IAlbania

IALBANIA lilizwana elinembali eninzi. Zininzi iintlanga nezizwana eziye zangena ziphuma kuyo, amagunya ehlabathi aye akruthakruthana ngayo, yaye kuqengqeleke amashumi eminyaka ilikheswa. Ngoxa amaNgqina kaYehova alapha aye ajamelana neengxaki neentshaba ezininzi, uYehova uThixo uye wawomeleza waza wawasikelela ngolwando. Makhe sithi gqaba-gqaba ngembali yawo ebangel’ umdla nebonisa indlela “isandla sikaYehova” esiye sabaxhasa ngayo abakhonzi bakhe abathobekileyo kweli.—IZe. 11:21.

Kangangeenkulungwane amanye amazwe ayekruthakruthana ngeAlbania, yaye oko kwabangela ungquzulwano kwezonqulo. Ekuqaleni kweminyaka ye-1500, kwakukho iinkonzo ezininzi, amaSilamsi, amaOthodoki namaKatolika.

Ngasekupheleni kweminyaka ye-1800, abantu baseAlbania baqalisa ukuvuselela ilizwe labo baza baseka nemibutho eyayikhuthaza ukuzingca ngalo. Inkoliso yabemi balapha yayingabantu abangathath’ intweni, yaye abaninzi babo babegxeka amazwe angaphandle njengonobangela wokuba ngamahlwempu kwabo. Ngeminyaka ye-1900 abantu babethe phithi kukufuna ukuzilawula, nto leyo eyabangela ukuba balwe neGrisi, iSerbia neTurkey. Ekugqibeleni, ngowe-1912 iAlbania yade yazimela.

Kamva, urhulumente wazivala iicawa ezilungelelanisiweyo. Emva kweMfazwe Yehlabathi II, amaKomanisi aluphelisa lonke unqulo eAlbania aza ayibhengeza njengelizwe lokuqala elingakholelwayo kuThixo.

‘UKUBAMBELELA ENYANISWENI NGOVUYO’

Ngaphambi kowama-56 C.E., umpostile uPawulos wathi yena namaqabane akhe bazishumayele ngokucokisekileyo iindaba ezilungileyo ‘baya kufikelela eIliriko,’ iphondo laseRoma elaliquka inxalenye yelizwe ekuthiwa yiAlbania namhlanje. (Roma 15:19) Kuyabonakala ukuba abanye kulo mmandla baba ngamaKristu okwenyaniso ngelo xesha kuba imbali ibonisa ukuba ubuKristu babusele bukho eAlbania ngenkulungwane yokuqala.

Ingxelo yokuqala yezi mini yonqulo lokwenyaniso ibonisa ukuba lwabakho ngowe-1921, xa uJohn Bosdogiannis owayeseKrete wabhalela iBheteli yaseBrooklyn ethetha ngokutyelela iqela labafundi beBhayibhile elaliseIoannina, ngoku eyinxalenye ekumntla weGrisi. Kwangaxeshanye, abantu abaninzi baseAlbania babehlala eNew England, eUnited States, kuquka uThanas (Nasho) Idrizi noCosta Mitchell. Ukufunda kwabo inyaniso, babhaptizwa ngokukhawuleza. Ngowe-1922, uMzalwan’ uIdrizi wabuyela eGjirokastër, eAlbania, yaye waba ngummi wokuqala welo owafika nenyaniso yeBhayibhile. UYehova wawusikelela umoya wakhe wokuzincama, yaye abantu babesabela. Kungekudala, namanye amaNgqina aseAlbania awayehlala eMerika abuyela ekhaya. Ngelo xesha uCosta Mitchell waqhubeka eshumayela kubemi baseAlbania ababehlala eBoston, eMassachusetts, eUnited States.

USokrat noThanas Duli (uAthan Doulis) bazalelwa eAlbania kodwa basiwa eTurkey besebancinane. Ngowe-1922, uSokrat wabuyela eAlbania. Kunyaka olandelayo, noThanas owayeneminyaka eli-14 ubudala wabuyela apho, esiya kukhangela umkhuluwa wakhe. Wabhala wathi: “Ukufika kwam, andizange ndimfumane ngokukhawuleza umkhuluwa wam kwindlu esasihlala kuyo, kuba wayesele esebenza kwindawo ekumgama weekhilomitha ezingama-200 ukusuka apho. Ekuphela kwento endayifumanayo yiMboniselo, iBhayibhile nemiqulu esixhenxe yeStudies in the Scriptures, kunye namaphecana awayexubusha ngemixholo yeBhayibhile. Kuyacaca ukuba nalapho kuloo mmandla uneentaba babekho aBafundi beBhayibhile ababevela eMerika baza babuyela apho sele benofifi ngeBhayibhile yaye beyithanda.” UThanas wada wadibana nomntakwabo uSokrat, owayesele enguMfundi weBhayibhile obhaptiziweyo ngelo xesha. USokrat akazange aphozise maseko, wafundisa umninawa wakhe inyaniso.

Ngowe-1924, iofisi yaseRomania yacelwa ukuba inyamekele loo ntsimi yayisandul’ ukuqalwa yaseAlbania. Nakuba kwakungekashunyayelwa kangako apho, IMboniselo kaDisemba 1, 1925 yathi: “Incwadi ethi UHadi LukaThixo, kunye nencwadana ethi The Desirable Government nethi The World Distress ziye zaguqulelwa ngolwimi lwaseAlbania. . . . Baninzi abantu abazifumanayo ezi ncwadi babe nabemi baseAlbania beyamkela ngovuyo inyaniso.”

Ngelo xesha, eAlbania kwakugquba izidubedube zezopolitiko. Abakhonzi bakaYehova bajamelana njani naloo meko? UThanas uthi: “Ngowe-1925 kwakukho amabandla amathathu eAlbania kunye namanye amaqela aBafundi beBhayibhile.” Wachaza nokuba indlela ababethandana ngayo yayahluke ngokupheleleyo kweyabantu basekuhlaleni ababengquzulana, besukuzana yaye bekhuphisana. Ngoxa abemi abaninzi balapho babelishiya elo, abanye abafunde inyaniso bona babebuyela belangazelela ukufundisa izalamane zabo ngoBukumkani bukaKristu obabusandul’ ukusekwa.

Ngelo xesha, ngeentsasa zangeCawa, eBoston kwakunikelwa iintetho zesidlangalala ngolwimi lwaseAlbania kubantu abamalunga nama-60. Abo bantu yayingabafundi beBhayibhile abazimiseleyo ababekuthanda ukufunda nokuhlolisisa imiqulu yencwadi ethi Studies in the Scriptures. Babefundisisa nencwadi ethi UHadi LukaThixo, nakubeni yayineempazamo ezininzi zabaguquleli. (Ngokomzekelo, ekuqaleni umxholo wayo wawuguqulelwe ngokuthi Isiginkci SikaThixo.) Sekunjalo, le ncwadi yanceda abantu abaninzi baseAlbania bafunda inyaniso yeBhayibhile yaza yomeleza ukholo lwabo.

“NINGAWAKHATHAZI!”

Ngowe-1926, IMboniselo yanikela ingxelo yokuba eAlbania kwiSikhumbuzo sokufa kukaKristu kwakuze abantu bali-13. Incwadi Yonyaka Yowe-1927 yathi: “Abazalwana abazinikeleyo eAlbania balishumi elinesihlanu kuphela yaye bayazibhokoxa ekusasazeni isigidimi sobukumkani.” Yaphinda yathi: “Kukho abazalwana baseAlbania abamalunga namashumi amathathu abahlala eMerika, yaye bazimisele ukuya kunceda abantu belizwe labo bafunde iNyaniso.” Abazalwana ababeli-15 abaseAlbania bavuyiswa bubukho babantu abangama-27 kwiSikhumbuzo sowe-1927, nani elo eliliphinda ngaphezu kwezihlandlo ezibini elonyaka ongaphambi kwalowo.

Ekupheleni kweminyaka ye-1920, kwakusekho izidubedube zezopolitiko eAlbania. Urhulumente owayekhokelwa nguFan Noli, ubhishophu wamaOthodoki, wangena ezintanjeni ithutyana nje elingephi kodwa wabhukuqwa nguMongameli uAhmed Bey Zogu. Wazibanga njengoyena mntu kuviwa ngaye eAlbania.

Ngowe-1928, uLazar Nasson, uPetro Stavro, nabanye abazalwana ababini basuka eUnited States baya kubonisa i-“Photo-Drama of Creation” eAlbania. Kanye ngelo xesha, omnye umfundisi wamaKatolika nowamaOthodoki ababesuka eUnited States nabo babelapho eAlbania betyelele uKumkani uZog I.

Elumkisa uZog, umfundisi wamaKatolika wathi: “Umele ulumke, kukho amadoda aseMerika aze noqhushululu.”

Kodwa yena umfundisi wamaOthodoki wakuphikisa oko. Wayebazi aba bazalwana kuba babesandul’ ukushiya icawa yakhe eseBoston. Yena wathi kuZog: “Ukuba bonke abantu baseAlbania bebefana nala madoda, bekungayi kubakho mfuneko yokuba uzitshixe iingcango zeli bhotwe lakho.”

UZog wathi: “Ukuba kunjalo, wayekeni ningawakhathazi!”

Kwakuloo nyaka, eBoston kwashicilelwa iculo elithi Songs of Praise to Jehovah ngesiAlbania yaye ngenxa yoko abazalwana abaseAlbania bade bazazi ezo ngoma namazwi azo. Iingoma ezimbini ezazithandwa gqitha kweli culo yethi xa iguqulelwe, “Ningoyiki Nina Mhlambi Mncinane” nethi “Emsebenzini!”—ezi ngoma zazibomeleza abazalwana zibaxhobisela iminyaka enzima eyayiza kulandela.

Ngokuqhelekileyo abantu baseAlbania abalalanisi bathetha phandle. Le ndlela yokuthetha nedla ngokulumeza kwabanye abantu, yinto eqhelekileyo kubo yaye bayiva bhetele. Xa beqinisekile ngombandela othile, abaneli nje ukuxelela abanye ngezimvo zabo kodwa bade bafune ukuba bakubone oko. Ngokuqinisekileyo oku kuye kwayichaphazela indlela abasabela ngayo kwiindaba ezilungileyo.

IINGXAKI ZIVELISA IMIPHUMO EMIHLE

Ngenxa yeengxaki ezigqugqisayo zezopolitiko nezoqoqosho, abantu abaninzi baseAlbania babelinikela umva elo, yaye abanye bafunda inyaniso eNew England naseNew York. Naphi na apho babegxalathelana khona, babesanda abantu abafumana inyaniso. Belangazelela ukufumana iincwadi ezintsha, abazalwana bavuya gqitha xa befumana incwadana ethi Kingdom nethi The Crisis ngesiAlbania.

Kwangaxeshanye abasemagunyeni eAlbania babezithimbile iincwadi zethu. Kodwa ngowe-1934, iBulletin (ngoku ekuthiwa buBulungiseleli Bethu BoBukumkani) yanikela le ngxelo ngeAlbania: “Sivuyiswa gqitha kukunazisa ukuba uMphathiswa Wezobulungisa ukhuphe umyalelo wokuba ukususela ngoku zonke iincwadi zethu zinokusasazwa ngokukhululekileyo kuwo onke amaphondo alapha . . . Zonke iincwadi neencwadana eziye zathinjwa ziye zabuyiselwa kubazalwana . . . Ngoku abazalwana abasixhenxe baye baqesha imoto batyelela iidolophu ezikude behambisa iincwadi yaye abanye bashumayela kwiindawo ezikufuphi.” Ngenxa yoko, ngowe-1935 nowe-1936 abazalwana bahambisa iincwadi ezingaphezu kwama-6 500.

“KUKHOLELWA UKUBA LOLONA SASAZO LUKHULU EMBALINI”

Ekuqaleni kowe-1936, iphephandaba laseBritani iLeeds Mercury lathi: “Kuza kwenziwa usasazo ekukholelwa ukuba lolona luza kuba lukhulu embalini. Kolu sasazo, uJaji uRutherford, ongumshumayeli wevangeli uza kunikela intetho eLos Angeles.” UJ. F. Rutherford, owayekhokela amaNgqina kaYehova ngelo xesha, wayeza kunikela intetho yesidlangalala eyayiza kusasazwa ngonomathotholo kulo lonke elaseUnited States naseBritani de iye kufikelela nakwamanye amazwe aseYurophu. Eli phephandaba laqukumbela ngelithi: “Likho iLizwe laseYurophu esiqinisekileyo ukuba alisayi kuyifumana le ntetho. Leyo yiAlbania kuba ayinazo iingcingo zefowuni.”

Kodwa ke, kwiiveki ezimbalwa emva kwaloo ntetho, uNicholas Christo, okwibandla lesiAlbania eliseBoston wabhalela ikomkhulu lehlabathi esithi: “Siyakuvuyela ukunazisa ukuba kutshanje abazalwana baseAlbania baye basixelela ukuba intetho kaJaji uRutherford ethi ‘Ukwahlula Iintlanga’ iye yaya kufika nakwelo, oko kusongezelela inani lamazwe amaninzi esasazwe kuwo. Basixelele ukuba kukho imimandla emibini aye afikelela kuyo amaza kanomathotholo. . . . Abazalwana balapho baba nemincili ngokwenene bakuva ilizwi likaJaji uRutherford.”

Abavakalisi baseAlbania babeziqhuba njani iintlanganiso ngaphambi kokuba kupapashwe IMboniselo ngolwimi lwabo? Inkoliso yabantu baseAlbania ababamkele inyaniso babefunde kwizikolo zesiGrike ezikumazantsi elo lizwe. Ngoko babengenangxaki yokufunda IMboniselo yesiGrike. Abanye babesebenzisa eyesiTaliyane okanye eyesiFrentshi. Nangona babephatha iincwadi zezinye iilwimi, iintlanganiso zona zaziqhutywa ngesiAlbania.

Ngeengokuhlwa zangoMvulo abazalwana abathetha isiAlbania abahlala eBoston babesebenzisa inkupho yesiGrike xa beqhuba isifundo seMboniselo. Sekunjalo, abazalwana abaninzi babaqeqesha kakuhle abantwana babo, yaye kwiminyaka kamva, oonyana neentombi, abatshana, abazukulwana, nabazukulwana babazukulwana baba ngabakhonzi bexesha elizeleyo. Eneneni, abazalwana baseAlbania baduma ngokuba nenzondelelo ekushumayeleni kangangokuba abantu bababiza ngokuba ziiungjillorë, gama elo elithetha “abahambisi bevangeli.”

ABASEMAGUNYENI BAYASHUNYAYEZWA

Ngowe-1938, kunyaka nje ngaphambi kokuba uKumkani uZog abhukuqwe, oodadewabo ababini baya eBoston. NgoDisemba iphephancwadi iConsolation (ngoku elinguVukani!) lathi: “Ukufika kwezo nkosazana apho saya kwihotele ezazihlala kuyo sivela kwibandla elithetha isiAlbania, eBoston, siziphathele isigidimi soBukumkani bukaThixo. Zasamkela ngezandl’ ezishushu.”

La maNgqina mabini yayinguNicholas Christo nodadewabo uLina. Abazange banele nje ukuthetha nezo nkosazana kuphela kodwa bathetha nezinye izikhakhamela ezihlanu, kuquka owayengunozakuzaku waseAlbania eUnited States ngelo xesha, uFaik Konitza [Konica]. Ngaphambi kokuthetha neli qela, bafunda ikhadi lesiAlbania lokunikela ubungqina elalichaza ngendlela ekushunyayelwa ngayo kubemi baseAlbania. Lalisithi: “Siyavuyiswa kukunazisa ukuba, esi sigidimi siye sashunyayelwa naseAlbania kangangeminyaka kwaza kwahanjiswa amashumi amawaka eencwadi kwabasemagunyeni nakubemi baseAlbania ukuze bakhanyiselwe yaye bathuthuzeleke.”

Unozakuzaku uKonitza wathi kwezi nkosazana: “Banqwenela ukusebenzisa igunya lenu ukuze umsebenzi wabo wokushumayela ungaphazanyiswa eAlbania. Icawa yabo ‘ayikaziwa kakuhle’ yaye bakholelwa ekubeni ihlabathi [intlangano yehlabathi ekhoyo ngoku] liza kupheliswa kungekudala yaye emva koko kuya kulawula uKristu kuze kuvuswe abafileyo.”

UMnu. Konitza wayezive phi zonke ezi zinto ngesigidimi soBukumkani? IConsolation yacacisa ukuba wayezive “ngelinye ingqina elalimazi kwiminyaka ngaphambi kokuba . . . lifumane inyaniso, . . . yaye lathetha naye ngenyaniso izihlandlo ezininzi.”

IMFAZWE YEHLABATHI II IZISA IIMVAVANYO

Kwiminyaka ye-1930, i-Itali yaqalisa ukulawula iAlbania, yaye ngowe-1939 uKumkani uZog nentsapho yakhe basaba. Umkhosi wobuFasi waseItali owawubhukuqe elo wakwenza akwabikho mthethweni ukuhanjiswa koncwadi nokushumayela kwabavakalisi abangama-50. Ngehlobo lowe-1940 kwathinjwa iincwadi ezili-15 000. NgoAgasti 6, eKëlcyrë, amajoni aseItali abamba abazalwana abasithoba aza abanyakathisa kwisisele esinobude obuziimitha ezine nezimbini ububanzi. Kamva bafuduselwa kwintolongo eseTiranë. Bavalelwa iinyanga ezisibhozo ngaphambi kokuba baye kuvela enkundleni apho bagwetywa iinyanga ezilishumi ukusa kwiminyaka emibini enesiqingatha.

Ngenxa yeemeko awayephila phantsi kwazo, kwakufuneka amabanjwa ondliwe ziintsapho zawo. Kodwa ngoku abona bantu babefanele bondle iintsapho babesentolongweni. Babeza kwenza njani?

UNasho Dori uthi: “Sasifumana iigram ezingama-800 zesonka esomileyo, iikhilogram ezintathu zamalahle kunye nesepha kuphela, emva kweentsuku ezili-15. Mna noJani Komino sasiba nemali eyanele ukuthenga ikhilogram yeembotyi. Sasibasa ngamalahle ukuze sibilise iimbotyi, size sizithengise kwamanye amabanjwa ngecephe. Kungekudala sasithengisa iimbiza ezinkulu ezintlanu zeembotyi. Ekugqibeleni sasiba nemali eyaneleyo yokuthenga inyama.”

Kubusika bowe-1940/1941 imikhosi yamaGrike yahlasela kumazantsi eAlbania yaza yanyanzela amadoda ukuba ayithelele. Kwenye idolophana, omnye umzalwana wakwala oko echaza ukuba akathabathi cala, kodwa amajoni amtsala ngeenwele aza ambetha de wafa isiqaqa.

Xa loo mzalwana ebuyele ezingqondweni, elinye igosa lathi: “Awukafuni ukuthobela nangoku?”

Waphendula esithi: “Ndisatsho ndithi, andithabathi cala.”

Enomsindo la majoni amyeka wahamba.

Kwiintsuku ezimbalwa kamva, eli gosa laya ekhayeni lalo mzalwana lalimthuthumbisa, laza lamncoma ngenxa yenkalipho yakhe. Lathi: “Kwiintsuku ezimbalwa ezidluleyo, ndiye ndabulala amaTaliyane ali-12 ndaza ndathweswa imbasa. Kodwa ndityiwa sisazela, ngoko andifuni nokuyinxiba. Ndiyigcina epokothweni kuba ndiyazi ukuba ifuzisela ulwaphulo-mthetho.”

ABALAWULI BATSHA—UVAVANYO LUSAFANA

Ngoxa kwakuqhubeka imfazwe, iQela LamaKomanisi eAlbania lalisiya likhula ngokufihlakeleyo, phezu kwayo nje imigudu yamajoni aseItali yokugcina iAlbania phantsi kolawulo lwawo. Ngowe-1943 xa loo majoni ayesilwa nobuKomanisi abamba omnye umzalwana, amphosa kwisigadla sawo, amsa edabini, aza amnika ingadla-ngadla. Wala ukuyithatha.

Umphathi wankqangaza esithi: “UliKomanisi! Ukuba ubungumKristu, nawe ubuza kulwa njengabanye abefundisi.”

Wayalela amajoni ukuba ambulale loo mzalwana. Athi xa eza kumdubula, kwathi gqi elinye igosa laza labuza ukuba kuqhubeka ntoni. Lathi lakuva ukuba lo mzalwana akathabathi cala, layalela loo majoni ukuba angamdubuli, waza wakhululwa.

NgoSeptemba 1943, amajoni aseItali arhoxa kwaza kwangena imikhosi yaseJamani, yabulala abantu abangama-84 eTiranë ngobusuku nje obunye. Abanye abangamakhulu bathunyelwa kwiinkampu zoxinaniso. Ngelo xesha, abazalwana babechwetheza izigidimi zeBhayibhile zethemba nezikhuthazayo. Xa umntu egqibile ukufunda eso sigidimi, wayecelwa ukuba asibuyisele ukuze sinikwe omnye umntu. Besebenzisa iincwadana ababezifihlile, abazalwana baqhubeka nomsebenzi wokushumayela. Babesebenzisa kuphela ezo nxalenye banazo zeBhayibhile xa beshumayela kuba babengenayo epheleleyo de kwakwiminyaka ye-1900.

Ngowe-1945 kwakukho abazalwana abali-15 ababesele begqibile ukuthothoza entolongweni. Ababini kwabo basiwa kwiinkampu zoxinaniso yaye omnye wabo wathuthunjiswa de wafa. Eyona nto imangalisayo kukuba, ngoxa abazalwana baseAlbania babetshutshiselwa ukwala ukuncedisa imikhosi yeAxis, kwelinye icala abazalwana baseAlbania abaseUnited States bavalelwa entolongweni kuba bengafuni ukulwa nxamnye nayo.

KwiAlbania eyayidlakazwe yimfazwe, uncwadi oluthinjiweyo lwalugcinwa kwisakhiwo seempahla ezivela kwamanye amazwe. Ngenxa yodushe olwalukufuphi, eso sakhiwo sadilika, lwaza olo ncwadi lwathi saa esitratweni. Abantu abadlula ngendlela bazicholela ezo ncwadi baza bazifunda. Bengaphozisanga maseko, abazalwana baqokelela eziseleyo.

Ngowe-1944, imikhosi yamaJamani yarhoxa eAlbania, yaye umkhosi wamaKomanisi wamisela urhulumente wokwexeshana. Ngokukhawuleza abazalwana bacela imvume yokushicilela iincwadana, kodwa abazange bayifumane. Baxelelwa oku: “IMboniselo ihlasela abefundisi, yaye apha eAlbania siyabahlonela.”

IMFAZWE IYAPHELA KODWA INTSHUTSHISO IYAQHUBEKA

Urhulumente omtsha wamaKomanisi wanyusa irhafu waza wathabathela kuye imihlaba, imizi-mveliso, amashishini, iivenkile neendawo zeemovie. Kwakungekho mntu uvumelekileyo ukuba athenge, athengise okanye aqeshise ngomhlaba, yaye sonke isivuno kwakufuneka sibuyiselwe kurhulumente. NgoJanuwari 11, 1946, iAlbania yaba yiRiphabliki Yabantu BaseAlbania. AmaKomanisi aluphumelela ukhetho aza amisela uEnver Hoxha njengomlawuli.

Kwavulwa izikolo ezingakumbi, yaye abantwana babefundiswa ukulesa, nangona urhulumente wayengavumeli nabani na ukuba afunde uncwadi olungakhuthazi ubuKomanisi. Iincwadi zethu zohluthwa yaye urhulumente walithimba iphepha elingephi esasinalo kunye noomatshini bokuchwetheza.

Ngalo lonke ixesha abazalwana bezama ukufumana imvume yokupapasha iincwadi, babengayifumani kodwa babesongelwa. Kodwa bahlala beqinile. Baxelela abasemagunyeni oku: “UYehova usinike imbopheleleko yokuxelela abantu baseAlbania ngenjongo yakhe, kodwa nina anifuni senjenjalo. Nini abaza kuphendula kuYehova.”

Abasemagunyeni babaphendula ngokuphandle besithi: ‘Apha ke eAlbania sithi abaphetheyo. Akulawuli Thixo apha, ngoko asinaxesha lenu kunye naloo Thixo wenu uYehova esingamaziyo!’ Bengapheli mandla, abazalwana baqhubeka beshumayela iindaba ezilungileyo naphi na yaye nanini na.

Ngowe-1946 kwakunyanzelekile ukuba wonke umntu avote, yaye nabani na owayengafuni ukuvota wayegqalwa njengotshaba lukarhulumente. Kwamiselwa imithetho eyayikwalela ukuba neentlanganiso, yaye ukushumayela yaba kukwaphula umthetho. Benza ntoni abazalwana?

Ngowe-1947, abazalwana baseTiranë ababeli-15 balungiselela amaphulo okushumayela. Zange kube kudala babanjwa. IiBhayibhile zabo zakrazulwa baza bangcungcuthekiswa. Emva kokukhululwa kwabo, baxelelwa ukuba ayikho indawo abanokuya kuyo ngaphandle kwemvume yamapolisa. Amaphephandaba ayegculela uYesu noYehova.

Abazalwana baseAlbania abahlala eBoston bakuva oku, yaye ngoMatshi 22, 1947, ngentlonipho babhalela uEnver Hoxha ileta enamaphepha amabini, besenjenjalo egameni lamaNgqina kaYehova ahlala eAlbania. Bamcacisela ukuba amaNgqina kaYehova akasosisongelo kurhulumente baza bambonisa nokuba iintshaba zawo zonqulo ziwatyabeka ngezityholo kuba iimpapasho zawo zibhenca izenzo zazo ezingezozabuKristu. Le leta yaqukumbela ngelithi: “Xa abathunywa baseAlbania ababetyelele kwiZizwe Ezimanyeneyo bekhokelwa nguMnu. Kapo baya eBoston, sabatyelela kwihotele yabo. UMnu. Kapo wasamkela ngobubele waza wasiphulaphula isigidimi sethu.” Kangangeminyaka uHysni Kapo wayengomnye wabalawuli abaphezulu eAlbania. Phezu kwawo nje la malinge abazalwana, iingxaki zaqhubeka zisanda.

Ngowe-1947, iAlbania yamanyana neSoviet Union neYugoslavia yaza yalwa neGrisi. Kunyaka olandelayo, iAlbania yazahlukanisa neYugoslavia yaza yasondela ngakumbi kwiSoviet Union. Nabani na ongahambisani norhulumente wayesenziwa ikheswa. Ukungathabathi cala kwabazalwana kwabangela ukuba bachaswe baze batshutshiswe nangakumbi.

Ngokomzekelo, ngowe-1948 abazalwana noodade abathandathu babehlanganisene kwidolophana encinane beza kwenza iSikhumbuzo. Kwagaleleka amapolisa kuloo ntlanganiso aza ababetha kangangeeyure ezininzi ngaphambi kokuba abavumele bahambe. Kwiiveki ezimbalwa kamva, abamba umzalwana owayenikela intetho yeSikhumbuzo aza ammisa ngeenyawo iiyure ezili-12. Ezinzulwini zobusuku umphathi wamapolisa wamngxolisa esithi, “Uwaphulelani umthetho?”

Lo mzalwana waphendula wathi: “Asinakuthobela umthetho kaRhulumente kunomthetho weNkosi!”

Eligqabi ngumsindo, wamqhwaba ngempama, waza wathi akubona lo mzalwana emnika elinye icala lesidlele wambuza, “Wenza ntoni?”

Lo mzalwana waphendula esithi, “Besele ndikuxelele ukuba singamaKristu. UYesu wasifundisa ukuba xa umntu ekubetha ngempama, ufanele umnike esinye isidlele.”

Ebhavuma ngumsindo, lo mphathi wathi: “Ekubeni ingumyalelo weNkosi yenu lowo, andiyi kuwuthobela, andiyi kuphinda ndikuqhwabe! Phum’ uphele apha!”

“ANDIZUKUYEKA UKUSHUMAYELA”

USotir Ceqi wayengumOthodoki ozinikeleyo ohlala eTiranë. Ngoxa wayengumntwana wayenesifo sephepha emathanjeni yaye wayeqaqanjelwa yimilenze. Xa wayeneminyaka eli-17 ubudala wadandatheka kangangokuba wagqiba kwelokuba azibulale ngokuziphosa phambi kololiwe. Kanye ngaphambi kokuba enjenjalo, watyelelwa nguLeonidha Pope owayezalana naye. Engazi ngento acinga ukuyenza uSotir, uLeonidha wamxelela ukuba uYesu waphilisa abagulayo nokuba umhlaba uza kuba yiparadesi. Wamnika neZibhalo ZesiGrike, waza waqalisa ukuzifunda ngoko nangoko.

USotir uthi: “Oko kwafana namanzi ahlaziyayo. Ndandiyifumene inyaniso!”

Nakuba wayengasabonani noLeonidha, kwiintsuku nje ezimbalwa uSotir waqiqa ngelithi: ‘IBhayibhile ithi uYesu washumayela. Abapostile nabafundi bonke bashumayela. Licacile elokuba nam ndimele ndenjenjalo.’

Ngoko uSotir waya kushumayela. Ephethe iZibhalo ZesiGrike ngesinye isandla yaye esimelela ngesinye, ngesibindi waya kwindlu ngendlu.

Ngaloo maxesha iSigurimi, okanye iGunya Lezokhuseleko, lalinembopheleleko yokukhusela abantu. Ekubeni amalungu alo ayesoloko ebek’ esweni nabani na osisisongelo kumaKomanisi, akuphawula ukushumayela ngesibindi kukaSotir. Ambamba, amgcina iiyure ezininzi, ambetha, aza amyalela ukuba angaphindi ashumayele.

Ekukhululweni kwakhe, uSotir waqhagamshelana noLeonidha owamsa kuSpiro Karajani, ugqirha owayefunde inyaniso kwiminyaka embalwa ngaphambilana. Ngoxa wayemnyanga, wamnceda ukuba ayiqonde ngakumbi inyaniso.

USpiro wacebisa uSotir esithi: “Ukuba uphinde wabanjwa, ngaphambi kokuba utyobele nantoni na, yifundisise yonke into ebhaliweyo. Krwela umgca emva kwegama ngalinye. Ungashiyi kwandawo banokuphinda babhale kuyo. Yonke into yifundisise kakuhle. Qiniseka ukuba utyobela into oyithethileyo.”

Kwiintsuku ezimbini kamva, amapolisa aphinda ambamba eshumayela. Kwisikhululo samapolisa, wayalelwa ukuba atyobele ingxelo ebhaliweyo. Wathi xa eza kutyobela, kwathi qatha icebiso likaSpiro. Nakubeni amapolisa ayemtshutshisela ukuba atyobele ngokukhawuleza, wazipha ixesha lokuyifundisisa loo ngxelo.

Wathi: “Nakundixolela, andinakuyityobela le ngxelo. Andikhange ndiyithethe le nto. Ukuba ndiyayityobela ndakuba ndiyaxoka, ibe andimele ndixoke.”

Wathi akutsho, elinye ipolisa lathatha intambo, laza lambetha ngayo kangangeeyure. Athi akubona ukuba usamile kwinto ayithethayo, ambambisa iingcingo zikagesi.

Kamva uSotir wathi: “Xa intlungu yayingasanyamezeleki, ndandithandaza zisihla iinyembezi. Ngequbuliso kwavuleka ucango. Kwakumi umphathi wamapolisa. Wandithi krwaqu nje, waza wathi, ‘Yekani loo nto niyenzayo! Niyazi ukuba ayivumelekanga.’” Bonke babesazi ukuba umthetho awukuvumeli ukungcungcuthekiswa kwabantu. Loo mapolisa ayeka ukumngcungcuthekisa, kodwa akazange ayeke ukumcinezela ukuba atyobele loo ngxelo. Sekunjalo, akazange avume.

Ekugqibeleni athi: “Uphumelele!” Ethandabuza abhala ingxelo ayinikwa nguSotir apho wanikela ubungqina obucokisekileyo. Amnika loo ngxelo. Phezu kwako nje ukubethwa kwakhe kangangeeyure nokubanjiswa kwakhe ngeengcingo zikagesi, uSotir wayifundisisa loo ngxelo. Xa isivakalisi siphela esithubeni, wayekrwela umgca oya kutsho ekugqibeleni.

Emangalisiwe loo mapolisa ambuza: “Uyifunde kubani le nto?”

USotir wathi: “UYehova undifundise ukuba ndingatyobeli nantoni na endingayithethanga.”

Linika uSotir isonka netshizi, elinye ipolisa labuza: “Khawundixelele, ngubani okunike oku kutya?” Ngelo xesha yayiyintsimbi yesithoba ebusuku, sabe isisu sikaSotir sithe nca emqolo, engakhange atye nto imini yonke. “NguYehova? Akunjalo. Sithi.”

USotir waphendula esithi: “Zininzi iindlela uYehova abanyamekela ngazo abantu. Uzithambisile iintliziyo zenu.”

Engayazi eyona nto amele ayenze, amapolisa athi: “Siza kukuyeka uhambe, kodwa ukuba ukhe waphinda washumayela, uyazi ukuba kuza kwenzeka ntoni.”

“Ukuba kunjalo ke, sanukundikhulula, kuba andizi kuyeka ukushumayela.”

Elinye ipolisa lathi: “Uze ungaxeleli mntu ngayo yonke le nto ibisenzeka apha!”

USotir wathi: “Ukuba bayandibuza, andinakuxoka.”

Linomsindo lathi: “Phum’ apha!”

Baninzi abantu abangcungcuthekiswa njengoSotir. Emva kolu vavanyo lokholo, uSotir wabhaptizwa.

Kangangeminyaka, iposi yayizihlolisisa iileta eziphuma eAlbania yaye kwakusinda nje kuphela ezo bangaziqondiyo ukuba zithini. Kwathi kwakuba nzima ngakumbi ukuhamba nokuya kwiintlanganiso, kwanzima ukuba abazalwana abakwelo lizwe banxibelelane. Ekubeni lwaluqhawukile unxibelelwano, kwaba nzima ukwazi eyona nto iqhubekayo apho. Sekunjalo, lalisanda inani labantu abamkela inyaniso. Ngowe-1940, kwakukho abazalwana noodade abangama-50 eAlbania, yaye ngowe-1949 babesele bengama-71.

ULWANDO NAKUBA KUKHO UNGQUZULWANO LWEZOPOLITIKO

Ngeminyaka ye-1950 urhulumente wayengqongqo kakhulu kuzo zonke iinkalo zobomi. Kwaya kusanda ukujongana ngezikhondo zamehlo phakathi kweAlbania neGrisi. IAlbania yayingenabudlelane kwaphela neNgilani neUnited States. Kwanobo buhlobo yayinabo neSoviet Union babungaqinanga. IAlbania yayisiya isiba likheswa, ilubeke esweni lonke unxibelelwano namanye amazwe.

Noko ke, kwakukho abazalwana ababini ababekwazi ukuthumela iileta namakhadi kubazalwana baseSwitzerland. Bona abazalwana baseSwitzerland babesebenzisa isiFrentshi okanye isiTaliyane namagama awayengenakuqondwa ngabanye abantu xa bephendula. Ngenxa yala makhadi, abazalwana baseAlbania beva ngendibano eyayiseNuremberg ngowe-1955. Iindaba zokukhululeka kwabazalwana baseJamani emva kokuphela kolawulo lukaHitler zalomeleza ukholo lwabazalwana baseAlbania.

Ngowe-1957, iAlbania yayisele inikela ingxelo yabavakalisi abangama-75. Nangona lingaziwa elona nani lichanileyo, Incwadi Yonyaka Yowe-1958 yanikela ingxelo yokuba kwiSikhumbuzo kwakukho “abantu abaninzi yaye abazalwana baseAlbania basashumayela.”

Incwadi Yonyaka Yowe-1959 yathi: “La mangqina kaYehova athembekileyo asaqhubeka esenza konke okusemandleni awo. Aye ashumayela ngokukhululekileyo kwabanye de azama nokupapasha ezinye iincwadi. Ayakuvuyela ukutya akufumana ngexesha elifanelekileyo ngamaxesha athile, kodwa kuyacaca ukuba amaKomanisi aluvale lonke unxibelelwano namazwe angaphandle.” Le ngxelo yaqukumbela ngelithi: “Ngoxa abalawuli belo lizwe benokubahlula abazalwana baseAlbania kwibutho lehlabathi elitsha, abanakuwuthintela umoya oyingcwele kaThixo ukuba usebenze kubo.”

IDABI LIYAQHUBEKA

Ngelo xesha wonke umntu kwakufuneka aphathe ikhadi lomkhosi. Abangaliphathiyo babenokuphelelwa ngumsebenzi okanye bavalelwe entolongweni. Ngenxa yoko uNasho Dori noJani Komino baphinda bathothoza iinyanga entolongweni. Nangona iqaqobana lalisoyika ukulahlekelwa yimisebenzi laza lalalanisa, bakho abazalwana abanyanisekileyo abenza iSikhumbuzo sowe-1959, yaye abazalwana noodade abaninzi babesashumayela ngenkalipho.

Ngowe-1959 iSebe Lezobulungisa lapheliswa, yaye amagqwetha ayengavumelekanga ukuba enze umsebenzi wawo. Yonke imithetho yayigqitywa ngamaKomanisi. Abangavotiyo babegqalwa njengeentshaba. Kwakukho uloyiko nokungathembani okugqithisileyo.

Abazalwana baseAlbania babethumela imiyalezo ebonisa indlela ekukubi ngayo kodwa bechaza nendlela abazimisele ngayo ukuhlala bethembekile. Ngalo lonke elo xesha, ikomkhulu lehlabathi eliseBrooklyn lalizama ukunxibelelana nabo. UJohn Marks, owazalelwa kumazantsi eAlbania kodwa sele ehlala eUnited States wacelwa ukuba azame ukufumana ivisa yaseAlbania.

Emva konyaka onesiqingatha, uJohn wada wayifumana ivisa yokungena eAlbania, nangona umfazi wakhe, uHelen, engazange ayifumane. UJohn wafika eDurrës ngoFebruwari 1961 waza waya eTiranë. Apho wadibana nodadewabo uMelpo, owayenomdla enyanisweni. Wanceda uJohn wakwazi ukudibana nabazalwana ngosuku olulandelayo.

UJohn wathetha nabo bazalwana ixesha elide waza wabanika iincwadi awayezifihle kwisutikheyisi yakhe. Abo bazalwana bavuya gqitha. Kwakusele kudlule iminyaka engama-24 bengasatyelelwa ngabazalwana abavela kwamanye amazwe.

UJohn wafumanisa ukuba kukho abazalwana abangama-60 kwiidolophu ezintlanu, kwakunye nabanye abakwezinye iidolophana. ETiranë abazalwana babehlanganisana ngokufihlakeleyo kanye ngeveki, ngeCawa, ukuze baxubushe iincwadi ababezifihlile ukususela ngowe-1938.

Ekubeni kwakusele kudlule ixesha elide bengasaqhagamshelani nentlangano, kwakufuneka ukuba abazalwana baseAlbania baxelelwe inkcazelo esexesheni ukuze bazi indlela esebenza ngayo intlangano kunye neenyaniso ezisandul’ ukutyhilwa. Ngokomzekelo, iintlanganiso zaziqhutywa ngabazalwana noodade, yaye abanye oodade babethandaza. Kamva uJohn wabhala: “Abazalwana baba madolw’ anzima ukuya kuthetha naba dade, bezibuza ukuba baza kulwamkela njani olu tshintsho, baza bandicela ukuba ndithethe nabo ngasese, yaye ndenjenjalo. Ndavuya ndakubona ukuba bayalwamkela.”

Nakubeni babehlupheka, aba bakhonzi bathembekileyo nabanenzondelelo bawuxhasa umsebenzi woBukumkani. Ngokomzekelo, uJohn waphawula ukuba kukho abazalwana ababini abakhulileyo baseGjirokastër abaye bonga “inxalenye ethile yemadlana ababenayo ukuze banikele kuMbutho.” Ngamnye kubo wonga iingqekembe zegolide ezingaphezu kweerandi ezingama-800.

Abazalwana baseTiranë bakuvuyela ukufumana incwadana ethi Preaching and Teaching in Peace and Unity, eyayinikela ulwalathiso ngendlela amabandla amele aqhube ngayo kwanaxa umsebenzi uvaliwe. Kwandula ke ngoMatshi, uJohn waqhuba iSikhumbuzo eTiranë kwikhaya likaLeonidha Pope, apho kwakukho abantu abangama-37. Emva kwaloo ntetho, uJohn wabuyela eGrisi ngesikhephe.

Emva kokuba abazalwana abakwikomkhulu behlolisise ingxelo ebuye noJohn eAlbania, bacela uLeonidha Pope, uSotir Papa, noLuçi Xheka ukuba banyamekele iBandla laseTiranë nomsebenzi waseAlbania. USpiro Vruho wamiselwa njengomveleli wesiphaluka. Kwakuza kufuneka atyelele amabandla aze adibane nabazalwana busuku ngabunye, anikele iintetho aze axubushe nangeempapasho ezithile. Intlangano yayisenza konke okusemandleni ukuze kuncedwe abazalwana baseAlbania bakhule ngokomoya baze bafumane inkcazelo esexesheni ngendlela esebenza ngayo.

Okubuhlungu kukuba, ekubeni iileta zazihlolisiswa, intlangano yayingakwazi ukuthumela ileta enaloo nkcazelo. Kunoko, uJohn wayemana eyidlulisela kancinane le nkcazelo kubazalwana baseAlbania, esebenzisa amagama angaqondwayo abhekisela kumaphepha eempapasho. Kungekudala zabuya iingxelo, nto leyo eyayibonisa ukuba abazalwana bayiqonda into eyayithethwa apho. Abazalwana abathathu baseTiranë babekhonza njengeKomiti Yelizwe, yaye uSpiro wayewatyelela rhoqo amabandla.

Abazalwana baseAlbania kwafuneka bafumane iindlela ezintsha zokuthumela iingxelo zenkonzo yasentsimini kwikomkhulu. Enye indlela ababeyisebenzisa yayikukuzithumela ngeposkhadi kubazalwana abathile. Besebenzisa usiba olutsolo, babebhala iingxelo ngamagama angaqondwayo phantsi kwesitampu. Ngokomzekelo, babebhala inombolo yephepha ekwincwadana ethi Preaching and Teaching, apho kufumaneka umxholo othetha “ngabavakalisi.” Ecaleni kwaloo nombolo babebhala inani labavakalisi abafake ingxelo kuloo nyanga. Kangangeminyaka emininzi abazalwana abakwamanye amazwe babesebenzisa kwaezo ndlela ukuze banxibelelane nabazalwana baseAlbania.

IZINTO ZIHAMBA KAKUHLE—EMVA KOKO ZONAKALE

Nakuba iKomiti Yelizwe yayisenza konke okusemandleni ukuze ihambisele phambili unqulo olunyulu, yayisenkulu into ezayo. Ngowe-1963 uMelpo Marks wabhalela umntakwabo uJohn emxelela ukuba abazalwana ababini kwabo bathathu babekwiKomiti Yelizwe, uLeonidha Pope noLuçi Xheka, “babekude neentsapho zabo” yaye iintlanganiso zazingasaqhutywa. Kamva kwafika ingxelo yokuba uSpiro Vruho usesibhedlele yaye uLeonidha Pope noLuçi Xheka bayagula, ibhekisela kwiZenzo 8:1, 3, apho uSawule waseTarso wavalela amaKristu entolongweni. Yintoni eyayiqhubeka?

ULeonidha Pope, uLuçi Xheka, noSotir Ceqi babesebenza kumzi-mveliso apho amaKomanisi ayekhuthaza khona iimfundiso zobuKomanisi kubo bonke abasebenzi. Ngenye imini xa kwakuthethwa ngendaleko uLeonidha noLuçi baphakama bathi: “Akunjalo. Abantu abaphumi kwiinkawu!” Ngosuku olulandelayo bobabini bahlukaniswa neentsapho zabo baza baya kuphoswa kwizixeko ezikude, isohlwayo abantu baseAlbania abasibiza ngokuba yi-internim (besifanisa nokuvalelwa entolongweni). ULuçi wathunyelwa kwiintaba zaseGramsh. Ngenxa yokuba babegqala uLeonidha ‘njengoyena uphambili,’ bamthumela kwimixethuka yeentaba ezibandayo zaseBurrel. Wagqiba iminyaka esixhenxe ngaphambi kokuba abuyele ekhaya eTiranë.

NgoAgasti 1964 iintlanganiso zazingasaqhutywa. Inkcazelo engephi eyafumanekayo yayibonisa ukuba abazalwana baphantsi kweliso elibukhali leSigurimi. Omnye umyalezo owawuphantsi kwesitampu wawusithi: “Sithandazeleni eNkosini. Bangena indlu ngendlu bathathe uncwadi abalufumanayo. Abasivumeli ukuba sifundisise. Bathathu abantu abakwi-internim.” Ekuqaleni kwakucingwa ukuba umzalwana uPope noXheka bakhululwe, kuba yayingabo kuphela ababekwazi ukubhala phantsi kwezitampu. Kodwa kamva kwafunyaniswa ukuba ngumfazi kaLuçi, uFrosina, owayebhale lo myalezo.

Abazalwana ababekhokela babefudusiwe. Kangangendlela eyayingqongqo ngayo iSigurimi, yayingabavumeli ukuba banxibelelane nabanye. Sekunjalo, abazalwana abakwi-internim babenikela ubungqina nakubani na abadibana naye. Abantu baseGramsh babedla ngokuthi: “Iiungjillorë [abashumayeli bevangeli] zifikile. Aziyi emkhosini, kodwa zakha iibhulorho zethu zize zisilungiselele oomatshini bokuphehla umbane (generators).” Aba bazalwana banyanisekileyo babedume kakuhle kangangamashumi eminyaka.

IALBANIA IBA LILIZWE ELINGAKHOLELWAYO KUTHIXO

Ngokwezopolitiko, ubudlelane beAlbania neSoviet Union baya buphela ngoxa isondela ngakumbi kwiTshayina. Kangangendlela obabukhula ngayo ubuKomanisi eAlbania abantu bakhona baqalisa ukunxiba ngendlela efanayo noSihlalo WamaKomanisi AseTshayina, uMao Tse-tung. Ngowe-1966, uEnver Hoxha wayiphelisa into yokubakho kwabaphathi emkhosini, yaye ngenxa yokungathembani abantu babengavunyelwa ukuvakalisa iingcamango ezichasene norhulumente.

Amaphephandaba karhulumente aqalisa ukuthetha nxamnye nonqulo esithi “luyingozi.” Kwathi kwakuba njalo, iqela labafundi lasebenzisa ugandaganda ukuze lidilize enye icawa eyayiseDurrës. Kungekudala, eso senzo sanwenwela nakwezinye izixeko. Ngowe-1967, ekubeni urhulumente wayekhuthaza abantu ukuba bathiye unqulo, iAlbania yaba lilizwe lokuqala elingakholelwayo kuThixo. Nangona amanye amazwe obuKomanisi ayelubeke phantsi kweliso elibukhali unqulo, yona iAlbania yayingafuni nokuva ngalo.

Wambi amaSilamsi, abefundisi bobuOthodoki nabamaKatolika bavalelwa entolongweni ngenxa yokubandakanyeka kwabo kwezopolitiko. Abanye abefundisi basinda ngenxa yokuba bahamba nezihambayo baluyeka unqulo. Izakhiwo ezithile zonqulo zenziwa iimyuziyam. Yonke imifanekiso enokuthanani nonqulo yayingavumelekanga, kuquka iminqamlezo okanye izithixo, nezakhiwo zayo. Igama elithi “Thixo” lalisetyenziswa nje ukuze kuhlekiswe ngaye. Ezi zinto zayenza mandundu imeko yabazalwana.

Abazalwana abaninzi bafa ngeminyaka ye-1960. Intsalela yabavakalisi eyayithe saa yaqhubeka iyimela ngokuqinileyo kangangoko inyaniso. Kodwa nabantu abanomdla babesoyika ukuyiphulaphula.

UTHANDO LWENYANISO ALUPHELI

Ngowe-1968, uGole Flloko wabhalela uJohn noHelen Marks ebaxelela ngempilo yakhe enkenenkene. Kwakungekho mthethweni ukushumayela nokuya kwiintlanganiso. Kodwa nangona wayesele eneminyaka engaphezu kwama-80 ubudala, uGole wayechaza indlela asoloko eshumayela ngayo kubahlobo nakubantu adibana nabo emarikeni, epakini nakwiivenkile zokutyela. Kungekudala emva koko, uGole wafa ethembekile. Njengabazalwana abaninzi baseAlbania, naye kwakungekho nto inokuyicima indlela awayemthanda ngayo uYehova nenyaniso.

Ngenxa yokwaluphala, uSpiro Vruho wayengasakwazi ukutyelela amabandla. Kwala ke ekuqaleni kowe-1969, wafunyanwa efele equleni. ISigurimi yanikela ingxelo yokuba uzibulele. Kodwa ngaba yayinyanisile?

Nakuba yayisithi uSpiro ushiye ileta echaza ukuba uzibulale ngenxa yokudandatheka, yayingesosandla sakhe esibhale apho. Kwakhona ngaphambi kokuba afe, kuthiwa uSpiro wayonwabile. Ukongezelela, wayenamabala amnyama entanyeni, nto leyo eyayibonisa ukuba ukrwitshiwe. Akukho zintambo zafunyanwayo kwelo qula kwabe kungekho namanzi kwimiphunga yakhe.

Kwiminyaka kamva, kwavakala ukuba uSpiro wayexelelwe ukuba xa engavoti, yena nentsapho yakhe baza kuvalelwa entolongweni, baze bangafumani kutya. Abazalwana baseTiranë bafumanisa ukuba uSpiro wabulawa kusuku olungaphambi konyulo, waza waphoswa equleni. Esi yayingesosihlandlo sokugqibela kunikelwa iingxelo zobuxoki zokuba amaNgqina kaYehova azibulele.

IMINYAKA ELISHUMI YOKWENZIWA IKHESWA

Ngowe-1971, ehlabathini lonke amaNgqina kaYehova avuya gqitha akuva ukuba kongezwe amalungu eQumrhu Elilawulayo eBrooklyn, eNew York. Avuya ngakumbi akuva ngelungiselelo lokumiselwa kwabadala nezicaka zolungiselelo. Kwathabatha iminyaka ngaphambi kokuba abazalwana baseAlbania beve ngala malungiselelo entlangano. Bathi ukuze beve ngawo, kwafika abakhenkethi baseUnited States baza badibana noLlopi Bllani udade waseTiranë. Aba bakhenkethi baxelelwa ukuba iintlanganiso azisaqhutywa, yaye ayemathathu kuphela amaNgqina akhutheleyo kweso sixeko, nangona eneneni ayengaphezu koko.

UKosta Dabe wayeseGrisi ukususela ngowe-1966 ezama ukufumana ivisa ukuze akwazi ukubuyela kwilizwe lakhe eAlbania. Nangona wayeneminyaka engama-76 ubudala, wayefuna ukufundisa abantwana bakhe inyaniso. Wathi akuncama, wasebenzisa incwadi yakhe yokundwendwela yaseUnited States ukuze angene eAlbania, esazi kakuhle ukuba wayesenokungavunyelwa ukuba aphinde aphume kwelo.

Ngowe-1975, esinye isibini saseAlbania esihlala eUnited States satyelela iAlbania. Sachaza ukuba amaNgqina kaYehova abekwe phantsi kweliso elibukhali ngakumbi kunangaphambili. Abantu abatyelele kwelo babephelekwa ngabakhenkethisi bakarhulumente naphi na apho baya khona, yaye abaninzi kubo yayingamalungu eSigurimi. Babesithi abo bantu bakumka, iSigurimi ibabek’ esweni ngakumbi abo kuye kwadityanwa nabo. Abakhenkethi babekrokrelwa, ngoko babengamkelwa kakuhle. Abantu babeboyika abantu abavela kwamanye amazwe.

NgoNovemba 1976, ileta eyayivela kuKosta Dabe yathi kwiSikhumbuzo ebesiqhutywa eVlorë bekukho abantu abahlanu. Wayesazi ukuba ePërmet naseFier, bekukho iNgqina elinye kwiSikhumbuzo. Kwezibini ezaziseTiranë, kwesinye kwakukho ababini, kwesinye kukho abane. Ngokokwazi kwakhe, ngowe-1976 ubuncinane kwakukho abantu abali-13 kwiSikhumbuzo.

Kwiminyaka kamva, ethetha ngendlela awasenza ngayo iSikhumbuzo, uKulla Gjidhari uthi: “Ekuseni ndenza isonka ndaza ndakhupha iwayini. Ngolo rhatya ndavala ikhethini ndaza ndakhupha iBhayibhile endandiyifihle kwindlu yangasese. Ndafunda indlela uYesu awasisungula ngayo iSikhumbuzo kuMateyu 26. Ndathandaza, ndathabatha isonka ndaza ndasibeka phantsi. Kwakhona ndafunda uMateyu, ndaphinda ndathandaza, ndathabatha iwayini ndaza ndayibeka phantsi. Emva koko ndacula. Nakuba ndandindedwa, ndandisazi ukuba ndikunye nabazalwana bam abasehlabathini!”

UKulla wayengenazalamane zingako. Kwiminyaka ngaphambilana, wathatyathwa nguSpiro Karajani waza wamkhulisa, yaye wayehlala nenye intombi yakhe uPenellopi eTiranë. USpiro wafa malunga nowe-1950.

IALBANIA IBA LIKHESWA NANGAKUMBI

IAlbania yaba likheswa nangakumbi xa yaqhawula ubudlelane bayo neTshayina ngowe-1978. Kwabakho umgaqo-siseko omtsha ngenjongo yokuba iAlbania izimele geqe, izimisele imithetho yayo engqongqo elawula zonke iinkalo zobomi babantu, kuquka imidlalo yeqonga, imidaniso, uncwadi nobugcisa. Nawuphi na umculo ogqalwa njengokhuthaza imvukelo wawungamkelekanga. Ngababhali abagunyazisiweyo kuphela ababevunyelwe ukuba babe noomatshini bokuchwetheza. Nabani na obhaqwe ebukele iinkqubo zikamabonwakude zamanye amazwe wayencinwa yiSigurimi.

Ngeli xesha lengcinezelo eqatha, abazalwana baseJamani, eOstriya, eSweden, eSwitzerland naseUnited States babengena kwelo njengabakhenkethi ngenjongo yokudibana nabazalwana. Imbinana yabo badibana nabo yayixabisa gqitha loo migudu. Noko ke, abazalwana babesoloko bengadibani nabanye, ukuze babe mbalwa abaziyo xa kuza kufika undwendwe.

Ngowe-1985, abantu baseAlbania bazilela ukufa kukazwilakhe owalawula ixesha elide, uEnver Hoxha. Zange kube kudala kwenziwa iinguqu kurhulumente nakwezentlalo. Kunyaka olandelayo, uJohn Marks wafa waza umfazi wakhe, uHelen, owayengaphaya kweminyaka engama-60 ubudala watyelela eAlbania. Xa wayesiya kulanda ivisa yokuya apho, abasemagunyeni bathi kuye: “Ukuba kukho nantoni ekwehlelayo ngoxa ulapho, uze ungalindeli ukuba kukho ilizwe eliza kukunceda.”

Utyelelo lukaHelen lweeveki ezimbini apho lwalubaluleke ngokwenene kwimbinana yabavakalisi baseAlbania. UHelen wada wadibana noMelpo, udadeboJohn, owayeve inyaniso kumntakwabo kwiminyaka engama-25 ngaphambili. Nakuba wayengekabhaptizwa, kangangeminyaka emininzi uMelpo wayesetyenziswa kakhulu yintlangano ukuze inxibelelane nelo.

Kwakhona uHelen wadibana noLeonidha Pope noVasil Gjoka, ababebhaptizwe ngowe-1960. Wafumanisa ukuba kukho amanye amaNgqina asixhenxe ahlala kwiindawo ezahlukahlukeneyo zelo. Wanika abazalwana iingxelo ezisexesheni ngentlangano nendlela umsebenzi owawuhambela phambili ngayo kwamanye amazwe obuKomanisi. Ngobulumko uHelen wayeshumayela ngokungacwangciswanga kwabo adibana nabo. Kodwa ke waphawula ukuba iAlbania inengxaki yezoqoqosho.

Wathi: “Kwakuqhelekile ukuma emgceni ukususela ngentsimbi yesithathu ekuseni ulindele ubisi nje oluncinane. Iivenkile ezininzi zazingenalo.”

Ngowe-1987, isebe laseOstriya nelaseGrisi lenza amalinge okuthumela abatyeleli eAlbania. Ngowe-1988, esinye isibini esivela eOstriya, uPeter Malobabic nomfazi wakhe, bangena kwelo njengabakhenkethi, baza banika uMelpo ibhlawuzi awayivuyela gqitha. Kodwa ke wavuya ngakumbi akufumana incwadi ethi “Izinto ekungenakwenzeka Ukuba UThixo Axoke Ngazo” eyayifihlwe kuloo bhlawuzi.

Kamva kuloo nyaka, esinye isibini sanika uMelpo iincwadi ezingakumbi, kodwa kwakufuneka silumke kuba iSigurimi yayisijonge ngeliso lokhozi. Sasisithi sakufumana imizuzwana nje embalwa singaphelekwanga ngabo singa-bakhenkethisi, esi sibini sisebenzise elo thuba ukuze sidibane nabanye abazalwana. Safumanisa ukuba uLeonidha uyagula yaye abazalwana abaninzi eAlbania sele bekhulile yaye abasakwazi ukuya pha naphaya.

IIMEKO ZIYATSHINTSHA

Ngowe-1989 imeko yezopolitiko yaqalisa ukutshintsha. Isigwebo sokubulawa kwabantu abazama ukuphuma eAlbania sapheliswa. Kwihlobo laloo nyaka uHelen waphinda watyelela kwelo. Wachitha iiyure edlulisela inkcazelo nemiyalelo awayeyiphathisiwe. NoVasil Gjoka wayemana efumana amathuba amafutshane okutyelela apho.

ISigurimi yeva ukuba uHelen ulapho yaza yaya kuye. Kunokuba imsokolise, yasuka yacela isipho aza naso eMerika. Oku kwakubonisa indlela abantu abakhawuleza batshintshe ngayo.

UDonga lwaseBerlin lwadilizwa ngoNovemba 9, 1989, yaye zange kube kudala iimeko zatshintsha eAlbania. NgoMatshi 1990 abantu baseKavajë baqalisa ukuqhankqalaza nxamnye nobuKomanisi. Amawaka abantu athontelana kwimizi yozakuzo eseTiranë, ezama ukuphuma kwelo. Abafundi banyanzelisa iinguqu baza bagwayimba bengatyi.

NgoFebruwari 1991, abantu bancothula umfanekiso oqingqiweyo kaEnver Hoxha, owawuziimitha ezilishumi ubude nowawuyeyona nto ibalaseleyo kwiSkanderbej Square eseTiranë kangangeminyaka. Abantu babevakalelwa kukuba luphelile ulawulo lwaloo zwilakhe. NgoMatshi, abantu baseAlbania abamalunga nama-30 000 baye baqweqwedisa iinqanawa ezisuka eDurrës naseVlorë baza baya kuba ziimbacu eItali. Kuloo nyanga, abantu bakwazi ukuvotela imibutho eyahlukahlukeneyo yezopolitiko okwesihlandlo sokuqala emva kweminyaka. Nakuba kwaphinda kwaphumelela amaKomanisi, kwacaca ukuba urhulumente wawo akasenamandla.

UHelen Marks watyelela eAlbania okokugqibela ngoAgasti 1991, kodwa ngoku izinto zazisele zitshintshile. Kwinyanga nje ngaphambi koko, urhulumente wayevule iofisi yesebe lezonqulo, ephinda elumisela ngokusemthethweni emva kweminyaka engama-24. Abazalwana abazange baphozise maseko, batyhalela phambili ngomsebenzi wokushumayela baza balungiselela ukuba kuqhutywe iintlanganiso zamabandla.

UVasil Gjoka waya eGrisi waza wachitha ixesha elithile kwiofisi yesebe yalapho efunda indlela yokulungelelanisa umsebenzi wokushumayela. Ekubeni wayengasazi kakuhle isiGrike, abazalwana ababenofifi ngesiAlbania benza konke okusemandleni abo ukuze bamncede. Emva kokubuyela kwakhe eTiranë, uVasil wazibhokoxa esenza konke awayekufundisiwe waza wazama ukuphucula indlela yokuqhuba iintlanganiso ezazibakho kabini ngeveki, enye yazo isisifundo seMboniselo yesiAlbania eyayisandul’ ukukhululwa.

Omnye umzalwana uthi: “Ngaphambili, iintlanganiso zazivulwa ngengoma nomthandazo, kusetyenziswa iingoma esasizifundiswe ngabazalwana abakhulileyo. Sasinandipha isifundo emva koko sivale ngengoma—okanye ezimbini, ezintathu nezingakumbi. Emva kwezo ngoma sasivala ngomthandazo.”

Ngo-Oktobha 1991 nangoFebruwari 1992, eAlbania kwafika uThomas Zafiras noSilas Thomaidis bezise iincwadi ezivela eGrisi. Badibana nabazalwana baseTiranë kunye nabavakalisi abangabhaptizwanga baseBerat baza babhala uludwe lwabantu abaninzi ababenomdla wokuncedwa bazi inyaniso. Emva kwamashumi eminyaka bengazifumani izinto zokomoya, uninzi lwabo lwalulambele inyaniso. Ngokomzekelo, eBerat abantu abanomdla babeziqhubela iintlanganiso nakuba kwakungekho bazalwana babhaptiziweyo kweso sixeko. Yintoni eyayiza kwenziwa ukuze kuncedwe aba bantu ngokomoya?

ISABELO ESINGALINDELEKANGA

UMichael noLinda DiGregorio yayingabathunywa bevangeli kwiDominican Republic. Utatomkhulu nomakhulu kaMichael yayingabanye babazalwana baseAlbania ababhaptizwa eBoston kwiminyaka ye-1920, ngoko wayenofifi ngolwimi lwesiAlbania. Ngoko xa abakwaDiGregorio babefuna ukutyelela izalamane eziseAlbania ngowe-1992, babuza kwiQumrhu Elilawulayo enoba bangakwazi kusini na ukudibana nabazalwana kwezo ntsuku zintathu belapho. Into eyabamangalisayo kukuba, iQumrhu Elilawulayo labacela ukuba bahlale apho iinyanga ezintathu ukuze bancedise ekulungelelaniseni umsebenzi wokushumayela.

Kwisebe laseRoma, abazalwana baseGrisi nabaseItali babathela gqabagqaba abakwaDiGregorio ngemeko yaseAlbania baza bababonisa iifoto zabanye abazalwana balapho kuquka ekaVasil Gjoka. Xa esi sibini sakwaDiGregorio sakhwela inqwelo-moya eya eTiranë ngoAprili 1992, abemi baseAlbania ababehlala kwamanye amazwe babesele bevumelekile ukubuyela ekhaya. Noko ke, kwakusekho izidubedube zezopolitiko apho babe nabantu bexhalabele ikamva.

Bathi uMichael noLinda bephuma nje kwisikhululo seenqwelo-moya, bahlangatyezwa yintsapho yabo ngezandl’ ezishushu. Kwangaxeshanye, uMichael wabona omnye umntu apho, waza waqonda ukuba nguVasil Gjoka, owayesele exelelwe ukuba esi sibini siza kufika ngaloo mini.

Wathi kuLinda: “Ungab’ uhamba nentsapho, ndiyeza.”

Emva kokuba le ntsapho yange uLinda, yathabatha imithwalo yabo yaza yayifaka ezimotweni, ngoxa uMichael wayesatsibe kuVasil.

UMichael wathi kuVasil: “Ndiza kukubona xa ndibuyela apha eTiranë, ngeCawa.”

UKoço, ilungu lentsapho yakuloMichael eAlbania elalingazi ukuba uMichael noLinda bangamaNgqina kaYehova, leza libaleka kuye laza lathi: “Wenza ntoni? Asithethi nabantu esingabaziyo.”

Njengoko babedud’ endleleni besinge eKorçë, abakwaDiGregorio bayibona indlela elahluke ngayo elo lizwe kwiCaribbean. UMichael uthi: “Yonk’ into yayindala, imthuqwasi luthuli. Yonk’ indawo yayibiyelwe ngocingo oluhlabayo. Abantu babengumbono nje olusizi. Kwakungabonakali kwamoto. Iifestile zaziziingceba. Abalimi babelima ngezandla. Kwakungekho mahluko ungako kwixesha lootatomkhulu. Kwakungathi siphila kwixesha lamandulo.”

“UHAMBO LWENU BELUKHOKELWA NGUTHIXO”

UKoço, wafuna ukubonisa uMichael into awayeyifihle kangangeminyaka. Emva kokufa kukamakhulu kaMichael, intsapho yakowabo eseBoston yabhalela intsapho eseAlbania ileta ende. Kumaphepha okuqala alishumi loo leta yayithetha ngemibandela yentsapho, kodwa yaqukumbela ngokuthetha ngovuko.

UKoço wathi kuMichael: “Amapolisa ayivula le leta aza afunda amaphepha ambalwa asekuqaleni. Adikwa aza athi: ‘Yithatheni! Yimibandela yentsapho.’ Xa ndandifunda inxalenye yayo yokugqibela, ndavuyiswa kukuva okuthile ngoThixo.”

Emva koko uMichael waxelela uKoço ukuba yena noLinda bangamaNgqina kaYehova, waza wamshumayeza ngokucokisekileyo.

Ngokufanayo nabantu bamaxesha okubhalwa kweBhayibhile, abantu baseAlbania babeziva benembopheleleko yokunyamekela nokukhusela iindwendwe zabo. Ngoko ke uKoço wafuna ukupheleka uMichael noLinda xa besiya eTiranë.

UMichael uthi: “Kwakunzima ukufumana ikhaya likaVasil eTiranë, kuba amagama ezitrato ayengabhalwanga. Ngoko uKoço wacebisa ukuba sibuze eposini.”

ULinda uthi: “Ukubuya kwakhe eposini, uKoço wabonakala ethe khamnqa, njengoko sasisiya ngqo kwindawo ahlala kuyo uVasil.”

Kamva, uKoço wathi: “Ukufika kwam eposini ndaza ndabuza ngoVasil, bathi: ‘Ngumntu ongcwele lowo! Ngaba uyazazi izinto aye watyhubela kuzo? Akukho mntu ulilungisa njengaye apha eTiranë!’ Ndithe ndakuva oko, ndaqonda ukuba uhambo lwenu belukhokelwa nguThixo! Andinakukwazi ukuba ngumqobo kwinto enize kuyenza apha.”

UKULUNGELELANISA IZINTO ETIRANË

UVasil wavuyiswa gqitha kukubona abakwaDiGregorio, baza bancokola ixesha elide. Kamva ngolo rhatya, uVasil wabachazela ukuba ngaloo ntsasa kufe uJani Komino, owayevalelwe entolongweni noNasho Dori. Yintoni eyayibangela ukuba uVasil angayi kumngcwabo walo mzalwana wayengumhlobo wakhe osenyongweni? Wathi: “Kungenxa yokuba kwakuza kufika umzalwana othunyelwe liQumrhu Elilawulayo.”

UMichael noLinda kwakufuneka bahlale eTiranë, kodwa urhulumente welo xesha wayengafuni bantu basuka kumazwe angaphandle kweso sixeko. Babeza kuthini?

UMichael uthi: “Sathandaza kuYehova yaye ekugqibeleni safumana igumbi lokuhlala kwesinye isakhiwo esincinane.”

ULinda uthi: “Isitshixo sasihlala kubanikazi balo yaye babefika nanini na bethanda. Ukongezelela, indlela eya kwigumbi lethu yayinqumla kwelomnye umntu. Okuvuyisayo kukuba elethu igumbi kwakungekho mntu unqumla kulo, labe lingekho nasemehlweni abantu.”

AbakwaDiGregorio baphulaphula ixesha elide ngoxa abazalwana abakhulileyo baseTiranë babebalisa ngeemvavanyo abazinyamezelayo. Kodwa ke, enye yeengxaki ababenazo yayikukuba abanye baba bazalwana babekrokrelana.

UMichael uthi: “Ngamnye wabo wayethembekile, kodwa engaqinisekanga enoba babenjalo na nabanye. Sekunjalo, ngoxa babengathembananga bona, thina babesithemba. Emva kokuba beyixubushe ngokuzola le ngxaki bavumelana kwelokuba eyona nto ibalulekileyo kukubhengeza igama likaYehova. Babemthanda uYehova ngokumanyeneyo yaye babekhangele phambili kwikamva.”

Kwakubonakala ukuba akukho bandla. Ngokomzekelo, xa uKulla Gjidhari noStavri Ceqi bayibona okokuqala incwadana ethi Ukuhlolisisa IZibhalo Imihla Ngemihla, bayityhila nje bengazi ukuba yeyokwenzani.

Ngequbuliso uStavri wathi, “AsiyoManna le?” ethetha ngencwadi ethi Daily Heavenly Manna for the Household of Faith, eyayisetyenziswa ukufumana kwakhe inyaniso.

UKulla wabuza: “Khanitsho, unjani umongameli, uMzalwan’ uKnorr? Ngaba usaphila yena umhlobo wakhe uFred Franz?” Oku kwayibonisa kakuhle indlela eyayisele imininzi ngayo iminyaka benganxulumani nentlangano.

YABA SISIKHUMBUZO ESIBALASELEYO!

Igumbi elalikumzi kaVasil Gjoka elinobude obuziimitha ezine nobubanzi obuziimitha ezintathu ababeziqhubela kulo abazalwana iintlanganiso lalilincinane kakhulu ukuba kuqhutyelwe kulo iSikhumbuzo. Ngoko ke saqhutyelwa kwigumbi elalilikomkhulu lephephandaba lamaKomanisi, apho kwakuze abantu abali-105. ISikhumbuzo sasiqala ukungaqhutyelwa emzini womntu eTiranë. Nangona abavakalisi baseAlbania babengama-30 ngowe-1992, bavuyiswa kukubakho kwabantu abangama-325 kwiSikhumbuzo.

Lalikhula ngokukhula iqela labantu abanomdla eTiranë, ibe abantu ababesiza kwiintlanganiso ezaziqhutyelwa kwaVasil babesiya kutsho kuma-40. Abantu abasandul’ ukungena entlanganweni babefuna ukuba ngabavakalisi abangabhaptizwanga, ngoxa abanye babefuna ukubhaptizwa. Abazalwana babechitha iiyure ezininzi behlola abo bafuna ukubhaptizwa. Ngenxa yokuba incwadi ethi Ukulungelelaniselwa Ukufeza Ubulungiseleli Bethu yayingekapapashwa ngesiAlbania, umbuzo ngamnye wabo baza kubhaptizwa kwakufuneka uguqulelwe ngomlomo. Abasebatsha babeqhutyelwa isifundo ngokucokisekileyo ukuze kuqinisekwe ukuba bayayiqonda inyaniso. Ngoxa kungekho mntu wakha wafundelwa kakuhle iBhayibhile, iyamangalisa indlela ababeyazi ngayo.

EKUGQIBELENI UMSEBENZI WAMISELWA NGOKUSEMTHETHWENI!

Kangangeeveki, abazalwana bachitha iiyure ezininzi bethetha namagqwetha kunye namagosa athile, bezama ukuba umsebenzi wokushumayela ngoBukumkani umiselwe ngokusemthethweni. Ngoxa iqela labazalwana nabantu abanomdla baseTiranë babesele bezifakile izicelo, kwangena urhulumente omtsha, ngoko kwafuneka babe nomonde.

Omnye umzalwana uthi: “Abantu babezenza zonke izinto bebetha ngezikaTshiwo. Sasisithi xa sihamba esixekweni sidibane nomphathiswa wamalungelo oluntu, owemicimbi yezangaphakathi, owobulungisa, intloko yamapolisa, amalungu enkundla yomgaqo-siseko nabanye abakwizikhundla eziphezulu. La madoda ayenobubele yaye ayevuyiswa kukuba iimeko zazisiba bhetele. Inkoliso yawo yayisele izazi iiungjillorë. Kwakucaca ukuba amaNgqina kaYehova akho yaye ayasebenza eAlbania.”

Kwaqengqeleka iiveki abasemagunyeni bethembisa ukuba urhulumente uza kuwabhalisa ngokusemthethweni amaNgqina kaYehova, kodwa kwabe kungekho nto iqhubekayo. Noko ke, kwada kwalunga xa uAngelo Felio, umzalwana owayevela eUnited States kodwa enemvelaphi yaseAlbania, wayetyelele intsapho yakhe eTiranë. Ngoxa wayelapho, abazalwana bahamba naye baya kuthetha nomntu othile owayecebisa umphathiswa onelungelo lokugunyazisa ukubhaliswa ngokusemthethweni. Lo mcebisi wavuya gqitha akuva ukuba abantu bakuloAngelo bavela kwingingqi yakowabo.

Wabuza uAngelo: “Yiyiphi ilali enivela kuyo?” Okumangalisayo kukuba, kwathi kanti naye uvela kuloo lali.

Wambuza: “Niyintsapho yakwabani?”

Kwathi kanti bayazalana, nto nje iintsapho zabo zalahlekana kudala.

Wathi: “Ndiye ndachukumiseka gqitha sisicelo senu yaye bendizimisele ukuninceda. Kodwa ngoku, kunyanzelekile ukuba ndinincede kuba siyazalana!”

Kwiintsuku ezimbalwa kamva, lo mcebisi wanika abazalwana uXwebhu No. 100 olwaluwamisela ngokusemthethweni amaNgqina kaYehova eAlbania. Ekugqibeleni, unqulo loThixo oyinyaniso, uYehova, olwaluvalwe ukususela ngowe-1939 lwamiselwa ngokusemthethweni. AbakwaDiGregorio bathi: “Siswel’ amazwi okuyichaza indlela esasivakalelwa ngayo ngaloo mini.”

Kwiiveki ezimbalwa kamva, isebe laseGrisi elalinyamekela iAlbania lathumela uRobert Kern eTiranë. URobert waxelela abazalwana balapho ngokubhaliswa ngokusemthethweni komsebenzi nokumiselwa kweBandla laseTiranë. Wabachazela nangokuba bamele bashumayele “kulo lonke ilizwe laseAlbania.” Kwakufuneka abazalwana babe nenzondelelo kumsebenzi wendlu ngendlu. ETiranë kwakuqeshwe indlu enamagumbi okulala amathathu eyayiza kuba yiofisi nekhaya labathunywa bevangeli, yaye igumbi elikhulu elalisecaleni laliza kusetyenziswa njengeHolo yoBukumkani yokuqala kwelo.

IMVU EBILIKHESWA IFUNYENWE

Xa babexubusha ngenkqubela yomsebenzi wokushumayela eAlbania, abazalwana babuza: “Ngaba akho amaNgqina eVlorë?” Abanye babesazi ibhinqa elisele likhulile ekwakusithiwa alisakwazi kuzenzela nto ngenxa yokwaluphala. Kwafika elinye ibhinqa eofisini lisithi lona nentsapho yalo baziiungjillorë yaye inyaniso bayifundiswa ngomnye umntu ogama linguAreti eVlorë. Ngoko abazalwana baseTiranë baya kufuna uAreti eVlorë.

UAreti Pina, ibhinqa esele likhulile nelifutshane wazingenisa ekhayeni lakhe ezo ndwendwe, nakuba wayebonakala engumntu othuleyo. Xa bamxelela ukuba ngabazalwana bakhe bokomoya, kwaba ngathi abathethanga nto.

Emva kwemizuzwana embalwa uAreti wathi: “Ndinganibuza imibuzo?” Waqalisa ukubangxixha ngemibuzo: “Ngaba niyakholelwa kuBathathu Emnye? Ngubani igama likaThixo? Ngaba niyakholelwa kwisihogo somlilo? Kwenzeka ntoni xa sisifa? Kuthekani ngomhlaba? Bangaphi abaya ezulwini?”

Abazalwana bayiphendula yonke loo mibuzo.

Emva koko uAreti wababuza: “Ngaba niyashumayela?”

Omnye umzalwana waphendula: “Ewe, siyashumayela.”

Wathi: “Kodwa nishumayela njani?”

Lo mzalwana waphendula: “Sishumayela kwindlu ngendlu.”

Zazehlela iinyembezi kuAreti, wema ngeenyawo waza wamanga loo mzalwana.

Wathi: “Ngoku ndiyazi ukuba ningabazalwana bam! Ngabantu bakaYehova kuphela abashumayela kwindlu ngendlu!”

Amaqela amaProtestanti aseVlorë eva ukuba uAreti ngumntu wecawa aza amcela ukuba awathelele. Waxelela abazalwana esithi: “Bendingafuni nto enokwenza neBhabhiloni Enkulu! Ngoko bendifuna ukuqiniseka ukuba niyintsapho yam yokomoya.”

UAreti wabhaptizwa ngowe-1928 eneminyaka eli-18 ubudala. Wayesehl’ enyuka iintaba ngeenyawo, eshumayela ephethe iBhayibhile ngesandla. Nangona wayengasadibani nabazalwana kangangeminyaka, kodwa waqhubeka eshumayela ngokuthembeka.

Ekhala uAreti wathi: “UYehova uyamangalisa. Akazange andilibale!”

Abantu babecinga ukuba uAreti umkelwa ziingqondo ngokuhlala enokholo kuThixo nakubeni kwakulawula uzwilakhe owayengenalusini eAlbania. Kodwa uAreti wayephile qete. Ingqondo yakhe yayisebenza kakuhle.

KUNINZI EKUFUNEKA KWENZIWE

Ekubeni umsebenzi wethu wawubhaliswe ngokusemthethweni, yayininzi into ekwakufuneka siyenze ukuze sihambisele phambili izilangazelelo zoBukumkani eAlbania. Kwakufuneka abazalwana bachazelwe ngezinto ezihlaziyiweyo entlanganweni baze bomelezwe ngokomoya. Kwakufuneka iimpapasho zesiAlbania ezaziza kusetyenziswa ngabazalwana nasentsimini. Yaye babefuneka ngokungxamisekileyo abavakalisi abangakumbi. Ngubani owayeza kunceda?

Ngowe-1992, kwafika oovulindlela abakhethekileyo abavela eItali naseGrisi, yaye baqalisa ukufunda isiAlbania. Kwangaxeshanye, kwakukho iqela elincinane elaqalisa ukuguqulela iincwadi zethu. Nakubeni umbane wawukhe umke kangangeentsuku ezingama-21 zilandelelana, abazalwana babesoloko bonwabile yaye bezibhokoxa emsebenzini.

Kwakukho nomnye umsebenzi omninzi. Xa kubanda, kwakufuneka kufudunyezwe ikhaya labathunywa bevangeli. Kodwa kwakungekho nkuni zithengiswayo eAlbania. Babeza kwenza ntoni abazalwana? Abazalwana baseGrisi bathumela iinkuni ezininzi nesarha yombane. Kodwa kwakusekho ingxaki, kuba indawo ezifakwa kuyo iinkuni esitovini yayincinane, yaye kwakungekho mbane eyayiza kusetyenziswa ngawo isarha. Ngethamsanqa, omnye umzalwana wayenomhlobo onezembe owayehlala kwelinye icala laseTiranë. Ngenxa yokuba kwakungekho zibhasi, kwathabatha iiyure ezimbini ukuze elo zembe lifike kwikhaya labathunywa bevangeli, yaye kwakufuneka libuyiselwe ngaphambi kokuba kurhatyele. Omnye umthunywa wevangeli uthi: “Satshintshisana ngokucanda iinkuni, nto leyo eyabangela ukuba sihlale sifudumele.”

Ngoxa sasigawula ezo nkuni, sifunda nolwimi, lona iqela labaguquleli besiAlbania lalivuyiswa kukutyelelwa nguNick noAmy Ahladis ababesuka kwiSebe Lokuguqulela, ngoku elisePatterson, eNew York. Indlela ababebafundisa ngobubele nakakuhle ngayo abaguquleli abatsha yabanceda bafunda ngokukhawuleza, baza bawenza kakuhle umsebenzi. Iincwadi zazishicilelwa lisebe laseItali, lize lizithumele eAlbania.

Wonke loo msebenzi unzima waba nemiphumo emihle kuba abantu babesabela kakuhle gqitha entsimini. Nabavakalisi abatsha babezibhokoxa. Ngokomzekelo, uLola wayesandul’ ukuba ngumvakalisi, kodwa wayesebenza iiyure ezili-150 nezingama-200 nangaphezulu nyanga nganye. Xa wayecetyiswa ukuba alumke yaye angazibhokoxi kakhulu entsimini, uLola wathi: “Ndiye ndadlala ngexesha lam ukuza kuthi ga ngoku. Kodwa le kuphela kwendlela endinokulisebenzisa kakuhle ngayo.”

UMSEBENZI UHAMBELA PHAMBILI

NgoMatshi 1993 kwenzeka izinto ezibalulekileyo kwimbali yaseAlbania. Oovulindlela abakhethekileyo baqalisa izabelo ezitsha eBerat, eDurrës, eGjirokastër, eShkodër, eTiranë naseVlorë; inkupho yokuqala eyaguqulelwa liqela labaguquleli besiAlbania yaba yiMboniselo kaMatshi 1; abazalwana baqalisa iSikolo Sobulungiseleli Sobuthixo, nto leyo ethetha ukuba kwaqhutywa iintlanganiso ezintlanu okwesihlandlo sokuqala; kwakhutshwa UBulungiseleli Bethu BoBukumkani bokuqala ngesiAlbania; yaye kwabakho indibano ekhethekileyo yosuku olunye yokuqala kwiBallet-Opera Theater, ekwiSkanderbej Square saseTiranë.

Kwafika iindwendwe ezivela eGrisi naseItali zize kunandipha indibano ekhethekileyo yosuku ekusathethwa ngayo nanamhlanje. UNasho Dori wavula ngomthandazo kuloo ndibano, ebulela uYehova ngeentsikelelo ababezinandipha. Kwakukho abantu abangama-585, kwaza kwabhaptizwa abangama-41. Phakathi kwabo kwakukho abantwana nabazukulwana babazalwana ababemkhonza ngokuthembeka uYehova eAlbania.

Eyona nto yabangela imincili yindibano yesithili eyayiqala ukubakho eAlbania ngowe-1993. Kwakukho abantu abangaphezu kwama-600 kuquka iindwendwe ezivela eFransi, eGrisi, eItali eOstriya naseSwitzerland. Abazalwana baseAlbania babengakwazi ukuzibamba luvuyo lokuba, emva kwexesha elide bengamakheswa, bakwazi ukunxulumana nabazalwana babo abaninzi abasuka kumazwe amaninzi kangaka.

Ukuze izinto zilungelelane kakuhle, iQumrhu Elilawulayo lamisela iKomiti Yelizwe eyayibunjwa nguNasho Dori, nguVito Mastrorosa, noMichael DiGregorio eyayiza kuba phantsi kolwalathiso lwesebe laseItali. Into yokuqala ebalulekileyo ababeza kuyenza kukufumana indawo yeofisi neza kuhlala iqela elalikhula labaguquleli.

Kwiqela lesibini loovulindlela abakhethekileyo elalifunda isiAlbania kwakukho uStefano Anatrelli ovela eItali. Emva kweeveki ezintlanu efunda olo lwimi, wabizwa eofisini waza waxelelwa oku: “Singathanda ukuba ube ngumveleli wesiphaluka oza kutyelela oovulindlela abakhethekileyo namaqela.”

Emva kokuba exelelwe oko uStefano wathi: “Kodwa andikwazi ukusithetha kakuhle isiAlbania.” Sekunjalo, esi sabelo wayesijonga njengelungelo elibalaseleyo. Emva kokuba encedwe ngabazalwana ekulungiseleleni iintetho eziliqela, waya kwimimandla ekude yaseAlbania. Kwakusele kudlule iminyaka emalunga nama-30 ukususela oko uSpiro Vruho wayetyelele abazalwana njengomveleli wesiphaluka ngexesha lokuvalwa komsebenzi. Ngowe-1995, uStefano wamiselwa njengelungu leKomiti Yelizwe.

Ngowe-1994 kwafika iqela lesithathu loovulindlela livela eItali. Abavakalisi abasebatsha baseAlbania bakhuthazwa yinzondelelo ebabenayo aba vulindlela. Ekupheleni konyaka wenkonzo wowe-1994, kwakukho abavakalisi abangama-354 ababekhuthele kumsebenzi wokushumayela.

Noko ke, abavakalisi abaninzi babejamelana nezinye iingxaki. Kwakungelula ukutshintshela kwinkululeko emva korhulumente wengcinezelo. Ukuze bakwazi ukuphila phantsi kolawulo lobuzwilakhe, kwakufuneka balumke bangazichazi ngokukhululekileyo iimvakalelo zabo kwabanye—ingakumbi kubantu abasuka kwamanye amazwe. Noko ke, abazalwana noodade abasuka kwamanye amazwe babeyiqonda imeko yabo yaye babesebenza nabo ngomonde bezama ukuba babathembe.

Ngaloo nyaka abazalwana noodade abakhulileyo kunye nabavakalisi abasebatsha bakuvuyela ukubona uTheodore Jaracz, owaye lilungu lokuqala leQumrhu Elilawulayo ukutyelela eAlbania. Kwintetho awayinikela eTiranë kwakukho abantu abangaphezu kwama-600.

Ngelo xesha, kwakusele kuthengwe indawo yeofisi eTiranë. Kwisithuba esingaphantsi kweenyanga ezintandathu, iqela labazalwana abazibhokoxayo abavela kwamanye amazwe lahlaziya indlu enkulu endala layenza iiofisi, laza lakha isakhiwo esihlala abantu abangama-24. Ezi zakhiwo zanikezelwa ngoMeyi 12, 1996 xa uMilton Henschel weQumrhu Elilawulayo wayetyelele eAlbania.

BABESHUMAYELA BODWA

Umfana waseKorçë, ogama linguArben wafunda incwadi yeBhayibhile awayeyithunyelelwe ngudadewabo waza waqonda ukuba yinyaniso leyo. Wabhalela iofisi yaseAlbania, yaye waqhubeka efunda inyaniso ngokubhalelana nabazalwana. Ukuze bamncede ngokomoya, abazalwana ababini bamtyelela ngokukhethekileyo. Kwincoko yabo, kwacaca ukuba uyakufanelekela ukuba ngumvakalisi. Emva koko baya naye kumbindi weKorçë waza wababukela njengoko beshumayela kubantu abadlulayo.

UArben uthi: “Bandula ke bandinika amaphephancwadi baza bathi, ‘Ngoku lithuba lakho.’ Bathi mandishumayele ndedwa, yaye ndenjenjalo.”

Kwadlula ezinye iinyanga ngaphambi kokuba aze kuncediswa ngoovulindlela abakhethekileyo. Ngoxa wayeseyedwa abantu babemphulaphula. Kungekudala emva kokuba aba vulindlela bakhethekileyo befikile kwasekwa iqela.

Ngasekupheleni kwaloo nyaka, oovulindlela abaseVlorë bafowunela iofisi, beyixelela ukuba uAreti Pina uyagula yaye ucela ukudibana nomnye wabazalwana abakhokelayo. Ukufika kwalo mzalwana, uAreti wacela wonke umntu owayelapho ukuba aphume ukuze akwazi ukuthetha naye.

Erhoxoza wathi: “Sele ndiza kufa. Kukho into ebendisoloko ndiyicinga yaye ndifuna ukuyibuza kuni. Andisazikhumbuli zonke iinkcukacha, kodwa ndifuna ukwazi, Ngaba izinto ekuthethwa ngazo kwiSityhilelo sele zizalisekile?”

“Ewe, Areti, inkoliso yazo izalisekile,” waphendula watsho lo mzalwana, owathi kamva wachaza izinto ezimbalwa eziseza kuzaliseka. UAreti waphulaphula ngenyameko.

Wathi: “Ngoku ndiza kufa ndiseluxolweni. Bendifuna ukwazi ukuba sele sisondele kangakanani kwinzaliseko yaso.”

Kangangeminyaka uAreti wayengumvakalisi onenzondelelo—nakubeni wayeshumayela yedwa ezintabeni okanye ebhedini xa egula. Kungekudala emva kokuba encokole nalo mzalwana, uAreti waligqiba ngokuthembeka ikhondo lakhe lasemhlabeni.

UKHOLO LWAKHE LOMELELA DE KWASA EKUFENI

UNasho Dori, owayeneminyaka engaphezu kwama-80 wayegula yaye engasenamandla. Kodwa kwakukho elinye iqela labazalwana elalifuna ukuba alikhuthaze—abazalwana abaselula ababebizelwa emkhosini. Umfundisi wamaOthodoki eBerat, owayengakuthandi ukubona amaNgqina kaYehova esanda, waphembelela abasemagunyeni ukuba batshutshise aba bafana.

Abazalwana abaselula abathandathu ababesala ukuya emkhosini babelindelwe sisigwebo seenyanga eziliqela entolongweni. Ekubeni wayeqonda ukuba bafuna ukukhuthazwa, uNasho wachopha ebhedini waza washicilela umyalezo wawuthumela ngevidiyo.

Wababongoza aba bazalwana wathi: “Ningoyiki. Nathi sikhe satyhubela koku. UYehova uya kuba nani. Ukuba banisa entolongweni, ningabi naxhala. Oko kuya kuphumela ekungcwalisweni kwegama likaYehova.”

Njengokuba impilo kaNasho yayisiba nkenenkene ngakumbi, wabiza abazalwana waza wathi kubo: “Kuye kwafuneka ndicele uxolo kuThixo. Kangangendlela ebendigula ngayo kwiveki ephelileyo, ndide ndathandazela ukufa. Kodwa ndiye ndakhumbula ukuba uYehova nguMsunguli wobomi. Eyona nto ayifunayo kukuba abantu baphile. Ngoko le nto bendiyifuna inxamnye nokuthanda kwakhe. Ndiye ndacela ukuba andixolele.”

Xa uNasho wevayo ukuba inani labavakalisi baseAlbania liye laya kutsho kuma-942, wathi: “Side saba naso isihlwele esikhulu eAlbania!” Kwiintsuku ezimbalwa kamva wafa, egqiba ikhondo lakhe lasemhlabeni.

ITRAZIRA—IXESHA LEZIPHITHIPHITHI

Ngowe-1997, yayixhaphakile into yokuxhatshazwa kwabantu, ukunyoba nokonakala kwabo. Abantu abaninzi baseAlbania bathengisa yonke into abanayo baza batyala yonke loo mali koomasinyusane kuba befuna ukuba zizityebi ngokukhawuleza. Xa oku kungazange kuphumelele, baba nomsindo baza baqalisa ukuqhankqalaza ezitratweni.

Kanye ngelo xesha, ngoxa kwakuqhubeka indibano yosuku olukhethekileyo, omnye udade owayesebenzela igosa eliphakamileyo waxelela abazalwana ukuba inkulumbuso yelo sele iza kuzibeka phantsi iintambo. Wayevile ukuba kuza kubakho ugonyamelo olungathethekiyo. Loo ndibano yashwankathelwa ukuze abazalwana bagoduke ngokukhawuleza. Kwiiyure nje ezimbini luphelile olo cwangciso, kwabakho unxunguphalo kwelo lizwe baza abantu babekelwa ixesha lokuba bangahambi esitratweni.

Akukho mntu wayeyazi eyona nto iqhubekayo. Kwakuvakala nje amarhe. Ngaba kwakungenelele amazwe angaphandle okanye yayiziipolitiki zasekuhlaleni? Oomasinyusane bapatyalaka, yaye abantu abaninzi balahlekelwa yiyo yonke into ababeyityalile. Kwabakho uqhushululu eVlorë. Abantu baqhekeza iindawo ezigcina izixhobo zelizwe baza bathatha zonke izixhobo neembumbulu. Njengoko iindaba zazichaza okuqhubekayo, kuzo zonke iidolophu kwakugcwele ugonyamelo. Umbhodamo owawukweli lizwe wawusohlula namapolisa. IAlbania yawohloka ngenxa yemvukelo neziphithiphithi.

Inkoliso yabakhonzi bexesha elizeleyo abali-125 abaseAlbania nabasuka kumazwe angaphandle yabalekela eTiranë. Inkoliso yabantu baseAlbania yayisithi ngabantu abasuka kwamanye amazwe ababangela ukuba kubekho ezo ziphithiphithi, ngoko yayibubulumko ngoovulindlela abasuka kwamanye amazwe ukuba balishiye elo. Ngenxa yokuba isikhululo seenqwelo-moya sasivaliwe, abanye oovulindlela abasuka eItali basiwa eDurrës, apho izibuko laliphantsi kweliso lamadoda asekuhlaleni axhobileyo. Emva kokulinda iiyure ezili-12 besoyika, aba vulindlela bakhwela inqanawa eya kwilizwe labo.

Suku ngalunye iKomiti Yelizwe yayinxibelelana nabazalwana abakwiindawo ezahlukahlukeneyo zelo lizwe ngefowuni. Ntsasa nganye ngaphambi kwentsimbi ye-12, kwakusithi nkcwe ezitratweni, kodwa emva kwemini kwakuqalisa izithonga zemipu de kube ngenj’ ixukuxa. Abanye babenezixhobo zomkhosi weenqwelo-moya. Olu dushe lwalubizwa ngokuba yitrazira, okanye isiphithiphithi.

“KUYA KUPHUMELA EKUNGCWALISWENI KWEGAMA LIKAYEHOVA”

UArben Merko, omnye wabazalwana abathandathu baseBerat ababanjelwa ukungathabath’ icala, uthi: “Kwakukho umngxuma omncinane kudonga lwesisele endandikuso. Enye indoda eyayikwisisele esikufutshane nesam yandibuza ukuba ndingubani.” UArben wayishumayeza kangangeeveki ezininzi. Ekuhambeni kwexesha lathi cwaka elo lizwi.

Emva kokuba uArben ekhululwe entolongweni, kwafika omnye umfana emzini wakhe. Nangona wayengamazi ebusweni, kodwa ilizwi lakhe wayeliqhelile—yayiyilaa ndoda yayikwisisele esikufuphi nesakhe.

Iphethe isixhobo sokwandisa isandi (amplifier), yathi: “Ndize kukunika esi sixhobo.”

Yathi: “Ndasiba kwiHolo yoBukumkani ngexesha letrazira.” Kodwa ndachukunyiswa yinto owandixelela yona ngoxa ndandisentolongweni. Ndisibuyisela kuwe kuba ndifuna ukuba nesazela esicocekileyo phambi koThixo.”

UArben wakhumbula amazwi okugqibela awathethwa nguNasho Dori kwiqela labagcini bengqibelelo abaselula esithi: “Oku kuya kuphumela ekungcwalisweni kwegama likaYehova.”

UKUNYAMEKELA IZIMVU ZIKAYEHOVA

Ukumka kwabadala abaphuma kwamanye amazwe kwabangela ukuba inkoliso yamabandla kunye namaqela amakhulu anyanyekelwe zizicaka zolungiselelo ezineminyaka eli-19 nengama-20 ubudala. Ngenye imini, abazalwana abathathu kwaba baselula babeka ubomi babo esichengeni ngokuya eTiranë besuka eVlorë. Ixhalabele ukunqongophala kokutya, iKomiti Yelizwe yabuza aba bazalwana enoba kwakungekho zinto ziphathekayo bazifuna ngokukhethekileyo kusini na.

Omnye umfana waphendula esithi: “Siphelelwe ziifomu zengxelo yenkonzo yasentsimini.” Ngokufanayo nabanye ababesele bekhulile yaye bethembekile ababephila kwiminyaka edluleyo, babexhalabele kakhulu izinto zokomoya kuneziphathekayo. Bandula ke bachaza ukuba abantu abaninzi babesabela kakuhle kwiindaba ezilungileyo ngenxa yoloyiko nokungaqiniseki ngezinto eziza kwenzeka.

Kungekudala emva kweSikhumbuzo kwafowuna mntu uthile eofisini. Omnye udade wathi: “Siliqela loodadewenu abaseKukës, yaye besisoloko siziqhubela iintlanganiso ukususela oko sashiywa ngoovulindlela.”

Ngenxa yesiphithiphithi esasikwelo abazalwana baseTiranë babengasakwazi ukuqhagamshelana nabazalwana abaseKukës. Sekunjalo, eli qela labavakalisi abasixhenxe abangabhaptizwanga laqhubela iSikhumbuzo kwiindawo ezimbini. Nangona lalixhalabele ukuba alizukusiqhuba ngendlela efanelekileyo iSikhumbuzo, lakuvuyela ukunikel’ ingxelo yokuba abantu ababekwezi ndawo zimbini babeli-19 xa bedibene. Okumangalisayo kukuba, nangona abantu babemiselwe ixesha lokungahambi esitratweni yaye kukho ezinye iimeko ezinzima ngowe-1997, kwakukho abantu abangama-3 154 ababeze eSikhumbuzweni kuyo yonke iAlbania. Phezu kwaso nje isiphithiphithi esasikwelo, abavakalisi baqhubeka beshumayela, bethuthuzela abantu, bekwenza oko ngobulumko.

Xa iKomiti Yelizwe yevayo ukuba abazalwana baseGjirokastër badinga ukutya neencwadi, yaxubusha ngendlela ekhuselekileyo yokuthumela ilori enezo zinto. Kodwa loo ngxubusho yaphazanyiswa ngomnye udade owathi kukho umsasazi weendaba onenkcazelo engaba luncedo oze kubona abo bazalwana.

Engazi ukuba le komiti ithetha ngantoni, lo msasazi wacebisa oku: “Kuyo yonke into eniyenzayo, ningayi ngasemazantsi ngomso. Sifumene iingxelo zokuba kucetywa ukwenziwa into eyingozi eTepelenë.” Ekubeni ilori eya eGjirokastër kwakuza kufuneka idlule eTepelenë, abazalwana bagqiba kwelokuba ingabi saya.

Ngosuku olulandelayo, emva nje kwentsimbi ye-11, iindaba zanikela ingxelo yokuba bekukho izixholoxholo ezimanyumnyezi eTepelenë yaye ibhulorho yeso sixeko iqhushumbisiwe. Abazalwana bambulela kakhulu uYehova ngokubakhusela ukuba bangayi apho ngobo busuku.

Kangangeeveki intsapho yaseBheteli yayingxolelwa zizithonga zemipu ubusuku bonke, yaye ngoxa iqhuba itekisi yosuku kwakukhala oombayimbayi neziqhushumbisi ngaphandle. Kwakusuka nje kudutyulwe emoyeni, yaye abantu babesoloko besesichengeni sokuchanwa ziimbumbulu ezidlulayo. Ukuze ikhuseleke, intsapho yaseBheteli yahlala ngaphakathi, yaye abaguquleli babehlala bhaxa phantsi kude ezifestileni ngoxa beqhubeka nomsebenzi wabo.

NgoAprili 1997, kwafika umkhosi wamajoni angama-7 000 weUnited Nations uze kuzinzisa elo lizwe. NgoAgasti imikhosi yeUN yayisele imkile eAlbania, ngoko abazalwana bakwazi ukulungiselela indibano yesithili. Abavakalisi bavuya gqitha; kuba kangangeminyaka babehlanganisana njengamaqela amancinane kuphela.

Abaphangi abaxhobileyo bamisa ezinye zeebhasi ezazisiya endibanweni. Kodwa bathi bakufumanisa ukuba abantu abakhwele kuzo ngamaNgqina kaYehova, bathi: “Nina nahlukile kwabanye abantu! Asizi kunenzakalisa.”

Itrazira yawuchaphazela njani umsebenzi wokushumayela eAlbania? Kunokuba kungabikho lwando, iingozi namaxhala zabangela ukuba abantu abaninzi bazixhalabele ngakumbi iintswelo zabo zokomoya. Ngenxa yoko, kwiinyanga nje ezili-15, abavakalisi abatsha abangama-500 baqalisa inkonzo yasentsimini, nto leyo eyabangela ukuba kubekho abavakalisi abangaphezu kwe-1 500.

KUNIKELW’ INGQALELO EKOSOVO

Emva kwetrazira, zancipha izithonga zemipu, yaye amabandla akhula. Sekunjalo, kwavela iingxaki eKosovo. Imfazwe eyayiqhubeka apho yayichaphazela neAlbania, kuba iimbacu ezininzi zazigxalathelana ukunqumla imida. Abavakalisi baseAlbania abazange baphozise maseko ekudluliseleni isigidimi sethemba neencwadi ezithuthuzelayo kwezo mbacu. Kwakhona babenyamekela iqela leembacu ezingamaNgqina kaYehova angama-22 kunye nabantwana bawo abancinane.

Ekupheleni kwemfazwe ngoAgasti, abazalwana baseKosovo bagoduka, kodwa bengasahambi bodwa. Babephelekwa ngabazalwana baseAlbania nabaseItali, kuquka oovulindlela abakhethekileyo ababefuna ukunceda ngokomoya. Ngasekupheleni konyaka wenkonzo wowe-1999, kwakukho abavakalisi abali-1 805 eAlbania, nabangama-40 eKosovo.

ULWANDO LOKOMOYA

Ngaphambi kokuba afe, uNasho Dori wathi: “Ndivuyiswa kukuba sisenza umsebenzi omninzi wokuguqulela, kodwa eyona nto ifuneka ngakumbi yiNguqulelo Yehlabathi Elitsha—IBhayibhile esemgangathweni yokomeleza ukholo lwethu!” Kwiminyaka nje emithathu emva kokuba uNasho efile, ngowe-1999 iQumrhu Elilawulayo lakhupha imvume yokuba kuguqulelwe INguqulelo Yehlabathi Elitsha YeZibhalo ZamaKristu ZesiGrike ngesiAlbania.

Kwindibano yowama-2000 abantu baseAlbania bothuswa kukufumana into ababengayilindelanga—ukukhululwa kweNguqulelo Yehlabathi Elitsha YeZibhalo ZamaKristu ZesiGrike yesiAlbania. Iqela labaguquleli lazibhokoxa ekuyiguquleleni laza layigqiba kwisithuba nje esingaphantsi konyaka. Omnye uvulindlela othe ngxi owayesakuba liKomanisi nowayelilungu lepalamente wabhala: “Sakuvuyela gqitha ukufumana le nguqulelo. Emva kokuba ndiyifundile, ndatsho ndabona indlela emnandi ngayo iBhayibhile, ngenxa yemihobe, imibongo neengxelo zayo ezimnandi. Xa ndandifunda ngendlela uYesu awayeyenza ngayo imimangaliso nendlela awayegculelwa ngayo, ndachukumiseka ngendlela engathethekiyo. Ndandiba nomfanekiso-ngqondweni wengxelo nganye ebuhlungu endiyifundayo!”

Ngelo xesha kwakukho abavakalisi abangama-2 200 eAlbania yaye intsapho yaseBheteli yayisele inamalungu angama-40. Kwakukho amagumbi aqashiweyo, kodwa kwakusafuneka angakumbi. Ngenxa yoko, iQumrhu Elilawulayo lavuma ukuba kuthengwe isiqwenga somhlaba oziihektare ezintathu eMëzez ngasekupheleni kweTiranë. Ukuze konganyelwe umsebenzi wentsimi ekhulayo yaseAlbania naseKosovo, ngowama-2000 iKomiti Yelizwe yaba yiKomiti Yesebe.

NgoSeptemba 2003, xa kwakuqaliswa ukwakhiwa kwesebe elitsha, iAlbania yayinabavakalisi abangama-3 122. Kwangaxeshanye, wawusele uqaliwe umsebenzi wokuguqulelwa kweZibhalo ZesiHebhere ngesiAlbania. Yayingengomsebenzi wokushumayela kuphela owawuhambela phambili, kodwa nabavakalisi babesenza inkqubela encomekayo ngokomoya. Abaninzi kubafana abangama-20 ababekwiklasi yokuqala yeSikolo Sokuqeqesha Abalungiseleli eAlbania ngoAgasti 2004, babesekwishumi elivisayo xa babenyamekela amabandla ngexesha letrazira kwiminyaka embalwa ngaphambili. Ngoku babevuyiswa kukufumana uqeqesho olungakumbi kwizinto zokomoya.

‘UMTYHOLI WAYENOMSINDO’

Imixholo ephambili yamaphephandaba angoFebruwari 2005 yayisithi, “UYehova Ufundisa Abantu Ukuba Bazibulale!” Iindaba zikamabonwakude nezamaphephandaba zasasaza amarhe okuba intombazana ekwishumi elivisayo eyayizibulele yayiliNgqina likaYehova. Enyanisweni le ntombazana yayingazange ifundelwe okanye iye kwiintlanganiso. Sekunjalo, abachasi basebenzisa esi siganeko ukuze bahlasele amaNgqina kaYehova.

Ootitshala babegculela abantwana bamaNgqina. Abazalwana babegxothwa emsebenzini. Abantu babefuna umsebenzi wethu uvalwe. Nangona abazalwana babezama ukuqiqa namajelo eendaba, zaqhubeka zisanda iingxelo eziphosakeleyo.

Kwakucacile ukuba abakhonzi bakaYehova badinga ulwalathiso nenkxaso ukuze bakwazi ukujamelana naloo meko. Ngoko isebe lalungiselela intetho ekhethekileyo eyayibonisa ukubaluleka kokuba abazalwana baqhubeke beshumayela inyaniso ukuze kubhencwe obo buxoki. Bakhuthazwa ukuba baqiqe nabantu baze banganikezeli ngenxa yokuba besoyika abantu. Abantu abaneentliziyo ezinyanisekileyo babenokuqiqa nabo ngokubabonisa ukuba inani lamaNgqina kaYehova liye landa ngendlela emangalisayo kwiminyaka nje engephi, nto leyo ebingenakwenzeka ukuba ebezibulala. Oku kwakungeyonto intsha. Abazalwana bakhunjuzwa ngeengxelo zobuxoki zokuzibulala kukaSpiro Vruho kwiminyaka ye-1960. Baxelelwa ukuba nale ngxelo yayiza kusilela, ibe kwaba njalo!

NgoAgasti, kwiinyanga nje ezimbalwa emva koko, uDavid Splane olilungu leQumrhu Elilawulayo waba phakathi kwabantu baseAlbania nabaseKosovo abangama-4 675 ababekwindibano yesithili. Esi sihlwele zange sikwazi ukuzibamba xa uMzalwan’ uSplane wakhulula INguqulelo Yehlabathi Elitsha YeZibhalo Ezingcwele yesiAlbania.

Omnye umzalwana osele enexesha elide eliNgqina wathi: “Ndiyasibona ke ngoku isizathu sokuba uSathana asisokolise kangaka. Ebecatshukiswa kukubona ezi zinto zininzi kangaka zintle zenzeka kubantu bakaYehova.”

Phezu kwazo nje ezo ngxelo zimbi zamajelo osasazo, abakhonzi bakaThixo eAlbania baqhubeka besanda. Abayeni abaninzi ababengakholwa kunye nezalamane ezabonayo ukuba ezo ziingxelo zobuxoki, zaqalisa ukufunda iBhayibhile zaza zaba ngabavakalisi. Phezu kwalo nje olo hlaselo lubuhlungu kangako lukaSathana, ukuthanda kukaYehova kwaqhubeka kusenziwa. Intsapho yaseBheteli yafudukela kwizakhiwo ezitsha zesebe, kwaza kwaqhutywa iklasi yesibini yeSikolo Sokuqeqesha Abalungiseleli.

UKUNIKEZELWA KWESEBE

Phakathi kweendwendwe ezingama-350 ezazivela kumazwe angama-32 zize kunikezela izakhiwo ezitsha zesebe ngoJuni 2006, kwakukho amalungu amabini eQumrhu Elilawulayo, uTheodore Jaracz noGerrit Lösch. Omnye umntu owayelapho yayinguSotir Ceqi, owakha wangcungcuthekiswa ngeentambo zombane kwiminyaka ye-1940. Nakuba ngoku sele eneminyaka engaphaya kwama-70 ubudala, usakhonza uThixo ngovuyo.

UFrosina Xheka, osakhonza ngokuthembeka phezu kwako nje ukuphathwa kakubi kangangamashumi eminyaka, uthi: “Andizange khe ndicinge ukuba ndingaze ndiyibone le mini.” Apho kwakukho uPolikseni Komino, owayengumfazi kaJani owafayo, owabalisa ngentombi nangomzukulwana wakhe ababengoovulindlela abathe ngxi. Omnye umntu owayelapho nguVasil Gjoka, ngoku osele ekhokhoba emva kweminyaka yokubandezeleka. Zathi gwantyi iinyembezi njengoko wayebalisa ngokutyelela kwakhe uLeonidha Pope nangokubhaptizwa kwakhe ngokufihlakeleyo ngowe-1960.

Isakhiwo sesebe elidala elaliseTiranë senziwa iHolo yoBukumkani nekhaya labathunywa bevangeli abali-14. Ngenxa yeeklasi ezintandathu zeSikolo Sokuqeqesha Abalungiseleli, intsimi yaseAlbania iye yafumana oovulindlela abakhethekileyo abalulutho kuyo ngenxa yokuthembeka nokuzincama kwabo. Bangaphezu kwama-950 oovulindlela abathe ngxi nabakhethekileyo balapho ababonisa umoya ofanayo wokushumayela ivangeli.

IKAMVA

Abazalwana noodade baseAlbania bayixabisa kakhulu iBhayibhile noncwadi oluye lwaguqulelwa ngolwimi lwabo. Umsebenzi kaYehova kule ndawo usatyhalela phambili. Ukongezelela kumadoda azimiseleyo nafanelekayo aqeqeshelwa iimbopheleleko zokomoya, kukho ‘nabafazi abavakalisa iindaba ezilungileyo abangumkhosi omkhulu.’—INdu. 68:11.

AmaNgqina kaYehova aseAlbania akungqina kakuhle ukunyaniseka kwala mazwi: “Nasiphi na isixhobo esiya kuyilwa nxamnye nawe asiyi kuphumelela, nalo naluphi na ulwimi oluya kuphakama nxamnye nawe ekugwetyweni uya kulugwebela isohlwayo. Lilo elo ilifa labakhonzi bakaYehova, yaye ubulungisa babo buphuma kum.” (Isa. 54:17) Ngenxa yobubele obungasifanelanga bukaYehova namandla akhe, akwazi ukuma eqinile phantsi kolawulo lobuzwilakhe, ukungcungcuthekiswa, ukwenziwa ikheswa, ukunyeliswa ngamajelo eendaba kunye neengxaki zobuqu.

Abantu bakaYehova eAlbania bakhangele phambili kwikamva beqinisekile ngothando olunyanisekileyo neentsikelelo zikaThixo. Phezu kwazo nje iingxaki abajamelene nazo, bavuyiswa lilungelo lokuyenza ibe nemihlali intliziyo kaYise osezulwini nalithemba elibekwe phambi kwabo. (IMize. 27:11; Heb. 12:1, 2) Kukho into enye eye yangqineka ichanile kangangezihlandlo ezininzi kwimbali yaseAlbania: UYehova akasoze abalibale abakhonzi bakhe abanyanisekileyo, abancinane nabakhulileyo, abazincama kwizinto ezincinane nezinkulu.—Heb. 6:10; 13:16.

[Amagama acatshulweyo akwiphepha 130]

Ekuqaleni umxholo wawuguqulelwe ngokuthi Isiginkci SikaThixo

[Amagama acatshulweyo akwiphepha 140]

“Ukuba ubungumKristu, nawe ubuza kulwa njengabanye abefundisi.”

[Amagama acatshulweyo akwiphepha 189]

Siphelelwe ziifomu zengxelo yenkonzo yasentsimini

[Ibhokisi/Umfanekiso okwiphepha 132]

Iinkcukacha NgeAlbania

Ukuma komhlaba

IAlbania ikumzantsi-mpuma weYurophu, kumantla eGrisi nakwimpuma yesithende selizwe laseItali elimile njengebhuti. Igubungela ummandla ozizikwekhilomitha ezingama-28 750, nonxweme oluziikhilomitha ezingama-362 olunabela kulwandle lweAdriatic nolwaseIonia. Inamanxweme anesanti emhlophe namanzi aluhlaza ahonjiswe ziintaba ezinde ezithe gqi emva kwawo, ukusuka eVlorë ukuya kutsho eSarandë. Kumantla nakumbindi weli lizwe kuthe rhwelele iintaba, ngoxa umzantsi-ntshona unamathafa anomhlaba otyebileyo ekulinywa kuwo.

Abantu balapha

Kuqikelelwa ukuba kukho abemi abazizi-3 600-000 yaye inkoliso yabo ziinzalelwane zalapha, neqaqobana labantu baseRoma, abaseGrisi nabaseSerbia.

Imozulu

Kumathafa akunxweme olusemazantsi elo, ehlotyeni iqondo lobushushu lifikelela kuma-26 ngokukaCelsius. Kanti kwiintaba ezisemantla eDibër ebusika amaqondo obushushu ayesihla abe ngaphantsi kweqondo lobushushu ngama-25 ngokukaCelsius.

Ukutya kwabo

Ipayi ehlohlwe isipinatshi, itshizi, iitumato netswele okanye ezinye iintlobo zemifuno okanye inyama ebizwa ngokuba yibyrek. Inkuku okanye inyama yegusha ebhakwe ngesosi yeyogurt nedile ibizwa ngokuba yitava e kosit. Abantu baseAlbania bayathanda ukutya ngecephe, ekubeni eyona nto ixhaphakileyo iyisuphu nesityu. Ngezihlandlo ezikhethekileyo xa kutyiwa inyama yegusha, undwendwe olubalulekileyo ludla ngokunikwa intloko. Phakathi kwezimuncumuncu ezityiwayo eAlbania yibaklava (esekunene) nekadaif, enesonka esigalelwe ubusi namandongomane ngaphezulu. Okona kutya kutyiwa kakhulu sisonka. Ukuba ufuna ukuxelela umntu ukuba utyile, uthi, “Hëngra bukë,” nto leyo ethetha ukuthi “nditye isonka.”

[Ibhokisi/Imifanekiso ekwiphepha 134]

Iindibano Zokuqala

Ngaphandle kweeNtlanganiso zesiAlbania ezaziqhutywa ngeeCawa, abantu baseAlbania ababehlala eNew England, eUnited States, babedla ngokuya kumabandla esiNgesi okanye esiGrike. Kwiminyaka ye-1920 neye-1930, abantu baseAlbania babesiya kwiindibano zesiGrike. Sekunjalo, babekuvuyela ukuba neebheji zolwimi lwabo ezazisithi: “Indibano Yeentsuku Ezintathu Yabafundi BeBhayibhile BaseAlbania”!

[Imifanekiso]

Ibheji (ngasekunene) eyayinxitywe ngabazalwana baseAlbania (ngezantsi) kwindibano eyayiseBoston ekupheleni kweye-1920

[Ibhokisi/Imifanekiso ekwiphepha 151, 152]

“UYehova Akazange Asishiye!”

UFROSINA XHEKA

WAZALWA Ngowe-1926

WABHAPTIZWA Ngowe-1946

INGXELO YOBOMI Wafumana inyaniso xa wayekwiminyaka yeshumi elivisayo. Nangona abazali bakhe babemchasa, babe nabasemagunyeni bemenze ikheswa, wayesoloko eziva esondele kuYehova nakwintlangano yakhe. Wafa ethembekile ngowama-2007.

◼ UFROSINA wafunda inyaniso kubantakwabo ngeminyaka ye-1940. Abazali bakhe ababengengomaNgqina bamgxotha kowabo kuba wayengafuni ukutshata nomntu abamfunele yena. Umzalwan’ uGole Flloko wamthabatha waza wamphatha njengentombi yakhe.

UFrosina uthi: “Ngenye imini ndabanjwa kuba ndandingafuni ukuvota. Ndarhangqwa ngamagosa angama-30 kwelinye igumbi. Likhwaza elinye lathi, ‘Uyayazi into esinokuyenza kuwe?’ Ndavakalelwa ngathi uYehova unam ndaza ndathi, ‘Akukho kwanto eninokundenza yona ngaphandle kokuba yiNkosi enguMongami uYehova enivumelayo!’ Acinga ukuba ndiyaphambana aza athi, ‘Phum’ uphel’ apha!’ Kwathi kanti ndinyanisile. UYehova wayenam!”

Ngowe-1957, uFrosina watshata noLuçi Xheka, yaye ethubeni baba nabantwana abathathu. Ekuqaleni kweminyaka ye-1960, uLuçi waba lilungu leKomiti Yelizwe eyayisandul’ ukusekwa, ukuze yongamele umsebenzi wokushumayela eAlbania. Kungekudala wagwetywa iminyaka emihlanu kwi-internim (eluvalelweni) eGramsh, kude lee kuFrosina nabantwana. Apho uLuçi waqhubeka eshumayela yaye ethetha ngentlangano. Akakaphumi ezingqondweni zabantu baseGramsh unanamhla.

Ngoxa uLuçi wayekwi-internim, amaKomanisi alingcolisa igama likaFrosina, ngoko wayengakwazi ukuthenga ukutya. UFrosina uthi: “Ayizange indikhathaze loo nto. Abazalwana babendipha loo nto banayo. Saqhubeka siphila kuba uYehova akazange asishiye!”

Emva kokuba uLuçi efile, abazalwana babehlanganisana manqaphanqapha. Sekunjalo, uFrosina akazange ayeke ukushumayela. Uthi: “Ngeye-1960 satyelelwa nguJohn Marks. Ekudibaneni kwam nomfazi wakhe uHelen ngowe-1986 yaba ngathi kudala sisazana! SinoLuçi sasithumela imiyalezo ngokufihlakeleyo kuMarks, aze ayidlulisele kubazalwana baseBrooklyn.”

Xa kwavulwa umsebenzi ngowe-1992, uFrosina wayengomnye wamaNgqina asithoba abhaptiziweyo aseleyo eAlbania. Wayesibakho rhoqo kwiintlanganiso yaye nangomhla awafa ngawo ngowama-2007 wayesentsimini. Ngaphambi nje kokuba afe, wathi: “UYehova ndimthanda ngentliziyo yam yonke! Andizange khe ndicinge ngokulalanisa. Ndandisazi ukuba ndinentsapho enkulu ehlabathini, kodwa ngoku andikwazi nokuyichaza indlela endivuya ngayo xa ndibona indlela enkulu ngayo intsapho ehlonela uThixo eAlbania. UYehova wayesoloko enathi, yaye usasibambe ngesandla sakhe esinothando nangoku!”

[Umfanekiso]

UFrosina Xheka ngowama-2007

[Ibhokisi/Imifanekiso ekwiphepha 159, 160]

Sasikade Sineencwadi Ezimbalwa Ngoku Sinentabalala

UVASIL GJOKA

WAZALWA Ngowe-1930

WABHAPTIZWA Ngowe-1960

INGXELO YOBOMI Wayimela ngokuqinileyo inyaniso phezu kwalo nje ulawulo lobuzwilakhe. Namhlanje ungumdala eTiranë.

◼ NDIKHUMBULA ndibona IMboniselo yesiGrike kwilali yam yaseBarmash kwiminyaka ye-1930. Esalatha elo phephancwadi uTata wathi, “Yinyaniso le ithethwa apha!” Ndandingayiqondi loo nto wayeyithetha de kwayiminyaka ethile kamva. Ndandikuthanda ukufunda iBhayibhile, nangona kwakuyingozi ukuba nayo. Xa sasingcwaba umkhwe womntakwethu, ndadibana nomnye umzalwana ovela eTiranë. Ndambuza ngomqondiso ‘wemihla yokugqibela’ okuMateyu isahluko 24. Wandicacisela, ndaza andalibazisa ndaxelela wonk’ umntu ngoko ndikuvileyo.

Ngowe-1959, ndaya kuhlanganisana nabazalwana kwikhaya likaLeonidha Pope. Ndandifunda incwadi yeSityhilelo ndaza ndafuna ukwazi ngerhamncwa kunye neBhabhiloni Enkulu ekuthethwa ngayo. Emva kokuba bendicacisele, ndaqonda ukuba le yinyaniso! Emva konyaka ndabhaptizwa.

Ndandishumayela ngenzondelelo, yaye ngenxa yoko, ndagxothwa emsebenzini. Ngoko ndafumana inqwelo endala eyenziwe ngomthi ndaza ndathutha ngayo izinto ndizisa eTiranë. Ngoxa kwakunzima ukudibana nabazalwana yaye ndingenazo iincwadi, andizange ndiyeke ukushumayela.

Ekuqaleni kweminyaka ye-1960, ngaphambi kokuba uLeonidha Pope athunyelwe einternim, wandinika iimpapasho zesiGrike ezazingeniswe ngokufihlakeleyo eAlbania. Wayeguqulela ngomlomo, ndize ndiyibhale phantsi loo nto ayithethayo. Emva koko wayendithuma ukuba ndenze iikopi ndize ndizithumele kwiqaqobana labazalwana abaseBerat, eFier naseVlorë.

Zininzi ngokwenene iinguqu ezenzekayo ukususela ngeminyaka ye-1990. Ndiyakuvuyela ukubona intabalala yeencwadi esizinikwe nguYehova. Ukususela ngowe-1992 ukuza kuthi ga ngoku, siye sahambisa amaphephancwadi esiAlbania angaphezu kwezigidi ezili-17. Iimpapasho ezintsha ziguqulelwa ngesiAlbania, yaye sineNguqulelo Yehlabathi Elitsha epheleleyo ngolwimi lwethu. Andikwazi ukuzibamba iinyembezi zovuyo xa ndicinga ngeminyaka esasingenazo iincwadi. Ukuba neencwadi ezimbalwa kangangexesha elide kuye kwasenza sanoxabiso olukhulu.

[Ibhokisi/Imifanekiso ekwiphepha 163, 164]

Ndafumana Umsebenzi Wokwenene Ndakubuyela Ekhaya

UARDIAN TUTRA

WAZALWA Ngowe-1969

WABHAPTIZWA Ngowe-1992

INGXELO YOBOMI Wafunda inyaniso eItali waza wabuyela eAlbania. Ulilungu leKomiti Yesebe LaseAlbania.

◼ IALBANIA sayinikel’ umva namanye amawaka eembacu ngowe-1991 xa ndandineminyaka engama-21 ubudala. Saqweqwedisa inqanawa eyayisiya eItali. Ubomi babunzima eAlbania, ngoko ndavuya gqitha ukuphuncuka kwam kwelo. Ndavakalelwa kukuba azalisekile amaphupha am.

Emva kweentsuku ezimbini sifikile eBrindisi, eItali, ndathubeleza kwinkampu yeembacu ndaya kufuna umsebenzi. Enye indoda yandinika isigidimi seBhayibhile esasikwikopi encinane esibhalwe ngesiAlbania yaza yandimemela kwintlanganiso eyayiza kuba semva kwaloo mini. Ndakhawuleza ndazixelela oku: ‘Nali ithuba. Mhlawumbi kukho umntu oza kundiqasha apho.’

Andizange ndiyicinge into yokuba ndiza kwamkelwa ngezandla ezishushu ngolo hlobo. Emva kwaloo ntlanganiso eyayikwiHolo YoBukumkani, wonke umntu weza kundibulisa ngobubele. Enye intsapho yandimemela kwisidlo. Yandiphatha ngobubele nesidima ngoxa ndandiyimbacu nje engekho mthethweni ephuma eAlbania.

Kwintlanganiso elandelayo uVito Mastrorosa wacela ukundiqhubela isifundo seBhayibhile. Ndasamkela yaye kungekudala ndaqonda ukuba le yinyaniso. Ndabhaptizwa ngoAgasti 1992, eItali.

Ndada ndazifumana iincwadi ezisemthethweni zokuba kwelo. Ndafumana umsebenzi ohlawula kakuhle ndaza ndakwazi ukuthumela imali ekhaya. Kodwa kwathi qatha oku: ‘Ekubeni ngoku umsebenzi uvuliwe, kukho imfuneko enkulu yabavakalisi eAlbania. Ngaba ndimele ndigoduke ukuze ndiye kukhonza apho? Baza kuthini ekhaya? Bayayifuna le mali ndibathumelela yona. Baza kuthini bona abantu?’

Kusenjalo ndafowunelwa yiofisi eseTiranë, bendicela ukuba ndiye apho ukuze ndifundise isiAlbania iqela loovulindlela abakhethekileyo baseItali ababesiya eAlbania ngoNovemba. Umzekelo wabo omhle wandenza ndacinga nzulu. Babesiya kushumayela kuloo ntsimi ndandiyishiyile. Babengalwazi ulwimi oluthethwa apho ukanti babekhangele phambili. Mna ndandilwazi olo lwimi kuba ndandikhulele apho. Kwakungekho nto ndiyifuna eItali.

Ndasamkela eso sicelo ndaza ndangena enqanaweni ndahamba nabo. Ukufika nje kwam, ndakhonza kwiBheteli eyayincinane. Kusasa ndandifundisa isiAlbania ndize ndisebenze nabaguquleli emva kwemini. Ekuqaleni, ayizange ihle kamnandi le nto ekhaya. Kodwa bathi bakusiqonda isizathu sokuba ndibuyele eAlbania baziphulaphula iindaba ezilungileyo. Kungekudala, abazali bam, oodadewethu ababini nomkhuluwa wam babhaptizwa.

Ngaba ndiyazisola ngokuncama umsebenzi nemali eItali? Nakanye! Ndafumana umsebenzi wokwenene eAlbania. Kum, owona msebenzi ubalulekileyo nobangela uvuyo olungapheliyo kukukhonza uYehova ngako konke onako.

[Umfanekiso]

UArdian nomfazi wakhe, uNoadia

[Ibhokisi/Imifanekiso ekwiphepha 173, 174]

Ukuphela Kweentlanganiso Zasekhusini

UADRIANA MAHMUTAJ

WAZALWA Ngowe-1971

WABHAPTIZWA Ngowe-1993

INGXELO YOBOMI Wamenyelwa kwintlanganiso eyayiqhutyelwa ekhusini, kwaza oko kwabutshintsha ngendlela emangalisayo ubomi bakhe. Ngoku unguvulindlela okhethekileyo.

◼ XA KWAFA umzala wam ngowe-1991, ndeva elinye ibhinqa elinguBarie likhuthaza udadobawo ngeBhayibhile. Kanye ngelo xesha ndalibuza imibuzo laza landicela ukuba ndiye kudibana nomhlobo walo uRajmonda kwindawo asebenza kuyo. Intsapho yakuloRajmonda yayihlanganisana ‘eklasini.’ URajmonda wandixelela ukuba ndifanele ndifundiswe iBhayibhile kangangexesha elithile, kuba abantu abasebatsha enyanisweni babengavunyelwa ukuba bangene kwangoko kuloo klasi. Ndakuthanda gqitha oko ndandikufunda, yaye akuzange kube kudala ndavunyelwa ukuba ndiye eklasini.

Loo klasi yayinabantu abangabhaptizwanga abaqala badibana noSotir Papa noSulo Hasani. Kwiminyaka engaphambili, kwakha kwanyebelezela amalungu eSigurimi angena kwezo klasi aza abambisa abazalwana. Ngenxa yoko babehlala belumkile, bengamemi nabani na kwiintlanganiso.

Kwintlanganiso yam yokuqala, ndafumanisa ukuba ndandimele ndibhale phantsi uluhlu lwabahlobo bam ndize ndibaxelele oko ndikufundayo. Ngoko nangoko ndancokolela uIlma Tani. Kungekudala naye wavunyelwa ukuba eze eklasini. Loo klasi yethu incinane yayinabantu abali-15 yakhula ngokukhawuleza.

NgoAprili 1992, uMichael noLinda DiGregorio batyelela eBerat. Kwacetyiswa ukuba simeme bonke abantu kwintetho yakhe. Ngenxa yoko kweza abantu abangama-54. Kwakungekho namnye kuthi owayebhaptiziwe. Emva kwaloo ntlanganiso, sabapheka sibophula ngemibuzo abakwaDiGregorio kangangeeyure. Sade sayiqonda indlela iqela lethu elalimele liziqhube ngayo iintlanganiso.

Kungekudala amaNgqina kaYehova amiselwa ngokusemthethweni kwelo. Mna, uIlma nabanye abazalwana ababini saya kufunda indlela yokushumayela kwindlu ngendlu eTiranë. Sacelwa ukuba sibonise abazalwana baseBerat oko sikufundileyo. Senza konke okusemandleni ethu. Xa kwafika oovulindlela abakhethekileyo abane baseItali eBerat ngoMatshi 1993, ibandla lalapho lenza inkqubela engathethekiyo, kwaza kwaqhutywa iintlanganiso ezimbini ngeveki.

NgoMatshi waloo nyaka, sinoIlma sabhaptizwa kwindibano ekhethekileyo yosuku olunye yokuqala eTiranë. Kuyo kwakuze abantu abangama-585. Saba ngoovulindlela abathe ngxi saza ngokukhawuleza sacelwa ukuba sibe ngoovulindlela abakhethekileyo bokuqala balapho. Kwakungasekho nto yenziwa ekhusini. Sathunyelwa eKorçë.

Kamva uIlma watshata noArben Lubonja, owayeshumayela yedwa eKorçë kwiinyanga ezimbalwa ngaphambi koko. Kamva baba ngabaveleli besiphaluka, yaye ngoku bakhonza eBheteli. Indivuyisa gqitha into yokuba ndamemela uIlma kuloo klasi.

Kutshanje, xa ndandihleli kwindibano yesithili nabanye abantu abangama-5 500 ababelapho, kwathi qatha loo klasi yasekhusini. Olunjani utshintsho olwenziwe nguYehova! Ngoku abantu bakhululekile ukuya kwiintlanganiso neendibano. Nakuba kukho amakhulu abazalwana aye ayishiya iBerat ngenxa yemeko yezoqoqosho, loo klasi yethu incinane iye yakhula yaba ngamabandla amahlanu aqhuba kakuhle!

[Umfanekiso]

Ilma (Tani) and Arben Lubonja

[Ibhokisi/Umfanekiso okwiphepha 183]

“Kulungile, Singahamba!”

UALTIN HOXHA NOADRIAN SHKËMBI

BAZALWA Ngowe-1973

BABHAPTIZWA Ngowe-1993

INGXELO YOBOMI Baphuma phakathi eyunivesithi baya kuba ngoovulindlela, ngoku ngabadala bebandla.

◼ EBUTSHENI bowe-1993 babefunda kwiyunivesithi yaseTiranë. Omnye umhlobo wabo wachitha iiyure ebancokolela ngezinto awayezifundiswa ngamaNgqina kaYehova. Yonke into ethethwayo yayisekelwa eBhayibhileni. Kamva bafunda izinto ezininzi, baza bazenza, yaye babhaptizwa kwangaloo nyaka. Kwihlobo laloo nyaka, baya kushumayela eKuçovë, indawo eyayingenabavakalisi.

Emva kokubuyela kwabo eTiranë, uAdrian wathi kuAltin: “Yintoni esisayihlalele esikolweni? Masiye kushumayela eKuçovë!”

UAltin wathi, “Kulungile, singahamba!” Emva kweenyanga ezisixhenxe bebhaptiziwe, babuyela eKuçovë.

UYehova wabasikelela gqitha ngemigudu yabo. Namhlanje kukho abavakalisi abakhutheleyo abangaphezu kwama-90 eKuçovë. Kukho amaNgqina amalunga nama-25 aye aphuma apho aya kuba ngoovulindlela abakhethekileyo okanye aya kukhonza eBheteli. Abaninzi kuwo baqhutyelwa isifundo nguAdrian noAltin.

Xa ecinga ngeyunivesithi, uAltin uye ancume athi: “Umpostile uPawulos wazishiya ngasemva izinto zehlabathi, ibe yiloo nto nam endayenzayo ngowe-1993. Andizisoli nakancinane ngamazwi endawathethayo ndisithi, ‘Kulungile, singahamba!’”

[Ibhokisi/Imifanekiso ekwiphepha 191, 192]

Owayesakufundisa Abantu Ukuba Bangakholelwa KuThixo, Ngoku Ubafundisa Inyaniso

UANASTAS RUVINA

WAZALWA Ngowe-1942

WABHAPTIZWA Ngowe-1997

INGXELO YOBOMI Wayefundisa abantu basemkhosini abasebenza phantsi kwakhe ukuba bangakholelwa kuThixo ngaphambi kokuba afundiswe inyaniso ngabantwana bakhe. Namhlanje ungumdala novulindlela okhethekileyo.

◼ NGOWE-1971, emva kokuthweswa isidanga sasemkhosini, ndaba ngumkomishinala wecandelo elithile lezopolitiko. Ndandibizwa njalo kuba ngowe-1966 urhulumente wayiphelisa into yokubakho kwabaphathi emkhosini. Omnye wemisebenzi yam yayikukufundisa abo baphantsi kwam ukuba akukho Thixo. Ndatyhalela phambili nemfundiso yokuba unqulo luyabakhobokisa abantu.

Ndandinomfazi nabantwana abathathu. Ngowe-1992 unyana wam uArtan waqalisa ukuya kwiintlanganiso zamaNgqina kaYehova eTiranë. Emva koko wahamba nodadewabo uAnila. Oko ndakujonga njengokudlala ngexesha nobudenge yaye kwabangela ukuba sihlale siphikisana ekhaya.

Ngenxa yokufuna ukwazi, ngenye imini ndathabatha IMboniselo ndayifunda. Nakuba kwakungekho nto ndiyilindeleyo kuyo, ndayifumana isengqiqweni. Ngoxa uArtan noAnila babesoloko bendikhuthaza, kodwa ndandingafuni ukufunda iBhayibhile. Ndandisithi umntu ongakholelwayo kuThixo akanakufunda iBhayibhile. Ngowe-1995 kwakhululwa incwadi ethi Life—How Did It Get Here? By Evolution or by Creation? ngesiAlbania. UArtan noAnila bandiphathela eyam. Yiloo ncwadi eyandinceda ndatshintsha. UThixo ukhona! Ndandingasenasebe lakusithela; kwanyanzeleka ukuba ndifunde iBhayibhile. Zange kube kudala nomfazi wam, uLirie, wayifunda, saza seyiseka ukuba le yinyaniso.

Xa ndithetha inyaniso, kwathabatha ixesha ngaphambi kokuba ndenze inkqubela. Ndandineminyaka engama-53 ubudala. Kwakungelula ukushiya iingcamango endandinazo zezopolitiko nezasemkhosini. Ndimele ndivume ukuba nguYehova uMdali owandincedayo ukuba ndenze inkqubela.

Ndandingafuni ukuba ngumvakalisi kuba ndandinexhala lokushumayela kanye kwabo bantu ndandibafundisa ukuba akukho Thixo. Babeza kuthini? Ngenye imini kwisifundo seBhayibhile, uVito Mastrorosa wandifundela ingxelo kaSawule waseTarso. Yalikhupha ixhala endandinalo! USawule wawatshutshisa amaKristu, wafunda inyaniso, emva koko washumayela. Ndandisazi ukuba uYehova angandinceda ndenjenjalo nam.

Maxa wambi ndiye ndizihleke izinto endizenzayo njengoko uYehova endinceda ndiyeke ukuba ngqongqo, ndibonise ingqiqo ndize ndiyeke ukuthanda ukuyalela. Ndiya ndiphucula!

Andisaphikisani nabantwana bam ngenyaniso. Ngokwahlukileyo, ndiyazidla ngabo. Ngoku uArtan nguvulindlela okhethekileyo nomdala. Iintombi zam, uAnila noEliona, zikhonza kwiBheteli yaseTiranë.

Mna noLirie singoovulindlela abakhethekileyo. Sinelungelo lokufundisa abantu inyaniso ngoMdali Ozukileyo nelokubabona betshintsha ubomi babo. Olunjani uvuyo lokunceda abantu bafumane ithemba lokwenene elisekelwe kwizithembiso zikaYehova, okuphela koThixo ophilayo noyinyaniso!

[Umfanekiso]

Ukusuka ekhohlo ukuya ekunene: uArtan, uAnila, uLirie, uAnastas, uEliona nomyeni wakhe, uRinaldo Galli

[Isicangca/Igrafu ekwiphepha 176, 177]

ULUHLU LWEZIGANEKO​—EAlbania

Ngowe-1920-1922 Abemi baseAlbania bafunda inyaniso eUnited States.

Ngowe-1922 UThanas Idrizi ubuyela eGjirokastër sele esazi inyaniso.

Ngowe-1925 EAlbania kuqhutywa iiklasi ezintathu ezincinane esifundo seBhayibhile.

Ngowe-1928 I-“Photo-Drama of Creation” iboniswa kwizixeko ezininzi.

1930

Ngowe-1935-1936 Kwenziwa iphulo elikhulu lokushumayela.

Ngowe-1939 AmaNgqina kaYehova avalwa umlomo.

1940

Ngowe-1940 Abazalwana abasithoba babanjelwa ukungathabath’ icala.

Ngowe-1946 Urhulumente wamaKomanisi ungena ezintanjeni.

1950

1960

Ngowe-1960 IKomiti Yelizwe iqalisa ukongamela umsebenzi eAlbania.

Ngowe-1962 Amalungu ekomiti avalelwa kwiinkampu ekusetyenzwa nzima kuzo.

Ngowe-1967 IAlbania ibhengezwa njengelizwe elingakholelwayo kuThixo.

1980

1990

Ngowe-1992 AmaNgqina kaYehova amiselwa ngokusemthethweni.

Ngowe-1996 UMilton Henschel kwisihlandlo sokuqala sokunikezelwa kweBheteli.

Ngowe-1997 Kuqalisa itrazira.

2000

Ngowama-2005 Kukhululwa INguqulelo Yehlabathi Elitsha epheleleyo yesiAlbania.

Ngowama-2006 Kunikezelwa iofisi yesebe eMëzez, eTiranë.

2010

[Igrafu]

(Yiya kwimpapasho)

Inani Labavakalisi

Inani Loovulindlela

4,000

3,000

2,000

1,000

1930 1940 1950 1960 1980 1990 2000 2010

[Iimaphu ezikwiphepha 133]

(Ukuba ufuna inkcazelo ehlahlelwe kakuhle, yiya kwimpapasho)

MONTENEGRO

KOSOVO

MACEDONIA

GREECE

Lake Scutari

Lake Ohrid

Lake Prespa

ADRIATIC SEA

TIRANË

Shkodër

Kukës

Burrel

Mëzez

Durrës

Kavajë

Gramsh

Kuçovë

Fier

Berat

Korçë

Vlorë

Tepelenë

Këlcyrë

Barmash

Përmet

Gjirokastër

Sarandë

[Umfanekiso ozalise iphepha, kwiphepha 126]

[Umfanekiso okwiphepha 128]

Emva kokuba efunde inyaniso eNew England, eUnited States, uThanas Idrizi wazisa iindaba ezilungileyo eGjirokastër, eAlbania

[Umfanekiso okwiphepha 129]

USokrat Duli wafundisa umntakwabo inyaniso

[Umfanekiso okwiphepha 137]

UNicholas Christo washumayela iindaba ezilungileyo kwizikhakhamela zaseAlbania

[Umfanekiso okwiphepha 142]

Ileta enamaphepha amabini eyabhalelwa uEnver Hoxha ngabazalwana baseAlbania ababeseBoston

[Umfanekiso okwiphepha 145]

ULeonidha Pope

[Umfanekiso okwiphepha 147]

“UYehova undifundise ukuba ndingatyobeli nantoni na endingayithethanga.”—USotir Ceqi

[Umfanekiso okwiphepha 149]

UHelen noJohn Marks ngaphambi kokuba uJohn abuyele eAlbania

[Umfanekiso okwiphepha 154]

USpiro Vruho wayengumveleli wesiphaluka

[Umfanekiso okwiphepha 157]

ULlopi Bllani

[Umfanekiso okwiphepha 158]

Nangona wayeyedwa, uKulla Gjidhari wasenza iSikhumbuzo

[Umfanekiso okwiphepha 167]

Michael noLinda DiGregorio

[Umfanekiso okwiphepha 172]

UXwebhu No. 100 lwawamisela ngokusemthethweni amaNgqina kaYehova

[Umfanekiso okwiphepha 175]

Intlanganiso yebandla kwiHolo yoBukumkani yokuqala eTiranë

[Umfanekiso okwiphepha 178]

UAreti Pina washumayela yedwa ngokuthembeka

[Imifanekiso ekwiphepha 184]

Indlu enkulu endala yenziwa iiofisi zezi mini

[Umfanekiso okwiphepha 186]

“Ukuba banisa entolongweni ningabi naxhala.”​—Nasho Dori

[Imifanekiso ekwiphepha 194]

UDavid Splane ekhulula “INguqulelo Yehlabathi Elitsha” epheleleyo yesiAlbanian

[Umfanekiso okwiphepha 197]

Abathunywa bevangeli abakhonza eAlbania ngoku sithethayo

[Imifanekiso ekwiphepha 199]

Isebe LaseAlbania

Ikomiti Yesebe: UArtan Duka, uArdian Tutra, uMichael DiGregorio, uDavide Appignanesi noStefano Anatrelli