UYehova Usilondolozela Usindiso

‘Wena ulondolozwa ngamandla kaThixo ngokholo ngenxa yosindiso olulungele ukutyhilwa ngexesha lokugqibela.’—1 PET. 1:4, 5.

UNOKUPHENDULA UTHINI?

UYehova usitsalele njani kunqulo lokwenyaniso?

Sinokumvumela njani uYehova asikhokele ngesiluleko sakhe?

Usikhuthaza njani uYehova?

1, 2. (a) Yintoni eyenza siqiniseke ukuba uThixo uya kusinceda sigcine ingqibelelo yethu? (b) UYehova usazi kakuhle kangakanani?

“LOWO unyamezele kwada kwasekupheleni uya kusindiswa.” (Mat. 24:13) Ngaloo mazwi, uYesu wenza kwacaca ukuba ukuze sisinde xa uThixo egweba ihlabathi likaSathana, sifanele sigcine ingqibelelo yethu de kube sekupheleni. Kodwa oku akuthethi ukuba uYehova ulindele ukuba sinyamezele ngobulumko okanye ngamandla ethu. IBhayibhile isiqinisekisa ngelithi: “UThixo uthembekile, yaye akayi kuniyekela nihendwe ngaphaya koko ninokukuthwala, kodwa kunye nesihendo eso uya kwenza nendlela yokuphuma ukuze nikwazi ukusinyamezela.” (1 Kor. 10:13) Atheth’ ukuthini la mazwi?

² Ukuze uYehova angasiyekeli ukuba sihendwe ngaphaya koko sinokukuthwala, ufanele azi yonk’ into ngathi kuquka iingxaki esijamelana nazo, ubuntu bethu noko sinokukwazi ukumelana nako. Ngaba uThixo usazi ngaloo ndlela? Ewe. IZibhalo zibonisa ukuba uYehova wazi yonk’ into ngomntu ngamnye. Uyabazi ubomi bethu bemihla ngemihla nemikhwa yethu. Wazi nezinto esizicingayo noko kusezintliziyweni zethu.—Funda iNdumiso 139:1-6.

3, 4. (a) Oko kwenzeka kuDavide kusibonisa njani ukuba uYehova unikela ingqalelo kumntu ngamnye? (b) Nguwuphi umsebenzi ophawulekayo owenziwa nguYehova namhlanje?

³ Ngaba kuvakala kuyintsomi ukuba uThixo anganomdla ebantwini? Umdumisi uDavide wakha wacinga ngolu hlobo, waza wambuza oku uYehova: “Xa ndibona amazulu akho, imisebenzi yeminwe yakho, inyanga neenkwenkwezi ozilungiseleleyo, uyintoni na umntu ofayo le nto umkhumbulayo?” (INdu. 8:3, 4) Mhlawumbi lo mbuzo wawubuza ngenxa yoko kwenzekayo kuye. Lo nyana mncinane kaYese, waba ‘yindoda evunyiweyo yintliziyo kaYehova’ yaye wamthatha ‘ekulandeleni umhlambi waba yinkokeli’ yamaSirayeli. (1 Sam. 13:14; 2 Sam. 7:8) Cinga nje ngendlela uDavide awavakalelwa ngayo esakufumanisa ukuba uMdali wendalo yonke uye wanikela ingqalelo kwiingcamango zakhe, nangona wayeyinkwenkwe nje engumalusi!

⁴ Iyamangalisa indlela uYehova anomdla ngayo kuthi namhlanje. Uqokelela ndawonye kunqulo lokwenyaniso “izinto ezinqwenelekayo zazo zonke iintlanga” yaye unceda abakhonzi bakhe ukuba bagcine ingqibelelo. (Hag. 2:7) Ukuze siqonde kakuhle ukuba uYehova usinceda sigcine ingqibelelo, makhe siqale sithethe ngendlela abatsala ngayo abantu ukuze beze kunqulo lokwenyaniso.

UKUTSALWA NGUTHIXO

5. UYehova ubatsalela njani abantu kuNyana wakhe? Zekelisa.

⁵ UYesu wathi: “Akukho mntu unako ukuza kum ngaphandle kokuba uBawo, owandithumayo, amtsale.” (Yoh. 6:44) La mazwi abonisa ukuba ukuze sibe ngabafundi bakaKristu sifanele sincedwe nguThixo. UYehova ubatsalela njani abanjengezimvu kuNyana wakhe? Ngokushunyayelwa kweendaba ezilungileyo nangokusebenza komoya oyingcwele. Ngokomzekelo, xa uPawulos nabo wayesebenza nabo babeseFilipi, badibana nebhinqa elinguLidiya baza bashumayela iindaba ezilungileyo kulo. Ingxelo ephefumlelweyo ithi: “UYehova wayivula yabanzi intliziyo yakhe ukuze anikele ingqalelo kwizinto ezazithethwa nguPawulos.” UThixo ngomoya wakhe wanceda eli bhinqa ukuba lisiqonde isigidimi, yaye umphumo waba kukuba yena nayo yonke indlu yakhe babhaptizwa.—IZenzo 16:13-15.

6. UThixo wasitsala njani ukuze sibe kunqulo lokwenyaniso?

⁶ Ngaba oko kwenzeka kuLidiya kwakungaqhelekanga? Akunjalo. Ukuba ungumKristu ozahluleleyo, nawe watsalwa nguThixo kunqulo lokwenyaniso. Kanye njengokuba uBawo wabona nto ithile entliziyweni kaLidiya, wabona into elungileyo nakuwe. Ukuqala kwakho ukuva ngeendaba ezilungileyo, uYehova wakunceda ngomoya oyingcwele ukuba uzive. (1 Kor. 2:11, 12) Xa uzimisele ukusebenzisa oko ukufundileyo, uyayisikelela imigudu yakho yokwenza ukuthanda kwakhe. Xa wawuzinikela kuye, intliziyo yakhe yayichulumancile. Enyanisweni, ukususela nje ekuqaliseni kwakho ukuba kule ndlela yobomi, uYehova ebesoloko enawe kwinyathelo ngalinye obulithabatha.

7. Sazi njani ukuba uThixo uya kusinceda sihlale sinyanisekile?

⁷ Ekubeni uYehova esincedile ukuze sihambe naye, akanakusiyekela ukuba sizibonele ngoko siya kukwenza ukuze sihlale sithembekile. Uyazi ukuba kanye njengokuba singakhange sizizele enyanisweni, ayinakuzenzekela into yokuba siqhubeke sihleli kuyo. Ebhalela amaKristu athanjisiweyo, umpostile uPetros wathi: ‘Wena ulondolozwa ngamandla kaThixo ngokholo ngenxa yosindiso olulungele ukutyhilwa ngexesha lokugqibela.’ (1 Pet. 1:4, 5) La mazwi asebenza kuwo onke amaKristu yaye afanele abangel’ umdla kuye ngamnye kuthi namhlanje. Kutheni kunjalo nje? Kungenxa yokuba sonke sixhomekeke kuncedo lukaThixo ukuze sihlale sithembekile.

UKUTHINTELWA EKWENZENI ISONO

8. Kutheni sifanele sikulumkele ukwenza isono?

⁸ Iingxaki zobomi kunye nokungafezeki kwethu kunokubangela ukuba siphulukane nokunikela ingqalelo kwizinto zokomoya kuze kusibeke esichengeni sokwenza isono singaqondanga. (Funda eyabaseGalati 6:1.) Oku sinokukuzekelisa noko kwenzeka ebomini bukaDavide.

9, 10. UYehova wamthintela njani uDavide ukuba one, yaye wenza ntoni kuthi namhlanje?

⁹ Ngoxa wayezingelwa nguKumkani uSawule, uDavide wabonisa ukuzeyisa okukhulu ngokuthi angaziphindezeli kulo kumkani unomona. (1 Sam. 24:2-7) Kodwa kamsinya nje emva koko, uDavide wadinwa kukuzibamba. Wayefuna ukulungiselela amadoda akhe, waza ngentlonelo wacela uncedo komnye umSirayeli ogama linguNabhali. Xa uNabhali waphendula ngezithuko, uDavide waba nomsindo waza wazimisela ukuziphindezela kuwo onke amadoda endlu kaNabhali, engaqondi ukuba ukubulala abantu abangenzanga nto kwakuza kumenza abe netyala legazi kuThixo. Kwanceda umfazi kaNabhali, uAbhigali ngokungalibazisi, kuba wamthintela uDavide ekwenzeni loo mpazamo yayiya kubangela intlekele. Eqonda ukuba usetyenziswe nguYehova, uDavide wathi kuAbhigali: “Makabongwe uYehova uThixo kaSirayeli, okuthumeleyo ngale mini wandihlangabeza! Makubongwe nokuba nengqiqo kwakho, kubongwe nawe ondithinteleyo ngale mini ndingangeni etyaleni legazi nasekuzisindiseni ngesam isandla.”—1 Sam. 25:9-13, 21, 22, 32, 33.

¹⁰ Sinokufunda ntoni kule ngxelo? UYehova wasebenzisa uAbhigali ukuba athintele uDavide angenzi sono. Wenza okufanayo nanamhlanje. Kambe ke, asinakulindela ukuba uThixo athumele umntu ukuba asinqande ngalo lonke ixesha siza kwenza impazamo; singenakuze siyicingele indlela aya kwenza ngayo uThixo nakweyiphi na imeko noko aya kukuvumela ukuze kuphunyezwe injongo yakhe. (INtshu. 11:5) Noko ke, sinokumthemba uYehova, siqinisekile ukuba uyazazi iimeko zethu yaye uya kusinceda sihlale sithembekile kuye. Usiqinisekisa ngelithi: “Ndiya kukuqiqisa ndikuyalele ngendlela ofanele uhambe ngayo. Ndiya kukucebisa iliso lam likuwe.” (INdu. 32:8) Usicebisa njani uYehova? Linokusinceda njani icebiso lakhe? Yaye sinokuqiniseka njani ukuba uYehova uyabakhokela abantu bakhe namhlanje? Phawula indlela le mibuzo ephendulwa ngayo kwincwadi yeSityhilelo.

SIKHUSELWA SISILULEKO

11. UYehova uzazi ukusa kuwuphi umkhamo izinto ezenzeka kumabandla abantu bakhe?

¹¹ Kumbono obhalwe kwiSityhilelo isahluko 2 nesesi-3, uYesu Kristu oseluzukweni uhlola amabandla asixhenxe aseAsia Minor. Lo mbono utyhila ukuba, uKristu ubona zonke iimeko zala mabandla. Kwezinye iimeko, ude akhankanye abantu ngabanye ngamagama yaye kwimeko nganye, uyancoma aze anikele isilulelo esifanelekileyo. Kuthetha ntoni oku? Kwinzaliseko yalo mbono, la mabandla asixhenxe amela amaKristu athanjisiweyo emva kowe-1914, yaye isiluleko esinikelwa kumabandla asixhenxe siyasebenza nakuwo onke amabandla abantu bakaThixo emhlabeni namhlanje. Ngenxa yoko, kufanelekile ukugqiba kwelokuba uYehova ukhokela abantu bakhe esebenzisa uNyana wakhe. Lunokusinceda njani olo khokelo?

12. Sinokumvumela njani uYehova ukuba alathise amanyathelo ethu?

¹² Enye indlela esinokulufumana ngayo ulwalathiso lothando lukaYehova kukwenza ufundisiso lobuqu. UYehova usinika intaphane yeziluleko eziluncedo ezisuka eZibhalweni esebenzisa iimpapasho zekhoboka elithembekileyo neliyingqondi. (Mat. 24:45) Noko ke, ukuze singenelwe kuzo simele siziphe ithuba lokufundisisa size sikusebenzise oko sikufundileyo. Ufundisiso lobuqu luyenye indlela uYehova ‘asilondoloza ngayo ekukhubekeni.’ (Yude 24) Ngaba akukhe ufunde ngenkalo ethile kuncwadi lwethu ebonakala ngathi ibhalelwe wena ngokukhethekileyo? Samkele eso siluleko, usigqale njengesivela kuYehova. Kanye njengokuba umhlobo wakho enokukuqhwetha egxalabeni akuxelele okuthile omele ukuve, uYehova unokusebenzisa umoya wakhe ukuze akuxelele ngenkalo ethile kwihambo okanye ubuntu bakho omele wena nabanye niyiphucule. Ngokuluthobela ukhokelo lomoya wakhe, sivumela uYehova ukuba alathise amanyathelo ethu. (Funda iNdumiso 139:23, 24.) Ngenxa yoko, kuya kuba kuhle ukucinga ngokuzibekela ithuba elingakumbi lokufundisisa.

13. Kutheni kububulumko nje ukuba sihlolisise ixesha esilichitha sifunda?

¹³ Ukuchitha ixesha elininzi ekuzihlaziyeni kunokubangela ukuba singabi nalo ixesha lokwenza ufundisiso lobuqu. Omnye umzalwana uthi: “Kulula kakhulu ukuvumela ixesha lihambe ungalwenzanga ufundisiso lobuqu. Zininzi kakhulu ngoku izinto zokuzihlaziya kunangaphambili yaye azisabizi mali ininzi kunokuba kwakunjalo. Zifumaneka koomabonwakude, kwiikhompyutha nasezifowunini. Zikho kuyo yonke indawo.” Ukuba asilumkanga, sisenokubamba siyeka xa kufuneka senze ufundisiso olunzulu, de siyeke ngokupheleleyo. (Efe. 5:15-17) Kuya kuba kuhle ukuba ngamnye wethu azibuze ukuba: ‘Kukangaphi ndisimba nzulu kwiLizwi likaThixo? Ngaba loo nto ndiyenza kuphela xa ndinentetho okanye xa ndilungiselela intlanganiso ethile?’ Ukuba kunjalo, mhlawumbi sinokusebenzisa ingokuhlwa ebekelwe unqulo lwentsapho okanye ufundisiso lobuqu ukuze sizibekele ubutyebi bokomoya obulungiselelwe nguYehova ngenjongo yokusikhusela ukuze sisinde.—IMize. 2:1-5.

UKHUTHAZO LUYASOMELEZA

14. IZibhalo zibonisa njani ukuba uYehova unikela ingqalelo kwindlela esivakalelwa ngayo?

¹⁴ UDavide wajamelana nezinto ezininzi ezibuhlungu ebomini bakhe. (1 Sam. 30:3-6) Amazwi akhe aphefumlelweyo abonisa ukuba uYehova wayeyazi indlela avakalelwa ngayo. (Funda iNdumiso 34:18; 56:8.) UThixo uyayazi indlela esivakalelwa ngayo. Uyasondela kuthi xa ‘saphuke intliziyo’ okanye ‘sinomoya otyumkileyo.’ Oku kunokusithuthuzela ngokomlinganiselo othile, kanye njengoDavide owacula wathi: “Ndiya kuvuya ndibe nemihlali ngobubele bakho obunothando, ngenxa yokuba uyibonile inkxwaleko yam; ukwazile ukubandezeleka komphefumlo wam.” (INdu. 31:7) Kodwa uYehova akapheleli nje ekuphawuleni intlungu esikuyo. Uyasomeleza ngokusithuthuzela aze asikhuthaze. Ukwenza oku ngeentlanganiso zamaKristu.

15. Sinokufunda ntoni koko kwenzeka kuAsafu?

¹⁵ Enye indlela ekuluncedo ngayo ukuya kwiintlanganiso ibonakala kumava kamdumisi uAsafu. Ukucinga ngokungabikho kokusesikweni kwabangela uAsafu athandabuze ukubaluleka kokukhonza uThixo. UAsafu wadimazeka. Uthi xa echaza le meko: “Intliziyo yam yenziwa muncu ndaza ndahlabeka ezintsweni zam.” Loo nto yaphantsa yamyekisa ukukhonza uYehova. Yintoni eyanceda uAsafu waphinda walungelelana? Wathi: “Ndafikelela kwingcwele ezukileyo kaThixo.” Elapho phakathi kwabanquli bakaYehova waphinda wabona izinto ngendlela eyiyo. Wabona ukuba abangendawo baphumelela okwexeshana yaye ngaphandle kokusilela, uYehova uya kuzilungisa izinto. (INdu. 73:2, 13-22) Kwenzeka okufanayo nakuthi. Uxinezeleko olubangelwa lihlabathi likaSathana lunokusithez’ amandla. Ukuhlanganisana nabazalwana bethu kuyasihlaziya kuze kusenze simkhonze ngovuyo uYehova.

16. Unokusinceda njani umzekelo kaHana?

¹⁶ Noko ke, kuthekani ukuba imeko esebandleni yenza kube nzima kuwe ukuya ezintlanganisweni? Mhlawumbi kuye kwafuneka waphulukana nelungelo elithile lenkonzo okanye uye awabona ngasonye nomzalwana okanye udadewenu. Ukuba kunjalo, unokufunda lukhulu kumzekelo kaHana. (Funda eyoku-1 kaSamuweli 1:4-8.) Khumbula ukuba wayekhathazwa kakhulu yimeko yentsapho eyayibandakanya umfazi owayengevani naye, uPenina. Imeko yayisiba mbi kakhulu nyaka ngamnye xa le ntsapho iye kubingelela kuYehova eShilo. Yayimkhathaza kakhulu uHana kangangokuba ‘wayelila yaye engadli.’ Sekunjalo akazange avumele le meko ukuba imenze angabikho xa kunqulwa uYehova. UYehova wakuphawula ukunyaniseka kwakhe waza wamsikelela.—1 Sam. 1:11, 20.

17, 18. (a) Ziziphi iindlela esikhuthazwa ngazo kwiintlanganiso zebandla? (b) Uvakalelwa njani ngendlela uYehova asinyamekela ngayo ukuze sisindiswe?

¹⁷ Namhlanje amaKristu anezizathu ezivakalayo zokuxelisa umzekelo kaHana. Kufuneka siye rhoqo kwiintlanganiso. Njengoko sonke sisazi iintlanganiso zisikhuthaza ngokwenene. (Heb. 10:24, 25) Ububele bamanye amaKristu buyasithuthuzela. Ingongoma ethile yentetho enikelwayo okanye amagqabaza inokusichukumisa. Ngoxa sincokola ngaphambi okanye ngemva kweentlanganiso omnye umKristu unokusiphulaphula okanye asithuthuzele. (IMize. 15:23; 17:17) Siyakhuthazeka njengoko siculela uYehova. Silufuna ngakumbi ukhuthazo esilufumana ezintlanganisweni xa sihlaselwe ‘ziingcamango eziphazamisayo,’ kuba kulapho uYehova asomeleza khona ‘ngentuthuzelo yakhe’ aze asincede njengoko sizimisele ukuhlala sithembekile.—INdu. 94:18, 19.

¹⁸ Ukusinyamekela kukaThixo kusenza sivakalelwe njengomdumisi uAsafu owamculela le ngoma uYehova: “Usibambile isandla sam sasekunene. Uya kundikhokela ngecebo lakho.” (INdu. 73:23, 24) Simbulela ngokwenene uYehova ngokusikhusela ukuze sisindiswe!

[Umfanekiso okwiphepha 28]

Nawe utsalwe nguYehova

[Imifanekiso ekwiphepha 30]

Ukusebenzisa isiluleko sikaThixo kuyasilondoloza

[Umfanekiso okwiphepha 31]

Ukhuthazo esilufumanayo luyasomeleza