Amandla Elizwi Lobubele

“Intliziyo esindwa ngamaxhala, hayi indlela eliyihlaziya ngayo ilizwi lobubele!”—IMizekeliso 12:25, Knox.

AMAKRISTU akakhuselekanga ngokupheleleyo kwinkxwaleko. Maxa wambi ahlangabezana namaxhala ngenxa yokuba ephila kula “maxesha anomngcipheko ekunzima ukuhlangabezana nawo.”—2 Timoti 3:1, NW.

Xa ebandezeleka ngenxa yeentlekele ezinjalo, enjani yona intsikelelo ekuyiyo ukuva amazwi obubele aphuma kumhlobo onyanisekileyo! IBhayibhile ithi: “Umhlobo uthanda ngamaxesha onke; umzalwana uzalelwe imbandezelo.” (IMizekeliso 17:17) Indoda ethembekileyo uYobhi yayisaziwa njengomhlobo onjalo. KwanoElifazi wathi ngaye: “Xa ubani wayekhubeka, ebuthathaka yaye etyhafile, amazwi akho ayemkhuthaza ukuba eme.”—Yobhi 4:4, Today’s English Version.

Noko ke, xa uYobhi wayefuna ukhuthazo, uElifazi namaqabane akhe abazange bathethe amazwi obubele. Bambek’ ityala uYobhi ngenkxwaleko awagaxeleka kuyo, bebonisa ukuba umele ukuba wayenesono asifihlayo. (Yobhi 4:8) IThe Interpreter’s Bible igqabaza ngolu hlobo: “Okufunwa nguYobhi yimfesane yentliziyo yomntu. Ekuphela kwento ayifumanayo kukushunyayezwa ngezicengcelezo ezimnandi zonqulo nokuchazelwa ngemithetho yokuziphatha eqhelekileyo yona ngokwayo ‘eyinyaniso’ ngokupheleleyo.” UYobhi wakhathazeka gqitha akuva intetho kaElifazi namaqabane akhe kangangokuba yambangela wadanduluka wathi: “Kunini na nisenza isingqala kumphefumlo wam, nindityumza ngokuthetha?”—Yobhi 19:2.

Singaze sibangele umkhonzi kaThixo akhale esentlungwini ngenxa yamazwi ethu angacingisiswanga, nangabonakalisi bubele. (Thelekisa IDuteronomi 24:15.) Umzekeliso weBhayibhile uyalumkisa: “Oko ukuthethayo kunokubulondoloza okanye kubutshabalalise ubomi; ngoko umele uyamkele imiphumo yamazwi akho.”—IMizekeliso 18:21, TEV.

Ekubeni siwaqonda amandla entetho, masilandele umzekelo wompostile uPawulos. Ngoxa wayeseMakedoni, ‘wayethetha amazwi enkuthazo ebantwini.’—IZenzo 20:2, TE.

Ngaba Uya Kukuvuyela Ukutyelelwa?

Kwanakweli hlabathi lizaliswe ziinkathazo, unako ukuzuza ulonwabo kulwazi oluchanileyo lweBhayibhile ngoThixo, uBukumkani bakhe nenjongo yakhe emangalisayo ngoluntu. Ukuba ungayivuyela inkcazelo engakumbi okanye ungathanda ukuba uthile eze kuwe ukuze akuqhubele isifundo seBhayibhile sekhaya sesisa, nceda ubhalele kwiWatch Tower, Private Bag X2067, Krugersdorp, 1740, okanye kwikhelingi efanelekileyo kwezidweliswe kwiphepha 2.