Imibuzo Evela Kubafundi

Wambi amaNgqina kaYehova aye afumana umsebenzi obandakanya izakhiwo okanye iindawo zonqulo. Yintoni imbono yeZibhalo ngomsebenzi onjalo?

Lo mbandela usenokuchaphazela amaKristu athi ngokunyanisekileyo afune ukusebenzisa eyoku-1 kaTimoti 5:8, ebonisa ukubaluleka kokunyamekela kukabani indlu yakhe ngezinto eziphathekayo. Ngoxa ngokuqinisekileyo amaKristu efanele asebenzise eso siluleko, oko akuwavumeli ukuba amkele naluphi na yaye zonke iintlobo zomsebenzi, kungakhathaliseki ukuba unjani na. AmaKristu ayayiqonda imfuneko yokukuxhalabela ukuthanda kukaThixo. Ngokomzekelo, umnqweno wokufuna kwendoda ukuxhasa intsapho awuyi kuyivumela yaphule oko kuthethwa yiBhayibhile ngokuziphatha okubi okanye ukubulala. (Thelekisa iGenesis 39:4-9; Isaya 2:4; Yohane 17:14, 16.) Ibalulekile nento yokuba amaKristu enze ngokuvumelana nomyalelo wokuba aphume kwiBhabhiloni Enkulu, ubukhosi behlabathi bonqulo lobuxoki.—ISityhilelo 18:4, 5.

Emhlabeni wonke, abakhonzi bakaThixo bajamelana nothotho lweemeko zengqesho. Bekungayi kuba sengqiqweni yaye kube ngaphaya kwamandla ethu ukuzama ukudwelisa konke okusenokwenzeka size sibeke imithetho ngokuphathelele oku. (2 Korinte 1:24) Nangona kunjalo, masikhe sikhankanye ezinye iinkalo amaKristu amele aziqwalasele xa esenza izigqibo zobuqu ngengqesho. Ezi ngongoma zazikhe zakhankanywa ngokufutshane kwiMboniselo kaJanuwari 1, 1983, kwinqaku elalixubusha ngokungenelwa kwisazela sethu esisinikwe nguThixo. Kwibhokisi kwaphakanyiswa imibuzo emibini engundoqo kwaza kwadweliswa ezinye iingongoma eziluncedo.

Umbuzo wokuqala ongundoqo uthi: Ngaba loo msebenzi uyagwetywa yiBhayibhile? Igqabaza ngoku, le Mboniselo yakhankanya ukuba iBhayibhile iyabugweba ubusela, ukusetyenziswa kakubi kwegazi nonqulo-zithixo. UmKristu umele awuphephe umsebenzi okhuthaza ngokungqalileyo imisebenzi eyalelwayo nguThixo, njengaleyo sele ikhankanyiwe.

Umbuzo wesibini uthi: Ngaba ukwenza loo msebenzi bekuya kumenza ubani abe lihlakani kwisenzo esigwetyiweyo? Ngokucacileyo, umntu oqeshwe kwindawo yokungcakaza, ikliniki yokuqhomfa okanye kwindlu yonoongogo ebeya kuba lihlakani kwisenzo esingavisisaniyo neZibhalo. Kwanokuba umsebenzi wakhe wamihla le ibikukutshayela nje imigangatho okanye ukuphendula umnxeba, ebeya kuba ufaka isandla kwisenzo esigwetywayo liLizwi likaThixo.

AmaKristu amaninzi aye ajamelana nezigqibo ngengqesho akufumanise kuluncedo ukuhlolisisa nje le mibuzo ukuze enze isigqibo.

Ngokomzekelo, ngokusuka kule mibuzo mibini, ubani unokusibona isizathu sokuba umnquli wokwenyaniso engenakuba ngumqeshwa ongqalileyo wentlangano yonqulo lobuxoki, esebenzela icawa kwaye asebenze kuyo. ISityhilelo 18:4 sisiyalela sisithi: “Phumani kuyo, bantu bam, ukuba anifuni kwabelana nayo ngezono zayo.” Umntu ebeya kuba wabelana ngemisebenzi nezono zeBhabhiloni Enkulu ukuba ebeqeshwe ngokusisigxina kunqulo olufundisa ubuxoki. Nokuba umqeshwa unyamekela isitiya, uyacoca, uyalungisa okanye uphatha imali, umsebenzi wakhe ubuya kuxhasa unqulo olungqubanayo nonqulo oluyinyaniso. Ukongezelela koko, abantu abaya kumbona lo mqeshwa esebenzela ukuba lo cawa ibe ntle, eyihlaziya okanye ephumeza usukelo lonqulo lwayo ngokusengqiqweni bebeya kumbandakanya nolo nqulo.

Noko ke, kuthekani ngomntu ongaqeshwanga ngokusisigxina ecaweni okanye kwintlangano yonqulo? Mhlawumbi ubizelwe nje umsebenzi ongxamisekileyo wokulungisa umbhobho wamanzi ogqabhukileyo kumgangatho ongaphantsi wecawa. Ngaba oko bekungayi kwahluka ekwenzeni isivumelwano, esinjengokufulela okanye ukugquma uphahla lwendlu yecawa?

Kwakhona zininzi iinkalo ezahlukahlukeneyo ezimele ziqwalaselwe. Ngoko ke, masikhe siphinde sihlolisise iinkalo ezintlanu ezingakumbi ezachazwa yile Mboniselo:

1. Ngaba loo msebenzi unikela inkonzo ebantwini into engaphosakele ngokweZibhalo? Masenze umzekelo ngonoposi. Ukuzisa kwakhe iposi akunakuthetha ukuba ukhuthaza uqheliselo olubi ukuba esinye sezakhiwo ayizisa kuzo yicawa okanye ikliniki yokuqhomfa. UThixo wenza ilanga lakhe likhanye kuzo zonke izakhiwo, kuquka nesecawa okanye loo kliniki. (IZenzo 14:16, 17) UmKristu ongunoposi usenokugqiba ngelithi wenza inkonzo yoluntu lonke, yonke imihla. Kunokwenzeka okufanayo nangomKristu owenza umsebenzi wongxamiseko—umlungisi wemibhobho yamanzi obizelwe ukuvala amanzi agqabhuke ecaweni okanye osebenza kwinqwelo yezigulana ebizelwe ukunceda umntu osuke wawa ngoxa esecaweni. Usenokukugqala oku njengenkonzo yelo xesha yokunceda abantu.

2. Ubani unegunya elingakanani koko kwenziwayo? UmKristu ongunovenkile ebengasayi kuvuma nakancinane ukuthenga nokuthengisa izithixo, amakhubalo, imidiza, okanye iisoseji ezenziwe ngegazi. Njengomniniyo ilawulwa nguye. Abantu basenokumcenga ukuba athengise imidiza okanye izithixo ukuze enze ingeniso, kodwa umele enze ngokuvumelana neenkolelo zeZibhalo. Kwelinye icala, umKristu oqeshwe kwivenkile enkulu yokutya usenokusetyenziswa kumatshini wokubala nokwamkela imali, amenyezelise imigangatho okanye agcine iincwadi. Akanagunya koko kuza kuthengwa kuze kuthengiswe, nokuba ezinye kwezi zinto azamkelekanga, njengemidiza okanye izinto ezisetyenziswa ngeeholide zonqulo.a (Thelekisa uLuka 7:8; 17:7, 8.) Oku kusizisa kwingongoma elandelayo.

3. Loo mntu ubandakanyeke ukusa kuwuphi umlinganiselo? Masibuyele kumzekeliso wevenkile. Mhlawumbi umqeshwa wabelwe ukusebenza kumatshini wokubala nokwamkela imali okanye azalise iishelufu kuphela ngamaxesha athile apho athi aphathe imidiza okanye izinto zonqulo; okuthetha ukuba oko kuyinxalenye encinane yomsebenzi wakhe. Noko ke, kwahluke gqitha oko kumqeshwa okwakule venkile osebenza kwindawo yecuba! Mihla le kumsebenzi wakhe, ujamelana nento echaseneyo neenkolelo zamaKristu. (2 Korinte 7:1) Oku kuzekelisa isizathu sokuba umkhamo obandakanyeke ngawo umele uhlolisiswe xa kusenziwa isigqibo ngokuqeshwa.

4. Intlawulo ivela kubani okanye wenziwa phi lo msebenzi? Umele uqwalasele iinkalo ezimbini. Ukuze iphucule indlela ejongwa ngayo luluntu, ikliniki yokuqhomfa igqiba ekubeni ihlawule umntu wokucoca izitrato zaselumelwaneni. Uhlawulwa yikliniki yokuqhomfa, kodwa akasebenzi apho, yaye akukho mntu umbona kuloo kliniki imini yonke. Kunoko, bambona esenza umsebenzi karhulumente ongangqubaniyo neZibhalo, kungakhathaliseki ukuba uhlawulwa ngubani. Kwelinye icala. Kwilizwe apho ubunongogo busemthethweni, isebe lempilo likarhulumente lihlawula umongikazi osebenza kwindlu yoonongogo, abaxilonge ukuze anciphise izifo ezidluliselwa ngesini. Nangona ehlawulwa lisebe lempilo likarhulumente, usebenza kwindlu yoonongogo ngokupheleleyo, esenza ukuziphatha okubi kukhuseleke, kuze kwamkeleke ngakumbi. Le mizekelo isibonisa isizathu sokuba indawo emhlawulayo nasebenza kuyo ubani zimele ziqwalaselwe.

5. Ukwenza lo msebenzi kunawuphi umphumo; ngaba uya kusenzakalisa isazela salowo uwenzayo okanye ubakhubekise abanye? Simele sicinge ngesazela, esethu nesabanye. Enoba umsebenzi othile (kuquka indawo owenziwa kuyo nalapho ivela khona intlawulo) ubonakala wamkelekile kumaKristu amaninzi, omnye usenokuvakalelwa kukuba ubuya kusiphatha kakubi isazela sakhe. Umpostile uPawulos, owamisela umzekelo omhle, wathi: “Sinenkoloseko yokuba sinesazela esinyanisekileyo, njengoko sinqwenela ukuziphatha ngokunyaniseka kwizinto zonke.” (Hebhere 13:18) Simele sikuphephe ukwenza umsebenzi oza kusiphazamisa; sekunjalo, asimele sibagxeke abanye abanesazela esahlukileyo kwesethu. Ngokufanayo, umKristu usenongakuboni kungqubana neBhayibhile ukwenza kwakhe umsebenzi othile, kodwa eqonda ukuba kuya kubaphazamisa gqitha abaninzi ebandleni nasekuhlaleni. UPawulos wabonakalisa isimo sengqondo esihle kumazwi akhe athi: “Akukho ndlela esithi ngayo sinikele nawuphi na unobangela wesikhubekiso, ukuze kungafunyanwa siphoso kubulungiseleli bethu; kodwa ngandlela zonke siyazincomela njengabalungiseleli bakaThixo.”—2 Korinte 6:3, 4.

Ngoku ke masikhe sibuyele emva kowona mbuzo ungundoqo ngokusebenza kwisakhiwo secawa, njengokufakela iifestile ezintsha, ukucoca ikhaphethi, okanye ukulungisa igumbi lobushushu. Zisenokubandakanyeka njani ezi nkalo zingasentla?

Khumbula inkalo yegunya. Ngaba loo nkampani yeyomKristu okanye ngumphathi wayo yena unokugqiba enoba umele wenziwe loo msebenzi wasecaweni kusini na? Ngaba umKristu onelo gunya ebeya kufuna ukwabelana neBhabhiloni Enkulu ngokwamkela loo msebenzi okanye enze isivumelwano sokunceda unqulo oluthile lukhuthaze unqulo lobuxoki? Ngaba oko akunakufaniswa nokugqiba kukabani ukuthengisa imidiza okanye izithixo kwivenkile yakhe?—2 Korinte 6:14-16.

Ukuba umKristu ngumqeshwa nje ongenakwenza zigqibo ngohlobo lwemisebenzi eyamkelekileyo, kukho ezinye iinkalo ezimele ziqwalaselwe, njengendawo nomkhamo abandakanyeke ukusa kuwo. Ngaba umqeshwa ucelwe nje ukuba ase okanye alungise izitulo ezitsha kweso sihlandlo okanye anikele inkonzo eluntwini, njengaxa umcimi-mlilo ecima umlilo ecaweni ngaphambi kokuba unwenwe? Abaninzi baya kukubona oku kwahlukile kumqeshwa ochitha ixesha elide epeyinta icawa okanye osebenza egadini ngokusisigxina eyenza ibe ntle. Ukuba lapho rhoqo okanye uqhagamshelwano olunjalo kangangexesha elide lusenokwandisa amathuba okunxulunyaniswa kwaloo mKristu ngabaninzi nonqulo athi akaluxhasi, nto leyo esenokubakhubekisa.—Mateyu 13:41; 18:6, 7.

Siye saqwalasela iinkalo eziliqela ezibalulekileyo ngokuphathelele ingqesho. Ezi ziye zanikelwa ngenxa yombuzo ongqalileyo obandakanya unqulo lobuxoki. Sekunjalo, zisenokuqwalaselwa ngokufanayo ngokuphathelele eminye imisebenzi yengqesho. Imeko nganye, ifanele ihlolisiswe ngomthandazo, kunikelwa ingqalelo ekhethekileyo—mhlawumbi kwiinkalo ezahlukileyo—zemeko leyo. Iingongoma ezinikelwe ngasentla sele zincede amaKristu amaninzi anyanisekileyo enza izigqibo zokuthembeka ezibonisa indlela anqwenela ngayo ukuhamba ngokuthe tye nangobulungisa phambi koYehova.—IMizekeliso 3:5, 6; Isaya 2:3; Hebhere 12:12-14.

[Umbhalo osemazantsi]

Uyakhumbula na?

Ngaba uye wakuxabisa ukufunda iimpapasho zakutshanje zeMboniselo? Ngoko, khangela enoba unokukwazi kusini na ukuphendula le mibuzo ilandelayo:

◻Kutheni ukusebenzisa kukaPawulos ibinzana elithi “singoonozakuzaku abasendaweni kaKristu” kufaneleka kangaka kumaKristu athanjisiweyo? (2 Korinte 5:​20)

Mandulo, ubukhulu becala oonozakuzaku babekhutshwa xa kujongenwe ngezikhondo zamehlo ukuze baye kufuna indlela yokunqanda imfazwe. (Luka 14:​31, 32) Ekubeni ihlabathi loluntu olunesono lahlukanisiwe noThixo, uthumela oonozakuzaku bakhe abathanjisiweyo ukuze bazise abantu ngokuxolelaniswa, ebabongoza ukuba basukele uxolo noThixo.​—⁠12/15, iphepha 18.

◻ Ziziphi izinto ezine ezomeleza ukholo luka-Abraham?

Eyokuqala, wabonakalisa ukholo lwakhe kuYehova ngokuthobela xa uThixo wayethetha (Hebhere 11:⁠8); okwesibini, ukholo lwakhe lwalunxulumene ngakumbi nethemba awayenalo (Roma 4:​18); okwesithathu, uAbraham wayethetha ngokufuthi noYehova; yaye okwesine, uYehova wamxhasa uAbraham xa wayelandela ulwalathiso lwakhe. Izinto ezinjalo zinokulomeleza ukholo lwethu namhlanje.​—⁠1/1, iphepha 17, 18.

◻ Lithetha ntoni ibinzana elithi “ungasingenisi ekuhendweni”? (Mateyu 6:​13)

Sicela uThixo ukuba angasivumeli ukuba soyisakale xa sihendelwa ukuba singamthobeli. UYehova unokusalathisa ukuze singanikezeli yaye singagaganyelwa nguSathana, “lowo ungendawo.” (1 Korinte 10:​13)​—⁠1/15, iphepha 14.

◻ Yintoni ubani amele ayenze ukuze axolelwe nguThixo ngenxa

yesenzo esibi asenzileyo?

Ukuvuma izono zethu kuThixo kumele kukhatshwe kukuzisola ‘naziziqhamo ezifanele inguquko.’ (Luka 3:⁠8) Umoya wenguquko nomnqweno wokulungisa oko bekungalunganga nawo uya kushukumisela ubani ukuba afune ukuncedwa ngokomoya ngabadala abangamaKristu. (Yakobi 5:​13-15)​—⁠1/15, iphepha 19.

◻ Kutheni sifanele sizabalazele ukuthobeka?

Umntu othobekileyo unomonde yaye uzeka kade umsindo yaye akazicingeli kakhulu. Ukuthobeka kukwenzela abahlobo bokwenene abakuthandayo. Okona kubaluleke ngakumbi, kuzisa iintsikelelo zikaYehova. (IMizekeliso 22:⁠4)​—⁠2/1, iphepha 7.

◻ Nguwuphi umahluko omkhulu ophakathi kokufa kukaYesu nokuka-Adam?

UAdam wayefanelwe kukufa, kuba kaloku akazange amthobele ngabom uMdali wakhe. (Genesis 2:​16, 17) Ngokwahlukileyo koko, uYesu wayengakufanelanga kwaphela ukufa, kuba yena “akazange enze sono.” (1 Petros 2:​22) Ngoko xa uYesu wafayo, wayenento ethile enexabiso elikhulu awayengenayo umoni onguAdam xa wayesifa​—⁠ilungelo lokuphila ubomi obufezekileyo. Ngaloo ndlela, ukufa kukaYesu kwaba lixabiso ledini ngokukhulula abantu.​—⁠2/15, iphepha 15, 16.

◻ Embonweni kaHezekile wesiprofeto, isixeko sasifuzisela ntoni?

Ekubeni isixeko simi phakathi kwilizwe elingengcwele (elihlanjelweyo), kumele ukuba siyinto elapha emhlabeni. Ngoko ke, sibonakala sifuzisela ulawulo lwasemhlabeni oluyingenelo kuye wonk’ ubani oyinxalenye yebutho labantu abangamalungisa abasemhlabeni.​—⁠3/1, iphepha 18.

◻ Kwakutheni ukuze uYesu ahlambe iinyawo zabapostile bakhe xa wayebhiyozela iPasika yowama-33 C.E.?

UYesu wayengamiseli isithethe sokuhlanjwa kweenyawo. Kunoko, wayenceda abapostile bakhe ukuba babe nesimo sengqondo esitsha​—⁠eso sokuthobeka nokuvuma ukwenza owona msebenzi uphantsi bewenzela abazalwana babo.​—⁠3/1, iphepha 30.

◻ Xa sifundisa abanye, yintoni ebalulekileyo ngaphezu kobuchule obungokwemvelo?

Ziimpawu esinazo noqheliselo lokomoya esiye saluhlakulela olunokuxeliswa ngabafundi. (Luka 6:​40; 2 Petros 3:​11)​—⁠3/15, iphepha 11, 12.

◻ Izithethi zasesidlangalaleni zinokuyiphucula njani indlela ezizilesa ngayo iZibhalo?

Ngokuqhelisela. Ewe, ngokufunda ngokuvakalayo ngokuphindaphindiweyo de zikwazi ukufunda ngokutyibilikayo. Ukuba zikho iikhasethi zeBhayibhile, kububulumko ukuphulaphula indlela umfundi agxininisa ngayo nokuguquguquka kwelizwi lakhe ukuze aphawule nendlela amagama abantu namagama angaqhelekanga abizwa ngayo.​—⁠3/15, iphepha 20.

◻ ‘Umoya ubuyela njani kuThixo’ ekufeni komntu? (INtshumayeli 12:⁠7)

Ekubeni umoya ungamandla obomi, ‘ubuyela kuThixo’ ngengqiqo yokuba nawaphi na amathemba obomi bexesha elizayo baloo mntu axhomekeke ngokupheleleyo kuThixo. NguThixo kuphela onokubuyisela umoya, okanye amandla obomi, ukuze umntu aphile kwakhona. (INdumiso 104:​30)​—⁠4/1, iphepha 17.