IiNdibano ZeSithili Zowe-1999 ‘Zelizwi LikaThixo Lesiprofeto’
1 Xa amaSirayeli ayeza kungena kwiLizwe Ledinga, uMoses wawabongoza ukuba awuxabise umyalelo kaThixo. Wawaxelela oku: “Asilizwi lilambathayo kuni eli, kuba bubomi benu.” (Dut. 32:45-47) Ngaba asinambulelo na kuYehova ngokuba ubomi bethu buxabisekile kuye kwaye eqhubeka esikhokela ngeLizwi lakhe elixabisekileyo? Ngoko ke siyilindele ngolangazelelo iNdibano yeSithili yeentsuku ezintathu ‘Yelizwi LikaThixo Lesiprofeto’ kunye noko asigcinele kona uYehova.
2 Kulo nyaka, kucetywe iindibano zesithili ezifanelekileyo kuzo zonke izixeko ezikweloMzantsi Afrika nakumazwe angaphantsi kwesebe loMzantsi Afrika. Ngaphandle kwesiNgesi, ucwangciso lwendibano luya kuqhutywa ngesiBhulu, ngesiPedi, ngesiPhuthukezi, ngesiSuthu, ngesiTsonga, ngesiTswana, ngesiVenda, ngesiXhosa, ngesiZulu nangeNtetho Yezandla kwiindawo ezintathu.
3 Alithandabuzeki elokuba sele uwenzile amalungiselelo okubakho suku ngalunye lwendibano ngenxa yokuba ukholelwa ukuba uYehova ulindele ukuba ubekho. Qiniseka ukuba uyayibona imigudu yabantu ngabanye nokuzincama okwenziwa ngabakhonzi bakhe ukuze babekho, yaye uyikhumbula ngoxabiso. (Heb. 6:10) Ngokubakho suku ngalunye lwendibano ukususela kwingoma yokuvula de ibe ngumthandazo wokuqukumbela, sibonisa uYehova ukuba siyawaxabisa amazwi akhe. (Dut. 4:10) Sikwabonisa uxabiso ngomsebenzi onzima wabazalwana bethu abaninzi ababandakanyekileyo ekulungiseleleni indibano.
4 Ukulungiselela amawaka abantu bakaThixo abaza kuhlanganisana kwindawo nganye yendibano kufuna ukucwangcisa kusengaphambili nolungelelwaniso olusemagqabini. Ukwazi ukuba amalungiselelo endibano ngothando sele enziwe kufanele kusishukumisele ukuba sibe nentsebenziswano, ukuze “zonke izinto zenzeke ngokundilisekileyo nangokwelungiselelo.” (1 Kor. 14:40) Inkcazelo elandelayo nezikhumbuzo zilungiselelwe ukuba ufike endibanweni yenu ukulungele ngokupheleleyo ukunandipha ukutya kokomoya nonxulumano lobuKristu.
Ngaphambi KweNdibano
5 Ngaba abo uqhuba nabo izifundo zeBhayibhile nabanye abanomdla bafuna uncedo ekwenzeni amalungiselelo obuqu ukuze babekho endibanweni? Oko bakubonayo nabakuvayo ngoxa belapho kunokubashukumisela ukuba babe ngabanquli bakaYehova. (1 Kor. 14:25) Abadala bafanele bamazi nabani na ofuna uncedo ngendawo yokuhlala okanye ngesithuthi, ingakumbi amalungu asele ekhulile ebandla, baze ngothando baqinisekise ukuba iintswelo zawo ziyahlangatyezwa.—Gal. 6:10.
6 Ngaba sele eqinisekisiwe amalungiselelo endawo yakho yokuhlala? Ukuba uza kuhlala ehotele, ngaba sele uqinisekisiwe ngendawo yakho? Ngoku, naziphi na iifomu zeZicelo Zamagumbi ezamkelwe yiKomiti Yenkonzo Yebandla zifanele zithunyelwe kwikhelingi efanelekileyo yendibano ngunobhala webandla. Ukuba wabelwe indawo yokuhlala, enoba kusehotele okanye kwikhaya elithile, yaye umele uyirhoxise, nceda wazise iSebe Lamagumbi lasekuhlaleni ngoko nangoko ukuze loo ndawo yokuhlala yabiwe ngokutsha. Idilesi nenombolo yomnxeba zinokufunyanwa kunobhala webandla.
7 Ukuba ufuna inkcazelo malunga nendibano, unobhala webandla unokukunika ikhelingi yaloo ndawo yendibano. Nceda ungabatsaleli umnxeba okanye ubabhalele abaphathi bendawo yendibano.
8 Ekubeni iSebe Loncedo Lokuqala endibanweni lenzelwe ukusingatha iimeko zongxamiseko kuphela, sincomela ukuba uziphathele ezakho iipilisi zeentlungu, amabhandeji, namayeza asezelwayo, amayeza esisu ancedisana nenkqubo yokwetyisa, nezinto ezinjengezo endibanweni ukuba ukholelwa ukuba zinokufuneka. Ukuba wena okanye uthile othandekayo ukhathazwa yimpilo, enjengesifo sentliziyo, iswekile, okanye ingxaki yokuxhuzula, nceda uziphathele amayeza afunekayo endibanweni ukuze unyamekele ezi ntswelo njengaxa usekhaya okanye ekhefini. Bekuya kuba bubulumko ngelungu lentsapho okanye umhlobo osondeleyo oyiqonda bhetele imeko ukuba abe kunye naloo mntu, ekubeni yena enokukwazi ukunikela uncedo olufunekayo.
9 Amathuba okunikela ubungqina obungacwangciswanga aya kuvela njengokuba nisiya kwaye nibuya endibanweni. Ngaba uya kukulungela ukwabelana nabanye ngenyaniso? Sonke, kuquka abantwana abancinane, sinokubandakanyeka ngokuhambisa amaphecana kubantu abatha ipetroli, abo bahlawulisayo endleleni nabanye odibana nabo eluhambeni. Amathuba okuhambisa amaphephancwadi, iincwadana, okanye olunye uncwadi kubantu abanomdla aya kuzivelela. Kulungele ukunikela ubungqina obungacwangciswanga kubantu abanokungafikelelwa ngeendlela zokushumayela eziqhelekileyo.
Ebudeni BeNdibano
10 Kwibala lendibano amasango aya kuvulwa nge-7:30 kusasa suku ngalunye. Izihlalo zinokugcinelwa kuphela abo bayinxalenye yentsapho yakho okanye abahamba nawe ngenqwelo-mafutha. Izihlalo ezikufutshane ziya kubekelwa abazalwana noodade abakhulileyo, yaye ezinye iindawo ziya kubekelwa abo bayimilwelwe nabo basebenzisa isitulo esinamavili sabaguli. Akusayi kulungiselelwa amagumbi asecaleni kwibala lendibano ukwenzela ukufaka abo bangalungelwayo yimeko-bume ethile. Suku ngalunye njengokuba ushiya indawo ohleli kuyo, nceda uqinisekise ukuba ukuthabathe konke okwakho.
11 Ukuze sikwazi ukuhlanganisana ngamaqela amakhulu kwiindibano zethu zesithili, kufuneka sisebenzisane nemithetho yasekuhlaleni, imithetho yomlilo neminye imithetho yokhuseleko. Ngoko ke, iinqwelwana zabantwana akufanele kuziwe nazo kwisakhiwo esihlanganisene kuso. Ezi ziyingozi kwiindawo ezixineneyo okanye phakathi kwezihlalo. Apho kunokwenzeka, iKomiti yeNdibano iya kubekela bucala indawo yokubeka iinqwelwana zabantwana. Noko ke, izihlalo zeentsana ezinokuhlala kwizihlalo ezisecaleni kwabazali zize zibotshelelwe zamkelekile. Ncedani nibambelele kwimiyalelo yabalindi ngokuzigcina zingenanto iipaseji.
12 Ngaba uza kubhaptizwa kwindibano yesithili? Kucwangciso lwangoMgqibelo kusasa, kuya kubekelwa bucala izihlalo ezithile zabo baza kubhaptizwa, yaye abalindi baya kukwalathisa kule ndawo. Ukuba kuyenzeka, nceda uhlale apho ngaphambi kokuba kuqalise ucwangciso. Yiza neBhayibhile yakho, iculo, itawuli nempahla yokungena emanzini endilisekileyo. Iibhulukhwe ezimfutshane zedenim ezingathi zigugile, izikipa ezinezibhengezo zentengiso, nezinye izinxibo ezifanayo azisifanelanga isihlandlo esinjalo ukundiliseka. Abadala abahlolisisa imibuzo ekwincwadi ethi Ubulungiseleli Bethu nabo baza kubhaptizwa bafanele baqiniseke ukuba ngamnye uyaziqonda ezi ngongoma. Ekubeni ubhaptizo lungumfuziselo wokuzinikela ngokobuqu kuYehova uThixo, bekungayi kufaneleka ngabo baza kubhaptizwa ukubambana ngezandla ngoxa bebhaptizwa.
13 Ninokuzisebenzisa iikhamera, nezixhobo zokurekhoda endibanweni. Noko ke, indawo ezibekwe kuyo okanye ukusetyenziswa kwazo akufanele kube ngumqobo ezipasejini, zisithe abanye, okanye ziphazamisane nokunikela ingqalelo kucwangciso. Azimele kuxokonyezelelwa kumbane okanye kwizandisi-lizwi—zimele zizisebenzele. Iqaqobana lamaNgqina liye leza endibanweni liphethe ikhamera neefilimu ukuze liqhube ushishino lokufota. Kunzima ukwazi ukuba ngubani osebenzisa ikhamera ukuze enze imali okanye ongayisebenziseli loo njongo. Ngenxa yoko, uMbutho ucela ukuba bonke abo bebesenza oku kwixa elidluleyo bakuyeke. Khumbulani ukuba, indawo yendibano yindawo yonqulo ngexesha lendibano yaye imcimbi yezoshishino ayimele kuxutyushwa apho. Ukunceda ukuphelisa olu qheliselo, abalindi bayalelwe ukuba bamise umda kufuphi neqonga.
14 Njengokuba ukusetyenziswa kweecellular phone neepager kuya kusanda, nceda uqinisekise ukuba aziyiphazamisi ingqalelo yakho kucwangciso okanye ingqalelo yabo bahleli kufutshane nawe. Ezi zixhobo azifanele zivunyelwe zikhale ngokuvakalayo ngoxa uhleli nabaphulaphuli. Ukuba kuvela imeko yongxamiseko, yazisa oyena mlindi ukufutshane ngoko nangoko. Bayifundisiwe indlela yokusingatha iimeko zongxamiseko. Nayiphi na iminxeba yongxamiseko ifanele yenziwe ngabo bagunyaziswe ngabalawuli bendibano, kungekhona ngabantu abasebenzisa iicellular phone zobuqu.
15 Ngenxa yokwenziwa lula kwezinto nokongiwa kwexesha, uMbutho uye wasicela ukuba siziphathele okwethu ukutya endibanweni suku ngalunye. Inkoliso yabazalwana iye yalulandela olu lwalathiso yaye iye yafumanisa ukuba ebudeni bonqumamo lwasemini, inokuhlala phantsi neentsapho zayo ize itye oko iziphathele kona ngolo suku. Abaninzi baye bathi amathuba okuphumla ebudeni bonqumamo lwasemini baze bachithe ixesha elongezelelekileyo nabazalwana noodade babo ayanandipheka. Oku kufuna kuthengwe ukutya neziselo kwangexesha zize zifakwe kwinto encinane okanye kwimantyi enokungena ngaphantsi kwesihlalo. Siyababongoza bonke abakhoyo ukuba balandele olu lwalathiso. Abazalwana baye babonwa beshiya iholo besiya kuthenga iziselo ne-ice cream kubathengisi basesitratweni ebudeni bocwangciso. Kufanele kunikelwe ingqalelo kwimfundiso yokomoya kunoku. Kwakhona, emva kocwangciso imigca emide eya kubathengisi yenza kuxinane emasangweni. Ngoko ke, sicela ukuba ngamnye azame ukuziphathela ukutya nesiselo sakhe endibanweni suku ngalunye kunokuxhasa abathengisi basesitratweni. Abanomdla abeze nawe endibanweni bafanele baziphathele okwabo ukutya. Izinto zeglasi neziselo ezinxilisayo azivumelekanga kwindawo yendibano.
16 Ngaba ungazinikela ngokuzithandela ukuze uncede ekucoceni le ndawo emva kocwangciso suku ngalunye? Okanye ngaba ungasebenza kwelinye lamasebe endibano? Ukuba unokunceda, yiza kwiSebe Lenkonzo Yamatsha-ntliziyo endibanweni. Abantwana abangaphantsi kweminyaka eli-16 ubudala bamkelekile ukuba baza kusebenza nomzali okanye omnye umntu omkhulu. Kakade ke, wonke ubani anganceda acoce le ndawo ngokuqinisekisa ukuba nayiphi na inkunkuma iyacholwa ize ilahlwe kwindawo efanelekileyo.
17 Siye safumana ukhokelo oluhle ngoko kusisinxibo nokuzilungisa okufanelekileyo kwiindibano zethu. Ngokomzekelo: Kule nkalo sinolwalathiso olukwisihlomelo soBulungiseleli Bethu BoBukumkani, sinemizekelo nemifanekiso kuncwadi lwethu, yaye okona kubalulekileyo ngaphezu kwako konke, sinoko kuthethwa nguYehova eBhayibhileni. (Rom. 12:2; 1 Tim. 2:9, 10) Abantu bayazi ukuba singoobani nesizathu sokuba sihlanganisene kwisixeko sabo. Ngaloo ndlela, isinxibo nokuzilungisa kwethu zibubungqina obunamandla. Inkoliso yabantu bakaYehova imisela umzekelo omhle kule nkalo. Noko ke, ngamaxesha athile sibona umoya wehlabathi kwisinxibo nakwindlela abazilungisa ngayo abathile abeze kwiindibano zethu. Iimpahla ezibonakalisa umzimba, ezinjengeelokhwe ezivuleke kakhulu ngasentla, iilokhwe nemibhinqo emifutshane, iilokhwe ezivelisa amalungu athile omzimba (sundresses) nezisikwe kakhulu ngezantsi zibangela ukuthandabuza enoba loo mntu uzixabisile izinto zokomoya. Eyona nto inomtsalane yendilisekileyo necocekileyo. Ngoko ke, iintloko-ntsapho zifanele zikuqonde oko amalungu eentsapho zazo aceba ukukunxiba. Oku kuya kuba njalo nokuba sesingasekho kwibala lendibano. Abo baneenxalenye kucwangciso bafanele bayiphaphele imilinganiselo yokunxiba. Ukunxiba amaqweqwe ebheji ngaphambili nasemva kocwangciso lwaloo mini kusifanisa ngakumbi noYehova nabantu bakhe abacocekileyo.—Thelekisa uMarko 8:38.
18 UKumkani osisilumko uSolomon waphefumlelwa ukuba abhale athi “ukumatha kubotshiwe entliziyweni yomntwana” yaye “ke yena umntwana oyekelelweyo udanisa unina.” (IMize. 22:15; 29:15) Ebudeni bocwangciso, amaNgqina aselula angabekwanga elisweni aye aphazamisa abazalwana noodade abafuna ukungenelwa kucwangciso. Ebudeni beendibano zonyaka ophelileyo, kwakudanisa ukubona iqela labantu—abakhulu nabakwishumi elivisayo—beyabula kwaye besiya kwizindlu zangasese ngokungeyomfuneko ngoxa kwakuqhubeka ucwangciso. Maxa wambi babengakhathali yaye bengazinanzi izibongozo zabalindi zokuba bahlale phantsi. Kwakhona, iqaqobana lolutsha lalizulazula kwisakhiwo yaye lidlala ngezixhobo nangemibhobho yamanzi yokucima umlilo. Umphathi wezinye zezi ndawo eMzantsi Afrika wacela uMbutho ukuba ubek’ iliso elibukhali kwiindwendwe ezazize endibanweni njengokuba abantu babehamba kwiindawo ezazingaqeshwanga nguMbutho. Kokokuqala ukuba kwenziwe isicelo esilolu hlobo yaye siyawahlazisa amaNgqina kaYehova. Kucace mhlophe ukuba olu lutsha aluzange lungenelwe kucwangciso lokomoya olwalulungiselelwe kucingwa ngalo. Ekubeni abazali bemele banikele ingxelo kuYehova ngehambo yabantwana babo, umama okanye utata angaqinisekisa ukuba abantwana bakhe baziphethe kakuhle yaye baphulaphule umyalelo kaYehova kuphela xa abantwana babo behleli kunye nabo. Ngaloo ndlela, abalindi baya kuthetha naye nabani na ophazamisayo, owonakalisa isakhiwo, okanye oyabulayo, baze babacele ukuba bayeke ukuphazamisa, babakhumbuze ngobuhlobo ukuba banikele ingqalelo kucwangciso.
19 Ngenxa yokuba wonke ubani amkelekile kwiindibano zethu, kububulumko ukukhusela abantwana nezinto zethu zobuqu. Abantwana bethu basisipho esixabisekileyo esivela kuYehova. Kodwa siyazi ukuba ihlabathi linomoya wokuxhaphaza kaSathana. Ngenxa yoko, nceda ubazi apho bakhoyo abantwana bakho ngamaxesha onke. Kwakhona, iikhamera, iingxowa eziphathwayo nezinye izinto ezixabisekileyo zifanele zisoloko zikuwe ngamaxesha onke ungazishiyi esihlalweni sakho. Qiniseka ukuba isithuthi sakho sitshixiwe, uze izinto zobuqu uzibeke ngasemva kwisithuthi okanye uhambe nazo. Oku kunciphisa isilingo sokuba ubani aqhekeze isithuthi sakho.
20 ISebe Lamagumbi lasekuhlaleni likulungele ukukunceda ukuba kuvela ingxaki ngendawo yakho yasehotele okanye kwindawo yokuhlala oyabelweyo. Nceda wazise iSebe Lamagumbi ngazo naziphi na iingxaki ngoxa usesendibanweni. Abazalwana baya kukuvuyela ukukunceda ucombulule le ngxaki ukuze uqhubeke unandipha indibano. Kwakhona, ngokuphathelele amagumbi, nceda uphawule oku kulandelayo:
▪ Nceda uphawule amaxesha okufika nawokuhamba kwihotele ohlala kuyo. Ukuba zicelwe kusengaphambili, iihotele zinokuvuma ukuba ufike ngaphambi kwexesha lokufika okanye uhambe ngemva kwexesha eliqhelekileyo lokuhamba.
▪ Umabonwakude neevidiyo ezifumaneka ezihotele zidla ngokuba namajelo abonisa amanyala. Ukuba ziceliwe, inkoliso yeehotele iya kuwavala amajelo athile okanye ezinye inkqubo kwigumbi ohlala kulo ngexesha lobukho bakho. Njengasekhaya, nceda ubek’ iliso kwindlela abamsebenzisa ngayo abantwana bakho umabonwakude.
21 Kuyakhuthaza ukubona abazwalana noodade bebhala amanqaku ebudeni bocwangciso lwendibano. Amanqaku amafutshane aya kukunceda unikele ingqalelo yaye ukhumbule iingongoma eziziintloko. Ukuhlolisisa amanqaku akho kamva kunye nentsapho okanye izihlobo kukwenza ucamngce ngeembalasane zendibano ukuze ungazilibali.
22 Abantu bakaYehova bebesoloko benikela ngesisa kwizilangazelelo zobuthixo. (Eks. 36:5-7; 2 Kron. 31:10; Rom. 15:26, 27) Iminikelo yenu yokuzithandela isetyenziselwa ukuhlawula iindleko zokuqesha izakhiwo ezikhulu ekuqhutyelwa kuzo iindibano. Ukuba unikela ngetsheki, nceda ubhale ukuba ihlawulwe kwi-“Watch Tower Convention.” Inkoliso yeendawo zendibano zokumisa inqwelo-mafutha zifumaneka ngomnikelo othile oqingqiweyo. Bambi abazalwana baye bema ngelithi amatikiti okumisa amele asebenze kwiindawo zendibano ezingaphezu kwenye. Kubi ukubona abanye bebonakalisa esi simo sengqondo sehlabathi. Nceda uphawule ukuba itikiti lokumisa inqwelo-mafutha lisebenza kwimpela-veki elaliza kusetyenziselwa yona kuphela alisebenzi kwenye indibano.
23 Njengokuba kubhaliwe kuAmos 3:7, uYehova wathi ‘akakhe enze into, engathanga aluhlakaze ucweyo lwakhe kubakhonzi bakhe abaprofeti.’ ‘NjengoMtyhili weemfihlakalo,’ uYehova uye wabhala eBhayibhileni iziprofeto ezininzi eziye zazaliseka ngokuchanileyo nangokupheleleyo. (Dan. 2:28, 47) Kuseza kuzaliseka amadinga azukileyo. IiNdibano ZeSithili zowe-1999 ‘Zelizwi LikaThixo Lesiprofeto’ ziza kulomeleza ukholo lwakho kumadinga kaThixo. Kuphulaphule ngenyameko oko likuthetha kuwe ilizwi likaYehova. Sebenzisa oko uza kukubona uze ukuve—kubulungiseleli, ebandleni nakubomi bakho buqu. Sithandazela intsikelelo kaYehova etyebileyo kuwo onke amalungiselelo akho okubakho suku ngalunye kweli dini lityebileyo lokomoya!
[Blurb on page 3]
Ceba ukubakho lonke usuku lwangoLwesihlanu, lwangoMgqibelo nolwangeCawa!