Iimbekiselo Zencwadi Yobomi BamaKristu Nomsebenzi Wokushumayela
MEYI 2-8
UBUTYEBI OBUPHUMA ELIZWINI LIKATHIXO | 1 SAMUWELI 27-29
“Indlela uDavide Awenza Ngayo Emfazweni”
it-1-E 41
UAkishe
Kuwo omabini amaxesha apho uDavide wayebaleka uSawule, wakhusuleka ngenxa yokuzimela kumazwe awayelawulwa nguAkishe. Xa wabalekela kwilizwe lakhe okokuqala, wayekrokrelwa njengotshaba ngoko wazenza ngathi uligeza waze uAkishe wamyeka wahamba. (1Sa 21:10-15; Nd 34:Sup; 56:Sup) Xa wabalekela kwilizwe lakhe okwesibini, uDavide wayehamba namadoda ayi-600 neentsapho zawo waza uAkishe wathi mabahlale eTsikelage. UDavide namadoda akhe ahlala apho unyaka oneenyanga ezine ibe bamqhatha uAkishe ukuze acinge bahlasela iidolophu zakwaYuda kodwa babehlasela amaGeshure, amaGirzi nama-Amaleki. (1Sa 27:1-12) UAkishe waqhatheka nyhani wade wenza uDavide ukuba abe ngunogada wakhe xa amaFilisti ayelungiselela ukuyohlasela uKumkani uSawule. Kodwa “iinkosi” zamaFilisti zange ziyivume loo nto ngoko kwafuneka uDavide namadoda akhe abuyele eTsikelage. (1Sa 28:2; 29:1-11) Kubonakala ngathi yena uAkishe zange abulawe xa uDavide waba ngukumkani waza walwa namaGati. Wayesaphila naxa kwakulawula uSolomon.—1Ku 2:39-41; jonga nendawo ethi GATH.
Izinto Abanokuzenza Abazalwana Abasebatsha Ukuze Bathenjwe
8 Nantsi enye ingxaki awayenayo uDavide. Emva kokuba ekhethiwe ukuba abe ngukumkani wakwaYuda, zange abekwe esihlalweni ngoko nangoko, kwafuneka alinde iminyaka emininzi. (1 Sam. 16:13; 2 Sam. 2:3, 4) Yintoni eyamnceda wanomonde okanye wakwazi ukulinda? Akazange atyhafe, wayexakekile esenza izinto awayekwazi ukuzenza. Ngokomzekelo, xa wayebalekele kwilizwe lamaFilisti, wayekhusela ubukumkani bamaYuda ngokulwa neentshaba zamaSirayeli.—1 Sam. 27:1-12.
it-2-E 245 ¶6
Ubuxoki
Nangona ukuthetha ubuxoki kungavunyelwa yiBhayibhile, loo nto ayithethi ukuba umntu unyanzelekile ukuba achaze ulwazi oluyinyani kubantu abangenalungelo lokulufumana. UYesu Kristu wanikela esi siluleko: “Sanukunika izinja izinto ezingcwele, okanye ninike iihagu iiperile zenu, hleze zizinyathele zize zijike zinihlasele.” (Mat 7:6) Yiloo nto ngamanye amaxesha uYesu wayengathethi yonke into okanye aphendule ngokungqalileyo kweminye imibuzo xa loo nto inokwenzakalisa omnye umntu ngokungeyomfuneko. (Mat 15:1-6; 21:23-27; Yoh 7:3-10) Njengoko uAbraham, uIsake, uRahabhi, noElisha bathetha inyani engaphelelanga nelahlekisayo kubantu ababengamkhonzi uYehova, isenzo sabo sifanele sisijonge ngendlela efanayo.—Gen 12:10-19; isahl. 20; 26: 1- 10;Yos 2:1-6; Yak 2:25; 2Ku 6:11-23.
Ubuncwane ObuseBhayibhileni
Ngaba Abafi Banokubanceda Abaphilayo?
Khawuyicingisise le nto. IBhayibhile ithi xa umntu esifa ‘ubuyela emhlabeni wakhe’ yaye “ziyatshabalala iingcamango zakhe.” (INdumiso 146:4) USawule noSamuweli babesazi ukuba uThixo wayengafuni ukuba abantu baye emagqirheni okanye baye kubuzisa kwabaneshologu. Kaloku, ngaphambili uSawule wayetshotshe phambili xa kwakugxothwa abaneshologu kwaSirayeli.—Levitikus 19:31.
Khawuyiqiqe kanje le nto. Ukuba uSamuweli wayephila kwelemimoya, ngaba wayeza kwaphula umthetho kaThixo aze asebenzisane nomntu oneshologu ukuze adibane noSawule? UYehova wayengafuni ukuthetha noSawule. Ngaba igqirha lalinokunyanzela uThixo uSomandla ukuba athethe noSawule esebenzisa uSamuweli owayefile? Unotshe! Kuyacaca ukuba lo “Samuweli” wayengenguye umprofeti kaThixo. Yayiyidemon eyayizenza uSamuweli ofileyo.
MEYI 9-15
UBUTYEBI OBUPHUMA ELIZWINI LIKATHIXO | 1 SAMUWELI 30-31
“Yomelezwa NguYehova UThixo Wakho”
Yoyika UYehova—Uze Wonwabe!
12 Ukoyika uYehova akuzange kumthintele nje uDavide angenzi okuphosakeleyo. Kwamomeleza wajamelana neemeko ezinzima ngobulumko nenkalipho. Kangangonyaka oneenyanga ezine, yena namadoda akhe basaba uSawule baya eTsikelage kwiindawo ezisemaphandleni zamaFilisti. (1 Samuweli 27:5-7) Kwathi ngenye imini amadoda engekho, kwafika abaphangi bama-Amaleki atshisa eso sixeko aza emka nabafazi, abantwana nemfuyo. Bebona loo monakalo, ekubuyeni kwabo uDavide namadoda akhe bakhala. Ngokukhawuleza, loo madoda aba krakra aza athetha ngokumxuluba uDavide. Nakuba wayecinezelekile, uDavide akazange alahle ithemba. (IMizekeliso 24:10) Ukoyika kwakhe uThixo kwamenza wabhenela kuYehova, waza “wazomeleza ngoYehova.” Bencedwa nguThixo, bawasukela bawafumana loo ma-Amaleki baza babuya nayo yonk’ into yabo.—1 Samuweli 30:1-20.
UYehova Usilondolozela Usindiso
14 UDavide wajamelana nezinto ezininzi ezibuhlungu ebomini bakhe. (1 Sam. 30:3-6) Amazwi akhe aphefumlelweyo abonisa ukuba uYehova wayeyazi indlela avakalelwa ngayo. (Funda iNdumiso 34:18; 56:8.) UThixo uyayazi indlela esivakalelwa ngayo. Uyasondela kuthi xa ‘saphuke intliziyo’ okanye ‘sinomoya otyumkileyo.’ Oku kunokusithuthuzela ngokomlinganiselo othile, kanye njengoDavide owacula wathi: “Ndiya kuvuya ndibe nemihlali ngobubele bakho obunothando, ngenxa yokuba uyibonile inkxwaleko yam; ukwazile ukubandezeleka komphefumlo wam.” (INdu. 31:7) Kodwa uYehova akapheleli nje ekuphawuleni intlungu esikuyo. Uyasomeleza ngokusithuthuzela aze asikhuthaze. Ukwenza oku ngeentlanganiso zamaKristu.
Ubuncwane ObuseBhayibhileni
Iimbalasane Zencwadi Yokuqala KaSamuweli
30:23, 24. Esi sigqibo, sisekelwe kwiNumeri 31:27, sibonisa ukuba uYehova uyakholiswa ngabo baxhasa ibandla. Nantoni na esiyenzayo, masiyenze ‘ngomphefumlo uphela ngokungathi siyenzela uYehova, kungekhona abantu.’—Kolose 3:23.
MEYI 16-22
UBUTYEBI OBUPHUMA ELIZWINI LIKATHIXO | 2 SAMUWELI 1-3
Sifunda Ntoni ‘Kwisaphetha’?
Yibani Nembeko Kwabo Banikwe Igunya Phezu Kwenu
9 Ngaba uDavide wayebandezelekile ngoxa wayephathwa kakubi? “Kukho . . . noozwilakhe abafuna umphefumlo wam,” uDavide wakhala kuYehova. (INdumiso 54:3) Waphalaza intliziyo yakhe kuYehova esithi: “Ndihlangule kwiintshaba zam, Thixo wam . . . Abo bomeleleyo bayandihlasela, ndingavukelanga, yaye ndingonanga, Yehova. Nangona kungekho siphoso, bayabaleka bazilungise. Vuka ndakukubiza ubone.” (INdumiso 59:1-4) Ngaba wakha wavakalelwa ngendlela efanayo—kukuba awenzanga siphoso kumntu osegunyeni, ukanti uqhubeka ekukhathaza? UDavide akazange asilele ekuboniseni intlonelo kuSawule. Ekufeni kukaSawule, endaweni yokuba achwayite, uDavide waqamba ingoma yosizi esithi: “USawule noYonatan, abathandekayo nabahle ebudeni bobomi babo . . . Babekhawuleza ngakumbi kuneenkozi, babenamandla ngakumbi kuneengonyama. Nina zintombi zakwaSirayeli, mlileleni uSawule.” (2 Samuweli 1:23, 24) Onjani ukuba mhle umzekelo wentlonelo yokwenene ngomthanjiswa kaYehova, nangona uDavide wayoniwe nguSawule!
Ukungcatsha—Umqondiso Owoyikekayo Wamaxesha!
8 Kwakhona iBhayibhile ithetha ngabantu abaninzi ababenyanisekile. Makhe sithethe ngababini kubo size sibone oko basifundisa kona, siqale ngendoda eyazingqina inyaniseke kuDavide. Kusenokwenzeka ukuba, uYonatan, owayelizibulo likaKumkani uSawule, wayeza kuba yindlalifa kwitrone kaSirayeli, kodwa wawumnye umqobo. UYehova wakhetha uDavide ukuba abe ngukumkani olandelayo wakwaSirayeli. UYonatan wasihlonela isigqibo sikaThixo. Akazange aqhutywe ngumona ajonge uDavide njengotshaba. Kunoko ‘umphefumlo kaYonatan wabophana nomphefumlo kaDavide’ njengoko wayenze umnqophiso wokunyaniseka kuye. Wada wanika uDavide iimpahla zakhe, ikrele, isaphetha nebhanti, ngaloo ndlela emnika uzuko lwasebukhosini. (1 Sam. 18:1-4) UYonatan wenza yonke into awayenokuyenza ‘ukomeleza isandla sikaDavide,’ ukusa kwinqanaba lokuba abeke ubomi bakhe esichengeni ukuze athethelele uDavide kuSawule. Ngokunyaniseka uYonatan wathi kuDavide: “Wena kanye uya kuba ngukumkani phezu koSirayeli, mna ke ndiya kuba ngowesibini kuwe.” (1 Sam. 20:30-34; 23:16, 17) Ayisimangalisi into yokuba, emva kokufa kukaYonatan, uDavide avakalise intlungu nothando awayenalo ngaye ngengoma.—2 Sam. 1:17, 26.
Ubuncwane ObuseBhayibhileni
it-1-E 369 ¶2
Umntakwethu
Igama elithi “mntakwethu” liyasetyenziswa naxa kuthethwa ngabantu abadityaniswe kukwenza izinto benenjongo efanayo. Ngokomzekelo, uKumkani uHiram waseTire wayengathi mntakwethu xa ebiza uKumkani Solomon kuba benezikhundla ezifanayo, kodwa wayesitsho kuba babenenjongo efanayo yokunikeza ngamaplanga omsedare nezinye izinto etempileni. (1Ku 9:13; 5:1-12) “Jonga! Kulungile ibe kuthandeka ngeyona ndlela ukuhlala kwabazalwana kunye bemanyene!” UDavide wabhala esi sibhalo kuba wayezama ukubonisa ukuba nabantu abangazalwa kunye bangahlala kunye ngoxolo bemanyene. (Nd 133:1) Kanti noDavide wathi uYonatan ngumntakwabo, hayi kuba babezalwa kunye, kodwa kuba babethandana ibe bethanda nezinto ezifanayo. (2Sa 1:26) Kuye kuthiwe ‘mntakwethu’ nakwabanye abahlobo abasenokuba nendlela efanayo yokucinga neyokwenza izinto, nangona isenokuba mbi ngelinye ixesha.—IMi 18:9.
MEYI 23-29
UBUTYEBI OBUPHUMA ELIZWINI LIKATHIXO | 2 SAMUWELI 4-6
“Hlala Ukoyika Ngendlela Efanelekileyo Ukwenza Into Angayithandiyo UYehova”
Iimbalasane Zencwadi Yesibini KaSamuweli
6:1-7. Nangona uDavide wayeneenjongo ezintle, ukuthwala iTyeya ngenqwelo kwakungqubana nomthetho kaThixo kwaza kwaphumela kwenkulu intlekele. (Eksodus 25:13, 14; Numeri 4:15, 19; 7:7-9) Ukubamba kukaUza iTyeya aze afe kubonisa ukuba iinjongo ezintle aziguquli nto koko kufunwa nguThixo.
UYehova Usoloko Esenza Okulungileyo
20 Khumbula ukuba u-Uza wayefanele ukuba uyawazi uMthetho. ITyeya yayinxulumene nobukho bukaYehova. UMthetho watsho ngokucacileyo ukuba nabani na ongagunyaziswanga akafanele ayichukumise, yaye watsho ngokucacileyo ukuba nabani na owutyeshelayo wayeya kohlwaywa ngokufa. (Numeri 4:18-20; 7:89) Ngoko ke, ukufuduswa kwaloo bhokisi ingcwele kwakungeyonto efanele ithatyathwe lula. Kubonakala ukuba u-Uza wayengumLevi (nangona wayengenguye umbingeleli), ngoko ke wayefanele ukuba wayewazi uMthetho. Ngapha koko, kwiminyaka ethile ngaphambilana iTyeya yayifuduselwe kwindlu kayise ukuze igcinwe khona. (1 Samuweli 6:20–7:1) Yayihleli apho kangangeminyaka enokuba ngama-70, de uDavide wakhetha ukuyifudusa. Ngoko ke, ukususela ebuntwaneni, kufanele ukuba u-Uza wayeyazi imithetho ephathelele iTyeya.
UYehova Usoloko Esenza Okulungileyo
21 Njengokuba kuchazwe ngaphambilana, uYehova uyakwazi ukubona okusentliziyweni. Ekubeni iLizwi lakhe lisithi okwenziwa ngu-Uza ‘sisenzo sokungamhloneli,’ kusenokwenzeka ukuba uYehova wabona uphawu lokuzingca olungachazwanga ngokungqalileyo kule ngxelo. Ngaba u-Uza wayengumntu okhukhumeleyo, owayeqhele ukugabadela? (IMizekeliso 11:2) Ngaba ukukhokela iTyeya phambi kwabantu eyayigcinwe kokwabo abantu bengazi kwamenza wanekratshi wazibona ebalulekile? (IMizekeliso 8:13) Ngaba u-Uza wayengenalukholo kangangokuba wacinga ukuba uYehova wayengenakukwazi ukuzinzisa ityeya engcwele eyayifuzisela ubukho Bakhe? Enoba imeko yayinjani na, sinokuqiniseka ukuba uYehova wenza okufanelekileyo. Kusenokwenzeka ukuba wabona nto ithile entliziyweni kaUza eyambangela ukuba amgwebe ngelo xesha.—IMizekeliso 21:2.
Ubuncwane ObuseBhayibhileni
Soloko Uwulahlela KuYehova Umthwalo Wakho
UDavide njengokumkani wayemele abekwe ityala ngale nto. Intsabelo yakhe ibonisa ukuba kwanabo banolwalamano oluhle noYehova ngamanye amaxesha banokusabela kakubi kwiimeko ezilingayo. UDavide waqala ngokuba nomsindo. Wandula ke woyika. (2 Samuweli 6:8, 9) Ulwalamano lwakhe lokukholosa ngoYehova lwavavanywa kanobom. Esi yayisisihlandlo ekubonakala ukuba akazange awuphose kuYehova umthwalo wakhe, xa engazange alandele imiyalelo yakhe. Ngaba nathi maxa wambi sisenokuba kuloo meko? Ngaba sikhe simbek’ ityala uYehova ngeengxaki ezibangelwa kukungathobeli imiyalelo yakhe?—IMizekeliso 19:3.
MEYI 30–JUNI 5
UBUTYEBI OBUPHUMA ELIZWINI LIKATHIXO | 2 SAMUWELI 7-8
“UYehova Uthembisa UDavide”
‘Itrone Yakho Iya Kumiselwa Ngokuqinileyo’
UYehova uyayithanda le nto afuna ukuyenza uDavide. Xa ephendula isicelo sikaDavide yaye ezalisekisa isiprofeto, uThixo wenza isivumelwano naye sokuba uya kuvelisa umntu wenzala yakhe oya kulawula ngonaphakade. UNathan uxelela uDavide esi sithembiso sikaYehova: “Nendlu yakho nobukumkani bakho ngokuqinisekileyo buya kuqina ukusa kwixesha elingenammiselo phambi kwakho; netrone yakho kanye iya kumiselwa ngokuqinileyo ukusa kwixesha elingenammiselo.” (iVesi 16) Ngubani le ndlalifa yesi sivumelwano eza kulawula ngonaphakade?—INdumiso 89:20, 29, 34-36.
‘Itrone Yakho Iya Kumiselwa Ngokuqinileyo’
UYesu waseNazarete wayengunyana kaDavide. Ingelosi eyayichaza ngokuzalwa kukaYesu yathi: “UYehova uThixo uya kumnika itrone kaDavide uyise, kwaye uya kulawula njengokumkani phezu kwendlu kaYakobi ngonaphakade, yaye ubukumkani bakhe abuyi kuba nasiphelo.” (Luka 1:32, 33) Isivumelwano esenziwa noDavide sazaliseka kuYesu Kristu. Ngenxa yoko akakhethwanga ngabantu kodwa ulawula ngenxa yesithembiso sikaThixo esimnika igunya lokulawula ngonaphakade. Singalibali kaloku ukuba izithembiso zikaThixo zisoloko zizaliseka.—Isaya 55:10, 11.
Yiba Nokholo Olungagungqiyo KuBukumkani
14 Khawuve ukuba uYehova wamthembisa ntoni uKumkani uDavide wakwaSirayeli esebenzisa umnqophiso kaDavide. (Funda eyesi-2 kaSamuweli 7:12, 16.) UYehova wawenza lo mnqophiso ebudeni bolawulo lukaDavide eYerusalem, emthembisa ukuba uMesiya wayeza kuphuma kwisizukulwana sakhe. (Luka 1:30-33) Ngaloo ndlela, uYehova wasikrobisa ukuba yayiza kuphuma kubani le mbewu waza wamisela ukuba indlalifa ethile kaDavide yayiza kuba ‘nelungelo elisemthethweni’ lokuhlala kwitrone yoBukumkani bukaMesiya. (Hez. 21:25-27) Ekubeni uYesu enguKumkani, ulawulo lukaDavide luza ‘kumiselwa ngokuqinileyo kangangexesha elingenammiselo.’ Imbewu kaDavide “iya kubakho de kuse kwixesha elingenammiselo, netrone yakhe ibe njengelanga.” (INdu. 89:34-37) Ulawulo lukaMesiya alusoze lonakale, ibe luza kwenza izinto eziya kuhlala ngonaphakade!
Ubuncwane ObuseBhayibhileni
it-2-E 206 ¶2
Imihla yokugqibela
Isiprofeto SikaBhileham. Ngaphambi kokuba amaSirayeli angene kwiLizwe Lesithembiso umprofeti uBhileham wathi kukumkani uBhalaki: “Khawuze ndikuxelele into eza kwenziwa sesi sizwana [amaSirayeli] kubantu bakho kwixesha elizayo. . . . Kuza kuphuma inkwenkwezi kwaYakobi, kuvele intonga yobukhosi kwaSirayeli. Yaye nakanjani uza kuliqhekeza ibunzi likaMowabhi namathambo eentloko zoonyana besiphithiphithi.” (Nu 24:14-17) Xa esi siprofeto sasizaliseka okokuqala, kwabonakala ukuba “inkwenkwezi” nguKumkani uDavide owoyisa amaMowabhi. (2Sa 8:2) Ngoko kubonakala ukuba, “ixesha elizayo” ekuthethwa ngalo kwesi siprofeto laqalisa ukuzaliseka xa uDavide waba ngukumkani. Ekubeni izinto ezazisenziwa nguDavide zazimela izinto ezaziza kwenziwa nguYesu, uKumkani onguMesiya, esi siprofeto sinokubhekisela nakuYesu xa eza koyisa iintshaba zakhe.—Isa 9:7; Nd 2:8, 9.
JUNI 6-12
UBUTYEBI OBUPHUMA ELIZWINI LIKATHIXO | 2 SAMUWELI 9-10
“UDavide Wabonisa Uthando Olungagungqiyo”
Ewe, Unako Ukulufumana Ulonwabo
UDavide wabhala: “Unoyolo nabani na onikela ingqalelo kwisisweli; ngomhla wentlekele uYehova uya kumsindisa. UYehova uya kumlinda amgcine ephila. Uya kubhengezwa enoyolo.” (INdumiso 41:1, 2) Uthando olwabonakaliswa nguDavide kuMefibhoshete, unyana owayesisiqhwala womhlobo kaDavide osenyongweni uYonatan, lubonisa isimo sengqondo esifanele sibe naso ngabo basweleyo.—2 Samuweli 9:1-13.
Iimbalasane Zencwadi Yesibini KaSamuweli
9:1, 6, 7. UDavide wasigcina isithembiso sakhe. Nathi simele sizame ukubambelela elizwini lethu.
Banyamezela Ameva Enyameni
10 Kwiminyaka ethile kamva, uKumkani uDavide, ngenxa yokuthanda kwakhe uYonatan, wabonakalisa ububele bothando kuMefibhoshete. UDavide wamnika wonke umhlaba kaSawule waza wamisela umlindi kaSawule uTsibha ukuba anyamekele lo mhlaba. UDavide wathi kuMefibhoshete: ‘Uya kudla isonka rhoqo etafileni yam.’ (2 Samuweli 9:6-10) Alithandabuzeki elokuba ububele bothando bukaDavide babuyintuthuzelo kuMefibhoshete yaye baba luncedo ekudambiseni intlungu yokuba nesiphene kwakhe. Esinjani ukuba sihle sona isifundo! Nathi sifanele sibonakalise ububele kwabo balwisana neliva enyameni.
Ubuncwane ObuseBhayibhileni
it-1-E 266
Iintshebe
Abantu abaninzi baseMpuma, kuquka amaSirayeli, ayejonga iintshebe njengento ebonisa isidima sendoda. Umthetho kaThixo owawusiya kumaSirayeli wawusithi awamele achebe “iituma,” ezibazinwele eziphakathi kwendlebe nemehlo, kunye neentshebe zabo ekugqibeleni. (Lev 19:27; 21:5) Le nto kwakufuneka yenziwe kuba kwabanye abantu ababekhonza izithixo yayiyindlela abakhonza ngayo ukucheba iinwele.
JUNI 13-19
UBUTYEBI OBUPHUMA ELIZWINI LIKATHIXO | 2 SAMUWELI 11-12
“Sukuvumela Iminqweno Engafanelekanga Ikulawule”
Lumka Ungabanjiswa NguSathana
10 Ukubawa kwenza uKumkani uDavide wazilibala izinto awayezinikwe nguYehova. Ezinye zazo bubutyebi, udumo namandla okoyisa iintshaba ezininzi. Wayembulela uYehova ngezinto ‘ezininzi’ amphe zona. (INdu. 40:5) Kwafika ukubawa, wafuna nezinto awayengazinikwanga. Wayenabafazi abaninzi, kodwa warhalela umfazi kaUriya umHiti, uBhatshebha. Walala naye, wammithisa. Yaba mbi kakhulu loo nto. Waphinda wenza embi nakakhulu kunaleyo, wazama ukuba kubulawe u-Uriya. (2 Sam. 11:2-15) Wayecinga ntoni? Inoba wayecinga ukuba uYehova akamboni? Wayeneminyaka ethembekile kuYehova, kodwa wabawa, yaza loo nto yamfaka kwembi ingxaki. Into evuyisayo kukuba ekuhambeni kwexesha wazisola, wabuyela kuYehova. Wavuya kakhulu akuxolelwa nguYehova!—2 Sam. 12:7-13.
Simele Sithobele UYehova
15 UYehova wakhetha uDavide ukuba akhokele intsapho yakhe nalo lonke ilizwe lakwaSirayeli. Kuba wayenguKumkani, uDavide wayenegunya. Ngamanye amaxesha, wayelisebenzisa kakubi igunya lakhe ibe wenza iimpazamo ezinkulu. (2 Sam. 11:14, 15) Kodwa wayemthobela uYehova kuba wavuma xa elungiswa. Wathandaza kuYehova wamxelela indlela azisola ngayo. Wayezimisela nokwenza izinto ezazifunwa nguYehova. (INdu. 51:1-4) Kwakhona, wayethobekile ibe emamela xa ecetyiswa, wayemamela naxa ecetyiswa ngamabhinqa. (1 Sam. 19:11, 12; 25:32, 33) UDavide wafunda kwiimpazamo zakhe kwaza ukukhonza uYehova kwayeyona nto ibalulekileyo kuye.
Isazela Sakho Masiqeqeshwe Yimithetho Nemigaqo KaThixo
7 Akunyanzelekanga ukuba sifunde isifundo ngemiphumo emibi esiyifumana ngenxa yokwaphula imithetho kaThixo. Masifunde kwiimpazamo zabanye abantu ezibhalwe kwiLizwi LikaThixo. IMizekeliso 1:5 ithi: “Umntu osisilumko uya kuphulaphula aze angenise uyalelo olungakumbi.” Olu yalelo, yiyo yonke imiyalelo evela kuThixo, ibe iyodlula lee eminye! Ngokomzekelo, cinga indlela awaba buhlungu ngayo uKumkani uDavide emva kokuba elele noBhatshebha. (2 Sam. 12:7-14) Xa sifunda ngeli bali size sicingisise ngalo sisenokuzibuza: ‘UKumkani uDavide wayenokuyiphepha njani le nto? Ukuba yayindim, ndandiza kukwazi ukubaleka? Ndandiza kubaleka njengoYosefu okanye ndandiza kunikezela njengoDavide?’ (Gen. 39:11-15) Xa sibona imiphumo emibi yesono, sitsho ‘sikuthiye okubi.’
Ubuncwane ObuseBhayibhileni
it-1-E 590 ¶1
UDavide
UYehova wayebukele waza walityhila lonke ihlazo. Ukuba uYehova wayevumele ukuba ityala lika Davide noBhashebha lixoxwe ngabagwebi abangabantu besebenzisa uMthetho kaMoses, bobabini abo benze into embi ngokuthi bakrexeze ngebabebulewe kunye nomntana wabo ongekazalwa. (Dut 5:18; 22:22) Noko ke uYehova walijonga ngokwakhe eli tyala waza wabonisa uDavide inceba ngenxa yesivumelwano soBukumkani (2Sa 7:11-16), ngokunga thandabuzekiyo kuba naye uDavide wabonisa inceba (1Sa 24:4-7; thelekisa uYakobi 2:13) yaye uYehova wakubona ukuguquka kwaba benzi bubi. (Nd 51:1-4) Kodwa abazange basibaleke sonke isohlwayo. Esebenzisa umprofeti uNatan, uYehova wathi: “Ndikuzisela intlekele. Iza kuvela kwalapha kwindlu yakho.”—2Sa 12:1-12.
JUNI 20-26
UBUTYEBI OBUPHUMA ELIZWINI LIKATHIXO | 2 SAMUWELI 13-14
“Ukuzicingela Yedwa Kuka-Amnon Kwabangela Intlekele”
it-1-E 32
UAbhisalom
Ukubulawa kuka-Amnon. Ubuhle bukaTamare udadebo Abhisalom kwenza ubhuti wakhe omdala uAmnon amthande kakhulu. Ukuzigulisa kuka-Amnon kwabangela ukuba kucelwe uTamare ukuba ayokumphekela kwindawo ahlala kuyo, yaye wamnyanzela ukuba alale naye. Iimvakalelo zesini uAmnon awayenazo zajika waze wamcaphukela uTamare wamgxothela ngaphandle. UTamare wadibana noAbhisalom ekrazule umwunduzo wakhe okhethekileyo owawumenza abonakale ukuba uyintombi kakumkani engazange yalala nandoda ibe wayezigalele nothuthu entloko. Wakhawuleza wayibona le nto waza wambuza uba nguAmnon na lo umenze le nto, esenza kucace ukuba ngumntakwabo owayemncwasile. UAbhisalom wathi kudadewabo angayithethi le nto, waza wamthatha ukuba ayokuhlala naye.—2Sa 13:1-20.
Unokwenza Njani Ukuze Ukwazi Ukuzibamba?
11 IBhayibhile inemizekelo yabantu aboyisakalayo ukuzibamba xa belingelwa ukuba babelane ngesondo. Isixelela nangemiphumo ebuhlungu ebangelwa kukungakwazi ukuzibamba. Nabani na okwimeko efana nekaKim uya kuba wenza kakuhle xa ecingisisa ngomfana ongenamava ochazwe kwiMizekeliso isahluko 7. Usenokucinga nangento eyenziwa nguAmnon kunye nemiphumo emibi awayifumanayo. (2 Sam. 13:1, 2, 10-15, 28-32) Abazali banokubanceda abantwana babo bakwazi ukuzibamba baze babe nobulumko xa kufikwa kumba wokuthandana, ngokuxubusha nabo ezi Zibhalo zichazwe ngasentla kunqulo lwentsapho.
it-1-E 33 ¶1
UAbhisalom
Kwagqitha iminyaka emibini. Kwafika ixesha lombhiyozo wokuchetywa kweegusha, yaye uAbhisalom walungiselela isidlo eBhali-hatsore ekwiikhilomitha eziyi-22 eMntla Mpuma kwaseYerusalem, wamema bonke oonyana bakakumkani kunye noDavide ukumkani. Xa utata wakhe engazange avume ukuhamba, uAbhisalom wamcenga ukuba athumele uAmnon, unyana wakhe omdala endaweni yakhe. (IMi 10:18) UAbhisalom wathi kwizicaka zakhe “xa intliziyo ka-Amnon ivuyiswa yiwayini,” esidlweni nimele nimbulale. Abanye oonyana babuyela eYerusalem, yaye uAbhisalom waya ekuthinjweni kunye notatomkhulu wakhe ongumSiriya kubukumkani baseGeshure kwiMpuma yoLwandle lwaseGalili. (2Sa 13:23-38) “Ikrele” elalichazwe ngumprofeti uNatan lalifikile “endlini” kaDavide yaye laliza kuqhubeka likho ubomi bakhe bonke.—2Sa 12:10.
Ubuncwane ObuseBhayibhileni
g04 12/22 8-9
Obona Buhle Bubalulekileyo
Khawuthelekise lo mzekelo noka-Abhisalom, omnye woonyana bakaDavide. Nakuba wayemhle ngembonakalo, wayengathandeki. IBhayibhile ithi ngaye: “Ke kaloku xa kuthelekiswa noAbhisalom kwakungekho ndoda intle kangako kuSirayeli wonke enokuze idunyiswe kakhulu. Ukususela entendeni yonyawo lwakhe kuse elukakayini lwentloko yakhe kwakungekho siphene kuye.” (2 Samuweli 14:25) Noko ke, amabhongo ka-Abhisalom ambangela ukuba avukele uyise aze ambhukuqe esihlalweni sobukhosi. Wada walala namashweshwe kayise. Ngenxa yoko, uAbhisalom waxhokonxa ingqumbo kaThixo waza wafa kabuhlungu.—2 Samuweli 15:10-14; 16:13-22; 17:14; 18:9, 15
Ngaba uziva utsalelekile kuAbhisalom? Ngokuqinisekileyo akunjalo. Lilonke wayenezothe. Ubuhle bakhe obubalaseleyo abuzange bumenze axoleleke ngekratshi awayenalo nokunganyaniseki kwakhe yaye abuzange bumkhusele kwintshabalalo. Ukanti kwelinye icala, iBhayibhile inemizekelo emininzi yabantu ababezizilumko nababethandeka, ekungathethwa nto ngembonakalo yabo yangaphandle. Licacile elokuba eyona nto yayibalulekile bubuhle babo bangaphakathi.
JUNI 27–JULAYI 3
UBUTYEBI OBUPHUMA ELIZWINI LIKATHIXO | 2 SAMUWELI 15-17
“UAbhisalom Wavukela Ngenxa Yekratshi”
it-1-E 860
Imbaleki
Kwakuyinto eqhelekileyo eAsia ukuba iimbaleki zibaleke phambi kwenqwelo yasebukhosini ukuze zenze isaziso sokuba ukumkani uyeza zize zimncedise ngezinto afuna ukuzenzelwa. (1Sa 8:11) UAbhisalom noAdoniya bathumela iimbaleki eziyi-50 phambi kweenqwelo zabo ukuze nabo bahlonitshwe baze bazukiswe kakhulu kunakuqala, ukuze abantu ababebavukela nabo baboyike.—2Sa 15:1; 1Ku 1:5; jonga indawo ethi RUNNERS.
Khonza UThixo Wenkululeko
5 IBhayibhile inemizekelo emininzi yabantu ababenempembelelo embi kwabanye. Omnye waloo mizekelo nguAbhisalom, unyana kaKumkani uDavide. UAbhisalom wayeyinzwana. Noko ke, njengoSathana wathi ngokuhamba kwexesha wavumela ukunyoluka kuzalise intliziyo yakhe waza wabawela ulawulo lukayise awayengenalungelo lakulufumana. Ezama ukubhukuqa uyise, ngobuqili uAbhisalom wazenza ngathi uwaxhalabele amanye amaSirayeli ngoxa ngobuqhetseba esenza ngathi inkundla kakumkani ayibaxhalabelanga. Kanye njengoMtyholi kumyezo wase-Eden, uAbhisalom wenza ngathi unceda abantu ngoxa ngenkohlakalo esenzakalisa uyise omzalayo.—2 Sam. 15:1-5.
it-1-E 1083-1084
EHebron
Kwiminyaka eyalandelayo uAbhisalom wabuyela eHebron apho angazange aphumelele ekuthatheni ubukumkani bukatata wakhe. (2Sa 15:7-10) UAbhisalom waqalisa iphulo lakhe lokufuna ukuba ngukumkani kwesi sixeko kuba iHebron yayibalulekile kwimbali kuba yayisisixeko sakwaYuda, yaye kulapho wayezalelwe khona. Ekuhambeni kwexesha, umzukulwana kaDavide ukumkani uRehobhoham waphinda wayakha iHebron. (2Kr 11:5-10) Emva kokuba uYuda etshatyalaliswe ngamaBhabhiloni yaye amanye amaYuda ebuye ekuthinjweni, abanye bahlala eHebron (eKiriyati-arbha).—Neh 11:25.
Ubuncwane ObuseBhayibhileni
Ngaba Uzazi Zonke Iinkcukacha?
Nathi kusenokungenziwa ubulungisa kuthi ngenxa yenyaniso okanye inkcazelo engaphelelanga esasazwayo ngathi. Masenze umzekelo ngento eyenzeka kuKumkani uDavide noMefibhoshete. UDavide waba nobubele kuMefibhoshete, wambuyisela yonke imihlaba katatomkhulu wakhe uSawule. (2 Sam. 9:6, 7) Kodwa ekuhambeni kwexesha, uDavide weva into embi ngoMefibhoshete. Akazange afune ukuyiqonda ukuba yinyani na loo nto, wagqiba ukuba alithathe lonke ilifa lakhe. (2 Sam. 16:1-4) Xa wade wathetha noMefibhoshete, uDavide wabona ukuba wenze impazamo waza wambuyisela eminye yemihlaba yakhe. (2 Sam. 19:24-29) Ngeyingazange yenzeke yonke le nto ukuba uDavide wayeqale wafuna ukuqonda into eyenzekileyo.