Iindlela Zokushumayela Iindaba Ezilungileyo

UYESU waba ngumzekelo wokushumayela iindaba ezilungileyo ngokuzimisela. Waya ebantwini, wathetha nabo waza wabafundisa kumakhaya abo nakwiindawo zikawonke-wonke. (Mat. 9:35; 13:36; Luka 8:1) UYesu wathetha nomntu ngamnye, wafundisa abafundi bakhe bebodwa, waza wathetha namaqela abantu ababede babe ngamawaka. (Marko 4:10-13; 6:35-44; Yoh. 3:2-21) Wawasebenzisa onke amathuba awayevela ukuze akhuthaze aze enze abantu babe nethemba. (Luka 4:16-19) Akazange awayeke adlule amathuba okushumayela, kwanaxa wayediniwe yaye elambile. (Marko 6:30-34; Yoh. 4:4-34) Xa sifunda amabali aphefumlelweyo kaYesu eshumayela, ngaba awasenzi sifune ukufana naye? Ayasikhuthaza njengoko kwakunjalo nakubapostile.—Mat. 4:19, 20; Luka 5:27, 28; Yoh. 1:43-45.

² Makhe sithethe ngamathuba anawo amaKristu anamhlanje okuncedisa kumsebenzi owaqaliswa nguYesu Kristu kwiminyaka emalunga neyi-2 000 edluleyo.

UKUSHUMAYELA KWINDLU NGENDLU

³ Thina maNgqina KaYehova siyakuqonda ukubaluleka kokushumayela iindaba ezilungileyo ezingoBukumkani kwindlu ngendlu. Siye sayisebenzisa kakhulu le ndlela kangangokuba sele sisaziwa ngayo. Ubulumko bokusebenzisa le ndlela ukuze kushunyayelwe kwiimiliyoni zabantu kuye kwabonakala kwimiphumo encumisayo eye yakho. (Mat. 11:19; 24:14) Ukushumayela kwindlu ngendlu yindlela esibonisa ngayo ukuba siyamthanda uYehova nommelwane.—Mat. 22:34-40.

⁴ Ukushumayela kwindlu ngendlu ayonto asandokuyiqala amaNgqina KaYehova. Umpostile uPawulos wabhala ngokufundisa kwakhe kumakhaya abantu. Echazela abadala base-Efese indlela awayeshumayela ngayo, wathi: ‘Ukususela kwimini yokuqala endafika ngayo kwiphondo laseAsiya, zange ndinifihlele nantoni na enokuninceda. Ndanifundisa nakwindlu ngendlu.’ Ngale ndlela nangezinye, uPawulos ‘washumayela ngokucokisekileyo kumaYuda nakumaGrike esithi mawaguqukele kuThixo aze akholwe kwiNkosi yethu uYesu.’ (IZe. 20:18, 20, 21) Ngelo xesha, abalawuli baseRoma babekhuthaza ukukhonza izithixo ibe abaninzi ‘babezinikele kwizithixo.’ Kwakungxamisekile ukuba abantu bafune “uThixo owadala umhlaba nazo zonke izinto ezikuwo,” Lowo ‘wayexelela bonke abantu abakuzo zonke iindawo ukuba mabaguquke.’​—IZe. 17:22-31.

⁵ Namhlanje kungxamiseke ngakumbi ukuba sixelele abantu iindaba ezilungileyo. Isiphelo seli hlabathi libi sisondele. Oku kusenza sizimisele ngakumbi ukushumayela. Asikayiboni enye indlela ebhetele yokufumana abo balambele inyaniso kunale kudala siyisebenzisa yokuya kwindlu ngendlu. Nanamhlanje isaphumelela njengokuba yayinjalo ngemihla kaYesu nabapostile bakhe.​—Marko 13:10.

⁶ Ngaba ushumayela kangangoko kwindlu ngendlu? Ukuba kunjalo, uyamvuyisa uYehova. (Hez. 9:11; IZe. 20:35) Kusenokungabi lula kuwe ukushumayela kwindlu ngendlu. Mhlawumbi uneengxaki zempilo okanye ushumayela kwintsimi enabantu abangenamdla. Mhlawumbi nemithetho karhulumente ayivumi ukuba kushunyayelwe kakuhle. Kusenokwenzeka ukuba uneentloni ibe kunzima kuwe ukuncokola nabantu ongabaqhelanga. Ngenxa yoko, uba novalo qho usiya kwindlu ngendlu. Ungatyhafi. (Eks. 4:10-12) Imeko yakho iyafana neyabanye abazalwana bakho abakwezinye iindawo.

⁷ UYesu wabathembisa oku abafundi bakhe: “Jongani! Ndikunye nani yonke imihla de kube sekuphelisweni kweli hlabathi.” (Mat. 28:20) Eso sithembiso siyasomeleza njengoko sisenza abafundi. Sifana nompostile uPawulos owathi: “Ezintweni zonke ndinamandla ngenxa yalowo undinika amandla.” (Filipi 4:13) Qiniseka ukuba ubakho xa ibandla lishumayela kwindlu ngendlu. Xa usebenza nabanye, baza kukhuthaza baze bakuncede. Thandaza kuYehova umcele akuncede woyise nayiphi na imiqobo uze uzimisele xa ushumayela iindaba ezilungileyo.​—1 Yoh. 5:14.

⁸ Njengoko uthetha nabanye ngeendaba ezilungileyo, uza kufumana amathuba okuchaza ‘isizathu sokuba unethemba.’ (1 Pet. 3:15) Uza kuwubona ngakumbi umahluko phakathi kwabo banethemba loBukumkani nabo bangenalo. (Isa. 65:13, 14) Ukwazi ukuba uye wawuthobela umyalelo kaYesu othi “makubonakale ukukhanya kwenu” kuza kukwenza waneliseke, kwaye usenokude uncede abanye bamazi uYehova nenyaniso ekhokelela kubomi obungunaphakade.​—Mat. 5:16; Yoh. 17:3; 1 Tim. 4:16.

⁹ Kuye kwenziwe amalungiselelo okuba kushunyayelwe kwindlu ngendlu ngeempela-veki naphakathi evekini. Kwiindawo ekunzima kakhulu ukufumana abantu kumakhaya abo emini, amanye amabandla aye alungiselela ukuba kushunyayelwe ngamarhatya. Abantu basenokungabi nangxaki yokuncokola nathi xa kutshona ilanga okanye xa kuqala ukuba sebusuku kunakusasa.

UKUKHANGELA ABAFANELEKAYO

¹⁰ UYesu wayalela abafundi bakhe ukuba ‘bakhangele’ abantu abafanelekayo. (Mat. 10:11) Wayengabakhangeli kwindlu ngendlu qha abantu abanomdla. Wayeshumayela nanini na ithuba livela, ngendlela ecwangcisiweyo nengacwangciswanga. (Luka 8:1; Yoh. 4:7-15) Nabapostile bashumayela kubantu ababekwiindawo ezahlukeneyo.​—IZe. 17:17; 28:16, 23, 30, 31.

¹¹ Nathi namhlanje, injongo yethu kukuxelela bonke abantu ngomyalezo woBukumkani. Oku kuthetha ukuba simele sixelise indlela uYesu nabafundi bakhe ababeshumayela ngayo size sikuqonde kakuhle ukutshintsha kwamaxesha neemeko ezingafaniyo zabantu abakwintsimi yethu. (1 Kor. 7:31) Ngokomzekelo, abavakalisi baye bakwazi ukushumayela kwiindawo zamashishini. Ukushumayela esitratweni, ezipakini, kwiindawo zokupaka iimoto, okanye kwezinye iindawo abafumaneka kuzo abantu, kuye kwaphumelela kumazwe amaninzi. Kwamanye amabandla abavakalisi baye besebenzisa iitafile okanye iitroli kwintsimi yabo. Neofisi yesebe inokulungiselela amaphulo okushumayela kwizixeko ezikhulu kwiindawo eziphithizela abantu abaninzi, isebenzisa abavakalisi bamabandla aliqela. Loo nto inceda abavakalisi bakwazi ukushumayela kubantu abangafumanekiyo emakhaya.

¹² Naphi na udibana nomntu onomdla eBhayibhileni, ungamnika enye yeencwadi zethu. Ukuze ugcine umdla waloo mntu, unokumchazela ukuba angakufumana njani uze wenze amalungiselelo okubuyela kuye. Mchazele ngo-jw.org okanye umnike iadresi yendawo ekufutshane ekungenelwa kuyo iintlanganiso. Usenokufumanisa ukuba ukushumayela kubantu abakwiindawo zikawonke-wonke yenye indlela emnandi onokushumayela ngayo.

¹³ Noko ke, amaKristu anamhlanje akathunywanga nje ukushumayela iindaba ezilungileyo. Ukuze ukwazi ukunceda abanye bamkele inyaniso baze bafumane ubomi obungunaphakade, kufuneka ubuyele kaninzi kubantu abanomdla ukuze benze inkqubela baze babe ngamaKristu aqolileyo.

UKWENZA AMABUYELO

¹⁴ UYesu wathi kubalandeli bakhe: “Niza kuba ngamangqina am. . . de niyokufika nakwezona ndawo zikude emhlabeni.” (IZe. 1:8) Kodwa wabaxelela noku: “Hambani niyokubenza abafundi abantu beentlanga zonke, . . . nibafundise ukuba benze yonke into endiniyalele yona.” (Mat. 28:19, 20) Ukwenza amabuyelo kunokukwenza umkhonze uvuya uYehova. Abantu abebenomdla kwiindaba ezilungileyo xa ububatyelela okokuqala basenokuvuya xa bephinda bencokola nawe. Xa ubaxelela okungakumbi ngeBhayibhile, usenokukwazi ukomeleza ukholo lwabo kuThixo uze ubancede babone ukuba bayakudinga ukufundiswa nguThixo. (Mat. 5:3) Ukuba uyalungiselela uze ubuyele ngexesha elifanelekileyo, usenokukwazi ukuqalisa isifundo seBhayibhile. Eyona njongo yokubuyela kukuqalisa isifundo seBhayibhile. Asaneli kuyityala nje imbewu yenyaniso, kodwa siyayinkcenkceshela.​—1 Kor. 3:6.

¹⁵ Ukwenza amabuyelo kunokuba nzima kwabanye. Mhlawumbi ulichule ekuqaliseni incoko emfutshane ngeendaba ezilungileyo, kwaye uyayithanda le ndlela yokushumayela. Kodwa ke uba madolw’ anzima ukubuyela kumninimzi ukuze ningene nzulu eBhayibhileni. Ukulungiselela kakuhle kukunceda ungoyiki. Sebenzisa amacebiso eendlela zokushumayela afumaneka kwintlanganiso yaphakathi evekini. Ungacela umvakalisi onamava akukhaphe.

UKUQHUBA IZIFUNDO ZEBHAYIBHILE

¹⁶ Xa wayethetha nendoda eyayiguquke yangumYuda awayibona ifunda iLizwi LikaThixo, uFilipu umshumayeli wayibuza: “Uyayiva na le nto uyifundayo?” Le ndoda yaphendula yathi: “Ndingayiva njani kungekho mntu undifundisayo?” Ingxelo yeBhayibhile ekwiZenzo isahluko 8 isixelela ukuba uFilipu waqala kanye ngeso Sibhalo yayisifunda le ndoda, ‘wayishumayeza iindaba ezilungileyo ezingoYesu.’ (IZe. 8:26-36) Asazi ukuba uFilipu wachitha ixesha elingakanani nale ndoda, kodwa wazicacisa iindaba ezilungileyo kangangokuba yaba likholwa yaza yacela ukubhaptizwa. Yaba ngumfundi kaYesu Kristu.

¹⁷ Abantu abaninzi namhlanje abayiqhelanga iBhayibhile, ngoko kusenokufuneka sibuyele kubo kaninzi size sifunde nabo kangangeeveki, iinyanga okanye unyaka nangaphezulu, ngaphambi kokuba babe nokholo baze bafanelekele ukubhaptizwa. Kodwa kuyanceda ukuba nomonde nothando njengoko ufundisa abantu abanomdla, kanye njengokuba uYesu wathi: “Kuvuyisa kakhulu ukupha kunokuphiwa.”—IZe. 20:35.

¹⁸ Ngokuqinisekileyo uza kufuna ukuqhuba isifundo seBhayibhile usebenzisa incwadi eyenzelwe loo nto. Xa usebenzisa izinto ozifunde kwintlanganiso yaphakathi evekini uze umane uhamba nabavakalisi abanamava okufundisa, uza kukwazi ukuba nezifundo ezinenkqubela, uncede abanye babe ngabafundi bakaYesu Kristu.

¹⁹ Ukuba ufuna ukuncedwa ukuze uqalise uze uqhube isifundo seBhayibhile, thetha nomdala okanye nelinye iNgqina eliqhuba izifundo zeBhayibhile ezinenkqubela. Angakunceda amacebiso akwiNcwadi Yobomi BamaKristu Nomsebenzi Wokushumayela ibe ezintlanganisweni kuboniswa indlela yokuwasebenzisa. Thembela kuYehova uze uwuthandazele umnqweno wakho. (1 Yoh. 3:22) Ukuba kunokwenzeka, zimisele ukuqhuba isifundo seBhayibhile ukongezelela kwezo uziqhuba nentsapho yakho. Xa uqhuba izifundo zeBhayibhile, uza kuvuya ngakumbi entsimini.

UKUNCEDA ABANOMDLA BANGENE KWINTLANGANO KAYEHOVA

²⁰ Xa sinceda abantu bamazi uYehova uThixo baze babe ngabafundi bakaYesu Kristu, baba yinxalenye yebandla. Izifundo zeBhayibhile ziza kwenza inkqubela zize zimthande ngakumbi uYehova xa ziyiqonda intlangano yakhe zize ziyithobele. Kubalulekile ukuzifundisa ukwenza le nto. Yiloo nto kuye kwenziwa iividiyo nencwadana ethi Ngoobani Abenza Ukuthanda KukaYehova Namhlanje? Nezinye izinto ezithethwe kwiSahluko 4 sale ncwadi zinokuba luncedo.

²¹ Nisaqala nje ukufunda iBhayibhile, sincede isifundo sibone ukuba uYehova usebenzisa intlangano ukuze kushunyayelwe iindaba ezilungileyo namhlanje. Mbonise ukubaluleka kweencwadi esiqhuba ngazo izifundo zeBhayibhile, umchazele indlela ezenziwa nezisasazwa ngayo emhlabeni wonke ngamavolontiya azinikele kuThixo. Mema isifundo sakho ukuba siye kwiintlanganiso. Sazise kubazalwana uze usicacisele ukuba ziqhutywa njani iintlanganiso zebandla. Kuya kuba kuhle nokusazisa kwamanye amaNgqina xa nikwiindibano. Xa amaKristu edibene, nceda umntu omtsha enyanisweni abone ukuba abantu bakaYehova bayathandana, nto leyo eyenza babonakale ukuba bangamaKristu okwenene. (Yoh. 13:35) Isifundo sakho siza kusondela ngakumbi kuYehova njengoko sisiya siyiqonda intlangano kaYehova.

UKUSEBENZISA IINCWADI ZOKUFUNDISA IBHAYIBHILE

²² AmaKristu okuqala aba ngabapapashi abakhutheleyo beLizwi LikaThixo. Ayekhuphela iZibhalo awayeza kuzisebenzisa nezaziza kufundwa ebandleni. Ayekhuthaza abanye ukuba bafunde inyaniso ekwiLizwi LikaThixo. Izibhalo ayezikhuphele ngesandla zazimbalwa kwaye ayezixabisile. (Kol. 4:16; 2 Tim. 2:15; 3:14-17; 4:13; 1 Pet. 1:1) AmaNgqina KaYehova asebenzisa iindlela zale mihla ukuze apapashe iimiliyoni zeeBhayibhile neencwadi zokufunda iBhayibhile, njengamaphecana, iincwadana ezinemifanekiso, iincwadi neemagazini ngeelwimi ezininzi.

²³ Njengoko uxelela abanye ngeendaba ezilungileyo, qiniseka ukuba uzisebenzisa kakuhle iincwadi zokufunda iBhayibhile ezilungiselelwe yintlangano kaYehova. Ukukhumbula indlela oye wancedakala ngayo ngokufunda iimpapasho zamaNgqina KaYehova, kuza kukwenza ufune ukuxelela abanye ngezinto oye wazifunda.—Heb. 13:15, 16.

²⁴ Abantu abaninzi bafunda izinto kwi-intanethi. Ngoko, ukongezelela kwiincwadi zeBhayibhile, enye into esinceda sisasaze iindaba ezilungileyo yiwebhsayithi yethu ethi jw.org. Abantu ehlabathini lonke banokusebenzisa ikhompyutha ukuze bafunde okanye bamamele iBhayibhile neencwadi ezicacisa iBhayibhile ezirekhodwe ngolwimi lwabo. Abangenamdla wokuncokola nathi okanye abahlala kwiindawo apho bengenakukwazi ukuncokola namaNgqina KaYehova, bayakwazi ukuzazi izinto esizikholelwayo besebenzisa le webhsayithi.

²⁵ Ngoko, sixelela abantu ngo-jw.org nanini na kuvela ithuba. Xa umninimzi esibuza ngezinto esizikholelwayo, sinokusebenzisa ifowuni okanye ikhompyutha ukuze simbonise impendulo ngoko nangoko. Xa sidibana nomntu othetha olunye ulwimi, kuquka nentetho yezandla, sinokumcela akhangele iBhayibhile okanye incwadi ecacisa iBhayibhile kwiwebhsayithi yethu ngolwimi lwakhe. Abavakalisi abaninzi baye baqalisa incoko yeBhayibhile besebenzisa iwebhsayithi yethu.

UKUSHUMAYELA OKUNGACWANGCISWANGA

²⁶ UYesu wathi kwabo babemmamele: “Nisisibane sabantu bonke abasemhlabeni. . . . Makubonakale ukukhanya kwenu phambi kwabantu, ukuze bayibone imisebenzi yenu emihle baze bamzukise uTata wenu osemazulwini.” (Mat. 5:14-16) Abo bafundi babephila ngendlela efunwa nguThixo ngokuxelisa uYesu owathi: “Ndikukukhanya kwehlabathi.” UYesu ngumzekelo wokulandelwa ngamaKristu kuba wakuvumela “ukukhanya okunika ubomi” ukuba kukhanye ukuze kuzuze bonke ababemmamela.—Yoh. 8:12.

²⁷ Nompostile uPawulos ungumzekelo esifanele siwulandele. (1 Kor. 4:16; 11:1) Xa wayeseAthene, washumayela yonke imihla kubantu ababekwindawo ekuthengiswa kuyo. (IZe. 17:17) AmaKristu aseFilipi awulandela umzekelo wakhe. Ngenxa yoko, wawabhalela esithi ayephila “phakathi kwesizukulwana esijijekileyo,” yaye ayekhanya “phakathi kwaso njengezibane ehlabathini.” (Fil. 2:15) Nathi namhlanje sinokuyenza ikhanye inyaniso yoBukumkani ngezenzo nangamazwi nanini na kukho ithuba lokuba sixelele abanye ngeendaba ezilungileyo. Kuyinyaniso kona ukuba umzekelo wethu wokunyaniseka unokwenza abanye babone ukuba sahlukile ehlabathini. Kodwa xa sibaxelela iindaba ezilungileyo, baza kutsho bayazi ukuba kutheni sahlukile.

²⁸ Abantu bakaYehova abaninzi bashumayela iindaba ezilungileyo kubantu abadibana nabo emsebenzini, esikolweni, ezibhasini nakwezinye izithuthi zikawonke-wonke, okanye xa besenza izinto zemihla ngemihla. Xa sinohambo, sinokufumana ithuba lokuthetha nabanye abantu esihamba nabo. Sonke simele sikhangele size sisebenzise naliphi na ithuba elivelayo ukuze sitshintshe incoko ibe yintshumayelo. Masizimisele ukuncokola nabantu nanini na kuvela ithuba.

²⁹ Siza kuthanda ukushumayela iindaba ezilungileyo ukuba sihlala sikhumbula ukuba xa sishumayela, sidumisa uMdali wethu kwaye sizukisa igama lakhe. Ngaphezu koko, sisenokukwazi ukunceda abantu abanomdla bamazi uYehova ukuze nabo bamkhonze baze bafumane ithemba lobomi elifumaneka ngokuba nokholo kuYesu Kristu. Xa sisenza le nto sikhonza uYehova ngendlela engcwele ibe siyamvuyisa.​—Heb. 12:28; ISityhi. 7:9, 10.

INTSIMI

³⁰ UYehova uthanda ukuba umyalezo woBukumkani ushunyayelwe emhlabeni wonke, ezidolophini nasezilalini. Ukuze yenziwe loo nto, ibandla kunye nabantu abashumayela kwiindawo ezikwanti banikwa intsimi yiofisi yesebe. (1 Kor. 14:40) Oku kuvisisana nelungiselelo elalisalathiswa nguThixo ngexesha labapostile. (2 Kor. 10:13; Gal. 2:9) Ekubeni uhambela phambili umsebenzi woBukumkani kule mihla yokugqibela, siyaphumelela xa enziwe kakuhle amalungiselelo okushumayela kwintsimi yebandla.

³¹ La malungiselelo enziwa ngumveleli wenkonzo. Isenokuba sisicaka solungiselelo esiyabayo intsimi. Kukho iintlobo ezimbini zentsimi, eyeqela neyomntu omnye. Kumabandla anentsimi encinci, abaveleli bamaqela baza kuba nentsimi eza kusetyenzwa ngabavakalisi abakwiqela elithile. Noko ke, xa ibandla linentsimi enkulu, umvakalisi unokunikwa intsimi yakhe.

³² Umvakalisi onentsimi yakhe unokushumayela naxa ingekho intlanganiso yenkonzo yasentsimini okanye xa engakwazi ukudibana neqela lentsimi. Ngokomzekelo, abanye abavakalisi baye bacele intsimi ekufutshane nendawo abaphangela kuyo baze bashumayele ngekhefu okanye emva komsebenzi. Ezinye iintsapho ziye zicele intsimi ekufutshane nendawo ezihlala kuyo zize zishumayele ngamarhatya athile. Ukuba nentsimi ekufutshane kunokumnceda umvakalisi akwazi ukushumayela kangangoko. Kodwa ke intsimi yomvakalisi inokusetyenzwa naliqela. Ukuba ufuna ukuba nentsimi yakho, unokuyicela kwisicaka sentsimi.

³³ Enoba le ntsimi icelelwe iqela ngumveleli weqela okanye yeyomvakalisi, loo mntu uyicelileyo uza kuqiniseka ukuba kwenziwa imizamo yokuba kushunyayelwe kuyo yonke imizi. Indlela ekucetywa ukusetyenzwa ngayo intsimi ifanele ilandele imiqathango ebekiweyo yelizwe ephathelele indlela yokusebenzisa inkcazelo yabanye abantu. Umveleli weqela okanye umvakalisi ofumana intsimi ufanele azame ukuyigqiba kwiinyanga ezine. Xa igqityiwe, kufanele kuxelelwe isicaka sentsimi. Kuxhomekeka kwiimeko, umveleli weqela okanye umvakalisi unokuphinda ayisebenze okanye ayibuyisele kwisicaka sentsimi.

³⁴ Xa bonke abantu ebandleni besebenzisana, intsimi inokucokiswa. Kwakhona sinokukuphepha ukuphindaphindwa kwentsimi ngabavakalisi ababini okanye ngaphezulu, nto leyo enokubacaphukisa abaninimzi. Ngaloo ndlela sakuba siyabacingela abazalwana bethu nabantu abakuloo ntsimi.

UKUSHUMAYELA KUBANTU BAZO ZONKE IILWIMI

³⁵ Bonke abantu bafanele bafunde ngoYehova uThixo, ngoNyana wakhe, nangoBukumkani bakhe. (ISityhi. 14:6, 7) Sinomdla wokunceda abantu bazo zonke iilwimi ukuba bathembele egameni likaYehova ukuze basindiswe kwaye banxibe ubuntu bamaKristu. (Roma 10:12, 13; Kol. 3:10, 11) Zeziphi iingxaki ezinokubakho xa kushunyayelwa kwintsimi eneelwimi eziliqela? Sinokuzilungisa njani ngendlela eza kunceda abantu abaninzi beve iindaba zoBukumkani ngolwimi abaluqonda kakuhle?​—Roma 10:14.

³⁶ Intsimi yebandla ngalinye yabiwa ngokweelwimi. Ngoko, kwiindawo ekuthethwa iilwimi ezininzi kuzo, abavakalisi abasuka kumabandla ahlukeneyo bashumayela kwintsimi enye. Kwiimeko ezinjalo kubhetele ukuba abavakalisi bazimisele ukushumayela kubantu abathetha ulwimi lwabo. Kuza kwenziwa ngolu hlobo naxa kuhanjiswa izimemo. Kodwa xa kushunyayelwa esidlangalaleni okanye ngokungacwangcwiswanga abavakalisi banokuhambisa iincwadi nangaluphi na ulwimi.

³⁷ Kwezinye iimeko, amabandla asebenzisa olunye ulwimi asenokungakwazi ukusoloko esiya kwiindawo ezikude zentsimi yawo. Kwezo meko, abaveleli benkonzo abakumabandla anjalo, bamele bathethe ngokuba baza kuyisebenza njani intsimi ngendlela eza kulungela wonke umntu. Le nto iza kunceda bonke abantu beve ngomyalezo woBukumkani kuze kungashunyayelwa kubantu abanye ngamabandla amaninzi.​—IMize. 15:22.

³⁸ Sifanele senze ntoni xa sifika endlini ethile kukho umntu othetha olunye ulwimi? Asifanele sicinge ukuba abavakalisi abathetha ulwimi lwakhe baza kuncokola naye. Abanye abavakalisi baye bafunda iintshumayelo ezilula ngolwimi abadla ngokudibana nalo entsimini. Sinokubonisa umntu esidibana naye indlela yokufunda okanye yokudawunlowuda iincwadi zolwimi lwakhe kwiwebhsayithi yethu ethi jw.org okanye simphathele iincwadi zolwimi lwakhe.

³⁹ Ukuba loo mntu unomdla nyhani, sinokumcelela umntu onokukwazi ukumnceda ngolwimi aluvayo. Sinokumxelela ukuba iintlanganiso eziqhutywa ngolwimi lwakhe zingenela phi. Ukuba ufuna ukutyelelwa okanye ukufowunelwa ngumntu othetha ulwimi lwakhe, sinokumbonisa indlela yokufaka inkcukacha zakhe ku-jw.org. Iofisi yesebe iza kuzama ukufumana umvakalisi, iqela okanye ibandla elikufutshane elinokumnceda.

⁴⁰ Sifanele singayeki ukuya kumntu onomdla de asixelele ukuba kukho umntu othetha ulwimi lwakhe oye wathetha naye. Kwezinye iimeko, iofisi yesebe iza kuchazela abadala ukuba ayimfumani umvakalisi othetha ulwimi lwaloo mntu. Xa kunjalo sifanele siqhubeke sibuyela kuloo mntu. Ukuba kunokwenzeka, sifanele sifunde naye iBhayibhile, mhlawumbi sisebenzisa incwadi yolwimi lwakhe. Ukuba siyisebenzisa kakuhle imifanekiso size sicele loo mntu afunde izibhalo, siza kumnceda abe nofifi lweBhayibhile. Kusenokubakho nomntu kwintsapho yakhe olwaziyo ulwimi lwakhe nolwethu onokunceda atolike.

⁴¹ Ukuze sincede umntu onomdla angene kwintlangano kaThixo sifanele simmeme aye kwiintlanganiso nangona esenokungayiqondi yonke into ethethwayo. Xa kufundwa izibhalo, sinokumnceda azityhile kwiBhayibhile yolwimi lwakhe ukuba ikhona. Ukuncokola nabantu ebandleni kukodwa nje kunokumnceda akhulise ukholo lwakhe.

⁴² Amaqela Angekamiselwa: Iqela elingekamiselwa libunjwa ngabavakalisi abashumayela kwintsimi ethetha olunye ulwimi kodwa bengenamdala okanye isicaka solungiselelo esifanelekayo esinokuqhuba iintlanganiso ngolo lwimi. Iofisi yesebe ingavuma ukuba ibandla libe neqela elingekamiselwa ukuba:

1. (1) Kukho abantu abaninzi abathetha olunye ulwimi kuloo ndawo.

2. (2) Bakhona abavakalisi abambalwa abalwaziyo olo lwimi okanye abafuna ukulifunda.

3. (3) Iqumrhu labadala liyavuma ukukhokela umsebenzi wokushumayela kubantu abathetha olo lwimi.

Ukuba iqumrhu labadala lifuna ukuba neqela elingekamiselwa, limele lithethe nomveleli wesiphaluka. Usenokuba wazi amanye amabandla azama ukushumayela kubantu abathetha olo lwimi, ngoko unokunceda ekuboniseni ukuba elo qela linokuba kweliphi ibandla. Xa elo bandla sele likhethiwe, abadala bathumela ileta kwiofisi yesebe becela ukuvunyelwa ukuba neqela elingekamiselwa eliphantsi kwebandla labo.

⁴³ Amaqela: Iofisi yesebe ingavuma ukuba ibandla libe neqela elimiselweyo ukuba:

1. (1) Baninzi abantu abanomdla abathetha olo lwimi yaye kubonakala ngathi kunokubakho ulwando.

2. (2) Kukho abavakalisi abambalwa abalwaziyo olo lwimi okanye abalufundayo.

3. (3) Kukho umdala okanye isicaka solungiselelo esinokukwazi ukukhokela nokuqhuba ngolo lwimi ubuncinane intlanganiso enye ngeveki okanye inxalenye yayo, njengentetho yesidlangalala okanye iSifundo SeMboniselo.

Ukuba ngomlinganiselo othile zonke ezi zinto ziyafikeleleka, abadala bathumela ileta kwiofisi yesebe bayichazele ngeli qela, baze bacele ukuvunyelwa ukuba neqela eliphantsi kwebandla labo. Umdala okhokela elo qela uza kuba ngumveleli weqela okanye isicaka seqela xa isisicaka solungiselelo.

⁴⁴ Xa iqela limiselwe, iqumrhu labadala lebandla elijonge elo qela liza kugqiba ukuba zeziphi ezinye iinxalenye zeentlanganiso iqela elinokuziqhuba ibe limele liziqhube kangaphi iintlanganiso ngenyanga. Kunokulungiselelwa nokuba elo qela liqhube intlanganiso yenkonzo yasentsimini. Bonke abakweli qela basebenza phantsi kwequmrhu labadala lebandla elijonge elo qela. Abadala baza kulikhokela ngendlela efanelekileyo eli qela yaye baza kutsiba kuqala xa kufuneka lincediwe kwizinto elizidingayo. Xa umveleli wesiphaluka esebenza neli qela ngeveki atyelele ngayo ibandla, uza kunika iofisi yesebe ingxelo emfutshane echaza ngenkqubela eyenziwa liqela, nangezinto elizidingayo. Ngexesha elifanelekileyo, eli qela linokumiselwa njengebandla. Ukuba bonke abantu bathobela ulwalathiso lwentlangano, uYehova uza kuvuya.​—1 Kor. 1:10; 3:5, 6.

UKUSHUMAYELA NJENGEQELA

⁴⁵ AmaKristu azinikeleyo amele axelele abanye ngeendaba ezilungileyo. Zininzi iindlela zokwenza le nto, kodwa abaninzi kuthi bathanda ukuya entsimini kunye nebandla. (Luka 10:1) Ngenxa yoku, amabandla aye ahlanganisane ukuze aye entsimini ngeempela-veki naphakathi evekini. Neeholide zisinika amathuba okushumayela njengeqela, kuba abazalwana abaninzi bengaphangelanga. IKomiti Yenkonzo Yebandla ilungiselela ukuba kuqhutywe iintlanganiso zenkonzo yasentsimini ngamaxesha nakwiindawo ezifanelekileyo, emini nangamarhatya.

⁴⁶ Ukushumayela njengeqela kubangela abavakalisi ‘bakhuthazane’ kuba besebenza kunye. (Roma 1:12) Abavakalisi abatsha banokusebenza nabanamava ukuze bafumane uqeqesho. Kwezinye iindawo, kucetyiswa ukuba abavakalisi basebenze bebabini okanye ngaphezulu ngenxa yokhuseleko. Enoba uceba ukusebenza wedwa, ukuhlanganisana neqela kunokukhuthaza wonke umntu okhoyo. Ukwazi ukuba kukho nabanye abasentsimini, besebenza kufutshane nalapho ukhoyo, kunokukwenza ube nesibindi. Oovulindlela nabanye abavakalisi abafanele bazive benyanzelekile ukuya kuzo zonke iintlanganiso zenkonzo yasentsimini ezilungiselelwe libandla, ingakumbi ukuba zibakho yonke imihla. Kodwa, basenokukwazi ukubakho kwezinye iintlanganiso zentsimi veki nganye.

⁴⁷ Ngamana sonke singalandela umzekelo kaYesu nabapostile bakhe. Sinokuqiniseka ukuba uYehova uza kusisikelela xa sizama kangangoko sinako ukwenza lo msebenzi ubalulekileyo wokushumayela iindaba ezilungileyo zoBukumkani.—Luka 9:57-62.