Ukuze sikwazi ukwenza konke okusemandleni ethu ukuvakalisa “iindaba ezilungileyo” “kuzo zonke iintlanga nezizwe neelwimi nabantu,” sivelisa uncwadi ngeelwimi ezingaphezu kwama-750. (ISityhilelo 14:6) Siwuphumeza njani lo msebenzi? Sincedwa liqela lababhali abakwizizwe ngezizwe kunye nabaguquleli abazinikeleyo—bonke ngamaNgqina kaYehova.

Ababhali basebenzisa isiNgesi. IQumrhu Elilawulayo livelela umsebenzi weSebe Lokubhala kwikomkhulu lethu lehlabathi. Eli sebe longamela izabelo zababhali abakwikomkhulu nakwiiofisi ezithile zesebe. Ngenxa yokuba sinababhali abaphuma kwiintlanga ezahlukahlukeneyo siyakwazi ukuthetha ngemibandela ephathelele izithethe ezahlukahlukeneyo yaye ngenxa yoko iimpapasho zethu zibangel’ umdla kubantu beentlanga zonke.

Emva kokuba bebhalile bathumela kubaguquleli. Emva kokuba umbandela uhleliwe, uthunyelwa ngekhompyutha kumaqela abaguquleli abasehlabathini lonke ukuze bawuguqulele, bawuhlole baze bawufunde. Bazama ukukhetha “amazwi achanileyo enyaniso” ukuze babhale kanye oko kuthethwa sisiNgesi ngolwimi lwabo.—INtshumayeli 12:10.

Iikhompyutha ziyawukhawulezisa umsebenzi. Ikhompyutha ayikwazi ukuba ngumbhali nomguquleli. Sekunjalo, umsebenzi wababhali nabaguquleli unokukhawuleza ngakumbi xa besebenzisa izichazi-magama nophando olukwikhompyutha. AmaNgqina kaYehova enza iMultilanguage Electronic Publishing System (MEPS) apho umbandela unokufakwa ngeelwimi ezininzi, udityaniswe nemifanekiso yawo, uze uprintwe.

Kutheni sisenza yonke le migudu nakubeni ezinye iilwimi zithethwa ngabantu abambalwa? Kungenxa yokuba uYehova uthanda ukuba “zonke iintlobo zabantu zisindiswe zize zifikelele elwazini oluchanileyo lwenyaniso.”—1 Timoti 2:3, 4.

• Zibhalwa njani iimpapasho zethu?

• Kutheni iimpapasho zethu siziguqulela kwiilwimi ezininzi kangaka?

Nyaka ngamnye intlangano yethu ipapasha ize isasaze amakhulu ezigidi zeeBhayibhile nezinye iimpapasho ngaphandle kwemali. Sakha size silungise iiHolo zoBukumkani kunye neeofisi zamasebe. Sixhasa amawaka-waka abasebenzi baseBheteli kunye nabashumayeli bevangeli, yaye ngamaxesha entlekele, sixhasa ngezinto zokunceda. Ngoko usenokuzibuza, ‘Ifumaneka phi imali yokwenza zonke ezi zinto?’

Asibhatalisi mali yamatikiti, izishumi, okanye inkongozelo. Nangona ziphakamile iindleko zokuxhasa umsebenzi wethu wokushumayela, asihambi sicela inkongozelo. Kwinkulungwane edluleyo, inqaku lesibini lephephancwadi IMboniselo lathi sikholelwa ukuba sixhaswa nguYehova nokuba “asisayi kungqiba okanye sicele abantu ukuba basixhase”—yaye asizange senjenjalo!—Mateyu 10:8.

Umsebenzi wethu uxhaswa ngeminikelo yokuzithandela. Abantu abaninzi bayayithanda imfundiso yethu yeBhayibhile yaye bayanikela. NamaNgqina ngokwawo anikela ngexesha, amandla, imali, nezinye izinto ukuze kwenziwe ukuthanda kukaThixo kuwo wonke umhlaba. (1 Kronike 29:9) KwiHolo yoBukumkani kukho iibhokisi zeminikelo ukuze abo bathanda ukunikela benjenjalo. Okanye iminikelo ingenziwa ngewebhsayithi yethu u-jw.org/xh. Ngokuqhelekileyo le mali inikelwa ngabantu abangathathi ntweni, ngokufanayo nomhlolokazi olihlwempu awathetha ngaye uYesu nowanikela ngeengqekembe ezincinane kwizikhongozelo zobuncwane. (Luka 21:1-4) Ngoko nabani na angasoloko ‘ebekela bucala okuthile’ ukuze anikele “kanye njengoko egqibile entliziyweni yakhe.”—1 Korinte 16:2; 2 Korinte 9:7.

Siqinisekile ukuba uYehova uya kuqhubeka eshukumisa iintliziyo zabo bafuna ‘ukumbeka ngezinto zabo zexabiso’ ukuze baxhase umsebenzi woBukumkani nokuze kufezwe ukuthanda kwakhe.—IMizekeliso 3:9.

• Yintoni ebangela ukuba intlangano yethu yahluke kwezinye iicawa?

• Isetyenziswa njani iminikelo yokuzithandela?

Njengoko igama elithi iHolo yoBukumkani lichaza, eyona mfundiso iphambili yeBhayibhile buBukumkani bukaThixo—umxholo wobulungiseleli bukaYesu.—Luka 8:1.

Ziyindawo yonqulo lokwenyaniso ekuhlaleni. Kulapho amaNgqina awulungelelanisa khona umsebenzi wokushumayela. (Mateyu 24:14) IiHolo zoBukumkani azilingani ngobukhulu yaye iindlela ezakhiwe ngazo azifani, kodwa zonke ayizozakhiwo ziyokoyoko, yaye ezininzi zisetyenziswa ngamabandla amaninzi. Kwiminyaka yakutshanje, siye sakha amashumi amawaka eeHolo zoBukumkani (umlinganiselo wezintlanu ngosuku) ngenxa yolwando oluthabath’ unyawo kumabandla ethu. Kwenzeka njani oku?—Mateyu 19:26.

Zakhiwa ngeminikelo ephuma kwibhokisi enye. Le minikelo ithunyelwa kwiofisi yesebe ukuze inikwe amabandla afuna ukwakha okanye ukulungisa iiHolo ZoBukumkani.

Zakhiwa ngamatsha-ntliziyo aphuma kwiimbombo zonke zomhlaba. Kumazwe amaninzi kuye kwasekwa AmaQela Okwakha IiHolo ZoBukumkani. Amaqela abo basebenza ekwakheni nabo bancedisayo bahambela amabandla elizwe, baya nakwezona ndawo kunzima ukufika kuzo ukuze bancede amabandla asekuhlaleni abe neeHolo ZoBukumkani. Kwamanye amazwe, kuye kwakhethwa amaNgqina afanelekayo ukuze akhokele umsebenzi wokwakha nowokulungisa iiHolo ZoBukumkani kwiindawo ezithile. Nangona kukho abantu abanobuchule abancedisayo, amalungu ebandla ngawona enza umsebenzi omninzi. Konke oku kwenziwa ngomoya kaYehova nokuzinikela kwabantu bakhe ngomphefumlo uphela.—INdumiso 127:1; Kolose 3:23.

• Kutheni iindawo esinqula kuzo zibizwa ngokuba ziiHolo zoBukumkani?

• Zakhiwa njani iiHolo zoBukumkani ehlabathini lonke?