Izikhumbuzo Ngelungiselelo Elenziwe Lula Lokuhanjiswa Koncwadi
1 Uthumo lwethu kukushumayela iindaba ezilungileyo zoBukumkani nokwenza abafundi. (Mat. 24:14; 28:19, 20) Kusivuyisa gqitha ukubona ulwando olungaka kwindlela olusasazwa ngayo uncwadi namaphephancwadi kususela oko saqalisa eli lungiselelo lenziwe lula lokuhambisa uncwadi. Ngenxa yoku kufikelelwa abantu abangakumbi ngeendaba ezilungileyo. Liqhuba njani ilungiselelo elenziwe lula lokuhambisa uncwadi kwibandla lenu? Siye safumana amagqabaza amaninzi ancomayo. Eyona ngenelo inkulu ngoku kukuba bonke ebandleni banokuba nombhalo wabo weMboniselo nencwadi kaDaniyeli kwiintlanganiso zebandla, enoba banokunikela ngokwaneleyo ukuze bagubungele iindleko zezi mpapasho okanye akunjalo. Oku kwenza bonke ebandleni bakwazi ukwenza inkqubela encomekayo yokomoya.
2 Abaninzi bazibuza oku, Iqhuba njani ngoku iminikelo ekubeni iincwadi namaphephancwadi siwahambisa ngaphandle kwentlawulo? Amabandla amaninzi enza kakuhle kakhulu, athumela iminikelo engakumbi kunangaphambili. Noko ke, ekubeni luphantse luphindeke kabini uncwadi oluthunyelwa emabandleni, sifanele silindele iminikelo engakumbi engenayo kumsebenzi owenziwa ehlabathini lonke. Kodwa okwangoku oku akwenzeki apha eMzantsi Afrika.
3 Oku kubangela umbuzo othi, Ngubani onembopheleleko yokuhlawula iindleko zoncwadi namaphephancwadi esiwahambisayo? Xa kwakusaziswa eli lungiselelo lenziwe lula lokuhambisa uncwadi, iQumrhu Elilawulayo lathi: “Abakhonzi bakaYehova abazahluleleyo bangabona baxhasi baphambili.” Longezelela lathi: “Sonke sifanele sizive sinembopheleleko ngoko sikufumanayo.” Ngoko ke, xa sithabatha uncwadi okanye amaphephancwadi, sifanele sizive sinembopheleleko yobuqu yokunikela ngokufaka umnikelo kwibhokisi ebhalwe “Iminikelo Eya Kumsebenzi WoMbutho Owenziwa Ehlabathini Lonke—Mat. 24:14.” Ukuba asikwazi kuzigubungela ngokupheleleyo iindleko zoncwadi namaphephancwadi esizifumanayo, ngaba asifanele ubuncinane sinikele kangangoko sinako? Ukuba asilazi ixabiso elichanileyo laloo nto, sinethuba lokuxelisa umzekelo wethu, uYesu Kristu, ngokunikela ngaphezu koko kufunekayo.—Thelekisa uMateyu 14:14-21; 1 Petros 2:21.
4 Ukongezelela, xa sihambisa iimpapasho zethu ezisekelwe eBhayibhileni entsimini baze abantu basibuze ixabiso, siyabaxelela ukuba sizihambisa ngaphandle kwentlawulo. Noko ke, songezelela sithi, umsebenzi wethu owenziwa ehlabathini lonke uxhaswa ngeminikelo yokuzithandela yaye ukuba bafuna ukwenza umnikelo omncinane kumsebenzi wethu wokushumayela owenziwa ehlabathini lonke banokuwufaka kwimvulophu esiyiphetheyo. Sifanele ngamaxesha onke sihambe sinemvulophu ukwenzela le njongo. Yonke le mali ifanele ifakwe kwiibhokisi zeminikelo ezibhalwe “Iminikelo Eya Kumsebenzi WoMbutho Owenziwa Ehlabathini Lonke—Mat. 24:14.” Iminikelo yethu kunye naleyo ivela entsimini ifanele ikwazi ukwenza uMbutho uqhubeke ushicilela uncwadi namaphephancwadi uze unyamekele umsebenzi owenziwa ehlabathini lonke. Iibhokisi zifanele zivulwe ngabazalwana ababini abazahluleleyo, mabayibale kunye imali baze benze irisithi baze badlulisele umbhalo wayo kunye nemali kwisicaka semali.
5 Sifanele sikujonge njani ukuba nedeluxe Bible, umqulu weInsight, imiqulu yeMboniselo noVukani! nezinye izinto ezibiza kakhulu? Zibuze oku, ‘Ngaba bendiya kuba nazo ezi zinto zibiza kakhulu ngaphambi kokuba eli lungiselelo lenziwe lula lokusasazwa koncwadi lisebenze? Ngaba ngoku, ndiyakwazi ukunikela ngokwaneleyo ukuze kugutyungelwe iindleko zezo mpapasho?’ Ngokomzekelo, kunokufuna ideluxe Bible, kutheni ndinganeliswa kukuba nohlelo oluqhelekileyo? Iintsapho ezinokukwazi ukufunda isiNgesi kwaye ezinokungenelwa ngokwenene kwimiqulu yeInsight, zinokuzifumanela iseti ibe nye yentsapho. Oku kuya kuba njalo nakwezinye izinto ezibiza imali eninzi ezinjengeekhasethi neevidiyo. Sonke sifanele sikuphaphele ukuzifumanela izinto ezinjalo kuba nje singazukuzihlawulela ekhawuntarini. Sisafanele sizive sinembopheleleko yokuzihlawula izinto ezinjalo ngokwamandla ethu.
6 Ngaba sifanele sisebenzise inxalenye yemali ekwiibhokisi zeminikelo ezibhalwe “Iminikelo Eya Kumsebenzi WoMbutho Owenziwa Ehlabathini Lonke—Mat. 24:14” ukuhlawula imali-mboleko yeHolo yoBukumkani okanye ezinye iindleko zebandla? Hayi, oko bekungayi kufaneleka. Imali ekwezi bhokisi asiyoyebandla, yeyoMbutho ukwenzela umsebenzi wokushumayela ehlabathini lonke yaye ifanele ithunyelwe kuMbutho ekupheleni kwenyanga nganye. Ayimele isetyenziselwe nayiphi na enye injongo. Iindleko zokusetyenziswa kweHolo YoBukumkani zifanele zihlawulwe ngeminikelo ekwibhokisi ebhalwe “Iminikelo Yebandla.”
7 Liyasivuyisa ilungiselelo elenziwe lula lokuhanjiswa koncwadi. Sonke masibonise uxabiso lwethu ngalo ngokunikela ngoncwadi namaphephancwadi esiwasebenzisayo nesiwahambisa kwinkonzo yasentsimini.