Ileta Evela KwiQumrhu Elilawulayo
MaNgqina KaYehova Athandekayo:
Hayi indlela achulumancisa ngayo la maxesha siphila kuwo! Olunjani uvuyo esinalo! Kusivuyisa ngokwenene ukusebenza nani bazalwana noodade—ngokungathi kunjalo “ngaxhatha linye”—ekunikeleni obona bungqina bubalaseleyo kuBawo wethu osezulwini, uYehova.—Zefaniya 3:9; Yohane 14:12.
Uvuyo lwethu enkonzweni kaYehova aluthethi ukuba asinazo iingxaki. Kulo nyaka wenkonzo udluleyo, abanye benu baye babandezeleka ngenxa yeenyikima, iimpuphuma, izitshingitshane nezinye iintlekele zemvelo ezisongela ubomi. (Mateyu 24:7) Abaninzi banyamezela izifo ezibuhlungu nokwaluphala. Sonke simele sinyamezele ‘inimba.’ (Mateyu 24:8) Kumazwe amaninzi aquka iArmenia, iEritrea neSouth Korea, abazalwana bethu abaninzi bankolonkoloza entolongweni ngenxa yokholo lwabo.—Mateyu 24:9.
Yintoni eye yasinceda sahlala sinesimo sengqondo esifanelekileyo nangona kukho obu bunzima? Umxholo wonyaka wowama-2010 uye wasikhumbuza ukuba: ‘Uthando lunyamezela zonke izinto. Uthando aluze lutshitshe.’ (1 Korinte 13:7, 8) Ewe, indlela esithandana ngayo kunye nokuthanda kwethu uYehova—kuyasomeleza ukuze sinyamezele.
Abantu abaninzi abathi bangamaKristu basala bebambe ongezantsi kukuzingisa kwethu kumsebenzi wokushumayela. Nangona besenokungavumelani neenkolelo neemfundiso zethu, abanye babo baye bathi, “nenza umsebenzi ebesifanele ukuba siya wenza!” Yintoni eyenza amaNgqina kaYehova aqhubeke eshumayela imihla ngemihla? Kwakhona impendulo luthando. NjengoBawo wethu wasezulwini, asifuni kubekho umntu otshabalalayo. (2 Petros 3:9) Umnqweno wethu wokuba bonke baguquke ubonakala kwincopho entsha yabavakalisi abazizi-7 508 050 kulo nyaka wenkonzo udluleyo. Ngaba ukho omnye umbutho wonqulo onabashumayeli abaninzi kangaka abenza lo msebenzi wothando ngokuzithandela ukuze bancede abanye ngokomoya?
Sikhuthazwa ukuba sibone ukuzaliseka okuqhubekayo kwesiprofeto sikaIsaya esithi: “Kuya kuthi ke ekupheleni kwemihla intaba yendlu kaYehova imiselwe ngokuqinileyo encotsheni yeentaba, ize ngokuqinisekileyo ivelele ngaphezu kweenduli; kwaye ziya kuba ngumsinga ukuya kuyo zonke iintlanga.” (Isa. 2:2-4) Phakathi kwezihlwele ezingumsinga ukuya kwindlu kaYehova ngama-294 368 aye abhaptizwa kunyaka wenkonzo odluleyo. Siyabamkela aba bantu baxabisekileyo phakathi kwethu. Ngamana uthando lwethu lobuKristu lungasikhuthazela ukuba siqhubeke sibanceda ukuba balwe notshaba lwethu uSathana uMtyholi.—1 Petros 5:8, 9.
Incopho yabantu abebeze esikhumbuzweni abazizi-18 706 895 ngoLwesibini, Matshi 30, 2010, babonisa ukuba izigidi zabantu zisafuna ukusithelela ekunquleni uYehova. Simele sonwabe kuba uYehova engekasizisi isiphelo sale nkqubo yezinto ingendawo. Okwangoku, uthando lwethu luyasinceda sinyamezele.—2 Tesalonika 3:5.
IiNdibano zeSithili ezinomxholo othi: “Hlalani Nisondele KuYehova!” inkoliso yazo beziqhutywa ehlabathini lonke ngowama-2010, ziye zalomeleza ulwalamano lwethu noBawo wethu wasezulwini uYehova. Anyanise ngokwenene amazwi endumiso athi: “Banoyolo abantu abaThixo wabo unguYehova!” (INdumiso 144:15) Enokuba linjani ikamva, siqinisekile ukuba, ukuba uYehova ungakuthi, asimele soyike nto. (INdumiso 23:4) Ngokukhawuleza uYehova, ngoNyana wakhe, ‘uza kuyichitha imisebenzi kaMtyholi.’ (1 Yohane 3:8) Ngokuqinisekileyo, siyalulangazelela olo suku. Kodwa okwangoku sinomsebenzi omnzi osigcina sixakekile.—1 Korinte 15:58.
Qinisekani ukuba ‘asiyeki’ ukunikhankanya emithandazweni. (Roma 1:9) “Zigcineni kuthando lukaThixo, ngoxa nilindele inceba yeNkosi yethu uYesu Kristu nikhangele kubomi obungunaphakade.”—Yude 21.
Sinithanda nonke!
Abazalwana benu,
IQumrhu Elilawulayo LamaNgqina KaYehova