Unegama Elinjani?

EBHAYIBHILENI, isibizo esithi “igama” maxa wambi sibhekisela kwindlela umntu aziwa ngayo. Ngokomzekelo, uKumkani uSolomon osisilumko wabhala: “Igama elilungileyo lingaphezulu nakwioli elungileyo; ulungile umhla wokufa ngaphezu komhla wokuzalwa komntu.” (INtshumayeli 7:1; thelekisa IMizekeliso 22:1.) Ngokwamazwi kaSolomon, umntu akazalwa enegama elihle. Kunoko, uzenzela igama elihle elinentsingiselo yokwenene ebudeni bobomi bakhe. Igama lakhe lilandelana neempawu zakhe zobuntu, enoba unobubele okanye uyazingca, enoba unovelwano okanye unolunya, enoba uthobekile okanye unekratshi, kwanokuba ulilungisa okanye ungendawo.

Cinga ngoDavide. Ebudeni bokulawula kwakhe, wazingqina omelele yaye engagungqi. Kwangaxeshanye, ngokuthobeka uDavide wazivuma iimpazamo zakhe waza waguquka kwizono ezinzulu. Enesizathu esihle, umprofeti kaYehova wavakalisa ukuba uDavide “wayeyindoda ekholekileyo kwintliziyo yakhe [uThixo].” (1 Samuweli 13:14) UDavide oselula wayesele ezenzele igama elihle noThixo.

Kwelinye icala, uKumkani uYehoram wakwaYuda, wazenzela igama elibi. Wabaphambukisa abalawulwa bakhe ekukhonzeni uYehova waza wabulala abantakwabo abathandathu kwanezinye iinkosana zakwaYuda. Ekugqibeleni, uYehova wamohlwaya uYehoram ngesigulo esibuhlungu gqitha nesathi sakhokelela ekufeni kwakhe. IBhayibhile ithi uYehoram “wemka engalilelwa bani,” okanye yona iToday’s English Version ikuchaza ngale ndlela, “akakho owaba buhlungu ngokufa kwakhe.”—2 Kronike 21:20.

Ubomi bukaDavide noYehoram bubonisa ukunyanisa komzekeliso weBhayibhile othi: “Ukukhunjulwa kwelungisa kuhleli kunentsikelelo; igama labangendawo liba livithi.” (IMizekeliso 10:7) Ngoko ke ngamnye wethu ufanele ahlolisise lo mbuzo ngenyameko, ‘Ndizenzela igama elinjani noThixo nabanye abantu?’