Ngaba Uya Kuhamba NoThixo?
‘Hamba noThixo wakho ngokuthozama.’—MIKA 6:8.
1, 2. Indlela uYehova avakalelwa ngayo ngathi inokufaniswa njani neyomzali ofundisa umntwana wakhe ukuhamba?
UMNTWANA uyaqingqa ngaloo milenzana yakhe ibhetyebhetye, uthe naa ezo ngalwana zakhe ezama ukuya kufika kumzali wakhe osele elungele ukumwola. Oku kusenokubonakala kuyinto encinane, kodwa kubazali yinto enkulu ebenza babe nethemba lokuba ngenye imini uza kube ebaleka phaya kude. Sele bejonge phambili xa beya kuba behamba nalo mntwana bembambe ngesandla, kwiinyanga nakwiminyaka ezayo. Basoloko benethemba lokuba baza kumkhokela baze bamnyamekele umntwana wabo kwixesha elizayo.
2 Naye uYehova uThixo uziva ngolo hlobo ngabantwana bakhe abasemhlabeni. Wakha wathi ngabantu bakhe amaSirayeli, okanye uEfrayim: “Ndamfundisa ukuhamba uEfrayim, ndamphatha ngeengalo zam . . . Ndamtsala ngeentsontelo zomntu wasemhlabeni, ngeentambo zothando.” (Hoseya 11:3, 4) Apha uYehova uzichaza njengomzali onothando nomonde njengoko efundisa umntwana wakhe ukuhamba, mhlawumbi ade ambambe xa esiwa. UYehova, umzali obalaseleyo, ulangazelela ukusifundisa indlela yokuhamba. Uyavuyiswa kukuhamba nathi njengokuba sisenza inkqubela. Njengoko isibhalo esingumxholo sibonisa, sinako ukuhamba noThixo! (Mika 6:8) Kodwa kuthetha ukuthini ukuhamba noThixo? Kutheni simele sihambe naye? Sinokuhamba njani naye? Ziziphi iintsikelelo esiya kuzifumana ngokuhamba noThixo? Makhe siqwalasele umbuzo ngamnye kule mibuzo mine.
Kuthetha Ukuthini Ukuhamba NoThixo?
3, 4. (a) Yintoni ebalaseleyo kwindlela elichazwa ngayo ibinzana elithi ukuhamba noThixo? (b) Kuthetha ukuthini ukuhamba noThixo?
3 Kakade ke, umntu owenziwe ngenyama negazi akanakuhamba ngokoqobo noYehova, ongumoya. (Eksodus 33:20; Yohane 4:24) Ngoko xa iBhayibhile ithetha ngabantu abahamba noThixo, isebenzisa isafobe. Ikuchaza oku ngeyona ndlela icacileyo inokuqondwa nangubani na, enoba ngowaliphi ilizwe nesithethe yaye uphila kwiliphi na ixesha. Eneneni, angaba uvelaphi okanye uphila kweliphi ixesha umntu ongakuqondiyo oko kuthethwa kukuhamba nomntu othile? Indlela elichazwa ngayo eli binzana isinika umfanekiso ngqondweni wobuhlobo obusenyongweni, akunjalo? Oku kusenza siqonde oko kuthethwa kukuhamba noThixo. Noko ke, makhe sikuchaze ngokungqalileyo oku.
4 Cinga ngamadoda athembekileyo uEnoki noNowa. Kutheni kusithiwa ahamba noThixo nje? (Genesis 5:24; 6:9) EBhayibhileni, ibinzana elithi “ukuhamba” lidla ngokuthetha ukulandela ikhondo elithile. UEnoki noNowa bakhetha ikhondo lokuphila ngokuvisisana nokuthanda kukaYehova uThixo. Ngokwahlukileyo kwabo babephila ngexesha labo, bafuna ukukhokelwa nguYehova baza bathobela ulwalathiso lwakhe. Babethembele kuye ngokupheleleyo. Ngaba oku kuthetha ukuba uYehova wayebenzela izigqibo? Akunjalo. UYehova unike abantu inkululeko yokuzikhethela, yaye ufuna siyisebenzise kwakunye ‘namandla ethu engqiqo.’ (Roma 12:1) Njengoko sisenza izigqibo sivumela amandla ethu engqiqo akhokelwe ziingcamango zikaYehova eziphakame ngokungenakulinganiswa nanto. (IMizekeliso 3:5, 6; Isaya 55:8, 9) Eneneni, njengokuba siqhubeka siphila, sihamba ngokusondeleleneyo noYehova.
5. Kwakutheni ukuze uYesu athethe ngokongeza ikubhite kubomi bukabani?
5 IBhayibhile idla ngokufanisa ubomi nohambo. Maxa wambi, iye ikufanise ngokungqalileyo, ukanti maxa wambi iye ikufanise ngokungangqalanga. Ngokomzekelo, uYesu wathi: “Ngubani na kuni onokuthi ngokuba nexhala ongeze ikubhite enye kubude bobomi bakhe?” (Mateyu 6:27) Lo mazwi asenokukudida. Kwakutheni ukuze uYesu athethe ngokongeza “ikubhite enye,” engumlinganiselo womgama, ekubeni wayethetha ‘ngobude bobomi’ bomntu, obulinganiswa ngexesha?a Kuyacaca ukuba uYesu wayejonga ubomi njengohambo. Eneneni, wayefundisa ukuba, ukuxhalaba akunakukunceda wongeze kwanenyathelo elincinane kuhambo lobomi bakho. Noko ke, ngaba sifanele sigqibe kwelokuba ayikho into esinokuyenza ngokuphathelele umkhamo esinokuhamba noThixo ngawo? Akunjalo konke konke! Oku kusifikisa kumbuzo wesibini othi, Kutheni simele sihambe noThixo?
Kutheni Simele Sihambe NoThixo?
6, 7. Yiyiphi eyona nto ifunwa ngabantu abangafezekanga, yaye kutheni simele siyifune kuYehova nje?
6 Esinye isizathu sokuba sihambe noYehova uThixo sichazwe kuYeremiya 10:23: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” Thina bantu asinawo amandla okanye ilungelo lokwalathisa indlela esimele sihambe ngayo. Simele sikhokelwe. Abo banyanzelisayo bahambe ngeendlela zabo, ngaphandle kolwalathiso lukaThixo, benza kanye impazamo eyenziwa nguAdam noEva. Esi sibini sacinga ukuba sinelungelo lokuzigqibela ngoko kulungileyo nokubi. (Genesis 3:1-6) Eneneni elo lungelo ‘asilolethu.’
7 Ngaba wena akuvakalelwa kukuba uyalufuna ukhokelo ebomini bakho? Mihla le simele senze izigqibo ezincinane nezikhulu. Ezinye zazo zinzima yaye zinokuchaphazela ikamva lethu—kwanelezalamane nezihlobo zethu. Khawucinge nje ngoku, umntu othile omdala lee nonobulumko kunathi uyavuyiswa kukusikhokela ngothando ekwenzeni ezo zigqibo! Okulusizi kukuba, abaninzi bakholosa ngeembono zabo baze bahambe ngabayibonayo. Bayawatyeshela amazwi ayinyaniso eMizekeliso 28:26 athi: “Okholosa ngentliziyo yakhe usisiyatha, kodwa ohamba ngobulumko uya kusinda.” UYehova ufuna siziphephe iintlekele ezinokubangelwa kukukholosa ngentliziyo enenkohliso. (Yeremiya 17:9) Ufuna sihambe ngobulumko, sikholose ngaye njengoMkhokeli noMyaleli olumkileyo. Ukuba senjenjalo, siya kuhamba ngokukhuselekileyo, ngendlela esishiya sanelisekile yaye sinenjongo.
8. Isono nokungafezeki zibakhokelela phi abantu, kodwa uYehova unayiphi injongo ngathi?
8 Esinye isizathu sokuhamba noThixo siquka umgama wohambo esifuna ukuluthabatha. IBhayibhile ichaza inyaniso ebuhlungu. Enyanisweni, bonke abantu abangafezekanga basinge ndaweni-nye. Ichaza intlungu ebangelwa kukwaluphala iNtshumayeli 12:5 ithi: ‘Umntu uhamba esiya endlwini yakhe ehlala ihleli nabenza isijwili bejikeleza isitrato.’ Yintoni le ‘ndlu ihlala ihleli’? Lingcwaba, apho isono nokungafezeki kusisa khona. (Roma 6:23) Noko ke, uYehova akufuni sihambe nje olu hambo lufutshane luzaliswe ziinkathazo ukususela ekuzalweni ukusa engcwabeni. (Yobhi 14:1) Kuxa sihamba noThixo kuphela apho sinokuba nethemba lokuhamba lonke elo xesha wayenenjongo yokuba sihambe ngalo—ngonaphakade. Ngaba asiyiyo loo nto oyifunayo? Ngoko, linye umele uhambe noYihlo.
Sinokuhamba Njani NoThixo?
9. Yintoni eyayibangela ukuba uYehova azifihle kubantu bakhe maxa wambi, ukanti sisiphi isiqinisekiso awabanika sona kuIsaya 30:20?
9 Owesithathu kule mibuzo ufuna siwuqwalasele ngenyameko. Wona uthi, Sinokuhamba njani noThixo? Impendulo siyifumana kuIsaya 30:20, 21: “UmYaleli Ozukileyo akayi kuba sazifihla, namehlo akho amele abe ngamehlo abona umYaleli Ozukileyo wakho. Neendlebe zakho ziya kuva ilizwi emva kwakho lisithi: ‘Nantsi indlela. Hambani ngayo,’ nokuba nisinga ekunene, nokuba nisinga ekhohlo.” Kwezi ndinyana zilukhuthazo, amazwi kaYehova akwindinyana 20 asenokuba akhumbuza abantu bakhe ukuba xa bamvukelayo, wazifihla kubo. (Isaya 1:15; 59:2) Noko ke, kwesi isihlandlo uYehova akachazwa njengozifihlileyo, kodwa uchazwa njengomi phambi kwabantu bakhe abathembekileyo. Sisenokucinga ngotitshala omi phambi kwabafundi, ebabonisa oko afuna bakufunde.
10. Kungayiphi ingqiqo ‘onokuva ilizwi lomYaleli wakho Ozukileyo emva kwakho’?
10 Kwindinyana 21, kuchazwa enye into eyahlukileyo. UYehova uchazwa njengohamba emva kwabantu bakhe, ebalathisa eyona ndlela bamele bahambe ngayo. Abaphengululi beBhayibhile bathi la mazwi asenokuba asekelwe kwindlela umalusi akhe aziqhube ngayo izimvu zakhe maxa wambi, ezikhwaza ukuze aziphethule zingaphambukeli kwindlela embi. La mazwi asebenza njani kuthi? Kaloku, xa sifuna ukhokelo kwiLizwi likaThixo, sifunda amazwi awabhalwa kumawaka eminyaka eyadlulayo. Sekudlule iminyaka emininzi abhalwayo, ukanti asebenza ngokungathi abhalwe izolo. Isiluleko seBhayibhile sinokusikhokela kwizigqibo esizenza mihla le, yaye sinokusinceda sizakhele ikamva. (INdumiso 119:105) Xa sifuna isiluleko esinjalo ngokunyaniseka size sisisebenzise, uYehova uba nguMkhokeli wethu. Sihamba noThixo.
11. Ngokutsho kukaYeremiya 6:16, yintoni uYehova awakhuthaza abantu bakhe ukuba bayenze, kodwa bona bathini?
11 Ngaba siyalivumela iLizwi likaThixo lisikhokele ngokupheleleyo? Ingantle into yokuba simane sizihlolisise ngokunyanisekileyo. Qwalasela indinyana eya kusinceda ekwenzeni oko: “Utsho uYehova ukuthi: ‘Yimani ngxi ezindleleni, nize nibone, nibuzise ngeendlela zakudala, apho ngoku, ikhoyo indlela elungileyo; nize nihambe kuyo, niyifumanele ukonwaba imiphefumlo yenu.’” (Yeremiya 6:16) La mazwi asenokusikhumbuza ngomhambi oma ekudibaneni kweendlela aze abuzise ngaleyo amele ahambe ngayo. Ngengqiqo yokomoya, abantu bakaYehova ababenemvukelo kwaSirayeli babemele benze oko. Kwakufuneka bafune ‘iindlela zakudala.’ “Indlela elungileyo” yayiyindlela ababehamba ngayo ooyisemkhulu, indlela olwathi olo hlanga ngobudenge lwaphambuka kuyo. Okubuhlungu kukuba, uSirayeli akazange asinanze esi sikhumbuzo sikaYehova sothando. Le ndinyana ihlabela mgama ithi: “Kodwa bathi: ‘Asizi kuhamba.’” Noko ke, kule mihla, abantu bakaThixo baye basabela ngendlela eyahlukileyo kweso siluleko.
12, 13. (a) Abalandeli bakaKristu abathanjisiweyo basabela njani kwisiluleko esikuYeremiya 6:16? (b) Sinokuzihlolisisa njani ukuze sibone indlela esihamba ngayo namhlanje?
12 Ukususela ngasekupheleni kwenkulungwane ye-19, abalandeli bakaKristu abathanjisiweyo baye basisebenzisa esi siluleko sikuYeremiya 6:16. Njengeqela, baye ngokunyaniseka babuyela ‘kwiindlela zakudala.’ Ngokungafaniyo neNgqobhoko ewexukileyo, baye banamathela “emazwini aphilileyo” awamiselwa nguYesu Kristu aza axhaswa ngabalandeli bakhe abathembekileyo ngenkulungwane yokuqala yeXesha Eliqhelekileyo. (2 Timoti 1:13) Ukuza kuthi ga namhlanje, abathanjiswa bayancedana baze bancede namaqabane abo “ezinye izimvu” ukuba ahambe ngendlela yobomi neyonwabisayo eye yaphambuka kuyo iNgqobhoko.—Yohane 10:16.
13 Ngokulungiselela ukutya kokomoya ngexesha elifanelekileyo, ikhoboka elithembekileyo liye lanceda izigidi zabantu zafumana ‘iindlela zakudala’ zatsho zahamba noThixo. (Mateyu 24:45-47) Ngaba ungomnye wezo zigidi? Ukuba kunjalo, yintoni onokuyenza ukuze ungakhukuliseki, uze uhambe ngeendlela zakho? Iya kuba bubulumko ukuba uziphe ithuba uze uhlolisise indlela ohamba ngayo. Ukuba ufunda iBhayibhile neencwadi ezisekelwe eBhayibhileni uze ubekho kwiintlanganiso zokufundisa ezilungiselelwa ngabathanjiswa namhlanje, uya kuba uqeqeshelwa ukuhamba noThixo. Ukuba uyathobeka uze usebenzise isiluleko osinikiweyo, uya kuba uhamba noThixo ngokwenene, yaye ulandela ‘iindlela zakudala.’
Hamba Ngokungathi “Uyambona Lowo Ungabonakaliyo”
14. Ukuba uYehova ngumntu wokwenene kuthi, oko kuya kubonakala njani kwizigqibo esizenzayo?
14 Ukuze sihambe noYehova, ufanele abe ngumntu wokwenene kuthi. Khumbula ukuba, uYehova waqinisekisa abo babethembekile kuSirayeli wamandulo ukuba wayengazifihlanga kubo. Ngokufanayo namhlanje, uzityhila kubantu bakhe njengomYaleli Ozukileyo. Ngaba uYehova ungumntu wokwenene ngaloo ndlela kuwe, ngokungathi umi phambi kwakho ekuyalela? Nalo ke ukholo esimele sibe nalo ukuze sihambe noThixo. UMoses wayenokholo olunjalo, “kuba waqhubeka eqinile ngokungathi uyambona Lowo ungabonakaliyo.” (Hebhere 11:27) Ukuba uYehova ngumntu wokwenene kuthi, siya kuyicinga indlela avakalelwa ngayo xa sisenza izigqibo. Ngokomzekelo, asiyi kuyicinga into yokwenza ububi size sizame ukuzifihla ezo zono zethu kubadala abangamaKristu okanye kumalungu entsapho. Siya kuzabalazela ukuhamba noThixo kwanokuba akukho mntu usibonayo. NjengoKumkani uDavide wamandulo, siya kufikelela kwesi sigqibo: “Ndiya kuhamba ngengqibelelo yentliziyo yam ngaphakathi endlwini yam.”—INdumiso 101:2.
15. Ukunxulumana nabazalwana noodadewethu abangamaKristu kungamenza njani uYehova abe ngumntu wokwenene kuthi?
15 UYehova uyaqonda ukuba asifezekanga, sizizidalwa zokwenyama yaye maxa wambi sinokukufumanisa kunzima ukukholelwa kwinto esingayiboniyo. (INdumiso 103:14) Usoloko esinceda ukuze siboyise obo buthathaka. Ngokomzekelo, uye wahlanganisa “isizwana segama lakhe” esiphuma kuzo zonke iintlanga ezisehlabathini. (IZenzo 15:14) Njengoko simkhonza ngaxhathalinye, siyomelezana. Ukuva indlela uYehova aye wanceda ngayo umzalwana okanye udade wokomoya wakwazi ukoyisa ubuthathaka obuthile okanye uvavanyo olunzima, kwenza uThixo abe ngumntu wokwenene ngakumbi kuthi.—1 Petros 5:9.
16. Ukufunda ngoYesu kunokusinceda njani sihambe noThixo?
16 Ngaphezu kwako konke, uYehova uye wasinika umzekelo woNyana wakhe. UYesu wathi: “Ndim indlela nenyaniso nobomi. Akukho bani uzayo kuBawo ngaphandle kokuza ngam.” (Yohane 14:6) Ukufunda ngobomi bukaYesu ngoxa wayesemhlabeni yenye yezona ndlela zinokwenza uYehova abe ngumntu wokwenene kuthi. Yonke into uYesu awayithethayo nawayenzayo yayibonisa ngokugqibeleleyo ubuntu neendlela zikaYise wasemazulwini. (Yohane 14:9) Njengoko sisenza izigqibo, simele sicingisise ngendlela uYesu ebeya kuyisingatha ngayo imibandela. Xa izigqibo zethu zibonisa ukuba siye sacingisisa ngenyameko nangomthandazo, siya kuba silandela emanyathelweni kaKristu. (1 Petros 2:21) Oko kuya kwenza sihambe noThixo.
Ziziphi Iintsikelelo Esiya Kuzifumana?
17. Ukuba sihamba ngendlela kaYehova, kukuphi “ukonwaba” esiya kukufumanela imiphefumlo yethu?
17 Ukuhamba noYehova uThixo kukhokelela kubomi obanelisayo. Khumbula oko uYehova wakuthembisa abantu bakhe xa befuna “indlela elungileyo.” Wathi: “Nize nihambe kuyo, niyifumanele ukonwaba imiphefumlo yenu.” (Yeremiya 6:16) Athetha ukuthini la mazwi? Ngaba athetha ukuba sifanele silindele ukuphila ubomi bolonwabo nobunewunewu? Akunjalo. UYehova usilungiselele into ebhetele gqitha kunoko, into engenakufane ifunyanwe nazezona ngcungcu zimilomo itsolo. Ukufumanela ukonwaba umphefumlo wakho kuthetha ukufumana uxolo lwangaphakathi, uvuyo, ulwaneliseko nokuva ufeze okuthile kokomoya. Oko kuthetha ukuba unokuqiniseka ukuba ukhethe eyona ndlela ibalaseleyo ebomini. Olo xolo lwengqondo lunqabile kweli hlabathi lizaliswe ziinkathazo.
18. Yiyiphi intsikelelo uYehova afuna ukukunika yona, yaye sisiphi isigqibo ofikelela kuso?
18 Kakade ke, ubomi buyintsikelelo. Kwanokuphila ixesha elifutshane kubhetele kunokungaphili kwaphela. Noko ke, uYehova wayengenanjongo yokuba siphile ixesha elifutshane ukususela kwixesha lobutsha apho umntu esenamandla ukusa kwingqaqambo zokwaluphala. UYehova ufuna ufumane eyona ntsikelelo ibalaseleyo. Ufuna uhambe naye ngonaphakade! Oku kuchazwa kakuhle kuMika 4:5: “Zonke izizwana ziya kuhamba ngasinye egameni lothixo waso; kodwa thina siya kuhamba egameni likaYehova uThixo wethu ukusa kwixesha elingenammiselo, ewe ngonaphakade.” Ngaba uya kuxhamla kuloo ntsikelelo? Ngaba uya kubufumana obo bomi uYehova abubiza ngokuba ‘bubomi bokwenene’? (1 Timoti 6:19) Ngoko ke, yenza konke okusemandleni ukuze uhambe noYehova namhlanje, ngomso, ngayo yonk’ imihla de kube ngonaphakade!
[Umbhalo osemazantsi]
a Ezinye iinguqulelo zeBhayibhile ziye zilitshintshe igama elithi “ikubhite” zize zisebenzise umlinganiselo wexesha, njengokuthi “isihlandlo esinye” (The Emphatic Diaglott) okanye “umzuzu” (A Translation in the Language of the People, kaCharles B. Williams). Noko ke, kumbhalo wantlandlolo eli gama lithetha ikubhite, eyayimalunga neesentimitha ezingama-45.
Ubunokuphendula Uthini?
• Kuthetha ukuthini ukuhamba noThixo?
• Kutheni uvakalelwa kukuba umele uhambe noThixo?
• Yintoni eya kukunceda uhambe noThixo?
• Ziziphi iintsikelelo ezifunyanwa ngabo bahamba noThixo?
[Imifanekiso ekwiphepha 23]
Kwiindinyana zeBhayibhile, siva ilizwi likaYehova emva kwethu lisithi, “Nantsi indlela”
[Umfanekiso okwiphepha 25]
Kwiintlanganiso, sifumana ukutya kokomoya ngexesha elifanelekileyo