Ukufunda Kumatiloshe

UKUHAMBA wedwa ngenqanawa kulwandle olusithabazi kunokuba yindinisa. Ukucubhuka okubangelwa kukudinwa kunokwenza umatiloshe adenge lula, aze enze iimpazamo nezigqibo eziphosakeleyo. Ngenxa yoko, uyiqonda kakhulu indlela ebaluleke ngayo iankile yaselwandle. Ivumela umatiloshe odiniweyo ukuba aphumle yaye ahlaziyeke engakhange adudulwe ngamanzi emsa engozini. Kwangaxeshanye, iankile yaselwandle iye inyanzele umphambili wenqanawa ukuba ujonge kwicala ovela kulo umoya namaza ize iyizinzise.

Kanye njengokuba oomatiloshe behlangabezana neengozi elwandle, namaKristu ajamelana neengcinezelo ezibetha zibuyelela zeli hlabathi kwaye azive efuna ukukhe aphumle. Enyanisweni, ngenye imini uYesu wakha wancomela oku kubafundi bakhe: “Yizani, nedwa kwindawo engasese, niphumle kancinane.” (Marko 6:31) Namhlanje, abanye basenokuthabatha uhambo lweeveki ezimbalwa okanye bachithe impelaveki bephumle nentsapho yabo. La mathuba anokuhlaziya yaye anike amandla. Noko ke, sinokuqiniseka njani ukuba sikhuselekile ngokomoya ebudeni baloo maxesha? Yintoni enokuba yiankile yethu yokomoya esinceda ukuba sixhathise ukududulwa size sihlale sizinzile?

UYehova usilungiselele okuthile ngesisa. Alikho elinye ilungiselelo ngaphandle kweLizwi lakhe Elingcwele, iBhayibhile. Xa siyifunda imihla ngemihla, sinokuhlala sisondele kuYehova yaye singaze sidudulwe simke kuye. Isiluleko sayo sinokusenza sizinze yaye sikwazi ukumelana nezihendo zikaSathana nehlabathi lakhe. Ukugcina kwethu ucwangciso oluthe rhoqo lokufunda iBhayibhile, kwanaxa singasenzi izinto zesiqhelo, kunokuba yiankile yokomoya kuthi.—Yoshuwa 1:7, 8; Kolose 2:7.

Umdumisi usikhumbuza ukuba “unoyolo umntu” “oyoliswa ngumthetho kaYehova, efunda emthethweni wakhe ngesandi esiphantsi imini nobusuku.” (INdumiso 1:1, 2) Ukufunda iLizwi likaThixo imihla ngemihla kuya kusizisela ‘uyolo’ olubangelwa kukuhlaziyeka kokwenene, silungele ukuqhubeka nekhondo lethu lobuKristu.

Ngaba Uya Kukuvuyela Ukutyelelwa?

Kwanakweli hlabathi lizaliswe ziinkathazo, unako ukuzuza ulonwabo kulwazi oluchanileyo lweBhayibhile ngoThixo, uBukumkani bakhe nenjongo yakhe emangalisayo ngoluntu. Ukuba ungayivuyela inkcazelo engakumbi okanye ungathanda ukuba uthile eze ekhayeni lakho ukuze akuqhubele isifundo seBhayibhile sesisa, nceda ubhalele kwiWatch Tower, Private Bag X2067, Krugersdorp, 1740, South Africa, okanye kwidilesi efanelekileyo kwezidweliswe kwiphepha 2.