Khonza UThixo Wenkululeko

“Kuba ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.”—1 YOHANE 5:3.

NGABA UNOKUPHENDULA?

USathana uzama njani ukwenza imithetho kaThixo ibonakale iluxanduva?

Kutheni simele sibalumkele ngokukhethekileyo abantu esinxulumana nabo?

Yintoni enokusinceda sinyaniseke kuThixo wenkululeko?

1. UYehova uyisebenzisa njani inkululeko, yaye oko kwabonakala njani kwindlela awayeqhubana ngayo noAdam noEva?

UYEHOVA ukuphela koMntu onenkululeko epheleleyo. Noko ke, akaze ayisebenzise kakubi; eyisikel’ umda inkululeko yabakhonzi bakhe ngokulawula yonke into abayenzayo. Kunoko, ubanike inkululeko yokuzenzela izigqibo neyokwanelisa yonke iminqweno yabo elungileyo. Ngokomzekelo, uThixo wanika uAdam noEva umyalelo omnye owawubathintela—ubalela ukuba batye ‘kumthi wokwazi okulungileyo nokubi.’ (Gen. 2:17) Babenenkululeko engathethekiyo njengoko besenza ukuthanda koMdali wabo!

2. Abazali bethu bokuqala baphulukana njani nenkululeko ababeyinikwe nguThixo?

² Kwakutheni ukuze uThixo anike abazali bethu bokuqala inkululeko engako? Wabadala ngokomfanekiso wakhe waza wabanika isazela, elindele ukuba ukumthanda kwabo njengoMdali wabo kubakhokelele kwikhondo elifanelekileyo. (Gen. 1:27; Roma 2:15) Okulusizi kukuba, uAdam noEva basilela ukuxabisa uMniki-bomi wabo omangalisayo nenkululeko awabanika yona. Bakhetha inkululeko engekho mthethweni abayifumana kuSathana, eyayikukuzimela geqe. Kunokuba bafumane inkululeko, abazali bethu bokuqala bazithengisa baza bathengisa nabantwana babo ababeza kuzalelwa kubukhoboka besono, nto leyo eyabangela imiphumo eyingozi.—Roma 5:12.

3, 4. USathana uzama njani ukusihenda ukuze sigatye imilinganiselo kaYehova?

³ Ukuba uSathana wakwazi ukuhenda abantu ababini abafezekileyo—singasathethi ke ngentaphane yezidalwa zomoya awazilukuhlayo ukuba zigatye ulongamo lukaThixo—unokusihenda nathi. Usasebenzisa amacebo afanayo. Uzama ukusilahlekisa ukuze sicinge ukuba imilinganiselo kaThixo iluxanduva, yaye isivimba uyolo nochulumanco. (1 Yoh. 5:3) Ezo ngcinga zisenokusongamela ukuba sisoloko siphakathi kwabantu abathetha ngazo. Omnye udade oneminyaka engama-24 ubudala owaziphatha kakubi ngokwesini uthi: “Ndachanwa kukuba nabahlobo abangalunganga, yaye eyona yabangela oko kukuba ndandikoyika ukwahluka kubo.” Mhlawumbi nawe uye wasisisulu sengcinezelo yoontanga efanayo.

⁴ Okulusizi kukuba, maxa wambi ingcinezelo yoontanga ikhe ivele nasebandleni lamaKristu. Elinye iNgqina eliselula lathi: “Kukho ulutsha endilwaziyo olwaluthandana nabantu abangakholwayo. Yandothusa into yokuba, xa ndichitha ixesha elininzi nalo, ndandiya ndifana nalo. Ndaba buthathaka ngokomoya. Ndandingasakunandiphi ukutya kokomoya ezintlanganisweni yaye ndandinqabile nasentsimini. Loo nto yayibonisa ukuba ndifanele ndiluqhawule olo nxulumano, yaye ndayenza loo nto!” Ngaba uyayiqonda indlela abanokukuphembelela ngayo abantu onxulumana nabo? Khawucinge nje ngomzekelo oseBhayibhileni onokusinceda.—Roma 15:4.

WAZIBA IINTLIZIYO ZABO

5, 6. UAbhisalom wabalahlekisa njani abantu, yaye ngaba iyelenqe lakhe laphumelela?

⁵ IBhayibhile inemizekelo emininzi yabantu ababenempembelelo embi kwabanye. Omnye waloo mizekelo nguAbhisalom, unyana kaKumkani uDavide. UAbhisalom wayeyinzwana. Noko ke, njengoSathana wathi ngokuhamba kwexesha wavumela ukunyoluka kuzalise intliziyo yakhe waza wabawela ulawulo lukayise awayengenalungelo lakulufumana.a Ezama ukubhukuqa uyise, ngobuqili uAbhisalom wazenza ngathi uwaxhalabele amanye amaSirayeli ngoxa ngobuqhetseba esenza ngathi inkundla kakumkani ayibaxhalabelanga. Kanye njengoMtyholi kumyezo wase-Eden, uAbhisalom wenza ngathi unceda abantu ngoxa ngenkohlakalo esenzakalisa uyise omzalayo.—2 Sam. 15:1-5.

⁶ Ngaba laphumelela iyelenqe lika-Abhisalom? Lasebenza ngandlel’ ithile, kuba ithi ingxelo yeBhayibhile: “UAbhisalom wamana eziba iintliziyo zamadoda akwaSirayeli.” (2 Sam. 15:6) Noko ke, ikratshi lika-Abhisalom lamfaka enkathazweni ekugqibeleni. Yaye waphela sel’ esifa, yena kunye namawakawaka awayewalahlekisile.—2 Sam. 18:7, 14-17.

7. Sinokufunda ntoni kwingxelo engoAbhisalom? (Sicela ujonge umfanekiso okwiphepha 14.)

⁷ Kwakutheni ukuze loo maSirayeli alahlekiswe lula ngolo hlobo? Mhlawumbi ayefuna nje izinto awayezithenjiswe nguAbhisalom. Okanye ke mhlawumbi atsalwa yinkangeleko yakhe. Enoba kwakutheni na, nantsi into esiqiniseke ngayo: Ayenganyanisekanga kuYehova nakukumkani awayemmisele. Nanamhlanje, uSathana “usenooAbhisalom” abasebenzisayo ngelokuzama ukurhwebesha iintliziyo zabakhonzi bakaYehova. Basenokuthi, ‘imilinganiselo kaYehova ingqwabalala. Khawubajonge nje bonke abantu abangakhonzi Yehova. Bazonwabele kamnandi!’ Ngaba unokuwabona loo maqhinga uze uhlale unyanisekile kuThixo? Ngaba uyayiqonda into yokuba ‘ngumthetho kaYehova ogqibeleleyo’ kuphela, umthetho kaKristu, onokukunika inkululeko yokwenene? (Yak. 1:25) Ukuba kunjalo, wuxabise lo mthetho ungaze utyekele ekuyisebenziseni kakubi inkululeko yakho njengomKristu.—Funda eyoku-1 kaPetros 2:16.

8. Yiyiphi imizekelo yokoqobo ebonisa ukuba ulonwabo alufumaneki ekuvukeleni imilinganiselo kaYehova?

⁸ Abantu abaselula bazizisulu ezikhethekileyo zikaSathana. Umzalwana osele ekwiminyaka engama-30 ubudala uthi xa ethetha ngeminyaka yakhe yokufikisa: “Ndandivakalelwa kukuba imilinganiselo yokuziphatha kaYehova ingqongqo, ndingayigqali njengendikhuselayo.” Ngenxa yoko, waziphatha kakubi ngokwesini. Kodwa naloo nto ayizange imenze onwabe. Uthi: “Ndazisola gqitha kangangeminyaka emininzi.” Omnye udade wathi ngeminyaka yakhe yokufikisa: “Emva kokuziphatha kakubi, uyadana uze uphelelwe kukuzixabisa. Sele kudlule iminyaka eli-19, kodwa ndiseneenkumbulo ezimbi.” Omnye udade uthi: “Ukucinga indlela ihambo yam eyabakhathaza ngayo abantu endibathandayo kuye kwandichaphazela engqondweni, ngokomoya nangokweemvakalelo. Kuyoyikisa ukungamkholisi uYehova.” USathana akafuni ukuba ucinge ngemiphumo yesono.

9. (a) Yiyiphi imibuzo enokusinceda sihlolisise indlela esimjonga ngayo uYehova, imithetho nemigaqo yakhe? (b) Kutheni kubalulekile ukumazi kakuhle uThixo?

⁹ Ilusizi into yokuba ulutsha oluninzi ebandleni—nkqu nabantu abadala abaliqela—kufuneke luyifunde ngokubetheka into yokuba ukuzonwabisa ngesono kusoloko kunemiphumo emibi! (Gal. 6:7, 8) Ngoko zibuze: ‘Ngaba ndiwabona kakuhle amaqhinga akhohlakeleyo kaSathana? Ngaba ndigqala uYehova njengoMhlobo wam osenyongweni, umhlobo osoloko endixelela inyaniso nondinqwenelela okuhle? Ngaba ndeyiseke ngokupheleleyo ukuba akasoze andivimbe oko kulungileyo nokuya kundibangela ndonwabe ngokupheleleyo?’ (Funda uIsaya 48:17, 18.) Ukuze le mibuzo uyiphendule ngoewe osuka entliziyweni, kufuneka umazi kakuhle uYehova. Kufuneka ube nolwalamano olusenyongweni naye uze uqonde ukuba imithetho nemigaqo yeBhayibhile ibonisa indlela akuthanda ngayo, ingekuba ufuna ukukubophelela.—INdu. 25:14.

THANDAZELA INTLIZIYO ELUMKILEYO NETHOBELAYO

10. Kutheni simele senze umgudu wokuxelisa uKumkani uSolomon oselula?

¹⁰ Ngoxa wayesengumfana, ngokuthobeka uSolomon wathandaza wathi: “Mna ndiyinkwenkwana. Andikwazi ukuphuma nokungena.” Emva koko, wathandazela intliziyo elumkileyo nethobelayo. (1 Kum. 3:7-9, 12) UYehova wawuphendula lo mthandazo unyanisekileyo, yaye uya kwenza okufanayo nakuwe enoba uselula okanye sele ukhulile. Kakade ke, uYehova akasayi kukunika ingqiqo nobulumko ngokungummangaliso. Kodwa uya kukwenza ube sisilumko ukuba ulifunda ngokuzimisela iLizwi lakhe, uthandazele umoya oyingcwele uze uwasebenzise ngokupheleleyo amalungiselelo okomoya afumaneka kwibandla lamaKristu. (Yak. 1:5) Ngokwenene, uYehova usebenzisa la malungiselelo ukuze enze nabakhonzi bakhe abaselula balumke ngaphezu kwabo bonke abo bagatya isiluleko sakhe, kuquka nabo babizwa ngokuba ‘zizilumko neengqondi’ zeli hlabathi.—Luka 10:21; funda iNdumiso 119:98-100.

11-13. (a) Ziziphi izifundo ezibalulekileyo esinokuzifunda kwiNdumiso 26:4, kwiMizekeliso 13:20, nakweyoku-1 kwabaseKorinte 15:33? (b) Unokuyisebenzisa njani le migaqo yeZibhalo?

¹¹ Ukuze sibone ukubaluleka kokufundisisa iBhayibhile nokucamngca ngoko sikufundayo size sibe nobuhlobo obusenyongweni noYehova, khawucinge ngezi zibhalo zilandelayo. Sibhalo ngasinye sinomgaqo obalulekileyo ophathelele indlela esibakhetha ngayo abahlobo: “Andihlalanga namadoda angenanyaniso; yaye andingeni kwabo bazifihlayo oko bakuko.” (INdu. 26:4) “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” (IMize. 13:20) “Unxulumano olubi lonakalisa imikhwa elungileyo.”—1 Kor. 15:33.

¹² Ziziphi izifundo ezibalulekileyo esinokuzifunda kwezi zibhalo? (1) UYehova ufuna sibakhethe abantu esinxulumana nabo. Ufuna sikhuseleke ngokokuziphatha nangokomoya. (2) Abantu esinxulumana nabo banokuba nempembelelo entle okanye embi kuthi, eso sisibakala esimele sisamkele. Indlela ezibhalwe ngayo ezi ndinyana zingasentla ibonisa ukuba uYehova ufuna ukusifikelela intliziyo. Ukwenza njani oko? Phawula ukuba, akukho nanye kwezi ndinyana ebhalwe yangumthetho, njengokuthi “akumele . . . ” Kodwa zibhalwe zayinyaniso nje ezicaceleyo. Eyona nto asixelela yona uYehova yeyokuba: ‘Nazi izibakala. Uza kusabela njani? Ucinga ntoni ngazo?’

¹³ Okokugqibela, ngenxa yokuba ezi ndinyana zintathu ziyinyaniso esisiseko, aziphelelwa yaye zinentsingiselo ebanzi. Ngokomzekelo, zibuze le mibuzo: Ndinokukuphepha njani ukunxulumana nabantu ‘abazifihlayo oko bakuko’? Ziziphi iimeko ezinokundenza ndizibone sele ndinxulumana nabantu abanjalo? (IMize. 3:32; 6:12) Ngoobani ‘izilumko’ uYehova afuna ndinxulumane nazo? Ingoobani zona ‘iziyatha’ afuna ndiziphephe? (INdu. 111:10; 112:1; IMize. 1:7) Yiyiphi le ‘mikhwa ilungileyo’ ndiya kuyonakalisa ngokukhetha izinxulumani ezingafanelekanga? Ngaba izinxulumani ezingalunganga ndinokuzifumana ehlabathini kuphela? (2 Pet. 2:1-3) Unokuyiphendula njani le mibuzo?

14. Ninokuyenza njani ingokuhlwa yoNqulo Lwentsapho ifundise?

¹⁴ Emva kokuba uqiqe ngezi Zibhalo, kutheni ungahlolisisi ezinye iindinyana zeBhayibhile ezichaza indlela avakalelwa ngayo uThixo kwimiba ebandakanya wena okanye intsapho yakho?b Bazali, khanikhe niyixubushe le miba ngengokuhlwa yoNqulo Lwentsapho. Njengoko nisenjenjalo, khumbulani ukuba usukelo lwenu kukunceda lungu ngalinye lentsapho libuqonde ngokupheleleyo ubunzulu bendlela asithanda ngayo uThixo, njengoko kubonakala kwimithetho nemigaqo yakhe. (INdu. 119:72) Ngokwenene, eso sifundo sifanele simanyanise amalungu entsapho size siwasondeze ngakumbi kuYehova.

15. Unokubona njani xa unentliziyo elumkileyo nethobelayo?

¹⁵ Unokubona njani xa unentliziyo elumkileyo nethobelayo? Phakathi kwezinye izinto, unokuthelekisa indlela ocinga ngayo naleyo yabakhonzi bakaThixo abathembekileyo bamandulo, njengoKumkani uDavide owabhala wathi: “Ukwenza ukuthanda kwakho, Thixo wam, kundiyolisile, nomthetho wakho ungaphakathi ezibilinini zam.” (INdu. 40:8) Kanti, umbhali weNdumiso 119 wathi: “Hayi indlela endiwuthanda ngayo umthetho wakho! Imini le yonke ndiwuxhalabele.” (INdu. 119:97) Olo thando alukhuli kumhlaba ongekho nzulu. Kunoko lubangelwa kukufundisisa nzulu, ukuthandaza, ukucamngca nokuba namava—ukubona iintsikelelo ezingathethekiyo ezibangelwa kukuphila ngemilinganiselo kaThixo.—INdu. 34:8.

YILWELE INKULULEKO YAKHO NJENGOMKRISTU!

16. Yintoni esimele siyiqonde ukuze siphumelele njengoko sisilwela inkululeko yokwenene?

¹⁶ Ukutyhubela imbali, amazwe aye alwa iimfazwe zenkohlakalo egameni lenkululeko. Ufanele ukulungele ngakumbi ukulwa ngokomoya usilwela inkululeko yakho njengomKristu! Khumbula ukuba iintshaba zakho aziphelelanga nje kuSathana, ihlabathi nomoya walo onetyhefu. Kusafuneka ulwe nokungafezeki kwakho, kuquka intliziyo enenkohliso. (Yer. 17:9; Efe. 2:3) Sekunjalo, xa sincediswa nguYehova sinokuwuphumelela lo mlo. Okungakumbi, uloyiso ngalunye—enoba lukhulu okanye luncinane—luya kuba nemiphumo emibini ubuncinane. Okokuqala, uya kuvuyisa intliziyo kaYehova. (IMize. 27:11) Okwesibini, njengoko unandipha amandla akhululayo ‘omthetho kaThixo ogqibeleleyo wenkululeko,’ uya kuzimisela ngakumbi ukuqhubeka uhamba ‘kwindlela emxinwa’ esa kubomi obungunaphakade. Ngokuhamba kwethuba, uya kunandipha inkululeko ethe kratya eza kufunyanwa ngabantu bakaYehova abanyanisekileyo.—Yak 1:25; Mat 7:13, 14.

17. Kutheni singamele sidane ngokugqithiseleyo ngenxa yokungafezeki kwethu, yaye usinceda njani uYehova?

¹⁷ Kambe ke, maxa wambi sonke siyazenza iimpazamo. (INtshu. 7:20) Xa oko kusenzeka, musa ukuphelelwa kukuzixabisa okanye udane ngokugqithiseleyo. Ukuba uyakhubeka, ngokungathi kunjalo, phakama uze uqhubeke uhamba—enoba loo nto ithetha ukucela uncedo kubadala bebandla okulo. UYakobi uthi, ‘umthandazo wabo wokholo uya kumphilisa lowo ungaphilanga, uYehova amvuse. Kanjalo, ukuba uye wenza izono, uya kuxolelwa.’ (Yak. 5:15) Ngokwenene, ungaze ulibale ukuba uThixo unenceba ngokwenene yaye wakutsalela ebandleni ngenxa yokuba wabona iimpawu ezintle kuwe. (Funda iNdumiso 103:8, 9.) Ngoko, logama usaqhubeka unentliziyo ephelele kuYehova, akasayi kuze akulahle.—1 Kron. 28:9.

18. Sinokwenza njani ngokuvisisana nomthandazo kaYesu ochazwe kuYohane 17:15?

¹⁸ Ngoxa ethandaza nabapostile bakhe abali-11, ngobusuku bokugqibela kunye nabo, uYesu wathetha la mazwi angenakulibaleka ngabo: ‘Balinde ngenxa yalowo ungendawo.’ (Yoh. 17:15) UYesu wayengaxhalabelanga abapostile bakhe kuphela, kodwa wayexhalabele bonke abalandeli bakhe. Ngenxa yoko, sinokuqiniseka ukuba uYehova uya kuwuphendula umthandazo kaYesu ngokusilinda kula maxesha amanqam. “[UYehova] ulikhaka kwabo bahamba ngengqibelelo . . . Uya kuyigcina indlela yabanyanisekileyo bakhe.” (IMize. 2:7, 8) Ngokwenene, indlela yengqibelelo inocelomngeni, kodwa ikuphela kwendlela esa kubomi obungunaphakade nakwinkululeko yokwenene. (Roma 8:21) Makungabikho nabani na okutyekisayo kuyo!

[Imibhalo esemazantsi]

[Imifanekiso ekwiphepha 14]

Sinokubabona njani ooAbhisalom bale mihla size sibalumkele?