Iimbekiselo Zencwadi Yobomi BamaKristu Nomsebenzi Wokushumayela
SEPTEMBA 6-12
UBUTYEBI OBUPHUMA ELIZWINI LIKATHIXO | DUTERONOMI 33-34
“Balekela Kwiingalo ZikaYehova ‘Zikanaphakade’”
it-2-E 51
Yeshurun
Eli ligama elalisetyenziselwa ukuhlonipha amaSirayeli. KwiSeptuagint yesiGrike, igama elithi “Yeshurun” lisetyenziswa ukubonakalisa imvakalelo yothando ibe lalithetha ukuthi “othandekayo.” Igama elithi “Yeshurun” kwakufuneka likhumbuze amaSirayeli ukuba bangabantu bakaYehova abakhethiweyo ibe kwakufuneka bahlale beziphethe kakuhle. (Dut 33:5, 26; Isa 44:2) Kwi Duteronomi 32:15, xa kusithiwa “Yeshurun” kubhekiselwa kumaSirayeli. Endaweni yokuba aphile ngokwegama lawo, aba nenkani, amlibala uMdali wawo aze amdela uMsindisi wawo.
rr 120, ibhokisi
UThixo Usinceda Siphakame
Sinokukhumbula nokuba kwiminyaka emininzi ngaphambi kukaHezekile, umprofeti uMoses wathi uYehova unamandla kwaye uyafuna ukuncda abantu bakhe. UMoses wabhala wathi: “UThixo uyindawo yokubalekela ekudala ikho, iingalo zakhe zikanaphakade ziyakuxhasa.” (Dut. 33:27) Sinokuqiniseka ukuba xa sinengxaki size sifune uncedo kuThixo, uya kusixhasa ngeengalo zakhe, asiphakamise aze asincede siqhubeke nobomi.—Hez. 37:10.
Lubaleke Ngonyamezelo Ugqatso
16 NjengoAbraham, uMoses akazange akubone ukuzaliseka kwesithembiso sikaThixo ngexesha awayephila ngalo. Ngexesha amaSirayeli ayelinde ukungena kwiLizwe Lesithembiso, waxelelwa oku uMoses: “Uya kulibonela mgama ilizwe elo, kodwa akuyi kungena kulo ilizwe endilinika oonyana bakaSirayeli.” Isizathu soku yayikukuba ngaphambilana yena noAron, ngenxa yokucatshukiswa yimvukelo yabantu, abazange ‘banyaniseke kuThixo phakathi koonyana bakaSirayeli emanzini aseMeribha.’ (Dut. 32:51, 52) Ngaba uMoses wathi khunubembe okanye waba krakra? Nakanye. Wabasikelela abantu waza waqukumbela ngala mazwi: “Unoyolo, Sirayeli! Ngubani na onjengawe, sizwana esisindiswe nguYehova, olikhakha loncedo lwakho, nekrele lobuhandiba bakho?”—Dut. 33:29.
Ubuncwane ObuseBhayibhileni
it-2-E 439 ¶3
UMoses
UMoses wasweleka eneminyaka eyi-120. Xa iBhayibhile ithetha ngamandla awayenawo, ithi: “Wayesabona kakuhle futhi esenamandla.” Wangcwatywa nguYehova kwindawo engaziwayo. (Dut 34:5-7) Kusenokwenzeka ukuba wayenza ngabom lento ukuze amaSirayeli angalingeki ekukhonzeni ingcwaba lakhe njengesithixo. Kubonakala ukuba noSathana wayefuna ukwenza into efanayo kumzimba kaMoses, kuba uYude ongumfundi nokwangu mntakwabo uYesu wabhala wathi: “Yena uMikayeli umphathi weengelosi, xa wayexambulisana noMtyholi, bephikisana ngesidumbu sikaMoses, wathobeka, akamgweba ngamazwi arhabaxa, kodwa wathi: ‘Kwanga uYehova angakukhalimela.’” (Yuda 9) Ngaphambi kokuba amaSirayeli akhokelwe nguYoshuwa ukuba aye kwaKanan, azilela uMoses iintsuku eziyi-30.—Dut 34:8.
SEPTEMBA 13-19
UBUTYEBI OBUPHUMA ELIZWINI LIKATHIXO | YOSHUWA 1-2
“Ungayenza Njani Indlela Yakho Iphumelele?”
Yiba Nesibindi—UYehova Unawe!
7 Ukuze sibe nesibindi sokwenza ukuthanda kukaThixo, simele silifunde iLizwi lakhe size sikwenze oko likutshoyo. Yiloo nto kanye uYehova awayixelela uYoshuwa ukuqala kwakhe ukulawula: “Yiba nesibindi womelele kakhulu ukuze unyameke wenze ngokuvumelana nawo wonke umthetho uMoses umkhonzi wam awakuyalela wona.” Waphinda wathi: “Le ncwadi yomthetho ayifanele isuke emlonyeni wakho, yaye umele uyifunde ngesandi esiphantsi imini nobusuku, ukuze wenze ngenyameko ngokuvumelana nako konke oko kubhalwe kuyo; kuba ke ngoko uya kuyenza iphumelele indlela yakho wandule ke wenze ngobulumko.” (Yosh. 1: 7, 8) UYoshuwa ‘waphumelela’ kuba walithobela elo cebiso. Nathi siya kuba nesibindi size siphumelele ekumkhonzeni uThixo ukuba siyamthobela.
Yiba Nesibindi—UYehova Unawe!
20 Akuyonto ilula ukuhlala sisenza ukuthanda kukaThixo kweli hlabathi lingendawo. Kodwa ke asisedwa. UThixo unathi. Siphinda sincedwe nguNyana wakhe, oyiNtloko yebandla. Olunye uncedo silufumana kubazalwana bethu, amaNgqina kaYehova angaphezu kwe-7 000 000 ehlabathini lonke. Ngamana sonke singaqhubeka sinokholo size sishumayele iindaba ezilungileyo njengoko kunkenteza umxholo wonyaka wowama-2013 othi: “Yiba nesibindi womelele. . . . uYehova uThixo wakho unawe.”—Yosh. 1:9.
Ubuncwane ObuseBhayibhileni
Iimbalasane Zencwadi KaYoshuwa
2:4, 5—Kutheni uRahabhi ekhohlisa amadoda kakumkani akhangela iintlola? URahabhi ukhusela iintlola nangona ebeka ubomi bakhe engozini kuba unokholo kuYehova. Ngoko ke, akanyanzelekanga ukuba awanike umkhondo ngokuphathelele iintlola amadoda afuna ukwenzakalisa abantu bakaThixo. (Mateyu 7:6; 21:23-27; Yohane 7: 3-10) Eneneni, uRahabhi ‘wavakaliswa elilungisa ngemisebenzi,’ kuquka nesenzo sokukhohlisa abathunywa bakakumkani.—Yakobi 2: 24-26.
SEPTEMBA 20-26
UBUTYEBI OBUPHUMA ELIZWINI LIKATHIXO | YOSHUWA 3-5
“UYehova Usikelela Izinto Esizenza Kuba Sinokholo”
it-2-E 105
IYordan
Ngokuqhelekileyo, indawo encinci yeYordan engaphantsi koLwandle lwaseGalili idla ngokubanzulu ngemitha enye ukuya kutsho kwezintathu, ize ibende kangangeemitha eziyi-27 ukuya kutsho kweziyi-30. Ngentwasahlobo, iYordan iyaphuphuma, ibe loo nto yenza ukuba ibe nzulu nabanzi kakhulu kunakuqala. (Yos 3:15) Xa yayiphuphuma ngoluhlobo, kwakunga khuselekanga ukuba amadoda, abafazi nabantwana bakwaSirayeli bawele, ingakumbi ngaseYeriko. Amanzi ayo akhawuleza kakhulu kangangokuba abantu abaqubha pha kuleminyaka bayatshona. Nangona kunjalo, uYehova wakwazi ukuwamisa ngxi amanzi ngokungummangaliso ukuze amaSirayeli awele kumhlaba owomileyo. (Yos 3:14-17) Kwiminyaka emininzi emva koko, uYehova waphinda wawenza lo mmangaliso xa uElisha wayeyedwa naxa wayekunye noEliya.—2Ku 2:7, 8, 13, 14.
Izikhumbuzo ZikaYehova Mazibe Kukugcoba Kwentliziyo Yakho
17 Izenzo zethu zokholo zisinceda njani sikwazi ukukholosa ngoYehova? Cinga ngengxelo eseZibhalweni yamaSirayeli xa ayengena kwiLizwe Lesithembiso. UYehova wayalela ababingeleli ukuba bathwale ityeya yomnqophiso baze bahambe nayo ukuya kuMlambo iYordan. Noko ke, njengokuba abantu babesondela emlanjeni, babona ukuba amanzi azizantyalantyala kuba yayilixesha leemvula. Ayeza kuthini ke ngoku amaSirayeli? Ngaba ayeza kumisa iintente apho ecaleni komlambo aze alinde iiveki de amanzi athothe? Akunjalo. Akholosa ngokupheleleyo ngoYehova aza alandela imiyalelo yakhe. Yaba yintoni imiphumo? IBhayibhile ithi: ‘Kwathi xa iinyawo zababingeleli zisithi nkxu enyeleni yamanzi, andula amanzi ema ngxi.’ Emva koko, ‘ababingeleli baqhubeka bemi bhuxe kumhlaba owomileyo phakathi eYordan njengoko wonke uSirayeli wayewela kumhlaba owomileyo.’ (Yosh. 3: 12-17) Unokuyicingela nje indlela awayemangaliswe ngayo amaSirayeli njengoko ebona ezo mpuphuma zamanzi zisima! Ukholo lwawo lomelela kuba akholosa ngolwalathiso lukaYehova.
Izikhumbuzo ZikaYehova Mazibe Kukugcoba Kwentliziyo Yakho
18 Ewe kona, uYehova akabenzeli mimangaliso abantu bakhe namhlanje, kodwa uyabasikelela xa bemkhonza. Amandla asebenzayo kaThixo ayabanceda njengoko beshumayela ngoBukumkani emhlabeni wonke. UYesu Kristu ovusiweyo, iNgqina likaYehova eliyintloko wathi xa eqinisekisa abafundi bakhe ukuba wayeza kubancedisa kulo msebenzi ubalulekileyo: “Hambani ke ngoko niye kubenza abafundi abantu beentlanga zonke . . . ndinani yonke imihla de kube sekuphelisweni kwenkqubo yezinto.” (Mat. 28:19, 20) Namhlanje, maninzi amaNgqina awayekade eneentloni yaye esoyika ukuthetha nabantu, kodwa aye ancedwa ngumoya oyingcwele kaThixo aza anesibindi.—Funda iNdumiso 119:46; eyesi-2 kwabaseKorinte 4:7.
Ubuncwane ObuseBhayibhileni
Iimbalasane Zencwadi KaYoshuwa
5:14, 15—Ngubani ‘inkosana yomkhosi kaYehova’? Inkosana eze komeleza uYoshuwa njengoko kuqalisa ukuthinjwa kweLizwe Lesithembiso isenokuba ‘nguLizwi’—uYesu Kristu ngaphambi kokuba abe ngumntu. (Yohane 1:1; Daniyeli 10:13) Komeleza ngokwenene ukuqiniseka ukuba uYesu Kristu ozukisiweyo ukunye nabantu bakaThixo namhlanje njengoko bekumlo wokomoya!
SEPTEMBA 27–OKTOBHA 3
UBUTYEBI OBUPHUMA ELIZWINI LIKATHIXO | YOSHUWA 6-7
“Ziyeke Izinto Ezingabalulekanga”
Susa Amehlo Akho Kwizinto Ezingento Yanto!
5 Kwiinkulungwane kamva, uAkan owayengumSirayeli wabona izinto ekwakubuywe nazo kwisixeko saseYeriko waza wazinqwenela. UThixo wayeyalele ukuba zonke izinto ezikweso sixeko zitshatyalaliswe, ngaphandle kwezinto ezithile ezazimele zifakwe kubuncwane bukaYehova. AmaSirayeli anikwa esi silumkiso: ‘Zigcineni kwizinto ezinikelwe kwintshabalalo, ngokoyikela ukuba nisenokuzinqwenela’ nize nithabathe ezithile zazo kweso sixeko. Ngenxa yokungathobeli kuka-Akan, abantu bakwaSirayeli boyiswa eAyi yaye uninzi lwabo lwafela apho. UAkan akazange azichaze ukuba ubile de wabhaqwa. UAkan wathi: ‘Ndithe ndakuzibona ndazinqwenela, ndaza ndazithabatha.’ Umnqweno wamehlo akhe wakhokelela ekubeni atshatyalaliswe “nayo yonke into eyayiyeyakhe.” (Yosh. 6: 18, 19; 7: 1-26) UAkan wanqwenela into awayengavumelekanga ukuba ayithabathe.
Kutheni Umele Ubuxele Ububi?
Esinye isizathu sokuxela isenzo sobubi sikukuba kugcina ibandla licocekile. UYehova unguThixo ococekileyo, uThixo ongcwele. Ufuna bonke abo bamnqulayo bacoceke ngokomoya nangokuziphatha. ILizwi lakhe eliphefumlelweyo liyasiluleka: “Njengabantwana abathobekileyo, yekani ukumilisa ngokweminqweno enaninayo ngaphambili ekungazini kwenu, kodwa, ngokuvumelana naLowo uNgcwele wanibizayo, kanjalo yibani ngcwele nani kuyo yonke ihambo yenu, ngenxa yokuba kubhaliwe kwathiwa: ‘Nimele nibe ngcwele, ngenxa yokuba mna ndingcwele.’” (1 Petros 1:14-16) Abathile abenza ukungcola okanye isenzo sobubi banokuzisa ugculelo nokungakholiseki kuYehova kulo lonke ibandla ngaphandle kokuba kuthatyathwa amanyathelo okubalungisa okanye okubasusa.—Thelekisa uYoshuwa, isahluko 7.
Susa Amehlo Akho Kwizinto Ezingento Yanto!
8 NamaKristu okwenyaniso anokulukuhlwa ngumnqweno wamehlo nowenyama. Ngoko ke, iLizwi likaThixo lisikhuthaza ukuba sizikhethe izinto esizijongayo nesizinqwenelayo. (1 Kor. 9:25, 27; funda eyoku-1 kaYohane 2:15-17.) UYobhi owayeyindoda egqibeleleyo, wayeyiqonda into yokuba into oyibonayo inqweneleka lula. Wathi: “Ndenze umnqophiso namehlo am. Ngoko ndinokuzibonakalisa njani ndinikela ingqalelo entombini enyulu?” (Yobhi 31:1) UYobhi akazange azimisele nje ukungalibambi ibhinqa ngendlela engafanelekanga kunoko wenza isigqibo sokungayicingi nokuyicinga into enjalo. Xa wayelumkisa ngokucinga ngezinto ezingcolileyo, uYesu wathi: “Wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.”—Mat. 5:28.
Ubuncwane ObuseBhayibhileni
Imibuzo Evela Kubafundi
Kumaxesha amandulo, isixeko sasiba phantsi kokungqingwa xa amajoni ejikeleze iindonga zaso, elungele ukusihlasela. Ukuba singqingwe ixesha elide, abantu esixekweni babesitya uninzi lokutya okugciniweyo. Xa amajoni ede asihlasela isixeko, ayethatha yonke into ayifunayo kuquka nokutya okushiyekileyo. Yiloo nto abembi bezinto zakudala beye bafumana intwana yokutya kumabhodlo ezixeko zasePalestina ezahlaselwa ngolu hlobo, ukanti kwamanye abafumananga kutya. Kodwa amabhodlo aseYeriko ohlukile. IBiblical Archaeology Review ithi: “Ezona zinto zafunyanwayo kuhlaselo, ngaphandle kwezinto zodongwe, yingqolowa.” Iphinda ithi: “Ukufumana ingqolowa eninzi kangako, kuyinto engaqhelekanga.”
IBhayibhile ithi amaSirayeli awazange akuthathe ukutya kwaseYeriko kuba uYehova wayewayalele ukuba angakuthathi. (Yoshuwa 6:17, 18) Iphinda isixelele ukuba amaSirayeli ayihlasela iYeriko ngentwasahlobo, emva nje kokuba kuvuniwe, xa kwakukho ingqolowa eninzi esixekweni. (Yoshuwa 3:15-17; 5:10) Ngoko, ukubakho kwengqolowa eninzi eYeriko emva kokuba ithinjiwe, kungqina ukuba yangqingwa ixesha elifutshane njengokuba iBhayibhile isitsho.
OKTOBHA 4-10
UBUTYEBI OBUPHUMA ELIZWINI LIKATHIXO| YOSHUWA 8-9
“Izinto Esinokuzifunda Kwinto Eyenzeka kumaGibheyon”
it-1-E 930-931
AmaGibheyon
Ukuqhubana noYoshuwa. Ngexesha likaYoshuwa, amaHivi ayehlala eGibheyon ibe ayelolunye lweentlanga ezisixhenxe zakwaKanan ezaziza kutshatyalaliswa. (Dut 7:1, 2; Yos 9:3-7) AmaGibheyon ayekwabizwa nangokuba ngamaAmori kuba eli gama laliye lisetyenziswe ngamanye amaxesha xa kubhekiselwa kuwo onke amaKanan. (2Sa 21:2; thelekisa neGen 10:15-18; 15:16.) Ngokungafaniyo namanye amaKanan, amaGibheyon aye aqonda ukuba enoba umkhosi wawo unamandla kangakanani okanye isixeko sawo sidume kangakanani, ayengasoze awoyise amaSirayeli kuba uYehova wayewalwela. Ngenxa yoko, emva kokutshatyalaliswa kweYeriko neAyi, amadoda akwaGibheyon awayemela izixeko ezithathu zamaHivi zakwaKefira, zakwaBheheroti nezakwaKiriyati-yarim (Yos 9:17), afuna ukwenza uxolo noYoshuwa eGilgali. Amadoda akwaGibheyon ayenxibe iimpahla neembadada ezigugileyo ibe ayephethe iibhotile zewayini zofele ezazisele zigqabhukile, iingxowa ezigugileyo, nesonka esomileyo nesiphuqekayo, aze athi asuka kwilizwe elikude ibe awazizo ezi ntlanga amaSirayeli ayemele azitshabalalise. Babeqonda ukuba uYehova uwancedile amaSirayeli ukuba atshabalalise iYiputa nookumkani bamaAmori uSihon noOgi. Baba nobulumko baze abathetha nto ngento eyenzeke eYeriko naseAyi kuba babeqonda ukuba babengenakukhawuleza bazive ezi ndaba kuba babethe bahlala “kwilizwe elikude kakhulu”. Amadoda akwaSirayeli abuhlola aze abamkela ubungqina. Emva koko, enza isivumelwano nawo ukuba awazokuwatshabalalisa.—Yos 9:3-15.
“Ungayami Ngokwakho Ukuqonda”
14 Ekubeni singafezekanga, sonke—nkqu nabadala abanamava—sifanele singaze silibale ukucela uYehova asikhokele xa sisenza izigqibo. Khawucinge ngendlela uYoshuwa namadoda amakhulu akwaSirayeli awasabela ngayo xa kwafika amaGibheyon alumkileyo awenza ngathi asuka kwilizwe elikude. Engakhange abuze uYehova, uYoshuwa namanye amadoda enza uxolo namaGibheyon, esenza umnqophiso nawo. Nangona uYehova wada wasixhasa eso sivumelwano, waqiniseka ukuba le ngxelo yokungalufuni ukhokelo lwakhe iyafakwa kwiZibhalo ukuze singenelwe kuyo.—Yosh. 9:3-6, 14, 15.
“Lihambahambe Ilizwe”
14 Abo bathunywa bathi: “Abakhonzi bakho bavela kwilizwe elikude kakhulu ngenxa yegama likaYehova uThixo wakho.” (Yoshuwa 9:3-9) Iimpahla nokutya kwabo kwaba ngathi kungqina ukuba basuka kude, kodwa eneneni iGibheyon yayikumgama onokuba ziikhilomitha ezingama-30 ukusuka eGiligali. Eyisekile, uYoshuwa neenkosana zakhe benza umnqophiso woxolo neGibheyon nezixeko ezaziyingqongile. Ngaba amaGibheyon ayesenza iqhinga nje lokuphepha ukubulawa? Akunjalo, kodwa oku kwabonisa umnqweno wokufuna ukwamkelwa nguThixo kaSirayeli. UYehova wawavumela amaGibheyon ukuba abe “ngabathezi beenkuni nabakhi bamanzi bendibano nesibingelelo sikaYehova,” betheza iinkuni ezazisetyenziswa kwisibingelelo. (Yoshuwa 9:11-27) AmaGibheyon aqhubeka ebonisa ukukulungela ukwenza imisebenzi ephantsi enkonzweni kaYehova. Kusenokwenzeka ukuba, abanye kuwo babephakathi kwamaNethinim abuyayo esuka eBhabhiloni nawasebenza xa kwakuphinda kusakhiwa itempile. (Ezra 2:1, 2, 43-54; 8:20) Sinokusixelisa isimo sawo sengqondo ngokuzabalazela ukuba seluxolweni noThixo nokukulungela ukwenza imisebenzi ephantsi enkonzweni yakhe.
Ubuncwane ObuseBhayibhileni
it-1-E 1030
Ukuxhonywa
Kumthetho uYehova awawunika amaSirayeli, ezinye izaphuli mthetho kwakufuneka zixhonywe esibondeni emva kokuba zibulewe kuba ‘zaziqalekisiwe nguThixo,’ ibe zazibekwa phambi kwabantu ngenjongo yokubalumkisa. Umntu oswelekileyo waze waxhonywa wayemele othulwe ngaphambi kokuba kutshone ilanga aze angcwatywe kuba ukumshiya ejinga esibondeni ubusuku bonke kwakuza kulingcolisa ilizwe uYehova awalinika amaSirayeli. (Dut 21:22, 23) AmaSirayeli ayewuthobela lo mthetho nokuba lo mntu uxhonyiweyo akangomSirayeli.—Yos 8:29; 10:26, 27.
OKTOBHA 11-17
UBUTYEBI OBUPHUMA ELIZWINI LIKATHIXO | YOSHUWA 10-11
“UYehova Uyawalwela AmaSirayeli”
it-1-E 50
UAdoni-tsedeki
Ukumkani waseYerusalem ngexesha amaSirayeli ayesoyisa kwiLizwe Lesithembiso. UAdoni-tsedeki wadibana nabanye ookumkani kwiNtshona yeYordan ukuze bazame ukuyekisa lento uYoshuwa wayeyenza yokutshabalalisa. (Yos 9:1-3) AmaHivi awayehlala eGibheyon enza uxolo noYoshuwa. UAdoni-tsedeki wadibanisa umkhosi wakhe kunye nabanye ookumkani abane bama-Amori ukuze azame ukuziphindezela kutshaba. Emva koko, warhangqa iGibheyon waza walwa nayo. Indlela uYoshuwa awawahlangula ngayo amaGibheyon ngokungummangaliso waze woyisa ngayo nookumkani abahlanu ababesilwa kunye, yabangela ukuba aba kumkani babalekele eMakeda, apho bafika bavaleleka emqolombeni. UYoshuwa wambulala uAdoni-tsedeki nabanye ookumkani abane phambi kwamajoni akhe waza wabaxhoma esibondeni. Ekugqibeleni izidumbu zabo zaphoswa emqolombeni owaba lingcwaba labo.—Yos 10:1-27.
it-1-E 1020
Isichotho
UYehova wasisebenzisa. Ngamanye amaxesha uYehova wayesebenzisa isichotho ukuze enze ukuthanda kwakhe aze abonise amandla akhe amakhulu. (Nd 148:1, 8; Isa 30:30) Isichotho esitshabalalisayo sokuqala ekubhaliweyo ngaso sisibetho sesixhenxe saseYiputa, satshabalalisa izityalo, sophula imithi, saze sabulala abantu nezilwanyana zasendle, kodwa zange siwachaphazele amaSirayeli awayehlala eGoshen. (Eks 9:18-26; Nd 78:47, 48; 105:32, 33) Saphinda sabakhona xa amaSirayeli ayekhokelwa nguYoshuwa kwiLizwe Lesithembiso. Apho, ahlangula amaGibheyon kookumkani abahlanu bama-Amori ababewoyikisa waza uYehova wasebenzisa isichotho esinamandla ukutshabalalisa ama-Amori. Baninzi ababulawa sisichotho kunabo babulawa ngamaSirayeli emfazweni.—Yos 10:3-7, 11.
Iimbalasane Zencwadi KaYoshuwa
10:13—Inokwenzeka njani into emangalisa ngolo hlobo? “Ikho na into emnqabeleyo uYehova,” uMdali wamazulu nomhlaba? (Genesis 18:14) Ukuba ufuna njalo, uYehova unokwenza umhlaba ujikeleze ngendlela afuna ngayo ukuze ilanga nenyanga zibonakale zingashukumi xa umntu ezijongile. Okanye unokwenza ukuba umhlaba nenyanga zishukume ngaphandle kokuphazamiseka ngoxa ebangela ukuba imitha yelanga nenyanga iqhubeke ikhanya. Enoba wenza ntoni, “ayikho imini eyaba njengaleyo” kwimbali yabantu.—Yoshuwa 10:14.
Ubuncwane ObuseBhayibhileni
Imibuzo Evela Kubafundi
Ukukhankanywa kweencwadi ezithile eBhayibhileni nokucatshulwa kwazo akumele kusenze sigqibe kwelokuba ziphefumlelwe. Noko ke, uYehova ulondoloze yonke imibhalo ‘enelizwi loThixo wethu,’ ibe iya “kuhlala ukusa kwixesha elingenammiselo.” (Isa. 40:8) Eneneni, oko uYehova akhethe ukukuquka kwiincwadi zeBhayibhile esinazo ezingama-66 kwanele ukusinceda ‘siwuxhobele ngokupheleleyo wonke umsebenzi olungileyo.’—2 Tim. 3:16, 17.
OKTOBHA 18-24
UBUTYEBI OBUPHUMA ELIZWINI LIKATHIXO | YOSHUWA 12-14
“Khonza UYehova Ngentliziyo Yakho Yonke”
Iimbalasane Zencwadi KaYoshuwa
14:10-13. Nangona eneminyaka engama-85 ubudala, uKalebhi ucela umsebenzi onzima wokugxotha abantu kummandla waseHebron. Lo mmandla uhlala ama-Anakim—abantu abanesithomo esingaqhelekanga. Ngoncedo lukaYehova, lo mphumi-mkhosi oyinkunkqele uyaphumelela, yaye iHebron iba sisixeko sokusabela. (Yoshuwa 15:13-19; 21:11-13) Umzekelo kaKalebhi usikhuthaza ukuba singaziphephi izabelo zobuthixo ezinzima.
Ukuba Nesibindi Ngenxa Yokholo Nokoyika UThixo
Ukholo olunjalo alumanga ndawonye. Njengokuba siphila ngokuvisisana nenyaniso luya lukhula, ‘singcamla’ imiphumo, ‘sibone’ iindlela ephendulwa ngazo imithandazo yethu, sitsho silubone ulwalathiso lukaYehova kubomi bethu. (INdumiso 34:8; 1 Yohane 5: 14, 15) Sinokuqiniseka ukuba ukholo lukaYoshuwa noKalebhi lwaya lusomelela njengoko babebona ukulunga kukaThixo. (Yoshuwa 23:14) Khawuqwalasele ezi zibakala: UThixo wabathembisa ukuba babeza kusinda xa amaSirayeli ayebhadula entlango iminyaka engama-40, ibe kwaba njalo. (Numeri 14:27-30; 32:11, 12) Baba nenxaxheba kwiminyaka emithandathu yokuthinjwa komhlaba wamaKanan. Ekugqibeleni banandipha ubomi obude besempilweni de bafumana nelifa lomhlaba wabo. UYehova uyabavuza abo bamkhonza ngokuthembeka nenkalipho!—Yoshuwa 14:6, 9-14; 19:49, 50; 24:29.
Ubuncwane ObuseBhayibhileni
it-1-E 902-903
IGebhali
UYehova wathi “umhlaba wamaGebhali” yenye yeendawo ekwakusafuneka amaSirayeli ezithathile ngemihla kaYoshuwa. (Yos 13:1-5) Abantu abagxeka iBhayibhile bathi le nto ayivisisani kuba iGebhali yayikude emntla kwakwaSirayeli (yayi ziikhilomitha eziyi-100 emntla wakwaDan) ibe bathi zange uthathwe ngamaSirayeli lo mhlaba. Abanye abaphandi bathi mhlawumbi izibhalo zesiHebhere zacimeka kule vesi ibe bathi kusenokwenzeka ukuba le vesi yayisithi kudala “umhlaba odibene ne Lebhanon,” okanye ‘ude uyokufikelela kumda wamaGebhali.’ Nokuba abantu bathini, kufuneka sikhumbule ukuba isithembiso sikaYehova esikuYoshuwa 13:2-7 sasixhomekeke ekubeni amaSirayeli ayeza kumthobela na. Ngenxa yaloo nto kusenokwenzeka ukuba amaSirayeli zange awufumane umhlaba wamaGebhali kuba engazange athobele.—Thelekisa no Yos 23:12, 13.
OKTOBHA 25-31
UBUTYEBI OBUPHUMA ELIZWINI LIKATHIXO | YOSHUWA 15-17
“Khusela Ilifa Lakho Elixabisekileyo”
it-1-E 1083 ¶3
IHebron
Njengoko amaSirayeli ayeqhubeka etshabalalisa iindawo ezisemazantsi eKanan, ukumkani waseHebron (ekubonakala ukuba waba ngukumkani emva ko-Hoham) nabantu bakhona batshatyalaliswa. (Yos 10:36, 37) Nangona amaSirayeli awayekhokelwa nguYoshuwa aphelisa ulawulo awayenalo amaKanan, kubonakala ukuba zange akhawuleze abe namajoni awayeza kugada iindawo awayezoyisile. Xa amaSirayeli ayesilwa kwenye indawo, amaAnakim aphinda anendawo yokuhlala eHebron, le nto yenza uKalebhi (okanye oonyana bakaYuda ababekhokelwa nguKalebhi) basoxuthe esa sixeko emva kwexesha. (Yos 11:21-23; 14:12-15; 15:13, 14; ABa 1:10) Ekuqaleni iHebron yanikwa uKalebhi wesizwe sakwaYuda, emva koko yenziwa indawo ebalulekileyo, yaba sisixeko sokubalekela. Yaba siso nesixeko sababingeleli. Kodwa, “intsimi yeso sixeko [iHebron]” neelali zayo yayililifa likaKalebhi.—Yos 14:13, 14; 20:7; 21:9-13.
it-1-E 848
Ukusetyenziswa Ngenkani
Ngamaxesha okubhalwa kweBhayibhile, kwakuyinto eqhelekileyo ukuba abantu ‘basetyenziswe ngenkani’ (Heb., mas) baze aboyisiweyo benziwe amakhoboka. (Dut 20:11; Yos 16:10; 17:13; Est 10:1; Isa 31:8; IZi 1:1) AmaSirayeli ayenabaphathi abangamaYiputa ababewacinezela, ibe babesetyenziswa ngenkani ukuze bakhe iindawo zokugcina eziyi-Pitom neRahameses. (Eks 1:11-14) Endaweni yokuba amaSirayeli enze into uYehova awayethe mabayenze xa befika kwiLizwe Lesithembiso, zange bafike bawagxothe amaKanan elizweni lawo baze bawatshabalalise. Kunoko, bafika bawenza amakhoboka. Le nto yaba nemiphumo emibi kuba amaSirayeli aye akhonza oothixo bobuxoki. (Yos 16:10; ABa 1:28; 2:3, 11, 12) UKumkani uSolomon waqhubeka ewabhatalisa lamaKanan angamaAmori, amaHiti, amaPerizi, amaHivi namaYebhusi ngokubasebenzisa ngenkani.—1Ku 9:20, 21.
it-1-E 402 ¶3
AmaKanan
Nangona amaKanan amaninzi engazange oyiswe ngokupheleleyo sisenokutsho sithi “uYehova wawanika amaSirayeli wonke umhlaba awayefunge ukuwunika ookhokho bawo,” waze “wawaphumza ngokupheleleyo,” ibe “asikho isithembiso esingazange sizaliseke kuzo zonke izithembiso ezihle uYehova awayezithembise indlu kaSirayeli; zonke zenzeka.” (Yos 21:43-45) Kwiindawo ezazijikeleze amaSirayeli, iintshaba zawo zazisoyika ibe amaSirayeli aziva ekhuselekile. Ngaphambili uThixo wathi uzakuwagxotha amaKanan “kancinci kancinci” ukwenzela izilwanyana zasendle zingabininzi kwindawo engenabantu. (Eks 23:29, 30; Dut 7:22) Nangona amaKanan ayenezixhobo ezikhulu zemfazwe eziquka iinqwelo zemfazwe ezinamarhengqa amakhulu entsimbi, akunakutyholwa uYehova ngenxa yokuba amaSirayeli engazange akwazi ukoxutha iindawo ezithile zamaKanan kuze kuthiwe isithembiso sakhe zange asifezekise. (Yos 17:16-18; ABa 4:13) Kodwa iBhayibhile ibonisa ukuba amaSirayeli ayesoyiswa ngamaxesha athile ngenxa yokungathembeki.—Num 14:44, 45; Yos 7:1-12.
Ubuncwane ObuseBhayibhileni
Ngaba Ubusazi?
Ngaba kwaSirayeli kwakukho imithi emininzi njengoko iBhayibhile isitsho?
IBhayibhile ithi ezinye iindawo kwiLizwe Lesithembiso zazinamahlathi ibe nemithi ‘yayimininzi.’ (1Ku 10:27; Yos 17:15, 18) Kodwa xa abantu abaninzi bezijonga ezi ndawo namhlanje, nendlela ephele ngayo imithi kuzo, baye bayithandabuze into yokuba yakhe yanemithi emininzi.
Incwadi ethi Life in Biblical Israel ithi “amahlathi akudala kwaSirayeli ayemakhulu kakhulu kunokuba enjalo kule mihla siphila kuyo.” Indawo ephezulu ezintabeni yona ngokuqhelekileyo yayiba nohlobo lomthi wompayina (Pinus halepensis), umthi wom-oki (Quercus calliprinos), nomthi womstorakisi (Pistacia palaestina). Yona indawo ekuthiwa yiShefela, eyayiquka amazantsi entaba nasesiphakathini kwentaba noLwandle lweMeditera, yayinemithi yomsikamore emininzi (Ficus sycomorus).
Incwadi ethi Plants of the Bible ithi ezinye iindawo kwaSirayeli azisenayo tu imithi. Yenziwe yintoni le nto? Le ncwadi xa iyicacisa ithi le nto yaqala kancinci kuba: “Abantu bayaqhubeka beyigawula imithi ukuze babe nomhlaba omninzi wokulima, bafumane amaplanga okwakha baze babe neenkuni zokubasa.”