“Uxolo LukaThixo” Maluyilondoloze Intliziyo Yakho
“Makabuphakamisele uYehova ubuso bakhe kuwe, akunike uxolo.”—NUMERI 6:26.
1. Ngaphambi nje kokufa kwakhe, uPawulos wambhalela wathini uTimoti, etyhila ntoni?
NGONYAKA wama-65 C.E., umpostile uPawulos wayengumbanjwa eRoma. Nangona wayeza kufa kabuhlungu kungekudala ebulawa ngumbulali wamabanjwa ongumRoma, uPawulos wayenoxolo. Oku kubonakala kumazwi awawabhalela umhlobo wakhe oselula uTimoti, xa wathi: “Umzamo omhle ndiwuzamile, ugqatso ndilufezile, ukholo ndilugcinile. Okokugqibela ndibekelwe isithsaba sobulungisa, eya kundibuyisela ngaso ngaloo mini iNkosi, umgwebi olilungisa.”—2 Timoti 4:7, 8.
2. Yintoni eyalondoloza intliziyo kaPawulos kubo bonke ubomi bakhe obabuzaliswe ziziganeko, ukusa ekufeni kwakhe?
2 UPawulos wakwazi njani ukuzola kangaka ekubeni wayejamelene nokufa? Kwakungenxa yokuba “uxolo lukaThixo, olugqithisele kuko konke ukuqonda” lwalulondoloze intliziyo yakhe. (Filipi 4:7) Olu xolo lukwalunye lwalumlondolozile ukutyhubela yonke iminyaka eyayizaliswe ziinkathazo ukususela ekuguqukeleni kwakhe kubuKristu ngaphambilana. Lwamzimasa ebudeni bokuhlaselwa ngamahlokondiba, bokuvalelwa entolongweni, ekutyakatyweni nasekuxulutyweni ngamatye. Lwamomeleza njengoko wayesilwa neempembelelo zowexuko nezobuYuda. Yaye lwamnceda ukuba alwe nemimoya engabonakaliyo yeedemon. Kuyacaca ukuba, lwamomeleza ukusa esiphelweni.—2 Korinte 10:4, 5; 11:21-27; Efese 6:11, 12.
3. Yiyiphi imibuzo ephakamayo mayela noxolo lukaThixo?
3 Enjani yona indlela olumele ukuba lunempembelelo enamandla ngayo olu xolo! Ngaba thina namhlanje sinokuluqonda oko lukuko? Ngaba luya kunceda ekulondolozeni nasekomelezeni iintliziyo zethu njengoko ‘sizama umzamo omhle wokholo’ ebudeni bala ‘maxesha anzima nanomngcipheko’?—1 Timoti 6:12; 2 Timoti 3:1.
Uxolo NoThixo—Indlela Ekwaphulukwana Ngayo Nalo
4. Ziziphi ezinye iintsingiselo zegama “uxolo” eBhayibhileni?
4 EBhayibhileni igama elithi “uxolo” lineentsingiselo ezininzi. Ezi zilandelayo zezinye zazo, njengoko zidweliswe kwiThe New International Dictionary of New Testament Theology: “Kuyo yonke iT[estamente] E[ndala], [usha·lohmʹ] (uxolo) uthetha impilo-ntle ngeendlela ezininzi (ABagwe. 19:20); impumelelo (INdu. 73:3, thelekisa iNW), kwanaxa kubhekiselwa kubantu abangahloneli Thixo; impilo engokwasemzimbeni (Isa. 57:18, [ 19]; INdu. 38:3, [thelekisa iNW]); ukwaneliseka . . . (Gen. 15:15 njl.); ulwalamano oluhle phakathi kweentlanga naphakathi kwabantu ( . . . ABagwe. 4:17; 1 Kron. 12:17, 18); ukusindiswa ( . . . Yer. 29:11; thelekisa uYer. 14:13).” Okona kubalulekileyo lulwalamano oluhle noYehova, ekuthi ngaphandle kwalo naluphi na uxolo, lube kuphela lolomzuzwana nolusikelwe umda.—2 Korinte 13:11.
5. Uxolo lwendalo kaThixo lwaphazanyiswa njani ekuqaleni?
5 Ekuqaleni, yonke indalo yayiseluxolweni ngokupheleleyo noYehova. Kwakungesizathu esilungileyo, awathi uYehova wavakalisa ukuba yonke imisebenzi yakhe yokudala yayimihle. Eneneni, izithunywa zezulu zaduma zimemelela zakuyibona. (Genesis 1:31; Yobhi 38:4-7) Noko ke, okubuhlungu kukuba, olo xolo lwendalo iphela aluzange luhlale luhleli. Lwaphela kabuhlungu xa isidalwa somoya ngoku esaziwa ngokuba nguSathana salukuhla esona sasisitsha kwizidalwa zikaThixo ezikrelekrele, uEva, ukuba angamthobeli uThixo. Indoda kaEva, uAdam, yamlandela, yaye ngenxa yobukho babavukeli abathathu bedibene, kwabakho ukungavisisani kwindalo iphela.—Genesis 3:1-6.
6. Ukuphulukana noxolo lukaThixo kwaphumela enini kuluntu?
6 Ukuphulukana noxolo noThixo kwaba yintlekele kuAdam noEva, abamizimba yathi ngoku yaqalisa ukuwohloka kancinane de ekugqibeleni bafa. Kunokuba anandiphe uxolo eParadisi, kwafuneka uAdam abulaleke esebenza umhlaba ongalungiswanga ngaphandle kwe-Eden ukuze ondle intsapho yakhe eyayikhula. Kunokuthi ngolwaneliseko abe ngunina wesizwe sabantu esifezekileyo, uEva wavelisa inzala engafezekanga esiva intlungu yaye ebulaleka. Ukuphulukana noxolo noThixo kwakhokelela kumona nogonyamelo kuluntu. UKayin wabulala umntakwabo uAbheli, yaye ngexesha loMkhukula, umhlaba uphela wawuzaliswe lugonyamelo. (Genesis 3:7–4:16; 5:5; 6:11, 12) Xa abazali bethu bokuqala bafayo, ngokuqinisekileyo abazange balale emangcwabeni benelisekile, ‘benoxolo,’ njengoko kwaba njalo ngoAbraham kumakhulu eminyaka kamva.—Genesis 15:15.
7. (a) Sisiphi isiprofeto esavakaliswa nguThixo esalatha ekubuyiselweni koxolo ngokupheleleyo? (b) Utshaba lukaThixo uSathana lwaba nempembelelo kangakanani?
7 Emva kokuba uAdam noEva bephulukene noxolo, okwesihlandlo sokuqala eBhayibhileni sifumana igama elithi ubutshaba. UThixo wathetha noSathana waza wathi: “Ndiya kumisa ubutshaba phakathi kwakho nomfazi, naphakathi kwembewu yakho nembewu yakhe; yona iya kukutyumza intloko, wena uya kuyityumza isithende.” (Genesis 3:15) Ekuhambeni kwexesha, impembelelo kaSathana yakhula ukusa kwinqanaba lokuba umpostile uYohane athi: “Ihlabathi liphela lilele kongendawo.” (1 Yohane 5:19) Ihlabathi elilawulwa nguSathana ngokuqinisekileyo alikho luxolweni noThixo. Ngoko ke, ngokufanelekileyo, umfundi uYakobi walumkisa amaKristu wathi: “Anazi na ukuba ubuhlobo balo ihlabathi bubutshaba kuye uThixo?”—Yakobi 4:4.
Ukuba Noxolo Kwihlabathi Elinobutshaba
8, 9. Ngemva kokona kuka-Adam, abantu babenokuba seluxolweni njani noThixo?
8 Emva phayaa e-Eden, xa uThixo wakhankanya okokuqala igama elithi “ubutshaba,” wakwaxela kwangaphambili indlela uxolo olupheleleyo olwaluza kubuyiselwa ngayo kwindalo. Imbewu ethenjisiweyo yomfazi kaThixo yayiza kutyumza intloko yalowo waba ngowokuqala ukuphelisa kabuhlungu uxolo. Ukususela e-Eden ukusa phambili, abo babonakalisa ukholo kwelo dinga banandipha ulwalamano loxolo kunye noThixo. KuAbraham, oku kwaphumela ekubeni kwakhiwe ubuhlobo.—2 Kronike 20:7; Yakobi 2:23.
9 Ngexesha likaMoses, uYehova wamisela abantwana bakaSirayeli, umzukulwana ka-Abraham, njengohlanga. Walunika olu hlanga uxolo lwakhe, njengoko kubonwa kwintsikelelo uAron, umbingeleli omkhulu, awayivakalisa kulo: “Makakusikelele uYehova, akugcine, makabukhanyise uYehova ubuso bakhe kuwe, akubabale; makabuphakamisele uYehova ubuso bakhe kuwe, akunike uxolo.” (Numeri 6:24-26) Uxolo lukaYehova lwaluza kuzisa imivuzo etyebileyo, kodwa wayeluzisa phantsi kweemeko ezithile.
10, 11. KuSirayeli, uxolo lukaThixo lwalunokufumaneka phantsi kwaziphi iimeko, yaye lwaluya kuphumela entwenini?
10 UYehova waluxelela oku olo hlanga: “Ukuba nithe nahamba emimiselweni yam, nayigcina imithetho yam, nayenza, ndoninika iziphango zenu ngexesha lazo; ilizwe lininike indyebo yalo, nemithi yentsimi ivelise iziqhamo zayo; ndoninika uxolo ezweni elo, nilale; kungabikho bani unigubhisayo, ndilisuse irhamncwa ezweni elo, ikrele lingahambi ezweni lenu; ndohamba phakathi kwenu, ndibe nguThixo wenu, nina nibe ngabantu bam.” (Levitikus 26:3, 4, 6, 12) USirayeli wayenokunandipha uxolo ngenxa yokuba wayenqabisekile kwiintshaba zakhe, wayenentabalala yezinto eziphathekayo nolwalamano olusondeleyo noYehova. Kodwa oku kwakuza kuxhomekeka ekunamatheleni kwakhe eMthethweni kaYehova.—INdumiso 119:165.
11 Kuyo yonke imbali yolo hlanga, amaSirayeli awazama ngokuthembekileyo ukugcina imimiselo kaYehova alunandipha uxolo naye, yaye ngokufuthi oko kwazisa nezinye iintsikelelo ezininzi. Ebudeni beminyaka yokuqala yolawulo lukaKumkani uSolomon, uxolo noThixo lwazisa impumelelo yezinto eziphathekayo ndawonye nesiqabu kwiimfazwe nabamelwane bakaSirayeli. Ichaza elo xesha, iBhayibhile ithi: “Ahlala amaYuda namaSirayeli ekholosile, elowo ehleli phantsi komdiliya wakhe naphantsi komkhiwane wakhe, ethabathela kwaDan esa eBher-shebha, yonke imihla kaSolomon.” (1 Kumkani 4:25) Kwanaxa kwaqhambuka imfazwe kumazwe aselumelwaneni, amaSirayeli athembekileyo ayesenalo olona xolo lubalulekileyo, uxolo noThixo. Ngaloo ndlela, uKumkani uDavide, umphumi-mkhosi odumileyo, wabhala: “Ndiya kulala phantsi, ndilale ubuthongo kwangoku, ndixolile, ngokuba wena, Yehova, undihlalisa ndikholosile, noko ndindedwa.”—INdumiso 4:8.
Isizinzi Esisiso Sokufumana Uxolo
12. Ekugqibeleni uSirayeli waphulukana njani noxolo awayenalo noThixo?
12 Ekugqibeleni, iMbewu eyayiza kubuyisela uxolo olupheleleyo yafika inguYesu, yaye ekuzalweni kwakhe izithunywa zezulu zacula zisithi: “Uzuko kuThixo enyangweni, uxolo emhlabeni kubantu bomnqweno wokulungileyo.” (Luka 2:14, NW) UYesu wavela kwaSirayeli, kodwa phezu kwako nje ukuba phantsi komnqophiso kaThixo, olo hlanga luphela aluzange lumamkele yaye lwamnikela kumaRoma ukuba abulawe. Ngaphambi nje kokufa kwakhe, uYesu wayililela iYerusalem, esithi: “Akwaba ubusazi nawe lo kwangayo yona le mini yakho, izinto ezizezoxolo lwakho! Ke kungoku zifihliwe emehlweni akho.” (Luka 19:42; Yohane 1:11) Ngenxa yokuba engazange amamkele uYesu, uSirayeli waphulukana ngokupheleleyo noxolo awayenalo noThixo.
13. Yiyiphi indlela entsha uYehova awayimiselayo yokuba umntu afumane uxolo Naye?
13 Sekunjalo, iinjongo zikaThixo azizange ziphazamiseke. UYesu wavuswa kwabafileyo ibe wanikela kuYehova ixabiso lobomi bakhe obufezekileyo njengentlawulelo yabantu abantliziyo zilungileyo. (Hebhere 9:11-14) Idini likaYesu laba yindlela entsha nesisizinzi esisiso sokuba uluntu—amaSirayeli okwemvelo neeNtlanga—lufumane uxolo noThixo. Kwincwadi yakhe eya kumaKristu aseRoma uPawulos wathi: “Sithe, besiziintshaba nje, saxolelaniswa noThixo ngako ukufa koNyana wakhe.” (Roma 5:10) Kwinkulungwane yokuqala, abo babesenza uxolo ngale ndlela babethanjiswa ngomoya oyingcwele ukuze bamkelwe njengoonyana bakaThixo namalungu ohlanga olutsha lokomoya olubizwa ngokuba ‘nguSirayeli kaThixo.’—Galati 6:16; Yohane 1:12, 13; 2 Korinte 1:21, 22; 1 Petros 2:9.
14, 15. Chaza uxolo lukaThixo, uze ucacise indlela oluwakhuthaza ngayo amaKristu kwanaxa engamaxhoba entiyo kaSathana.
14 La maSirayeli matsha okomoya ayeza kuba ngamaxhoba emfazwe kaSathana nehlabathi lakhe. (Yohane 17:14) Noko ke, ayeza kuba “noxolo oluvela kuThixo uYise, noKristu uYesu iNkosi yethu.” (2 Timoti 1:2) UYesu wawaxelela oku: “Ezi zinto ndizithethile kuni, ukuze nibe noxolo kum. Ehlabathini niya kuba nembandezelo; yomelelani, mna ndiloyisile ihlabathi.”—Yohane 16:33.
15 Olu luxolo olwanceda uPawulos namaKristu angoowabo ukuba banyamezele phezu kwabo nje bonke ubunzima ababejamelene nabo. Lubonisa ulwalamano lwenzolo nemvisiswano noThixo olwenziwa lube nokwenzeka ngedini likaYesu. Lunika lowo unalo uxolo lokuzola kwengqondo njengoko ewuqonda umsebenzi kaYehova. Umntwana ofunqulwe ziingalo zotata onothando unemvakalelo yoxolo efanayo, isiqinisekiso esingathandabuzekiyo sokuba ulondolozwe nguthile omnyamekeleyo. UPawulos wakhuthaza abaseFilipi wathi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:6, 7.
16. Uxolo noThixo lwaluchaphazela njani ulwalamano olwalukho phakathi kwamaKristu enkulungwane yokuqala?
16 Omnye umphumo wokuphulukana komntu noxolo noThixo wawuyintiyo nokungavisisani. KumaKristu enkulungwane yokuqala, ukufumana uxolo noThixo kwaphumela kokwahlukileyo koko: uxolo nomanyano phakathi kwawo, zinto ezo uPawulos wazibiza ngokuba ‘yintambo [emanyanisayo, NW] yoxolo.’ (Efese 4:3) ‘Ayecinga ntonye, ezolile [ehleli ngoxolo, NW], yaye uThixo wothando noxolo wayenawo.’ Ngaphezu koko, ayeshumayela “iindaba ezilungileyo zoxolo,” ngokusisiseko, ezaziziindaba ezilungileyo zosindiso ‘kwaboxolo,’ abo babesabela kakuhle kwiindaba ezilungileyo.—2 Korinte 13:11; IZenzo 10:36; Luka 10:5, 6.
Umnqophiso Woxolo
17. UThixo uye wenza ntoni nabantu bakhe kumhla wethu?
17 Ngaba uxolo olunjalo lunokufunyanwa namhlanje? Ewe, lunokufunyanwa. Ukususela ekumiselweni koBukumkani bukaThixo phantsi koYesu Kristu ozukisiweyo ngowe-1914, uYehova uye wahlanganisa abaseleyo boSirayeli kaThixo abaphuma kweli hlabathi waza wenza umnqophiso woxolo kunye nabo. Ngaloo ndlela ezalisekisa idinga lakhe awalenzayo esebenzisa umprofeti uHezekile: “Ndobenzela umnqophiso woxolo; uya kuba ngumnqophiso ongunaphakade kubo; ndibamise, ndibandise, ndibeke ingcwele yam phakathi kwabo ngonaphakade.” (Hezekile 37:26) UYehova wenza lo mnqophiso namaKristu athanjisiweyo athi wona, njengabazalwana bawo benkulungwane yokuqala, abonakalise ukholo kwidini likaYesu. Ecociwe kukungcola okungokomoya, aye azahlulela kuYise wasezulwini yaye azabalazela ukulandela imiyalelo yakhe, eyona ndlela iphawulekayo akwenza ngayo oku ingokukhokela ekushumayeleni iindaba ezilungileyo zoBukumkani bukaThixo obumiselweyo ehlabathini lonke.—Mateyu 24:14.
18. Bambi phakathi kweentlanga basabele njani bakuqonda ukuba igama likaThixo liphezu koSirayeli kaThixo?
18 Esi siprofeto siqhubeka sithi: “Umnquba wam uya kuba phezu kwabo, ndibe nguThixo wabo, babe ngabantu bam; zazi iintlanga ukuba ndinguYehova ongcwalise amaSirayeli.” (Hezekile 37:27, 28) Ngokuvisisana noku, amakhulu amawaka, ewe, izigidi, eziphuma ‘kwiintlanga’ ziye zaqonda ukuba igama likaYehova liphezu koSirayeli kaThixo. (Zekariya 8:23) Bephuma kuzo zonke iintlanga, baye bathontelana ukuza kukhonza uYehova nolo hlanga lokomoya, babumba “isihlwele esikhulu” esabonwa kusengaphambili kwiSityhilelo. Ekubeni siye ‘sazihlamba iingubo zaso ezinde sazenza mhlophe egazini leMvana,’ siya kusinda kwimbandezelo enkulu sisindele kwihlabathi elitsha elinoxolo.—ISityhilelo 7:9, 14.
19. Luluphi uxolo olunanditshwa ngabantu bakaThixo namhlanje?
19 Bekunye, uSirayeli kaThixo nesihlwele esikhulu banandipha uxolo lokomoya olunokuthelekiswa noxolo olwalunanditshwa nguSirayeli phantsi koKumkani uSolomon. Ethetha ngabo, uMika waprofeta wathi: “Ziwakhande, amakrele azo abe ngamakhuba, nezikhali zazo zibe zizitshetshe zokuthena imidiliya. Uhlanga aluyi kuphakamisela kuhlanga ikrele lalo, bangabi safunda ukulwa. Baya kuhlala elowo phantsi komdiliya wakhe, naphantsi komkhiwane wakhe, kungabikho uboyikisayo.” (Mika 4:3, 4; Isaya 2:2-4) Ngokuvisisana noku, bakuyekile ukulwa nokukruthakruthana, ngokomfuziselo bekhanda amakrele abo abe ngamakhuba nezikhali zabo zibe zizitshetshe zokuthena imidiliya. Ngaloo ndlela, banandipha ubuzalwana obunoxolo kuyo yonke intlangano yabo yezizwe ngezizwe, kungakhathaliseki ukuba ngabaluphi na uhlanga, ulwimi, isizwe okanye imvelaphi. Ibe bavuyiswa kukuqiniseka ngokuba uYehova uya kubalondoloza. ‘Akukho uboyikisayo.’ Ngokwenyaniso, ‘uYehova ubanikile abantu bakhe amandla, uYehova ubasikelele abantu bakhe ngoxolo.’—INdumiso 29:11.
20, 21. (a) Kutheni simele sisebenzele ukulondoloza uxolo lwethu noThixo? (b) Sinokuthini ngemigudu kaSathana yokuphelisa uxolo lwabantu bakaThixo?
20 Noko ke, njengakwinkulungwane yokuqala yeXesha Eliqhelekileyo, uxolo lwabakhonzi bakaThixo luye lwabangela intiyo kaSathana. Ukususela ekulahlelweni kwakhe ngaphandle kwamazulu emva kokumiselwa koBukumkani bukaThixo ngowe-1914, uSathana uye walwa imfazwe “nabaseleyo bembewu [yomfazi].” (ISityhilelo 12:17) Kwanangomhla wakhe, uPawulos walumkisa: “Umzamo wethu asingowokuzamana negazi nenyama; ngowokuzamana . . . nayo imikhosi yomoya abakhohlakeleyo kwezasezulwini iindawo.” (Efese 6:12) Ekubeni uSathana ngoku epheleliselwe kummandla womhlaba, eso silumkiso singxamisekile.
21 USathana uye wasebenzisa bonke ubuchule anabo kumgudu wakhe wokuphelisa uxolo lwabantu bakaThixo, kodwa akaphumelelanga. Emva phayaa ngowe-1919, kwakukho abantu abangaphantsi lee kwe-10 000 ababezabalazela ukukhonza uThixo ngokuthembeka. Namhlanje, kukho abantu abangaphezu kwezigidi ezine abaloyisayo ihlabathi ngokholo lwabo. (1 Yohane 5:4) Kwaba, uxolo noThixo noxolo oluphakathi kwabo luyinto yokwenene, kwananjengokuba benyamezela intiyo kaSathana nembewu yakhe. Kodwa ngenxa yale ntiyo, naxa kuqwalaselwa ukungafezeki kwethu ‘namaxesha anomngcipheko’ esiphila kuwo, sifanele ngenkuthalo sisebenzele ukulondoloza uxolo lwethu. (2 Timoti 3:1) Kwinqaku elilandelayo, siza kubona oko kuqukwa koku.
Ngaba Unokucacisa?
◻ Kwakutheni ukuze umntu ekuqaleni aphulukane noxolo lwakhe noThixo?
◻ KuSirayeli, uxolo lukaThixo lwalunokufumaneka phantsi kwaziphi iimeko?
◻ Uxolo noThixo lusekelwe entwenini namhlanje?
◻ Luyintoni “uxolo lukaThixo” olulondoloza iintliziyo zethu?
◻ Ziziphi iintsikelelo ezibhekele phaya esizinandiphayo ukuba siseluxolweni noThixo?