Ngaba Uyafuduka?

Ukuba impendulo yaloo mbuzo nguewe, zininzi izinto wena nabanye ekufuneka niqale nizenze. Ngokulandela la manyathelo asisiseko andlalwe ngezantsi, uya kukhawuleza uzinze kwibandla lakho elitsha.

(1) Ukwazi nje kwakho apho uya khona, unobhala webandla okulo ngoku unokukwazi ukufumana idilesi yeHolo yoBukumkani yebandla lakho elitsha. Wakuba ufikile kuloo mmandla, ngoko nangoko khangela iholo uze uqiniseke ngexesha leentlanganiso zebandla. Ukuba loo Holo yoBukumkani ayisetyenziswa libandla elinye, cela abadala ukuba bakuxelele ukuba uhlala kumhlaba weliphi ibandla. Musa ukulibazisa ukuya ezintlanganisweni nasekuqhelaneni nabadala basekuhlaleni.

(2) Oonobhala bebandla lakho langoku kwakunye nelitsha baya kusebenzisana ekufuduseni amaqweqwe eNgxelo Yomvakalisi Webandla lakho nawentsapho yakho. Ileta yokwazisa iya kuthunyelwa kubadala bebandla lakho elitsha. (Bona Isingxobo Semibuzo soBulungiseleli Bethu BoBukumkani bukaFebruwari 1991.) IKomiti Yenkonzo Yebandla yalapho ifanele yazise umqhubi wesifundo sencwadi ofanelekileyo ngokufika kwakho ukuze aqhagamshelane nawe yaye akuncede ukuze wazi isifundo sencwadi seqela esitsha.—Rom. 15:7.

(3) Bonke abavakalisi kwibandla lakho elitsha banendima ebangel’ umdla abafanele bayidlale—eyokuqhelana nawe nokukwenza uzive usekhaya. (Thelekisa eyesi-3 kaYohane 8.) Kakade ke, oku kuthetha ukuba umele ubekho kwiintlanganiso ukuze unandiphe ukhuthazo nokwakhana nabazalwana noodade.

(4) Akufanele ulinde kude kugqitywe wonke umsebenzi wokufuduka obandakanyekileyo ngaphambi kokuba ube nesabelo kubulungiseleli basentsimini nebandla lakho elitsha. Njengokuba ubeka izilangazelelo zoBukumkani kuqala, ezinye izinto ziya kunyanyekelwa yaye uya kuziva wonwabe gqitha kule ndawo intsha. (Mat. 6:33) Xa uzinzile kwikhaya lakho elitsha, mhlawumbi uya kufuna ukumema abathile ebandleni ukuba bakutyelele ukuze niqhelane ngakumbi.—Rom. 12:13b.

Ukufuduka ngumsebenzi omkhulu. Noko ke, xa wonke ubani obandakanyekileyo ekwenza konke okunconyelwayo, akusayi kubakho kuphazamiseka ngokomoya. Bonke baya kuchukumiseka luthando lwethu lobuzalwana bobuKristu.