“Ikrele LikaYehova NelikaGidiyon!”

IINTSHABA zawo zininzi njengeenkumbi ezihlasela amasimi achumileyo ziwavuthulule kusale kusenkangala. Kungaxa lithile kulawulo lwabagwebi, amaSirayeli adakumbile. Kangangeminyaka esixhenxe, kuthi kanye xa imbewu iqalisa ukuntshula, ihlokondiba labaphangi bamaMidiyan, ama-Amaleki nabantu baseMpuma bahlasela ilizwe. Umhlambi wabaphangi uthe saa ufuna amadlelo, utshabalalisa kwasityalo sikhoyo. AmaSirayeli akanaesile, engenayo kwankomo nagusha. AmaSirayeli acinezelwe ngamaMidiyan kangangokuba sele esenza oovimba ezintabeni, emiqolombeni nakwiindawo ezisezingontsini.

Ibangelwa yintoni le ngxaki? AmaSirayeli awexukileyo akhonza oothixo bobuxoki. Ngenxa yoko uYehova uye wawayekela kubacinezeli bawo. Xa oonyana bakaSirayeli babengasakwazi ukunyamezela bakhala kuYehova becela uncedo. Ngaba uza kubaphulaphula? Yintoni esinokuyifunda kula mava amaSirayeli?—ABagwebi 6:1-6.

Ngaba Ungumlimi Olumkileyo Okanye ‘Likroti Elinamandla’?

Ngokuqhelekileyo abalimi bamaSirayeli basebenzisa isileyi esirhuqwa yinkomo xa bebhula ingqolowa, kwindawo esithabazi ukuze umququ uphetshethwe ngumoya ngoxa kubhulwa. Kodwa ngenxa yaba baphangi abangeva kwanto akasakwazi kubhula ekuhleni. Kwindawo efihlakeleyo kumaMidiyan, uGidiyon ubhula ingqolowa kwisixovulelo sewayini—mhlawumbi esi sixovulelo sasixhonkxwe elityeni elikhulu. (ABagwebi 6:11) Kwesi sixovulelo wayenokubhula ingqolowa encinane esebenzisa intonga. Kwimeko efana nale uGidiyon usebenzisa loo nto ikhoyo.

Khawuthelekelele, indlela amel’ ukuba wothuka ngayo uGidiyon xa kufika ingelosi kaYehova isithi kuye: “UYehova unawe, kroti, elinamandla.” (ABagwebi 6:12) Njengoko ebhula ingqolowa kwisixovulelo sewayini kwindawo efihlakeleyo, ngokuqinisekileyo uGidiyon wayengaziva elikroti. Kanti, loo mazwi abonisa intembelo anayo uThixo yokuba uGidiyon unokuba yinkokeli elikroti kaSirayeli. Nangona kunjalo kusafuneka eyiselwe.

Xa uYehova emthuma ukuba ‘asindise amaSirayeli entendeni yamaMidiyan,’ ngokuthozama uGidiyon uthi: “Ndiyangxengxeza, Yehova. Ndiya kumsindisa ngantoni na uSirayeli? Khangela! Iwaka lam lelona lincinane kwaManase, yaye nam ndingoyena mncinane endlwini kabawo.” Ngobulumko, uGidiyon ucela umqondiso obonisa ukuba uThixo uza kuba naye xa esilwa namaMidiyan, kwaye uYehova ukulungele ukumqinisekisa. UGidiyon uyenzela ukutya le ngelosi imtyeleleyo, kuphuma umlilo kwelo litye, uze utshise lo mbingelelo. Emva kokuba uYehova eye waluthomalalisa uloyiko lukaGidiyon, uGidiyon umakhela isibingelelo kanye kuloo ndawo.—ABagwebi 6:12-24.

“UBhahali Makazikhusele Ngokwakhe Ngokusemthethweni”

Eyona ngxaki yamaSirayeli asikokucinezelwa ngamaMidiyan. Kukunqula kwawo uBhahali. UYehova “nguThixo onekhwele” akakho umntu onokumnqula ngendlela efanelekileyo ngoxa ekhonza abanye oothixo. (Eksodus 34:14) UYehova uyalela uGidiyon ukuba atshabalalise isibingelelo sikayise asakhele uBhahali aze agawule nesibonda esingcwele. Esoyika uyise nabanye abantu xa enokukwenza ilanga lihlab’ umhlaba oku, uGidiyon usigawula ebusuku, encediswa ngabakhonzi abalishumi.

Siyaqondakala isizathu sokuba alumke kangaka uGidiyon, kuba xa befumanisa oku abanquli bakaBhahali bafuna ukumbulala. Noko ke, uYowashe uyise kaGidiyon uqiqa nabo ngendlela abangenakuyiphikisa esithi ukuba uBhahali ebe nguThixo, ebefanele azikhusele. Emva koko, uYowashe, uthiya unyana wakhe ngokuba nguYerubhahali, gama elo elithetha ukuthi “uBhahali makazikhusele ngokwakhe ngokusemthethweni.”—ABagwebi 6:25-32, umbhalo osemazantsi weNW eneembekiselo.

UThixo usoloko ebakhusela abakhonzi bakhe xa belumela ngokuqinileyo unqulo lokwenyaniso. Xa amaMidiyan namahlakani awo ehlasela uSirayeli kwakhona, ‘umoya kaYehova ugubungela uGidiyon.’ (ABagwebi 6:34) Esalathiswa ngumoya kaThixo okanye amandla akhe asebenzayo, uGidiyon ugaya umkhosi kwisizwe sakwaManase, kwesakwa-Ashere, kwesakwaZebhulon nakwesakwaNafetali.—ABagwebi 6:35.

Ukulungiselela Ukuya Edabini

Nangona uGidiyon enomkhosi wamadoda angama-32 000, ucela umqondiso kuThixo. Ukuba uboya obushiywe esandeni bumanziswa ngumbethe uze umhlaba ushiyeke womile, oko kuza kubonisa ukuba uThixo uza kusebenzisa yena ukuhlangula uSirayeli. UYehova uyawenza lo mmangaliso, yaye uGidiyon ufuna isiqinisekiso esingakumbi, ngokuwenza ngenye indlela—ngoku ucela ukuba ibe ngumhlaba omanzi buze uboya bome. Ngaba uGidiyon wayezibaxa izinto? Kucacile ukuba akunjalo, kuba uYehova wenza ngokuvisisana nesicelo sakhe. (ABagwebi 6:36-40) Asiyilindelanga imimangaliso enjalo namhlanje. Nangona, kunjalo sinokufumana ukhokelo nesiqinisekiso eLizwini lakhe.

Ngoku uThixo uthi umkhosi kaGidiyon mkhulu kakhulu. Ukuba ayazoyisa iintshaba zawo ngomkhosi omkhulu ngolo hlobo, amaSirayeli anokuzigwagwisa acinge ukuba azihlangule ngokwawo. Kodwa uzuko lufanele luye kuYehova ngolo loyiso. Siyintoni isicombululo? UGidiyon uza kusebenzisa uMthetho kaMoses, ngokuyalela bonke abanedyudyu ukuba bagoduke. Amadoda angama-22 000 ayarhoxa kuze kusale ali-10 000.—Duteronomi 20:8; ABagwebi 7:2, 3.

Ngokwembono kaThixo asemaninzi la madoda. Ngoku uGidiyon uyalelwa ukuba awase emlanjeni. Umbhali-mbali ongumYuda uJosephus uthi uThixo wathi kuGidiyon makase loo madoda emlanjeni kanye xa ilanga ligqats’ ubhobhoyi. Enokuba yayinjani imeko, uGidiyon wondela indlela asela ngayo. Ngamadoda angama-300 kuphela asela ngesandla esinye ngoxa ekhangele utshaba. Ngamadoda angamakroti angama-300 kuphela aza kuhamba noGidiyon. (ABagwebi 7:4-8) Khawuzibeke endaweni yala madoda. Ekubeni umkhosi wotshaba umalunga ne-135 000, ngokuqinisekileyo umele uqonde ukuba uloyiso luza kuza ngamandla kaYehova, kungekhona awenu!

UThixo uyalela uGidiyon ukuba athabathe umlindi ukuze bahlole inkampu yamaMidiyan. Ngoxa belapho uGidiyon uva indoda ibalisela enye ngephupha layo ize loo ndoda ililawule ithi lithetha ukuba uThixo uza kuwanikela esandleni sikaGidiyon amaMidiyan. Yiloo nto kanye uGidiyon afuna ukuyiva. Ngoku uqinisekile ukuba uYehova uza kumnika uloyiso yena namadoda akhe angama-300.—ABagwebi 7:9-15.

Icebo Lokulwa Idabi

La madoda angama-300 ahlulwa abe ngamaqela amathathu, ngalinye linamadoda ali-100. Ndoda nganye inikwa isigodlo nengqayi. Ngaphakathi kulo ngqayi kufihlwe isikhuni somlilo. Umyalelo wokuqala kaGidiyon kula madoda uthi: ‘Nifanele nifunde ngokondela kum. Ndakuvuthela isigodlo, nani nimele nivuthele nithi “Ikrele likaYehova nelikaGidiyon!”’—ABagwebi 7:16-18, 20.

Umkhosi wamaSirayeli angama-300 uyathubeleza ungena kwinkampu yotshaba. Kumalunga nentsimbi yeshumi ebusuku—kanye emva kokutshintshana kwabalindi. Kubonakala ngathi eli lixesha elifanelekileyo lokuhlasela, kuba kuza kuthabatha ixesha ngaphambi kokuba abalindi abatsha baqhelane nobumnyama.

AmaMidiyan afikelwa luloyiko! Loo nzolo iphela ngesiquphe xa kusophulwa iingqayi ezingama-300, kuvuthelwa izigodlo ezingama-300, ezitsho ngesankxwe. Emangaliswe yiloo ntsholo itsho ngaxeshanye, isithi “ikrele likaYehova nelikaGidiyon!,” amaMidiyan ongezelela kule ntsholo ngokukhala. Kulo mbhodamo, akakwazi kwahlula ukuba ngubani na olutshaba. La madoda angama-300 ema ngokweendawo zawo njengoko uThixo esenza iintshaba zibulalane zodwa. Inkampu iyaphanziswa, ayikho indlela yokusaba, intsalela yomkhosi wamaMidiyan itshatyalaliswa ngokupheleleyo. Ulawulo olucinezelayo lufikelela esiphelweni.—ABagwebi 7:19-25; 8:10-12, 28.

Nasemva kolu loyiso, uGidiyon uthozamile. Xa amadoda akwaEfrayim, exabana naye ngokuba engawabizanga xa kusiyiwa edabini uwaphendula ngobulali. Impendulo yakhe enobulali iyawudambisa umsindo wawo ize iwuthomalalise umoya wawo.—ABagwebi 8:1-3; IMizekeliso 15:1.

Ekubeni ngoku kukho uxolo, amaSirayeli acela uGidiyon ukuba abe ngukumkani wawo. Esinjani isilingo! Kodwa uGidiyon usikhaba ngawo omane isicelo sawo. Akalibelanga ukuba ngubani owoyise amaMidiyan. Uthi: “Mna ngokwam andiyi kunilawula, engayi kunilawula nonyana wam. UYehova nguye oya kunilawula.”—ABagwebi 8:23.

Ekubeni engafezekanga uGidiyon akasoloko egweba ngendlela esengqiqweni. Ngesizathu esingachazwanga, wenza iefodi ngezinto azithimbe emfazweni aze ayibeke kwisixeko sakowabo. Ingxelo ihlabela mgama isithi amaSirayeli aqalisa “ukuba neentlobano zokuziphatha okubi” naloo efodi. Bayayinqula, kwaye iba ngumgibe nkqu nakuGidiyon nendlu yakhe. Sekunjalo akabi ngumnquli zithixo, kuba iZibhalo zimbala phakathi kwamadoda awayenokholo kuYehova.—ABagwebi 8:27; Hebhere 11:32-34.

Isifundo Kuthi

Eli bali likaGidiyon linezifundo ezilumkisayo nezikhuthazayo. Lisifundisa ukuba, xa uYehova enokusohlutha umoya nentsikelelo yakhe ngenxa yehambo yethu engafanelekanga, imeko yethu yokomoya iya kufana nelizwe elihlwempuzekileyo ngenxa yokuhlaselwa ziinkumbi. Siphila kumaxesha anzima yaye asimele silibale ukuba intsikelelo kaYehova “yiyo etyebisayo, yaye akongezi ntlungu kuyo.” (IMizekeliso 10:22) Sinandipha intsikelelo kaThixo kuba ‘simkhonza ngentliziyo epheleleyo nangomphefumlo onoyolo.’ Kungenjalo ebeya kusilahla.—1 Kronike 28:9.

Sinokukhuthazwa yingxelo kaGidiyon, kuba ibonisa ukuba uYehova unokubahlangula abantu bakhe nakweyiphi na ingxaki abajamelana nayo, mhlawumbi esebenzisa abantu ababonakala bebuthathaka okanye bezintsizana. Into yokuba uGidiyon namadoda akhe angama-300 bakwazi ukoyisa umkhosi wamaMidiyan angama-135 000 ibonisa amandla kaThixo angumangaliso. Nathi sisenokuzifumana sikwimeko emaxongo size sibonakale sizintsizana ezingenakuzenzela nto, ube umkhosi wotshaba ungapha kwamandla ethu. Ingxelo yeBhayibhile ephathelele uGidiyon isikhuthaza ukuba sithembele kuYehova, oya kubasikelela aze abahlangule bonke abo babonakalisa ukholo Kuye.