UmThandazo

Ingcaciso: Yintetho yokunqula, ekhutshwa ngubani, ngokuvakalayo okanye ngokungavakaliyo kwiingcinga zakhe, eyibhekisa kuThixo oyinyaniso okanye koothixo bobuxoki.

Ngaba unoluvo lokuba, njengoko abaninzi bevakalelwa njalo, akuyifumani impendulo kwimithandazo yakho?

Yimithandazo yoobani uThixo ayiphulaphulayo?

INdu. 65:2; Ize. 10:34, 35: “Wena mphulaphuli wemithandazo, iza kuwe inyama yonke.” “UThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” (Ubuhlanga bukabani, ibala lesikhumba sikabani, okanye iimeko zikabani ezingokoqoqosho azibalulekanga kulo mbandela. Kodwa iintshukumisa zentliziyo kabani nendlela kabani yobomi zizo ezibalulekileyo.)

Luka 11:2: “Xa sukuba nithandaza, yithini, Bawo wethu osemazulwini, malingcwaliswe igama lakho.” (Ngaba imithandazo yakho ibhekiswa kuBawo, ogama lakhe iBhayibhile ethi linguYehova? Okanye, kunoko, ngaba imithandazo yakho ibhekiswa “kwiingcwele”?)

Yoh. 14:6, 14: “Uthi uYesu kuye, Ndim indlela, ndim inyaniso, ndim ubomi; akukho namnye uzayo kuBawo, engezi ngam. Ukuba nithe nacela into ngegama lam, ndoyenza mna.” (Ngaba uthandaza egameni likaYesu Kristu, uqonda ukuba njengomntu onesono uyafuna ukuba akuthethelele?)

1 Yoh. 5:14: “Kuko oku ukungafihlisi esinako kuye: ukuba sithi sicele into ngokokuthanda kwakhe, uyasiva.” (Noko ke, ukuze ube nentembelo enjalo, kuqala umele ukwazi ukuthanda kukaThixo. Emva koko qiniseka ukuba izicelo zakho zivisisana nako.)

1 Pet. 3:12: “Amehlo eNkosi aphezu kwamalungisa, neendlebe zayo zisingisele esikhungweni sawo; ke ubuso beNkosi buphezu kwabenza okubi.” (Ngaba uye wazinika ixesha ukuze ufunde oko uYehova akuthethayo ngeLizwi lakhe ngokubhekisele kwinto ebubulungisa nembi?)

1 Yoh. 3:22: “Nesithi sikucele siyakwamkela kuye, ngokuba imithetho yakhe siyigcina, sizenze izinto ezikholekileyo emehlweni akhe.” (Ngaba ngokwenyaniso kungumnqweno wakho ukukholisa uThixo, ibe ngaba ngokunyanisekileyo uzabalazela ukuthobela loo mithetho yakhe osele uyazi?)

Isa. 55:6, 7: “Funani uYehova esenokufunyanwa; mbizeni esekufuphi. Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova: woba nemfesane kuyo; ibuyele kuThixo wethu ngokuba woxolela ngokukhulu.” (Ngenceba, uYehova umema kwanabantu abenze izinto ezimbi ukuba bathandaze kuye. Kodwa, ukuze babe ngabakholisekileyo kuThixo, ngokunyanisekileyo bamele baguquke kwiindlela neengcinga eziphosakeleyo baze baguqule ikhondo labo.)

Yintoni enokwenza imithandazo yomntu ibe yengamkelekanga kuThixo?

Mat. 6:5: “Naxa sukuba uthandaza, uze ungabi njengabahanahanisi; ngokuba bethanda ukuthandaza bemi ezindlwini zesikhungu nasezimbombeni zezitrato, ngokokuze babe nokubonwa ngabantu. Inene ndithi kuni, Bawufincile umvuzo wabo.” (KwanoLuka 18:9-14)

Mat. 6:7: “Nithandaza njalo ke, maningenzi milembelele ingeyanto, njengabeentlanga; kuba beba boviwa ngenxa yamazwi abo amaninzi.”

IMize. 28:9: “Osusa indlebe yakhe ekusiphulaphuleni isiyalo [sikaThixo], kwanomthandazo wakhe ulisikizi.”

Mika 3:4: “Baya kwandula bakhale kuYehova, angabaphenduli; asuke abusithelise ubuso bakhe kubo ngelo xesha, njengoko bazenze zambi iintlondi zabo.”

Yak. 4:3: “Niyacela, ningamkeli noko, ngenxa enokuba nicela kakubi, ukuze oko nikuchithele iziyolo zenu.”

Isa. 42:8; Mat. 4:10: “NdinguYehova, lilo elo igama lam; andiluniki omnye uzuko lwam, nendumiso yam andiyiniki imifanekiso eqingqiweyo.” “YiNkosi uThixo wakho [“nguYehova uThixo wakho,” NW] oya kuqubuda kuyo, ukhonze yona yodwa.” (KwaneNdumiso 115:4-8) (Umthandazo uluhlobo lonqulo. Ukuba uthandaza phambi kwezinto ezikroliweyo, okanye imifanekiso eqingqiweyo, ngaba oko kuza kumkholisa uThixo?)

Isa. 8:19: “Xa bathe kuni, Quqelani kwabaneshologu nakoosiyazi, abalozayo, abadumzelayo, yithini, Abantu mabangaquqeli kuThixo wabo, yini na? Ngenxa yabaphilileyo mabaquqele kwabafileyo na?”

Yak. 1:6, 7: “Ke makacele ekholwa, engathandabuzi; kuba lowo uthandabuzayo ufana nokulatyuza kolwandle, luqhutywa ngumoya, luntsileka. Kuba loo mntu makangabi uya kwamkela nto kuyo iNkosi.”

Yiyiphi imicimbi efanelekileyo enokuthandazelwa?

Mat. 6:9-13: “Thandazani nina ngoko nenjenje: ‘[1] Bawo wethu osemazulwini, malingcwaliswe igama lakho. [2] Mabufike ubukumkani bakho. [3] Makwenziwe ukuthanda kwakho nasemhlabeni, njengokuba kusenziwa emazulwini. [4] Siphe namhla isonka sethu semihla ngemihla. [5] Usixolele amatyala ethu, njengokuba nathi sibaxolela abo banamatyala kuthi. [6] Ungasingenisi ekulingweni, sihlangule enkohlakalweni.” (Phawula ukuba igama likaThixo nenjongo yakhe zimele zize kuqala.)

INdu. 25:4, 5: “Ndazise iindlela zakho, Yehova, ndifundise umendo wakho. Ndinyathelise enyanisweni yakho, undifundise; ngokuba unguThixo ongumsindisi wam.”

Luka 11:13: “Ukuba ke ngoko nina, ningendawo nje, niyakwazi ukubapha abantwana benu izipho ezilungileyo, wobeka phi na ke yena uYihlo wasemazulwini, ukugqithisela ukubapha uMoya oyiNgcwele abo bamcelayo?”

1 Tes. 5:17, 18: “Thandazani ningayeki. Ezintweni zonke bulelani.”

Mat. 14:19, 20: “[UYesu] wazithabatha izonka zozihlanu neentlanzi zombini, wathi, ekhangele ezulwini, wasikelela; waqhekeza, wazinika abafundi izonka ezo; ke abafundi banika izihlwele. Badla bonke bahlutha.”

Yak. 5:16: “Nithandazelane.”

Mat. 26:41: “Lindani nithandaze, ukuze ningangeni ekuhendweni.”

Fil. 4:6: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo.”

Ukuba Ubani Uthi—

‘Thandaza nam kuqala, wandule ke unikele isigidimi sakho’

Usenokuphendula uthi: ‘Ndiyavuya kukwazi ukuba ungumntu okuxabisayo ukubaluleka komthandazo. AmaNgqina kaYehova akwathandaza rhoqo. Kodwa kukho into uYesu awayithethayo ngexesha nendlela yokuthandaza nto leyo esenokubantsha kuwe. Ubusazi na ukuba waxelela abafundi bakhe ukuba banganikeli imithandazo yasesidlangalaleni ngenjongo yokuba benze abanye babone ukuba babengabantu abazinikelayo nabathandazayo? . . . (Mat. 6:5)’ Mhlawumbi usenokongeza uthi: ‘Phawula awahlabela mgama wathi kumele kube yinto esiyixhalabele ngokuyintloko nento esimele siyibeke kuqala kwimithandazo yethu. Leyo yinto endizokuncokola nawe ngayo. (Mat. 6:9, 10)’

Okanye unokuthi: ‘Ndiyazi ukuba abameli bamaqela eenkonzo ezithile bayakwenza oko. Kodwa amaNgqina kaYehova akakwenzi oko, ngenxa yokuba uYesu wayalela abafundi bakhe ukuba benze umsebenzi wabo wokushumayela ngenye indlela. Kunokuba athi, “Xa ningena endlwini, okokuqala manithandaze,” phawula awakuthethayo, njengokuba kufumaneka apha kuMateyu 10:12, 13. . . . Uze ubone apha kwindinyana 7 into ababemele bathethe ngayo. . . . Obo Bukumkani bunokubanceda njani abantu abanjengawe nam? (ISityhi. 21:4)’