Qhubeka Ukhula Elwazini
“Yithini elukholweni lwenu nongezelele . . . ukwazi.”—2 PETROS 1:5.
1, 2. (a) Unokufunda ntoni ngokujonga emazulwini? (Roma 1:20) (b) Umntu uye walwandisa ukusa kuwuphi umlinganiselo ulwazi?
UNOKUFUNDA ntoni xa uphuma phandle ngobusuku obuzolileyo nobumnyama uze ujonge inyanga ekhanya ngokuqaqambileyo nenginginya yeenkwenkwezi? Unokufunda okuthile ngaLowo wadala zonke ezi zinto.—INdumiso 19:1-6; 69:34.
2 Ukuba ubufuna ukwandisa olo lwazi, ngaba ubuya kukhwela phezu kophahla lwendlu yakho uze uzijonge ulapho? Ngokuqinisekileyo ubungenakwenjenjalo. UAlbert Einstein wakha wasebenzisa umzekelo onjalo ukuphuhlisa ingongoma yokuba izazinzulu azihambelanga phambili kangako ekwazini indalo yaye ngokuqinisekileyo zazi okuncinane gqitha ngaLowo wayidalayo.a UGqr. Lewis Thomas wabhala: “Eyona nto ibalaseleyo ifunyaniswe yinzululwazi kule nkulungwane yenkqubela kwezenzululwazi kukuba asinalwazi ngokulusizi; sazi okuncinane gqitha ngendalo yaye incinane nangakumbi into esiyiqondayo ngayo.”
3. Ukwandisa ulwazi kuyandisa ngayiphi ingqiqo intlungu?
3 Nokuba uchitha yonke iminyaka eseleyo yobomi ufuna ulwazi olunjalo, unokuyiqonda ngakumbi indlela obufutshane ngayo ubomi uze ubone ngokucace ngakumbi ukuba indlela umntu alusebenzisa ngayo ulwazi isikelwe umda kukungafezeki ‘nabubugwenxa’ beli hlabathi. USolomon wayiphuhlisa loo ngongoma, ngokubhala oku: “Ebuninzini bobulumko kukho ukuhlelwa sisiyengelezane esininzi; owongeza ukwazi, wongeza umvandedwa.” (INtshumayeli 1:15, 18) Ewe, ukufumana ulwazi nobulumko obunganxulumananga nangayiphi na indlela neenjongo zikaThixo ngokuqhelekileyo kubandakanya intlungu nenkathazo.—INtshumayeli 1:13, 14; 12:12; 1 Timoti 6:20.
4. Luluphi ulwazi esifanele sifune ukuluzuza?
4 Ngaba iBhayibhile ikhuthaza ukuba singabi namdla ekwandiseni ulwazi lwethu? Umpostile uPetros wabhala: “Khulani ke elubabalweni nasekuyazini iNkosi yethu, uMsindisi uYesu Kristu. Kuye malubekho uzuko nangoku, kuse nakwimini engunaphakade.” (2 Petros 3:18) Sinokusamkela yaye sifanele sisamkele eso sibongozo njengesisebenza kuthi, sisikhuthaza ukuba sikhule elwazini. Kodwa kuhlobo olunjani lolwazi? Sinokulwandisa njani? Yaye ngaba ngokwenene senjenjalo?
5, 6. UPetros wayibethelela njani into yokuba sifanele sizuze ulwazi?
5 Ukwandisa ulwazi oluchanileyo ngoMdali wendalo nangoYesu yeyona ngongoma iphambili kwincwadi yesibini kaPetros. Ekuqaleni kuyo wabhala: “Lwanga ubabalo noxolo lungandiswa kuni ngolwazi oluchanileyo ngoThixo noYesu iNkosi yethu, njengoko amandla akhe obuthixo esiphile zonke izinto ezisingise ebomini nasekuhloneleni uThixo, ngolwazi oluchanileyo lwalowo wasibizayo ngozuko nesidima.” (2 Petros 1:2, 3, NW) Ngoko unxulumanisa ukufumana ubabalo noxolo nokuzuza kwethu ulwazi ngoThixo nangoNyana wakhe. Oko kusengqiqweni, ekubeni uMdali, uYehova, engumthombo wolwazi lokwenyaniso. Lowo umoyikayo uThixo uyakwazi ukubona izinto ngendlela elungileyo aze afikelele kwizigqibo ezifanelekileyo.—IMizekeliso 1:7.
6 Wandula ke uPetros wabongoza: “Elukholweni lwenu nongezelele isidima, esidimeni ke ulwazi, elwazini ke ukuzeyisa, ekuzeyiseni ke unyamezelo, kunyamezelo ke ukuhlonela uThixo, ekuhloneleni ke uThixo ukuthanda abazalwana, ekuthandeni ke abazalwana, uthando. Kuba xa zikhoyo ezo zinto kuni, zisanda, zinenza ukuba ninganqeni, ningabi ngabaswele isiqhamo ekuyazini iNkosi yethu uYesu Kristu.” (2 Petros 1:5-8, NW)b Kwisahluko esilandelayo, sifunda ukuba ukuzuza ulwazi kunceda abantu basinde kwizinto ezingcolisayo zehlabathi. (2 Petros 2:20) Ngaloo ndlela uPetros wacacisa ukuba abo baba ngamaKristu bafanele babe nolwazi, njengoko kunjalo nangabo sele bekhonza uYehova. Ngaba ukuluhlu lwabantu abanjalo?
Funda, Uphindaphinde, Usebenzise Okufundileyo
7. Abaninzi baye baluzuza ngayiphi indlela ulwazi oluchanileyo lweenyaniso ezisisiseko zeBhayibhile?
7 Usenokuba uqhutyelwa isifundo seBhayibhile ngamaNgqina kaYehova kuba isigidimi sawo sivakala siyinyaniso kuwe. Kanye ngeveki, malunga neyure, nixubusha ngombandela oseBhayibhileni nisebenzisa incwadi enjengethi Unokuphila Ngonaphakade KwiParadisi Esemhlabeni. Kuyancomeka oko! Abaninzi abebeqhutyelwa isifundo esinjalo ngamaNgqina kaYehova baye bazuza ulwazi oluchanileyo. Noko ke, yintoni onokuyenza ukuze wandise umlinganiselo woko ukufundayo ngokobuqu? Nanga amacebiso athile.c
8. Ngoxa elungiselela isifundo, umntu oqhutyelwa isifundo unokwenza ntoni ukuze afunde okungakumbi?
8 Kusengaphambili, njengoko ulungiselela isifundo sakho, hlolisisa umbandela oza kugutyungelwa. Oko kuthetha ukujonga umxholo wesahluko, imixholwana, nayo nayiphi na imifanekiso esetyenzisiweyo ukubonisa oko kuthethwa ngako. Yandula ke, njengoko ufunda isiqendu okanye icandelo lempapasho, ufune iingongoma eziziintloko nezibhalo ezizixhasayo, uzikrwelele okanye uziphawule. Ukuze ubone ukuba uziqondile iinyaniso ezigutyungelweyo, zama ukuphendula imibuzo ekwiziqendu ezahlukahlukeneyo. Xa usenza oko, zama ukulungiselela iimpendulo ngamazwi akho. Ekugqibeleni, yenza impinda ngoko ubukufunda, uzame ukukhumbula iingongoma eziziintloko nendlela ezixhaswa ngayo.
9. Ukusebenzisa amacebiso ngendlela yokufundisisa kunokumnceda njani ubani ukuba afunde?
9 Unokulindela ukuba ukhule elwazini xa usebenzisa la macebiso. Kutheni kunjalo nje? Esinye isizathu sikukuba uya kufunda umbandela unomnqweno onzulu wokuwuqonda, ngokungathi kunjalo, uya kuba ulungisa umhlaba. Ngokwazi oko kuqulethweyo nokujonga iingongoma eziziintloko nendlela ezixhaswa ngayo, uya kubona indlela iinkcukacha ezinxulumene ngayo nomxholo okanye isigqibo ekufikelelwa kuso. Impinda yokuqukumbela iya kukunceda ukhumbule oko ukufundileyo. Yintoni eya kukunceda ekuhambeni kwexesha, ebudeni besifundo sakho seBhayibhile?
10. (a) Kutheni ukuphindaphinda nje izibakala okanye inkcazelo entsha kungeyongenelo kangako? (b) Kubandakanyeke ntoni ‘ekukhumbuleni izinto emva kwexesha elide’? (c) Oonyana bamaSirayeli banokuba babengenelwa njani ngenxa yokuphindaphindwa kwemithetho?
10 Iingcali kwezemfundo ziyakwazi ukubaluleka kokuphindaphinda ngokunenjongo ngexesha elifanelekileyo. Oku asikokuphindaphinda nje amazwi, nto leyo osenokuba wakha wayizama esikolweni ngoxa wawufunda amagama, ingongoma, okanye ingcamango ethile ngokucengceleza. Noko ke, ngaba wawufumanisa ukuba wawukhawuleza ukulibale oko ukucengcelezileyo? Kutheni? Ukucengceleza nje igama okanye ingongoma entsha kunokuba yindinisa, yaye uhlala uyikhumbula ixesha nje elifutshane. Yintoni enokuguqula oko? Ukufuna kwakho ngokwenene ukufunda kuya kuba luncedo. Enye into eluncedo kukuphindaphinda ngokunenjongo. Kwimizuzu embalwa emva kokufunda ingongoma, ngaphambi kokuba uyilibale, zama ukuzikhumbuza ngoko ukufundileyo. Oku kuye kwabizwa ngokuthi “kukukhumbula izinto ezintsha emva kwethuba elide.” Ngokuzikhumbuza ngaphambi kokuba ulibale, wandisa ixesha lokuyikhumbula loo nto. KwaSirayeli, oobawo babefanele batsolise imithetho kaThixo koonyana babo. (Duteronomi 6:6, 7) Igama elithi ‘ukutsolisa’ lithetha ukufundisa ngokuphindaphinda. Kunokwenzeka ukuba, oobawo abaninzi babeqala babaxelele oonyana babo imithetho; baphinde babaxelele kamva; bandule ke bababuze imibuzo oonyana babo ngoko kwakufundiwe.
11. Kunokwenziwa ntoni ebudeni besifundo seBhayibhile ukuze kwandiswe ulwazi?
11 Ukuba uqhutyelwa isifundo seBhayibhile liNgqina, linokukunceda ukuba ufunde ngokuthi lenze ushwankathelo lokufundiweyo ngamathuba athile ebudeni besifundo. Oku akungomdlalo nje wabantwana. Bubuchule bokuphucula indlela yokufunda, ngoko yiba nenxaxheba ngovuyo xa kusenziwa impinda. Ngoko, ekupheleni kwesifundo, yiba nenxaxheba kwimpinda yokuqukumbela ngokuphendula izinto ozikhumbulayo. Ngamazwi akho, usenokuchaza iingongoma ngendlela obuya kwenza ngayo xa ufundisa omnye umntu. (1 Petros 3:15) Oko kuya kukunceda uhlale ukukhumbula ixesha elide oko ukufundileyo.—Thelekisa INdumiso 119:1, 2, 125; 2 Petros 3:1.
12. Umntu oqhutyelwa isifundo unokwenza ntoni ukuze aphucule inkumbulo yakhe?
12 Enye into eluncedo kukuba, emva kosuku okanye emva kweentsuku ezimbini, ubalisele omnye umntu oko ukufundileyo, mhlawumbi umntwana ofunda naye, umntu osebenza naye, okanye ummelwane. Unokukhankanya umxholo uze ke umxelele ukuba ufuna ukubona enoba unokuzikhumbula kusini na iingongoma eziziintloko okanye indlela iindinyana zeBhayibhile ezizixhasa ngayo. Oko kusenokumenza abe nomdla loo mntu. Nokuba akwenzekanga njalo, ukuphindaphinda kwakho inkcazelo entsha emva kosuku okanye emva kweentsuku ezimbini kuya kwenza ukuba uhlale uyikhumbula. Ngoko uya kuba uyifunde ngokwenene, usenza oko kukhuthazwa kweyesi-2 kaPetros 3:18.
Ukufunda Ngenkuthalo
13, 14. Kutheni sifanele senze okungakumbi kunokufumana nokukhumbula nje inkcazelo?
13 Ukufunda kungaphezu kokufumana nje ingongoma okanye ukukhumbula inkcazelo ethile. Abantu bonqulo ngomhla kaYesu babesenza oko ngemithandazo yabo ababeyiphindaphinda. (Mateyu 6:5-7) Kodwa babechatshazelwa njani yiloo nkcazelo? Ngaba babevelisa iziqhamo zobulungisa? Nakanye. (Mateyu 7:15-17; Luka 3:7, 8) Enye ingxaki kukuba ulwazi aluzange lwehlele nzulu ezintliziyweni zabo, lubangele imiphumo emihle.
14 Ngokutsho kukaPetros, kwakufanele kungabi njalo ngamaKristu, ngelo xesha nangoku. Usibongoza ukuba elukholweni lethu songezelele ulwazi oluya kusinceda siphephe ukuphola okanye ukungabi nasiqhamo. (2 Petros 1:5, 8) Ukuze kube njalo ngathi, simele sifune ukukhula elwazini size sifune lusishukumise ngokunzulu, luchukumise imbilini yethu. Oko kusenokungenzeki ngamaxesha onke.
15. Yiyiphi ingxaki awayenayo amanye amaKristu angamaHebhere?
15 Ngomhla kaPawulos amaKristu angamaHebhere ayenengxaki kule nkalo. Ekubeni ayengamaYuda, ayenolwazi oluthile ngeZibhalo. Ayemazi uYehova nezinye izinto awayezifuna. Kamva ongezelela ulwazi ngoMesiya, abonakalisa ukholo, aza abhaptizwa njengamaKristu. (IZenzo 2:22, 37-41; 8:26-36) Kangangeenyanga neminyaka, afanele ukuba ayesiya kwiintlanganiso zamaKristu, apho ayenokuba nenxaxheba ekufundeni izibhalo nasekugqabazeni. Sekunjalo, wambi akazange akhule elwazini. UPawulos wabhala: “Nakuba benifanele ukuba ngabafundisi, ngenxa yokuba sekumzuzu nakholwayo, nibuye naswela umntu wokunifundisa iziqalelo zokuqala zezihlabo zikaThixo; nesuka naba ngabafanele ukusezwa amasi, anaba ngabafanele ukudla okuqinileyo.” (Hebhere 5:12) Kwakunokwenzeka njani oko? Ngaba oko kusenokwenzeka nakuthi?
16. Uyintoni umhlaba onomkhenkce onganyibilikiyo, yaye uzichaphazela njani izityalo?
16 Ngokomzekelo, qwalasela umhlaba onomkhenkce onganyibilikiyo (permafrost) kwiArctic nakweminye imimandla apho umlinganiselo wamaqondo obushushu ungaphantsi kweqondo lomkhenkce. Umhlaba, amatye, kunye namanzi aba ngumkhenkce, maxa wambi ukusa kubunzulu beemitha ezingama-900. Ehlotyeni, lo mkhenkce usenokunyibilika kumaleko womhlaba (obizwa ngokuba ngumhlaba ongaphezulu). Noko ke, olu cwecwe ekunyibilike umkhenkce kulo ngokuqhelekileyo luba ludaka ngenxa yokuba amanzi akanakudlulela kumhlaba ongaphantsi onomkhenkce onganyibilikiyo. Izityalo ezikhula kolu cwecwe zidla ngokuba zincinane okanye zingakhuli kakhulu; iingcambu zazo azinakungena kumhlaba onomkhenkce onganyibilikiyo. Usenokubuza, ‘Umhlaba onomkhenkce onganyibilikiyo unento yokwenza nantoni nokukhula kwam elwazini lwenyaniso yeBhayibhile?’
17, 18. Umhlaba onomkhenkce onganyibilikiyo kunye nomhlaba wawo ongaphezulu unokusetyenziswa njani ukuzekelisa oko kwakusenzeka kwamanye amaKristu angamaHebhere?
17 Umhlaba onomkhenkce onganyibilikiyo uyizekelisa kakuhle imeko yalowo amandla akhe engqondo angabandakanyekanga ngokukhutheleyo ekungeniseni, ekukhumbuleni, nasekusebenziseni ulwazi oluchanileyo. (Thelekisa uMateyu 13:5, 20, 21.) Umntu onjalo kunokwenzeka ukuba unako ukufunda imibandela eyahlukahlukeneyo, kuquka nenyaniso yeBhayibhile. Wazifunda “iziqalelo zokuqala zezihlabo zikaThixo” yaye usenokuba wakufanelekela ukubhaptizwa, njengoko enzayo loo maKristu angamaHebhere. Noko ke, ‘usenokungaqhubeli kwelokukhula,’ kwizinto ezingaphezu ‘kwelengqalo ilizwi elithetha ngoKristu.’—Hebhere 5:12; 6:1.
18 Khawube nomfanekiso-ngqondweni ngathile kuloo maKristu esezintlanganisweni emva apho. Ayesibakho yaye ayengalali, kodwa ngaba iingqondo zawo zazibandakanyekile ekufundeni? Ngaba ngenkuthalo nangokunyaniseka ayekhula elwazini? Mhlawumbi kwakungenjalo. Kuba abantu abangaqolanga, babebandakanyeka ngendlela elinganiselweyo kwiintlanganiso, ngokungathi kunjalo, ngokusuka kumhlaba ongaphezulu, ngoxa ngaphantsi kwakukho umkhenkce. Iingcambu zenyaniso eqinileyo okanye enzima zazingenakungena kulo mmandla unomkhenkce onganyibilikiyo engqondweni.—Thelekisa uIsaya 40:24.
19. UmKristu onamava namhlanje unokufana njani namaKristu angamaHebhere?
19 Kunokwenzeka okufanayo kumKristu namhlanje. Ngoxa esibakho ezintlanganisweni usenokungazisebenzisi ezo zihlandlo ukuze akhule elwazini. Kuthekani ngokuba nenxaxheba ngenkuthalo kuzo? Kumntu osemtsha okanye oselula kusenokuba ngumgudu ukufunda isibhalo okanye ukugqabaza ngamazwi abhalwe esiqendwini, nto leyo ebonisa indlela entle nencomekayo awasebenzisa ngayo amandla akhe. Kodwa uPawulos wabonisa ukuba abanye, ngenxa yexesha elide bengamaKristu, bafanele bagqithe kwelo nqanaba lokuqala lokuba nenxaxheba ngolo hlobo ukuba bafuna ukuqhubeka bekhula elwazini.—Hebhere 5:14.
20. Luluphi uhlolisiso lobuqu ngamnye wethu afanele alwenze?
20 Ukuba umKristu onamava akenzi nkqubela engaphaya kokufunda nje indinyana yeBhayibhile okanye ukugqabaza ngokusuka ngokungqalileyo esiqendwini, kunokwenzeka ukuba ukuba nenxaxheba kwakhe kusuka nje “kumhlaba ongaphezulu” wengqondo yakhe. Kusenokudlula iintlanganiso ezininzi ubukhulu becala ingqondo yakhe isemkhenkceni, xa siqhubeka sisebenzisa umzekelo wethu womhlaba onomkhenkce onganyibilikiyo. Simele sizibuze oku: ‘Ngaba mna ndinjalo? Ngaba ndiye ndavumela ingqondo yanomkhenkce onganyibilikiyo? Ndiphaphe kangakanani yaye ndinomdla kangakanani ekufundeni?’ Nokuba asanelisekanga ziimpendulo zethu ezinyanisekileyo, sinokuqalisa ngoku ukuthabatha amanyathelo okukhula elwazini.
21. Ngawaphi amanyathelo ekuthethwe ngawo ekuqaleni onokuwasebenzisa xa ulungiselela okanye xa usezintlanganisweni?
21 Mntu ngamnye unokuwasebenzisa amacebiso anikelwe kwisiqendu 8. Kungakhathaliseki ukuba besinxulumene ixesha elide kangakanani na nebandla, sinokuzimisela ukuqhubela kwelokukhula nasekuzuzeni ulwazi olungakumbi. Kwabathile oko kuya kuthetha ukuzilungiselela ngenkuthalo ngakumbi iintlanganiso, mhlawumbi bebuyela kwiindlela ababezisebenzisa kwiminyaka eyadlulayo kodwa abaziyekayo ngokuthe ngcembe. Xa ulungiselela, zama ukubona iingongoma eziziintloko uze uqonde izibhalo ezingaqhelekanga ezisetyenzisiweyo ukuzixhasa. Khangela nantoni na entsha kumbandela ofundisiswayo. Ngokufanayo, ebudeni beentlanganiso, zama ukusebenzisa ngokobuqu amacebiso akhankanywe kwisiqendu 10 nese-11. Zabalazela ukuhlala uthe qwa, ngokungathi ugcina iqondo lobushushu lengqondo yakho liphezulu. Oko kuya kuphelisa naluphi na utyekelo lokuvela “komhlaba onomkhenkce onganyibilikiyo”; kwakhona lo mgudu wokunyaniseka uya kunyibilikisa nawuphi na “umkhenkce” osenokuba uye wakho kwixesha elidluleyo.—IMizekeliso 8:12, 32-34.
Ulwazi, Uncedo Lokuvelisa Isiqhamo
22. Siya kungenelwa njani ukuba sisebenzela ukwandisa ulwazi lwethu?
22 Siya kungenelwa njani ngokwabantu ngabanye ukuba sisebenzela kulo mbandela wokukhula kubabalo naselwazini lweNkosi noMsindisi wethu uYesu Kristu? Ngokwenza umgudu wokunyaniseka ukuze sihlale siphaphile engqondweni, sikulungele ukungenisa ulwazi, imbewu yeenyaniso zeBhayibhile ezintsha nezinzima ngakumbi iya kuzifaka zitshone iingcambu zayo, yaye ukuqonda kwethu kuya kukhula kuze kuhlale kuhleli. Kuya kufana noko kwathethwa nguYesu kumzekeliso owahlukileyo othetha ngeentliziyo. (Luka 8:5-12) Imbewu ewele kumhlaba olungileyo inokuba neengcambu ezomeleleyo zokuxhasa izityalo ezixakatha isiqhamo.—Mateyu 13:8, 23.
23. Yiyiphi imiphumo enokubakho xa sinikel’ ingqalelo kwisiluleko esikweyesi-2 kaPetros 3:18? (Kolose 1:9-12)
23 Lo mzekeliso kaYesu wawahlukile ngandlel’ ithile, kanti imiphumo emihle yayifana noko kwathenjiswa nguPetros: “Ngenxa yoko, nakuba niqokele ukukhuthala konke, yithini elukholweni lwenu nongezelele isidima; esidimeni ke ukwazi . . . Kuba xa zikhoyo ezo zinto kuni, zisanda, zinenza ukuba ninganqeni, ningabi ngabaswele isiqhamo ekuyazini iNkosi yethu uYesu Kristu.” (2 Petros 1:5-8) Ewe, ukukhula kwethu elwazini kuya kusinceda sibe nesiqhamo. Siya kufumanisa ukuba ukungenisa ulwazi olungakumbi kuya kuyolisa ngakumbi. (IMizekeliso 2:2-5) Oko ukufundileyo uya kuhlala ukukhumbula yaye uya kukusebenzisa xa ufundisa abanye ukuba babe ngabafundi. Ngoko nangale ndlela, uya kuba nesiqhamo ngakumbi yaye uya kuzisa uzuko kuThixo nakuNyana wakhe. UPetros waqukumbela incwadi yakhe ngala mazwi: “Khulani ke elubabalweni nasekuyazini iNkosi yethu, uMsindisi uYesu Kristu. Kuye malubekho uzuko nangoku, kuse nakwimini engunaphakade.”—2 Petros 3:18.
[Imibhalo esemazantsi]
a “[Ukwanda kolwazi lwethu] kufana noko kufunyanwa yindoda enomdla wokwazi okungakumbi ngenyanga, xa ikhwele eluphahleni lwendlu yayo ukuba isijongele kufutshane eso sikhanyiso.”
b Ukholo nesidima, iimpawu ezimbini zokuqala kwesi sicatshulwa, zaxutyushwa kwinkupho yethu kaJulayi 15, 1993.
c Kwakhona la macebiso anokunceda nabo bebengamaKristu ixesha elide ukuba bazuze okungakumbi kufundisiso lwabo lobuqu naxa belungiselela iintlanganiso.
Uyakhumbula Na?
◻ Kutheni ufanele ube nomdla ekwandiseni ulwazi lwakho?
◻ Umntu osandul’ ukuqhutyelwa isifundo seBhayibhile unokungenelwa ngakumbi njani kwisifundo asiqhutyelwayo?
◻ Yiyiphi ingozi ofanele uyiphephe, njengoko izekeliswe ngomhlaba onomkhenkce onganyibilikiyo?
◻ Kutheni ufanele uzimisele ukuphucula ubuchule bakho bokwandisa ulwazi?
[Umfanekiso okwiphepha 15]
Ngaba ndinengxaki yomkhenkce onganyibilikiyo engqondweni?