Kutheni Sisiya Kwiintlanganiso Nje?
UCHRISTINE washiywa kwesinomhlwa ngumyeni wakhe emva kweminyaka engama-20 betshatile, emshiya ekhulisa oonyana abasixhenxe nentombazana. Babeqala kwiminyaka esi-7 ukusa kweli-18 ubudala. Uthi: “Ngoku kwakuza kufuneka ndenze zonke izigqibo ezibalulekileyo. Ndayifumana inzima gqitha le mbopheleleko ibe ndandilangazelela inkxaso nokhokelo.” Walufumana phi uncedo?
UChristine uthi: “Sancedwa ziintlanganiso zamaKristu. Kwezi ntlanganiso, sasixhaswa ngabahlobo size sifumane ulwalathiso kwiLizwi likaThixo. Ukuya rhoqo kwiintlanganiso kwasinceda kuzo zonke iinkalo ezibalulekileyo zobomi.”
Kula ‘maxesha amanqam ekunzima ukujamelana nawo,’ sonke sijamelana nezilingo ezahlukeneyo. (2 Timoti 3:1) NjengoChristine, usenokuba ufumanisa iintlanganiso zamaNgqina kaYehova zilomeleza ukholo lwakho, kwanokuba ziyindlela ebalulekileyo yokunqula uYehova. Iintlanganiso zebandla ezintlanu ezibakho veki nganye zimele zikwenze umthande ngakumbi uThixo, zomeleze ithemba lakho kwikamva zize zikunike ulwalathiso olusekelwe eBhayibhileni ngendlela yokuhlangabezana nezilingo.
Noko ke, kukho abo kunzima kubo ukubakho rhoqo kwiintlanganiso. Ithi imini iphela babe bedinwe beyimfe, de kube nzima nokucinga ngokutshintsha impahla baye kwiintlanganiso. Abanye umsebenzi wabo uhlala uphazamisana nokuya kwabo kwiintlanganiso. Kusenokufuneka bafumane umvuzo omncinane okanye babe sesichengeni sokuphulukana nomsebenzi ukuze bakwazi ukubakho kuzo zonke iintlanganiso. Bambi basenokungayi kwiintlanganiso kuba nje bevakalelwa kukuba ukuzonwabisa kubahlaziya ngakumbi kunokuya kwiintlanganiso.
Ziziphi izizathu ezibalulekileyo zokuya kwiintlanganiso zamaKristu? Yintoni onokuyenza ukuze zikuhlaziye iintlanganiso? Ukuze sifumene impendulo kule mibuzo, makhe sihlolisise isimemo sobubele sikaYesu esikuMateyu 11:28-30. Wathi: “Yizani kum, nonke nina nibulalekayo nenisindwa ngumthwalo, yaye ndiza kunihlaziya. Thabathani idyokhwe yam nize nifunde kum, kuba ndinomoya wobulali, ndithobekile ngentliziyo, kwaye niya kuyifumanela ukuhlaziyeka imiphefumlo yenu. Kuba idyokhwe yam yeyobubele nomthwalo wam ukhaphukhaphu.”
“Yizani Kum”
UYesu wathi: “Yizani kum.” Enye indlela yokwamkela esi simemo kukubakho rhoqo kwiintlanganiso. Kubalulekile ukubakho kwezi ntlanganiso, kuba uYesu wakha wathi: “Apho kukho ababini okanye abathathu abahlanganisene ndawonye egameni lam, ndilapho phakathi kwabo.”—Mateyu 18:20.
Kwinkulungwane yokuqala, uYesu wamema abantu abahlukahlukeneyo ukuba bamlandele. Ngaloo ndlela wabanika ithuba lokuba nolwalamano olusondeleyo naye. Bambi basamkela kwangoko eso simemo. (Mateyu 4:18-22) Abanye bavumela izinto eziphathekayo zabathintela. (Marko 10:21, 22; Luka 9:57-62) UYesu waqinisekisa abo bamlandelayo wathi: “Asinini enanyula mna, kodwa ndim owanyula nina.”—Yohane 15:16.
Emva kokufa nokuvuswa kwakhe, uKristu zange aphinde akwazi ukuba kunye nabafundi bakhe ngokwenyama. Kodwa wayesekunye nabo kuba wayesalathisa umsebenzi wabo ebona nendlela abasabela ngayo kwisiluleko sakhe. Ngokomzekelo, kwiminyaka emalunga nama-70 evusiwe, wawaluleka waza wawakhuthaza amabandla asixhenxe aseAsia Minor. Amazwi akhe aye abonisa ukuba ubuqonda kakuhle ubuthathaka neempawu ezintle zabantu ababekulo mabandla.—ISityhilelo 2:1–3:22.
Nangoku uYesu usenomdla ongazenzisiyo kumfundi ngamnye wakhe. Uthembisa athi: “Khangelani! ndinani yonke imihla de kube sekuphelisweni kwenkqubo yezinto.” (Mateyu 28:20) Ngoku siphila kwixesha lesiphelo ibe simele sithobele isimemo sikaYesu sokuba simlandele. Oku kuquka ukubakho rhoqo kwiintlanganiso. UYesu ufuna simphulaphule size ‘sifundiswe ngaye’ kwizifundo neentetho ezisekelwe eBhayibhileni ezihlala zikho kwiintlanganiso. (Efese 4:20, 21) Ngaba uyasabela kwisimemo sikaYesu esithi: “Yizani kum”?
“Nina Nibulalekayo Nenisindwa Ngumthwalo”
Isizathu esibalulekileyo sokuya kwiintlanganiso zamaKristu kukufumana ukhuthazo. (Hebhere 10:24, 25) Baninzi kuthi ‘ababulalekayo nabasindwayo ngumthwalo’ ngeendlela ezahlukeneyo. Zisenokuba ninzi izinto ezixhalabisayo, njengempilo. Kwiintlanganiso zamaKristu, unokufumana ukhuthazo. (Roma 1:11, 12) Ngokomzekelo, uva amagqabaza akomelezayo, ukhunjuzwe ngethemba eliseBhayibhileni ubone nokholo lwabanye abanyamezela izilingo. Konke oku kunokukunceda ukwazi ukuzinyamezela uze ube nembono efanelekileyo ngeengxaki zakho.
Cinga la magqabaza elinye ibhinqa elingumKristu elinesifo esinganyangekiyo. Lithi: “Isigulo sam sifuna ndichithe ixesha elithile esibhedlele. Ukuya kwiintlanganiso emva kokuhlala esibhedlele kuba nzima maxa wambi, kodwa ndiyaya kuba yeyona ndawo yam leyo. Ububele nothando lwabazalwana noodade zivuselela uvuyo lwam, yaye imfundiso nolwalathiso olunikelwa nguYehova noYesu zenza ubomi bam bube nenjongo.”
“Idyokhwe Yam Yeyobubele Nomthwalo Wam Ukhaphukhaphu”
Phawula ukuba kule ndinyana siyihlalutyayo, uYesu wathi: “Nifunde kum.” Ngokufunda kuYesu, siba ngabafundi bakhe, ibe sithabatha idyokhwe yakhe xa sizahlulela kuThixo size sibhaptizwe. (Mateyu 28:19, 20) Ukuba nenxaxheba rhoqo kwiintlanganiso kubalulekile ukuze sihlale singabafundi bakaYesu. Kutheni kubalulekile nje? Kungenxa yokuba kukwiintlanganiso zamaKristu apho sifundiswa khona ngoYesu, iimfundiso zakhe neendlela zakhe zokwenza izinto.
Nguwuphi lo mthwalo uKristu afuna siwuthwale? Ikwangulo mthwalo awuthweleyo—ilungelo lokwenza ukuthanda kukaThixo. (Yohane 4:34; 15:8) Kufuneka umgudu ukuze sithobele imiyalelo kaThixo, kodwa lo mthwalo awukho nzima ukuba singakwazi ukuwuthwala. Usenokubonakala unzima xa sizama ukuwuthwala ngokwethu. Noko ke, ukuba sithandazela umoya kaThixo size sizondle ngokutya kokomoya esikufumana kwiintlanganiso, uThixo uya kusinika “amandla angaphaya koko kuqhelekileyo.” (2 Korinte 4:7) Xa sizilungiselela kakuhle iintlanganiso size sibe nenxaxheba kuzo, sitsho simthande ngakumbi uYehova. Xa sisenza izinto kuba simthanda uThixo, imiyalelo yakhe ‘ayibi nzima.’—1 Yohane 5:3.
Abantu ngokubanzi bazama ukufumana imali eyaneleyo ukuze baphile, iingxaki zempilo nezinye. Noko ke, asithembeli kubulumko babantu ukuze sihlangabezane nazo. Iintlanganiso zebandla zisinceda siyeke ‘ukuxhalaba,’ kuba uYehova uyazinyamekela iintswelo zethu asincede sihlangabezane neengxaki. (Mateyu 6:25-33) Eneneni, iintlanganiso zamaKristu yindlela uThixo abonisa ngayo ukusithanda kwakhe.
“Ndinomoya Wobulali Ndithobekile Ngentliziyo”
UYesu wayesoloko esiya kwindlu yesikhungu, apho lalixutyushwa khona iLizwi likaThixo. Ngesinye isihlandlo, uYesu wathabatha umsongo kaIsaya waza wafunda wathi: “Umoya kaYehova uphezu kwam, ngenxa yokuba undithambisele ukuvakalisa iindaba ezilungileyo kumahlwempu, undithumele ukushumayela inkululo kubathinjwa nokubuyiselwa kokubona kwiimfama, ukukhulula abo batyunyuziweyo, ukushumayela unyaka wolwamkelo kaYehova.” (Luka 4:16, 18, 19) Kumele ukuba kwaba mnandi gqitha ukuva uYesu ecacisa loo mazwi esithi: “Namhlanje esi sibhalo nisandul’ ukusiva sizalisekile.”—Luka 4:21.
UYesu, “umalusi oyintloko” onomoya wobulali, usabanyamekela ngokomoya abalandeli bakhe. (1 Petros 5:1-4) Lisalathiswa nguye, “ikhoboka elithembekileyo neliyingqondi” liye lamisela amadoda angabelusi kumabandla amaNgqina kaYehova ehlabathini lonke. (Mateyu 24:45-47; Tito 1:5-9) La madoda ‘alusa umhlambi kaThixo’ ngobulali nokumisela umzekelo omhle ngokubakho rhoqo kwiintlanganiso. Unokubonisa umbulelo ngezi “zipho ezingabantu” yaye ukhuthaze abanye ngokubakho kwakho uze ube nenxaxheba kwezi ntlanganiso.—IZenzo 15:30-33; 20:28; Efese 4:8, 11, 12.
“Niya Kuyifumanela Ukuhlaziyeka Imiphefumlo Yenu”
Xa ukwiintlanganiso zamaKristu, yintoni onokuyenza ukuqinisekisa ukuba zikuhlaziya ngokwenene? Enye kukuthobela isiluleko sikaYesu esithi: “Nikelani ingqalelo kwindlela eniphulaphula ngayo.” (Luka 8:18) Abantu ababekufuna ngokwenene ukufunda banikela ingqalelo epheleleyo kuYesu. Bamcela ukuba acacise imizekeliso yakhe, batsho baqonda izinto ezinzulu.—Mateyu 13:10-16.
Nawe unokuxelisa abo babelambele izinto zokomoya ngokuziphulaphula ngenyameko iintetho ezinikelwa kwiintlanganiso zethu. (Mateyu 5:3, 6) Ukuze unikele ingqalelo, zama ukuhambisana nendlela esiqiqa ngayo isithethi. Zibuze le mibuzo: ‘Ndingayisebenzisa njani le nkcazelo kubomi bam? Ndingayisebenzisa njani ukuze ndincede abanye? Ndingayicacisa njani le ngongoma?’ Khangela nezibhalo ezisetyenziswa sisithethi ukuphuhlisa iingongoma zaso. Okukhona unikela ingqalelo kwindlela ophulaphula ngayo, kokukhona ziya kuhlaziya ngakumbi iintlanganiso.
Emva kweentlanganiso, xubusha oko ukufundileyo nabanye. Nikela ingqalelo kumbandela nendlela onokusetyenziswa ngayo. Ukuncokola ngendlela eyakhayo kwenza iintlanganiso zihlaziye gqitha.
Ziyavakala izizathu zokuya kwethu kwiintlanganiso. Emva kokuhlolisisa iingenelo esixubushe ngazo, apha, kutheni ungazibuzi, ‘Ndisabela njani kwisimemo sikaYesu esithi: “Yizani kum”?’
[Imifanekiso ekwiphepha 11]
Ngaba kukho izinto ezikuphazamisayo ungayi kwiintlanganiso?