayo kuThixo. (Luka 18:1-8) Ngokomzekelo, sisenokucela uYehova asincede soyise ubuthathaka obuthile. Ngokuzingisa emthandazweni nangokwenza ngokuvisisana nezicelo zethu, sibonisa ukunyaniseka kwethu. Sifanele singqale yaye sinyaniseke kwizicelo zethu. Kubaluleke ngokukodwa ukuthandaza ngokunzulu xa sidibana nezilingo. (Mateyu 6:13) Njengoko siqhubeka sithandaza ngoxa sizama ukulawula iminqweno yethu yesono, siya kuyibona indlela uYehova asinceda ngayo. Oku kuya kulwakha ukholo lwethu kuze komeleze ulwalamano lwethu naye.—1 Korinte 10:13; Filipi 4:13.
17. Siya kungenelwa njani ngokuba nesimo sengqondo somthandazo ekukhonzeni uThixo?
17 Ngokuhlakulela isimo sengqondo somthandazo ekunikeleni inkonzo engcwele kuYehova uThixo, siya kuqonda ukuba asimkhonzi ngawethu amandla. Izinto sizenza ngamandla kaYehova. (1 Korinte 4:7) Ukukuvuma oku kuya kusinceda sithobeke yaye kuya kulwenza lube nentsingiselo ulwalamano lwethu naye. (1 Petros 5:5, 6) Ewe, sinezizathu ezivakalayo zokuzingisa emthandazweni. Imithandazo yethu enyanisekileyo nolwazi lwethu oluxabisekileyo ngendlela yokusondela kuBawo wethu wasezulwini onothando iya kwenza ubomi bethu bube bobonwabisa ngokwenene.
UNXIBELELWANO NOYEHOVA ALUKHO CALA-NYE
18. Sinokumphulaphula njani uThixo?
18 Ukuba sifuna uThixo ayive imithandazo yethu, simele siphulaphule oko akuthethayo. (Zekariya 7:13) Imiyalezo yakhe akasayithumeli ngabaprofeti abaphefumleleyo yaye ngokuqinisekileyo akasebenzisi izinto ezinokuthanani nemimoya. (Duteronomi 18:10-12) Kodwa sinokuphulaphula uThixo ngokufundisisa iLizwi lakhe, iBhayibhile. (Roma 15:4; 2 Timoti 3:16, 17) Kanye njengoko kusenokufuneka sihlakulele umnqweno wokutya kokoqobo okuluncedo kuthi, siyabongozwa ukuba ‘[sakhe, NW] ukuwalangazelela amasi angawelizwi, angenankohliso.’ Sihlakulele umnqweno wokutya kokomoya ngokufunda iLizwi likaThixo yonke imihla.—1 Petros 2:2, 3; IZenzo 17:11.
19. Kuyingenelo njani ukucamngca ngoko ukufunda eBhayibhileni?
19 Camngca ngoko ukufundayo eBhayibhileni. (INdumiso 1:1-3; 77:11, 12) Oko kuthetha ukucingisisa ngombandela othile. Oku unokukufanisa nokwetyisa ukutya. Unokwetyisa ukutya kokomoya ngokudibanisa oko ukufundayo nezinto osele uzazi. Qwalasela indlela umbandela obuchaphazela ngayo ubomi bakho, okanye cinga ngoko ukutyhilayo ngeempawu zikaYehova neenkqubano zakhe. Ngaloo ndlela ngofundisiso lobuqu, unokungenisa ukutya kokomoya uYehova akulungiselelayo. Oku kuya kukusondeza kuThixo yaye kuya kukunceda uhlangabezane neengxaki zemihla ngemihla.
20. Ukubakho kwiintlanganiso zamaKristu kusinceda njani sisondele kuThixo?
20 Kwakhona unokusondela kuThixo ngokuphulaphula iLizwi lakhe xa lixutyushwa kwiintlanganiso zamaKristu, kanye njengokuba amaSirayeli ayephulaphula ngenyameko xa ayehlanganisene ukuze aphulaphule ukufundwa kwasesidlangalaleni koMthetho kaThixo. Abayaleli ngelo xesha babefaka intsingiselo ekufundeni kwabo uMthetho, ngaloo ndlela benceda abo babephulaphule baqonde baze bashukunyiselwe ekubeni bakusebenzise oko babekuvile. Oku kwakukhokelela kuvuyo olukhulu. (Nehemiya 8:8, 12) Ngoko kwenze umkhwa ukubakho kwiintlanganiso zamaNgqina kaYehova. (Hebhere 10:24, 25) Oku kuya kukunceda uqonde uze usebenzise ulwazi ngoThixo ebomini bakho yaye kuya kukuzisela ulonwabo. Ukuba yinxalenye yobuzalwana bamaKristu bomhlaba wonke kuya kukunceda uhlale usondele kuYehova. Yaye njengokuba siza kubona, unokufumana unqabiseko lokwenyaniso phakathi kwabantu bakaThixo.
HLOLA ULWAZI LWAKHO
Kutheni ufanele usondele kuYehova?
Ziziphi ezinye zezinto ezifunekayo ukuze sisondele kuThixo?
Yintoni onokuyiquka emithandazweni yakho?
Kutheni ufanele uzingise emthandazweni?
Unokumphulaphula njani uYehova namhlanje?
[Umfanekiso ozalise iphepha, kwiphepha 157]