Isahluko 19
Xa Ulwazi NgoThixo Luzalise Umhlaba
1, 2. Indalo kaYehova yonakaliswa njani?
MASITHI umzobi wodumo usandul’ ukugqiba ukwenza umzobo omhle. Ngokufanelekileyo uwujonga njengomhle kakhulu—obalaseleyo! Kodwa ebusuku kufika utshaba olunomona luwonakalise. Ngesizathu esivakalayo, oku kumenza buhlungu kakhulu lo mzobi. Hayi indlela akulangazelela ngayo ukubona le ndlavini ivalelwe! Yaye unokuyithelekelela indlela lo mzobi akunqwenela ngayo ukubona umsebenzi wakhe ubuyiselwe kubuhle bawo bangaphambili.
2 Njengaloo mzobi, uYehova wenza umsebenzi obalaseleyo xa walungiselela umhlaba waza wabeka uluntu kuwo. Emva kokudala indoda nomfazi, wathi wonke umsebenzi wakhe wasemhlabeni ‘wawulungile kunene.’ (Genesis 1:31) UAdam noEva babengabantwana bakaThixo, yaye wayebathanda. Wayebanqwenelela ikamva elonwabisayo nelizukileyo. Liyinyaniso elokuba, uSathana wabakhokelela kwimvukelo, kodwa indalo kaThixo emangalisayo ayizange yonakaliswe ngendlela engenakulungiseka.—Genesis 3:23, 24; 6:11, 12.
3. Buyintoni “ubomi bokwenyani”?
3 UThixo uzimisele ukuyilungisa imicimbi. Ukufuna ngokwenene ukusibona siphila ngendlela awayenenjongo yokuba siphile ngayo ntlandlolo. Ubomi bethu obufutshane nobuzaliswe ziinkathazo asibubo “ubomi bokwenyani,” kuba bukumgangatho ophantsi kakhulu kunalowo uYehova wayecinga ngawo. “Ubomi bokwenyani” uThixo afuna sibufumane ‘bubomi obungunaphakade’ kwiimeko ezigqibeleleyo.—1 Timoti 6:12, 19, TE.
4, 5. (a) Liya kuzalisekiswa njani ithemba leParadisi? (b) Kutheni sifanele sicinge ngethemba lethu ngekamva?
4 Ulwazi ngoThixo lusenza sibe ngabo baya kuphendula kuYehova. (Yakobi 4:17) Kodwa cinga ngeentsikelelo oya kuzinandipha ukuba usebenzisa olo lwazi uze ufumane ubomi obungunaphakade. ELizwini lakhe, iBhayibhile, uYehova uThixo uzobe umfanekiso omhle woko obo bomi buya kuba kuko kumhlaba oyiParadisi osondelayo. Kakade ke, njengabantu bakaYehova asikhonzi uThixo kuphela nje kuba sinqwenela umvuzo. Sikhonza uThixo kuba simthanda. (Marko 12:29, 30) Ngaphezu koko, ubomi asibuzuzi kuba sikhonza uYehova. Ubomi obungunaphakade sisipho sikaThixo. (Roma 6:23) Kuya kusinceda ukucamngca ngobo bomi kuba ithemba leParadisi lisikhumbuza ngohlobo loThixo uYehova alulo—‘umvuzi onothando wabo bamfunayo.’ (Hebhere 11:6) Ithemba eliqaqambileyo ezingqondweni nasezintliziyweni zethu liya kusinceda sinyamezele ubunzima kwihlabathi likaSathana.—Yeremiya 23:20.
5 Ngoku makhe sitsolise ingqalelo yethu kwithemba eliseBhayibhileni lobomi obungunaphakade kwiParadisi yasemhlabeni ezayo. Buya kuba njani ubomi xa ulwazi ngoThixo luzalise umhlaba?
EMVA KWEARMAGEDON —UMHLABA OYIPARADISI
6. Yintoni iArmagedon, yaye iya kuthetha ntoni kuluntu?
6 Njengoko kubonisiwe ngaphambili, kungekudala uYehova uThixo uza kuyitshabalalisa le nkqubo ikhoyo ingendawo yezinto. Ihlabathi lisondela ngokukhawuleza koko iBhayibhile ikubiza ngokuba yiHar–Magedon, okanye yiArmagedon. Elo gama lisenokwenza abantu abathile bacinge ngembubhiso yenyukliya eya kuziswa ziintlanga ezilwayo, kodwa iArmagedon ayinjalo. Njengoko ISityhilelo 16:14-16 sibonisa, iArmagedon ‘yimfazwe yaloo mini inkulu kaThixo, uSomandla.’ Yimfazwe ebandakanya “ookumkani bomhlaba, nabelimiweyo liphela,” okanye iintlanga. UNyana kaYehova uThixo, uKumkani omisiweyo, kungekudala uya kuphalisa aye edabini. Umphumo walo siqiniseke ngokupheleleyo ngawo. Bonke abo babuchasayo uBukumkani bukaThixo nabayinxalenye yenkqubo kaSathana engendawo baya kutshatyalaliswa. Kuphela ngabo banyanisekileyo kuYehova abaya kusinda.—ISityhilelo 7:9, 14; 19:11-21.
7. USathana needemon zakhe baya kuba bephi ebudeni boLawulo lukaKristu Lweminyaka Eliwaka, yaye abantu baya kungenelwa njani koku?
7 Khawube nomfanekiso-ngqondweni wakho usindile kuloo ntlekele. Buya kuba njani ubomi emhlabeni kwihlabathi elitsha likaThixo elithenjisiweyo? (2 Petros 3:13) Akuyomfuneko ukuba siqashele, kuba iBhayibhile iyasixelela, yaye oko ikutshoyo kuyachulumancisa. Sifunda ukuba uSathana needemon zakhe baya kuthintelwa, bavalelwe enzonzobileni kwimeko yokungasebenzi ebudeni boLawulo Lweminyaka Eliwaka lukaYesu Kristu. Ezo zidalwa zingendawo nezikhohlakeleyo azisayi kubuye ziphembelele abantu, ziqhwaya iinkathazo yaye zizama ukusiqhubela kwizenzo zokungathembeki kuThixo. Kuya kutsho kuthi qabu!—ISityhilelo 20:1-3.
8, 9. Kwihlabathi elitsha, kuya kwenzeka ntoni kwiintlungu, ukugula nokwaluphala?
8 Ekuhambeni kwexesha, konke ukugula kuya kuphela. (Isaya 33:24) Iziqhwala ziya kuma, zihambe, zibaleke zize zingqungqe ngemilenze eyomeleleyo nesempilweni. Emva kweminyaka emininzi zingeva nto, izithulu ziya kuva izandi ezivuyisayo. Iimfama ziya kubamb’ ongezantsi xa zibona imibala emihle nezinto ezininzi phambi kwazo. (Isaya 35:5, 6) Ekugqibeleni, ziya kububona ubuso babo zibathandayo! Mhlawumbi ngoko ziya kukhe zingaboni okwethutyana amehlo azo eenkungu ziinyembezi zovuyo.
9 Khawufan’ ucinge! Siya kwahlukana neendondo zamehlo, sahlukane neentonga zokuhamba nemisimelelo, sahlukane namayeza, sahlukane neekliniki zamazinyo nezibhedlele! Abantu abasayi kuze baphinde bangonwabi ngenxa yokugula ngokweemvakalelo nokudandatheka. Akusayi kubakho bangabunandiphiyo ubuntwana babo ngenxa yezifo. Umonakalo obangelwe kukwaluphala uya kulungiswa. (Yobhi 33:25) Siya kuba sempilweni ngakumbi, somelele ngakumbi. Ntsasa nganye siya kuvuka emva kokulala okuhlaziyayo sisemandleni, sizaliswe ngamandla yaye silangazelela usuku olutsha lobomi obuzaliswe ludlamko nomsebenzi owanelisayo.
10. Nguwuphi umsebenzi oya kwenziwa ngabo basinde eArmagedon?
10 Kuya kubakho intabalala yomsebenzi onandiphekayo ofanele wenziwe ngabo basinde eArmagedon. Baya kuguqulela lo mhlaba ekubeni yiparadisi. Naziphi na izinto ezisele kwinkqubo endala engcolileyo ziya kususwa. Endaweni yamatyotyombe nomhlaba owonakalisiweyo kuya kuvela iipaki nemiyezo. Bonke baya kunandipha ukuba nezindlu ezitofotofo nezibukekayo. (Isaya 65:21) Njengoko ixesha lihamba, imimandla yomhlaba eyiparadisi iya kunaba idibane de umhlaba wonke ufikelele umlinganiselo wobuhle owamiselwa nguMdali emva phayaa kumyezo wase-Eden. Hayi indlela okuya kwanelisa ngayo ukuba nesabelo kuloo msebenzi wokulungisa!
11. Uluntu luya kuba naluphi ulwalamano nemeko-bume yomhlaba nezilwanyana kwixesha elizayo?
11 Konke oku kuya kwenziwa ngaphantsi kokhokelo lukaThixo ukuze imeko-bume ingonakaliswa. Abantu baya kuba beseluxolweni nezilwanyana. Kunokuzibulala ngokungeyomfuneko, umntu uya kuphinda abe ligosa elinyamekela umhlaba, ezikhathalela. Khawube nomfanekiso-ngqondweni weengcuka neemvana, iingonyama namathole, zisidla ndawonye—yaye izilwanyana zasekhaya zikhuseleke ngokupheleleyo. Kwanomntwana omncinane akayi koyika nento le kumarhamncwa asendle, yaye uxolo lwehlabathi elitsha aluyi kuphazanyiswa ngabantu abakhohlakeleyo nabaneengcwangu. (Isaya 11:6-8) Olunjani lona uxolo oluya kubakho kwelo hlabathi litsha!
ULUNTU LUYA KUGUQULWA
12. UIsaya 11:9 uzaliseka njani namhlanje, yaye uya kuzaliseka njani eParadisi?
12 UIsaya 11:9 usixelela isizathu sokuba umhlaba wonke ungayi konakaliswa. Uthi: “Ilizwe liya kuzala kukwazi uYehova, njengamanzi egubungele ulwandle.” Oku kubhekisela kubantu ngenxa yokuba izilwanyana azinako ukungenisa “ukwazi uYehova” zize zenze iinguqulelo, ngenxa yokuba zilawulwa lithuku. Kodwa ulwazi ngoMdali wethu luyabaguqula abantu. Alithandabuzeki elokuba nawe zikho iinguqulelo ozenzileyo ngenxa yokusebenzisa ulwazi ngoThixo ebomini bakho. Izigidi zenjenjalo. Ngoko ke, esi siprofeto sele siqalile ukuzaliseka kwabo bakhonza uYehova. Sekunjalo, salatha kwixesha apho abantu emhlabeni wonke beya kwahlukana nazo naziphi na iimpawu zobulwanyana okanye zogonyamelo baze babe seluxolweni ngonaphakade.
13. Yiyiphi inkqubo yokufundisa eya kuqhubeka emhlabeni?
13 Hayi indlela eliya kuzuka ngayo elo xesha laxa ulwazi ngoThixo luzalise umhlaba! Kuya kubakho inkqubo yokufundisa yomhlaba wonke ngaphantsi kolwalathiso lukaKumkani uYesu Kristu nabalawuli abakunye naye abali-144 000. Kuya kusetyenziswa “iincwadi” ezintsha. Kubonakala ukuba ezi yimiyalelo kaThixo ebhaliweyo eya kusebenza njengesiseko sokufundisa abemi bomhlaba. (ISityhilelo 20:12) Uluntu luya kufunda uxolo, kungekhona imfazwe. Zonke izixhobo zokutshabalalisa ziya kuphela ngonaphakade. (INdumiso 46:9) Abemi bomhlaba omtsha baya kufundiswa ukuphatha abanye abantu ngothando, intlonelo nesidima.
14. Ihlabathi liya kwahluka njani xa uluntu luyintsapho enye emanyeneyo?
14 Uluntu luya kuba yintsapho enye emanyeneyo. Akusayi kubakho mida yomanyano nobuzalwana. (INdumiso 133:1-3) Akukho khaya kuya kufuneka litshixwe ukuze amasela angangeni. Kuya kugquba uxolo kuzo zonke iintliziyo, izindlu nakuwo wonke ummandla womhlaba.—Mika 4:4.
UVUKO OLUVUYISAYO
15. Ngawaphi amaqela amabini aya kuvuswa emhlabeni?
15 Ebudeni beWaka Leminyaka, kuya kubakho uvuko. Abo bawone ngabom umoya oyingcwele kaThixo, okanye amandla asebenzayo, ngokungaguquki kwizenzo ezichaseneyo nokubonakaliswa okanye ukhokelo lwawo abayi kuvuswa. (Mateyu 23:15, 33; Hebhere 6:4-6) Kambe ke, nguThixo oya kugqiba ngokuba ngoobani abone ngaloo ndlela. Kodwa kuya kuvuswa amaqela amabini ahlukahlukeneyo—‘amalungisa nabangemalungisa.’ (IZenzo 24:15) Ekubeni kuya kubakho ulungelelwano olufanelekileyo, kusengqiqweni ukugqiba kwelokuba abokuqala ukubuyiselwa ebomini emhlabeni iya kuba ngabangamalungisa, abo bakhonza uYehova ngokunyaniseka.—Hebhere 11:35-39.
16. (a) Ngoobani abaya kuba phakathi ‘kwamalungisa’ aya kuvuswa emhlabeni? (b) Ngabaphi kubantu abathembekileyo bamandulo ongathanda ukudibana nabo ngokukhethekileyo, yaye ngoba?
16 Kunokuva iindaba ezingeemfazwe, iintlekele nokufa, abakhonzi bakaYehova baya kufumana iingxelo ezichulumancisayo zovuko. Kuya kuchulumancisa ukuva ngokubuya kwamadoda nabafazi abathembekileyo abanjengoAbheli, uEnoki, uNowa, uAbraham, uSara, uYobhi, uMoses, uRahabhi, uRute, uDavide, uEliya noEstere. Ezinjani ukuchwayitisa izibakala zembali abaya kuzibalisa njengoko benikela iinkcukacha zemvelaphi yeengxelo ezininzi zeBhayibhile! Ngokungathandabuzekiyo bona nabangamalungisa abafe kumaxesha akutshanje baya kuba belangazelela ukufunda ngokuphela kwenkqubo kaSathana nendlela uYehova alingcwalise ngayo igama lakhe elingcwele waza wathethelela ulongamo lwakhe.
17. Luluphi uncedo abathembekileyo abaya kulunikela kwabanye abavusiweyo?
17 Hayi indlela aba bathembekileyo abaya kuba luncedo ngayo ebudeni benqanaba elilandelayo lovuko, xa amawaka ezigidi ‘zabangemalungisa’ ekhululwa kumakhamandela okufa! Inkoliso yoluntu ayizange ilifumane ithuba lokumazi uYehova. USathana ‘wayezimfamekisile iingqondo zalo.’ (2 Korinte 4:4) Kodwa oko kwenziwa nguMtyholi kuya kulungiswa. Abangemalungisa baya kubuyela kumhlaba omhle nonoxolo. Baya kwamkelwa ngabantu abasele bekulungiselele kade ukubafundisa ngoYehova noNyana wakhe olawulayo, uYesu Kristu. Njengoko amawaka ezigidi zabavusiweyo efikelela ekumazini nasekumthandeni uMdali wawo, ulwazi ngoYehova luya kuzalisa umhlaba ngendlela engazange ibonwe.
18. Ucinga ukuba uya kuvakalelwa njani xa usamkela obathandayo abavusiweyo?
18 Hayi indlela uvuko oluya kuzivuyisa ngayo iintliziyo zethu! Ngubani ongakhange akhe ave ubuhlungu ngenxa yotshaba lwethu ukufa? Eneneni, ngubani ongakhange akhe akhathazeke xa iqhina lothando okanye lobuhlobo liqhawulwa kuba ukugula, ukwaluphala, ingozi, okanye ugonyamelo lusuba ubomi bomntu esimthandayo? Ngoko ke, khawuthelekelele uvuyo oluya kubangelwa kukudibana kwakhona eParadisi. Oomama noobawo, oonyana neentombi, abahlobo nezalamane, baya kwangana, behleka yaye bekhala ngenxa yovuyo.
IMFEZEKO EKUGQIBELENI!
19. Nguwuphi ummangaliso oya kwenzeka ebudeni beWaka Leminyaka?
19 Ebudeni balo lonke iWaka Leminyaka, kuya kuba kusenzeka ummangaliso ovuyisayo. Kuluntu, mhlawumbi le iya kuba yeyona nkalo ichulumancisayo yoLawulo lukaKristu Lweminyaka Eliwaka. UYehova uya kwalathisela uNyana wakhe ukuba asebenzise iingenelo zedini lentlawulelo kuye ngamnye wamadoda nabafazi abathembekileyo nabathobelayo. Ngentlawulelo yelo dini, sonke isono siya kususwa yaye uluntu luya kwenziwa lufezeke.—1 Yohane 2:2; ISityhilelo 21:1-4.
20. (a) Kuya kuthetha ntoni ukufezeka? (b) Abo basinde kwiArmagedon nabavusiweyo baya kuqala nini ukuphila ngengqiqo egqibeleleyo?
20 Imfezeko! Iya kuthetha ntoni? Iya kuthetha ukubuyela ebomini ngendlela uAdam noEva ababebunandipha ngayo ngaphambi kokuba bone kuYehova uThixo. Emzimbeni, engqondweni, ngokweemvakalelo, ngokokuziphatha, ngokomoya—ngandlela zonke onokuzithelekelela—abantu abafezekileyo baya kuyifikelela ngokupheleleyo imilinganiselo kaThixo. Kodwa ngaba bonke abantu baya kufana ngelo xesha? Nakanye! Izinto ezidalwe nguYehova—imithi, iintyatyambo, izilwanyana—zonke zisifundisa ukuba uyakuthanda ukwahlukahlukana. Abantu abafezekileyo baya kuba nobuntu nobuchule obungafaniyo. Ngamnye uya kunandipha ubomi ngendlela uThixo awayefuna bunanditshwe ngayo. ISityhilelo 20:5 sithi: “Abafileyo abaseleyo ababuyanga badle bomi, yada yazaliseka iminyaka eliwaka.” Njengesihlwele esikhulu sabo basinde eArmagedon, abavusiweyo baya kudla ubomi ngokupheleleyo xa befikelele kwimfezeko yokungabi nasono.
21. (a) Kuya kwenzeka ntoni ekupheleni koLawulo lukaKristu Lweminyaka Eliwaka? (b) Ekugqibeleni kuya kwenzeka ntoni kuSathana nabo bonke abo bangakuye?
21 Abantu abafezekileyo baya kujamelana novavanyo olunye lokugqibela. Ekupheleni kweWaka Leminyaka, uSathana needemon zakhe baya kukhululwa enzonzobileni okwethutyana baze bavunyelwe bazame ukukhukulisa abantu kuYehova okokugqibela. Bambi baya kubeka iminqweno ephosakeleyo kuqala kunothando ngoThixo, kodwa le mvukelo iya kunqanyulelwa. UYehova uya kubabulala aba bazingcayo kunye noSathana nazo zonke iidemon zakhe. Ngoko bonke abenzi bobubi baya kutshatyalaliswa ngonaphakade.—ISityhilelo 20:7-10.
UYA KWENZA NTONI?
22. Ukhangele phambili ekwenzeni ntoni eParadisi?
22 Baya kuphila ngonaphakade abo bamthandayo uYehova uThixo nabahlala kumhlaba oyiParadisi. Asinakuluthelekelela uvuyo lwabo, yaye nawe unokuba nesabelo kulo. Umculo, ubugcisa—kaloku, oko kunokufezwa luluntu olufezekileyo kuya kuyigqwesa lee eyona misebenzi mihle yezona ngcali zibalaseleyo kweli hlabathi lidala! Ngapha koko, abantu baya kuba befezekile yaye baya kuba nexesha elingasikelwe mda abanokulisebenzisa. Khawufan’ ucinge ngoko uya kukwazi ukukwenza njengomntu ofezekileyo. Kwakhona, cinga ngoko wena nabanye abantu niya kukwazi ukukufunda ngendalo kaYehova—kumawaka ezigidi zeminyele akwindalo iphela nakumasuntswana amancinane kuneathom. Yonke into uluntu oluyifezayo iya kuyivuyisa ngakumbi intliziyo yoBawo wethu wasezulwini onothando, uYehova.—INdumiso 150:1-6.
23. Kutheni ubomi eParadisi bungayi kuze bukruqule?
23 Ngelo xesha ubomi abuyi kukruqula. Buya kubangela umdla ngakumbi nangakumbi njengoko ixesha lihamba. Uyabona, ulwazi ngoThixo alunasiphelo. (Roma 11:33) Kude kuse emaphakadeni, kuya kusoloko kukho okungakumbi okunokufundwa yaye kuya kusoloko kukho okutsha okunokuhlolisiswa. (INtshumayeli 3:11) Yaye njengoko uqhubeka ufunda ngoYehova uThixo, uya kuqhubeka uphila—kungekuphela nje iminyaka embalwa kodwa ngonaphakade!—INdumiso 22:26.
24, 25. Kutheni ufanele ngoku uphile ngokuvisisana nolwazi ngoThixo?
24 Ngaba ikamva elimyoli kumhlaba oyiparadisi alifanelanga nayiphi na imigudu okanye ukuzincama okwenzayo? Kakade kunjalo! Kaloku, uYehova udlulisele kuwe isikhokelo selo kamva libalaseleyo. Eso sikhokelo lulwazi ngoThixo. Ngaba uya kusisebenzisa?
25 Ukuba uyamthanda uYehova, uya kuvuyiswa kukwenza ukuthanda kwakhe. (1 Yohane 5:3) Njengoko usukela elo khondo, ezinjani zona iintsikelelo oya kuzifumana! Ukuba usebenzisa ulwazi ngoThixo, lunokukuzisela ubomi obonwabisa ngakumbi kwanakweli hlabathi lineenkathazo. Yaye imivuzo yexesha elizayo ayithetheki, kuba olu lulwazi olukhokelela kubomi obungunaphakade! Eli lixesha elifanelekileyo lokuba uthabathe inyathelo. Zimisele ukuphila ngokuvisisana nolwazi ngoThixo. Bonisa uthando lwakho ngoYehova. Beka igama lakhe elingcwele uze ungqine uSathana elixoki. Yena ke, uYehova uThixo, uMthombo wobulumko nolwazi lokwenyaniso, uya kuvuyiswa nguwe entliziyweni yakhe enkulu nenothando. (Yeremiya 31:3; Zefaniya 3:17) Yaye uya kukuthanda ngonaphakade!
HLOLA ULWAZI LWAKHO
Buyintoni “ubomi bokwenyani”?
Emva kweArmagedon, kuya kwenzeka ntoni emhlabeni?
Ngoobani abaya kuvuswa emhlabeni?
Uluntu luya kufezeka njani luze luvavanywe okokugqibela?
Unaliphi ithemba ngokuphathelele iParadisi?
[Umfanekiso okwiphepha 188, 189]
Ngaba unethemba lokuphila eParadisi, xa ulwazi ngoThixo luzalise umhlaba?