• Sebenzisa Iividiyo Ukuze Ufundise
    Ubulungiseleli BoBukumkani—2006 | Februwari

    • Sebenzisa Iividiyo Ukuze Ufundise

      1. UYehova wayisebenzisa njani imibono namaphupha ukuze afundise abakhonzi bakhe bamandulo, yaye oku kwaba nawuphi umphumo?

      1 Ukuze adlulisele inkcazelo ebalulekileyo kubakhonzi bakhe bamandulo, maxa wambi uYehova wayesebenzisa imibono namaphupha. Cinga nje ngombono kaHezekile wenqwelo kaYehova yokulwa yasezulwini. (Hez. 1:1-28) Khawube nomfanekiso ngqondweni wendlela uDaniyeli awavakalelwa ngayo emva kokuphupha ngesiprofeto sokulandelelana kwamagunya ehlabathi. (Dan. 7:1-15, 28) Yaye kuthekani ngokutyhilelwa okuchulumancisayo kukampostile uYohane “ngemiqondiso” ephathelele izinto eziza kwenzeka ‘ngemini yeNkosi’? (ISityhi. 1:1, 10) UYehova wabafundisa esebenzisa imibala ecacileyo nemibono, yaye oko kwayibethelela loo mfundiso ezingqondweni zabo.

      2. Yintoni esinokuyisebenzisa ukuze sifundise abantu inyaniso yeBhayibhile?

      2 Ukuba sifuna ukufundisa abanye inyaniso yeBhayibhile ukuze bangalibali lula, ngokufanayo sinokusebenzisa iividiyo zethu ukuze sibafundise. Iividiyo zethu zigubungela imibandela emininzi yaye zenza ubani ayithembe ngakumbi iBhayibhile, intlangano kaYehova nemigaqo ephucula ubomi bamaKristu. Makhe sihlolisise iindlela ezimbalwa esinokuzisebenzisa ngazo iividiyo zethu. Nantsi imizekelo yezo sinokuzisebenzisa.

      3. Unokusebenzisa ntoni ukuze utsalele isifundo seBhayibhile entlanganweni?

      3 Entsimini: Ngaba usandul’ ukuxelela isifundo sakho seBhayibhile ngobuzalwana bazwenibanzi bamaKristu? Sibonise oko ngokusebenzisa ividiyo ethi Our Whole Association of Brothers. Usenokusiboleka ukuba siyibukele ngaphambi kokuba niqhube esinye isifundo okanye niyibukele kunye ngexesha eniqhele ukufunda ngalo. Yandula ke uxubushe naso usebenzisa imibuzo efumaneka kuBulungiseleli Bethu BoBukumkani bukaOktobha 2002.

      4. Ziziphi izixhobo zokufundisa iNgqina eliselula elinokuzisebenzisa esikolweni?

      4 Lutsha, ninokucela kootitshala benu ukubonisa iklasi ividiyo ethi Jehovah’s Witnesses Stand Firm Against Nazi Assault okanye ethi Faithful Under Trials—Jehovah’s Witnesses in the Soviet Union. Unokucela ukwenza iphepha lemibuzo, yaye loo mibuzo unokuyithabatha kuBulungiseleli Bethu BoBukumkani bukaFebruwari 2003 uze uyitshintshe ukuze ilungele ingxubusho yaseklasini.

      5. Ziziphi izixhobo ezifumanekayo ezinokusetyenziswa ngabazali kwisifundo sentsapho?

      5 Kwintsapho Nakubahlobo: Bazali, cingani ngendlela abantwana benu abasele bekhule ngayo ukususela ekukhululweni kwevidiyo ethi Young People Ask—How Can I Make Real Friends? Kutheni ningayibukeli kwakhona kwisifundo senu sentsapho? UBulungiseleli Bethu BoBukumkani buka-Aprili 2002 bunemibuzo enokwenza ingxubusho ibangele umdla.

      6. Unokulilungiselela njani ixesha elakhayo kunye nabahlobo?

      6 Ngaba bakho abahlobo ebandleni obufuna ukubamema? Ukubukela kunye nabo ividiyo ethi Respect Jehovah’s Authority kuya kubangela ubusuku obakhayo, ingakumbi ukuba emva koko ninokucingisisa ngezifundo enizizuzileyo, nisebenzisa imibuzo edweliswe kuBulungiseleli Bethu BoBukumkani bukaSeptemba 2004.

      7. Ziziphi ezinye iindlela onokucinga ngazo zokusebenzisa iividiyo zethu?

      7 Amanye Amathuba: Yiyiphi enye indlela onokuzisebenzisa ngayo iividiyo ezingama-20 ezahlukahlukeneyo? Ngaba ukubonisa amabuyelo akho ividiyo enye okanye ezingakumbi kunokuwanceda enze inkqubela ngokomoya? Ngaba unokubonisa ezi vidiyo kwikhaya labangenakuzinyamekela okanye kubantu abasele baluphele? Ngaba ezi vidiyo zinokunceda izalamane, abamelwane nabantu esisebenza nabo abangengawo amaNgqina ukuba babe nentlonelo ngathi? Iividiyo zethu zihlab’ umxhelo, ziyafundisa yaye ziluncedo. Zisebenzise ukuze ufundise.

  • Iintshumayelo Zamaphephancwadi
    Ubulungiseleli BoBukumkani—2006 | Februwari

    • Iintshumayelo Zamaphephancwadi

      IMboniselo Feb. 15

      “Ukuba ubunokukhetha umntu onokulawula ihlabathi, ibinokuba ngubani? [Mvumele aphendule.] Le Mboniselo ithetha ngeemfaneleko zikaMesiya, okhethwe nguThixo ukuba alawule umhlaba. Kwakhona isichazela ngentsingiselo yolawulo lwakhe kuluntu.” Funda uIsaya 9:6,7.

      Vukani! Feb.

      “Abantu banqula oothixo abaninzi namhlanje. Noko ke, phawula oko kwathandazelwa nguYesu kuYise osezulwini. [Funda uYohane 17:3.] Ukuba mnye kuphela uThixo oyinyaniso, kuthekani ngabanye oothixo? [Mvumele aphendule.] Eli nqaku lichaza oko kuthethwa yiBhayibhile.” Mbonise inqaku elikwiphepha 28-9.

      IMboniselo Mat. 1

      “Abantu abaninzi bayavuma ukuba sifanele sithandane, kanye njengokuba uYesu watshoyo kule ndinyana. [Funda uYohane 13:34, 35.] Kodwa ke, sinokubafumana phi abantu abasebenzisa iimfundiso zikaYesu kubomi babo? [Mvumele aphendule.] Eli phephancwadi lithetha ngendlela esinokuwabona ngayo amaKristu okwenyaniso namhlanje.”

      Vukani! Mat.

      “Uthando lubalulekile ukuze sihlale sonwabile size sibe nempilo entle. Kodwa ke, kwabaninzi kunzima ukufumana uthando lokwenene. Kutheni kunjalo nje? [Mvumele aphendule.] Ukuze sithandwe, sifanele sifunde ukubathanda ngokungazingci abanye. Eli phephancwadi lithetha ngendlela esinokukwenza ngayo oku.” Funda eyoku-1 kwabaseKorinte 13:4-7.