Sifanele Sibajonge Njani Abantu Njengoko Imini KaYehova Isondela?

“UYehova akacothi ngokuphathelele isithembiso sakhe, . . . kodwa unomonde kuni ngenxa yokuba akanqweneli ukuba kutshabalale nabani na kodwa unqwenela ukuba bonke bafikelele enguqukweni.”—2 PETROS 3:9.

1, 2. (a) UYehova ubajonga njani abantu namhlanje? (b) Yiyiphi imibuzo esinokuzibuza yona?

ABAKHONZI bakaYehova bathunywe ‘ukwenza abafundi beentlanga zonke.’ (Mateyu 28:19) Njengokuba siphumeza esi sabelo yaye silindele “imini enkulu kaYehova,” sifanele sibajonge abantu ngendlela yena abajonga ngayo. (Zefaniya 1:14) Yena ubajonga njani abantu? Umpostile uPetros uthi: “UYehova akacothi ngokuphathelele isithembiso sakhe, njengoko abanye becinga njalo, kodwa unomonde kuni ngenxa yokuba akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Petros 3:9) UThixo ubajonga abantu njengabanokuguquka. ‘Uthanda ukuba zonke iintlobo zabantu zisindiswe zize zifikelele elwazini oluchanileyo lwenyaniso.’ (1 Timoti 2:4) Kaloku, uYehova uyavuya xa ‘ongendawo ebuya endleleni yakhe aze okunene ahlale ephila’!—Hezekile 33:11.

² Ngaba thina sibajonga abantu ngendlela uYehova abajonga ngayo? Njengaye, ngaba sibajonga abantu bezizwe neentlanga njengabasenokuba ‘zizimvu zedlelo lakhe’? (INdumiso 100:3; IZenzo 10:34, 35) Makhe siqwalasele imizekelo emibini ebonisa ukubaluleka bokuba nembono kaThixo. Kuyo yomibini le mizekelo, intshabalalo yayisele isondele, yaye abakhonzi bakaYehova babekuxelelwe kusengaphambili oku. Le mizekelo ibaluleke ngokukhethekileyo njengoko silindele imini enkulu kaYehova.

UAbraham Wayebajonga Abantu Ngendlela UYehova Abajonga Ngayo

3. UYehova wayebajonga njani abemi baseSodom naseGomora?

³ Umzekelo wokuqala ngokasolusapho owayethembekile uAbraham nezixeko ezazizaliswe bubungendawo, iSodom neGomora. Xa uYehova wasiva “isikhalo sokumangalelwa kweSodom neGomora,” akazange nje asuke azitshabalalise ezo zixeko nabo bonke abemi bazo. Waqala waya kuhlola enoba oko kuyinyaniso. (Genesis 18:20, 21) Kwathunyelwa iingelosi ezimbini eSodom, ezafikela emzini kaLote owayelilungisa. Ngobusuku ezafika ngabo ezo ngelosi, “amadoda esixeko, . . . ayingqonga indlu, kususela enkwenkweni kwesa kwindoda endala, bonke abantu belihlokondiba elinye” befuna ukuba neentlobano zobufanasini nezo ngelosi. Ngokucacileyo, ubungendawo obugqithiseleyo babemi beso sixeko bangqina ukuba ngokwenene sasifanele sitshatyalaliswe. Sekunjalo, ezi ngelosi zathi kuLote: “Kukho nabani na ongomnye apha? Umkhwenyana noonyana bakho neentombi zakho nabo bonke onabo kwesi sixeko, bakhuphe kule ndawo!” UYehova wavula ithuba lokusindisa abemi abathile beso sixeko, kodwa ekugqibeleni, kwasinda uLote neentombi zakhe ezimbini kuphela.—Genesis 19:4, 5, 12, 16, 23-26.

4, 5. Kwakutheni ukuze uAbraham ambongoze uYehova ngenxa yabemi baseSodom, yaye ngaba indlela awayebajonga ngayo abantu yayivisisana naleyo kaYehova?

⁴ Ngoku, makhe sibuyele emva xa uYehova wachaza injongo yakhe yokuhlola isixeko saseSodom nesaseGomora. Ngelo xesha uAbraham wambongoza esithi: “Masithi kukho abantu abangamalungisa abangamashumi amahlanu phakathi kweso sixeko. Ngaba ubuya kubatshayela, ungayixoleli loo ndawo kusini na, ngenxa yamalungisa angamashumi amahlanu angaphakathi kuyo? Makube lee kuwe ukwenza ngale ndlela, ukubulala umntu olilungisa kunye nongendawo, wenze emntwini olilungisa njengoko usenza kongendawo! Makube lee kuwe ukwenjenjalo. UMgwebi womhlaba wonke akayi kwenza okulungileyo yini na?” UAbraham wasebenzisa ibinzana elithi “makube lee kuwe” kabini. UAbraham wayesazi ukuba uYehova wayengenakumtshabalalisa olungileyo nongendawo. Xa uYehova wathi wayengayi kuyitshabalalisa iSodom ukuba kwakukho “abantu abangamalungisa abangamashumi amahlanu phakathi kweso sixeko,” uAbraham waqhubeka elinciphisa eli nani de lafikelela kwabalishumi kuphela.—Genesis 18:22-33.

⁵ Ngaba uYehova ngewayemphulaphule izibongozo zika-Abraham ukuba oko kwakungqubana nembono yakhe? Ngokucacileyo akunjalo. ‘Njengomhlobo kaYehova,’ kucacile ukuba uAbraham wayekwazi oko yaye naye wayenembono efana neYakhe. (Yakobi 2:23) Xa uYehova wayeza kuyigweba iSodom neGomora, wayekulungele ukuphulaphula izibongozo zika-Abraham. Ngoba? Ngenxa yokuba uBawo wethu osezulwini “akanqweneli ukuba kutshabalale nabani na kodwa unqwenela ukuba bonke bafikelele enguqukweni.”

Indlela UYona Awayebajonga Ngayo Abantu—Yayahluke Kwaphela

6. Yintoni abayenzayo abemi baseNineve bakuva isibhengezo sikaYona?

⁶ Ngoku makhe siqwalasele umzekelo wesibini—lowo kaYona. Ngoku isixeko esasiza kutshatyalaliswa yayiyiNineve. Umprofeti uYona kwathiwa makaxelele abantu ukuba ububi beso sixeko ‘babunyuke baya kufika phambi kukaYehova.’ (Yona 1:2) Xa kudityaniswa namahlomela-dolophu ayo, iNineve yayisisixeko esikhulu, “umgama onokuhanjwa ngeentsuku ezintathu.” Xa ekugqibeleni uYona wathobelayo waza wangena eNineve, waqhubeka evakalisa esithi: “Ziintsuku ezingamashumi amane kuphela, ibhukuqwe iNineve.” Bakukuva oko, “abantu baseNineve bakholwa kuThixo, yaye babhengeza ukuba kuzilwe ukutya kwambathwe namarhonya.” Kwanokumkani waseNineve waguquka.—Yona 3:1-6.

7. UYehova wabajonga njani abemi abaguqukileyo baseNineve?

⁷ Oku kwakwahluke gqitha koko kwenzeka eSodom! UYehova wabajonga njani abemi baseNineve abaguqukileyo? KuYona 3:10 kuthiwa: “UThixo oyinyaniso wayibona imisebenzi yabo, ukuba babebuyile endleleni yabo embi; yaye uThixo oyinyaniso wazisola ngentlekele awayethe uza kubazisela yona; waza akayizisa.” UYehova “wazisola” ngengqiqo yokuba warhoxa kwinto awayeza kuyenza kubemi baseNineve ngenxa yokuba baziguqula iindlela zabo. Imigaqo kaThixo ayizange iguquke, kodwa uYehova wasiguqula isigqibo sakhe akubona ukuba abemi baseNineve baguqukile.—Malaki 3:6.

8. Yintoni eyambangela uYona waqumba?

⁸ Xa uYona wafumanisa ukuba iNineve ayisayi kutshatyalaliswa, ngaba wazijonga izinto ngendlela uYehova awayezijonga ngayo? Akunjalo, kuba sixelelwa oku: “Noko ke, oku kwakungamkholisi kakhulu uYona, yaye wavutha ngumsindo.” Yintoni enye eyenziwa nguYona? Le ngxelo ithi: “Wathandaza kuYehova wathi: ‘Awu, Yehova, ibingengomcimbi wam na lo, ngoxa bendisemhlabeni wakowethu? Kungenxa yoko le nto ndiye ndahamba phambili ndaza ndabaleka ndemka ndaya eTarshishe; kuba bendisazi ukuba unguThixo onobabalo nenceba, ozeka kade umsindo nonobubele bothando obuninzi, nozisolayo ngentlekele.’” (Yona 4:1, 2) UYona wayezazi iimpawu zikaYehova. Noko ke, ngesi sihlandlo lo mprofeti waqumba yaye akazange abajonge abemi baseNineve abaguqukileyo ngendlela uThixo awayebajonga ngayo.

9, 10. (a) UYehova wamfundisa ntoni uYona? (b) Kutheni sinokuthi ekugqibeleni uYona wayamkela indlela uYehova abajonga ngayo abemi baseNineve?

⁹ UYona waphuma eNineve, wakha umnquba, waza wahlala emthunzini wawo “de abone oko kwakuza kwenzeka esixekweni.” UYehova wahlumisa umhlavuthwa ukuze uYona afumane umthunzi. Noko ke, ngosuku olulandelayo lo mthi wabuna. Xa uYona waba nomsindo ngenxa yoku, uYehova wathi: “Wena uye wanosizi ngomhlavuthwa . . . Yaye mna andifanele na ndibe nosizi ngeNineve isixeko esikhulu, ekukho kuyo abantu abangaphezu kwekhulu elinamashumi amabini amawaka abangawaziyo konke konke umahluko phakathi kwesandla sabo sasekunene nesasekhohlo, ngaphandle kwezilwanyana zasekhaya ezininzi?” (Yona 4:5-11) Esi sisifundo esihle awayefanele uYona asifunde ngendlela uYehova abajonga ngayo abantu!

¹⁰ Asichazelwanga indlela uYona aziva ngayo ngenxa yamazwi kaThixo okuba nosizi ngabantu baseNineve. Sekunjalo, kuyabonakala ukuba lo mprofeti wayiguqula indlela awayebajonga ngayo abantu baseNineve abaguqukayo. Sitsho kuba uYehova wamsebenzisa ekubhaleni le ngxelo iphefumlelweyo.

Sinjani Isimo Sakho Sengqondo?

11. Yiyiphi indlela ekucacileyo ukuba uAbraham wayeza kubajonga ngayo abantu abaphilayo namhlanje?

¹¹ Namhlanje sijamelene nenye intshabalalo—ukutshatyalaliswa kwale nkqubo yezinto ingendawo ebudeni bemini enkulu kaYehova. (Luka 17:26-30; Galati 1:4; 2 Petros 3:10) UAbraham wayeza kubajonga njani abantu abaphila kweli hlabathi seliza kutshatyalaliswa? Kuyacaca ukuba wayeza kukhathazeka ngabo bangekaziva ‘iindaba zilungileyo zobukumkani.’ (Mateyu 24:14) UAbraham wambongoza ngokuphindaphindiweyo uThixo ngenxa yamalungisa ayesenokuba akho eSodom. Ngaba nathi siyakhathazeka ngabantu abasenokuzishiya iindlela zeli hlabathi lilawulwa nguSathana ukuba banokunikwa ithuba lokuguquka baze bakhonze uThixo?—1 Yohane 5:19; ISityhilelo 18:2-4.

12. Kutheni kulula ukuba nesimo sengqondo esinjengesikaYona ngabantu esidibana nabo entsimini, yaye yintoni esinokuyenza ngaloo nto?

¹² Kuyinto efanelekileyo ukulangazelela ukuphela kobungendawo. (Habhakuki 1:2, 3) Sekunjalo, kulula nokuba nesimo sengqondo esinjengesikaYona, ukungakhathali ngabantu abasenokuguquka. Oku kunjalo ngakumbi ukuba sisoloko sidibana nabantu abangakhathaliyo, abachasayo okanye nabade babe ndlongondlongo xa sibatyelele emakhayeni abo sibaphathele isigidimi soBukumkani. Sisenokuyilibala into yokuba uYehova usenabathile aza kubahlangula kule nkqubo yezinto ingendawo. (Roma 2:4) Ukuba xa sizigocagoca sifumanisa ukuba sinembono awayenayo uYona ngaphambili, enoba incinane kangakanani na, yendlela awayebajonga ngayo abemi baseNineve, sinokuthandaza kuYehova size sicele asincede ukuze sibajonge abantu ngendlela abajonga ngayo.

13. Kutheni sinokuthi uYehova unenkxalabo ngabantu namhlanje?

¹³ UYehova usenenkxalabo ngabo bangekabi ngabakhonzi bakhe, yaye uyaziphulaphula izibongozo zabantu bakhe abazahluleleyo. (Mateyu 10:11) Ngokomzekelo, uya ‘kubangela ukuba okusesikweni kwenziwe’ ukuphendula imithandazo yabo. (Luka 18:7, 8) Ngaphezu koko, uYehova uya kuzizalisekisa zonke izithembiso neenjongo zakhe ngexesha lakhe. (Habhakuki 2:3) Oku kuya kuquka ukushenxisa bonke ububi emhlabeni, kanye njengokuba wabatshabalalisayo abemi baseNineve emva kokuba baphinda benza ubungendawo.—Nahum 3:5-7.

14. Yintoni esifanele ukuba siyayenza ngoxa silindele imini enkulu kaYehova?

¹⁴ De le nkqubo ingendawo ishenxiswe ebudeni bemini enkulu kaYehova, ngaba siya kulinda ngomonde, sixakekile ekwenzeni ukuthanda kwakhe? Asazi enoba kusafuneka sishumayele kangakanani na ngaphambi kokuba ifike imini kaYehova, kodwa into esiyaziyo kukuba iindaba ezilungileyo zoBukumkani ziya kushunyayelwa kuwo wonke umhlaba omiweyo de uThixo aneliseke ngaphambi kokuba kufike isiphelo. Yaye ngokuqinisekileyo sifanele sibe nenkxalabo ‘ngezinto ezinqwenelekayo’ ekusafuneka kuziwe nazo njengoko uYehova eqhubeka ezalisa indlu yakhe ngozuko.—Hagayi 2:7.

Imbono Esinayo Ibonakala Ngezenzo Zethu

15. Yintoni enokulwandisa uxabiso lwethu ngomsebenzi wokushumayela?

¹⁵ Mhlawumbi kwindawo esihlala kuyo abantu abanamdla xa sishumayela, yaye asikwazi ukufudukela kwindawo abafuneka ngakumbi kuyo abavakalisi boBukumkani. Masithi kukho abantu abalishumi abanokufumaneka entsimini yethu ngaphambi kokufika kwesiphelo. Ngaba sivakalelwa kukuba sifanele senze umgudu wokufuna abo bantu balishumi? UYesu “wazisizela” izihlwele “ngenxa yokuba zazihlinzekile, zilahliwe njengezimvu ezingenamalusi.” (Mateyu 9:36) Ngokufundisisa iBhayibhile nokuwafunda ngenyameko amanqaku eMboniselo noVukani!, sinokuyibona ngakumbi indlela elisebunzimeni ngayo eli hlabathi. Kwakhona, oku kunokusenza siyiqonde ngakumbi imfuneko yokushumayela iindaba ezilungileyo. Ngaphezu koko, ukubonisa uxabiso ngenkcazelo esekelwe eBhayibhileni elungiselelwe “likhoboka elithembekileyo neliyingqondi” kusenokusenza sibe nenzondelelo engakumbi nakwintsimi esetyenzwa rhoqo.—Mateyu 24:45-47; 2 Timoti 3:14-17.

16. Sinokuyandisa njani impumelelo yethu entsimini?

¹⁶ Ukubakhathalela abo basenokusamkela isigidimi esinik’ ubomi esisekelwe eBhayibhileni kusenza sicinge ngamaxesha awahlukahlukeneyo neendlela zokuthetha nabantu entsimini. Ngaba sifumanisa ukuba abantu abaninzi abakho xa sibatyelele? Ukuba kunjalo, sinokuphumelela ngakumbi entsimini ukuba sishumayela ngamaxesha angafaniyo nakwiindawo ezahlukahlukeneyo. Abalobi baloba ngexesha abanokubambisa ngaloo iintlanzi ezininzi. Ngaba sinokwenza into efanayo nakumsebenzi wethu wokuloba ngokomoya? (Marko 1:16-18) Kutheni ungazami ukushumayela ngamarhatya nangomnxeba apho kuvumeleke khona? Abanye bafumanise ukuba ‘babambisa’ ngakumbi kwiindawo zokumisa iimoto, apho ziphumla khona iilori, kwindawo ezimisa kuyo iiteksi, ezigaraji nasezivenkileni. Ukubajonga abantu ngendlela uAbraham awayebajonga ngayo kubonakala naxa sixhakamfula amathuba okushumayela ngokungacwangciswanga.

17. Sinokubakhuthaza njani abavangeli basemazweni nabanye abakhonza kwamanye amazwe?

¹⁷ Abantu abaninzi abakasiva isigidimi soBukumkani. Ukongezelela kumsebenzi wethu wokushumayela, ngaba sinokubonisa ukuba siyabakhathalela abo bantu kungakhange de kufuneke ukuba sihambe emakhaya? Kaloku, ngaba kukho abavangeli basemazweni okanye abalungiseleli bexesha elizeleyo esibaziyo abasebenza kwamanye amazwe? Ukuba kunjalo, sinokubabhalela iileta sivakalise uxabiso esinalo ngomsebenzi abawenzayo. Ukwenjenjalo kunokubonisa njani ukuba siyabakhathalela abantu bonke? Iileta zethu zokhuthazo nezokuncoma zinokubomeleza abavangeli basemazweni ukuze bahlale kwizabelo zabo, ngaloo ndlela bancede abantu abaninzi ngakumbi ukuze bayazi inyaniso. (ABagwebi 11:40) Kwakhona sinokubathandazela abavangeli basemazweni size sithandazele nabo balambele inyaniso kwamanye amazwe. (Efese 6:18-20) Enye indlela esinokubonisa ngayo ukuba sibakhathalele abanye kungokunikela ngemali kumsebenzi wamaNgqina kaYehova owenziwa ehlabathini lonke.—2 Korinte 8:13, 14; 9:6, 7.

Ngaba Unokukwazi Ukufuduka?

18. Amanye amaKristu enze ntoni ukuhambisela phambili uBukumkani kumazwe ahlala kuwo?

¹⁸ Abo baye bafudukela kwiindawo abafuneka ngakumbi kuzo abavakalisi boBukumkani baye basikelelwa ngemigudu yabo yokuzincama. Noko ke, ngoxa ehlala kumazwe awo, amanye amaNgqina kaYehova aye afunda olunye ulwimi ukuze akwazi ukunceda ngokomoya abantu abasuka kwamanye amazwe. Imigudu enjalo iye yaluncedo ngokwenene. Ngokomzekelo, amaNgqina asixhenxe anceda amaTshayina kwisixeko saseTexas, eUnited States, aye amkela abantu abali-114 ababeze esikhumbuzweni seSidlo seNkosi Sangokuhlwa ngowama-2001. Abo banceda abo bantu baye bayifumanisa intsimi yabo ilungele ukuvunwa.—Mateyu 9:37, 38.

19. Yintoni ecebisekayo ukuba ucinga ngokufudukela kwelinye ilizwe ukuze uye kuncedisa kumsebenzi wokushumayela ngoBukumkani?

¹⁹ Mhlawumbi ucinga ukuba wena nentsapho yakho nisenokufudukela kwindawo abafuneka ngakumbi kuyo abashumayeli boBukumkani. Phofu ke, kububulumko ukuba ‘uhlale phantsi kuqala, ubale indleko.’ (Luka 14:28) Oku kubaluleke nangakumbi xa ubani ecinga ngokufudukela kwelinye ilizwe. Nabani na ocinga ngokwenjenjalo ufanele azibuze le mibuzo: ‘Ngaba ndiya kukwazi ukuyondla intsapho yam? Ngaba ndinokuzifumana iincwadi ezifanelekileyo zokuhlala kwelo lizwe? Ngaba ndiyakwazi ukuthetha ulwimi lwalapho, okanye ndikulungele ukulufunda? Kuthekani ngemo yezulu nendlela yalapho yokuphila? Ngaba ngokwenene ndiya ‘kuwomeleza’ yaye ndingabi ngumthwalo kwamanye amakholwa elo lizwe?’ (Kolose 4:10, 11) Ukuze ufumanise ukuba kufuneka uncedo olungakanani kwilizwe ocinga ukufudukela kulo, kusoloko kukuhle ukubhalela iofisi yesebe yamaNgqina kaYehova eyongamela umsebenzi wokushumayela kuloo mmandla.a

20. Omnye umKristu oselula uye wazinikela njani ukuze ancede amanye amakholwa nabanye kwelinye ilizwe?

²⁰ Omnye umKristu owayesebenza kulwakhiwo lweeHolo zoBukumkani eJapan weva ukuba kufuneka abasebenzi abanobuchule bokwakha indawo yonqulo eParaguay. Kuba wayengatshatanga yaye esenamandla obutsha, wafudukela kwelo lizwe waza wasebenza kangangeenyanga ezisibhozo inguye yedwa osebenza ixesha elizeleyo kuloo msebenzi wokwakha. Ngoxa wayelapho, wafunda ukuthetha iSpanish waza waqhuba izifundo zeBhayibhile. Wayibona imfuneko yabavakalisi boBukumkani kwelo lizwe. Nangona wabuyela eJapan, wakhawuleza wabuyela eParaguay waza wanceda ekuhlanganiseleni abantu kuloo Holo yoBukumkani.

21. Yintoni esifanele siyixhalabele ngokuyintloko yaye sifanele sibe nesimo sengqondo esinjani njengoko silindele imini enkulu kaYehova?

²¹ UThixo uya kuqinisekisa ukuba kushunyayelwe ngokucokisekileyo, ngokuvumelana nokuthanda kwakhe. Ngoku, uyawukhawulezisa umsebenzi wokugqibela wokuvuna ngokomoya. (Isaya 60:22) Njengokuba silindele imini kaYehova, masiwenze ngenzondelelo umsebenzi wokuvuna size sibajonge abantu ngendlela uThixo wethu onothando abajonga ngayo.

[Umbhalo osemazantsi]

Usakhumbula Na?

• Njengokuba silindele imini kaYehova, sifanele sibajonge njani abantu?

• UAbraham wayebajonga njani abantu abangamalungisa abasenokuba babehlala eSodom?

• UYona wabajonga njani abemi abaguqukileyo baseNineve?

• Sinokubonisa njani ukuba sibajonga abantu abangekaziva iindaba ezilungileyo ngendlela uYehova abajonga ngayo?

[Umfanekiso okwiphepha 16]

UAbraham wayebajonga abantu ngendlela uYehova abajonga ngayo

[Umfanekiso okwiphepha 17]

UYona waguquka wabajonga abemi baseNineve abaguqukayo ngendlela uYehova abajonga ngayo

[Imifanekiso ekwiphepha 18]

Ukubakhathalela abantu kusenza sicinge ngamaxesha awahlukahlukeneyo neendlela esinokushumayela ngazo iindaba ezilungileyo