Iimbekiselo Zencwadi Yobomi BamaKristu Nomsebenzi Wokushumayela
JANUWARI 3-9
UBUTYEBI OBUPHUMA ELIZWINI LIKATHIXO | ABAGWEBI 15-16
“Ukujikela Umntu Yinto Eyonyanyekayo!”
Ukungcatsha—Umqondiso Owoyikekayo Wamaxesha!
4 Okokuqala, khawucinge ngoDelila onamayelenqe, owayethandana noMgwebi uSamson. USamson wayezimisele ukulwela abantu bakaThixo kumaFilisti. Mhlawumbi ziqonda ukuba uDelila akamthandi ngokunyanisekileyo uSamson, iinkosi ezintlanu zamaFilisti zathembisa ngokumnyoba ngemali enkulu, ukuba wayenokufumanisa imfihlelo yamandla akhe amakhulu ukuze zimcim’ igama. Umbulalikazi onguDelila wasamkela esi sinyobo, kodwa imigudu yakhe yokutyhila imfihlelo kaSamson yasilela kangangezihlandlo ezithathu. Waqhubeka emxina “ngamazwi akhe ngalo lonke ixesha kwaye eqhubeka embongoza.” Ekugqibeleni, “umphefumlo wakhe waphelelwa ngumonde ukusa kwinqanaba lokufa.” Ngenxa yoko, wamxelela ukuba iinwele zakhe azizange zichetywe yaye ukuba zazinokuchetywa, wayenokuphelelwa ngamandla. Esazi oko, uDelila wazicheba iinwele zikaSamson ngoxa wayelele ethangeni lakhe, waza wamnikela kwiintshaba zakhe ukuze zimenze nantoni na eziyithandayo. (ABagwe. 16:4, 5, 15-21) Yenyanyeka ngokwenene into awayenzayo! Ngenxa yokunyoluka kwakhe, uDelila wangcatsha umntu owayemthanda.
Iimbalasane Zencwadi YaBagwebi
14:16, 17; 16:16. Ukucinezela omnye umntu ngokulila nangokukhalaza kunokonakalisa ulwalamano onalo naloo mntu.—IMizekeliso 19:13; 21:19.
Ukungcatsha—Umqondiso Owoyikekayo Wamaxesha!
15 Abo batshatileyo banokuhlala njani benyanisekile kumaqabane abo? ILizwi likaThixo lithi: ‘Yiba nemihlali ngumfazi [okanye umyeni] wobutsha bakho’ uze ‘udle ubomi nomfazi [okanye umyeni] omthandileyo.’ (IMize. 5:18; INtshu. 9:9) Njengoko omabini amaqabane ekhula, amele ‘azinikele ngokupheleleyo’ kulwalamano lwawo, ngokoqobo nangokweemvakalelo. Loo nto ithetha ukuba amaqabane makakhathalelane, achithe ixesha kunye aze asondelelane. Amele anikele ingqalelo ekulondolozeni umtshato wawo nolwalamano lwawo noYehova. Ukuze zikwenze oko, izibini ezitshatileyo zimele zifundisise iBhayibhile kunye, zisebenze kunye rhoqo entsimini zize zithandaze kunye zicele intsikelelo kaYehova.
HLALA UNYANISEKILE KUYEHOVA
16 Kukho amalungu ebandla aye enza izono ezinzulu aza ohlwaywa ‘ngokuqatha, ukuze aphile elukholweni.’ (Tito 1:13) Ngenxa yehambo yabo, kuye kwafuneka abanye basuswe kubudlelane. Ingqeqesho iye yabanceda ukuba bachache ngokomoya, ‘abo baqeqeshiweyo yiyo.’ (Heb. 12:11) Kuthekani ukuba sinesalamane okanye umhlobo wethu osenyongweni osuswe kubudlelane? Ngoko kufuneka sinyaniseke kuThixo, kungekhona kuloo mntu. UYehova usijongile enoba siza kuwuthobela kusini na umyalelo wakhe, wokunganxulumani naye nabani na osuswe kubudlelane.—Funda eyoku-1 kwabaseKorinte 5:11-13.
Ubuncwane ObuseBhayibhileni
USamson Uyoyisa Ngenxa Yamandla KaYehova!
USamson wayezimisele ukuphumeza usukelo lwakhe, ukulwa namaFilisti. Isizathu sokuya kwakhe kwindlu kanongogo eGaza yayikukuze alwe neentshaba zikaThixo. USamson wayefuna indawo yokufihla intloko ngobo busuku kwisixeko sotshaba, ibe loo ndawo yayifumaneka kwikhaya lonongogo. USamson wayengacingi ngokuziphatha kakubi. Wayishiya indlu yelo bhinqa ezinzulwini zobusuku, wabamba iingcango zesango lesixeko nezibonda ezisecaleni ezibini, wazithwala wazisa phezu kwentaba ekufuphi neHebron, eyayimalunga neekhilomitha ezingama-60 ukusuka apho. Esi senzo samkholisa uThixo waza wamnika amandla.—ABagwebi 16:1-3.
JANUWARI 10-16
UBUTYEBI OBUPHUMA ELIZWINI LIKATHIXO | ABAGWEBI 17-19
“Ukungawuthobeli Umthetho KaThixo Kubangela Iingxaki”
it-2-E 390-391
UMika
1. Indoda yakwaEfrayim. UMika zange awuthobele umthetho wesibhozo okwiMithetho Elishumi (Eks 20:15), kuba waba amaqhosha esilivere ayi-1100 kumamakhe. Xa uMika wazixela waze wawabuyisela amaqhosha esilivere, umamakhe wathi: “Ngokuqinisekileyo ndiza kuyenza ngcwele kuYehova le silivere iphuma esandleni sam, ukuze unyana wam enze ngayo umfanekiso oqingqiweyo nomfanekiso wesinyithi. Ndiyibuyisela kuwe ke.” Emva koko wasa amaqhosha esilivere ayi-200 kumkhandi wesilivere waze wenza “umfanekiso oqingqiweyo nomfanekiso wesinyithi” owaye wafakwa endlini kaMika. UMika ‘owayenendlu yoothixo’ wenza iefodi nesithixo sekhaya waza wenza nomnye woonyana bakhe ukuba abe ngumbingeleli wakhe. Nangona wayecinga ukuba le nto wayeyenza iza kuzukisa uYehova, yayingafanelekanga tu kwaphela kuba umthetho wawusithi makungakhonzwa izithixo. (Eks 20:4-6) Ngaphezu koko, yayingeyondlela uYehova awayefuna bakhethwe ngayo ababingeleli. (ABa 17:1-6; Dut 12:1-14) Emva koko uMika wathatha uYonatan, umLevi osemtsha owayengumzukulwana kaMoses, wambeka ekhayeni lakhe waze wamenza umbingeleli. (ABa 18:4, 30) UMika wayevuya yile nto ayenzileyo waza waziqhatha wathi: “Ngoku ndiyazi ukuba uYehova uza kundenzela izinto ezintle.” (ABa 17:7-13) Kodwa le nto yasuka yongeza kwizinto ezimbi awayezenzile kuba uYonatan wayengaphumi kumnombo ka-Aron ngoko wayengakufanelekeli ukuba ngumbingeleli.—Num 3:10.
it-2-E 391 ¶2
UMika
Kungadlulanga xesha lide emva koko, uMika namanye amadoda aye aleqa amaDan. Emva kokuba ewafumene ambuza ukuba kutheni ewaleqa waze uMika wathi: “Nithathe oothixo bam endabenzayo, naza nahamba nombingeleli wam. Nindishiye nantoni?” Oonyana bakwaDan bathi ukuba uqhubeka ebaleqa kwaye ebangxolisa basenokulwa naye. Akubabona ukuba banamandla kunaye, uMika waye wagoduka. (ABa 18:22-26) AmaDan aye ayitshisa iLayishe, aza akhela isixeko sakwaDan kwalapho. UYonatan noonyana bakhe baye baba ngababingeleli bamaDan baza ‘bawumisa loo mfanekiso uqingqiweyo wawenziwe nguMika, ibe wahlala ulapho yonke imihla eyayikho ngayo indlu yoThixo wokwenene eShilo.’—ABa 18:27-31.
Ubuncwane ObuseBhayibhileni
Inguqulelo Elula YeLizwi LikaThixo
6 Ngoku, sinesizathu esingakumbi sokusebenzisa igama likaYehova. Livela izihlandlo eziyi-7216 kwiNguqulelo Yehlabathi Elitsha ehlaziyiweyo ka-2013. Liye longezwa kwimibhalo emithandathu kule nguqulelo. Emihlanu ifunyenwe kwimiSongo Yolwandle Olufileyo yakutshanje. Ukanti, owesithandathu ufunyenwe komnye wemisongo yamandulo yeBhayibhile. (Funda umbhalo osemazantsi.)
JANUWARI 17-23
UBUTYEBI OBUPHUMA ELIZWINI LIKATHIXO | ABAGWEBI 20-21
“Qhubekani Nicela UYehova”
Ngaba Unokufana NoFinehasi Xa Ujongene Nezilingo?
Emva kokudlwengulwa nokubulawa kweshweshwe lomLevi ngamadoda aseGibheya, esizwe sakwaBhenjamin, ezinye izizwe zavusa imfazwe nxamnye namaBhenjamin. (ABagwe. 20:1-11) Zathandazela uncedo lukaYehova ngaphambi kokuya kulwa, kodwa zoyiswa kwade kwakabini, kwabulawa abantu abaninzi. (ABagwe. 20:14-25) Ngaba zazinokugqiba kwelokuba zazithandazela ilize? Ngaba ngokwenene uYehova wayenomdla wokuzibona zisabela kububi obenzekileyo?
Iimbalasane Zencwadi YaBagwebi
20:17-48—Kwakutheni ukuze uYehova avumele amaBhenjamin oyise ezinye izizwe kabini, nangona kwakufuneka wona ohlwaywe? Ngokuvumela ukuba izizwe ezithembekileyo zoyiswe okokuqala, uYehova wayevavanya ukuzimisela kwazo ukuphelisa ububi kwaSirayeli.
Ngaba Unokufana NoFinehasi Xa Ujongene Nezilingo?
Sinokufunda ntoni kule ngxelo? Ezinye iingxaki zebandla zisenokuqhubeka zikho nakuba abadala besenza imigudu yaye bethandazela uncedo lukaThixo. Xa oku kusenzeka, abadala bafanele bakhumbule la mazwi kaYesu: “Qhubekani nicela [okanye nithandaza], niya kunikwa; qhubekani nifuna, niya kufumana; qhubekani ninkqonkqoza, niya kuvulelwa.” (Luka 11:9) Nokuba imithandazo ibonakala ngathi ayiphendulwa msinya, abaveleli banokuqiniseka ukuba uYehova uya kuyiphendula ngexesha lakhe.
Ubuncwane ObuseBhayibhileni
Ngaba Ubusazi?
Zazisetyenziswa njani izilingi kwiimfazwe zamandulo?
UDavide wasebenzisa isilingi ukubulala uGoliyati. Kuyacaca ukuba uDavide wafunda ukusisebenzisa esi sixhobo ngexesha wayengumalusi.—1 Samuweli 17:40-50.
Zikho izilingi kwimizobo yaseYiputa neyaseAsiriya yamaxesha okubhalwa kweBhayibhile. Esi sixhobo sinesingxobo esenziwe ngesikhumba okanye ilaphu elixokonyezelwe kwimicu yakhona emibini. Umntu osebenzisa isilingi wayefaka ilitye elincinane eligudileyo elinobunzima obuyi-250 gram. Ngoko wayejiwuzisa isilingi eso phezu kwentloko yakhe ukuze kuphume ilitye ngesantya esiphezulu lize lingqale ngqo.
Ukwembiwa kwezinto zakudala kuMbindi-Mpuma kwenze kwavela izilingi ezininzi ezazisetyenziswa mandulo. Oochwepheshe bemfazwe basenokuba babejukujela amatye ngesilingi ngesantya seekhilomitha eziyi-160 ukuya kweziyi-240 ngeyure. Abaphandi bayaphikisana ngento yokuba isilingi sasinobungozi njengotolo, kodwa isilingi sasibulala kanye njengotolo.—ABagwebi 20:16.
JANUWARI 24-30
UBUTYEBI OBUPHUMA ELIZWINI LIKATHIXO | RUTE 1-2
“Bonisa Uthando Olungagungqiyo”
Yiba Njengabahlobo BakaYehova Abasondeleyo
5 Intsapho yakuloRute yayihlala kwaMowabhi. Wayenokubuyela kuyo, ibe yayiseno kumnyamekela. Wayebazi abantu balapho, ulwimi nezithethe zabo. UNahomi wayengenakumthembisa ukuba kuza kuba njalo naseBhetelehem. Kwakhona wayenoloyiko lokuba uRute akazukumfumana umyeni nomzi. Ngoko wathi makabuyele kwaMowabhi. Njengoko sibonile, uOrpa ‘wabuyela ebantwini bakowabo nakoothixo bakhe.’ (Rute 1:9-15) Kodwa yena uRute wakhetha ukungabuyeli ebantwini bakowabo nakoothixo babo.
Yiba Njengabahlobo BakaYehova Abasondeleyo
6 Kusenokwenzeka ukuba uRute wayefunde ngoYehova kumyeni wakhe okanye kuNahomi. Wafunda ukuba uYehova akafani noothixo bakwaMowabhi. Wayemthanda uYehova, ibe esazi ukuba kwakufuneka amnqule. Ngoko wenza isigqibo sobulumko. Wathi kuNahomi: “Abantu bakowenu baya kuba ngabantu basekhaya, noThixo wakho abe nguThixo wam.” (Rute 1:16) Isichukumis’ intliziyo indlela uRute awayemthanda ngayo uNahomi. Kodwa eyona nto isichukumisa nangakumbi yindlela awayemthanda ngayo uYehova. Oku kwamchukumisa noBhohazi, waza wamncoma ‘ngokufuna kwakhe indawo yokusabela phantsi kwamaphiko kaYehova.’ (Funda uRute 2:12.) Amazwi kaBhohazi asenokusikhumbuza indlela intshontsho lentaka elizifihla ngayo phantsi kwamaphiko kanina ukuze likhuseleke. (INdumiso 36:7; 91:1-4) Ngokufanayo, ngothando uYehova wamkhusela uRute waza wamvuza ngokholo lwakhe. URute wayengenaso kwaphela isizathu sokuzisola ngesigqibo sakhe.
Ubuncwane ObuseBhayibhileni
Iimbalasane Zencwadi KaRute
1:13, 21—Ngaba uYehova wenza ubomi bukaNahomi bakrakra waza wambangela intlekele? Akunjalo, yaye uNahomi akazange ambek’ ityala uThixo ngokwenza nakuphi na okubi. Noko ke, ngenxa yoko kwenzeka kuye, wayecinga ukuba uYehova unxamnye naye. Waba buhlungu yaye wayephelelwe lithemba. Ngaphezu koko, ngaloo mihla ukuzala kwakujongwa njengentsikelelo evela kuThixo yaye ukuba ludlolo, njengesiqalekiso. Ekubeni wayengenabazukulwana yaye oonyana bakhe ababini befile, kusenokwenzeka ukuba uNahomi wayevakalelwa kukuba uYehova umhlazisile.
JANUWARI 31–FEBRUWARI 6
UBUTYEBI OBUPHUMA ELIZWINI LIKATHIXO | RUTE 3-4
“Hlala Ungumntu Owaziwa Kakuhle”
“Umfazi Obalaseleyo”
UBhohazi wathetha ngelizwi eliphantsi nangelizolileyo yaye ububele bakhe bamthuthuzela uRute. Wathi: “Ngamana uYehova angakusikelela, ntombi yam. Ububele bakho bothando uye wabubonisa kakuhle ngakumbi ekugqibeleni kunasekuqaleni, ngokungalandeli emva kwabafo abaselula enoba bazizisweli okanye bazizityebi.” (Rute 3:10) Esi “sihlandlo sokuqala” athetha ngaso uBhohazi bububele bothando bukaRute awabenzela uNahomi xa wayebuyela kwaSirayeli. “Isihlandlo sokugqibela” kungoku. UBhohazi uyaqonda ukuba umfazana onjengoRute wayenokufuna umyeni oselula enoba usisityebi okanye ulihlwempu. Kunoko wayefuna ukwenza okulungileyo kungekhona kuNahomi kuphela kodwa nakumyeni wakhe ongasekhoyo, ukuze avuse igama lakhe. Akukho nzima ukubona isizathu sokuba uBhohazi amothulel’ umnqwazi uRute.
“Umfazi Obalaseleyo”
Umele ukuba wavuya gqitha uRute esakuva izinto ezithethwa nguBhohazi—ukuba bonke abantu ‘babeqonda ukuba ungumfazi obalaseleyo!” Ngokungathandabuzekiyo ukulangazelela kwakhe ukwazi uYehova nokumkhonza kwakunento yokwenza negama lakhe elihle. Kwakhona wamphatha ngobubele waza wamnonophela uNahomi nabantu bakowabo, ngokuzithandela wamkela iindlela nezithethe awayengaqhelananga nazo. Ukuba sixelisa ukholo lukaRute, sakubaphatha ngentlonelo abanye abantu nezithethe zabo. Ukuba siyayenza loo nto, nathi sakuzenzela igama elihle.
“Umfazi Obalaseleyo”
UBhohazi watshata noRute. Emva koko sifunda oku: “UYehova wamenza ukuba akhawule waza wazala unyana.” Abafazi baseBhetelehem bamsikelela uNahomi baza bamdumisa uRute besithi ulunge ngaphezu koonyana basixhenxe kuNahomi. Kamva sifunda ukuba lo nyana kaRute waba ngukhokho kaKumkani uDavide obalaseleyo. (Rute 4:11-22) Yena uDavide waba ngukhokho kaYesu Kristu.—Mateyu 1:1.
Ubuncwane ObuseBhayibhileni
Iimbalasane Zencwadi KaRute
4:6—Yiyiphi indlela umhlawuleli ‘awayenokulonakalisa’ ngayo ilifa lakhe ngokuhlawulela? Okokuqala, ukuba lowo uba lihlwempu uwuthengisile umhlaba wakhe olilifa, umhlawuleli kwakufuneka awuthenge lo mhlaba ngexabiso elilingana neminyaka eseleyo ngaphambi kokuba ibe yiNtlokoma. (Levitikus 25:25-27) Ukwenjenjalo kwakunciphisa ixabiso lomhlaba wakhe. Ngaphezu koko, ukuba uRute wayeza kuzala unyana, loo nyana uya kufumana njengelifa umhlaba othengiweyo kunokuba ufunyanwe zizalamane ezisondeleyo ezisaphilayo zomhlawuleli.
FEBRUWARI 7-13
UBUTYEBI OBUPHUMA ELIZWINI LIKATHIXO | 1 SAMUWELI 1-2
“Thandaza KuYehova Umxelele Yonke Into”
Wakhupha Imbilini Yakhe KuThixo Ngomthandazo
12 UHana ngumzekelo omhle wendlela yokuthandaza kubo bonke abakhonzi bakaThixo. UYehova umema bonke abantu bakhe ukuba bathethe naye ngokukhululekileyo, bamchazele konke okusentliziyweni njengomntwana othetha nomzali wakhe. (Funda iNdumiso 62:8; 1 Tesalonika 5:17.) Umpostile uPetros waphefumlelwa ukuba abhale la mazwi athuthuzelayo ngoYehova: “Liphoseni kuye lonke ixhala lenu, kuba unikhathalele.”—1 Pet. 5:7.
Indlela UHana Awafumana Ngayo Uxolo Lwengqondo
Yintoni esinokuyifunda koku? Xa sithandazela izinto ezisixhalabisayo, sinokumxelela uYehova indlela esivakalelwa ngayo size sicele oko kusentliziyweni yethu. Ukuba akusekho nto sinokuyenza ukucombulula loo ngxaki, simele siwuyekele ezandleni zikaYehova loo mbandela. Leyo yeyona ndlela simele senze ngayo.—IMizekeliso 3:5, 6.
Ubuncwane ObuseBhayibhileni
Iimbalasane Zencwadi Yokuqala KaSamuweli
2:10—Kutheni uHana wathandazela ukuba uYehova ‘anike amandla ukumkani’ ekubeni kwakungekho kumkani ungumntu kwaSirayeli? Into yokuba uSirayeli wayeza kuba nokumkani ongumntu yayixelwe kwangaphambili kuMthetho kaMoses. (Duteronomi 17:14-18) Xa wayeza kufa uYakobi waprofeta wathi: “Intonga yobukhosi ayisayi kusuka kuYuda.” (Genesis 49:10) Ukanti, ngokuphathelele uSara—ukhokhokazi wakwaSirayeli—uYehova wathi: ‘Ookumkani bezizwana baya kuphuma kuye.’ (Genesis 17:16) Ngoko uHana wayethandazela ukumkani wexesha elizayo.
FEBRUWARI 14-20
UBUTYEBI OBUPHUMA ELIZWINI LIKATHIXO | 1 SAMUWELI 3-5
“UYehova Uyabacingela Abantu”
NguSomandla Kodwa Uyabacingela Abantu
3 USamuweli waqala esemncinci ‘ukulungiselela uYehova’ emnqubeni. (1 Sam. 3:1) Ngobunye ubusuku uSamuweli elele, kwenzeka into engaqhelekanga. (Funda eyoku-1 kaSamuweli 3:2-10.) Weva ilizwi limbiza. Ecinga ukuba lilizwi loMbingeleli Omkhulu uEli, waya ebaleka kuye waza wathi: “Ndim lo, ngokuba undibizile.” UEli wathi akambizanga. Xa wayebizwa okwesithathu, uEli waqonda ukuba uSamuweli ubizwa nguThixo. Wamxelela indlela amakaphendule ngayo, waza uSamuweli wenjenjalo. Kwakutheni ukuze uYehova angazivezi kwasekuqaleni kuSamuweli esebenzisa ingelosi? IBhayibhile ayisichazeli, kodwa ngokwendlela izinto ezenzeka ngayo, eyona nto yayibalulekile kuYehova yayikukucingela uSamuweli. Kutheni sisitsho?
NguSomandla Kodwa Uyabacingela Abantu
4 Funda eyoku-1 kaSamuweli 3:11-18. UMthetho KaYehova wawuyalela abantwana ukuba babahloniphe abantu abadala, ngokukodwa isikhulu. (Eks. 22:28; Lev. 19:32) Ngaba unomfanekiso-ngqondweni kaSamuweli esiya kuEli kwakusasa aze abe nesibindi sokumxelela ngento ebuhlungu uThixo aza kuyenza kuye? Ebengasoze ayenze loo nto! IBhayibhile ithi, uSamuweli “woyika ukumxelela uEli umbono.” UThixo wabonisa uEli ukuba uSamuweli ubizwa nguye. Loo nto yabangela ukuba uEli athi uSamuweli makakhululeke athethe. Wade wamyalela esithi: ‘Musa ukundifihlela ilizwi emazwini onke awathethileyo kuwe.’ USamuweli “wamxelela onke amazwi.”
Ubuncwane ObuseBhayibhileni
Highlights From the Book of First Samuel
3:3—Ngaba uSamuweli wayelala ngokwenene kweYona Ngcwele? Akunjalo. USamuweli wayengumLevi ophuma kwintsapho kaKohati engengabo ababingeleli. (1 Kronike 6:33-38) Ngoko, wayengavumelekanga ukuba ‘akhangele ezintweni ezingcwele.’ (Numeri 4:17-20) Ekuphela kwendawo awayekwazi ukungena kuyo uSamuweli yayiyintendelezo yomnquba. Umele ukuba wayelala apho. Kuyabonakala ukuba uEli wayelala kwalapho entendelezweni. Ibinzana elithi, “apho kwakukho khona ityeya kaThixo” kucaca ukuba libhekisela kummandla womnquba.
FEBRUWARI 21-27
UBUTYEBI OBUPHUMA ELIZWINI LIKATHIXO | 1 SAMUWELI 6-8
“Ulawulwa Ngubani?”
it-2-E 163 ¶1
UBukumkani bukaThixo
Kufunwa UKumkani Ongumntu. Kwakusele kudlule phantse iminyaka eyi-400 ukususela kwixesha leEksodus, nengaphezu kweyi-800 ukususela kwixesha uThixo awenza ngayo isivumelwano kunye noAbraham, xa amaSirayeli amcela ukuba abe nokumkani ongumntu kuba nezinye iintlanga zazinookumkani abangabantu. Esi sicelo sabo sasibonisa ukuba nguYehova lo bangamfuniyo ukuba abe ngukumkani wabo. (1Sa 8:4-8) Ewe kona, abantu babelindele ubukumkani obabuza kumiselwa nguYehova ngokwesithembiso awayesenze kuAbraham nakuYakobi. Enye into eyayibenza balikholelwe eli themba yinto uYakobi awayiprofetayo ngoYuda ngaphambi kokuba asweleke (Gen 49:8-10), ngamazwi awathethwa nguYehova emva kweEksodus (Eks 19:3-6), zizinto ezazikhona kwimiyalelo yoMthetho (Dut 17:14, 15), nezinye zezinto uThixo awenza umprofeti uBhileham azithethe (Num 24:2-7, 17). Umama kaSamuweli othembekileyo, uHana, wathetha ngelithemba emthandazweni wakhe. (1Sa 2:7-10) Kodwa ke, uYehova wayengekayichazi kakuhle “imfihlelo engcwele” ngoBukumkani bakhe, engekalichazi nexesha elibekiweyo lokuba buqalise ibe zange atsho nokuba obu Bukumkani buza kuba semhlabeni okanye ezulwini. Ngoko ayezigqatsa amaSirayeli ngokufuna ukuba nokumkani ongumntu.
Wanyamezela Ngaphezu Nje Kokuphoxeka
Phawula indlela uYehova awasabela ngayo xa uSamuweli ethandaza kuye ngalo mba: “Liphulaphule ilizwi labantu kuko konke abakutshoyo kuwe; kuba ingenguwe abamgatyayo, kodwa bagatye mna ukuba ndingabi ngukumkani phezu kwabo.” Loo mazwi amel’ ukuba amthuthuzela uSamuweli, kodwa le nto yayisisithuko kuThixo onguSomandla! UYehova waxelela umprofeti wakhe ukuba alumkise amaSirayeli ngemiphumo yokuba nokumkani ongumntu. Xa uSamuweli wakwenza oku, anyanzelisa esithi: “Hayi, kodwa ke thina siya kuba nokumkani phezu kwethu.” USamuweli, owayesoloko ethobela uThixo wakhe, wahamba waya kuthambisa ukumkani owayenyulwe nguYehova.—1 Samuweli 8:7-19.
Ukuthethelelwa Kolawulo LukaYehova!
9 Ekuhambeni kwexesha, loo nto wayewalumkise ngayo uYehova yenzeka ngokwenene. Ulawulo lookumkani abangabantu lwalubangela ukuba amaSirayeli angene ezingxakini ezinzulu ingakumbi xa ukumkani lowo engathembekanga. Xa sicinga ngalo mzekelo wamaSirayeli, siyasiqonda isizathu sokuba bonke oorhulumente babantu nabangamaziyo uYehova bangaphumeleli. Liyinyaniso elokuba, ezinye iinkokeli zezopolitiko ziye zicele uThixo ukuba azisikelele kwimizamo yazo yokufuna uxolo nonqabiseko, kodwa ngaba uThixo angabasikelela abantu abangaluthobeliyo ulawulo lwakhe?—INdu. 2:10-12.
Ubuncwane ObuseBhayibhileni
Kutheni Ufanele Ubhaptizwe?
13 Ngaphambi kokuba sibhaptizwe njengamaNgqina kaYehova simele sijike kwikhondo langaphambili. Umntu ujika ngokuthanda kwakhe kwikhondo langaphambili emva kokuba enze isigqibo esisuka entliziyweni sokulandela uKristu uYesu. Abantu abanjalo bayalilahla ikhondo labo langaphambili eliphosakeleyo baze bazimisele ukwenza okulungileyo phambi kwamehlo kaThixo. EZibhalweni, isenzi sesiHebhere nesesiGrike esiphathelele ukujika kwikhondo langaphambili sinentsingiselo yokuguquka. Eli nyathelo libhekisela ekuguqukeni komntu kwindlela ephosakeleyo eze kuThixo. (1 Kumkani 8:33, 34) Ukuze ubani ajike kwikhondo lakhe langaphambili kufuneka ‘enze imisebenzi efanele inguquko.’ (IZenzo 26:20) Kufuneka silahle unqulo lobuxoki, senze ngokuvisisana nemiyalelo kaThixo, size sizinikele ngokupheleleyo kuYehova. (Duteronomi 30:2, 8-10; 1 Samuweli 7:3) Ukujika kwikhondo langaphambili kubangela ukuba sitshintshe indlela esicinga ngayo, usukelo lwethu, nobuntu bethu. (Hezekile 18:31) ‘Siyajika’ njengoko imikhwa yokungahlonel’ uThixo ithatyathelw’ indawo bubuntu obutsha.—IZenzo 3:19; Efese 4:20-24; Kolose 3:5-14.
FEBRUWARI 28–MATSHI 6
UBUTYEBI OBUPHUMA ELIZWINI LIKATHIXO | 1 SAMUWELI 9-11
“USawule Waqala Engumntu Othobekileyo”
Thobeka, Uzazi Izinto Ongenakuzenza
11 Cinga ngento eyenzeka kuKumkani uSawule. Wayengumfana othobekileyo. Wayezazi izinto awayengenakukwazi ukuzenza, wade wathandabuza nokwamkela neminye imisebenzi emininzi. (1 Sam. 9:21; 10:20-22) Ekuhambeni kwexesha, uSawule waqalisa ukuzigqatsa. Le nto yenzeka esandokuba ngukumkani. Ngenye imini, waphelelwa ngumonde xa wayelinde umprofeti uSamuweli. Endaweni yokuba amthembe uYehova ukuba uza kubanceda abantu bakhe, uSawule wanikela ngombingelelo otshiswayo engavumelekanga. Loo nto yenza ukuba uYehova angamthandi uSawule, ekuhambeni kwexesha wamsusa esihlalweni sokuba ngukumkani. (1 Sam. 13:8-14) Iza kusinceda into yokufunda kweli bali size siyeke ukuzigqatsa.
Oko Sinokukwenza Ukuze Sihlale Silungele Ukuzincama
8 UKumkani uSawule wakwaSirayeli ungumzekelo osisilumkiso kuthi obonisa indlela ukuzingca okunokusenza ngayo singakulungeli ukuzincama. USawule wayethozamile yaye ethobekile xa wayeqalisa ukuba ngukumkani. (1 Sam. 9:21) Zange avume ukohlwaya amaSirayeli awakugxekayo ukuba ngukumkani kwakhe, nakuba wayenokuthetheleleka ngokukhusela isikhundla asinikwe nguThixo. (1 Sam. 10:27) UKumkani uSawule wavuma ukwalathiswa nguThixo njengoko wayekhokela uSirayeli ekoyiseni ama-Amoni. Emva koko, ngokuthobeka wazukisa uYehova ngolo loyiso.—1 Sam. 11:6, 11-13.
Ama-Amon—Abantu Ababuyekeza Ububele Ngentiyo
Kwakhona ama-Amon ayebuyekeze ububele bukaYehova ngentiyo. UYehova akazange asiphose kwelokulibala esi sisongelo. “Umoya kaYehova wamfikela ngamandla uSawule ekuwaveni kwakhe la mazwi [kaNahashe], wavutha umsindo wakhe kunene.” Phantsi kolwalathiso lomoya kaThixo, uSawule waqokelela umkhosi wamadoda angama-330,000 awathi awacokisa ama-Amon kangangokuba “akwasala kuwo nokuba abe mabini ndaweni-nye.”—1 Samuweli 11:6, 11.
Ubuncwane ObuseBhayibhileni
Iimbalasane Zencwadi Yokuqala KaSamuweli
9:9—Lithetha ukuthini ibinzana elithi “umprofeti lo wanamhlanje wayedla ngokubizwa ngokuba yimboni kumaxesha angaphambili”? La mazwi asenokubonisa ukuba ekubeni abaprofeti baye bazibalula ngemihla kaSamuweli nangexesha lookumkani bakwaSirayeli, igama elithi “imboni” lathatyathelw’ indawo ligama elithi “umprofeti.” USamuweli uthatyathwa njengowokuqala kuluhlu lwabaprofeti.—IZenzo 3:24.