Imibuzo Evela Kubafundi

IZibhalo zinikela luphi ulwalathiso ngokuqeqesha umntwana xa omnye wabazali eliNgqina likaYehova yaye omnye engelilo?

Mibini imigaqo esisiseko enikelwa ziZibhalo ngokuqeqesha umntwana kumzali oliNgqina oneqabane elingeloNgqina. Owokuqala ngulo: “Simele sithobele uThixo njengomlawuli kunabantu.” (IZenzo 5:29) Omnye ngulo: “Indoda iyintloko yomfazi wayo njengokuba noKristu eyintloko yebandla.” (Efese 5:23) Lo mgaqo wesibini awusebenzi kuphela kubafazi abanabayeni abangamaNgqina kodwa nakwabo banamaqabane angengawo amaNgqina. (1 Petros 3:1) Umzali oliNgqina unokuyithobela njani le migaqo ngendlela efanelekileyo xa efundisa abantwana bakhe?

Ukuba indoda ingomnye wamaNgqina kaYehova, yiyo efanele inyamekele intsapho yayo ngokomoya nangokwenyama. (1 Timoti 5:8) Nangona umama ongakholwayo enokuchitha ixesha elingakumbi nabantwana bakhe, ubawo oliNgqina ufanele abafundise abantwana bakhe ngokubaqeqesha ngokomoya ekhaya aze aye nabo kwiintlanganiso zamaKristu, apho banokufundiswa khona indlela yokuziphatha baze bafumane unxulumano olwakhayo.

Kuthekani ukuba umfazi wakhe ongakholwayo unyanzelisa ukubasa abantwana kwicawa yakhe okanye ufuna ukubafundisa iinkolelo zakhe? Umthetho welizwe unokumnika ilungelo lokwenjenjalo. Enoba abantwana baya kutsaleleka kunqulo lwakhe oko kuxhomekeke kwindlela ubawo afundisa ngayo ngokomoya. Njengoko abantwana bekhula, imfundiso yeZibhalo kayise ifanele ibancede balandele inyaniso ekwiLizwi likaThixo. Hayi indlela indoda ekholwayo eya kuvuya ngayo ukuba abantwana bayo bamkela inyaniso!

Ukuba unina ungomnye wamaNgqina kaYehova, ufanele ahlonele umgaqo wobuntloko ngoxa exhalabele intlalo-ntle engunaphakade yabantwana bakhe. (1 Korinte 11:3) Kwiimeko ezininzi, iqabane lakhe elingakholwayo alidli ngokwala ukuba umfazi walo oliNgqina abafundise indlela yokuziphatha nezinto zokomoya abantwana babo, yaye uncedo olunjalo luyafumaneka kwiintlanganiso zabantu bakaYehova. Umama unokunceda umyeni ongakholwayo ukuba abone iinzuzo zemfundiso eyakhayo abantwana babo abayifumana kwintlangano kaYehova. Ngobuchule unokubalaselisa iinzuzo ezifunyanwa ngabantwana babo ngokufundiswa imigaqo yeBhayibhile yokuziphatha, njengoko bejamelene nehlabathi eliya liphelelwa yimilinganiselo emihle yokuziphatha.

Noko ke, indoda engakholwayo isenokunyanzelisa ukuba abantwana bayo bahambe icawa yayo, ibase kwicawa yayo ize ibafundise ngokweenkolelo zayo. Okanye indoda isenokungazifuni zonke iicawa ize inyanzelise ukuba abantwana bayo bangafundiswa nto ngonqulo. Njengentloko-ntsapho, yiyo enembopheleleko eyintloko yokwenza eso sigqibo.a

Ngoxa ehlonela ubuntloko bendoda yakhe, njengomKristu ozahluleleyo, umfazi okholwayo ufanele akhumbule isimo sengqondo sompostile uPetros noYohane, abathi: “Kodwa thina, asinakuyeka ukuthetha ngezinto esizibonileyo nesizivileyo.” (IZenzo 4:19, 20) Ngenxa yokuba exhalabele intlalo-ntle yokomoya yabantwana, umama oliNgqina uya kufuna amathuba okunikela ulwalathiso lokuziphatha kubo. Unembopheleleko kuYehova yokufundisa abanye ngoko akwazi kuyinyaniso, yaye ufanele abafundise nabantwana bakhe. (IMizekeliso 1:8; Mateyu 28:19, 20) Umama oliNgqina unokuhlangabezana njani nale ngxaki?

Ngokomzekelo cinga ngombandela wokukholelwa kuThixo. Umfazi oliNgqina usenokungakwazi ukuba nesifundo seBhayibhile esicwangcisiweyo nabantwana bakhe ngenxa yemiqathango ebekwa yindoda yakhe. Ngaba ngenxa yoku ufanele angathethi nto nabantwana bakhe ngoYehova? Akunjalo. Amazwi akhe nezenzo zakhe ngokuzenzekelayo zinokubonisa ukuba uyakholelwa kuMdali. Ngokuqinisekileyo abantwana bakhe baya kuba nemibuzo kuloo mbandela. Ufanele azive ekhululekile ukusebenzisa inkululeko yakhe yonqulo ngokuchaza indlela akholelwa ngayo kuMdali, kuquka nakubantwana bakhe. Nokuba akanakukwazi ukuqhuba isifundo seBhayibhile nabantwana okanye aye nabo kwiintlanganiso ngokuthe rhoqo, unokubafundisa ngoYehova uThixo.—Duteronomi 6:7.

Ngokuphathelele ulwalamano phakathi kweNgqina neqabane lalo elingakholwayo, umpostile uPawulos wabhala: “Indoda engakholwayo iyangcwaliswa ngenxa yomfazi wayo, nomfazi ongakholwayo uyangcwaliswa ngenxa yomzalwana; kungenjalo, abantwana benu ngokwenene bebeya kuba ngabangahlambulukanga, kodwa ngoku bangcwele.” (1 Korinte 7:14) UYehova ulujonga ulwalamano lomtshato njengelingcwele ngenxa yeqabane elikholwayo, yaye abantwana bangcwele emehlweni kaYehova. Umfazi oliNgqina ufanele enze okusemandleni ukunceda abantwana bakhe baqonde inyaniso, aze ashiyele yonke enye into ezandleni zikaYehova.

Njengoko abantwana bekhula, bafanele bakhethe oko bakufunayo ngokusekelwe kwinkcazelo abayifumene kubazali babo. Banokugqiba ukuba benze ngokuvisisana namazwi kaYesu athi: “Lowo unomsa omkhulu ngakumbi ngoyise okanye ngonina kunam akandifanele mna.” (Mateyu 10:37) Nabo bakwayalelwa kusithiwa: “Bantwana, bathobeleni abazali benu ngokumanyene neNkosi, kuba oku kububulungisa.” (Efese 6:1) Ulutsha oluninzi luye lwagqiba kwelokuba ‘luthobele uThixo njengomlawuli’ kunomzali ongeloNgqina, phezu kwako nje ukuphathwa kakubi nguloo mzali. Hayi indlela ekuvuza ngayo kumzali oliNgqina ukubona abantwana besenza isigqibo sokukhonza uYehova phezu kwayo nje inkcaso!

[Umbhalo osemazantsi]