Ngaba Ubusazi?
Kutheni abantu besithi “amen” xa kuqukunjelwa umthandazo?
Igama lesiXhosa nelesiGrike elithi “amen,” liguqulelwe ngqo kwelesiHebhere elithi ʼa·menʹ. Eli gama elidla ngokubizwa ngamxhelo mnye ngabantu xa kuqukunjelwa umthandazo, xa kufungwa, kusikelelwa okanye kuqalekiswa lithetha ukuthi “makube njalo,” okanye “ngokuqinisekileyo.” Ukulibiza kuthetha ukuba uyavumelana naloo nto ithethwayo. Enye imbekiselo ithi, “eli gama libonisa ukuqiniseka, ukuba yinyaniso, ukuthembeka nokungathandabuzeki.” Ngamaxesha okubhalwa kweBhayibhile eli binzana lalimbophelela ngokusemthethweni umntu olitshoyo xa efunga okanye esenza umnqophiso yaye libonisa ukwamkela imiphumo.—Duteronomi 27:15-26.
Ngamanye amaxesha uYesu wayewaqala ngokuthi “amen” amazwi akhe xa eshumayela. Loo nto wayeyenzela ukugxininisa ukuthembeka kwaloo nto awayeza kuyithetha. Xa lisetyenziswe kwiimeko ezinjalo igama lesiGrike elithi a·menʹ liguqulelwa ngokuthi “inene.” (Mateyu 5:18; 6:2, 5; King James Version) Xa liphindaphindiwe njengokuba kunjalo kwiVangeli kaYohane, ibinzana elasetyenziswa nguYesu liguqulelwa ngokuthi “inene, inene.” (Yohane 1:51) Kuthiwa nguYesu kuphela osebenzisa u-amen ngale ndlela kwiincwadi ezingcwele.
KwiZibhalo zamaKristu zesiGrike isibizo esithi “Amen” sibhekiswa kuYesu ukubonisa ukuba ubungqina bakhe ‘buthembekile yaye buyinyaniso’—ISityhilelo 3:14.
Yayiyintoni IUrim neTumim?
Kubonakala ngathi iUrim neTumim zazisetyenziswa ngamaSirayeli amandulo ukuze aqonde ukuthanda kukaYehova kwizinto eziphathelele uhlanga okanye iinkokeli zalo. IUrim neTumim zazihlala kumbingeleli omkhulu kwaye zazigcinwa kwisingxobo ‘sobengo lwesigwebo.’ (Eksodus 28:15, 16, 30) Nangona iZibhalo zingathethi nto kangako ngazo okanye eyona ndlela zazisetyenziswa ngayo, kubonakala ngathi iindinyana ezithile zibonisa ukuba zazisetyenziswa ukwenza amaqashiso okubona enoba impendulo evela kuThixo yayiza kuthi “ewe” okanye ithi “hayi” okanye ingabikho kwaukubakho kusini na.
Omnye umzekelo ngulowo waxa uDavide wayalela uAbhiyatare ukuba eze ne-efodi yombingeleli omkhulu eyayineUrim neTumim. UDavide wabuza imibuzo emibini kuYehova: ‘Ngaba uSawule uza kundisukela?’ yaye ‘Ngaba abanini-mhlaba baseKeyila baya kundinikezela na esandleni sakhe?’ Impendulo yayo yomibini le mibuzo yaba ngu-ewe nto leyo eyamenza uDavide wakwazi ukwenza izigqibo ezifanelekileyo.—1 Samuweli 23:6-12.
Ngaphambilana, uKumkani uSawule wayesebenzise iUrim neTumim ukuze abone, kuqala enokuba yayinguye na okanye yayingabantu okanye uYonatan owayenetyala, okwesibini ukuze abone enoba kwakone yena okanye unyana wakhe. (1 Samuweli 14:40-42) Kwathi ke kamva xa uSawule wayexabene noThixo, uThixo wayeka ukumkhokela “nokuba kungamaphupha okanye kungeUrim okanye ngabaprofeti.”—1 Samuweli 28:6.
Ngokwesithethe samaYuda, ukusetyenziswa kweUrim neTumim kwaphela isakutshatyalaliswa itempile kaYehova ngowama-607 B.C.E.
[Umfanekiso okwiphepha 27]
“Amen,” ISityhilelo 3:14. KwiCodex Alexandrinus, yenkulungwane yesihlanu C.E.