Kwanasemva kokuba iqumrhu elilawulayo lenkulungwane yokuqala liwuzinzisile umbandela wolwaluko, abathile ababezibanga bengamaKristu baqhubeka ngenkani nale mbambano. Umpostile uPawulos wababiza aba ngokuba ‘ngabazalwana bobuxoki’ ababefuna “ukuzigqwetha iindaba ezilungileyo ezingoKristu.”—Gal. 1:7; 2:4; Tito 1:10.
Kuyabonakala ukuba injongo yaba bantu babenyanzelisa iimbono zobuYuda yayikukukholisa amaYuda ukuze angabuchasi ngogonyamelo ubuKristu. (Gal. 6:12, 13) Aba bantu babesima ngelithi umntu wayesiba lilungisa ngenxa yemisebenzi yoMthetho kaMoses kwizinto ezinjengokutya, ulwaluko nemithendeleko yamaYuda.—Kol 2:16.
Siyaqondakala isizathu sokuba abantu ababenamathele kwezi mbono babengakhululeki ukuhlala namakholwa eeNtlanga. Ngelishwa, ezo ngcamango zingafanelekanga zazibonakala nakwamanye amaKristu ahlonelwayo ayenemvelaphi yobuYuda. Ngokomzekelo, xa abameli bebandla laseYerusalem batyelela kwa-Antiyokwe bazahlula kubazalwana babo beeNtlanga. KwanoPetros, owayehleli ngokukhululekileyo neeNtlanga ngaphambi kokufika kwala maKristu wazahlula akufika—engatyi kwaukutya nawo. Ewe, wophula kanye loo migaqo wayeyithethelele ngaphambili. Ngenxa yoko, uPetros walulekwa kabukhali nguPawulos.—Gal. 2:11-14.