Ngaba Usoloko Ufuna Umyalelo WeBhayibhile?

NGOXA wawuselula, kusenokwenzeka ukuba abazali bakho babekubekela imithetho emininzi. Njengokuba uya ukhula, uye waqonda ukuba babekwenza oko kuba bekuthanda. Njengomntu okhulileyo, kusenokwenzeka ukuba usaphila ngeminye yaloo migaqo abayibethelela kuwe, nangona ungasalawulwa ngabo.

UBawo wethu wasezulwini, uYehova, usinike imiyalelo eliqela engqalileyo ngeLizwi lakhe, iBhayibhile. Ngokomzekelo, uyakwalela ukunqula izithixo, ukuhenyuza, ukukrexeza nobusela. (Eksodus 20:1-17; IZenzo 15:28, 29) Njengokuba ‘sikhula ezintweni zonke,’ siyaqonda ukuba uYehova uyasithanda yaye imiyalelo yakhe ayisibekeli nje imiqathango engeyomfuneko.—Efese 4:15; Isaya 48:17, 18; 54:13.

Noko ke, kukho iimeko ezininzi ekungekho miyalelo ingqalileyo kuzo. Ngenxa yo-ko, abanye bavakalelwa kukuba ukungabikho komthetho ongqalileyo weBhayibhile, kuthetha ukuba bangenza unothanda. Bathi ukuba uThixo wayebone kuyimfuneko, ngewayesichazele ukuthanda kwakhe ngomyalelo ongqalileyo.

Abo bacinga ngale ndlela ngokuqhelekileyo benza izigqibo zobuyatha abathi kamva bazisole gqitha ngazo. Abaqondi ukuba iBhayibhile iqulethe kungekuphela nje imithetho kodwa ikwabonisa nendlela uThixo acinga ngayo. Njengokuba sifunda iBhayibhile yaye sisiya siyazi indlela uYehova ayigqala ngayo imibandela ethile, siba nesazela esiqeqeshwe yiBhayibhile yaye sincedwa ukuba senze ukhetho olubonisa indlela acinga ngayo. Xa sisenjenjalo, siyayivuyisa intliziyo yakhe size sizuze iziqhamo ezibangelwa kukwenza izigqibo zobulumko.—Efese 5:1.

Imizekelo YeBhayibhile Ebalaseleyo

Xa sijonga ingxelo yeBhayibhile yabakhonzi bakaThixo bamandulo, sifumana iimeko apho babecinga ngendlela uYehova azijonga ngayo izinto naxa kwakungekho myalelo ungqalileyo. Ngokomzekelo, khawucinge ngoYosefu. Ngoxa wayelukuhlwa ngumfazi kaPotifare efuna ukulala naye, kwakungekho mthetho kaThixo ubhaliweyo owawukwalela ukukrexeza. Sekunjalo, nakuba kwakungekho mthetho ungqalileyo, uYosefu waqonda ukuba ukukrexeza kukona, kungekuphela nje isazela sakhe kodwa “uThixo.” (Genesis 39:9) Kubonakala ukuba uYosefu waqonda ukuba ukukrexeza kuchasene nendlela uThixo wayecinga ngayo nokuthanda kwakhe, njengoko wayekuchazile e-Eden.—Genesis 2:24.

Khawucinge ngomnye umzekelo. KwiZenzo 16:3 sifunda ukuba uPawulos wamalusa uTimoti ngaphambi kokuba ahambe naye kuhambo lwakhe lobuKristu. Ukanti, kwindinyana 4 sifunda ukuba uPawulos noTimoti baya ezixekweni bedlulisela “imimiselo . . . leyo kwakugqitywe kuyo ngabapostile namadoda amakhulu awayeseYerusalem.” Phakathi kwaloo miyalelo kwakukho isigqibo sokuba amaKristu akakho phantsi komthetho wolwaluko! (IZenzo 15:5, 6, 28, 29) Kwakutheni ukuze uPawulos acinge ukuba uTimoti wayefanele aluswe? “Ngenxa yamaYuda awayekwezo ndawo, kuba onke ayesazi ukuba uyise [kaTimoti] ngumGrike.” UPawulos akazange afune ukubakhubekisa abanye ngokungeyomfuneko. Wayefuna ukuqiniseka ukuba amaKristu ‘ayazincomela kuso sonke isazela sabantu emehlweni kaThixo.’—2 Korinte 4:2; 1 Korinte 9:19-23.

Le yindlela uPawulos noTimoti ababesoloko becinga ngayo. Funda ezi ndinyana zilandelayo njengamaRoma 14:15, 20, 21 neyoku-1 kwabaseKorinte 8:9-13; 10:23-33, yaye uya kubona indlela uPawulos awayeyixhalabele ngokunzulu ngayo ngempilo-ntle yokomoya yabanye, ingakumbi abo banokukhutyekiswa yinto, eneneni, engekho mbi. Yaye uPawulos wabhala ngoTimoti esithi: “Andinamntu wumbi onokuninyamekela ngokwenene njengaye. Kuba bonke abanye bafuna izilangazelelo zabo, kungekhona ezikaKristu Yesu. Kodwa niyabazi ubungqina awabunikelayo ngaye siqu, bokuba waba likhoboka kunye nam ekuhambiseleni phambili iindaba ezilungileyo.” (Filipi 2:20-22) Hayi indlela omhle ngayo umzekelo asimisela wona loo madoda mabini angamaKristu! Kunokukhetha oko kubalungeleyo nabakuthandayo xa kungekho mthetho kaThixo ubandakanyekileyo, baxelisa uthando uYehova noNyana wakhe abanalo ngokuqwalasela indlela izigqibo zabo ezinokubachaphazela ngayo abanye ngokomoya.

Khawucinge ngoYesu Kristu, umzekelo wethu oyintloko. KwiNtshumayelo yakhe yaseNtabeni, walitsho latsola elokuba lowo uyiqondayo injongo yemithetho kaThixo uya kuyithobela nangaphezu koko kuyalelwe ngokucacileyo. (Mateyu 5:21, 22, 27, 28) UYesu, uPawulos, uTimoti noYosefu abazange baqiqe ngelithi ukuba akukho mthetho ungqalileyo, ubani unokwenza unothanda. Bevisisana nendlela uThixo acinga ngayo, la madoda aphila ngokuvumelana noko uYesu akubiza ngokuthi yeyona mithetho mikhulu mibini—ukuthanda uThixo nokuthanda ummelwane.—Mateyu 22:36-40.

Kuthekani NgamaKristu Namhlanje?

Kucacile ukuba asifanele siyigqale iBhayibhile njengoxwebhu lwasemthethweni—silindele ukubona yonke into efanele yenziwe nengenziwa ibhalwe phantsi ngokucacileyo. Siyivuyisa gqitha intliziyo kaYehova xa sikhetha ukwenza izinto ngendlela acinga ngayo, naxa kungekho mthetho ungqalileyo owalatha indlela esizenza ngayo izinto. Ngamanye amazwi, kunokuba sisoloko sixelelwa oko uThixo afuna sikwenze, ‘sinokukuqonda into okuyiyo ukuthanda kukaYehova.’ (Efese 5:17; Roma 12:2) Kutheni oku kumvuyisa uYehova? Ngoba kubonisa ukuba asikhathalelanga kuphela izinto esizikhethayo namalungelo ethu ngaphezu kokumkholisa. Kwakhona kubonisa ukuba sinoxabiso ngothando lwakhe kangangokuba sifuna ukuluxelisa, siluvumele olo thando lusiphembelele. (IMizekeliso 23:15; 27:11) Ukongezelela, ukwenza izinto ezalathwa ziZibhalo kuyasinceda ngokomoya yaye ngamaxesha amaninzi kuyasiphilisa emzimbeni.

Makhe sibone ukuba lo mgaqo unokusebenza njani kwimibandela yobuqu.

Ukukhetha Indlela Yokuzonwabisa

Khawucinge ngomfana ofuna ukuthenga umculo othile. Uyawuthanda lo mculo, kodwa ukhathazwa koko akufunda kwiqweqwe lawo okubonisa ukuba unamazwi athetha ngokuphandle ngesini nathukayo. Kwakhona, uyaqonda ukuba iingoma ezininzi zale mvumi zikhuthaza ukuba nomsindo nogonyamelo. Njengomntu othanda uYehova, lo mfana unomdla kwindlela uYehova acinga navakalelwa ngayo. Unokukuqonda njani oko uThixo akuthandayo kulo mbandela?

Kwincwadi yakhe ayayisiya kwabaseGalati, umpostile uPawulos udwelisa imisebenzi yenyama neziqhamo zomoya kaThixo. Kusenokwenzeka ukuba uyakwazi oko kuqukwa ziziqhamo zomoya kaThixo: uthando, uvuyo, uxolo, ukuzeka kade umsindo, ububele, ukulunga, ukholo, ubulali nokuzeyisa. Kodwa yiyiphi imisebenzi yenyama? UPawulos uyabhala: “Iyabonakala ke yona imisebenzi yenyama, eyile, uhenyuzo, ukungahlambuluki, ihambo evakalala, unqulo-zithixo, ukusebenzelana nemimoya, ubutshaba, iimbambano, amakhwele, ukugqajukelwa yimisindo, usukuzwano, izahlukano, amahlelo, oomona, iindywala, iziyunguma, nezinto ezinjengezi. Ngokubhekisele kwezi zinto ndinilumkisa kwangaphambili, njengoko besendinilumkisile kakade, ukuba abo baqhelisela izinto ezinjalo abayi kubudla ilifa ubukumkani bukaThixo.”—Galati 5:19-23.

Phawula amazwi okugqibela kolu ludwe, athi—“nezinto ezinjengezi.” UPawulos akazange abhale udederhu olupheleleyo lwezinto eziyimisebenzi yenyama. Oku akuthethi kuthi umntu unokusuka nje athi, ‘ndivumelekile ngokweZibhalo ukuba ndenze nantoni na engekho kuludwe lukaPawulos lwemisebenzi yenyama.’ Kunoko, abafundi bafanele basebenzise amandla abo okuqonda ukuze bazibone izinto ezisenokuba azikho kolu ludwe kodwa “ezinjengezi.” Abo baqhubeka besenza izinto “ezinjengezi” bengaguquki abasayi kuzifumana iintsikelelo zoBukumkani bukaThixo.

Ngoko ke, sifanele siziqonde, okanye sizibone, izinto ezingamkholisiyo uYehova. Ngaba oko kunzima? Masithi ugqirha ukuxelele ukuba utye iziqhamo nemifuno kodwa ungayityi ipayi, i-ice cream, nezinto ezinjengezi. Ngaba bekuya kuba nzima ukufumanisa ukuba ikeyiki iwela kweliphi icala? Ngoku khawuphinde ukhangele iziqhamo zomoya kaThixo nemisebenzi yenyama. Umculo okhankanywe ngasentla uwela kweliphi icala? Ngokuqinisekileyo awunanto yakwenza nothando, ukulunga, ukuzeka kade umsindo, okanye iimpawu ezinxulumene nesiqhamo somoya kaThixo. Ubani akasayi kufuna umthetho ongqalileyo ukuze aqonde ukuba olu hlobo lomculo aluvisisani nendlela uThixo acinga ngayo. Bekuya kusebenza imigaqo efanayo nakwiincwadi, iifilimu, iinkqubo zikamabonwakude, imidlalo yekhompyutha, iiWeb sites, nezinye izinto.

Indlela Yokuzilungisa Eyamkelekileyo

Kwakhona iBhayibhile inikela imigaqo yendlela yokunxiba nokuzilungisa. Oku kunceda umKristu ngamnye ukuba asoloko ezilungisa ngendlela entle neyamkelekayo. Kwakhona, umntu othanda uYehova akakugqali oku njengethuba lokwenza unothanda, kodwa lokwenza oko kuya kuvuyisa uYise wasezulwini. Njengokuba sesibonile, isibakala sokuba uYehova enganikelanga miyalelo ingqalileyo ngombandela othile akuthethi kuthi akakhathali enoba abantu benza ntoni na. Iindlela zokuzenza izinto ziyahluka ngokweendawo, yaye nasendaweni enye, ziyaguquka ngokuhamba kwexesha. Noko ke, uThixo unikela imigaqo esisiseko efanele yalathise abantu bakhe ngamaxesha onke nasezindaweni zonke.

Ngokomzekelo, eyoku-1 kuTimoti 2:9, 10 ithi: “Ngokunjalo ndinqwenela ukuba abafazi bazihombise ngesinxibo esilungiswe kakuhle, ngokuthozama nangengqondo ephilileyo, kungekhona ngezimbo zokulukwa kweenwele nokunxitywa kwegolide neeperile nezambatho zeendleko ezinkulu, kodwa ngendlela efanele abafazi abazibanga behlonela uThixo, oko kukuthi, ngemisebenzi elungileyo.” Ngaloo ndlela, amabhinqa namadoda angamaKristu—afanele acingisise ngendlela abantu “abazibanga behlonela uThixo” abalindelwe ukuba bazilungise ngayo ekuhlaleni. Kufanelekile ukuba umKristu acingisise ngendlela inkangeleko yakhe eya kubenza abantu bacinge ngayo ngesigidimi seBhayibhile asithweleyo. (2 Korinte 6:3) UmKristu ongumzekelo akasayi kuzikhathaza gqitha ngokhetho okanye amalungelo akhe, kodwa, kunoko, uya kuzabalazela ukungabi sisiphazamiso okanye isikhubekiso kwabanye.—Mateyu 18:6; Filipi 1:10.

Xa umKristu efumanisa ukuba indlela ethile yokuzilungisa iyabaphazamisa okanye iyabakhubekisa abanye, unokuxelisa umpostile uPawulos ngokuxhalabela abanye ngokomoya kunokwenza into ayithandayo. UPawulos wathi: “Yibani ngabaxelisa mna, njengoko nam ndixelisa uKristu.” (1 Korinte 11:1) Ethetha ngoYesu, uPawulos wabhala: “Kuba kwanoKristu akazange azikholise yena ngokwakhe.” Ingongoma kaPawulos icacile yaye isebenza kuwo wonke amaKristu kuba ithi: “Ngoko, thina bomeleleyo sifanele sithwale ubuthathaka babo bangomelelanga, singazikholisi thina ngokwethu. Ngamnye wethu makakholise ummelwane wakhe koko kulungileyo ukuze akheke.”—Roma 15:1-3.

Ukuqeqesha Amandla Ethu Okuqonda

Sinokuwaqeqesha njani amandla ethu okuqonda ukuze sazi indlela esinokumkholisa ngayo uYehova naxa angasinikanga imiyalelo engqalileyo ngombandela othile? Ukuba iLizwi lakhe silifunda imihla ngemihla, silifundisisa rhoqo, size sicamngce ngezinto esizifundileyo, aya kukhula amandla ethu okuqonda. Kodwa oko akwenzeki ngokuqhwanyaza nje kweliso. Njengokuba umntwana ekhula ngokuthe ngcembe, kunjalo ke nokukhula ngokomoya, akubonakali ngokukhawuleza. Ngoko ke kufuneka umonde, yaye asifanele sikhathazeke ukuba asibonakali sisenza inkqubela ngokukhawuleza. Kwelinye icala, ukuhamba kwexesha kukodwa akusayi kuwakhulisa amandla ethu okuqonda. Elo xesha lifanele lizaliswe kukufundwa kweLizwi likaThixo ngokuthe rhoqo njengokuba kuphawuliwe ngasentla, yaye sifanele siphile ngokuvisisana nelo Lizwi kangangoko sinako.—Hebhere 5:14.

Kusenokuthiwa ngoxa imithetho kaThixo ivavanya ukuthobela kwethu, imigaqo yakhe ivavanya indlela esinzulu ngayo ngokomoya nomnqweno esinawo wokumkholisa. Njengokuba siya sikhula ngokomoya, siya kugxininisa ngakumbi ekuxeliseni uYehova noNyana wakhe. Izigqibo esizenzayo ziya kusekelwa kwindlela uThixo acinga ngayo ngezinto njengoko kubonisiwe kwiZibhalo. Njengoko sivuyisa uBawo wethu wasezulwini kuko konke esikwenzayo, siya kufumanisa ukuba novuyo lwethu luyanda.

[Imifanekiso ekwiphepha 23]

Indlela yokunxiba iyahluka ngokweendawo, kodwa imigaqo yeBhayibhile ifanele isincede kukhetho esilwenzayo