‘Ingqina Elithembekileyo Esibhakabhakeni’

INYANGA ibisoloko inconywa ziimbongi nababhali beengoma ngobuhle bayo. Ngokomzekelo, ingoma ephefumlelwe nguThixo ithetha ngebhinqa ‘elihle njengenyanga ehlangeneyo.’ (INgoma yazo iiNgoma 6:10) Yaye kumbongo wakhe, umdumisi uchaza inyanga ‘njengengqina elithembekileyo esibhakabhakeni.’ (INdumiso 89:37) Iyintoni intsingiselo yeli binzana ngokuphathelele inyanga?

Inyanga ijikeleza umhlaba rhoqo ngeentsuku ezingama-27,3. Ngenxa yoko, kunokutshiwo ukuba inyanga lingqina elithembekileyo ngenxa yokuba inokuthenjwa. Noko ke, kusenokwenzeka ukuba umdumisi wayecinga ngenye intsingiselo enzulu. Kwingoma yakhe ebuprofeti ethetha ngoBukumkani uYesu awayalela abalandeli bakhe ukuba babuthandazele, uchaza inyanga ‘njengengqina elithembekileyo.’—Mateyu 6:9, 10.

Kwiminyaka engaphezu kwama-3 000 eyadlulayo, uYehova uThixo wenza umnqophiso woBukumkani noKumkani uDavide wakwaSirayeli wamandulo. (2 Samuweli 7:12-16) Injongo yaloo mnqophiso yayikukumisela uYesu Kristu ngokusemthethweni njengendlalifa kaDavide ukuba ahlale etroneni ngonaphakade. (Isaya 9:7; Luka 1:32, 33) Ebhekisela kwitrone ‘yembewu’ kaDavide, umdumisi wavuma le ngoma: “Iya kumiselwa ngokuqinileyo njengenyanga kangangexesha elingenammiselo, nanjengengqina elithembekileyo esibhakabhakeni.”—INdumiso 89:36, 37.

Ngoko ‘njengesikhanyiso esilawula ubusuku’—inyanga—isikhumbuza ukuba ulawulo lukaKristu luya kubakho ngokusisigxina. (Genesis 1:16) Ngokuphathelele uBukumkani bakhe, uDaniyeli 7:14 uthi: “Ulawulo lwakhe lulawulo oluhlala ngokungenammiselo olungayi kudlula, nobukumkani bakhe bobungayi konakaliswa.” Inyanga lingqina elisikhumbuza ngobo Bukumkani neentsikelelo obuya kuzizisela uluntu.

Ngaba Uya Kukuvuyela Ukutyelelwa?

Kwanakweli hlabathi lizaliswe ziinkathazo, unako ukuzuza ulonwabo kulwazi oluchanileyo lweBhayibhile ngoThixo, uBukumkani bakhe nenjongo yakhe emangalisayo ngoluntu. Ukuba ungayivuyela inkcazelo engakumbi okanye ungathanda ukuba uthile eze ekhayeni lakho ukuze akuqhubele isifundo seBhayibhile sesisa, nceda ubhalele AmaNgqina KaYehova, Private Bag X2067, Krugersdorp, 1740, South Africa, okanye kwiadresi efanelekileyo kwezidweliswe kwiphepha 2.