Ukunyamezela Kunomvuzo

¹ “Ngokunyamezela kwenu niya kuyizuza imiphefumlo yenu.” (Luka 21:19) Loo mazwi, ayinxalenye yesiprofeto sikaYesu esiphathelele ‘ukupheliswa kwenkqubo yezinto,’ ayibeka icace into yokuba simele silungele ukujamelana neemvavanyo ezininzi xa sigcina ingqibelelo yethu. Kodwa ngamandla kaYehova, ngamnye wethu ‘unokunyamezela kude kube sekupheleni’ aze ‘asindiswe.’—Mat. 24:3, 13; Fil. 4:13.

² Intshutshiso, impilo, ubunzima bemali, nokunxunguphala ngokweemvakalelo kunokwenza suku ngalunye lube ngumnqantsa. Sekunjalo, singaze silibale ukuba uSathana uzama ukwaphula ingqibelelo yethu kuYehova. Suku ngalunye esihlala sithembekile ngalo kuBawo wethu lolunye usuku esifak’ isandla ngalo kwimpendulo enikelwa kucelomngeni loMngcikivi. Hayi indlela okuvuza ngayo ukwazi ukuba “iinyembezi” zethu ezibangelwa ziimvavanyo azilityalwanga! Zixabisekile kuYehova, yaye ingqibelelo yethu iyayivuyisa intliziyo yakhe!—INdu. 56:8; IMize. 27:11.

³ Ukusulungekiswa Ziimvavanyo: Inkxwaleko inokubonisa ubuthathaka bokholo okanye iimpawu ezibangelwa kukungafezeki, njengekratshi okanye ukungabi namonde. Kunokuzama ukuphepha iimvavanyo okanye ukuziphelisa ngendlela engeyoyaZibhalo, simele sithobele isiluleko esiseLizwini likaThixo sokuba ‘unyamezelo lwethu malupheleliswe.’ Kutheni sisitsho? Ngenxa yokuba ukunyamezela izilingo sithembekile kusinceda sibe ‘ngabapheleleyo nabaphilileyo kwiinkalo zonke.’ (Yak. 1:2-4) Ukunyamezela kunokusinceda sihlakulele iimpawu ezixabisekileyo, ezifana nokuba nengqiqo, uvelwano nenceba.—Roma 12:15.

⁴ Umlinganiselo Ovavanyiweyo Wokholo: Xa sinyamezela iimvavanyo, sifumana umlinganiselo ovavanyiweyo wokholo oxabiseke kakhulu emehlweni kaThixo. (1 Pet. 1:6, 7) Ukholo olunjalo lusixhobisela ukuba sihlale siqinile ukutyhubela iimvavanyo zexa elizayo. Ngaphezu koko, sinokumkholisa uThixo, yaye oku komeleza ithemba esinalo, kulwenze lube lelokwenene ngakumbi kuthi.—Roma 5:3-5.

⁵ Owona mvuzo wokunyamezela esiza kuwufumana ngulowo uchazwe kuYakobi 1:12, othi: “Unoyolo umntu oqhubeka enyamezela isilingo, ngenxa yokuba akuba ekholekile uya kwamkela isithsaba sobomi.” Ngoko ke, masihlale siqinile kuzinikelo lwethu kuYehova, siqinisekile ukuba uya kubavuza ngokwenene abo “baqhubeka bemthanda.”

Icandelo 2: Ukuqhuba Izifundo ZeBhayibhile Ezinenkqubela

Ukulungiselela Ukuqhuba Isifundo

¹ Ukusifundisa ngempumelelo isifundo seBhayibhile kubandakanya kungekuphela nje ukuxubusha umbandela nokufunda iZibhalo ezingacatshulwanga. Kufuneka inkcazelo siyidlulisele ngendlela echukumis’ intliziyo yomfundi. Oku kufuna ukuba silungiselele kakuhle sicinga ngalowo simfundelayo.—IMize. 15:28.

² Indlela Yokulungiselela: Qala ngokuthandazela umfundi lowo neentswelo zakhe. Mcele uYehova akuncede ufikelele intliziyo yakhe. (Kol. 1:9, 10) Ukuze uyazi into ekuthethwa ngayo, hlolisisa umxholo weso sahluko okanye weso sifundo, imixholwana, kunye nayiphi na into oyibonayo enokunceda ekufundiseni. Zibuze, ‘Yintoni eyona njongo yalo mbandela?’ Lo mbuzo uya kukunceda ukuba xa uqhuba isifundo unikel’ ingqalelo kwiingongoma eziziintloko.

³ Wuhlolisise ngenyameko umbandela ngokweziqendu. Fumana iimpendulo zemibuzo ebhaliweyo, ukrwele kuphela amagama namabinzana aziintloko. Hlalutya indlela iZibhalo ezicatshulweyo ezinxulumana ngayo nengongoma eyintloko yeso siqendu, uze ugqibe ngeZibhalo oza kuzifunda xa sele uqhuba isifundo. Mhlawumbi kunokuba luncedo ukubhala amanqaku amafutshane kudini lwephepha elo. Umfundi umele aqonde ukuba ufundiswa iLizwi likaThixo.—1 Tes. 2:13.

⁴ Isifundo Sivisisanise Neentswelo Zomfundi: Emva koko, hlolisisa isifundo ucinga ngaloo mntu uza kumfundela. Zama ukucinga ngemibuzo anokuyibuza neengongoma ekunokuba nzima ukuba aziqonde okanye azamkele. Zibuze: ‘Yintoni ekufuneka ayiqonde okanye asebenzele kuyo ukuze enze inkqubela ngokomoya? Ndinokuyifikelela njani intliziyo yakhe?’ Yandula ke uyilungelelanise kakuhle indlela oza kumfundisa ngayo. Maxa wambi, unokufumanisa ukuba kufuneka ulungiselele umzekeliso, ingcaciso okanye ungcelele lwemibuzo eya kunceda umfundi aqonde intsingiselo yengongoma ethile okanye yesibhalo esithile. (Neh. 8:8) Kodwa kulumkele ukunikela inkcazelo eyongezelelekileyo engazukunceda nganto ekuphuhliseni into ekuthethwa ngayo. Ukwenza impinda emfutshane nakugqiba ukufunda kuya kumnceda zihlale zinkentenza engqondweni yakhe iingongoma ezibalulekileyo.

⁵ Hayi indlela esivuya ngayo xa abafundi abatsha bethwala isiqhamo sobulungisa ukuze badumise uYehova! (Fil. 1:11) Ukuze sibancede balufikelele olo sukelo, sihlandlo ngasinye masilungiselele ngokucokisekileyo xa siza kuqhuba isifundo seBhayibhile.