Indlela Onokwenza Ngayo Izigqibo Ezilungileyo
INKULULEKO yokuzikhethela sisipho esivela kuThixo. Ngaphandle kwayo besiya kuphantse sifane neerobhothi, singakwazi ukulawula izenzo zethu. Noko ke, ngenxa yale nkululeko, sijamelana nocelomngeni. Njengoko sinale nkululeko yokuzikhethela, ubomi bethu bonke simele senze izigqibo.
Kambe ke, izigqibo ezininzi zilula. Ezinye ezinjengomsebenzi esifuna ukuwenza okanye ukuba sitshate nokuba singatshati zinokuchaphazela ikamva lethu. Sekunjalo ezinye zichaphazela nabanye abantu. Ezinye izigqibo ezenziwa ngabazali ziyabachaphazela kakhulu abantwana babo. Ukongezelela, sifanele siziphendulele kuThixo ngezigqibo ezininzi esizenzayo.—Roma 14:12.
Imfuneko Yoncedo
Abantu abanangxelo intle kangako xa kusiziwa kumbandela wokwenza izigqibo. Esinye sezigqibo zokuqala ezenziwa ngumntu esibhaliweyo saphumela kwintlekele. UEva wagqiba kwelokuba atye isiqhamo uThixo awayelikhuphe latsola elokuba bangasityi. Ukhetho lwakhe, olusekelwe kwiminqweno yokwanelisa isiqu sakhe, lwakhokelela ekubeni umyeni wakhe amthelele ekungamthobelini uThixo, yaye umphumo waba kukubandezeleka okukhulu kwalo lonke uluntu. Kwiimeko ezininzi, abantu benza izigqibo ezisekelwe kulwaneliseko lobuqu kunokuba zisekelwe kwimigaqo elungileyo. (Genesis 3:6-19; Yeremiya 17:9) Yaye xa sisenza izigqibo ezibalulekileyo, sisoloko sikuqonda ukusikelwa kwethu umda.
Akumangalisi ke ngoko ukuba, xa lusenza izigqibo ezinzulu, uninzi lufuna uncedo kwimithombo engaphezulu kuneyabantu. IBhayibhile inengxelo yaxa uNebhukadenetsare, owayephakathi edabini, kwafuneka ukuba enze isigqibo. Nangona wayengukumkani, wavakalelwa kukuba ufanele “abhenele ekuvumiseni,” anxibelelane nemimoya. Ngoko, ingxelo ithi: “Uhlukuhle iintolo. Ubuze ngemilonde-khaya; ukhangele esibindini.” (Hezekile 21:21) Nanamhlanje, abaninzi baya kubaxeli-thamsanqa nabavumisi ngeenkwenkwezi baze bafune uncedo kwimimoya ngezinye iindlela. Kodwa ezi ndlela zezobuqhophololo yaye ziyalahlekisa.—Levitikus 19:31.
Ukho Othembekileyo ngokugqibeleleyo noye wathi ukutyhubela imbali wanceda abantu benza izigqibo zobulumko. Akakho omnye ngaphandle koYehova uThixo. Ngokomzekelo, kumaxesha amandulo, uThixo wanika uhlanga lwakhe, amaSirayeli, iUrim neTumim—ekubonakala ukuba ezi zinto zazingcwele yaye zazisetyenziswa xa uhlanga lujamelene nemibandela ebaluleke gqitha. Esebenzisa iUrim neTumim, uYehova wayenikela iimpendulo ezingqalileyo kwimibuzo aze ancede amadoda amakhulu akwaSirayeli ukuba aqiniseke ukuba izigqibo zawo ziyavumelana nokuthanda kwakhe.—Eksodus 28:30; Levitikus 8:8; Numeri 27:21.
Khawucinge ngomnye umzekelo. Xa uGidiyon wabizwa ukuba aye kukhokela imikhosi yamaSirayeli xa yayisilwa namaMidiyan, kwafuneka enze isigqibo enoba alithabathe kusini na elo lungelo likhethekileyo. Efuna ukuqiniseka ukuba uYehova uza kumxhasa, uGidiyon wacela umqondiso ongummangaliso. Wathandazela ukuba uboya obushiywe phandle ebusuku bumanziswe ngumbethe kodwa wona umhlaba obubekwe kuwo wome. Kubusuku obulandelayo wacela ukuba uboya bome ngoxa umhlaba obubekwe kuwo umele umanziswe ngumbethe. Ngobubele uYehova wayenza yonke imiqondiso eyayicelwa nguGidiyon. Ngenxa yoko, uGidiyon wenza isigqibo esilungileyo, yaye exhaswa nguThixo, wazoyisa ngokupheleleyo iintshaba zikaSirayeli.—ABagwebi 6:33-40; 7:21, 22.
Kuthekani Ngomhla Wethu?
Nanamhlanje, uYehova uyabanceda abakhonzi bakhe xa kufuneka benze izigqibo ezibalulekileyo. Njani? Ngaba njengoGidiyon simele sifune umqondiso ‘woboya,’ ovela kuYehova ukuze asibonise inyathelo esimele silithabathe? Esinye isibini sasingaqinisekanga enoba siye kukhonza apho kwakukho imfuneko enkulu yabavakalisi boBukumkani kusini na. Ukuze sincedakale senze isigqibo, salungiselela ukwenza uvavanyo. Salungiselela ukuthengisa indlu yaso ngexabiso elithile. Ukuba le ndlu iye yathengwa ngomhla othile ngexabiso esigqibe ngalo okanye ngaphezulu, sasiza kukuthabatha oko njengomqondiso wokuba uThixo ufuna sifuduke. Ukuba indlu ayithengwa, sasiza kugqiba kwelokuba uThixo akafuni sihambe.
Indlu ayizange ithengwe. Ngaba lo yayingumqondiso wokuba uYehova akafuni ukuba esi sibini sikhonze apho kukho imfuneko enkulu khona? Eneneni, ibiya kuba kukuzikhukhumalisa ukuzibala ngokweenkcukacha izinto uYehova abenzela zona nangabenzeli zona abakhonzi bakhe. Asinako ukuthi uYehova akangeneleli ukuze asibonise oko afuna sikwenze. (Isaya 59:1) Noko ke, asinalo ilungelo lokulindela ukuba angenelele xa sisenza izigqibo ezibalulekileyo, ngaloo ndlela sinike uThixo uxanduva lokuba asenzele izigqibo. Kaloku, kwinxalenye enkulu yobomi bakhe naye uGidiyon kwakumele enze izigqibo ngaphandle kommangaliso ovela kuYehova!
Sekunjalo, iBhayibhile ithi sinokulufumana ulwalathiso oluvela kuThixo. Yakuxela kwangaphambili oko kuya kwenzeka ngexesha lethu isithi: “Neendlebe zakho ziya kuva ilizwi emva kwakho lisithi: ‘Nantsi indlela. Hambani ngayo,’ nokuba nisinga ekunene, nokuba nisinga ekhohlo.” (Isaya 30:21) Xa simele senze ukhetho olubalulekileyo, kokona kulungileyo ukuba siqiniseke ukuba izigqibo esizenzayo ziyavumelana nokuthanda kukaThixo yaye zibonisa ubulumko bakhe obuphakamileyo. Njani? Ngokujonga kwiLizwi lakhe nokulivumela ukuba libe ‘sisibane ezinyaweni zethu, nokukhanya endleleni yethu.’ (INdumiso 119:105; IMizekeliso 2:1-6) Ukuze sikwazi ukwenza oku, sifanele sihlakulele umkhwa wokungenisa ulwazi oluchanileyo lweBhayibhile. (Kolose 1:9, 10) Yaye xa simele senze isigqibo, simele senze uphando ngayo yonke imigaqo yeBhayibhile ephathelele loo mbandela. Uphando olunjalo luya kusinceda ‘siqiniseke ngezinto ezibaluleke ngakumbi.’—Filipi 1:9, 10.
Sikwamele sithethe noYehova ngomthandazo, siqinisekile ukuba uya kusiphulaphula. Enjani intuthuzelo ekuyiyo ukucacisela uThixo wethu onothando isigqibo esimele sisenze kunye neendlela esicinga ukubhenela kuzo! Sinokwandula ke sicele ulwalathiso lwakhe ukuze senze isigqibo esifanelekileyo. Ngokufuthi, umoya oyingcwele uya kusikhumbuza imigaqo yeBhayibhile ephathelele loo mbandela, okanye usincede sisiqonde ngakumbi isibhalo esiphathelele imeko yethu.—Yakobi 1:5, 6.
Kwakhona uYehova wenze ilungiselelo lokuba kubekho abo baqolileyo ebandleni esinokuxubusha nabo izigqibo esizenzileyo. (Efese 4:11, 12) Noko ke, xa sibuza kwabanye, asimele silandele ikhondo labo babuza wonke umntu de ekugqibeleni bafumane umntu oza kubaxelela loo nto bafuna ukuyiva. Bandule ke balandele icebiso lakhe. Kwakhona simele sikhumbule umzekelo osisilumkiso kaRehobhoham. Xa kwafuneka enze isigqibo esibalulekileyo, wafumana icebiso elihle kumadoda amakhulu awayekhonze noyise. Noko ke, kunokuba alandele icebiso lawo, wabuza kubafana abaselula akhule nabo. Elandela icebiso labo, wenza isigqibo sobuyatha waza walahlekelwa yinxalenye enkulu yobukumkani bakhe.—1 Kumkani 12:1-17.
Xa ufuna icebiso, lifune kwabo banamava ngobomi yaye abanolwazi oluphangaleleyo ngeZibhalo yaye abayihlonela ngokunzulu imigaqo elungileyo. (IMizekeliso 1:5; 11:14; 13:20) Ukuba kunokwenzeka, thabatha ixesha ucamngca ngemigaqo ebandakanyekileyo nangolwazi oye waluqokelela. Njengoko uzibona ngokukhanya kweLizwi likaYehova izinto, siya kuzicacela isigqibo esilungileyo omele usenze.—Filipi 4:6, 7.
Izigqibo Esizenzayo
Kulula ukwenza ezinye izigqibo. Xa bayalelwa ukuba bayeke ukushumayela, abapostile babesazi ukuba bamele baqhubeke beshumayela ngoYesu, yaye ngokukhawuleza bayixelela iSanhedrin ngesigqibo sabo sokuthobela uThixo kunabantu. (IZenzo 5:28, 29) Ezinye izigqibo kunokufuneka sicingisise ngazo ngenxa yokuba kungekho lwalathiso lweBhayibhile lungqalileyo luphathelele zona. Sekunjalo, imigaqo yeBhayibhile iya kunikela ukukhanya okuyimfuneko ngezigqibo ezizezona zilungileyo sinokuzenza. Ngokomzekelo, nangona iindlela zokuzonwabisa ezikhoyo namhlanje zazingekho ngexesha likaYesu, kukho iingxelo ezicacileyo zeBhayibhile ngoko kumkholisayo uYehova noko kungamkholisiyo. Ngoko, nawuphi na umKristu obandakanyeka ekuzonwabiseni okukhuthaza ugonyamelo, ukuziphatha okubi okanye imvukelo wenze isigqibo esiphosakeleyo.—INdumiso 97:10; Yohane 3:19-21; Galati 5:19-23; Efese 5:3-5.
Maxa wambi, izigqibo ezibini zisenokuba zilungile zombini. Ukukhonza apho kukho imfuneko enkulu lilungelo elikhethekileyo yaye linokubangela ukuba sifumane iintsikelelo ezingakumbi. Kodwa ukuba ngesizathu esithile umntu ugqiba kwelokuba angenjinjalo, usenokuqhubeka esenza umsebenzi omhle kwibandla lakhe lasekuhlaleni. Ngamathub’ athile, sinokujamelana nesigqibo esiya kusinika ithuba lokuba sibonakalise ubunzulu bokuzinikela kwethu kuYehova okanye sibonakalise eyona nto ibalulekileyo ebomini bethu. Ngaloo ndlela, uYehova usinika ithuba lokuba sisebenzise inkululeko yokuzikhethela esinayo ukuze sibonakalise oko kusezintliziyweni zethu.
Ngokufuthi, abanye bayachaphazeleka kwizigqibo esizenzayo. Ngokomzekelo, amaKristu enkulungwane yokuqala ayekuvuyela ukukhululeka kwimiqathango emininzi yoMthetho. Ngokomzekelo, oku kwakuthetha ukuba ayenokukwamkela okanye akugatye ukutya okwakungahlambulukanga phantsi koMthetho. Sekunjalo, abongozwa ukuba acingele izazela zabanye xa esenza isigqibo sokuba ayisebenzise kusini na le nkululeko. Amazwi kaPawulos ngalo mbandela anokusebenza kwizigqibo esizenzayo: “Kuphepheni ukuba zizikhubekiso.” (1 Korinte 10:32) Umnqweno wokungafuni ukukhubekisa abanye unokuba negalelo kwizigqibo esizenzayo. Ngapha koko, uthando ngommelwane ngumyalelo wesibini omkhulu.—Mateyu 22:36, 39.
Umphumo Wezigqibo Zethu
Izigqibo ezenziwe ngesazela esikhululekileyo yaye ezisekelwe kwimigaqo yeBhayibhile ziya kusoloko zinomphumo omhle ekugqibeleni. Noko ke, okwangoku zinokubangela ukuba uncame izinto ezithile. Xa abapostile baxelela iSanhedrin ngesigqibo sabo sokuqhubeka beshumayela ngoYesu, bakatswa ngaphambi kokuba bakhululwe. (IZenzo 5:40) Xa amaHebhere amathathu—uShadraki, uMeshaki noAbhednego—bagqiba kwelokuba bangawunquli umfanekiso wegolide kaNebhukadenetsare, babebeka ubomi babo esichengeni. Babekulungele ukufa ngenxa yesigqibo sabo. Kodwa babesazi ukuba baza kumkholisa uThixo yaye wayeza kubasikelela.—Daniyeli 3:16-19.
Ukuba sijamelana nobunzima emva kokwenza isigqibo esicingisiswe kakuhle, eso ayisosizathu sokucinga ukuba isigqibo esisenzileyo siphosakele. ‘Ixesha nesihlo’ zinokuyichaphazela ngendlela engentle imiphumo yezigqibo ezenziwe ngezona njongo zintle. (INtshumayeli 9:11) Ngaphezu koko, maxa wambi uYehova uyabuvumela ubunzima ukuba buvavanye ubunzulu bozinikelo lwethu. UYakobi kwafuneka ukuba ajijisane nesithunywa ubusuku bonke ngaphambi kokuba afumane intsikelelo. (Genesis 32:24-26) Nathi kusenokufuneka sinyamezele ubunzima, nokuba senza into elungileyo. Sekunjalo, xa izigqibo zethu zivumelana nokuthanda kukaThixo, sinokuqiniseka ukuba uya kusinceda sinyamezele yaye ekugqibeleni uya kusisikelela.—2 Korinte 4:7.
Ngoko ke, xa usenza isigqibo esibalulekileyo, ungayami kobakho ubulumko. Phanda ngemigaqo yeBhayibhile echaphazela oko ukufunayo. Thetha noYehova ngombandela lowo. Ukuba kunokwenzeka, buza kumaKristu aqolileyo. Uze ube nenkalipho. Yisebenzise ngendlela efanelekileyo inkululeko yokuzikhethela oyinikwe nguThixo. Yenza isigqibo esilungileyo uze ubonise uYehova ukuba intliziyo yakho ithe tye phambi kwakhe.
[Umfanekiso okwiphepha 28]
Phanda kwiLizwi likaThixo ngaphambi kokuba wenze isigqibo esibalulekileyo
[Imifanekiso ekwiphepha 28, 29]
Thetha noYehova ngezigqibo omele uzenze
[Umfanekiso okwiphepha 30]
Unokuthetha namaKristu aqolileyo ngezigqibo ezibalulekileyo