“Musa Ukoyika. Mna Ngokwam Ndiza Kukunceda”

UYESU walumkisa abalandeli bakhe wathi: “UMtyholi uya kuhlala ephosa bambi benu entolongweni ukuze nivavanywe ngokupheleleyo.” Noko ke, ngaphambi kweso silumkiso, uYesu wathi: “Musa ukuzoyika izinto osele uza kubandezeleka ngazo.” Ekubeni uSathana eqhubeka esebenzisa isisongelo sokuphosa abantu abashumayela ngoBukumkani entolongweni ukuze ayekise lo msebenzi, sinokulindela ukuba abanye oorhulumente batshutshise amaKristu okwenyaniso. (ISityhi. 2:10; 12:17) Ngoko, yintoni eya kusinceda siwaxhobele amaqhinga kaSathana size ‘singoyiki,’ njengoko uYesu wasibongozayo?

Kakade ke, phantse sonke sikhe sibe nalo uloyiko. Sekunjalo, iLizwi likaThixo liyasiqinisekisa ukuba uYehova unokusinceda singoyiki. Njani? Enye indlela uYehova asinceda ngayo sikwazi ukujamelana nenkcaso, kukusibonisa amaqhinga asetyenziswa nguSathana namahlakani akhe. (2 Kor. 2:11) Ukuze sibone umzekelo woko, makhe sihlolisise isiganeko esenzeka ngamaxesha okubhalwa kweBhayibhile. Siza kuqwalasela nemizekelo yale mihla yamanye amaKristu athembekileyo ‘awema eqinile nxamnye namaqhinga kaMtyholi.’—Efe. 6:11-13.

Ukumkani Owoyik’ UThixo Uma Phambi Komlawuli Okhohlakeleyo

Ngenkulungwane yesibhozo ngaphambi kweXesha Eliqhelekileyo, uKumkani uSenaribhe okhohlakeleyo waseAsiriya woyisa iintlanga ezahlukahlukeneyo emfazweni. Ngenxa yoku, wazithemba waza wafuna ukuhlasela abantu bakaYehova nesixeko sabo esikhulu, iYerusalem, apho uHezekiya owoyika uThixo wayelawula khona njengokumkani. (2 Kum. 18:1-3, 13) Ngokuqinisekileyo, uSathana waxhakamfula eli thuba, waza waphembelela uSenaribhe ukuba afeze iinjongo zakhe ukuze kupheliswe unqulo lokwenyaniso emhlabeni.—Gen. 3:15.

USenaribhe wathumela igqiza eYerusalem ukuba liyalele ukumkani walapho ukuba anikezele. Omnye wabantu ababethunywe apho yayinguRabheshake, owayesisithethi esiphambili sikakumkani.a (2 Kum. 18:17) Injongo ephambili kaRabheshake yayikukwenza amaYuda angenwe yintaka aze angabi salwa. Ngawaphi amacebo awawazamayo uRabheshake ukuze oyikise amaYuda?

Ukuthembeka Nangona Benziwe Amakheswa

URabheshake wathi kubameli bakaHezekiya: “Utsho ukumkani omkhulu, ukumkani waseAsiriya ukuthi: ‘Uthembele ngantoni na? . . . Khangela! ukholose ngenkxaso yale ngcongolo ityumkileyo, iYiputa, leyo, ukuba umntu unokuxhathisa ngayo, ngokuqinisekileyo ingangena entendeni yakhe ize iyihlabe.’” (2 Kum. 18:19, 21) Izityholo zikaRabheshake zazibubuxoki kuba uHezekiya wayengenzanga sivumelwano neYiputa. Sekunjalo, isityholo sikaRabheshake sasibonisa ukuba eyona nto wayefuna amaYuda ayicinge yile: ‘Akukho mntu uza kuninceda. Niza kuzibonela—ningamakheswa.’

Kwiminyaka yakutshanje, abachasi bonqulo oluyinyaniso baye basebenzisa isisongelo esifanayo ukuze boyikise amaKristu okwenyaniso. Omnye udade ongumKristu, owavalelwa entolongweni ngenxa yokholo lwakhe waza wahlukaniswa namanye amaKristu kangangeminyaka, kamva wachaza oko kwamncedayo ukuze angoyiki. Wathi: “Umthandazo wandinceda ndasondela kuYehova . . . Ndakhumbula amazwi akuIsaya 66:2 athi uThixo uyamkhangela ‘lowo uxhwalekileyo nokhathazekileyo emoyeni.’ Oku kwandomeleza kwaza kwandithuthuzela.” Nomnye umzalwana owayevalelwe yedwa esiseleni kangangeminyaka emininzi wathi: “Ndaphawula ukuba xa unolwalamano olusondeleyo noThixo unokuziva ukhululekile nangona uvalelwe kwisisele esincinane.” Nangona la maKristu mabini ayenziwe amakheswa, akwazi ukunyamezela ngenxa yokuba nolwalamano olusondeleyo noYehova. (INdu. 9:9, 10) Abo babetshutshisa la maNgqina ayevalelwe entolongweni babenokukwazi ukuwahlukanisa neentsapho, abahlobo namanye amakholwa, kodwa wona ayesazi ukuba babengenakuwahlukanisa noYehova.—Roma 8:35-39.

Ngoko kubalulekile ukuba sisebenzise onke amathuba ukuze siqinise ulwalamano lwethu noYehova! (Yak. 4:8) Ngalo lonke ixesha sifanele sizibuze: ‘Ngaba uYehova ungumntu wokwenene kum? Ngaba ndiphenjelelwa lilizwi lakhe yonke imihla xa ndisenza izigqibo ezincinane nezikhulu?’ (Luka 16:10) Ukuba senza umgudu wokuhlala sinolwalamano olusondeleyo noThixo, asinasizathu sakoyika. Ethethela amaYuda axhwalekileyo, umprofeti uYeremiya wathi: “Ndimemeze igama lakho, Yehova, ndisenzulwini yomhadi . . . Usondele ngemini yokuqhubeka kwam ndikubiza. Uthe: ‘Musa ukoyika.’”—IZili. 3:55-57.

Ukukatya Kwelinge Lokufaka Amathandabuzo

URabheshake wasebenzisa amaqhinga ukuze abantu babe namathandabuzo. Wathi: “Asinguye na [uYehova] lowo uHezekiya ashenxise iindawo zakhe eziphakamileyo nezibingelelo zakhe? . . . UYehova uthe kum, ‘Nyuka nxamnye neli lizwe, uze ulonakalise.’” (2 Kum. 18:22, 25) Ngoko uRabheshake wayesithi uYehova akazukubalwela abantu bakhe kuba akakholiswa ngabo. Kodwa kwakungenjalo. UYehova wayekholiswa nguHezekiya nangamaYuda awayebuyele kunqulo lokwenyaniso.—2 Kum. 18:3-7.

Namhlanje, abatshutshisi basenokuqala bathethe izinto eziyinyaniso kuba befuna sibathembe, baze bayingxenge loo nyaniso ngobuxoki ukuze basenze sibe namathandabuzo. Ngokomzekelo, abazalwana noodade abavalelwe entolongweni maxa wambi baye baxelelwe ukuba umzalwana okhokelayo kwilizwe abahlala kulo uye walalanisa yaye akunakuba yinto ephosakeleyo nangabo ukukhanyela ukholo lwabo. Noko ke, amaKristu anengqiqo akakhohliswa ngaloo maqhinga.

Cinga ngento eyenzeka komnye udade ongumKristu ngeMfazwe Yehlabathi II. Xa wayevalelwe entolongweni, waboniswa amaxwebhu abonisa ukuba umzalwana okhokelayo ulukhanyele ukholo. Umtshutshisi wambuza ukuba uyalithemba na elo Ngqina. Lo dade wathi, “Akafezekanga.” Wongezelela wathi uThixo ebemsebenzisa ngoxa ebelandela imigaqo yeBhayibhile. “Kodwa ngoku njengokuba ethetha izinto ezichasene neBhayibhile, akasenguye umzalwana wam.” Lo dade uthembekileyo wasebenzisa isiluleko seBhayibhile esithi: “Musani ukukholosa ngezidwangube, nangonyana womntu wasemhlabeni, lowo ungenalo usindiso.”—INdu. 146:3.

Xa sinolwazi oluchanileyo lweLizwi likaThixo size sithobele isiluleko esikulo siya kukwazi ukukuphepha ukuqiqa ngendlela ephosakeleyo nenokusithez’ amandla. (Efe. 4:13, 14; Heb. 6:19) Ngenxa yoko, ukuze sikwazi ukwenza izigqibo xa sijamelene nezilingo, kufuneka sifunde iBhayibhile yonke imihla size senze nofundisiso lobuqu. (Heb. 4:12) Sifanele singenise ulwazi yaye siqinise ukholo lwethu ngoku. Omnye umzalwana owayevalelwe yedwa esiseleni wathi: “Ndithanda ukukhuthaza wonke umntu ukuba abonise uxabiso ngako konke ukutya kokomoya esikufumanayo, kuba kuya kusinceda ngenye imini.” Eneneni ukuba ngoku silifundisisa ngenyameko iLizwi likaThixo neempapasho esizilungiselelwe ludidi lwekhoboka, xa kufika amaxesha anzima, umoya oyingcwele uya ‘kusikhumbuza’ zonke izinto esizifundileyo.—Yoh. 14:26.

Uyasikhusela Ukuze Singoyiki

URabheshake wazama ukuwoyikisa amaYuda. Wathi: “Khawuncede ubheje nenkosi yam ukumkani waseAsiriya, ndokunika amawaka amabini amahashe ndibone enoba wena unganako na ukubeka abakhweli kuwo. Wothini na ngoko, ukubujika ubuso berhuluneli yoyena mkhonzi mncinane wenkosi yam?” (2 Kum. 18:23, 24) Ngokwembono yabantu, uHezekiya nabantu bakhe babengenakumelana nomkhosi wama-Asiriya owawunamandla.

Abatshutshisi basenokubonakala benamandla ingakumbi xa bexhaswa nguRhulumente. Kwakunjalo ngabatshutshisi abangamaNazi ngeMfazwe Yehlabathi II. Bazama ukoyikisa abakhonzi bakaThixo abaninzi. Omnye umzalwana owavalelwa iminyaka emininzi entolongweni wachaza indlela awayesongelwa ngayo. Ngesinye isihlandlo ipolisa lambuza: “Uyibonile indlela adutyulwe ngayo umninawa wakho? Ikuxelela ntoni wena loo nto?” Waphendula wathi: “NdiliNgqina likaYehova yaye ndiya kuhlala ndililo.” Eli polisa lamsongela lathi: “Nguwe olandelayo.” Sekunjalo, lo mzalwana wama eqinile, lwaza utshaba lwanikezela. Yintoni eyamnceda ukuba ahlale eqinile? Uthi: “Ndathembela ngoYehova.”—IMize. 18:10.

Xa sikholose ngoYehova ngokupheleleyo, kuba ngathi siphethe ikhaka elikhulu elisikhusela kuzo zonke izinto ezenziwa nguSathana ukuze asenzakalise ngokomoya. (Efe. 6:16) Ngenxa yoko simele sithandaze kuYehova simcele ukuba asincede sibe nokholo olomeleleyo. (Luka 17:5) Sikwafanele sisebenzise onke amalungiselelo esiwafumana kudidi lomkhonzi othembekileyo okomeleza ukholo lwethu. Xa sisongelwa, kuyasomeleza ukucinga ngesiqinisekiso uYehova awasinika umprofeti uHezekile, owayefanele adlulisele isigidimi kubantu abaneenkani. UYehova wathi kuye: “Ndibenze ubuso bakho balukhuni kanye njengobuso babo nebunzi lakho lalukhuni kanye njengamabunzi abo. Njengedayimani, ndilenze laba lukhuni ngaphezu kwelitye leqhwitha ibunzi lakho.” (Hez. 3:8, 9) NjengoHezekile, nathi uYehova unokusenza sibe lukhuni njengedayimani.

Ukuxhathisa Izilingo

Abatshutshisi baye bafumanisa ukuba xa yonke imizamo isiwa phantsi, banokuthembisa umntu izinto ezintle ukuze alahle ingqibelelo yakhe. NoRabheshake walisebenzisa eli qhinga. Wathi kwabo babeseYerusalem: “Utsho ukumkani waseAsiriya ukuthi: ‘Nikezela kum, uze kum . . . ndide ndifike ndinithabathele kwilizwe elinjengelizwe lenu, ilizwe lokudla okuziinkozo newayini entsha, ilizwe lesonka nezidiliya, ilizwe leminquma nobusi; nize niqhubeke niphila ningafi.’” (2 Kum. 18:31, 32) Isithembiso sokufumana isonka nokusela iwayini entsha, simele ukuba saba nomtsalane kwabo bantu beso sixeko sasirhangqiwe!

Eli qhinga lakhe lasetyenziswa ukuze kulukuhlwe omnye umthunywa wevangeli owayevalelwe entolongweni. Waxelelwa ukuba uza kukhutshwa apho asiwe “kwindlu entle nenegadi entle” kangangeenyanga ezintandathu ukuze akwazi ukucingisisa kakuhle. Noko ke, lo mzalwana wahlala ethembekile yaye akazange alalanise kwimigaqo yamaKristu. Wancedwa yintoni? Kamva waphendula wathi: “Ndandicinga ngoBukumkani njengento yokwenene. . . . Ukwazi ngoBukumkani bukaThixo, ukuqiniseka ngabo ndize ndingabuthandabuzi nakancinane, kwandinceda ndangagungqi.”

Ngaba uBukumkani bukaThixo sibugqala njengento yokwenene? Usolusapho uAbraham, umpostile uPawulos noYesu, bakwazi ukunyamezela izilingo kuba babegqala uBukumkani njengento yokwenene. (Fil. 3:13, 14; Heb. 11:8-10; 12:2) Ukuba siqhubeka sibeka kuqala uBukumkani ebomini bethu size sikhumbule iintsikelelo obuza kuza nazo, nathi sinokuxhathisa izilingo size singazamkeli izithembiso ezizisa isiqabu sokwexeshana.—2 Kor. 4:16-18.

UYehova Akasokuze Asishiye

Nangona uRabheshake wenza imizamo ukuze oyikise amaYuda, uHezekiya nabantu bakhe bathembela kuYehova ngokupheleleyo. (2 Kum. 19:15, 19; Isa. 37:5-7) UYehova wayiphendula imithandazo yabo ngokuthumela ingelosi ukuba ibulale amajoni ali-185 000 enkampini yama-Asiriya ngobusuku obunye. Ngosuku olulandelayo, uSenaribhe wabuyela eNineve edanile ehamba neqaqobana lamajoni awayesele.—2 Kum. 19:35, 36.

Kucacile ukuba, uYehova akazange abashiye abo bathembele kuye. Imizekelo yanamhlanje yabazalwana noodade abema beqinile nangona babejamelene nezilingo, ibonisa ukuba uYehova akatshintshanga. Kungenxa yoko le nto uBawo wethu wasezulwini esiqinisekisa ngala mazwi: “Mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’”—Isa. 41:13.

[Umbhalo osemazantsi]

[Amagama acatshulweyo akwiphepha 13]

Izihlandlo ezingaphezu kwama-30 kwiLizwi lakhe, uYehova uthi kubakhonzi bakhe: ‘Musani ukoyika’

[Umfanekiso okwiphepha 12]

Amaqhinga kaRabheshake afana njani nalawo asetyenziswa ziintshaba zabantu bakaThixo namhlanje?

[Imifanekiso ekwiphepha 15]

Xa sinolwalamano olusondeleyo noYehova siya kukwazi ukugcina ingqibelelo yethu naxa silingwa