Unokuyoyisa Le Miqobo!

INQWELO-MOYA enkulu inokuthwala amakhulu abantu kunye neetoni zomthwalo. Kwenzeka njani ukuba inqwelo-ntaka enzima ngolu hlobo ifukuke emhlabeni? Kulula gqitha, incedwa ngamandla okufukula.

Xa inqwelo-moya ibaleka kwindlela yayo, umoya udlula ngentla nangaphantsi kwaloo maphiko ayo angqukuva. Oku kuvelisa amandla okuyifukula ekuthiwa yilift. Xa la mandla okufukula inqwelo-moya anele, le nqwelo-ntaka inokuwushiya umhlaba ize ibhabhe. Kakade ke, inqwelo-moya enomthwalo omninzi ngokugqithiseleyo ayinakuba nawo amandla awaneleyo okuyifukula ukuze ibhabhe.

Nathi sisenokusindwa ngumthwalo omkhulu ngokugqithiseleyo. Kwiinkulungwane ezadlulayo, uKumkani uDavide wathi ‘ubugwenxa bakhe bumsinda njengomthwalo onzima.’ (INdumiso 38:4) Ngendlela efanayo, uYesu Kristu walumkisa ngokusindwa ngamaxhala obomi. (Luka 21:34) Iingcinga neemvakalelo ezingakhiyo zisenokusisinda ukusa kwinqanaba lokuba kusenokubonakala kunzima “ukubhabha.” Ngaba nawe usindwa ngaloo ndlela? Okanye ngaba uye wafumana kukho umqobo othile othintela ukukhula kwakho ngokomoya? Ukuba kunjalo, yintoni enokukunceda?

Ngaba Ukruqukile?

Ukukruquka—okusisikhalazo esiqhelekileyo namhlanje—kusenokuba ngumqobo osengqondweni, kwanakubantu bakaYehova abathile. Abaselula ngokukodwa banotyekelo lokucekisa imisebenzi ethile abayigqala njengekruqulayo. Ngaba maxa wambi uye uvakalelwe ngolo hlobo ngeentlanganiso zamaKristu? Ukuba kunjalo, unokwenza ntoni ukuze ukuya kwakho ezintlanganisweni kube kokuvuselelayo?

Ukuba nenxaxheba kungundoqo. UPawulos wambhalela oku umfana onguTimoti: “Ziqhelise ukuhlonela uThixo. Kuba eyeyomzimba ingqeqesho inceda kancinane; ke kona ukuhlonela uThixo kunceda ngako konke, kunedinga lobomi bakalokunje, nobobo buza kubakho.” (1 Timoti 4:7, 8) Incwadi yokuqeqesha umzimba ibinokukruqula yaye ingaxabiseki kangako ukuba besingalulandeli uqheliselo eluncomelayo. Iintlanganiso zamaKristu zilungiselelwe ukuba ziqeqeshe iingqondo zethu yaye ziya kukwenza oko ukuba siyalungiselela size sibe nenxaxheba. Oku kuba nenxaxheba kuya kuzenza iintlanganiso zibe yingenelo zize zinike umdla.

Ngokuphathelele oku, ibhinqa eliselula elingumKristu uMara lathi: “Ukuba andizilungiseleli iintlanganiso, andizinandiphi. Noko ke, xa ndilungiselele kwangaphambili, ingqondo nentliziyo yam zikulungela ngakumbi ukuphulaphula. Iintlanganiso ziba nentsingiselo ngakumbi, yaye ndikhangela phambili ekugqabazeni.”

Ukufunda ukuphulaphula nako kuyanceda. Ukuphulaphula umculo omnandi kulula yaye kuba mnandi zisuka nje. Kodwa asilulo lonke ulwaneliseko olufumaneka ngokukhawuleza. Ulwaneliseko silufumana kucwangciso lweentlanganiso kuphela xa siphulaphula ngenyameko koko kuthethwayo. UmKristu ogama linguRachel wathi: “Xa isithethi singenahlombe, kufuneka ndinikele ingqalelo ngokugqithiseleyo. Umgaqo endizibekele wona ngothi, ‘Xa intetho inganiki mdla, kufuneka ndinikele ingqalelo ethe chatha.’ . . . Ndinikela ingqalelo ekhethekileyo kwizibhalo, ndizama ukungenelwa kuzo kangangoko kunokwenzeka.” NjengoRachel, kufuneka siziqeqeshe ukuze siphulaphule. Incwadi yeMizekeliso ithi: “Nyana wam, bubazele indlebe ubulumko bam, ingqondo yam uyithobele indlebe yakho.”—IMizekeliso 5:1.

Inkcazelo ethile enikelwa ezintlanganisweni isenokuba ngandlel’ ithile iyaphindaphindwa. Oko kuyimfuneko! Bonke abakhonzi bakaThixo bafuna ukukhunjuzwa. Inyama engafezekanga notyekelo lwayo oluphosakeleyo nokulibala, ifuna naluphi na uncedo enokulufumana. Umpostile uPetros ‘wayengakuyeki ukuhlala ebakhumbuza ngezo zinto, noko babezazi, bezimasekile enyanisweni.’ (2 Petros 1:12) UYesu naye wachaza ukuba “umbhali wonke . . . ufana nomntu ongumninindlu, orhola ebuncwaneni bakhe izinto ezintsha kwanezindala.” (Mateyu 13:52) Ngaloo ndlela, ngoxa iintlanganiso zethu zisinika iingcamango eziqhelekileyo zeZibhalo, okanye ‘izinto ezindala,’ kusoloko kukho ezinye ‘izinto ezintsha’ zokusivuyisa.

Ukuzimisela ukuzuza ngokuzeleyo kwiintlanganiso kusenokuphumela ekukhuthazekeni ngokwenene ngokomoya. UYesu wathi: “Banoyolo abangamahlwempu ngomoya.” (Mateyu 5:3) Isimo sengqondo esinjalo ngokutya okunik’ impilo kokomoya okufumaneka ezintlanganisweni siya kukuphelisa ukukruquka.—Mateyu 24:45-47.

Ngaba Utyhafiswa Ngumzekelo Ombi?

Ngaba uye wakhutyekiswa yihambo yomntu othile ebandleni lakho? Mhlawumbi uye wazibuza ukuba ‘Kwenzeka njani ukuba umzalwana aziphathe ngolu hlobo aze aqhubeke enodumo oluhle?’ Iingcinga ezinjalo zisenokuba yimiqobo esengqondweni, zisenza singakuqondi ukuxabiseka kolwalamano olulungileyo esinokuba nalo nabantu bakaThixo.—INdumiso 133:1.

Mhlawumbi abathile kumalungu ebandla laseKolose babenengxaki efanayo. UPawulos wabayala: “Nixolelana, ukuba ubani uthi abe nokusola ngakubani; njengokuba naye uKristu wanixolelayo, yenjani njalo nani.” (Kolose 3:13) UPawulos wayeqonda ukuba abathile kumaKristu aseKolose babesenokuba banehambo engalunganga yaye ngaloo ndlela banika abanye isizathu esibambekayo sokukhalaza. Ngoko asimele sothuke ngokugqithe emgceni ukuba omnye wabazalwana okanye woodade uswele uphawu oluthile lwamaKristu. UYesu wanikela isiluleko esisengqiqweni ngendlela yokuzinzisa iingxaki ezinzulu. (Mateyu 5:23, 24; 18:15-17) Kodwa kumaxesha amaninzi, sinokusuka nje sibunyamezele ubuthathaka babo sikhonza kunye nabo size sibaxolele. (1 Petros 4:8) Enyanisweni, ukuzisingatha ngolo hlobo izinto kunokuba yingenelo kuthi nakwabanye. Kutheni kunjalo nje?

IMizekeliso 19:11 ithi: “Ingqiqo yomntu imenza azeke kade umsindo; sisihombo sakhe ukulugqitha ukreqo.” Hayi indlela ekulunge ngaphezulu ngayo ukuxolela kunokuvumela umsindo nengqumbo zikongamele! USalvador, umdala owaziwa ngokuba nomoya wothando, wathi: “Xa umzalwana endiphatha kakubi okanye ethetha into ethile engalunganga, ndiye ndizibuze: ‘Ndinokumnceda njani umzalwana wam? Ndingakuphepha njani ukuphulukana nolwalamano lwakhe oluxabisekileyo?’ Ndisoloko ndikuphaphele indlela ekulula ngayo ukuthetha into ephosakeleyo. Ukuba ubani uthetha nje engacinganga, esona sicombululo ibiya kuba kukuwaginya loo mazwi aze aqalise ukuthetha kwakhona. Kodwa oko akunakwenzeka, ngoko ndithabatha elona nyathelo lilungileyo lilandelayo ndize ndingawahoyi loo mazwi. Ndisuka ndiwagqale njengokudubuleka okubangelwa yinyama engafezekanga kunokuba ndiwagqale njengabonisa ubuntu bokwenene bomzalwana wam.”

Unokuvakalelwa kukuba kulula ukukuthetha oku kunokukwenza. Kodwa okuninzi kuxhomekeke kwindlela esicinga ngayo. UPawulos wanikela esi siluleko: “Iinto zonke ezithandekayo, . . . zithelekeleleni ezo zinto.” (Filipi 4:8) Igama elithi “ezithandekayo” eneneni lithetha into “evuselela uthando.” UYehova ufuna siqwalasele okulungileyo ebantwini, sinikele ingqalelo kwizinto ezisenza sivuselele uthando kunokuba sibe nengqumbo. Yena ngokwakhe usibekela umzekelo omhle ngokuphathelele oku. Umdumisi wasikhumbuza ngako oku, esithi: “Ukuba uthe wabunqala ubugwenxa, Yehova, ngubani na ongaba nokuma, Nkosi?”—INdumiso 103:12; 130:3.

Kuyinyaniso ukuba ngamanye amaxesha ihambo yomzalwana othile isenokuba yedanisayo, kodwa uninzi lwabo sinqula kunye nabo lumisela imizekelo emihle yendlela yokuphila yamaKristu. Ukuba siyakukhumbula oku, njengoDavide siya kukuvuyela ‘ukubulela kakhulu kuYehova ngemilomo yethu, simdumise phakathi kwabaninzi.’—INdumiso 109:30.

Ngaba Kubonakala Kunzima Ukuba LiNgqina?

Okubuhlungu kukuba bambi abakaqalisi ukudumisa uYehova ngenxa yomqobo othile osengqondweni. Amadoda amaninzi angengawo amaNgqina kaYehova azondla ngenkuthalo iintsapho zawo aze ade axhase abafazi bawo kubulungiseleli bamaKristu. Abonakalisa ubuhlobo yaye asenokuba nomdla ebandleni, kodwa ayakuphepha ukuba ngabakhonzi abazinikeleyo bakaThixo. Yintoni le iwabambileyo?

Enye ingxaki isenokuba kukuba la madoda abona ukuxakeka kwabafazi bawo ngumsebenzi wobulungiseleli aze avakalelwe kukuba ukuba liNgqina kuyinto enzima. Okanye kunokwenzeka ukuba oyika ukuba akanakuze abandakanyeke kumsebenzi wokushumayela kwindlu ngendlu. Ngokwembono yawo, iimbopheleleko zibonakala zizisitha iintsikelelo. Kutheni oku kungumqobo osengqondweni nje? Inkoliso yabafundi beBhayibhile iyayifunda ize iyisebenzise inyaniso ngokuthe ngcembe. Kodwa ngokufuthi amadoda angakholwayo azazi gqitha zonke iimbopheleleko zamaKristu ngaphambi kokuba abe nentshukumisa yokuzamkela.

UManuel, owayekwimeko efanayo, uyachaza: “Bendipheleka umfazi wam ukuya kwiindibano nakwiintlanganiso kangangeminyaka elishumi. Xa ndithetha inyaniso, bendikhetha ukunxulumana namaNgqina kunabantu behlabathi, yaye bendikuvuyela ukuwanceda xa ndinako. Ndachukunyiswa luthando olwalukho phakathi kwawo. Kodwa into yokuya kwindlu ngendlu yayingumqobo omkhulu kum, yaye ndandisoyika ukuba abo ndisebenza kunye nabo babeza kundigculela.

“Umfazi wam wayenomonde gqitha ngam yaye akazange andinyanzele ukuba ndifundisise iBhayibhile. Yena kunye nabantwana ‘babeshumayela’ ngokuyintloko ngomzekelo wabo omhle. UJosé, ongumdala ebandleni, waba nomdla okhethekileyo kum. Ndicinga ukuba lukhuthazo lwakhe olwathi ekugqibeleni lwandenza ndaqalisa ukuzimisela ukufundisisa. Emva kokubhaptizwa, ndafumanisa ukuba umqobo ubusengqondweni yam ngaphezu kwayo nayiphi na enye into. Ndakuba ndigqibe ekubeni ndikhonze uYehova, ndaluva uncedo lwakhe ekoyiseni uloyiko endandinalo.”

Abafazi abangamaKristu kunye nabadala bangawanceda njani amadoda anjengoManuel oyise imiqobo esezingqondweni zawo? Isifundo seBhayibhile sinokwakha uxabiso nomnqweno wokwenza ukuthanda kukaThixo. Eneneni, ulwazi oluphangaleleyo lweZibhalo lusisiseko sokuqhelisela ukholo nokuba nentembelo kwithemba elingaphambili.—Roma 15:13.

Yintoni eya kuwakhuthaza amadoda anjalo ukuba amkele isifundo seBhayibhile? Ngokufuthi, ubuhlobo nomzalwana oqondayo ebandleni bunokuyinceda yenze isigqibo. Mhlawumbi umdala okanye omnye umzalwana onamava unokuziqhelanisa naloo ndoda. Lwakuba lwakhekile ulwalamano oluhle, kusenokufuneka ukuba loo mntu acele ukufundisisa naye. (1 Korinte 9:19-23) Ebudeni beli thuba, umfazi oqondayo ongumKristu unokwabelana nendoda yakhe engakholwayo ngeentwana-ntwana zokomoya, esazi ukuba kusenokwenzeka ingasabeli kakuhle xa inyanzelwa.—IMizekeliso 19:14.

Njengoko uManuel wafunda ngamava, xa umntu esomelela ngokomoya, imiqobo enjengeentaba iba ngathi ziziduli. UYehova uyabomeleza abo banqwenela ukumkhonza. (Isaya 40:29-31) Ngamandla kaThixo nangenkxaso yamaNgqina aqolileyo, imiqobo isenokushenxiswa. Ngaloo ndlela umsebenzi wendlu ngendlu unokungabi yinto enzima yaye nabo asebenza nabo banokungabi sisisongelo kangako, ngoxa inkonzo yomphefumlo uphela isiba nomtsalane ngakumbi.—Isaya 51:12; Roma 10:10.

Ukulondoloza Amandla Ayintshukumisa

Kuyinto enokwenzeka ukuba siyoyise imiqobo efana nale mithathu sisandul’ ukuyiqwalasela. Xa inqwelo-moya isuka, ngokuqhelekileyo kufuneka awona mandla makhulu e-injini kunye nengqalelo epheleleyo yeqela labasebenzi benqwelo-moya. Ebudeni bokusuka kwayo, ii-injini zisebenzisa amafutha ngaphezu kwalo naliphi na ixesha lohambo. Ngokufanayo, ukuze sikhululeke kwiingcinga neemvakalelo ezingakhiyo kufuneka senze umgudu opheleleyo yaye sinikele ingqalelo kangangoko kunokwenzeka. Ukuqalisa kusenokuba lelona nqanaba linzima, ngoxa kuya kusiba lula ngakumbi ukuba nenkqubela xa amandla ayintshukumisa efumanekile.—Thelekisa eyesi-2 kuPetros 1:10.

Amandla ayintshukumisa aqhubekayo alondolozwa kukuphulaphula ngokukhawuleza kukhuthazo olungokweZibhalo. (INdumiso 119:60) Sinokuqiniseka ukuba ibandla liyakufuna ukunceda. (Galati 6:2) Noko ke, okona kubaluleke ukugqitha konke, yinkxaso kaYehova uThixo. Kunjengokuba uDavide watshoyo ukuthi, “mayibongwe iNkosi; ithwala imithwalo yethu imihla ngemihla.” (INdumiso 68:19) Xa sisothula umthwalo ngomthandazo, umthwalo wethu uba lula ngakumbi.

Ngamanye amaxesha, inqwelo-moya ishiya emva kusina yaye kukho amafu, iphumele ngaphaya kweengqimba zamafu, ize ibhabhe kwisibhakabhaka esizaliswe kukukhanya okuqaqambileyo kwelanga. Nathi ngokufanayo sinokuzishiya ngemva iingcinga ezingakhiyo. Ngoncedo lukaThixo, sinokugqobhozela ngaphaya kweengqimba zamafu, ngokungathi kunjalo, size sinandiphe imeko eqaqambileyo, neyolonwabo yentsapho yabanquli bakaYehova ehlabathini jikelele.

[Imifanekiso ekwiphepha 23]

Ngoncedo lukaYehova, sinokuyoyisa imiqobo esengqondweni