INorway

ITYENDYANA elalikhwele kwinqanawa lalikhangele kunxweme lwaseNorway. Igama lalo yayinguKnud Pederson Hammer. UKnud owayefudula engumfundisi weCawa yaseBhaptizi eMntla Dakota, eU.S.A., wayesele enonyaka enguMfundi weBhayibhile (ngoku abaziwa njengamaNgqina kaYehova). Ngowe-1892, wayebuyela kwilizwe lakowabo eze kushumayela kubahlobo nezalamane.

Inkoliso yabemi baseNorway abazizigidi ezibini yayikwiCawa yamaLuthere. UKnud wayenomdla wokunceda abemi baseNorway abanyanisekileyo ukuba bamazi uThixo wokwenyaniso, uYehova, nokuba baqonde ukuba lo Thixo uluthando akangcungcuthekisi aboni kwisihogo somlilo. Wayefuna nokubaxelela ngokuza koLawulo lukaKristu Lwewaka Leminyaka apho umhlaba uya kube uyiparadesi.

Njengoko inqanawa yayisondela ngaselunxwemeni, uKnud waqwalasela lo mhlaba mhle—eli lizwe lingumtya ukuba lide, limxinwa, lineentaba ezigqunywe ngumkhenkce nelinamachweba anzulu namahlathi. Wabona ukuba kuza kuba nzima ukufikelela imimandla enabemi abahlala kwimizi egqagqeleneyo apho kungekho ndlela nazibhulorho zingako. Nangona abemi baseNorway abaninzi babehlala kwizixeko, abanye babehlala ezilalini okanye kumakhulu eziqithi ezigudl’ unxweme. Ukushumayela kukaKnud nokwanda konqulo lokwenyaniso eNorway phezu kwazo nje iingxaki komeleza ukholo yaye kukhuthaza abantu bakaThixo abakuzo zonke iindawo.

IMBEWU YOBUKUMKANI IVELISA ISIQHAMO

Nakubeni abantu abaninzi bedolophu yakuloKnud, eSkien, babenomdla kwisigidimi sakhe, akazange akwazi ukuhlala nabo kuba kwafuneka abuyele kwintsapho yakhe eUnited States. Ngowe-1899, waphinda waya eNorway, ngoku ecelwe nguCharles T. Russell, owayevelela umsebenzi waBafundi beBhayibhile ngelo xesha. UMzalwan’ uRussell wayefuna uKnud amisele ibandla eNorway. UKnud waya nemiqulu emibini yokuqala yeMillennial Dawn (kamva eyabizwa ngokuba yiStudies in the Scriptures), eyayiguqulelwe kwisiDanish esidibene nesiNorway. (Ngelo xesha isiNorway esibhalwayo sasifana nesiDanish, ngoko iimpapasho zazinokufundwa ngesiDanish nesiNorway.) UKnud washumayela kubantu abaninzi waza wahambisa neencwadi ezininzi, kodwa ekuhambeni kwexesha kwafuneka abuyele eUnited States.

Kunyaka olandelayo, uIngebret Andersen, owayehlala ngaseSkien, wafumana incwadi eyayisaziwa ngokuba yiThe Plan of the Ages, ekusenokwenzeka ukuba yenye yeencwadi ezafika noKnud eNorway. Kangangexesha elide, uIngebret wayenomdla “ekubuyeni okwesibini” kukaKristu, ibe ngoku yena nomfazi wakhe uBerthe, baba nomdla kule ncwadi. Ngoko nangoko uIngebret waqalisa ukushumayela ebantwini. Wayede aye kubaxelela ezicaweni ngoLawulo lukaKristu Lwewaka Leminyaka. Emva koko wayebuyela kwabo banomdla yaye kungekudala, kwabakho ibandla laBafundi BeBhayibhile abalishumi eSkien.

UKnud wathi akuva ngesinye sezizalwane zakhe ukuba kukho ibandla elincinane eSkien, wabuyela eNorway ngowe-1904 esiya kufuna uIngebret. Wadibana nendoda ethile esitratweni waza wayibuza, “Uyayazi indoda egama linguIngebret Andersen ehlala apha?” Le ndoda yathi: “Yiyo le uthetha nayo.” UKnud wavuya kakhulu waza wavula ibhegi yakhe wabonisa uIngebret iincwadi awayeziphethe. NoIngebret wavuya akubona uKnud nezo ncwadi zininzi.

UKnud wabalisela amanye amaKristu aseNorway ngentlangano nangomsebenzi wokushumayela. Wathi ebuyela kwintsapho yakhe eyayihlala eKhanada ngelo xesha, labe iBandla laseSkien likhuthazekile.

UKUFIKELELA EMINYE IMIMANDLA YASENORWAY

Umsebenzi wokushumayela eNorway wahambela phambili ngowe-1903 xa kwafika iicolporteurs (abashumayeli bexesha elizeleyo) ezintathu ezinenzondelelo—uFritiof Lindkvist, uViktor Feldt, noE. R. Gundersen. UFritiof wahlala kwidolophu elikomkhulu, iKristiania (ngoku ebizwa ngokuba yiOslo) yaye ngowe-1904 umzi wakhe waba yiofisi yeWatch Tower Society, apho kwakuodwa khona uncwadi nemirhumo yeZion’s Watch Tower.

Ngasekupheleni kowe-1903, xa uMzalwana uGundersen wayeshumayela eTrondheim ekumbindi Norway, wathetha noLotte Holm, owamkela uncwadi. Kamva, uLotte wagoduka waya kummandla waseNarvik, ngasentla kweArctic Circle, waza waba ngumvakalisi wokuqala emntla Norway. Emva koko, uViktor Feldt waya eNarvik waza wanceda izibini ezibini zaba ngaBafundi beBhayibhile. Zadibana noLotte yaye kungekudala elo qela lalihlanganisana rhoqo ukuze lifunde iBhayibhile. UdadeboLotte, uHallgerd, naye wayamkela inyaniso yaye bobabini baba ngoovulindlela abanenzondelelo kwimimandla eyahlukahlukeneyo yaseNorway.

Abantu baseBergen babesabele kakuhle kwiintshumayelo zikaMzalwan’ uFeldt noGundersen ngowe-1904 nangowe-1905. IZion’s Watch Tower kaMatshi 1, 1905, yathi: “Umshumayeli odumileyo weCawa yeFree Mission [yaseBergen] ufumene ukukhanya, ibe ngoku uvakalisa inyaniso yeVangeli kumarhamente akhe.”

Loo mshumayeli yayinguTheodor Simonsen, owagxothwa kwiCawa yaseFree Mission ngenxa yokufundisa inyaniso ayifunde kwiimpapasho zethu. Noko ke, ukonakala kwenye kwaba kukulunga kwenye. Abantu bakaYehova babemthanda uTheodor njengomzalwana wabo nangenxa yokuba esisithethi esiphum’ izandla. Kamva, wazinza eKristiania, apho kwakukho ibandla elikhulayo laBafundi beBhayibhile.

OOVULINDLELA BOKUQALA

Malunga nowe-1905, kwakukho amabandla aBafundi beBhayibhile kwezi zixeko zine: eSkien, eKristiania, eBergen naseNarvik. Kungekudala nabanye abavakalisi baqalisa ukuba ngoovulindlela baza baya kushumayela iindaba ezilungileyo kweminye imimandla emininzi kwelo lizwe. Abo vulindlela bokuqala babenamava abangela umdla.

Udade wokuqala owayenguvulindlela eNorway nguHelga Hess. Wayeyinkedama ehlala eBergen, apho waba ngutitshalakazi kwisikolo seCawa eneminyaka eli-17 ubudala. Wathi akuva uTheodor Simonsen eshumayela kwicawa yaseFree Mission ngezinto awayezifunde kwiincwadi zaBafundi beBhayibhile, waba nomdla waza waqalisa ukufunda ezo ncwadi. Wayeka ukuba ngutitshalakazi kwisikolo seCawa, waza ngowe-1905, eneminyaka eli-19 ubudala, waya kushumayela iindaba ezilungileyo eHamar naseGjøvik.

Ngenye imini ngowe-1908, uAndreas Øiseth wayegawula iinkuni kwifama yakowabo ekufuphi neKongsvinger xa omnye uvulindlela wamshiyela incwadi ethi The Divine Plan of the Ages. UAndreas, owayengaphezulu kancinane kweminyaka engama-20 ubudala, wakuthanda oko wayekufunda waza wacela iincwadi ezingakumbi. Emva kweenyanga ezimbalwa washiya loo fama komnye wabaninawa bakhe waza waqalisa ukuba nguvulindlela. Kwiminyaka esibhozo, wayesele eshumayele phantse kulo lonke elo lizwe. Ekuqaleni waya emantla, ehamba kwimimandla ekude nolwandle ngebhayisekile ehlotyeni, aze ebusika ahambe ngesileyi. Akufika eTromsø, wabuyela emazantsi waza wagubungela ummandla ongaselunxwemeni de waya kutsho eKristiania.

UAnna Andersen waseRygge, kufuphi naseMoss, wayengomnye woovulindlela bokuqala. Wayeligosa leSalvation Army kangangeminyaka yaye wayezinikele ekuncedeni abantu abasweleyo. Malunga nowe-1907 wafunda ezinye zeempapasho zethu waza waqonda ukuba uyifumene inyaniso. EKristiansund wadibana nelinye igosa leSalvation Army, uHulda Andersen (kamva owaba ngowakwaØiseth), owaba nomdla eBhayibhileni. Kungekudala la mabhinqa mabini athabatha uhambo olude olusinge emantla ngenqanawa, aya kufika eKirkenes, kufutshane nomda waseRashiya. Ayehamba emisa kunxweme ngalunye ehambisa iincwadi. Ngowe-1912 okanye malunga naloo nyaka, uAnna waba nguvulindlela. Kangangamashumi eminyaka wayehamba lonke elo lizwe ngenqanawa nangebhayisekile, ehambisa uncwadi lweBhayibhile kuzo zonke iidolophu zaseNorway. Wachitha ixesha emazantsi eKristiansand, apho waxhasa elo bandla likhulayo.

UKarl Gunberg wayeligosa lomkhosi wamanzi ngaphambi kokuba abe nguMfundi weBhayibhile. Waqalisa ukuba nguvulindlela ekwiminyaka engama-30 ubudala, malunga nowe-1911, ezixhasa ngokufundisa abantu ukuqhuba iinqanawa. Nakuba wayebonakala ngathi ngumntu ongqwabalala, wayesaziwa njengomntu othandekayo nothanda ukuqhula. Washumayela kulo lonke elaseNorway de waluphala yaye ukuba ligosa lomkhosi wamanzi kwakhe nokufundisa kwakhe kwaba luncedo kakhulu kumsebenzi wokushumayela, njengoko siza kubona kamva.

UKOMELEZA ABAZALWANA

Ngo-Oktobha wowe-1905, abantu babenemincili ngenxa yendibano yokuqala eyayiqhutyelwa eKristiana. Kwakukho abantu abamalunga nabali-15, kwaza kwabhaptizwa aba-3. Ngowe-1906 kwabakho indibano eBergen, yaye ukususela ngowe-1909 kwabakho iindibano nyaka ngamnye apho, kusiza izithethi ezisuka eDenmark, eFinland naseSweden. Abanye baba bazalwana babetyelela amabandla njengabahambi ngezonqulo, namhlanje ababizwa ngokuba ngabaveleli abahambahambayo.

Iimbalasane zaloo minyaka yayizizihlandlo zokutyelelwa nguMzalwan’ uRussell. Ngowe-1909, watyelela eBergen naseKristiania. Abazalwana noodade bakuxabisa ngokwenene ukudibana naye nokuphulaphula iintetho zakhe! Utyelelo lwakhe lwesibini, olwalungowe-1911, lwaba ngundaba-mlonyeni yaye abazalwana noodade abangama-61 bavuyiswa kukuza kwabantu abali-1 200 kwintetho kaMzalwan’ uRussell!

Kwiminyaka emithathu emva koko, uMzalwan’ uRussell wacela uHenry Bjørnestad ukuba atyelele abazalwana baseNorway nabaseSweden rhoqo njengomveleli ohambahambayo wokuqala othetha isiNorway.

UKUZIBHOKOXA NGAPHAMBI KOWE-1914

Ngowe-1910 kwashicilelwa iphecana lokushumayela elithi Peoples Pulpit. Eli phecana lanceda abafundi beBhayibhile abaninzi ukuba babe nenxaxheba kumsebenzi wokushumayela. Belangazelela ukubhenca ubuxoki bonqulo nokuchaza iinyaniso zeBhayibhile, abazalwana noodade basasaza amawaka ala maphecana ngesisa, efakwa nakumaphephandaba.

ABafundi beBhayibhile babelangazalela ukubona okuza kwenzeka ngowe-1914. Incwadi ethi The Time Is at Hand (umqulu wesibini weencwadi ezithi Millennial Dawn) yathi amaxesha eeNtlanga ayeza kuphela ngowe-1914 yaye ayeza kubonakala ngeengxaki neziphithiphithi, emva koko uBukumkani bukaThixo babuza kuqalisa ukulawula. ABafundi beBhayibhile babelindele nokuba iindlalifa eziza kulawula noKristu zaziza kufumana umvuzo wazo wasezulwini.

Lo ngumbandela owawusoloko usematheni. Ngokomzekelo, ngorhatya lwangoJulayi 1914, uKarl Kristiansen wayedlala kwiokhestra ekwisixeko saseSkien. Ngoxa wayesekhefini waxelela abantu ababekunye naye oku: “Kwiiveki ezimbalwa ezizayo kukho into eza kwenzeka. Kuza kuqala kubekho imfazwe, imvukelo, isiphithiphithi, kwandule ke kufike uBukumkani bukaThixo.” Kungekudala emva koko kwaqhambuka iMfazwe Yehlabathi I, baza abantu beza bethontelana kuKarl befuna ukwazi.

Emazantsi ngaselunxwemeni eArendal, kwakukho uMfundi weBhayibhile omnye ngowe-1914. Ngenye imini lo dade wadibana noMia Apesland esitratweni waza wamxelela ukuba iBhayibhile ithi kuza kubakho imfazwe ngokwindla lowe-1914. UMia wathi: “Ukuba ikhe yenzeka loo nto, ndiza kuba likholwa.” Akubona kusenzeka oko kwakuthethwe ngulo dade, ngoko nangoko uMia waba likholwa. UMia, loo dade kunye nabanye abambalwa baseka iBandla lokuqala laseArendal.

INKQUBELA NEENGXAKI

Azizange zenzeke zonke izinto ezazilindelwe ngaBafundi beBhayibhile ngowe-1914. Sekunjalo, baqhubeka besebenza ngenzondelelo. Ukususela ngoDisemba wowe-1914 ukusa kowe-1915, umboniso obangel’ umdla we-“Photo-Drama of Creation” wanikela ubungqina kwinkitha yabantu baseKristiania, eBergen, eTrondheim, eSkien, eArendal naseKristiansand.

Noko ke, kungekudala emva koko kwabakho iingxaki. UFritiof Lindkvist, owayesalathisa umsebenzi eNorway kangangeminyaka elishumi wawexuka, waza ngowe-1916 wayishiya intlangano. Ngenxa yoko, kwiminyaka embalwa emva koko, ngabazalwana baseSweden naseDenmark ababesalathisa umsebenzi eNorway. Ngowe-1921, uEnok Öman walathisa umsebenzi eNorway de kwaba ngowe-1945.

Kwabakho isiphithiphithi nasemva kokufa kukaC. T. Russell ngowe-1916 kwaza kwangena uJ. F. Rutherford ezihlangwini zakhe njengomveleli womsebenzi waBafundi beBhayibhile. Ngenxa yokungazaliseki kwezinto ababezilindele ngowe-1914 notshintsho olwenzeka entlanganweni, abaninzi bayishiya. Kwaba nzima ngakumbi eBergen, kuba ngowe-1918 kwasala umzalwana noodade abasixhenxe kuphela ebandleni. ETrondheim, baba liqela abantu abashiya ibandla yaye lona iqela laseKristiania laphela. Kodwa uYehova wabasikelela abo baxhasa intlangano ngokunyanisekileyo.

UKUBA NENZONDELELO KWAKHONA

Ngowe-1918, uMzalwan’ uRutherford wanikela udlwabevu lwentetho ethi “Izigidi Eziphilayo Ngoku Azisayi Kuze Zife.” Ukususela ngowe-1920 ukusa kowe-1925, le ntetho yanikelwa ehlabathini lonke. UA. H. Macmillan weza evela kwikomkhulu lehlabathi eNew York ukuze anikele le ntetho kwizixeko ezininzi zaseNorway. EKristiania, izitulo zazizele zimi ngeembambo, kangangokuba abaninzi bajikiswa. Noko ke, uMzalwan’ uÖman wakhwela phezu kwebhokisi eyayikumnyango weholo waza wathi: “Buyani emva kweyure enesiqingatha, uMacmillan uza kuphinda ayinikele le ntetho!” Ngenene, iholo yazala qhu ngabantu ababeze kuphulaphula le ntetho. Kwiminyaka emininzi emva koko, abazalwana baseNorway babenikela le ntetho kulo lonke elo. Amawaka abantu ayemamele ngomdla kubungqina obunikelwa ziZibhalo bokuba abaninzi baya kusinda eArmagedon baze baphile ngonaphakade kumhlaba oyiparadesi. Abaninzi bafumana incwadana ethi Millions Now Living Will Never Die!

Ukususela ngowe-1922 ukusa kowe-1928, aBafundi beBhayibhile bahambisa amawaka amaphecana awayenezigqibo ezamkelwa kwiindibano, njengelithi A Challenge to World Leaders, elithi A Warning to All Christians, nelithi Ecclesiastics Indicted. ABafundi beBhayibhile abaninzi baqalisa ukushumayela ngokusasaza loo maphecana.

Nakubeni kunjalo, ulwando lwalungekho kangako. Nangona oovulindlela nabavakalisi abanenzondelelo babeshumayela ngokuzimisela, kwakufuneka abanye bancedwe ukuze bazibhokoxe kumsebenzi wokushumayela. Ngaphezu koko, iimpapasho zazisashicilelwa ngesiDanish, isiDanish esidityaniswe nesiNorway okanye isiSwedish, kungekhona isiNorway. Yintoni eyayinokwenziwa ukuze umsebenzi utyhalele phambili?

IBulletin (UBulungiseleli Bethu BoBukumkani) ka-Aprili 1925 yesiNorway yathi: “Ngoku sinithumelela iThe Golden Age yokuqala ngolwimi lwenu. Ninokufumana imirhumo.” Leyo yayiyiThe Golden Age (ngoku eyaziwa ngokuba nguVukani!) kaMatshi 1925. Kungekudala le Golden Age yasasazwa kungekuphela eNorway, kodwa naseDenmark. Ngowe-1936, xa kwatshintshwa igama lale Golden Age laba yiNy Verden (Ihlabathi Elitsha), yayisele irhunyelwe ngabantu abangama-6 190.

ULUNGELELWANO NEZAKHIWO EZIPHUCUKILEYO

NgoMeyi 1925, aBafundi beBhayibhile abangaphezu kwama-500 abasuka kwimimandla eyahlukahlukeneyo yaseScandinavia bahlanganisana kwindibano eyayiseÖrebro, eSweden. Kuloo ndibano, uMzalwan’ uRutherford wathi kuza kuvulwa iOfisi yoMntla Yurophu eCopenhagen, eDenmark. Kwakuza kuza uWilliam Dey ovela eLondon eze kwalathisa umsebenzi wabantu bakaThixo eDenmark, eNorway, eSweden, eFinland nakumazwe eBaltic. La mazwe ayeza kuqhubeka enabaveleli yaye uEnok Öman wayeza kuqhubeka engumveleli waseNorway.

UWilliam Dey waseSkotlani, wayengumntu okhutheleyo yaye wancedisa ekubeni umsebenzi wokushumayela uhambele phambili. Wayekwazi ukulungelelanisa izinto yaye wayekhuthaza abazalwana ngendlela awayezole ngayo nangomzekelo wakhe omhle entsimini. NgoSeptemba nango-Oktobha 1925, wayehamba kulo lonke elaseNorway elungelelanisa imisebenzi yebandla ngokolwalathiso oluvela kwikomkhulu, enomntu omtolikelayo kuba wayethetha isiNgesi. UMzalwan’ uDey waba ngumveleli weOfisi yoMntla Yurophu de kwaba yiMfazwe Yehlabathi II.

Abazalwana babesoloko befuna indawo efanelekileyo yokwakha iofisi yaseNorway. Ngowe-1925 omnye umzalwana owafumana ilifa lemali wathenga isakhiwo esinemigangatho emithathu eOslo waza wasithengisela intlangano ngesiqingatha sexabiso laso. Esi sakhiwo safika kanye ngexesha elililo, yaye sasithwala de kwangowe-1983.

INTLANGANO ENAMANGQINA ANENZONDELELO

Unyaka wowe-1931 waba ngunyaka wesiganeko esibalulekileyo kubakhonzi bakaThixo ehlabathini lonke. Ngaloo nyaka, bamkela ukubizwa ngegama elitsha—amaNgqina kaYehova. UMzalwan’ uÖman uthi: “Ukwamkela kwethu eli gama, kwafuneka sonke sisukume size ngodlamko olukhulu sithi ‘Ja’ [Ewe].” Abazalwana noodade bavuyiswa gqitha kukuba negama elisekelwe kwiZibhalo yaye babezimisele ukuphila ngokuvisisana nalo.

Kwakubonakala ukuba uYehova wayewusikelela umsebenzi wokushumayela eNorway. Inani labavakalisi landa lisuka kwi-15 ngowe-1918 laya kutsho kuma-328 ngowe-1938. Abantu bakaYehova babengengoBafundi beBhayibhile nje; babengamangqina anenzondelelo.

Omnye umzekelo ngokaEven Gundersrud, owabhaptizwa ngowe-1917 nowayekwiBandla laseSkien. Ekuqaleni, umfazi wakhe wayefihla izihlangu zakhe esenzela ukuba angayi ezintlanganisweni. Kodwa loo nto ayizange imtyhafise—wayesuka nje aye kwiintlanganiso enganxibanga zihlangu! Ngesinye isihlandlo xa watshixela uEven kwigumbi lokulala, waphuma ngefestile. Ayikho into eyayinokwenziwa ngumfazi kaEven eyayinokumthintela ukuba aye kwiintlanganiso. Kwangaxeshanye, wayesoloko emphatha ngobubele umfazi wakhe. Waqalisa ukuba neentloni xa ebona umyeni wakhe ehamba enganxibanga zihlangu. Efuna ukuqonda le nto izenza zibaluleke kangaka iintlanganiso kuEven, wahamba naye. Ekugqibeleni, naye waba liNgqina likaYehova.

Inzondelelo yeBandla laseSkien yayibonisa indlela ayeyiyo amabandla aloo mihla. Abazalwana balapho babeshumayela ngenkuthalo kwizixeko ezikufuphi, ezidolophini nasezilalini. Ngeempelaveki babedla ngokuhamba ngeelori okanye ngezikhephe, beshumayela yaye belungiselela ukuqhuba iintlanganiso. Kungekudala kwamiselwa amaqela namabandla kuloo ngingqi. Namanye amabandla ayexakekile ngumsebenzi wobuthixo.

INKQUBELA EBERGEN

Omnye wabavakalisi abazimiseleyo eBergen yayinguTorkel Ringereide. Ngowe-1918 wafumana iphephancwadi elalipapashwe ngaBafundi beBhayibhile. Wakhangela uMzalwan’ uDahl, ngelo xesha owayengokuphela komzalwana kwiBandla laseBergen. UMzalwan’ uDahl wayeqhuba iintlanganiso ekhayeni lakhe kunye nebandla—oodade abasixhenxe. Omnye wabo yayinguHelga Hess, okhankanywe ngaphambili nowayebuyele eBergen. UTorkel waba lilungu lelo bandla, waza ngowe-1919 watshata noHelga.

UTorkel wayeyindoda enenkalipho, engqokola. Kangangeminyaka yayinguye kuphela isithethi sasesidlangalaleni kwelo bandla. Wayedla ngokunikela iintetho ngeeCawa, ebhenca uhanahaniso lweenkokeli zeecawa neemfundiso zazo ezibubuxoki. Ezi ntetho zazidla ngokubhengezwa kumaphephandaba yaye abantu abanomdla babedla ngokuba baninzi kunaBafundi beBhayibhile bale ngingqi.

UTorkel wayebakhuthaza abaphulaphuli ukuba baxelele abanye ngenyaniso. Ngowe-1932, uNils Raae wayephulaphule olu khuthazo. UNils wayesele enonyaka esazi inyaniso, kodwa wayemathidala ukuqalisa ukushumayela. Ibandla laliseza kuqalisa iphulo lokuhambisa incwadana ethi The Kingdom, the Hope of the World yaye uTorkel wanikela intetho ethetha ngendlela ekubaluleke ngayo ukuba nenxaxheba kubulungiseleli. UNils uthi: “Yayiludlwabevu lwentetho yaye yandenza ndanemincili.” Xa equkumbela le ntetho, uTorkel wacaphula amazwi kaYehova akuIsaya 6:8 athi: “Ngubani na owosiyela?” Emva koko uTorkel wathi: “Ngamana sonke sinokuphendula ngendlela awaphendula ngayo uIsaya sithi: ‘Ndikho! Thuma mna’!” Olu khuthazo lwamchukumisa uNils nomfazi wakhe. Bengaphozisanga maseko, baqalisa ukushumayela.

Abazalwana noodade babekuthanda ukuya ekhayeni likaTorkel noHelga. Babedla ngokuncokola ngenyaniso yaye abavakalisi abatsha nabaselula bakhuthazeka. Abavakalisi baseBergen babedla ngokushumayela kwiingingqi ezingqongileyo behamba ngesikhephe okanye ngelori. Emva koko, babedibana ukuze babaliselane amava banandiphe ubudlelane.

ABASHUMAYELI ABANENZONDELELO BASEOSLO

Ebudeni beminyaka ye-1920 neye-1930, umsebenzi wokushumayela wawuhambela phambili nakummandla waseOslo. Omnye wabavakalisi yayinguOlaf Skau, owayebhaptizwe ngowe-1923. Ngowe-1927 wamiselwa njengomalathisi wenkonzo ebandleni yaye kangangamashumi eminyaka wayengumveleli osisiquququ nonobubele. Walungelelanisa umsebenzi wokushumayela eOslo waza walungiselela nokutyelelwa kwemimandla engqonge eso sixeko ngebhasi okanye ngelori. Wayedla ngokuhlala de kube sebusuku ezoba iimaphu elungiselela namaphulo okushumayela.

Abavakalisi baseOslo babeshumayela ezixekweni nakwiindawo ezisemaphandleni ukusuka eHalden naseFredrikstad esemazantsi eOslo ukuya eHamar esemantla, nokusuka eKongsvinger engasempuma ukuya kutsho eDrammen naseHønefoss ezingasentshona. Abavakalisi babefika kule mimandla ngesithuba sentsimbi ye-9 kusasa baze bashumayele kwindlu ngendlu imini yonke. Amaxesha amaninzi babedla ngokuqhuba neentlanganiso. Lo msebenzi waba sisiseko esihle samaqela namabandla amatsha yaye abazalwana noodade abambalwa ababehlala kwezo ndawo babewuxabisa kakhulu. Kwelinye iphulo elathatha iintsuku ezisithoba ngowe-1935, abavakalisi baseOslo abangama-76 bahambisa iincwadana ezingama-13 313, umlinganiselo weencwadana ezili-175 ngumvakalisi ngamnye!

Umfazi kaOlaf, uEsther, wayenesifo samathambo yaye wayehamba ngesitulo esinamavili. Sekunjalo, ikhaya labo lalisoloko lityelelwa ngabazalwana noodade. NguOlaf owayedla ngokupheka yaye wayesaziwa ngokupheka amaphiko enkuku amuncis’ iintupha. Kodwa eyona nto asayikhumbula nangoku amaNgqina elo xesha ngekhaya lakwaSkaus kukuncokola ngezinto ezakhayo ngokomoya, ukuxutyushwa kweZibhalo nemidlalo yeBhayibhile. URagnhild Simonsen ukhumbula oku: “Sasingakhe simke sidakumbile kwaSkaus.”

“BABENOTYEKELO OLUFANELEKILEYO NGOBOMI OBUNGUNAPHAKADE”

Kwiminyaka yangaphambili abantu babeluthanda unqulo yaye babeyazi ngakumbi iBhayibhile kunokuba kunjalo ngoku. Abaninzi babekulungele ukuncokola ngeZibhalo, ibe njengakwinkulungwane yokuqala, “abo babenotyekelo olufanelekileyo ngobomi obungunaphakade baba ngamakholwa.”—IZenzo 13:48.

Umzekelo woku nguDurdei Hamre. Ngowe-1924 wamkela incwadana yaye wayifunda ngaloo ngokuhlwa ubusuku bonke. Kamva wathi: “Ndalala ndingumPentekoste ndavuka ndifuna ukuba liNgqina likaYehova.”

Phakathi kweminyaka ye-1920, omnye woonyana abasibhozo bakwaFjelltvedt waya kuphulaphula intetho yesidlangalala eyayithetha ngesihogo waza wafumana incwadana eyayithetha ngalo mbandela. Izinto azifundayo zamenza wabona ukuba imfundiso yesihogo bubuxoki. Kungekudala emva koko, xa intsapho yakowabo yayidibene kwifama yayo, waxelela abantakwabo abasixhenxe noodadewabo abathathu ngezinto awayezifundile. Bancokola ngale ncwadana de kwasezinzulwini zobusuku. Ngexesha nje elifutshane, bonke baba ngaBafundi beBhayibhile kunye namanye amaqabane abo. Kamva, abaninzi kubantwana babo nabazukulwana babo baba ngabavakalisi abanenzondelelo, baza abanye baya kushumayela kwezinye iindawo.

Umdla ababenawo abantu kwizinto zokomoya wabonakala ngowe-1936 xa uM. A. Howlett owayesuka kwikomkhulu lehlabathi eNew York wayesisithethi kwiindibano ezaziseBergen naseOslo. EBergen, kweza abantu abangama-810 kwintetho yesidlangalala kuquka abefundisi nobhishophu yaye amaNgqina ayeli-125 kuphela kwabo bantu. EOslo, kweza abantu abali-1 014 kwintetho yesidlangalala, amaNgqina eli-140 kuphela!

“NGOKU SIYAFIKA ESI SIHLWELE!”

Ngowe-1935, amaNgqina kaYehova avuya kakhulu xa kwacaca ukuba singubani esi ‘sihlwele sikhulu’ sichazwe kwiSityhilelo 7:9-17. Abantu bakaThixo bavuyiswa kukwazi ukuba abanquli abanethemba lokuphila kwiparadesi esemhlabeni banokukhonza uYehova kunye nentsalela ethanjisiweyo. Ukususela ngaloo nyaka, banikela ingqalelo ekuhlanganiseni isihlwele esikhulu, esiza kusinda “embandezelweni enkulu,”—owona msebenzi mkhulu wokuhlanganiswa kwabanquli bokwenyaniso kwimbali yoluntu.

Ngowe-1935 abanethemba lokuphila ezulwini babeshumayela kwilali ekufuphi naseLillehammer. UJohn Johansen oneminyaka elishumi ubudala wayephulaphule ngomdla njengoko aba vulindlela babexelela intsapho yakowabo ngenjongo kaThixo yokwenza umhlaba ube yiparadesi. Xa wayeneminyaka eli-13 ubudala, uJohn wayekufuna ngamandla ukuya kuxelela abantu ithemba analo kangangokuba waboleka ibhegi kayise waza waya kushumayela kubamelwane—ehamba yedwa! Ngoku, emva kweminyaka engama-70, uJohn nomfazi wakhe uEdith basengabashumayeli abanenzondelelo yaye bavuyiswa kukufak’ isandla ekufikeni kwabantu abatsha kuyo yonke loo minyaka.

Ngenye imini, ngowe-1937, uOlaf Rød nomnye umzalwana babesekhayeni likaOlaf bencokola ngesihlwele esikhulu. Yayingabo kuphela amaNgqina eHaugesund yaye babezibuza ukuba siza kuvela phi esi sihlwele sikhulu. Kusenjalo, kwankqonkqozwa emnyango. Wathi xa evula uOlaf, kwabe kumi uAlfred Trengereid. Wayefunde IMboniselo yaye wayithanda into awayifundayo. Kamsinya emva koko, wakhwela iphenyane, waya kufuna uncwadi kwindoda awayeyazi ukuba iliNgqina, uOlaf, eHaugesund. Kwammangalisa uOlaf oku. Wazixelela oku: ‘Saqalisa ukuvela esi sihlwele!’ Sasiqalise ngokwenene ukuvela, nangona sasingezi ngendlela efanayo yaye singezi nangexesha elinye. UAlfred waba ngumzalwana kunye nabanye abaninzi abazamkelayo iindaba ezilungileyo zoBukumkani.

IZIKHEPHE ZINCEDA EKUHLANGANISENI ISIHLWELE ESIKHULU

Ukuqalisa komsebenzi wokushumayela eNorway, kwakutyhafisa ukushumayela kubantu abahlala kwiziqithi ezininzi ezikwanti. Ngenxa yoko, ngowe-1928 iofisi yesebe yathenga isikhephe esasinokukhwela oovulindlela ababini okanye abathathu nesomelele ngokwaneleyo ukuba singakwazi ukutyhutyha unxweme lwaseNorway. Kodwa ngubani owayenokuqhuba eso sikhephe? UKarl Gunberg, owayenguvulindlela onamava, wavuma ukusiqhuba. Amava akhe asemkhosini wamanzi nawokufundisa kwakhe abantu ukuqhuba inqanawa amnceda kakhulu. Isikhephe sokuqala, iElihu, sasuka eOslo sisiya kumazantsi saza samisa ngakumazibuko angaselunxwemeni. Noko ke, ngowe-1929, ngobunye ubusuku basebusika obabunesaqhwithi, iElihu yaphuka kufutshane naseStavanger. Bonke baba nombulelo kuba abazalwana ababekhwele kuyo bafika bekhuselekile elunxwemeni.

Ngowe-1931 abazalwana bafumana esinye isikhephe, abasibiza ngokuba yiEster. UKarl wathathisa kwakhona, ephelekwa ngabazalwana ababini. IEster yafikelela kwimimandla esentshona nasemntla Norway. Ngowe-1932, uKarl waziva “emdala kakhulu ukuba angaqhubeka ehamba kula maphulo.” Washiya isikhephe ezandleni zikaJohannes Kårstad waza waya kuba nguvulindlela empuma Norway. Ngowe-1938, iEster yathatyathelw’ indawo yiRuth, eyasetyenziswa de kwaba ngowe-1940, xa umsebenzi wabazalwana wokushumayela wamiswa yiMfazwe Yehlabathi II. Aba vulindlela bolwandle babesele begubungele imimandla emininzi yaye behambise uncwadi oluninzi. Ngowe-1939 abazalwana ababini ababesebenzisa iRuth, uAndreas Hope noMagnus Randal beza nengxelo yokuba, ngonyaka nje omnye, babehambise iincwadi, iincwadana namaphephancwadi angaphezu kwama-16 000, baza badlalela abantu abangama-2 531 iintetho ezingama-1 072 ngegramafoni.

Ukongezelela kumava amnandi ababa nawo, abazalwana ababeshumayela ngezikhephe babebona izinto ezintle. UAndreas Hope uthi: “Sasidla ngokuya ngasemantla mihla le, sityhutyha amachweba neenduli ezithe ncothu. Sasibukela ubuhle bendalo basendle.” Ebusika, entla kweArctic Circle, bamangaliswa “kukubengezela kwezikhanyiso [aurora borealis] ezikumantla.” Ehlotyeni babekhamnqiswa “kukuqaqamba kwelanga ezinzulwini zobusuku.”

UDADE ONGUVULINDLELA ONENZONDELELO

Kwiminyaka ye-1930, oovulindlela babesanda ngendlela engummangaliso. Nangona babengathathi ntweni, bagubungela intsimi enkulu, beshumayela iindaba ezilungileyo yaye besasaza iincwadi zeBhayibhile. Inzondelelo yabo engagungqiyo yabangela ukuba kubekho ulwando.

Ngokomzekelo, uSolveig Løvås (kamva owaba nguStormyr) waseOslo, wayefuna inyaniso yaye wayesele ehambe iicawa ezahlukahlukeneyo. Ngenye imini, waya kwintlanganiso yamaNgqina kaYehova waza waqonda ukuba uyifumene inyaniso yeBhayibhile. Wabhaptizwa ngowe-1933 yaye emva kweminyaka emibini waya kuba nguvulindlela kumntla Norway. Nangona wayeqhwalela ngenxa yesifo sepoliyo, kwiminyaka emithandathu uSolveig washumayela kwizixeko, iidolophu, iilali nakwimimandla emincinane emininzi ukusuka kumazantsi eBodø ukuya kutsho eKirkenes. Abantu abangamawaka balwamkela uncwadi lweBhayibhile. Kwisithuba nje esingangonyaka, uSolveig wayesele efumene imirhumo yamaphephancwadi engaphezu kwe-1 100.

Omnye umntu owaba nomdla kwisigidimi sikaSolveig nguDag Jensen owayengumchweli kwilali yaseHennes eVesterålen. Kangangeminyaka wayefumana uncwadi lwethu kwabanye abantu abanomdla. Ukudibana kwakhe noSolveig, uSolveig walungiselela ukuba uDag afumane umrhumo wamaphephancwadi, waza wafudukela kweminye imimandla ukuze anikele ubungqina. UDag waqalisa ukushumayela eyedwa, eboleka abantu abanomdla ezo ncwadi wayenazo zimbalwa.

Kwisiqithi saseAndøya, uSolveig waya kuthetha neqela labalobi abazizigantsontso etyotyombeni labo. Washumayela ngenkalipho, wadlala iintetho ngegramafoni waza wabacela ukuba barhumele amaphephancwadi. Omnye umlobi oselula, uFrits Madsen waba nomdla waza warhumela amaphephancwadi. Wathi akugqiba ukushumayela apho, uSolveig wadlulela kwenye indawo. Oovulindlela baloo maxesha babesenza ngolo hlobo—babeshumayela, befumana abantu abanomdla, bahambise uncwadi, bafumane imirhumo bandule ke ukuya kwintsimi elandelayo. Kwakuza kwenziwa ntoni ukuze kubuyelwe kwabo bantu banomdla?

UKWALUSA IZIMVU ZIKATHIXO

NgoJanuwari 1939 kwaqalisa ilungiselelo elitsha labaveleli abahambahambayo. INorway yahlulahlulwa yaba ngamacandelo okanye iziphaluka ezine. Abaveleli besiphaluka (ababebizwa ngokuba ngabaveleli bamacandelo) kwakufuneka bachithe ixesha elingakumbi kwindawo nganye kunokuba bebesenza ngaphambili. Babenikel’ ingqalelo ekuncedeni amabandla, ekumiseleni amabandla amatsha nasekuncedeni abantu abanomdla baqalise ukushumayela. UAndreas Kvinge wamiselwa njengomveleli ohambahambayo kwiSiphaluka 4, esingumgama oziikhilomitha ezingama-2 600 ukusuka eFlorø ukuya eKirkenes. Kulo mmandla mkhulu kwakukho amabandla amathathu kuphela—elaseTrondheim, elaseNamsos nelaseNarvik. Kwakukho abavakalisi namaqela akwanti kunye nabantu abarhumelayo ekwakufuneka bebatyelele.

UAndreas wayehambahamba ngebhayisekile nomfazi wakhe uSigrid. Wayezama ukunceda abavakalisi nabantu abanomdla ukuba benze inkqubela enyanisweni. Oovulindlela abanjengoSolveig Løvås babexelela uAndreas ngabantu abanomdla abafuna ukuncedwa ngokomoya. Ngokomzekelo, wamxelela ngoDag Jensen waseHennes noFrits Madsen okwisiqithi saseAndøya.

Ngowe-1940, xa uAndreas wadibana noDag okokuqala, ngokutsho kuka-Andreas, “wayecheba iindevu yaye enesepha ebusweni. Abukaphumi nangoku engqondweni yam obo buso babuzele lugwebu. Walibala nokuba ebecheba.” UAndreas wanceda uDag wenza inkqubela ngokomoya. UDag wayedlamkile, yaye wanceda umfazi wakhe, uAnna, abahlobo nezalamane zakhe ezininzi zafunda inyaniso.

Kwilali yaseBleik eAndøya, uAndreas wakhangela umlobi oselula uFrits Madsen. Bencedwa nguAndreas, uFrits nomfazi wakhe baba ngabokuqala kwibandla elasekwa apho kamva. Kwezinye iindawo ezininzi, uAndreas nomfazi wakhe batyelela abantu ababeshunyayezwe nguSolveig nangabanye oovulindlela. UAndreas nabanye abaveleli besiphaluka balungiselela ukuba kubekho iintlanganiso baza bamisela amabandla. Njengokuba kwakunjalo nakwibandla lamaKristu lenkulungwane yokuqala, abanye eNorway babetyala, abanye benkcenkceshela, kodwa ngendlela engummangaliso “uThixo wakhulisa.”—1 Kor. 3:6.

IMFAZWE YEHLABATHI II IGUNGQISA INORWAY

NgoAprili 1940, iNorway yanyanzeleka ukuba ingene kwimfazwe yehlabathi yesibini xa yahlaselwa ngumkhosi wamaJamani. Emva kweentsuku nje ezingama-62 zaloo mfazwe, lonke elo lizwe laba phantsi kweJamani yamaNazi. Ngelo xesha, iidolophu ezininzi zazihlaselwe ngamandla. Kwiintsuku ezimbalwa emva koko, amaGestapo avalela umveleli wesebe, uEnok Öman, entolongweni kangangeveki. Amagosa amncina kangangexeshana aza amkhulula. Kwiiveki ezimbalwa kamva amaGestapo aphinda amncina uMzalwan’ uÖman.

Abazalwana babesoyika ukuba amaNazi ayeza kubathumela kwiinkampu zoxinaniso, njengokuba ayenzile eJamani. Kodwa amaNazi akazange ayenze loo nto yaye abavakalisi baqhubeka beshumayela ngokuzimisela nangenzondelelo. Abantu babebonakala benomdla kwiindaba ezilungileyo ngenxa yemfazwe yaye kwaqaliswa izifundo zeBhayibhile (ngoko ezazibizwa ngokuba zizifundo ezingumzekelo) ezininzi. Abazalwana babesazifumana iiMboniselo zesiDanish eDenmark, ngoxa yona iConsolation (iNy Verden) yaqhubeka ishicilelwa ngesiNorway. Abazalwana babesaziqhuba iintlanganiso neendibano yaye okumangalisayo kukuba inani labavakalisi laya lisanda.

UKUTHINJWA, UKUBANJWA NOKUVALWA KOMSEBENZI

Kodwa ke yaqal’ inkathazo. Afika kwakhona amapolisa amaJamani kwiofisi yesebe, afuna uncwadi aza ancina uMzalwan’ uÖman. Kamva ngowe-1940, athimba incwadi ethi Enemies ngenxa yezinto eyayizithetha ngamaFasi namaNazi. Ngasekuqaleni kowe-1941, amapolisa abamba aza ancina oovulindlela abaninzi. Ngamanye amaxesha amaJamani namaNazi aseNorway ayesiya kwiintlanganiso kuba efuna ukwazi okuqhubekayo emabandleni. Emva koko, kwafika amagosa amaNazi aza athimba iincwadana ezinemixholo ethi Fascism or Freedom nethi Government and Peace.

Ngequbuliso, ngoJulayi 1941, amaGestapo enza iinzame zokuba kupheliswe umsebenzi wokushumayela eNorway. Kweza amapolisa amahlanu amaJamani eBheteli, athimba lonke uncwadi olwalulapho aza aya kuncina intsapho yaseBheteli kwikomkhulu lamapolisa. Kwafuneka ukuba uMzalwan’ uÖman aye kuvela emapoliseni suku ngalunye, nto leyo awayenza kangangeeveki ezili-12.

Kwiphulo elalilungiselelwe ngokucokisekileyo, amaGestapo ahlasela imizi yabazalwana aza athimba lonke uncwadi lweWatch Tower Society. Axelela abazalwana ukuba, ukuba abayeki ukushumayela, baya kuphoswa kwiinkampu zoxinaniso. AmaGestapo abamba abazalwana noodade abaninzi aza abavalela kangangeentsuku ezimbalwa.

Amapolisa aseMoss aya ekhayeni likaSigurd Roos aza athimba uncwadi lwakhe. Abamba uSigurd, umkakhe kunye nomnye umzalwana. Abayalela ukuba bayeke ukushumayela nokusebenzisa igama elithi Yehova. Aba bavakalisi bathi abanakuze bayeke ukushumayela ngoYehova noBukumkani bakhe. Ekugqibeleni amapolisa athi: “Siyavuma, asinakulenza nto ukholo lwenu.” Emva kweeyure ezimbalwa, abakhulula aba bavakalisi.

AmaNazi aya nakwikhaya likaOlaf Skau, eOslo. Agqogqa umzi wakhe aza athimba iiBhayibhile, uncwadi neegramafoni. Atshixa nekhabhathi yeencwadi kaOlaf. Amagosa akazange awabone amakhadi engxelo yabavakalisi, awayefihlwe esitovini. Kamva amaNazi abuya ngelori eze kuthatha iincwadi. Inkokeli yawo, uKlaus Grossmann, yayiliSekela loMphathi Mkhosi wamaNazi, owayesoyikwa kunene. Xa uOlaf wabuza uGrossmann ukuba baza kwenza ntoni ngoncwadi lweBhayibhile, wathi baza kulushwabanisa.

UMzalwan’ uSkau wabuza: “Kanti animoyiki uYehova?”

Lingenaxesha lakhe, eli Nazi lathi: “Makalumke loo Yehova!” Kwiminyaka emine kamva, xa amaNazi anikezelayo, uGrossmann wazibulala.

NgoJulayi 1941, amaGestapo abamba uAndreas Kvinge eBodø aza ambuza ukuba aphi amaNgqina akumntla weNorway. Engawaqhathi, uAndreas wawaphendula wathi: “Andiwazi ukuba aphi namhlanje.” Khawufan’ ucinge indlela awavakalelwa ngayo uAndreas xa amagosa aqongqotha ibhegi kwaza kwathi saa amaphepha anamagama neeadresi zamabandla, izicaka zamabandla nabantu abanomdla. Zehla izibilini kuAndreas kwakungabikho mntu ufunda loo maphepha. AmaGestapo ayefuna uAndreas atyobele isivumelwano sokuba akukho mthethweni ukushumayela nokuba liNgqina likaYehova.

UAndreas wathi: “Siyazi ukuba umsebenzi wethu uvaliwe ngoku, ngoko ekuphela kwento endinokuyityobela sisivumelwano sokuba ndiyakwazi oko. Kodwa nakuba singavunyelwa ukuba sibe neentlanganiso size sisasaze amaphephancwadi neencwadi, asizi kuyeka ukusebenzisa iBhayibhile nokuthetha nabantu ngoBukumkani bukaThixo.” Kwathi kwakubonakala ukuba uAndreas akagobi phondo, amaGestapo amkhulula.

Ekugqibeleni, amagosa amaNazi athimba indlu eyayisetyenziswa ngabazalwana njengeofisi yesebe. Avuma ukuba kusale uMzalwana noDade Öman, kodwa amanye amalungu entsapho yaseBheteli kwafuneka ahambe.

UKUHLANGANISANA NAKUBA UMSEBENZI UVALIWE

Xa amaNazi azama ukuwaphelisa amaNgqina kaYehova, abazalwana basuka nje basebenza emfihlekweni. Iqaqobana labazalwana lalityelela abazalwana noodade libakhuthaza. USøren Lauridsen, owayekhonza eBheteli, wayetyelela kumazantsi eNorway. UAndreas Kvinge wayetyelela kumaNgqina akwisiphaluka sakhe kumantla eNorway—esoloko esenza imisebenzi yezingxungxo ukuze angakrotyelwa. Ngowe-1943, uMagnus Randal, owayenguvulindlela kwisikhephe iRuth, wafumana iiadresi kuMzalwana uÖman waza wasinga kumantla ehamba umgama oziikhilomitha ezili-1 200 ngebhayisekile esiya kukhuthaza abazalwana noodade eBodø.

Nangona abasemagunyeni babengavumi ukuba abazalwana noodade bahlanganisane, iqaqobana labo lalidibana ukuze likhuthazane. Kwakudla ngokuhlanganisana iqela elincinane kumakhaya abazalwana, kodwa maxa wambi abaninzi babehlanganisana kwiindawo ezifihlakeleyo. Baba nemincili ngokwenene ngowe-1942 kuba kwabakho abantu abangama-280 kwiSikhumbuzo esasiqhutyelwa kwiindawo ezimbini eOslo, apho kwathabatha abangama-90!

AmaNgqina akwazi nokubamba iindibano ngokufihlakeleyo kwiifama okanye emahlathini. Eyona yayinkulu kwezi ndibano yileyo yayiqhutyelwa kwilali yaseSki ngowe-1943. Kwahlanganisana abazalwana noodade abamalunga nabali-180 abasuka kwindawo ekufutshane neChweba laseOslo. Ebudeni bekhefu, ngoxa abazalwana benandipha izidlo, kwagaleleka amajoni aseJamani amathathu ekhwele amahashe. Babeza kuthini abazalwana noodade?

Umzalwana othetha isiJamani waya kuwo aza amxelela ukuba afuna ukuya kudada kodwa alahlekile. Abazalwana bakulangazelela ngokwenene ukubabonisa indlela.

Elinye lala majoni labuza amanye lisithi: “Nicinga ukuba kudityenwe ngantoni phaya?”

Elinye laphendula lathi: “Mhlawumbi yikwayara ethile.” Abazalwana noodade abazange bazame ukuwaxelela eyona nto eyenzekayo loo majoni kodwa zehla izibilini njengoko loo mahashe ayesithela.

UKUSEBENZA EMFIHLEKWENI

Abavakalisi abaninzi babefihle iimpapasho kwiindawo ezingaqhelekanga. Ibinzana elithi “emfihlekweni” laba nenye intsingiselo xa abazalwana babefihla uncwadi emngxunyeni baze balukhuphe xa lufuneka. UMzalwan’ uSkau, owayesebenza ngezombane, wafihla ibhokisi yeencwadi emva kwetransformer emsebenzini. UMzalwan’ uØiseth yena wazifihla kwindawo yeenyosi, waza uMzalwan’ uKvinge wazifihla kwingxowa yeetapile.

Enexhala lokuba indawo ezifikela kuyo iincwadi eHarstad ingabhaqwa, uLotte Holm waya kuthatha zonke iibhokisi zoncwadi. Wakhwela isikhephe, wapakisha iibhokisi zeencwadi, waza wahlala phezu kwazo. Njengoko isikhephe sasinduluka, uLotte woyikiswa kukubona amajoni amaninzi amaJamani awayekweso sikhephe waza wazama ukucinga indlela aza kuzothula ngayo ezo bhokisi. Noko ke, wayengamele azikhathaze nganto. Ukufika kwesikhephe elunxwemeni, amajoni asizela eli xhegwazana linemithwalo enzima kangaka aza alothulisa zonke iibhokisi, ada aya kuzibeka kwakhe. Loo majoni anobubele ayengayiqondi indlela awayewanceda ngayo amaNgqina ngelo xesha.

Nakuba umsebenzi wawuvaliwe, abazalwana baqhubeka bengenisa iiMboniselo ezisuka eSweden naseDenmark zisiya eNorway. Baguqulela amanqaku ngesiNorway baza bawasasaza kulo lonke elo. Abazalwana babehamba ngoololiwe, iibhayisekile okanye ngezikhephe besisa ukutya kubanquli bokwenyaniso abakwelo lizwe.

BAQHUBEKA BESHUMAYELA

Ngexesha lemfazwe, kwavela ingxaki eyayiza kuvavanya ukholo lwabazalwana noodade eNorway. Xa umsebenzi wethu wavalwayo ngoJulayi 1941, abazalwana bacetyiswa ukuba balumke bangawacaphukisi amagunya amaNazi. Ngoko abanye bashumayela ngokungacwangciswanga kubahlobo nezalamane okanye kubantu ababekhe bathetha nabo ngaphambili. Noko ke, abanye abazalwana babevakalelwa kukuba le ndlela ibenza babe ngathi bayazifihla yaye akukho nto inokwenzeka xa beshumayela kwindlu ngendlu besebenzisa iBhayibhile kuphela. Nangona ayengavumelani ncam ngendlela amele ashumayele ngayo, omabini la maqela ayekufuna ngokwenene ukukhonza uYehova ngokuthembeka nakubeni ayechaswa.

Babeza kwenza ntoni abazalwana? Ngenxa yemfazwe, kwaba nzima ukunxibelelana nekomkhulu lehlabathi eNew York, kungabonakali nokuba le ngxaki iza kulungiswa ngokukhawuleza. Ngaba abazalwana babeza kuvumela ukungaboni ngasonye kwabo kulwenze buthathaka ukholo lwabo? Okanye ngaba babeza kuqhubeka bezibhokoxa kumsebenzi wokushumayela de uYehova nentlangano yakhe bayilungise le ngxaki?

Kuyabonakala ukuba uYehova wayeyisikelela inkonzo yabo, kuba ngexesha lemfazwe intlangano yaba nolwando olufanayo nolweminyaka emihlanu ngaphambi kwayo. Nakubeni kwakukho imfazwe, uvaliwe umsebenzi yaye kushunyayelwa ngeendlela ezahlukahlukeneyo, incopho yabavakalisi yanda isuka kwabangama-462 ngowe-1940 yaya kutsho kwabangama-689 ngowe-1945—nto leyo eyayibangela ukuba abazalwana bavuye!

UKUMANYANA ENKONZWENI KAYEHOVA

Emva kokuba imfazwe iphelile ngowe-1945, uWilliam Dey weza eNorway ngoJulayi nangoAgasti ukuze ancede abazalwana baphinde balungelelanise umsebenzi. UMzalwan’ uDey waqhuba iintlanganiso eOslo, eSkien, naseBergen ebongoza bonke abazalwana ukuba basebenze ngomanyano. Wabakhumbuza ngokuba baye bazibona iintsikelelo zikaYehova nolwando, ngoko bamele baqhubeke benentembelo kulwalathiso lukaYehova.

NgoSeptemba 1945, uNathan H. Knorr, owayekwikomkhulu lehlabathi wadibana noMarvin F. Anderson, inzalelwane yaseDenmark, eyayihlala eMerika neyayineminyaka engama-28 ubudala, eyayikhe yakhonza eBheteli eNew York neyayingumveleli wesiphaluka eUnited States. UMzalwan’ uKnorr wabuza uMzalwan’ uAnderson enoba angakuvuyela kusini na ukuya kunyamekela imicimbi ethile eNorway aze ahlale “iminyaka eliqela.” UMzalwan’ uAnderson wavuma, nangona kwakuza kuthabatha iinyanga eziliqela ngaphambi kokuba afike eNorway.

Kwathi kusenjalo, uMzalwan’ uKnorr noHenschel batyelela eNorway ngoDisemba 1945. Ulwalathiso lwabo lwanceda abazalwana bathandana baza bamanyana ngakumbi. Kanye ngelo xesha, uMzalwan’ uKnorr wabaxelela ukuba uMzalwan’ uDey uza kungena endaweni kaMzalwan’ uÖman njengomveleli wesebe. Kwisithuba esingangenyanga emva koko, uMzalwan’ uAnderson wafika eNorway yaye ngoFebruwari wamiselwa njengomveleli wesebe. Njengokuba iMfazwe Yehlabathi II yayisele idlule, abakhonzi bakaYehova kulo lonke elaseNorway babezimisele ukushumayela ngamandla, beqinisekile ukuba uYehova uza kubasikelela.

INTLANGANO KAYEHOVA IHAMBELA PHAMBILI

UMarvin Anderson wafika kusetyenzwa nzima kwisebe laseNorway. NgoSeptemba 1945, abavakalisi babefumana incwadana enye ngesiNorway nezine ngesiSwedish. Kwinyanga elandelayo, kwapapashwa IMboniselo kaOktobha 1, 1945 ngesiNorway kwaza kwalandela iimpapasho ezininzi.

Esi siganeko silandelayo sibonisa indlela ekwakubaluleke ngayo ukuba noncwadi ngolwimi lwesiNorway. Enye incwadana yesiSwedish yayinomxholo othi Hopp—gama elo elithetha “ithemba” ngesiSwedish. Noko ke, ngesiNorway, igama elithi “hopp” lithetha “ukutsiba.” Kwakufuneka abavakalisi bacacise ukuba isigidimi sethemba abathetha ngaso asiyaleli ukuba abafundi batsiba-tsibe!

Xa uMzalwan’ uAnderson wayeze kuba ngumveleli wesebe ngowe-1946, abantu babexinene, ngoko wayehlala egumbini nabazalwana abahlanu. Abantu abangengomaNgqina ababehlala kweso sakhiwo ukususela ngexesha lamaNazi kwafuneka bafuduswe ukuze kuvuleke indawo yentsapho yaseBheteli eyayisanda.

UMzalwan’ uAnderson wasiqalisa ngodlamko isabelo sakhe esitsha. Kwalungiswa iofisi yesebe kwaza kwathengwa izixhobo ezitsha zokusebenza eziquka umatshini wokushicilela. Ngowe-1946 emabandleni kwaqalisa isikolo esitsha sokufundisa—ISikolo Sobulungiseleli Sobuthixo. Ekugqibeleni, kwakuza kuqeqeshwa abazalwana abangakumbi ukuba balungiselele baze banikele iintetho yaye kungekudala, abaninzi kubo bakufanelekela ukunikela iintetho zesidlangalala.

Emva kwemfazwe, iindibano zokuqala zaqhutyelwa eOslo, eBergen, naseTrondheim ngoSeptemba nango-Oktobha ngowe-1946. Kuzo zonke ezo ndibano zintathu, kwintetho yesidlangalala eyayinomxholo othi “INkosana Yoxolo,” kwakukho abantu abangama-3 011 kwaza kwabhaptizwa abangama-52—inani elincumisayo xa ucinga ukuba ngelo xesha kwakukho abavakalisi abangama-766 eNorway.

NgoDisemba 1946, emva kokuphazamiseka kangangeminyaka engaphezu kwemihlanu, kwaphinda kwaqaliswa umsebenzi wesiphaluka. Abanye abazalwana abaselula, abanye babo ababeseBheteli, bamiselwa njengabaveleli besiphaluka (ngoko ababebizwa ngokuba zizicaka ezikhonza amabandla). Owona msebenzi wabo wawuphambili yayikukuqeqesha abavakalisi kumsebenzi wendlu ngendlu, yaye bazama ukusebenza nabavakalisi abaninzi kangangoko kunokwenzeka kwibandla ngalinye. UGunnar Marcussen, owayengomnye wabaveleli besiphaluka ngelo xesha, uthi kwiveki yotyelelo kwamanye amabandla wayesebenza nabavakalisi abaphakathi kwama-50 nama-70. Ngokuthe ngcembe, abavakalisi baba nobuchule obungakumbi bokunikela isigidimi soBukumkani, baza bayeka ukusebenzisa amakhadi aneentshumayelo kunye neegramafoni, ezazisetyenziswa ukususela kwiminyaka ye-1930. Kwanikelwa ingqalelo engakumbi ekwenzeni amabuyelo nasekuqhubeni izifundo zeBhayibhile.

UKUKHUTHAZA UBUVULINDLELA

Emva kwemfazwe, abavakalisi bakhuthazwa ukuba babe ngoovulindlela ukuze bancede inani elandayo labo babenomdla kwisigidimi soBukumkani. Ngenxa yoko, iqela labavakalisi elayeka ukuba ngoovulindlela xa kwavalwa umsebenzi ngowe-1941 laqala apho beliyeke khona. Nangona kwakunzima kwezoqoqosho, abazalwana noodade abangama-47 babesele bengoovulindlela ekupheleni kowe-1946.

Omnye waba vulindlela yayinguSvanhild Neraal, udade owayeye emantla kwisiphaluka saseFinnmark ngowe-1946. USvanhild wayenguvulindlela apho kunye noSolveig Løvås ngowe-1941 yaye wazibonela ngawakhe ukuqhushumbiswa kweKirkenes neVardø. Yayingaphumi engqondweni kaSvanhild indlela ababenomdla ngayo abantu abadibana nabo noSolveig, ngoko wabuyela eKirkenes, indawo eyayidlakazwe yimfazwe. Abantu basekuhlaleni babecinga ukuba uSvanhild uyaphambana ngokufudukela apho, engenayo nendawo yokuhlala.

Sekunjalo, uSvanhild wayethembele ngoYehova, yaye kubusika bokuqala elapho, wayelala phantsi kwikhitshi lendlu encinci ekwakuhlala kuyo abanye abantu abahlanu. Ubomi basemva kwemfazwe babunzima ngokwenene, yaye wanyamezela izinto ezininzi. Wayedla ngokulinda, kusitshw’ ikhephu nemvula, izikhephe ezazingafiki ngexesha okanye zingafiki kwaukufika.

USvanhild wafumana amava amaninzi abangel’ umdla ekushumayeleni kwakhe kumaSami. Xa engakwazi ukufikelela kwiindawo zawo ezikude ngebhasi, wayedla ngokuya ngesikhephe okanye ngebhayisekile. AmaSami anobubele ayedla ngokummemela ezintenteni zawo ezenziwe ngofele lwenyamakazi aze aphulaphule njengoko ewashumayeza encediswa yitoliki. Ayedla ngokummema nakwisidlo sawo senyama yenyamakazi. Abanye abantu abeva iindaba ezilungileyo ngoSvanhild kamva bayamkela inyaniso.

UKjell Husby, owayeseBheteli ngelo xesha, uthi uSvanhild wayesoloko esaziwa apho akhoyo lisebe ngenxa yeedilesi zemirhumo awayeyithumela. Kwiminyaka emithathu ayichitha eFinnmark, wafumana imirhumo yeMboniselo engama-2 000 waza wahambisa iincwadi ezingama-2 500!

“ABALOBI BABANTU”

Emva kwemfazwe, nabavakalisi abasemabandleni baba nenxaxheba kumsebenzi wokushumayela yaye oko kwaba nemiphumo emihle. Ngexesha lemfazwe, uDag Jensen, okhankanywe ngaphambili, wayeshumayela kubahlobo nakwizalamane kwilali yaseHennes eVesterålen. Abantu abaninzi baba nomdla baza bafunda iBhayibhile besebenzisa uncwadi lwethu. Ukuphela kwemfazwe ngowe-1945, uDag wabhaptizwa. Kunyaka olandelayo, xa kwasekwa ibandla eHennes, kwabhaptizwa abantu abali-16 ekhayeni likaDag. Kwiminyaka emihlanu emva koko, elo bandla lalisele linabavakalisi abangama-50 yaye ngowe-1971, uDag wahambisa ingxelo yokuba kweli bandla kukho oovulindlela abangaphezu kwama-20.

Indlela uDag awayemthanda ngayo uYehova nenzondelelo awayenayo entsimini yayikhuthaza. UÅshild Rønning owakhulela kweli bandla uthi: “Xa uDag engena emzini, wayesoloko onwabile yaye edlamkile. Kwakuba ngathi kungene ilanga kuloo ndlu.” UDag wayesoloko ekhuthaza abantwana, njengaxa beza kunikela intetho kwiSikolo Sobulungiseleli Sobuthixo. UÅshild uthi: “Wayesenza sibone ukuba senze into ebalulekileyo.” Ngenxa yolo khuthazo, ngowe-1962 uÅshild waba nguvulindlela waza naye wavuyiswa kukuxelela abanye ‘ngeendaba ezilungileyo ezizukileyo zoThixo onoyolo, uYehova.’—1 Tim. 1:11.

Yintoni eyabangela ukuba abantu abaninzi kangaka babe ngamaNgqina anenzondelelo? Nangona abaninzi kuloo ndawo babengahambi cawa, babekholelwa kuThixo naseBhayibhileni. Ngaphezu koko, amaNgqina amaninzi ayesaziwa njengeentloko-ntsapho ezizinyamekela kakuhle iintsapho zazo nezixhaswayo ngabafazi bazo abathembekileyo. Enye yezi ntloko-ntsapho yayinguArnulf Jensen, unyana womkhuluwa kaDag, owabhaptizwa ngowe-1947. Phakathi evekini, wayeloba iintlanzi aye kuzithengisa, ngamany’ amaxesha esimka iintsuku eziliqela. Kodwa wayebuyel’ emzini wakhe rhoqo ngooLwezihlanu, nokuba iintlanzi zidlal’ abantwana apho aloba khona, de abanye abalobi basale ukuze benze imali engakumbi. UArnulf wayeqiniseka ukuba uba khona ngeempelaveki ukuze aye kwiintlanganiso aze ashumayele nomfazi wakhe nabantwana abasibhozo—bonke abayimelayo inyaniso. NgeMigqibelo nangeeCawa, abazalwana babeqhubeka nomsebenzi wabo wokuba “ngabalobi babantu,” besoloko besebenzisa isikhephe sika-Arnulf ukuze benze umsebenzi wokuloba abantu kwiindawo ezisemaphandleni.—Marko 1:16-18.

“SASISENZA UMSEBENZI OBALULEKILEYO”

ISikolo seBhayibhile SeWatchtower SaseGiliyadi eNew York sabanceda kakhulu abazalwana baseNorway. UHans Peter Hemstad noGunnar Marcussen abaphumelela eGiliyadi ngowe-1948, babengabafundi bokuqala abasuka kweli lizwe. Babuyela eNorway baza baba ngabaveleli abahambahambayo baya naseBheteli, baza kamva batshata. Ukususela ngowe-1948 ukuya kuma ngowama-2010, bamalunga nama-45 abantu baseNorway abaphumelela kwiSikolo saseGiliyadi. Abangaphezu kwesiqingatha babuyiselwa eNorway baza bakhonza njengabashumayeli bexesha elizeleyo, abaveleli abahambahambayo okanye bakhonza eBheteli.

Abanye abavangeli bokuqala abafika eNorway nabaqeqeshwa eGiliyadi nguAndreas Hansen waseDenmark noKalevi Korttila waseFinland. Ngowe-1951 bathunyelwa eMpuma Finnmark, apho bagubungela ummandla omkhulu ngesikhephe, ngebhayisekile, behamba nasemkhenkceni. Babedla ngokuthetha nabantu ababeshunyayezwe nguSvanhild Neraal kwiminyaka edluleyo. Ngenxa yoko, emva konyaka, abavakalisi baloo mmandla banda ukusuka kwaba-3 ukuya kwabali-15!

UKjell Martinsen waseHennes, eVesterålen waphumelela eGiliyadi ngowe-1953 waza wabuyela eNorway. Xa wayeneminyaka engama-22 ubudala, wamiselwa njengomveleli ohambahambayo eVestfold naseTelemark. Nangona wayesoyika ukuba ngumveleli ohambahambayo emncinane ngolo hlobo, ukhumbula indlela awamkelwa ngokufudumele ngayo nendlela awayesebenzisana ngokunyaniseke ngayo nabazalwana abanamava. UKjell waba ngumveleli ohambahambayo de kwaba ngowama-2001, xa yena nomkakhe, uJorunn baya kuba ngoovulindlela eSvolvær eLofoten.

Ngowe-1950 kwafika uKaren Christensen waseDenmark eze kuba nguvulindlela e-Egersund naseKongsvinger, apho kwakungekho mabandla. Wawuhamba wonke loo mmandla ngebhayisekile. Emva kokuba ephumelele eGiliyadi ngowe-1954, wathunyelwa eKongsberg. Ngowe-1956 watshata noMarvin Anderson yaye ukususela ngoko ebeseBheteli. Ngoku uKaren sele eneminyaka engaphezu kwama-60 ekwinkonzo yexesha elizeleyo. UKaren uthi, “Asibalulekanga nganto, kodwa umsebenzi esiwenzayo ubalulekile.”

UKUPHUMELELA EKULWELENI AMALUNGELO ETHU

Ukususela ngowe-1948 ukusa kowe-1951, ulwando lwaluncumisa ngokukhethekileyo. Ngowe-1951, abavakalisi banda ngama-29 ekhulwini, bafikelela kwincopho yabangama-2 066. Sekunjalo, kwangaxeshanye abakhonzi bakaYehova eNorway basukuzana nabasemagunyeni.

Eyona nto yabangela uchuku yayikukuhambisa IMboniselo esitratweni. NgoNovemba 1949, amapolisa abamba abavakalisi ababeshumayela esitratweni eOslo aza abakhulula emva kweeyure ezimbalwa. Engaphelanga mandla, la maNgqina aphinda aya kushumayela esitratweni ngempelaveki elandelayo. NgoDisemba 6, 1949, kwabanjwa bonke abavakalisi ababeshumayela esitratweni eOslo. Baxelelwa ukuba abamele bahambise amaphephancwadi esitratweni ngaphandle kwemvume yamapolisa. Amapolisa athi lo msebenzi unokubangela isiphithiphithi. Abavakalisi abasixhenxe bancinwa baza basiwa kwinkundla yamatyala, apho bakhethiswa ukuhlawula imali okanye bahlale entolongweni iintsuku ezintathu.

Ngenxa yokuba lo yayingengombandela nje wokufumana imvume yamapolisa, kodwa wawubandakanya ilungelo lokunqula, abazalwana babhenela kwiNkundla Ephakamileyo yaseNorway. Kwiphephandaba iDagbladet, uJohn Roos, owayemela amaNgqina kaYehova kwelo phephandaba wathi ukushumayela kwethu esitratweni akuzange kube yingxaki. Wathi: “Ukuba kushunyayelwa esitratweni kungaphazanyiswa mntu nazimoto, ngaba kuyimfuneko ukucela imvume emapoliseni? Okanye ngaba inkululeko yonqulo inika wonke umntu ilungelo lokushumayela ngolu hlobo?” Ngoxa ayelindele isigqibo seNkundla Ephakamileyo, amaNgqina akazange ayeke ukushumayela esitratweni nakubeni ayebanjwa yaye ehlawuliswa imali engakumbi. Abanye abavakalisi babanjwa izihlandlo ezilishumi.

NgoJuni 17, 1950, iNkundla Ephakamileyo yasihlehlisa isigqibo senkundla yedolophu, baza abavakalisi bakhululwa! Esi nezinye izigqibo zabonisa ngokuphandle ukuba amaNgqina kaYehova anelungelo lokuhambisa uncwadi lweBhayibhile eNorway, esitratweni nakwindlu ngendlu, ngaphandle kwemvume yamapolisa.

IINDIBANO EZINGALIBALEKIYO

Kwiminyaka ye-1950 neye-1960, iindibano ezininzi ezingalibalekiyo zayomeleza intlangano zaza zawamanyanisa amaNgqina. Ezinye izithethi ezazikwindibano eyayiseLillehammer ngowe-1951 nguNathan H. Knorr noMilton G. Henschel, ababesuka kwikomkhulu lehlabathi. Iindwendwe ezisuka kuzo zonke iinxalenye zelo lizwe zathontelana ukuya kuloo ndibano. Zazingayivali imilomo yimincili yokubona kubhaptizwa abantu abangama-89 kwabangama-2 391 ababelapho! Kwiminyaka eyalandelayo iindwendwe ezazivela eNorway zavuyiswa kukuba khona kwiindibano zezizwe ngezizwe eLondon naseNew York. Ngowe-1955, amalunga nama-2 000 amaNgqina aseNorway awayekho kwindibano yezizwe ngezizwe eStockholm, eSweden.

Enye eyayibalasele yindibano yezizwe ngezizwe ‘YeLizwi Lenyaniso’ yowe-1965 eyabanjelwa eOslo eUllevål Stadium. Noko ke, kwakukho ingxaki. Ngobusuku bangaphambi kwendibano, iqela lebhola laseNorway lalidlala neqela lelinye ilizwe. Isihlwele samaNgqina salinda ngaphandle de kwaphuma bonke ababukeli, emva koko sagaleleka ukuze silungise ibala lendibano. Asebenza ubusuku bonke—ecoca, ekhupha inkunkuma yaye emisa iintente zokutya. Akha amaqonga, iindawo zokudlala umculo aza ahombisa ngeendlwana ezifulelwe ngengca. Iphephandaba iDagbladet lathi, “Kwenzeka ummangaliso ebusuku. IUllevål Stadium itshintshwe yaba ngathi yindawo ezolileyo yasemaphandleni . . . Le nto yenziwe ngamaNgqina kaYehova ayikholeleki.”

Abazalwana noodade baseNorway abanobubele bangenisa abazalwana basemazweni abangaphezu kwama-7 000, uninzi lwabo ababesuka eDenmark. Kwamiswa intente ebaleni elisecaleni kwesixeko. Le ntente yayifanelekile, ngoxa imozulu yayintle. Noko ke, kubantu abangama-6 000 ababehlala kuloo ntente kwiintsuku zokuqala zendibano, ayinakukhawuleza ilibaleke imvula eyanetha de ibala laba ludaka. Kwavuya wonke umntu yakuzola imozulu ngeentsuku ezimbini zokugqibela. Phezu kwayo nje loo mozulu imbi, abazalwana basekuhlaleni nabasemzini bakuvuyela ukunxulumana njengamaKristu yaye bahlaziyeka emva kokufumana ukutya kokomoya okufika ngexesha. Baba nemincili emva kokuba kubhaptizwe abantu abali-199 kubantu abangama-12 332 abeza kuphulaphula intetho yesidlangalala eyayinikelwa nguMzalwan’ uKnorr!

“UKUSHUMAYELA KUSEGAZINI KUTHI”

Ukongezelela ekushumayeleni kwindlu ngendlu nasezitratweni, abazalwana noodade abaninzi baye bafumana imiphumo emihle xa beshumayela ngokungacwangciswanga. Ngowe-1936, uKonrad Flatøy owayesebenza kwinqanawa, wanika elinye igosa lenqanawa incwadana. Elo gosa, uPaul Bruun, layamkela loo ncwadana laza layifunda ngobo busuku.

UPaul uthi: “Ndakhawuleza ndabona ukuba le yinyaniso yaye le ncwadana yandibonisa umahluko okhoyo phakathi konqulo lwenyaniso nolobuxoki.” Njengoko uPaul wayeqhubeka efunda, waqalisa ukuthetha nabanye ngezo zinto yaye ebudeni bemfazwe, waqhuba isifundo seBhayibhile nomqhubi wenqanawa owayenomdla. Njengoko ulwazi lwalo mqhubi wenqanawa lwalusiya lukhula, wavakalelwa kukuba akanakuqhubeka esebenzisa imipu ekule nqanawa. Bathi bakuva ngendlela avakalelwa ngayo lo mqhubi wenqanawa, abasemagunyeni bayalela uPaul ukuba ayeke ukumqhubela isifundo seBhayibhile. Wala, waza yena nalo mqhubi bashiywa eLondon. Kwisithuba senyanga emva koko, loo nqanawa yazika emva kokuba idutyulwe. Ekuhambeni kwexesha, loo mqhubi wabhaptizwa, waza yena uPaul wacelwa ukuba aye kwisikolo sabavangeli saseGiliyadi. Ukuphumelela kwakhe ngowe-1954, uPaul wathunyelwa kwiiPhilippines. Kamva, wabuyela eNorway ukuze abe ngumveleli ohambahambayo, exhaswa ngumfazi wakhe, uGrethe.

Ngowe-1948, uHolger Abrahamsen wayesenza umsebenzi wokuthutha abasebenzi ababegutyula kwizibuko laseNarvik. UHolger wayethanda ukuthi: “Ukushumayela kusegazini kuthi. Ukuba besinokungashumayeli, besiya kufa.” Ngeso sizathu, uHolger wayesebenzisa onke amathuba awafumanayo okushumayela kubantu awayebakhwelisa. Omnye wabo bantu, uOlvar Djupvik, waba nomdla waza waxelela intokazi awayeza kutshata nayo, uAnne Lise ngethemba leParadesi. Bobabini babhaptizwa yaye kamva bakhulisa oonyana babo abane baba ngabakhonzi bakaYehova. Omnye wabo, uHermann, ebengumthunywa wevangeli eBolivia nomfazi wakhe, uLaila. UHermann noLaila babuyela eNorway yaye ngoku uHermann ungumveleli ohambahambayo.

UKUNYAMEKELA IZIMVU ZIKAYEHOVA

Ebudeni beminyaka ye-1960 neye-1970, kwaphuculwa iindlela ezithile zokulungelelanisa izinto kwiofisi yesebe nasemabandleni. URoar Hagen wangena ezihlangwini zikaMarvin Anderson njengomveleli wesebe. Ngowe-1969, uThor Samuelsen wabelwa ukuba ibe nguye ovelela isebe. Ngowe-1976, kwamiselwa iKomiti Yesebe eza kuvelela umsebenzi wesebe, uThor Samuelsen, uKåre Fjelltveit noNiels Petersen baba ngamalungu okuqala eKomiti Yesebe yaseNorway.

Ngo-Oktobha 1972, kwamiselwa amaqumrhu abadala ukuze abe ngabalusi bokomoya emabandleni. Kwancedwa amadoda aqolileyo emabandleni ukuba afanelekele ukwenza umsebenzi wokwalusa kwabo basandul’ ukuyamkela inyaniso yeBhayibhile. Ukususela ngoko, uYehova uye wabasikelela abantu bakhe kuba beye bamkhonza ngokunyaniseka phantsi kolwalathiso lwakhe.

AMASAMI AMKELA IINDABA EZILUNGILEYO

Kangangamashumi eminyaka, oovulindlela abaninzi nabanye abavakalisi baye bashumayela iindaba ezilungileyo kumaSami, kuquka abalusi beenyamakazi abakumahewu aseFinnmarksvidda. Nangona uninzi lwamaSami lusithetha isiNorway, ngamanye amaxesha kuye kwafuneka abavakalisi basebenzise iitoliki. Omnye wamaNgqina okuqala owashumayela kakhulu ngolwimi lwamaSami yayinguAksel Falsnes owayenalo igazi lamaSami ethetha isiSami, isiNorway nesiFinnish. Udadewabo, owayephila emzantsi Norway, wayefumene inyaniso waza wamthumela enye yeencwadi zethu, wazifunda. Kwakungekho maNgqina eTroms, apho wayehlala khona, kodwa ngowe-1968 abanye oovulindlela nomveleli wesiphaluka batyelela uAksel baza bamnceda ukuba akhule ngokomoya.

UAksel wayengumvakalisi onenzondelelo. Wayedla ngokukhweza ibhayisekile yakhe esikhepheni kusasa, awele ichweba, aze asebenzise ibhayisekile ukutyelela abantu. Ngenxa yokukwazi kwakhe ukuthetha isiSami, uAksel wakwazi ukunikela ubungqina kumaSami kwezona ndawo zikude zaseFinnmark.

UAksel wayomelele yaye wayehamba imigama emide ekhephini ukuze afikelele amakhaya athe qelele. Ngokomzekelo, ngobunye ubusika wahamba ekhephini ukusuka eKarasjok wawela ihewu waya eKautokeino waza wadlulela eAlta. Eyona nto awayenokuyiphatha yibhegi eyayinezinto zakhe ezimbalwa noncwadi. Emva kweeveki ezimbalwa, wafika ekhayeni labahlobo bakhe eAlta, ehambe umgama oziikhilomitha ezimalunga nama-400 emkhenkceni!

Ekuqaleni kweminyaka ye-1970, amaSami aliqela ayamkela inyaniso. EHammerfest, elinye ibhinqa elingumSami nomyeni walo baqalisa ukufundelwa ngamaNgqina kaYehova. Kungekudala, ezinye izalamane zakhe eAlta zaba nomdla. UArne noMarie Ann Milde, ababengoovulindlela abakhethekileyo eAlta, baqalisa ukufunda iBhayibhile naba bantu banyanisekileyo yaye kwakudla ngokubakho abantu abali-10 ukuya kwabali-12 kweso sifundo. Ekugqibeleni, malunga nesiqingatha sabo saba ngamaNgqina.

UHartvig Mienna, umSami onguvulindlela eAlta, osebenzisa imoto ehamba emkhenkceni ukuze afikelele abantu uthi: “Akululanga ukushumayela kummandla wamaSami. Uhamba umgama omde, yaye abantu abaninzi babambelele kumasiko abo. Kodwa banobubele yaye siye sakwazi ukuqalisa izifundo zeBhayibhile nabo.”

IMINYAKA EKWAKULINDELWE LUKHULU KUYO

Kwabakho ulwando kwinani labavakalisi ukususela phakathi kweminyaka ye-1960 ukusa kweye-1970. Kodwa izinto ezazilindeleke ukuba zenzeke ngowe-1975 zaluvavanya ukholo lwabanye abazalwana. Xa ingazange ifike imbandezelo enkulu ngowe-1975, abanye bayishiya intlangano; phakathi kowe-1976 nowe-1980, lehla kancinane inani labavakalisi. Amanye amaKristu ayedanile, ngoko ayekelela kangangethutyana. Noko ke, abaninzi bavakalelwa njani ngokuqhubeka bekhonza uYehova?

UHans Jakob Lilletvedt uthi: “Zazininzi izinto ezazilindelwe kowe-1975, kodwa ukholo lwam lwalungaxhomekekanga kuzo.”

UJohn noEdith Johansen, amaNgqina angoomakad’ enetha, bathi: “Sazinikela kuYehova singenamhla uthile sicinga ngawo, ngoko akuzange kutshintshe nto.”

ULea Sørensen waqiqa ngelithi: “Ndiza kumkhonza ngonaphakade uYehova. Into yokuba isiphelo sifika ngowe-1975 okanye emva koko ayibalulekanga.”

IOFISI YESEBE ENTSHA

Ngasekupheleni kweminyaka ye-1970, umsebenzi wawusiba mninzi. Kwakufuneka abasebenzi abangakumbi eBheteli nezakhiwo ezingakumbi zokuhlala nokusebenza. Ngenxa yoko, ngowe-1979 iQumrhu Elilawulayo lavuma ukuba kwakhiwe iofisi yesebe entsha ngaseOslo. Ngasekupheleni kowe-1980, abazalwana bafumana isiza esifanelekileyo, eYtre Enebakk, malunga neekhilomitha ezingama-30 ukusuka eOslo.

Ukuze kungabikho zindleko zininzi, kwacelwa amatsha-ntliziyo okwakha kweso siza. Akuzange kube lula ukufumana izixhobo zokwakha, ukulungiselela abantu abamalunga ne-100 ukutya neendawo zokuhlala, nokugqiba wonke loo msebenzi.

Abazalwana noodade basekuhlaleni nabaphuma kwamanye amazwe abangaphezu kwama-2 000 ‘bazinikela ngokuvumayo.’ (INdu. 110:3) Abaninzi banikela ngeetapile, imifuno, iziqhamo, izonka, amaqanda, iintlanzi, iimpahla nezixhobo zokwakha. Abanye bagawula imithi ehlathini, ngoxa abanye babesarha amaplanga kweso siza. Abanye abaninzi babeboleka imali baze banikele ngayo.

Abasebenzi abangamagcisa babencedisa ithutyana nje elincinane, kodwa umsebenzi omninzi wawusenziwa ngamatsha-ntliziyo angawazi kangako umsebenzi. UJohn Johnson, owayefakela izinto zombane uchaza indlela yena nabanye ababezibona bengafanelekanga ngayo. Uthi: “Amatsha-ntliziyo awufunda umsebenzi aza awenza kakuhle. Kwakumangalisa ukubona indlela ezazilungiswa ngayo iingxaki. Kwakubonakala ukuba lo msebenzi walathiswa nguYehova uThixo.”

Ngenxa yokuzimisela kwamatsha-ntliziyo, ububele babazalwana noodade kunye nentsikelelo kaYehova, umsebenzi wenziwa kakuhle. Kwaqalisa ukwakhiwa ekuqaleni kowe-1981, yaye ngoMeyi 19, 1984, uMilton Henschel weQumrhu Elilawulayo weza kunikezela le ofisi yesebe intsha. Lo msebenzi wawubavuyisa abazalwana baseNorway yaye wabenza basondelelana ngakumbi. Kwiminyaka emva kokugqitywa kwesakhiwo, amatsha-ntliziyo amaninzi aba ngoovulindlela abangabancedani okanye abathe ngxi.

UMSEBENZI WOKWAKHIWA KWEEHOLO ZOBUKUMKANI UHAMBELA PHAMBILI

Ngowe-1928 oonyana abane bakwaFjelltvedt bakha iholo yokuqala yabanquli bakaYehova eBergen. Ekuqaleni kweminyaka ye-1980 amabandla amaninzi akha okanye athenga iiHolo zoBukumkani. Kodwa amabandla amaninzi ayesaqasha iiholo ezingekho mgangathweni. Xa kwakusakhiwa isebe, abanye abazalwana babonisana ngendlela yokukhawulezisa ukwakhiwa kweeHolo zoBukumkani. Babesazi ukuba abazalwana baseUnited States naseKhanada babesakha iiHolo zoBukumkani ngeentsuku ezimbalwa, yaye babezibuza, ‘Ukuba abo bazalwana banokwenza oku ngoncedo lukaYehova, kutheni thina singenakukwenza?’

Abanye abazalwana benza imizobo baza babhala neenkcukacha, yaye emva kokwakha iHolo yabo yokuqala eAskim ngowe-1983, ngowe-1984 bakha iiHolo zoBukumkani ezintathu—elaseRørvik, elaseSteinkjer nelaseAlta. Bakwenza njani oku? Babedla ngokwakha iziseko kusengaphambili baze babele amatsha-ntliziyo imisebenzi—angamagcisa nangengawo—ukuze wonke umsebenzi wokwakha ugqitywe ngeentsuku nje ezimbalwa.

Kwiminyaka elishumi eyalandelayo, zimalunga nama-80 iiHolo zoBukumkani ezakhiwayo eNorway. Kamva, abazalwana baseNorway baya kuncedisa ekwakhiweni kweeHolo zoBukumkani ezintathu eIceland. Nangona amabandla amaninzi aseNorway eneeHolo zoBukumkani, umsebenzi usemninzi. Kusafuneka kulungiswe iiholo ezindala, ezinye zandiswe kuze kwakhiwe ezintsha.

“ABAZALWANA BAYE BOMELEZWA”

Ukwakhiwa kweeHolo zoBukumkani kuye kwanceda ekubeni kubekho iindawo ezintle zonqulo, yaye kuye kwanikela ubungqina kubantu basekuhlaleni. Ngokomzekelo, ngowe-1987 abazalwana abathathu baya kudibana namagosa edolophu eFredrikstad befuna ukwakha iHolo yoBukumkani. Loo magosa abahleka abazalwana xa besithi baza kuyigqiba ngeentsuku ezintathu loo holo. Kwangosuku lokuqala, ngoLwesihlanu, amagosa abona ukuba kuza kwenzeka ngale ndlela athethe ngayo amaNgqina. NgoMgqibelo elinye igosa leza neqela lomculo laza laculela abakhi—lizama ukuxolisa. Elinye ibhinqa elalibukele kusakhiwa iHolo yoBukumkani eArendal ngowe-1990 lathi: “Iyamangalisa into yenu maNgqina yokwakha ngokukhawuleza okungaka, kodwa eyona nto indimangalisa kakhulu kukubona indlela enonwabe ngayo.”

Namhlanje zimbini iiKomiti Zenqila Zokwakha ezijongene nokwakhiwa kweeHolo zoBukumkani eNorway. Abazalwana noodade baye bazinikela nakweminye imisebenzi yokwakha emikhulu nefuna ixesha elingakumbi. Ngokomzekelo, ngowe-1991 nowe-1992, abazalwana kwafuneka bandise iofisi yesebe. Ngowe-1994 bakha iHolo yeNdibano ethi ndijonge eOslo. Ngowama-2003, kwakhiwa iHolo yoBukumkani enkulu eBergen, enokusetyenziselwa iintlanganiso zebandla neendibano.

Ukusebenzisana nokumanyana kwala maqela kuye kwanegalelo elihle kubakhonzi bakaYehova. Umzalwana owayencedisa ekwakhiweni kweeHolo zoBukumkani ukususela ngowe-1983 uthi: “Oku kuye kwanceda amabandla ukuba asondelelane ngakumbi. Abazalwana baye bomelezwa—baye baba ngabahlobo bokwenene abakwaziyo nokusebenza kunye.”

UKWANDISWA KOMSEBENZI EBHETELI

Emva kokuba kugqityiwe ukwakhiwa iofisi entsha yesebe, kwafuneka kwandiswe abantu kuze kwenziwe umsebenzi omkhulu wokuxhasa ukushumayela eNorway. Ngokomzekelo, kuye kwaguqulelwa uncwadi olungakumbi kwisiNorway. Ngowe-1996, INguqulelo Yehlabathi Elitsha YeZibhalo Ezingcwele yapapashwa ngesiNorway. (INguqulelo Yehlabathi Elitsha YeZibhalo ZamaKristu ZesiGrike yayisele ipapashwe ngowe-1991.) Sithetha nje lonke uncwadi lwamaNgqina kaYehova lukhona ngesiNorway, kuquka nencwadi ethi Insight on the Scriptures.

Kwesi sakhiwo sesebe sitsha kwakukho nendawo yokurekhoda. Ukususela ngeminyaka ye-1960 imidlalo yayirekhodelwa kwiiHolo zoBukumkani, kwigumbi elingaphantsi kophahla nelingaphantsi kwesakhiwo sokuqala. Babengakwazi ukurekhoda kakuhle kuba babesoloko bephazanyiswa sisandi seemoto ezidlulayo. Kodwa le ndawo intsha yokurekhoda iyakufanelekela ukwenziwa kwemidlalo, iividiyo neengoma zoBukumkani. Kurekhodwa neeMboniselo nooVukani! ngesiNorway yaye kwenziwa iiCD zeBhayibhile nezezinye iincwadi ezikhoyo nakwiwebhusayithi ethi www.pr2711.com.

BAKHONZA APHO BABEFUNEKA KAKHULU KHONA

Ngoxa abavakalisi bebandla beshumayela kubamelwane babo, abanye kunye noovulindlela abaninzi baye baya kwintsimi engabelwanga bani njengaseLongyearbyen ekwisiqithi saseSvalbard. Bambi bafudukela kwimimandla ekwanti, yaye xa kuyimfuneko, babenceda ekumiseleni amabandla.

Ngowe-1950 uFinn watshata noTordis Jenssen, yaye babesazi ukuba kufuneka abavakalisi eHammerfest, esinye sezixeko zehlabathi ezikumantla. UFinn noTordis babengenamali ingako; kodwa babomelele yaye bezimisele, beneebhayisekile. Ngoko basuka eBodø besiya eHammerfest ngezo bhayisekile, uhambo olwathabatha umgama omalunga neekhilomitha ezingama-900. Emva kokuba behambe umgama omalunga neekhilomitha ezingama-450, abahlobo babo babapha imali ukuze bagqibezele olo hambo ngesikhephe. Bakufika eHammerfest, uFinn noTordis baxakeka ngumsebenzi wokushumayela nokumemela abantu kwiintetho zesidlangalala ezazinikelwa nguFinn ngeempelaveki. UYehova wawusikelela umgudu ababewenza, yaye kungekudala bamisela ibandla.

Esinye isithethi esasikwindibano yesithili eTrondheim ngowe-1957 sakhuthaza abavakalisi ukuba bacingisise ngokufudukela kwindawo ekufuneka abavakalisi kuyo. UViggo noKaren Markussen ababehlala eStavanger babenikele ingqalelo epheleleyo kwesi sithethi, yaye uViggo waqhwetha uKaren. UKaren waqonda ukuba uthetha ukuthini. Wazixelela oku, ‘Iintsuku zethu zibaliwe apha eStavanger.’ Kodwa ngaba iintombi zabo ezintathu ezineminyaka ephakathi kweli-11 neli-14 ubudala nezazingabavakalisi zaziza kufuna ukufuduka?

Emva kwendibano aba bakwaMarkussens bancokola ngale ntetho, baza bonke bavumelana ukuba banokukwazi ukuya kukhonza apho kukho imfuneko. Bafaka isicelo kwiofisi yesebe baza bacelwa ukuba baye eBrumunddal, apho kwakungekho bandla. Ngoko ngowe-1958, uViggo noKaren bathengisa indlu yabo, yena uViggo wathengisa ivenkile yakhe yefanitshala, yaza intsapho yafudukela kwindlu yamaplanga kufuphi neBrumunddal. UYehova wawusikelela umoya wabo wokuzincama, yaye kwiminyaka eyalandelayo, izifundo zabo ezininzi zayamkela inyaniso. Athi amantombazana akuya kuzimela, uViggo waba ngumveleli wesiphaluka, kwakusele kukho ibandla elincinane elinabavakalisi abamalunga nama-40 eBrumunddal.

Abazalwana abangatshatanga abaselula baye bakwazi ukwenza okungakumbi kumsebenzi wokushumayela ngoBukumkani ngokufudukela kwiindawo ezingenamabandla. Ngowe-1992 iqela labazalwana laba ngoovulindlela, uninzi lwabo luneminyaka emalunga neli-19 ubudala, lafudukela eMåløy eNord Fjord, ukuze livuselele umdla wabantu balapho. Baxakeka ngumsebenzi wokushumayela yaye baqalisa ukuqhuba iintlanganiso kumzi ababewuqashile. Elinye ibhinqa ababefunda nalo lalinobubele kakhulu laza labaphatha njengabantwana balo aba bazalwana baselula. Kamva omnye umdala nomfazi wakhe bafudukela eMåløy kwaza kwamiselwa ibandla. Aba bazalwana babesinandipha isabelo sabo, beqhuba izifundo, benezabelo emabandleni yaye besomeleza ibandla elitsha. Omnye wabo uthi: “Saba nexesha elimnandi yaye elo yayilithuba elihle lokukhula ngokomoya.” Ngenxa yokusebenza nzima kwaba bazalwana nabanye, ngoku kukho abavakalisi abamalunga nama-30 kwiBandla laseNord Fjord, yaye baqhuba izifundo zeBhayibhile eziphakathi kwama-50 nama-60.

UKUSHUMAYELA NGEZINYE IILWIMI

Kwiminyaka engama-20 nangaphezulu edluleyo, bebesanda abantu basemzini abahlala eNorway. Ngoko amabandla aye azimisela ukubashumayeza ngolwimi lwabo okanye ngolwimi abaluqondayo. IBandla lokuqala elisebenzisa ulwimi lwasemzini eNorway, elamiselwa ngowe-1986 lalibizwa ngokuba liBandla lesiLatin laseOslo, kuba lalinabantu abathetha isiSpanish nesiPhuthukezi, inkoliso yabo isuka eLatin America. Kwangaxeshanye, abanye abavakalisi baqalisa ukushumayela kubantu abathetha isiNgesi kwingingqi yaseOslo. Badibana nabantu abaninzi abanomdla, ingakumbi abasuka eAfrika naseAsia. Abanye babebafumana kumsebenzi wamaphephancwadi; abanye badibana nabo kwiindawo ezifikela kuzo iimbacu. Babesebenzisa neencwadi zefowuni ukuze bafumane abantu abanamagama angaqhelekanga ekusenokwenzeka ukuba bathetha isiNgesi. Kwaqaliswa izifundo zeBhayibhile ezininzi, yaye ngowe-1990 kwamiselwa iBandla lesiNgesi eOslo.

Ukususela ngelo xesha, abavakalisi abaninzi baseNorway baye bafunda iilwimi zasemzini. Bekunye nabavakalisi basemazweni, baseka amaqela namabandla abantu abathetha isiArabic, isiNgesi, isiPersia, isiPolish, isiPunjabi, isiRashiya, isiSerbo-Croatia, iSpanish, isiTagalog, isiTamil, isiTshayina nesiTigrinya.

Nentsimi yabentetho yezandla yanda. Bangamawaka ambalwa abantu abazizithulu abasebenzisa iNtetho Yezandla yaseNorway, yaye intlangano izimisele ukubanceda. Kwiminyaka ye-1970 abazalwana baqalisa ukutolikela iintetho zeentlanganiso nezeendibano ezinkulu nezincinane kwintetho yezandla, yaye ukususela ngoko, abavakalisi baye bayifunda intetho yezandla. Kumabandla amaninzi kwasekwa amaqela abentetho yezandla, yaye ngowama-2008 kwamiselwa ibandla lokuqala lentetho yezandla eOslo. Kulo lonke elo kukho abavakalisi abazizithulu abamalunga nama-25, abakuvuyelayo ukusebenzisa iimpapasho zeNtetho Yezandla yaseNorway nezifumaneka ngeDVD.

IIKOMITI ZOKUNXIBELELANA NEZIBHEDLELE

Ngenxa yokuba amaNgqina kaYehova engalamkeli igazi, maxa wambi bekuba nzima ngezigulane ezingamaNgqina ukufumana unyango ezilufunayo nezilungele ukulamkela. Ukuze kuncedwe amaNgqina kule ngxaki kuze kufunyanwe inkcazelo ngonyango olunokusetyenziswa endaweni yegazi, ngowe-1990 intlangano yaseka iiKomiti Zokunxibelelana Nezibhedlele [Hospital Liaison Committees (HLC)] eNorway. Ukususela ngowe-1990 ukusa kowama-2010, abazalwana abakwiHLC yaseOslo babamb’ iintlanganiso izihlandlo ezimalunga nama-70 nabezonyango kwizibhedlele ezikwingingqi yabo baza bancedisa kubantu abamalunga nama-500. Imigudu yabo iye yabanceda bakwazi ukuqhagamshelana noogqirha abaninzi abanentsebenziswano, yaye inkcazelo yezonyango yeHLC iye yabangela ukuba oogqirha abaninzi basebenzise olunye unyango endaweni yegazi. Uncedo olunikelwa Ngamaqela Atyelela Abaguli nalo luxatyiswa kakhulu zizigulane nezalamane zazo.

Umzekelo kaHelen, udade oselula onguvulindlela ubonisa indlela elixabiseke ngayo ilungiselelo leHLC. Ngowama-2007 wagula kakhulu waza wathunyelwa esibhedlele. Wayephelelwa ligazi, yaye abezonyango babefuna ukuba atofelwe igazi, besithi le kuphela kwento anokuyenza ukuze aphile. Ngoncedo lomzalwana okwiHLC wasiwa kwesinye isibhedlele esikhulu nesinazo zonke izixhobo zonyango. Ukufika kukaHelen nonina kweso sibhedlele, babelindwe ngumzalwana okwiHLC, owabakhuthazayo waza waqinisekisa ukuba bafumana uncedo. Isibhedlele savuma ukunika uHelen unyango oluncedisa ekwakheni iiseli ezibomvu zegazi. Kwiintsuku nje ezimbalwa, igazi labuya, yaye wachacha. Ngoku uHelen ungumqabaqaba, yaye uchaza indlela ayixabisa ngayo into yokuba isibhedlele sazihlonela iinkolelo zakhe. UHelen nonina bathi, “Soze siyilibale indlela esebenza ngayo intlangano kaYehova nendlela abazalwana noodade abasixhasa ngayo baze basithandazela yaye siya kusoloko sinombulelo.”

UKUJAMELANA NOKUHLASELWA NGABEENDABA

Phakathi kowe-1989 nowe-1992 amaNgqina kaYehova aseNorway ayegculelwa kumaphephandaba nakumaphephancwadi, koonomathotholo nakumabonwakude. Enye into eyabangela oku yayikukuthobela kwethu umthetho weBhayibhile ophathelele abantu abasusiweyo kubudlelane. (1 Kor. 5:9-13; 2 Yoh. 10) Ngenxa yokuba kuthethwa kakubi ngawo, amaNgqina ayenyamezela ukugculelwa ziintsapho nasentsimini, emisebenzini nasezikolweni. Nangona ukungcikivwa kungabothusi abafundi bakaYesu, kwakunzima.—Mat. 5:11, 12.

Omnye umzalwana uthi, “Kwakunzima, kodwa zazikho iingenelo. Ndatsho ndaphinda ndacingisisa ngeenkolelo zam ezisekelwe eZibhalweni. Kwalomeleza ukholo ukucinga ngokutya kokomoya esikufumana kwikhoboka elithembekileyo neliyingqondi. Ngenxa yoko, ndicinga ukuba siye somelezelwa ukujamelana nokuvavanywa kokholo lwethu.”

Omnye umveleli wesiphaluka uthi, “Kwakukhuthaza ukubona indlela abanesibindi ngayo abazalwana noodade ngelo xesha. Saqonda ukuba eyona nto sinokuyenza kukuzibhokoxa entsimini nakumsebenzi wamaphephancwadi. Okuvuyisayo kukuba, amaNgqina amaninzi akazange atyhafe.”

Ngokwahlukileyo kwindlela echaseneyo neZibhalo abacinga ngayo abeendaba, phawula indlela omnye umntu owayekhe wasuswa kubudlelane awavakalelwa ngayo ngoko kuthethwa yiBhayibhile ngokususwa kubudlelane. UFred uthi, “Ukususwa kwam kubudlelane xa ndandineminyaka engama-20 ubudala, ndaqalisa ukucinga nzulu ngobomi bam. Kwakungekho mnandi, kodwa ukususwa kubudlelane kwandinceda. Kwakungathi uYehova uthi: ‘Kuza kufuneka ulungise iindlela zakho nyana! Ukuba akuzilungisi, uza kuba sengxakini.’ Ndafunda isifundo esabangela ukuba ndilishiye ikhondo elibi. Kunokuba ndiziyolise ngobumnandi, ndaqalisa ukuyixabisa inyaniso. Ngaphezu koko, abanye abahlobo bam batshintsha indlela abacinga ngayo.” Okuvuyisayo kukuba, uFred waguquka, watshintsha iindlela zakhe, wabuyiselwa. Ngoku ungumdala.

“UKULUNGELA UMHLA KAYEHOVA”

Nakuba uninzi lwabantu luthanda izinto eziphathekayo yaye lungenamdla, abakhonzi bakaYehova bayaqhubeka bebeka izinto zokomoya ezomeleza ukholo kuqala ebomini babo, njengokufunda iBhayibhile rhoqo nokuya kwiintlanganiso zebandla. Abavakalisi abaninzi baba ngoovulindlela abathe ngxi. Omnye umzalwana wachaza indlela ababevakalelwa ngayo abaninzi ngokuthi: “Ukuba ngomso andikawulungeli umhla kaYehova, andinakuze ndiphinde ndiwulungele. Kufuneka sihlale siwulungele. Ngeny’ imini uza kufika.” Alithandabuzeki elokuba esi simo sengqondo siye sanegalelo kulwando obelubonakala ukususela ngowama-2001.

Elinye ilungiselelo lokomoya eliye lanceda amabandla neliye lafundisa abazalwana abaninzi izinto zobuthixo siSikolo Sokuqeqesha Abalungiseleli (ngoku esibizwa ngokuba siSikolo SeBhayibhile Sabazalwana Abangatshatanga). Omnye umfundi uthi, “Ithuba esalifumanayo lokufunda iBhayibhile nzulu kangangeeveki ezisibhozo, landenza ndayazi inyaniso ngendlela endingazange ndiyazi ngayo. Yonke into eseBhayibhileni yacaca okwekat’ emhloph’ ehlungwini!” Kwiminyaka engamashumi amabini edluleyo, abangaphezu kwabangama-60 abaphumeleleyo, baye bomeleza amabandla baza bawakhuthaza ukuba asebenze ngakumbi.

BAKHULISWA NGAMANGQINA KAYEHOVA

Ukutyhubela iminyaka, abantu abaninzi abaye babhaptizwa baba ngamaNgqina kaYehova bafunda inyaniso yeBhayibhile kubazali babo. Abanye abavakalisi baseNorway basisizukulwana sesithathu, sesine okanye esesihlanu samaNgqina. UIvan Gåsodden, osisizukulwana sikaIngebret Andersen, uMfundi weBhayibhile wokuqala eSkien uthi, “Bendihlala ndicinga ngendlela ekumnandi ngayo ukuzalwa yintsapho ekubeka kwindawo yokuqala ukukhonza uYehova. Ukufunda nokufundisisa iBhayibhile rhoqo nokuba nabahlobo abanosukelo olufana nolwam kwandinceda ndayimela inyaniso.” Oonyana bakaIvan, uAndré noRichard, nabo bayayixabisa inyaniso abayincance ebeleni.

UBente Bu onguvulindlela nongumzukulwana kaMagnus Randal, owayenguvulindlela kwisikhephe iRuth uthi: “Iyandivuyisa indlela obaqalisa ngayo ubomi bam. Le ndlela ndabuqalisa ngayo iye yandisindisa kwiingxaki ezininzi, yaye ndifuna ukusebenzisa ubomi bam ukuze ndincede abantu.”

Abanye ababengabambelelanga enyanisweni ngexesha lobutsha babo baba ngamaNgqina kaYehova azinikeleyo bakuba badala. Ngokomzekelo, uThomas noSerine Fauskanger baseBergen, bakhuliswa ngabazali abangamaNgqina, kodwa abazange benze nkqubela ingako. Yintoni eyabangela ukuba batshintshe indlela ababekujonga ngayo ukunqula uYehova?

UThomas uthi, “Ngowama-2002 ebandleni kwafika omnye umzalwana oselula owayevela kwiSikolo Sokuqeqesha Abalungiseleli. Wandinceda ndakhuthala entsimini ndaza ndanosukelo lwezinto zokomoya.”

Xa wayeneminyaka engama-25, uThomas watshata noSerine, yaye ngowama-2007 bafudukela eBåtsfjord, eFinnmark, ukuze bancede isibini esingoovulindlela. Kungekudala nabo baba ngoovulindlela. Ngowama-2009 bachitha iinyanga ezintathu kumhlaba okwanti kwilali yaseKjøllefjord, apho bona nabanye abavakalisi baqalisa izifundo zeBhayibhile ezingaphezu kwama-30. Emva koko uThomas noSerine bafudukela eKjøllefjord besiya kunceda abantu abanomdla. Ukuze bakwazi ukwenza oko kufuneka bahambe umgama oziiyure ezintathu ezinesiqingatha ngemoto. Baxakekile bona, kodwa uSerine uthi: “Ubomi bam abuphithizeli yaye ndonwabile. Sinezinto ezimbalwa kodwa neengxaki zimbalwa.”

UKUKHANGELA PHAMBILI SINOKHOLO KUYEHOVA

Izinto ziye zatshintsha eNorway ukususela oko uMfundi weBhayibhile uKnud P. Hammer nabanye baqalisa ukushumayela. Ekuqaleni, abakhonzi bakaYehova babahlukile kuba babefundisa inyaniso yeBhayibhile kubantu abathanda unqulo nabalawulwa ziicawa ezinempembelelo nezifundisa ubuxoki. Kwiminyaka edluleyo, inkitha yabantu abanyanisekileyo iye yakuvuyela ukufunda ngeBhayibhile yaza yalumela unqulo lokwenyaniso.

Ngoku itshintshile indlela abantu abalujonga ngayo unqulo eNorway. Bambalwa abantu abakholelwa kuThixo, yaye abafuni nokuyiva into yokuba lunye kuphela unqulo lokwenyaniso. Kufuna ixesha nomgudu ukuba umntu onomdla azi iBhayibhile aze abe nokholo kuThixo neBhayibhile. Kufuna ixesha elingakumbi ukufunda indlela yokuphila ngemilinganiselo yeBhayibhile. Sekunjalo, uYehova uyaqhubeka etsala abantu abanyanisekileyo, enoba bahlala kwiilali ezikwanti okanye ezidolophini.—Yoh. 6:44.

Njengokuba kunjalo ehlabathini lonke, amaNgqina kaYehova ayalixabisa “ilungelo lokunikela inkonzo engcwele” kwiNkosi enguMongami uYehova. (Luka 1:74) Njengoko ekhangela abantu abanotyekelo olufanelekileyo kulo mmandla mkhulu, akrotyiswa ubuhle beparadesi obukhamnqisayo noxolo uMdali awayefuna lubekho kumhlaba wonke. Bekunye nabazalwana noodade abathembekileyo emhlabeni wonke, abanquli bakaYehova baseNorway balujonge ngamehlw’ abomvu usuku lwaxa uBukumkani bukaThixo buya kuqinisekisa ukuba ukuthanda kukaThixo kwenziwa kulo lonke elimiweyo.—Dan. 2:44; Mat. 6:10.

[Amagama acatshulweyo akwiphepha 106]

Loo nto ayizange imtyhafise—wayesuka nje aye kwiintlanganiso enganxibanga zihlangu!

[Amagama acatshulweyo akwiphepha 111]

“Ndalala ndingumPentekoste ndavuka ndifuna ukuba liNgqina likaYehova”

[Amagama acatshulweyo akwiphepha 122]

“Siyavuma, asinakulenza nto ukholo lwenu”

[Amagama acatshulweyo akwiphepha 157]

‘Kuza kufuneka ulungise iindlela zakho nyana! Ukuba akuzilungisi, uza kuba sengxakini.’

[Ibhokisi/Umfanekiso okwiphepha 90]

Amagqabantshintshi NgeNorway

Ukuma Komhlaba

INorway idume ngamachweba ayo athi ndijonge neentaba ezikushiya ubamb’ ongezantsi kwanamawakawaka eziqithi. Xa ungalidibanisi nesiqithi saseSvalbard esiphakathi kweNorway neNorth Pole, eli lizwe ligubungela umhlaba ongaphezulu kancinane kweItali. Nangona ingqele yaseNorway ikhe iqhaqhazelise amazinyo, ngakumbi kumntla weArctic, imisinga nomoya oshushu weAtlantic ubangela ukuba imozulu yalapha ibe ntle xa ithelekiswa namanye amazwe akwindawo efanayo.

Abantu balapha

Inkoliso yabantu balapha abazizigidi ezintlanungabemi bomthonyama yaye abamalunga ne-10 ekhulwini ziimbacu. Inkoliso yamaSami (awayesaziwa njengamaLapp) asaphila ngokuloba, ukuzingela, nokuthiyela.

Ulwimi lwabo

Ulwimi oluthethwayo, isiNorway, lubhalwa ngeendlela ezimbini—iBokmål (Ulwimi Olubhalwayo), esetyenziswa yinkoliso yabantu balapha nesondeleyo kwisiDanish, neNynorsk (IsiNorway Esitsha).

Indlela abazixhasa ngayo

Eyona ndlela eli lizwe lifumana imali ngayo kukuthengisa ioli, ipetroli nokuba nemizi-mveliso. Eyona nto ithengiselwa amanye amazwe yintlanzi. Umhlaba ekulinywa kuwo umalunga nesithathu ekhulwini.

Ukutya kwabo

Okona kutya kwabo yintlanzi, inyama, iitapile, isonka nezinto ezenziwe ngobisi. Ukutya okwaziwayo kwabantu basemaphandleni yiFårikål (isityu senyama yegusha nekhaphetshu). Ngenxa yokufika kweembacu ezininzi kwiminyaka yakutshanje, kutyiwa nezinto ezivela kwamanye amazwe.

[Ibhokisi/Umfanekiso okwiphepha 95, 96]

Wazibhokoxa Ekukhonzeni UYehova

UTHEODOR SIMONSEN

WAZALWA Ngowe-1864

UBE NGUMFUNDI WEBHAYIBHILE UKUSUSELA Ngowe-1905

INGXELO YOBOMI Owayesakuba ngumshumayeli waseFree Mission waza waba ngumveleli ohambahambayo

◼ XA UTHEODOR wafunda kwiimpapasho zethu ukuba imfundiso yesihogo somlilo iyaphikisana neBhayibhile, waqalisa ukubhenca le mfundiso yobuxoki kwiintshumayelo awayezinikela kwicawa yakhe—nto leyo eyawavuyisayo amarhamente amaninzi. Kodwa ngenye imini, wathi akugqiba ukushumayela, wanikwa iphepha elalisithi, “Le ibiyintshumayelo yakho yokugqibela!”

UTheodor wagqibelisa ukushumayela kwicawa yaseFree Mission ngowe-1905, waza kwangaloo nyaka waba nguMfundi weBhayibhile. Emva koko, wanikela uthotho lweentetho kumakhulukhulu aBafundi beBhayibhile ababenoxabiso. Wayepeyinta izindlu ukuze axhase intsapho yakhe, ngoxa ngeempela-veki wayeshumayela yaye efundisa. Waba ngumfundisi ophum’ izandla ngenxa yokuba wayeyazi kakuhle iBhayibhile, ethetha ngokuzolileyo yaye ebaqiqisa abantu. Wayecula kamnandi yaye wayedla ngokuqalisa aze avale iintetho zakhe ngengoma edlala nekitara yakhe.

Ngowe-1919, iimeko zakhe zamvumela ukuba abe ngumveleli ohambahambayo. Waba nguye de kwangowe-1935, etyelela amabandla eNorway, eDenmark naseSweden. Lo msebenzi wawumqoba, kuba ngaphezu kokukhuthaza amabandla namaqela akwanti, kwakufuneka anikele iintetho kwiidolophu apho kwakungekho Bafundi beBhayibhile. Ngokomzekelo: Kolunye uhambo lweenyanga ezili-12, kwakufuneka atyelele iindawo ezili-190 ezaziphakathi kweKristiansand esemazantsi neTromsø esemantla. Ngaloo mihla, abaveleli abahambahambayo babehlala usuku okanye iintsuku ezimbini kwiindawo ezininzi baze badlulele kwelandelayo. Babehamba ngayo nantoni na ekhoyo.

Nakuba iindawo ezininzi awayezityelela zazinaBafundi beBhayibhile, kwakufika abantu abaninzi abanomdla xa enikela intetho yesidlangalala. Ngokomzekelo, xa wayetyelele eBodø ngowe-1922, washumayela noAnna Andersen, uvulindlela owayetyelele apho, baza bamemela abantu kwintetho yesidlangalala. UJohan no-Olea Berntsen baba nomdla. Emva kwentetho bamema uTheodor noAnna ekhayeni labo ukuze baphendule imibuzo abanayo ngeBhayibhile. Emva koko, abakwaBerntsen baba ngaBafundi beBhayibhile bokuqala eBodø.

UTheodor wayerekhoda iintetho ezininzi zegramafoni ezazisenziwa ngesiNorway ngeminyaka ye-1930. Wakhonza ngokuthembeka de waligqiba ikhondo lakhe lasemhlabeni ngowe-1955.

[Ibhokisi/Umfanekiso okwiphepha 102]

‘Wahamba NoThixo’

UENOK ÖMAN

WAZALWA Ngowe-1880

WABHAPTIZWA Ngowe-1911

INGXELO YOBOMI Waba ngumveleli wesebe ukususela ngowe-1921 ukusa ngowe-1945.

◼ XA UENOK waseSweden wayeselula, ingxelo yeBhayibhile ethetha ngendlela uEnoki ‘awaqhubeka ehamba noThixo oyinyaniso ngayo’ yamchukumisa. (Genesis 5:22) UEnok wayefuna ukuxelisa ugama wakhe oseBhayibhileni. Xa wayeneminyaka engama-31 ubudala, wafunda umqulu wokuqala weStudies in the Scriptures, waza wafunda ngakumbi ngokuhamba noThixo. Wabhaptizwa waba nguMfundi weBhayibhile waza waba nguvulindlela. Kamva waba kwiofisi yesebe yaseSweden.

Ngowe-1917, uEnok wemka eSweden waya kwiofisi yesebe yaseNorway yaye ekuqaleni kowe-1921, wamiselwa ukuba avelele umsebenzi eNorway. Ngelo xesha iofisi yeWatch Tower Society yayikwigumbi elinye lesakhiwo apho uDade Maria Dreyer wayenendawo ahlala kuyo kunye neshishini lokulungisa iinzipho. Emva kokutshata kukaEnok noMaria ngowe-1922, basisebenzisa sonke eso sakhiwo njengeofisi yesebe. Basebenza kunye eBheteli de uMaria wafa ngowe-1944. Ngowe-1953, uEnok waphinda watshata waza waba nguvulindlela kwakhona. UEnok, owayesoloko ejolise amehlo akhe kwithemba lokuphila ezulwini, ‘wahamba noThixo’ de wafa ngowe-1975.

[Ibhokisi/Umfanekiso okwiphepha 110]

“Wayelukhuthazo”

UWILHELM UHRE

WAZALWA Ngowe-1901

WABHAPTIZWA Ngowe-1949

INGXELO YOBOMI Wayengumshumayeli okhutheleyo nangona wayenesifo sezihlunu

◼ UWILHELM wayenesifo sezihlunu esambulala imilenze saza senza kwanzima ngaye ukuthetha. Nakuba kunjalo, wathi akuva iindaba ezilungileyo kwiminyaka ye-1930, waqalisa ukuxelela abanye ngenyaniso emangalisayo ayifundayo. Wayedla ngokuya kushumayela ngebhayisekile enamavili amathathu ehamba ngenjini, esoloko esiya kudlala iintetho zeBhayibhile ezirekhodwe ngegramafoni aze ahambise uncwadi kwizibuko laseSortland, eVesterålen. Ngenxa yesiphene awayenaso uWilhelm, nangenxa yokuba wayekude kwamanye amaNgqina, wabhaptizwa ngowe-1949. Kodwa wayengumshumayeli onenzondelelo. Abantu abaninzi ababehamba ngaselunxwemeni bayiva kuye inyaniso yaye abanye baba ngamaNgqina kaYehova.

Ekwaluphaleni kwakhe, uWilhelm waya kuhlala kwikhaya labalupheleyo eTromsø. Encediswa ngabanye abavakalisi, waqhubeka eshumayela ngeeleta. Ngenxa yobuntu bakhe, wayebakhuthaza abanye kuquka nabo basebenza kwikhaya labalupheleyo. Emva kokufa kwakhe, umphathi welo khaya wathi: “Kwakusivuyisa ukuya egumbini lakhe. Ngenxa yokholo lwakhe, wayelukhuthazo.”

[Ibhokisi/Umfanekiso okwiphepha 113]

Wasigcina Isithembiso Sakhe

UJOHANNES KÅRSTAD

WAZALWA Ngowe-1903

WABHAPTIZWA Ngowe-1931

INGXELO YOBOMI Wayenguvulindlela esikhepheni iminyaka esibhozo

◼ NGOWE-1929, uJohannes wayechacha kwi-TB esibhedlele. Waqalisa ukufunda iBhayibhile waza wathembisa uThixo ukuba uya kumkhonza akuphila.

Kanye ngaphambi kokuba aphume esibhedlele, uJohannes wafunda ezinye zeencwadi zaBafundi beBhayibhile ngomdla. Kamva wafuna iincwadi ezingakumbi, efunda nganye yazo izihlandlo ezine okanye ezihlanu yaye kungekudala emva koko, wayexelela abanye ngenyaniso ayifundileyo. Wathi akuphila, waya eBergen kuMzalwan’ uRingereide, owamcebisa ukuba abe nguvulindlela. Nangona uJohannes wayesandul’ ukuqalisa ukushumayela, akazange abe mathidala ukuba nguvulindlela.

Ukususela ngowe-1931 ukusa kowe-1938, wayenguvulindlela esebenzisa isikhephe iEster, kangangesithuba sonyaka wasebenzisa iRuth, ehamba ngakunxweme esiya kumantla de waya kufika eTromsø. Ngowe-1939, uJohannes waba ngumveleli ohambahambayo kwinxalenye engakwimpuma yaseNorway, ngoxa wayemana ukusebenza eBheteli. Emva kweMfazwe Yehlabathi II, watshata noSigrid baza bangoovulindlela kunye. Ngowe-1995, uJohannes waligqiba ikhondo lakhe lasemhlabeni eseFredrikstad.

[Ibhokisi/Umfanekiso okwiphepha 132]

Ukushumayela Kwiindawo Ezithe Tyaba

URANDI HUSBY

WAZALWA ngowe-1922

WABHAPTIZWA ngowe-1946

INGXELO YOBOMI Ube kwinkonzo yexesha elizeleyo ukususela ngowe-1946.

◼ ABAZALI bakaRandi babhaptizwa ngowe-1938 baba ngamaNgqina kaYehova yaye kamva, uRandi wenza isigqibo sokukhonza uYehova. Ngowe-1946, waya kukhonza eBheteli, apho wafika wadibana nomzalwana oselula uKjell Husby. Wathandana noKjell, batshata baza baba ngoovulindlela. Baba kwiinxalenye ezahlukahlukeneyo zenkonzo yexesha elizeleyo de kwasekufeni kukaKjell ngowama-2010.

Kutshanje, imilenze kaRandi ibisenza kube nzima ngaye ukusebenzisa izinyuko okanye ukunyuka emaqhineni. Kodwa uhamba kakuhle kwiindawo ezithe tyaba yaye usoloko eshumayela ezitratweni nakwiivenkile zaseTrondheim. Ukuze athethe nabo bonke abantu adibana nabo ngeendaba ezilungileyo, uRandi uyaqiniseka ukuba uphatha uncwadi ngeelwimi ezimalunga nesibhozo. Kwakhona, abahlobo bakhe abasebandleni badla ngokumthatha ngemoto bamse kubantu abawamkela rhoqo amaphephancwadi akutshanje.

URandi akasakwazi ukushumayela ngendlela awayekade eshumayela ngayo. Kodwa uqhubeka evuyiswa yaye esaneliswa kukukhonza uYehova ngentliziyo yakhe yonke, esazi ukuba akanakuze ‘awulibale umsebenzi wakhe nothando alubonisayo ngegama lakhe.’—Heb. 6:10.

[Ibhokisi/Imifanekiso ekwiphepha 149, 150]

Wafumana Amandla Aguqulayo ELizwi LikaThixo

UVIKTOR UGLEBAKKEN

WAZALWA Ngowe-1953

WABHAPTIZWA Ngowe-1981

INGXELO YOBOMI Wayesisaphuli-mthetho, esakhululeka ekuphathweni kakubi ziidemon nasekusebenziseni kakubi iziyobisi.

◼ UVIKTOR waqalisa ukutshaya intsangu nezinye iziyobisi eselula waza wasisaphuli-mthetho. Wayesoloko enomdla kwiBhayibhile yaye ngowe-1979, engasayithandi indlela awayephila ngayo, wazibuza enoba iLizwi likaThixo lingamnceda kusini na. Noko ke, akazange aneliseke ziicawa ezininzi awaya kuzo.

Exinezelekile, wacinga ukuzibulala. Kusenjalo, wafumana ileta evela kumzala wakhe oseBergen, owayeqalise ukufundelwa ngamaNgqina kaYehova. UViktor wafudukela eBergen waza naye wafundelwa. Ekuqaleni, wazama indlela yokuba amaNgqina abonakale engachananga. Kodwa ngenxa yokuba wayesoloko exhalabele ukucoceka komhlaba, wavuya akuva ukuba uThixo uza ‘kubonakalisa abo bawonakalisayo umhlaba’ aze wona awenze iparadesi.—ISityhi. 11:18.

Waqalisa ukuya kwiintlanganiso nomzala wakhe yaye wayithanda indlela ayenobubele ngayo amaNgqina kwiHolo yoBukumkani nasemakhayeni awo. Into awayivayo nawayibonayo yabangela ukuba azimisele ukuguqula indlela awayephila ngayo aze ayeke ukusebenzisa iziyobisi. Ngenxa yokuthandaza kwakhe ngokungapheziyo nangokusuka entliziyweni, wafumana amandla aguqulayo eLizwi likaThixo nomoya oyingcwele.—Luka 11:9, 13; Heb. 4:12.

Kwakungelula ukuba uViktor akufanelekele ukubhaptizwa. UYehova wamnceda wakhululeka ekuphathweni kakubi ziidemon naxa waphinda wasebenzisa iziyobisi izihlandlo ezibini. Wancedakala xa omnye umdala wamqinisekisa ukuba “njengoyise obenzela inceba oonyana bakhe, uYehova ubenzele inceba abo bamoyikayo.” (INdu. 103:13) Wenza inkqubela ngokomoya waza wabhaptizwa ngowe-1981. Kwakusafuneka achithe ixesha entolongweni ngenxa yokwaphula kwakhe umthetho, kodwa kungekudala emva kokuba ekhululwe, waba nguvulindlela. Ukususela ngoko, uye wakuvuyela ukunceda abantu abaninzi baba ngabakhonzi bakaYehova. Uye wafumana imiphumo emihle kakhulu ngokushumayela entolongweni yaye amabanjwa amabini awayewafundela ayamkela inyaniso.

UViktor uyintloko-ntsapho nomdala onokuthenjwa. Uqhubeka enguvulindlela kunye nomfazi wakhe uTone nonyana wabo. Ngoku uthi: “Intsimi yenye yezinto ezandinceda ndatshintsha ubomi bam. Andinawo amazwi okumbulela uYehova kuba endenze ndakwazi ukuxelela abanye ngobutyebi obuxabisekileyo bokomoya.”

[Ibhokisi/Umfanekiso okwiphepha 152]

Wayefuna Ukwenza Into Ebhetele

UTOM FRISVOLD

WAZALWA Ngowe-1962

WABHAPTIZWA Ngowe-1983

INGXELO YOBOMI Umdlali webhola ekhatywayo owayefuna ukukhonza uYehova.

◼ XA WAYENEMINYAKA engama-20 ubudala, uTom wafumana ithuba lokudlalela elinye lamaqela ebhola agqwesileyo eNorway. Unina wayesele eliNgqina likaYehova. Ngenye imini, uvulindlela owayetyelele unina wacela ukuqhubela uTom isifundo seBhayibhile. Wavuma kodwa wathi akazimiselanga ukuba liNgqina.

UTom wayithanda indlela awamkelwa ngayo xa wayeqala ukuya kwiintlanganiso. Waphawula nokuba wonke umntu ukhangela izibhalo ekuthethwa ngazo ebudeni bocwangciso. Wathi: “Kumel’ ukuba yiBhayibhile eyenza aba bantu babe nobubele kangaka.”

UTom wazixelela ukuba uyifumene inyaniso yaye ufuna ukukhonza uYehova. Kodwa wayeza kulicela njani iqela lakhe ukuba limkhulule, ekubeni wayengomnye wabona badlali babalaseleyo? Okumangalisayo kukuba, emva kokuba ecacisele abaphathi bakhe ukuba ufuna ukwenza into ebhetele ngobomi bakhe kunokudlala ibhola, bamkhulula.

UTom wabhaptizwa ngowe-1983 waza ngowe-1985 waba nguvulindlela. Ngowe-1987 waya kuhlala noViktor Uglebakken eHammerfest ukuze ancede apho kufuneka abavakalisi abangakumbi. Kamva, uTom waba ngumveleli wesiphaluka, yaye ngoku useBheteli kunye nomkakhe, uKristina.

[Isicangca/Imifanekiso ekwiphepha 162, 163]

ULUHLU LWEZIGANEKO—ENorway

1890

Ngowe-1892 UKnud Pederson Hammer uqalisa ukushumayela eNorway.

1900

Ngowe-1900 Kusekwa ibandla lokuqala.

Ngowe-1904 Kuvulwa iofisi eKristiania (eOslo).

Ngowe-1905 Indibano yokuqala eKristiania.

Ngowe-1909 nangowe-1911 UC. T. Russell utyelela eNorway.

1910

Ngowe-1914 Kumiselwa umveleli ohambahambayo wokuqala.

Ngowe-1914-1915 I“Photo-Drama of Creation” itsala izihlwele.

1920

Ngowe-1920-1925 Intetho enomxholo othi “Izigidi Eziphilayo Ngoku Azisayi Kuze Zife!” inikelwa elizweni lonke.

Ngowe-1925 IThe Golden Age (uVukani!) ipapashwa ngesiNorway.

Ngowe-1928-1940 Izikhephe ekushunyayelwa ngazo kubantu abahlala ngaselunxwemeni.

1930

1940

Ngowe-1940-1945 Abayeki ukushumayela ngexesha lemfazwe nakubeni bechaswa.

Ngowe-1945 IMboniselo ipapashwa ngesiNorway.

Ngowe-1948 Kufika abavangeli bokuqala abaqeqeshwe eGiliyadi.

1950

Ngowe-1950 INkundla Ephakamileyo isinika ilungelo lokushumayela ngoncwadi.

1960

Ngowe-1965 Indibano yezizwe ngezizwe eOslo.

1970

1980

Ngowe-1984 Kunikezelwa isebe elitsha.

1990

Ngowe-1990 Kumiselwa iiKomiti Zokunxibelelana Nezibhedlele.

Ngowe-1994 Kunikezelwa iHolo yeNdibano eOslo.

Ngowe-1996 Kukhululwa INguqulelo Yehlabathi Elitsha epheleleyo yesiNorway.

2000

2010

Ngowama-2011 Kufikelelwa incopho entsha yoovulindlela abathe ngxi nabangabancedani, nenani labeze kwiSikhumbuzo.

[Igrafu/Umfanekiso okwiphepha 159]

(Ukuba ufuna inkcazelo ehlahlelwe kakuhle, yiya kwimpapasho)

Isimbuku Sabavakalisi

Isimbuku Soovulindlela

10,000

8,000

6,000

4,000

2,000

1920 1935 1950 1965 1980 1995 2010

[Iimaphu ezikwiphepha 91]

(Ukuba ufuna inkcazelo ehlahlelwe kakuhle, yiya kwimpapasho)

SWEDEN

STOCKHOLM

Örebro

Gulf of Bothnia

FINLAND

HELSINKI

Gulf of Finland

BALTIC SEA

DENMARK

COPENHAGEN

NORWAY

OSLO

Kjøllefjord

Båtsfjord

Vardø

Kirkenes

Karasjok

Hammerfest

Alta

Finnmarksvidda

Kautokeino

Tromsø

Harstad

Narvik

Sortland

Hennes

Svolvær

Bodø

Rørvik

Namsos

Steinkjer

Trondheim

Kristiansund

Måløy

Florø

Bergen

Haugesund

Stavanger

Egersund

Kristiansand

Arendal

Skien

Kongsberg

Drammen

Hønefoss

Gjøvik

Lillehammer

Brumunddal

Hamar

Kongsvinger

Ski

Askim

Moss

Halden

Fredrikstad

Oslo Fjord

NORTH SEA

NORWEGIAN SEA

Andøya Island

Bleik

Svalbard Archipelago

Longyearbyen

COUNTIES

Finnmark

Troms

Telemark

Vestfold

[Umfanekiso okwiphepha 88]

UKnud Pederson Hammer

[Umfanekiso okwiphepha 88, 89]

IReine, emntla Norway

[Umfanekiso okwiphepha 92]

IBandla laseSkien ngowe-1911, noIngebret noBerthe Anderson

[Umfanekiso okwiphepha 93]

UViktor Feldt

[Umfanekiso okwiphepha 94]

UHallgerd Holm (1), uTheodor Simonsen (2), noLotte Holm (3)

[Imifanekiso ekwiphepha 98]

Oovulindlela bokuqala: (1) UHelga Hess, (2) UAndreas Øiseth, (3) UKarl Gunberg, (4) UHulda Andersen, (5) noAnna Andersen

[Umfanekiso okwiphepha 100]

I-“Peoples Pulpit”

[Umfanekiso okwiphepha 104]

I-“Golden Age” yesiNorway

[Umfanekiso okwiphepha 106]

UEven Gundersrud

[Umfanekiso okwiphepha 107]

Amalungu eBandla laseSkien ayesoloko esiya kushumayela kwimimandla ekufutshane ngelori engenaphahla

[Umfanekiso okwiphepha 108]

UTorkel Ringereide

[Umfanekiso okwiphepha 109]

UOlaf Skau

[Imifanekiso ekwiphepha 114]

UKarl Gunberg wayengumqhubi wesikhephe i-“Elihu”

[Imifanekiso ekwiphepha 115]

UJohannes Kårstad wayeqhuba isikhephe i-“Ester”

[Imifanekiso ekwiphepha 116]

UAndreas Hope noMagnus Randal babeshumayela ngesikhephe i-“Ruth”

[Umfanekiso okwiphepha 117]

I-“aurora borealis” kumntla Norway

[Umfanekiso okwiphepha 118]

USolveig Løvås

[Umfanekiso okwiphepha 119]

UAndreas noSigrid Kvinge

[Umfanekiso okwiphepha 124]

Indibano ebanjelwe emfihlekweni kufuphi naseSki

[Umfanekiso okwiphepha 127]

UMarvin Anderson nomkakhe uKaren

[Umfanekiso okwiphepha 128]

Umatshini wokushicilela

[Umfanekiso okwiphepha 129]

Indibano yowe-1946 eBergen

[Umfanekiso okwiphepha 130]

USvanhild Neraal, ngowe-1961

[Umfanekiso okwiphepha 133]

Isikhephe sika-Arnulf sasidla ngokusetyenziselwa intsimi

[Umfanekiso okwiphepha 135]

UGunnar Marcussen (1) noHans Peter Hemstad (2) babengabafundi bokuqala baseNorway ukuphumelela eGiliyadi

[Umfanekiso okwiphepha 138]

Iintente zendibano yezizwe ngezizwe ‘YeLizwi Lenyaniso’

[Umfanekiso okwiphepha 139]

UPaul Bruun

[Umfanekiso okwiphepha 142]

UHartvig Mienna nabanye abavakalisi babesebenzisa iimoto ezihamba ekhephini ukuze bashumayele kumaSami

[Umfanekiso okwiphepha 144]

Isebe laqalisa ukwakhiwa ngowe-1981

[Umfanekiso okwiphepha 145]

Iofisi yesebe namhlanje

[Umfanekiso okwiphepha 147]

IHolo yeNdibano yaseOslo

[Umfanekiso okwiphepha 160]

Ukufundisa iintsapho iBhayibhile kuye kwabangela ukuba kubekho izizukulwana zabakhonzi bakaYehova abanyanisekileyo