Iimbekiselo Zencwadi Yobomi BamaKristu Nomsebenzi Wokushumayela

MATSHI 1-7

UBUTYEBI OBUPHUMA ELIZWINI LIKATHIXO | NUMERI 7-8

“Izinto Esinokuzifunda Kwinkampu YamaSirayeli”

it-1-E 497 ¶3

Ibandla

Abantu bakwaSirayeli babemelwa ziinkokheli ezinokuthenjwa. (Ezr 10:14) Ngoko ‘yayizinkosi zezizwe’ ezazisenza iminikelo emva kokumiswa kwentente engcwele. (Num 7:1-11) Kanti, nangemihla kaNehemiya abantu ababebeka isitampu ‘sesivumelwano esibhaliweyo’ yayingababingeleli, abaLevi, ‘neenkokheli zabantu’. (Neh 9:38–10:27) Xa amaSirayeli ayehamba entlango kwakukho ‘iinkokheli zebandla, amadoda akhethiweyo ohlanga, namadoda ahloniphekileyo’ kodwa ayi-250 kuwo akhetha ukuba kwicala likaKora, uDatan, uAbhiram no-Oni elalingafuni ukukhokelwa nguMoses noAron. (Num 16:1-3) Kuba uMoses wayefuna ukwenza izinto ngendlela awayeyalelwe ngayo nguThixo, wakhetha amadoda ayi-70 angabadala kwaSirayeli ukuze amncedise ekuthwaleni ‘lo mthwalo ungabantu’, kuba wayengakwazi ukuwuthwala yedwa. (Num 11:16, 17, 24, 25) ILevitikus 4:15 ithetha ‘ngamadoda amakhulu ebandla,’ ibe kuyabonakala ukuba abantu babemelwa ngamadoda amakhulu, iintloko, iijaji, namagosa eso sizwe.​—Num 1:4, 16; Yos 23:2; 24:1.

it-2-E 796 ¶1

URubhen

Kwinkampu yakwaSirayeli, isizwe sakwaRubhen sasisezantsi kwentente engcwele ibe sasihlala phakathi kwesizwe sakwaSimeyon nesakwaGadi. Xa ezi zizwe zintathu zazihamba kwakukhokela isizwe sakwaRubhen baze xa bebonke balandele izizwe zakwaYuda, zakwaIsakare nezakwaZebhulon. (Num 2:10-16; 10:14-20) Le ndlela babelandelana ngayo xa behamba yayifana nendlela abalandelana ngayo xa babesenza iminikelo ngemini yokunikezelwa kwentente engcwele.​—Num 7:1, 2, 10-47.

w04 8/1 25 ¶1

Iimbalasane Zencwadi YeNumeri

8:25, 26. Ukuze ifezwe kakuhle inkonzo yabaLevi, nangenxa yokucingela abo bakhulileyo ngeminyaka, amadoda amakhulu ayeyalelwe ukuba ayiyeke loo nkonzo. Noko ke, anokubancedisa abanye abaLevi. Nangona ubani angayeki ukuba ngumvakalisi woBukumkani namhlanje, umgaqo walo mthetho usifundisa okubalulekileyo. Ukuba ngenxa yokukhula ngeminyaka umKristu othile akakwazi ukuzifeza iimbopheleleko zakhe, unokwenza umsebenzi akwaziyo ukuwenza ngokwamandla akhe.

Ubuncwane ObuseBhayibhileni

it-1-E 835

Unyana Wokuqala, Izibulo

Oonyana bokuqala kwaSirayeli yayingabo ababezintloko zamakhaya abo, ngoko babemela nohlanga lonke. UYehova wathi uhlanga lakwaSirayeli ‘lizibulo’ lakhe ngenxa yesivumelwano awasenza noAbraham. (Eks 4:22) Kuba uYehova wayesindise ubomi bamazibulo wathi ‘umntu wokuqala ukuzalwa oyindoda ebantwini ngowakhe. Nesilwanyana esizelwe kuqala’ singcwele kuye. (Eks 13:2) Yiloo nto oonyana abangamazibulo kwaSirayeli babenikelwa kuye.

MATSHI 8-14

UBUTYEBI OBUPHUMA ELIZWINI LIKATHIXO | NUMERI 9-10

“Indlela UYehova Abakhokela Ngayo Abantu Bakhe”

it-1-E 398 ¶3

Inkampu

Xa ilifu laliphezu kwentente engcwele, inkampu yayihlala endaweni enye. Kodwa xa ilifu lihamba, nabantu abasenkampini kwakufuneka bahambe. ‘Babemisa inkampu ngokuyalelwa nguYehova baze bahambe xa uYehova ethe mabahambe.’ (Num 9:15-23) Kwakucaca nyhani ukuba kukho ulungelelwano kuba loo nto siyibona kwindlela le nkampu inkulu kangaka eyayikwazi ngayo ukumane ihamba isisiwa kwiindawo ezahlukeneyo, (kwincwadi yeNumeri 33 uMoses uthetha ngeenkampu eziphantse zibeyi-40). Ukuze abantu enkampini bave into eyayithethwa nguYehova, kwakuvuthelwa amaxilongo amabini esilivere. (Num 10:2, 5, 6) Xa kuvuthelwe isandi esitshintsha-tshintshayo, abantu abasenkampini kwakufuneka bahambe. Le nto yaqala yenzeka “ngonyaka wesibini [1512 B.C.E.], ngenyanga yesibini, ngosuku lwe-20.” Xa babephuma babekhokelwa nguYuda, belandelwa nguIsakare noZebhulon yabe yona ityeya yesivumelwano iphambi kwabo bonke. Balandelwa ngamaGershon namaMerari ibe wona ayephethe izinto zentente engcwele ekwakufuneka baziphathe. Iqela lezizwe ezithathu elikhokelwa nguRubhen lona lalilandelwa nguSimeyon noGadi. Emva kwabo kweza amaKohati ephethe ingcwele aze alandelwa liqela lezizwe ezintathu elikhokelwa nguEfrayim, owayelandelwa zizizwe zakwaManase namaBhenjamin. Pha ekugqibeleni kwakusiza iqela elikhokelwa nguDan lihamba nesizwe sakwa-Ashere nesakwaNafetali. Ezona zizwe zinamandla nezinabantu abaninzi zazisima ngaphambili nangasemva.​—Num 10:11-28.

w11 4/15 4-5

Ngaba Uyabubona Ubungqina Bokhokelo LukaThixo?

Sinokubonisa njani ukuba siyaluxabisa ukhokelo lukaThixo? Umpostile uPawulos wathi: “Bathobeleni abo bakhokelayo phakathi kwenu nize nibalulamele.” (Heb. 13:17) Kusenokungasoloko kulula ukwenjenjalo. Ngokomzekelo: Khawuzifake ezihlangwini zomSirayeli ngomhla kaMoses. Masithi emva kokuba uhambe ixesha elide, umqulu uyema. Uza kuma ixesha elingakanani apho? Usuku? Iveki? Iinyanga eziliqela? Uyazibuza, ‘Ndiyikhuphe imithwalo yam engxoweni?’ Okokuqala, usenokukhupha nje izinto ezimbalwa eziyimfuneko. Kodwa, emva kweentsuku ezithile usenokucatshukiswa kukuguqulula izinto uzikhangela kule mithwalo uze uqalise ukukhupha yonke into. Kuthi kusenjalo, kanye xa ugqiba ukukhupha yonke into, ubona ilifu liphakama​—ngoku kufuneka uphinde uqale phantsi ukupakisha! Imele ukuba lowo yayingumsebenzi omkhulu. Sekunjalo, amaSirayeli ayefanele ‘anduluke emva koko.’​—Num. 9:17-22.

Ngoko ke, sisabela njani xa sifumana ulwalathiso oluvela kuThixo? Ngaba siye sizame ukulusebenzisa ‘emva koko’? Okanye ngaba siye senze izinto kanye ngendlela ebesiqhele ukwenza ngayo? Ngaba sisebenzisa ulwalathiso lwakutshanje kwimiba ephathelele ukuqhuba izifundo zeBhayibhile, ukushuMEYIela kubantu abathetha ulwimi lwasemzini, ukuqhuba unqulo lwentsapho rhoqo, ukusebenzisana neKomiti Yokunxibelelana Nezibhedlele yaye ngaba siziphatha ngendlela efanelekileyo kwiindibano? Sibonisa ukuba noxabiso ngokhokelo lukaThixo naxa sisamkela isiluleko. Xa kufuneka senze izigqibo ezibalulekileyo, asithembeli kubulumko bethu kodwa sifuna ukhokelo lukaYehova nentlangano yakhe. Kanye njengomntwana ofuna ukukhuselwa ngabazali bakhe xa kukho isaqhwithi, sifuna ukhokelo lwentlangano kaYehova xa iingxaki zeli hlabathi zisiza ziyimvula.

Ubuncwane ObuseBhayibhileni

it-1-E 199 ¶3

Indibano

Into eyayisenza kubaluleke ukudibana. Into esiyifundayo kwiPasika eyayibakho qho ngonyaka isenza sizixabise izinto uYehova asilungiselela zona ukuze sidibane size siqinise ukholo lwethu. Nayiphi na indoda eyayingayanga ePasikeni kodwa ibe icocekile kwaye ingayanga ndawo, yayimele ibulawe. (Num 9:9-14) Xa uKumkani uHezekiya wabizela amaYuda namaSirayeli eYerusalem ukuze batye iPasika kunye wathi: “Bantu bakwaSirayeli, buyelani kuYehova . . . sanukuba nenkani njengookhokho benu. Zithobeni kuYehova, nize kwingcwele yakhe awayingcwalisa ngonaphakade, nize nikhonze uYehova uThixo wenu, ukuze wehle umsindo wakhe kuni. . . . uYehova uThixo wenu uyabavela abantu kwaye unenceba. Ukuba nibuyela kuye, akasoze abususe ubuso bakhe kuni.” (2Kr 30:6-9) Ukungayi ePasikeni ngabom kwakubonisa ukuba loo mntu umshiyile uYehova. Nangona amaKristu engasawabhiyozeli amatheko afana nePasika, uPawulos wawakhuthaza ukuba ajonge amalungiselelo awo okudibana ngendlela efanayo. Wathi: “Masicingelane ukuze sikhuthazane ukuba sithandane size senze izinto ezilungileyo, singaziphosanisi nokudibana kunye, njengokuba abanye benesiko lokwenjenjalo, kodwa masikhuthazane, ingakumbi njengoko nibona ukuba imini iyasondela.”​—Heb 10:24, 25; jonga indawo ethi CONGREGATION.

MATSHI 15-21

UBUTYEBI OBUPHUMA ELIZWINI LIKATHIXO | NUMERI 11-12

“Kutheni Sifanele Sikuphephe Ukukhalaza?”

w01 6/15 17 ¶20

Musani Ukuba Ngabevayo Nize Nilibale

²⁰ Uninzi lwamaKristu aluweli ekuziphatheni okubi ngokwesini. Ukanti, simele sikulumkele ukuba singasukeli ikhondo elikhokelela ekubeni ngabambombozelayo nto leyo enokubangela ukuba uThixo angakholiswa sithi. UPawulos uyasiluleka esithi: “Masingamvavanyi uYehova, njengoko abathile [kumaSirayeli] bamvavanyayo, suke batshabalala ziinyoka. Masingabi ngabambombozeli, kanye njengoko abathile kubo bambombozelayo, suke batshabalala ngumtshabalalisi.” (1 Korinte 10:9, 10) AmaSirayeli ambombozela nxamnye noMoses noAron​—ewe, nxamnye noThixo ngokwakhe​—ekhalazela imana awayeyilungiselelwe ngokungummangaliso. (Numeri 16:41; 21:5) Ngaba ukumbombozela kwawo akuzange kumcaphukise uYehova ngendlela okwamcaphukisa ngayo ukuhenyuza kwawo? Ingxelo yeBhayibhile ibonisa ukuba abaninzi kwabo babembombozela babulawa ziinyoka. (Numeri 21:6) Ngaphambilana, kwatshatyalaliswa abavukeli ababembombozela abangaphezu kwe-14<u202F>700. (Numeri 16:49) Ngoko ke, masingawuvavanyi umonde kaYehova ngokungawahloneli amalungiselelo akhe.

w06 7/15 15 ¶7

‘Musani Ukumbombozela’

⁷ Hayi indlela esasitshintshe ngayo isimo sengqondo samaSirayeli! Ngangendlela ayenombulelo ngayo ngokukhululwa kwawo eYiputa nokuwezwa kwawo kuLwandle Olubomvu, acula ingoma yokudumisa uYehova. (Eksodus 15:1-21) Kodwa ngenxa yobunzima basentlango nokoyika kwabo abemi baseKanan, basuka ngoku abantu bakaThixo ababekade benombulelo bangenwa ngumoya wokukhalaza. Kunokuba bambulele uThixo ngokubakhulula kwakhe, bamgxeka besithi ubabandeza ubumnandi. Ngoko ukumbombozela kwabo kwakubonisa ukungakuxabisi kwabo oko uYehova wayebenzela kona. Kungako nje wathi: “Kuya kude kube nini na indimbombozelela le ndibano ingendawo?”​—Numeri 14:27; 21:5.

it-2-E 719 ¶4

Ukuxambulisana

Ukukhalaza. Ukukhalaza kuyatyhafisa ibe kuphelisa amandla. Kwakungekudalanga amaSirayeli ephumile eYiputa xa aqalisa ukukhalazela uYehova. Ayegxeka abantu abakhokelayo uMoses noAron nangona babekhethwe nguYehova. (Eks 16:2, 7) Ezi zikhalazo zamtyhafisa kakhulu uMoses kangangokuba wade wacela ukufa. (Num 11:13-15) Umntu okhalazayo usenokuba sengxakini yena kuqala. Nangona amaSirayeli ayekhalazela uMoses, kuYehova kwaba ngathi akhalazela yena nendlela alawula ngayo. (Num 14:26-30) Amaninzi afa ngenxa yokusoloko ehoye iimpazamo.

Ubuncwane ObuseBhayibhileni

it-2-E 309

Imana

Ingcaciso. Imana yayisisonka “esimhlophe njengembewu yekoriyanda” ibe “ifana” nentlaka yebhideliyu, yayingathi iyatyibilika xa uyibambile, ingenamibala ibe yayifana neperile. Incasa yayo “yayinjengeyesonka esinobusi” okanye “njengesonka esinencasa esigalelwe ioli.” Emva kokuyiguba baze bayingqushe babeyibilisa bayibhake ibe sisonka esinencasa.​—Eks 16:23, 31; Num 11:7, 8.

MATSHI 22-28

UBUTYEBI OBUPHUMA ELIZWINI LIKATHIXO | NUMERI 13-14

“Indlela Ukholo Olusenza Sibe Nesibindi Ngayo”

w06 10/1 16-17 ¶5-6

Ukuba Nesibindi Ngenxa Yokholo Nokoyika UThixo

⁵ Noko ke, iintlola ezimbini, uYoshuwa noKalebhi, zazikulangazelela ukungena kwiLizwe Lesithembiso. Zathi amaKanan ‘asisonka sethu limkile ikhusi lawo kuwo, yaye uYehova unathi. Musani ukuwoyika.’ (Numeri 14:9) Ngaba uYoshuwa noKalebhi babeqhutywa ziimvakalelo? Nakanye! Bona namanye amaSirayeli, bambona uYehova ehlaza iYiputa enamandla nezithixo zayo ngeZibetho Ezilishumi. Emva koko, bambona uYehova ebulala uFaro nomkhosi wakhe kuLwandle Olubomvu. (INdumiso 136:15) Kucacile ukuba uloyiko lweentlola ezilishumi nabo baye baphenjelelwa zizo lwalungenasihlahla. Ebuhlungu uYehova wathi: “Kuya kude kube nini na singandihloneli esi sizwana, yaye kuya kude kube nini na singakholwa kum ngemiqondiso yonke endiyenzileyo phakathi kwaso?”​—Numeri 14:11.

⁶ UYehova wachaza esona sizathu, ukoyika kwabantu kwakuntama ukungabi nalukholo. Ewe, ukholo nenkalipho zinxibelelene kangangokuba umpostile uYohane wabhala wathi ngokuphathelele ibandla lamaKristu nemfazwe yalo yokomoya: “Lulo ke olu uloyiso esiloyise ngalo ihlabathi, ukholo lwethu.” (1 Yohane 5:4) Namhlanje, ukholo olufana nolukaYoshuwa noKalebhi luye lwaphumela ekubeni iindaba ezilungileyo zoBukumkani zishunyayelwe ehlabathini jikelele ngamaNgqina kaYehova angaphezu kwezigidi ezithandathu, aselula namadala, omeleleyo nabuthathaka. Alukho utshaba oluye lwakwazi ukuwuvala umlomo lo mkhosi ukhaliphileyo.​—Roma 8:31.

Ubuncwane ObuseBhayibhileni

it-1-E 740

Ilizwe UYehova Awalinika AmaSirayeli

UYehova wanika amaSirayeli umhlaba omhle kakhulu. UMoses wathuma iintlola ukuba ziyokuhlola iLizwe Lesithembiso nokuba zibuye nezinye zeziqhamo zazo. Zabuya namafiya, iirharnati kunye nesihlahla seediliya esasisikhulu kangangokuba kwafuneka sithwalwe ngamadoda amabini ngepali. Nangona zoyika ngenxa yokungabi nalukholo zachaza ukuba ilizwe “nyhani ligcwele ubisi nobusi.”​—Num 13:23, 27.

MATSHI 29–APRILI 4

UBUTYEBI OBUPHUMA ELIZWINI LIKATHIXO | NUMERI 15-16

“Kulumkele Ukuba Nekratshi Nokuzithemba Kakhulu”

w11 9/15 27 ¶12

Ngaba Uyaziwa NguYehova?

¹² Kodwa ke, ngoxa uhlanga lwakwaSirayeli lwalusiya kwiLizwe Lesithembiso, uKora wabona izinto awayecinga ukuba ziingxaki kwilungiselelo likaThixo. Yaye namadoda angama-250 awayekhokela uhlanga aba ngakwicala likaKora ezama ukwenza utshintsho. Kusenokwenzeka ukuba uKora nabanye babeqinisekile ngolwalamano lwabo noYehova. Bathi kuMoses: “Kwanele ngani, ngokuba indibano iphela ingcwele yaye uYehova uphakathi kwayo.” (Num. 16:2, 3) Babezithembile yaye benekratshi ngokugqith’ emgceni! Wathi uMoses kubo: “UYehova uya kusazisa lowo ungowakhe.” (Funda iNumeri 16:5.) Kwathi kuphela usuku olulandelayo, wabe uKora namahlakani akhe emvukelo sele befile.​—Num. 16:31-35

w11 9/15 27 ¶11

Ngaba Uyaziwa NguYehova?

¹¹ UMoses noKora bahluke ngendlela ephawulekayo kumba wokuhlonela ilungiselelo nezigqibo zikaYehova. Izenzo zabo zayichaphazela indlela uYehova awayebajonga ngayo. UKora wayengumLevi ongumKohati yaye wanandipha amalungelo amaninzi ekusenokwenzeka ukuba phakathi kwawo yayikukubona ukuhlangulwa kohlanga kuLwandle Olubomvu, ukuxhasa imigwebo kaYehova nxamnye namaSirayeli angathobeliyo kwiNtaba yeSinayi, nokuba nenxaxheba ekuthwaleni ityeya yomnqophiso. (Eks. 32:26-29; Num. 3:30, 31) Wayenyanisekile kuYehova kangangeminyaka emininzi yaye wayethenjwa ngabantu abaninzi enkampini yamaSirayeli.

Ubuncwane ObuseBhayibhileni

w98 9/1 20 ¶1-2

Qiniseka Ukuba Ubeka Izinto Zokuqala Kwindawo Yokuqala!

UYehova walijonga njengelinzulu elo tyala. IBhayibhile isichazela oku: “Wathi uYehova kuMoses, Makabulawe afe loo mntu.” (Numeri 15:35) Kwakutheni ukuze uYehova abe ngqongqo kangako ngoko kwenziwa yiloo ndoda?

Abantu babeneentsuku ezintandathu zokutheza kuquka ukulungiselela iimfuno zabo eziphathelele ukutya, impahla nekhusi. Usuku lwesixhenxe lwalufanele lube lolweentswelo zabo zokomoya. Ngoxa kwakungaphosakalanga ukutheza, kwakuphosakele ukusebenzisa ixesha elalifanele ukubekelwa bucala ukuze kunqulwe uYehova. Nangona amaKristu engekho phantsi koMthetho kaMoses, ngaba esi siganeko asisifundisi isifundo ngokucwangcisela kakuhle izinto eziza kuqala namhlanje?​—Filipi 1:10.

APRILI 5-11

UBUTYEBI OBUPHUMA ELIZWINI LIKATHIXO | NUMERI 17-19

“Elakho Ilifa . . . Ndim”

w11 9/15 13 ¶9

Ngaba Wenza UYehova Abe Sisabelo Sakho?

⁹ Cinga nje ngabaLevi, abangazange balifumane ilifa elingumhlaba. Ekubeni eyona nto babeyixhalabele yayilunqulo olunyulu, babemele bathembele kuYehova ukuze abanike isixhaso, kuba wayethe kubo: “Ndim isabelo sakho.” (Num. 18:20) Nangona singakhonzi kwitempile yokoqobo njengababingeleli nabaLevi, sinokuxelisa umoya abawubonisayo sibe nentembelo yokuba uYehova uya kusinyamekela. Ukuthembela kwethu kumandla kaThixo okusinyamekela kuya kubaluleka ngakumbi njengoko singena nzulu kwimihla yokugqibela.​—ISityhi. 13:17.

w11 9/15 7 ¶4

UYehova Usisabelo Sam

⁴ Eso sabelo sasithetha ntoni kubaLevi? UYehova wathi uza kuba sisabelo sabo ngengqiqo yokuba, endaweni yokuba bafumane umhlaba njengelifa, babeza kunikwa ilungelo lenkonzo elingenakuthelekiswa nanto. Ukuba ‘bububingeleli bukaYehova’ kwakulilifa labo. (Yosh. 18:7) Umongo weNumeri 18:20 ubonisa ukuba oku akuzange kubashiye behlwempuzekile ngokwezinto eziphathekayo. (Funda iNumeri 18:19, 21, 24.) AbaLevi babeza kunikwa “zonke izishumi kwaSirayeli njengelifa ngenxa yenkonzo yabo.” Babeza kufumana i-10 ekhulwini lemveliso yamaSirayeli nelenzala yezilwanyana zasendle. Bona abaLevi kwakufuneka banikele ngesishumi soko bakufumeneyo, ‘okona kulungileyo’ ukuze baxhase ububingeleli. (Num. 18:25-29) Kanti ababingeleli babenikwa “yonke iminikelo engcwele” eyayisisiwa ngoonyana bakaSirayeli kuThixo kwindawo yakhe yonqulo. Ngenxa yoko amalungu obubingeleli ayenesizathu esifanelekileyo sokucinga ukuba uYehova uya kuwalungiselela.

Ubuncwane ObuseBhayibhileni

g 12/06 17 ¶7

Izelwe Ngabona Bazali Basulungekileyo

Maxa wambi abantwana babehlikihlwa ngayo xa bezalwa, mhlawumbi ngenxa yoncedo lwayo ekunyangeni okanye ekubulaleni iintsholongwane. (Hezekile 16:4) Kwakhona eBhayibhileni kuthethwa ngetyuwa ngokufuziselayo. Ngokomzekelo, uYesu wathi abafundi bakhe ‘babeyityuwa yomhlaba’ ebhekisela kwimpembelelo eluncedo abanayo kwabanye ngenxa yesigidimi esinik’ ubomi ababesithwele. (Mateyu 5:13) Kwakhona ityuwa yafanekisela into ezinzileyo nesisigxina. Ngenxa yoko, “umnqophiso wetyuwa” wawugqalwa njengesivumelwano esasingaguquki.​—Numeri 18:19.

APRILI 12-18

UBUTYEBI OBUPHUMA ELIZWINI LIKATHIXO | NUMERI 20-21

“Hlala Ululamile Naxa Uneengxaki”

w19.02 12 ¶19

Zama Ukululama Uze Uvuyise UYehova

¹⁹ Siza kukuphepha ukwenza iimpazamo. Makhe siphinde sithethe ngoMoses. Kangangeminyaka emininzi wahlala elulamile ibe wamvuyisa uYehova. Emva kweminyaka eyi-40 amaSirayeli esentlango, uMoses wayeka ukululama. Kwakusandokusweleka udadewabo, ekusenokwenzeka ukuba ngulo wayemsindise eYiputa, ibe wangcwatywa eKadeshe. Emva koko, amaSirayeli aphinda athi ayengakhathalelwanga. Ngoku ‘axabana noMoses’ ngenxa yokuba amanzi engekho. Nangona uYehova wanika uMoses amandla okwenza imimangaliso emininzi, ibe naye uMoses wabakhokela ngaphandle kokunyanzelwa, abantu bakhalaza. Zange bakhalazele nje ukungabikho kwamanzi kodwa bakhalazela noMoses, ngokungathi kungenxa yakhe le nto babenxaniwe.​—Num. 20:1-5, 9-11.

w19.02 13 ¶20-21

Siza kukuphepha ukwenza iimpazamo

²⁰ UMoses wacaphuka kakhulu waza wayeka ukululama. Nangona uYehova wathi makathethe nelitye, yena uMoses wathetha kakubi nabantu waza wathi uza kwenza ummangaliso. Emva koko, wabetha ilitye kabini kwaza kwaphuma amanzi amaninzi. Wenza impazamo enkulu kuba waba nekratshi nomsindo. (INdu. 106:32, 33) Ngenxa yokuba engazange alulame okwexeshana, uMoses zange avunyelwe ukuba angene kwiLizwe Lesithembiso.​—Num. 20:12.

²¹ Kulo mzekelo, sifunda izinto ezibalulekileyo. Okokuqala, simele sizame ukuhlala silulamile. Ukuba siyayeka ukululama, sisenokukhawuleza sibe nekratshi size sithethe okanye senze izinto esiza kuzisola ngazo. Okwesibini, xa sinestres kusenokuba nzima ukuhlala silulamile, ngoko yiloo nto simele sizame ukululama, enoba kwenzeka ntoni.

w09 9/1 19 ¶5

Umgwebi Ongagungqiyo Kwinto Elungileyo

Okokuqala, uThixo wayengamthumanga uMoses ukuba aye kuthetha nabantu, singasathethi ke ngokubagweba athi bangabavukeli. Okwesibini, uMoses noAron abazange bamzukise uThixo. UThixo wathi: ‘Anindingcwalisanga.’ (Ivesi 12) Xa wathi ‘siza kunikhuphela amanzi’ wathetha ngokungathi yayingengoThixo kodwa yayinguye noAron ababeza kukhupha loo manzi. Okwesithathu eso sigwebo sasivisisana nendlela uThixo awayebagwebe ngayo abanye abantu ngaphambili. UThixo wayesalele isizukulwana esingaphambili sabavukeli ukuba singene kwaKanan, ibe wabagweba ngendlela efanayo uMoses noAron. (Numeri 14:22, 23) Okwesine uMoses noAron babeziinkokeli zakwaSirayeli. UThixo ulindele okungakumbi kubantu abaneembopheleleko ezinkulu.​—Luka 12:48.

Ubuncwane ObuseBhayibhileni

w14 6/15 26 ¶12

Ngaba Ubujonga NjengoYehova Ubuthathaka Babanye?

¹² Kwimeko nganye yezi, uYehova wayenokumohlwaya ngoko nangoko uAron. Kodwa wayebona ukuba uAron akakho ngendawo ibe zazingabangelwa nguye ngokupheleleyo zonke ezo ngxaki. Kuyabonakala ukuba uAron wavumela iimeko okanye impembelelo yabanye yamphambukisa kwikhondo elilungileyo. Noko ke, xa waziboniswayo iimpazamo zakhe, wazivuma waza wasamkela isohlwayo sikaYehova. (Eks. 32:26; Num. 12:11; 20:23-27) UYehova wakhetha ukujonga ukholo nokuguquka kuka-Aron. Kwiinkulungwane kamva, uAron nenzala yakhe babesakhunjulwa njengabantu ababesoyika uYehova.​—INdu. 115:10-12; 135:19, 20

APRILI 19-25

UBUTYEBI OBUPHUMA ELIZWINI LIKATHIXO | NUMERI 22-24

“UYehova Utshintsha Isiqalekiso Sibe Yintsikelelo”

bt 53 ¶5

Ukuvakalisa “Iindaba Ezilungileyo EzingoYesu”

⁵ Njengokuba kwakunjalo ngenkulungwane yokuqala, nanamhlanje intshutshiso ayikhange ibavale umlomo abantu bakaThixo. Ukunyanzelwa ngokufuthi kwamaKristu ukuba afudukele kwezinye iindawo​—enoba kukuvalelwa kwawo entolongweni okanye ukugxothelwa kwelinye ilizwe​—kuye kwabangela ukuba isigidimi soBukumkani siye kufikelela kwezo ndawo athunyelwa kuzo. Ngokomzekelo, ebudeni beMfazwe Yehlabathi II, amaNgqina kaYehova aye akwazi ukunikela ubungqina kwiinkampu zoxinaniso zamaNazi. UmYuda othile owadibana namaNgqina kwezo nkampu uthi: “Inkalipho yamabanjwa awayengamaNgqina kaYehova yandenza ndeyiseka ukuba ukholo lwawo lusekelwe eZibhalweni​—ngoko ke nam ndaba liNgqina.”

it-2-E 291

Ukuphambana

Ukuphambana Ngokuchasa UYehova. Umprofeti uBhileham wenza ubudenge ngokufuna ukuprofeta ubuxoki ngamaSirayeli ukuze afumane imali kuKumkani uBhalaki wamaMowabhi. UYehova wenza elo cebo lakhe alaphumelela. Umpostile uPetros wathi ngoBhileham “idonki engakwazi kuthetha yathetha ngathi ngumntu, yamnqanda loo mprofeti kuloo mpambano yakhe.” Ukuze umpostile acacise impambano kaBhileham, wasebenzisa igama lesiGrike elithi pa·ra·phro·niʹa, elithetha ukwenza izinto eziphikisana nengqondo.​—2Pe 2:15, 16; Num 22:26-31.

Ubuncwane ObuseBhayibhileni

w04 8/1 27 ¶2

Iimbalasane Zencwadi YeNumeri

22:20-22​—Kwakutheni ukuze umsindo kaYehova uvuthe nxamnye noBhalam? UYehova wayexelele umprofeti uBhalam ukuba ufanele angawaqalekisi amaSirayeli. (Numeri 22:12) Noko ke, lo mprofeti waya kumadoda kaBhalaki kuba efuna ukuqalekisa uSirayeli. UBhalam wayefuna ukukholisa ukumkani wamaMowabhi aze afumane umvuzo kuye. (2 Petros 2:15, 16; Yude 11) Kwanaxa uBhalam wanyanzelwa ukuba asikelele uSirayeli kunokuba amqalekise, wafuna ukukholisa ukumkani ngokucebisa ukuba amabhinqa anqula uBhahali asetyenziselwe ukulukuhla amadoda akwaSirayeli. (Numeri 31:15, 16) Ngoko ke, uThixo wavutha ngumsindo kuba uBhalam wayenyolukile yaye enganyanisekanga.

APRILI 26–MEYI 2

UBUTYEBI OBUPHUMA ELIZWINI LIKATHIXO | NUMERI 25-26

“Ngaba Umntu Omnye Angawenza Umahluko?”

lv 97 ¶1-2

“Sabani Kulo Uhenyuzo”

KHAWUBE nombono womlobi esiya kwindawo adla ngokuloba kuyo. Kukho uhlobo oluthile lwentlanzi azimisele ukulubambisa. Ukhetha loo nto afuna ukuyigcayisela ngayo, ayibophelele kumtya wokuloba, aze ayiphose emanzini. Kwimizuzu engephi, umtya uyaqina, uluthi awubophelele kulo luyagoba, ibe uyayitsala intlanzi ayibambisileyo. Imincili ibhaliwe ebusweni bakhe, kwaye uzigobh’ amacala ngokukhetha isigcayiselo esifanelekileyo.

² Ngonyaka ka-1473 B.C.E., ndoda ithile egama linguBhileham yakha yadl’ amathambo engqondo icinga ngesigcayiselo eyayifuna ukusisebenzisa. Kodwa ke yona yayizimisele ukubambisa abantu bakaThixo ababemise iinkampu kumaThafa akwaMowabhi kumda weLizwe Lesithembiso. UBhileham wayesithi ungumprofeti kaYehova, kodwa eneneni wayeyindoda enyolukileyo neyayiqeshelwe ukuqalekisa amaSirayeli. Noko ke, ngenxa yokungenelela kukaYehova, uBhileham wawasikelela amaSirayeli. Ezimisele ukufumana umvuzo wakhe, uBhileham waqiqa ngelithi mhlawumbi wayenokukwazi ukwenza uThixo abaqalekise abantu bakhe xa benokwenza isono esinzulu. Enaloo njongo, uBhileham waphosa isigcayiselo sakhe​—ebahenda ngeentombi zakwaMowabhi.​—Numeri 22:1-7; 31:15, 16; ISityhilelo 2:14.

lv 98 ¶4

“Sabani Kulo Uhenyuzo”

⁴ Yintoni eyabangela le ntlekele? Abantu abaninzi babeye baba neentliziyo ezingendawo ngenxa yokucezela kwabo kude noYehova, uThixo owayebakhulule eYiputa, wabondla entlango, waza wabakhokelela kwilizwe lesithembiso. (Hebhere 3:12) Ecinga ngale ntlekele, umpostile uPawulos wathi: “Masingaqheliseli luhenyuzo, njengoko abathile kubo bahenyuzayo, suke bawa, amawaka angamashumi amabini anesithathu kubo ngamini-nye.”​—1 Korinte 10:8.

Ubuncwane ObuseBhayibhileni

it-1-E 359 ¶1-2

Umda

Ukwabiwa komhlaba kwizizwe zakwaSirayeli kwakuxhomekeka kwizinto ezimbini: ukuba iqashiso liya kubani nokuba isizwe sinabantu abaninzi kangakanani. Iqashiso lalichaza indawo elikulo ilizwe elaliza kuba lilifa lesizwe ngasinye, lalichaza ukuba laliza kuba seMntla na okanye eMzantsi okanye eNtshona okanye eMpuma, ibe lalibonisa nokuba liza kuba selunxwemeni na okanye kummandla weentaba. NguYehova owayegqiba ukuba iqashiso liya kubani ibe loo nto yayisenza kungabikho mona okanye ukuxambulisana. (IMi 16:33) Ngokwenza ngoluhlobo, uYehova wayekwazi ukulawula indlela izinto ezenzeka ngayo ukuze kuzaliseke isiprofeto sikasolusapho uYakobi awasenza sele eza kufa esikwiGenesis 49:1-33.

Emva kokuba iqashiso lichazile ukuba isizwe siza kuhlala phi, kwakujongwa ukuba abantu beso sizwe baninzi kangakanani ukuze kubonwe ukuba baza kudinga indawo enkulu kangakanani na. “Nimele niwahlule ngamaqashiso umhlaba ube lilifa leentsapho zenu. Nize nilandise ilifa leqela elinabantu abaninzi, nilinciphise ilifa leqela elinabantu abambalwa. Wonke umntu uza kunikwa ilifa lakhe apho liwele khona iqashiso lakhe. Niza kufumana ilifa lenu lomhlaba ngokwezizwe zootata benu.” (Num 33:54) Indawo yesizwe ebichazwe liqashiso yayingatshintshi kodwa ilifa lalinokutshintshwa. Yiloo nto yacuthwa indawo yesizwe sakwaYuda xa kwafunyaniswa ukuba sinkulu zaze ezinye iindawo zanikwa isizwe sakwaSimeyon.​—Yos 19:9.