Iimbekiselo Zencwadi Yobomi BamaKristu Nomsebenzi Wokushumayela
© 2022 Watch Tower Bible and Tract Society of Pennsylvania
MATSHI 6-12
UBUTYEBI OBUPHUMA ELIZWINI LIKATHIXO | 1 KRONIKE 23–26
“Kwakukhonzwa Ngocwangco Kakhulu Etempileni”
it-2-E 241
AbaLevi
UDavide wenza umsebenzi wabaLevi wanocwangco kakhulu kuba wamisela abantu abongamela umsebenzi, amagosa, abagwebi, oonogada basegeyithini nabagcini mali. Wamisela nabantu abaninzi ukuba bancedise ababingeleli etempileni naseyadini yetempile. Waphinda wamisela nabantu ababezojongana namagumbi okutyela xa kusenziwa iminikelo, imibingelelo, umsebenzi wokucoca, ukukala, ukumeta nemisebenzi eyahlukileyo yoonogada. Ngendlela ebufana nekwakwenziwe ngayo xa kwakusahlulwa ababingeleli, iimvumi ezingabaLevi zazahlulwe zaba ngamaqela ayi-24, yaye zazitshintshiselana ngomsebenzi. Imisebenzi yayabiwa ngamaqashiso. Nomsebenzi woonogada basegeyithini wawusabiwa ngendlela efanayo.—1Kr 23; 25; 26; 2Kr 35:3-5, 10.
it-2-E 686
Umbingeleli
Kumsebenzi wasetempileni, ababingeleli babephantsi kwamagosa ahlukeneyo. Kwakusenziwa amaqashiso xa kwakusabiwa imisebenzi ethile. Qela ngalinye kula ayi-24 lalisebenza iveki enye ngexesha, kabini ngonyaka. Ubungqina bubonisa ukuba babesebenza bonke ababingeleli xa ilixesha lamatheko, abantu babesenza imibingelelo emininzi kakhulu kanye ngendlela ababesenza ngayo xa kwakunikezelwa itempile. (1Kr 24:1-18, 31; 2Kr 5:11; thelekisa 2Kr 29:31-35; 30:23-25; 35:10-19.) Umbingeleli wayenokusebenza ngamanye amaxesha ukuba akazukuphazamisa ababingeleli ababiwe ngokwamaqashiso ukuba basebenze. Xa uYesu wayephila apha emhlabeni, ngokwesithethe soorabhi ababingeleli babebaninzi ukuze umsebenzi weveki wahlulwe ngokweentsapho, ibe ntsapho nganye yayincedisa usuku olunye okanye nangaphezulu kuxhomekeka kwinani layo.
it-2-E 451-452
Umculo
Xa kwakusenziwa amalungiselelo etempile kaYehova uDavide wakhetha abaLevi abayi-4 000 ebakhethela ukwenza umculo. (1Kr 23:4, 5) Abayi-288 kubo ‘babeqeqeshelwe ukuculela uYehova, bonke beziincutshe.’ (1Kr 25:7) Eli lungiselelo lalisalathiswa ziimvumi ezizincutshe, uAsafu, uHeman, noYedutun (okwabizwa ngokuba nguEtan). Ngenxa yokuba ookhokho bala madoda yayingoonyana bakaLevi, uGershom, uKohati, noMerari, ngoko iintsapho ezintathu zabaLevi ezaziphambili zaba nabantu ababeza kubamela emculweni. (1Kr 6:16, 31-33, 39-44; 25:1-6) Xa bebonke oonyana bala madoda mathathu babeyi-24, yaye babengabanye beencutshe zomculo eziyi-288 ebekuthethwe ngazo. Xa kwakwahlulwe ezi mvumi ziyi-288 nyana ngamnye wayemiselwa ngokwamaqashiso ukuba akhokele iqela elinye. Phantsi kolwalathiso lwakhe kwakukho “iincutshe” ezingakumbi eziyi-11 ezazikhethwe koonyana bakhe nakwabanye abaLevi. Ngoko iincutshe eziziimvumi zabaLevi eziyi-288 ([1 + 11] × 24 = 288), zazahlulahlulwe zangamaqela ayi-24 kanye ngendlela ekwakwenziwe ngayo kubabingeleli. Ukuba ‘aba bafundi’ bayi-3 712 bashiyekileyo babenokwahlulwa, kwakuza kongezeleleka amadoda amalunga ne-155 kwiqela ngalinye kula ayi-24. Loo nto yayiza kuthetha ukuba incutshe nganye yomculo ijongene nabaLevi abayi-13 kwiqela lakhe lokuqeqeshela umculo. (1Kr 25:1-31) Kuba abavutheli-maxilongo yayingababingeleli, babeza kongeza kwiimvumi zabaLevi.—2Kr 5:12; thelekisa uNum 10:8.
it-1-E 898
Unogada Wasegeyithini
ETempileni. Ngaphambi kokuba asweleke uKumkani uDavide waye waqokelela abaLevi, abasebenzi basetempileni nonoogada basegeyithini ababeyi-4000 xa bebonke. Babesiza ngokwamaqela lize iqela ngalinye lisebenze iintsuku eziyi-7. Babenomsebenzi wokugada indlu kaYehova baqiniseke ukuba iminyango ivulwa ize ivalwe ngexesha elifanelekileyo. (1Kr 9:23-27; 23:1-6) Ngaphandle komsebenzi wokuba ngonoogada, abanye babejonga iminikelo eyayiziswa ngabantu ukuze isetyenziswe etempileni. (2Ku 12:9; 22:4) Ethubeni xa umbingeleli omkhulu uYehoyada wakhetha uYehowashe ukuba abe ngukumkani, kwaye kwabekwa onoogada abakhethekileyo kwiigeyithi zetempile ukuze bakhusele uYehowashe kuKumkanikazi uAtaliya owayoxuthe ubukumkani. (2Ku 11:4-8) Xa ukumkani uYosiya watshabalalisa izithixo, oonogada basemnyango bancedisa ekukhupheni izinto ezazenzelwe ukukhonza uBhahali. Ezi zinto zatshiselwa ngaphandle kwesixeko.—2Ku 23:4.
Ubuncwane ObuseBhayibhileni
Uza Konwaba Kakhulu Xa Ukhonza UYehova Ngendlela Ayifunayo
10 Sikhonza uYehova ngokucula nabanye abazalwana noodade. (INdu. 28:7) Ukucula yayiyenye indlela eyayibalulekile yokukhonza kumaSirayeli. UKumkani uDavide wakhetha abaLevi abayi-288 ukuba babe ziimvumi zasetempileni. (1 Kron. 25:1, 6-8) Namhlanje sinokubonisa indlela esimthanda ngayo uThixo ngokucula iingoma zokumdumisa. Akunyanzelekanga ukuba sicule kamnandi ukuze siyenze loo nto. Khawuyicinge kanje le nto: Xa sithetha “sihlala sizenza iimpazamo,” kodwa asiyeki ukuthetha ebandleni nasentsimini. (Yak. 3:2) Ngoko ukucinga ukuba singamayilo akumele kusenze singamculeli iindumiso uYehova.
MATSHI 13-19
UBUTYEBI OBUPHUMA ELIZWINI LIKATHIXO | 1 KRONIKE 27-29
“Icebiso Lothando Elisuka KuTata Lisiya KuNyana”
Ukulondoloza Iimpawu Ezisenza Sibe NgamaKristu
9 Qiniseka ngenyaniso yeBhayibhile. Zisenokuba buthathaka iimpawu zethu ezisenza sibe ngabakhonzi bakaYehova ukuba azisekelwanga kulwazi oluqinileyo lweZibhalo. (Filipi 1:9, 10) Wonke umKristu—oselula nokhulileyo—ufanele aqiniseke ukuba oko akukholelwayo ngokwenene kuyinyaniso efumaneka eBhayibhileni. UPawulos wawabongoza amanye amakholwa esithi: “Qinisekani ngezinto zonke; nibambelele nkqi koko kuhle.” (1 Tesalonika 5:21) AmaKristu aselula akhuliswe ngabazali abahlonel’ uThixo amele aqonde ukuba akanakuphila ngokholo lwabazali bawo. UDavide, uyise kaSolomon wambongoza esithi “mazi uThixo kayihlo, umkhonze ngentliziyo epheleleyo.” (1 Kronike 28:9) Kwakunganele ngoSolomon owayeselula ukujonga uyise ehlakulela ukuba nokholo kuYehova. Wayefanele amazi uYehova ngokunokwakhe, yaye wenjenjalo. Wambongoza uThixo esithi: “Ndinike ke ubulumko nolwazi ukuze ndiphume ndingene phambi kwesi sizwana.”—2 Kronike 1:10.
Hlala Unentliziyo Epheleleyo KuYehova
13 Isifundo sizicacele. Kuyancomeka ukwenza imisebenzi eyanelisayo njengokubakho rhoqo kwiintlanganiso zebandla size sibe nenxaxheba nakwinkonzo yasentsimini. Kodwa ukukhonza uYehova ngentliziyo epheleleyo kuquka okungakumbi. (2 Kron. 25:1, 2, 27) Ukuba umKristu uqhubeka ezithanda ‘izinto ezisemva’—okuthetha ukuthi, ezinye zeendlela zehlabathi zokuphila—usengozini yokuphulukana nolwalamano oluhle noThixo. (Luka 17:32) Kuphela kuxa ngokunyanisekileyo ‘sikwenyanya oko kungendawo [size] sinamathele koko kulungileyo’ esiya ‘kubufanelekela kakuhle ubukumkani bukaThixo.’ (Roma 12:9; Luka 9:62) Noko ke, sonke kufuneka siqiniseke ukuba akukho nanye into kweli hlabathi likaSathana, enoba ibonakala iluncedo kangakanani na, esithintelayo ekunyamekeleni izilangazelelo zoBukumkani ngentliziyo yethu yonke.—2 Kor. 11:14; funda eyabaseFilipi 3:13, 14.
“Yiba Nesibindi . . . Uze Uthabathe Inyathelo”
20 UKumkani uDavide wakhumbuza uSolomon ukuba uYehova wayeza kuba naye de awugqibe umsebenzi wokwakha itempile. (1 Kron. 28:20) Athi akungena loo mazwi engqondweni nasentliziyweni kaSolomon, akayivumela into yokuba emncinci yaye engenamava yaba ngumqobo kuye. Waqin’ isibindi, watshona emsebenzini, ibe uYehova wamnceda wakha itempile enobungangamsha ngeminyaka esixhenxe enesiqingatha.
21 Nathi uYehova unokusenza sibe nesibindi njengoSolomon, siwenze de siwugqibe umsebenzi asinike wona entsatsheni nasebandleni. (Isa. 41:10, 13) Xa simnqula ngesibindi uYehova, sinokuqiniseka ukuba uza kusisikelela ngoku nakwixesha elizayo. Lilonke ke sithi, “yiba nesibindi . . . uze uthabathe inyathelo.”
Ubuncwane ObuseBhayibhileni
Yiba Ngumhlobo Xa Ubuhlobo Busecicini Lokuphela
UDavide wayenabo nabanye abahlobo ababa ngakwicala lakhe ngamaxesha anzima. Omnye wabo yayinguHushayi, iBhayibhile ithi “wayeliqabane [wayengumhlobo] likakumkani.” (2 Sam. 16:16; 1 Kron. 27:33) Kusenokwenzeka ukuba wayeligosa lenkundla nomhlobo osondeleyo kakumkani, ibe ngamanye amaxesha wayesazi iimfihlo.
Xa uAbhisalom, unyana kaDavide, wabhukuqa itrone, amaSirayeli amaninzi aba ngakwicala lakhe kodwa yena uHushayi wayengekho ngakulo. Xa uDavide wabalekayo, uHushayi waya kuye. UDavide wayebuhlungu kakhulu kukungcatshwa ngunyana wakhe nangabanye awayebathembile. Kodwa yena uHushayi wahlala ethembekile, wabeka ubomi bakhe esichengeni waza wabangela ukuba iqhinga elaliphekwa lingaphumeleli. UHushayi zange ayenze loo nto kuba eziva enyanzelekile njengegosa lenkundla. Kodwa wayengumhlobo othembekileyo.—2 Sam. 15:13-17, 32-37; 16:15–17:16.
MATSHI 20-26
UBUTYEBI OBUPHUMA ELIZWINI LIKATHIXO | 2 KRONIKE 1–4
“Ukumkani USolomon Wenza Isigqibo Esingesasobulumko”
it-1-E 174 ¶5
Umkhosi
Ulawulo lukaSolomon lwenza kwabhalwa isahluko esitsha kwiingxelo zomkhosi wakwaSirayeli. Ulawulo lwakhe lwalunoxolo kodwa waqhubeka esongeza amahashe neenqwelo. (Jonga indawo ethi CHARIOT.) Amahashe amaninzi ayethengwa eYiputa. Kwafuneka kwakhiwe izixeko kuwo wonke ummandla ukuze la maqela matsha emikhosi abenendawo yokuhlala. (1Ku 4:26; 9:19; 10:26, 29; 2Kr 1:14-17) Kodwa uYehova zange ayisikelele le misebenzi kaSolomon. Xa waswelekayo naxa ubukumkani bahlulahlulwayo, umkhosi wakwaSirayeli wacutheka. UIsaya waye wabhala wathi: “Baza kuthi shu abo bayokukhalela uncedo eYiputa, Abathembela ngamahashe, Abo bathembela ngeenqwelo zokulwa ngenxa yobuninzi bazo, Nangamahashe emfazwe, ngenxa yamandla awo, Kodwa bengakhangelanga kuLowo Ungcwele kaSirayeli, Bengabalekelanga kuYehova.”—Isa 31:1.
it-1-E 427
Inqwelo
KwaSirayeli zange khe kwakho iinqwelo zokulwa ezininzi de yalixesha likaSolomon. Le nto yayisenzeka kuba uThixo walumkisa ukuba ukumkani wayengamele azongezele amahashe ngokungathi amaSirayeli axhomekeke kuwo ukuze akhuseleke. Esi silumkiso sasinciphisa ukusetyenziswa kweenqwelo ekubeni yayingamahashe awayesetyenziswa ukuze kurhuqwe ezi nqwelo. (Dut 17:16) Xa uSamuweli wayelumkisa ookumkani ngomthwalo ababeza kuwuthwalisa abantu wathi: “Uza kubathatha oonyana benu ababeke ezinqwelweni zakhe.” (1Sa 8:11) Kuba uAbhisalom noAdoniya babefuna ubukumkani, ngamnye kubo wayenenqwelo kunye namadoda ayi-50 abaleka phambi kwayo. (2Sa 15:1; 1Ku 1:5) Xa uDavide woyisa ukumkani waseTsobha, wazigcinela amahashe atsala inqwelo ayi-100.—2Sa 8:3, 4; 10:18.
Kuba uKumkani uSolomon wayefuna ukwandisa umkhosi wamaSirayeli, wongeza iinqwelo zaba yi-1400. (1Ku 10:26, 29; 2Kr 1:14, 17) Ukongezelela kwiYerusalem, kwakukho nezinye iidolophu zeenqwelo ezazineendawo ezikhethekileyo zokulungisa izixhobo zemfazwe.—1Ku 9:19, 22; 2Kr 8:6, 9; 9:25.
Ubuncwane ObuseBhayibhileni
Iimbalasane Zencwadi Yesibini YeziKronike
1:11, 12. Isicelo esenziwa nguSolomon kuYehova sibonisa ukuba, ubulumko nolwazi yayizizinto awayezixabisa ukumkani. Imithandazo yethu kuThixo ibonisa oko kusezintliziyweni zethu. Kuya kuba kuhle ukuba sicingisise ngendlela esithandaza ngayo nangezo zinto sizithandazelayo.
MATSHI 27–APRIL 2
UBUTYEBI OBUPHUMA ELIZWINI LIKATHIXO | 2 KRONIKE 5–7
“Intliziyo Yam Iza Kuhlala Ilapho”
Ningakutyesheli Ukuhlanganisana
Kamva, xa uDavide wayengukumkani eYerusalem, wavakalisa umnqweno wokwakha indlu esisigxina yokuzukisa uYehova. Noko ke, ekubeni uDavide wayeyindoda eyalwa iimfazwe, uYehova wathi kuye: “Akusayi kulakhela indlu igama lam.” Kunoko, wakhetha unyana kaDavide, uSolomon, ukuba akhe itempile. (1 Kronike 22:6-10) Ngowe-1026 B.C.E., emva kokuyakha iminyaka esixhenxe enesiqingatha, uSolomon wayinikezela itempile. UYehova wakholiswa sesi sakhiwo, waza wathi: “Ndiyingcwalisile le ndlu uyakhileyo ngokubeka igama lam apho ukusa kwixesha elingenammiselo; kwaye ngokuqinisekileyo amehlo am nentliziyo yam aya kusoloko elapho.” (1 Kumkani 9:3) Logama nje amaSirayeli ayeza kuqhubeka ethembekile, uYehova wayeya kuhlala ekholisekile yiloo ndlu. Noko ke, ukuba ayephambuka, uYehova wayeya kuyishiya loo ndlu, ize ‘loo ndlu ibe yimfumba yamanxuwa.’—1 Kumkani 9:4-9; 2 Kronike 7:16, 19, 20.
it-2-E 1077-1078
ITempile
IMbali. Itempile yayikhona de yatshatyalaliswa ngo-607 B.C.E. ngumkhosi wamaBhabhiloni owawukhokelwa nguKumkani uNebhukadenetsare. (2Ku 25:9; 2Kr 36:19; Yer 52:13) Kuba amaSirayeli ayesiya ekhonza izithixo, uThixo wazivumela ezinye iintlanga ukuba zihlasele uYuda neYerusalem, zide ngamanye amaxesha zibathathele nezinto ezixabisekileyo ezisetempileni. Ngamanye amaxesha itempile yayingakhathalelwanga. Emva kweminyaka eyi-33 imiselwe, uKumkani uShishaki waseYiputa wathatha zonke izinto zayo ezixabisekileyo (993 B.C.E.) xa kwakulawula uRehoboham unyana kaSolomon. (1Ku 14:25, 26; 2Kr 12:9) UKumkani uAsa (977-937 B.C.E.) wayeyihlonipha indlu kaYehova, kodwa wenza ngobudenge ukuze akhusele iYerusalem kuba wanyoba uKumkani uBhen-hadadi I waseSiriya ngesilivere negolide eyayisetempileni ukuze ophule isivumelwano awayesenze noBhahasha ukumkani wakwaSirayeli.—1Ku 15:18, 19; 2Kr 15:17, 18; 16:2, 3.
Ubuncwane ObuseBhayibhileni
Uyazazi ‘Iintliziyo Zoonyana Boluntu’
Umthandazo kaSolomon unokusithuthuzela. Abanye abantu basenokungaziqondi iimvakalelo zethu—‘izibetho zethu neentlungu zethu.’ (IMizekeliso 14:10) UYehova uyayazi intliziyo yethu yaye usikhathalele. Xa sizityanda igila kuye ngomthandazo siya kukwazi ukunyamezela. IBhayibhile ithi: “Liphoseni kuye lonke ixhala lenu, kuba unikhathalele.”—1 Petros 5:7.
APRILI 10-16
UBUTYEBI OBUPHUMA ELIZWINI LIKATHIXO | 2 KRONIKE 8-9
“Wayebuxabisa Ubulumko”
Xa Abantu Besiba Nezinwe
Kakade ke, ukumkanikazi waseShebha wancama ixesha lakhe elininzi waza wenza umgudu wokuya kutyelela uSolomon. Kuyabonakala ukuba iShebha yayikwindawo namhlanje eyiRiphabliki yaseYemen; ngoko lo kumkanikazi kunye neenkamela zakhe bahamba umgama ongaphezu kweekhilomitha ezili-1 900 ukuya eYerusalem. Kunjengokuba uYesu watshoyo, “weza evela eziphelweni zomhlaba.” Kwakutheni ukuze ukumkanikazi waseShebha azixhamle kangako? Ngokuyintloko wayeze ‘kuva ubulumko bukaSolomon.’—Luka 11:31.
Utyelelo Olwavuzwa Ngokutyebileyo
Enoba kwakwenzeke ntoni, lo kumkanikazi wafika eYerusalem “nesihlwele esinzima kunene, esineenkamela ezithwele ubulawu, negolide eninzi kunene, namatye anqabileyo.” (1 Kumkani 10:2a) Abanye bathi esi ‘sihlwele sinzima’ sasiquka iimpelesi ezazixhobile. Oku kuyaqondakala, xa sicinga ukuba ukumkanikazi wayengumntu obekekileyo yaye wayephethe izinto ezixabisa amashumi ezigidi zeerandi.
Noko ke, phawula ukuba ukumkanikazi waseShebha weva ngodumo lukaSolomon “olusingisele kwigama likaYehova.” Ngoko olu yayingelulo uhambo nje lwezoshishino. Kubonakala ukuba, ukumkanikazi ngokuyintloko weza ukuze eve ngobulumko bukaSolomon—mhlawumbi nokufunda okuthile ngoThixo wakhe, uYehova. Ekubeni kusenokwenzeka ukuba wayengowomnombo kaShem okanye uHam, ababengabakhonzi bakaYehova, kusenokwenzeka ukuba wayenomdla wokuva ngonqulo lookhokho bakhe.
Utyelelo Olwavuzwa Ngokutyebileyo
Ukumkanikazi waseShebha wachukumiseka gqitha bubulumko bukaSolomon nobutyebi bobukumkani bakhe kangangokuba “akwaba sabakho kuqina kwamxhelo kuye.” (1 Kumkani 10:4, 5) Bambi bathi eli binzana lithetha ukuba ukumkanikazi “wabindeka.” Omnye umphengululi uthi wawa isiduli! Enoba kwenzeka ntoni, ukumkanikazi wamangaliswa gqitha koko wakubonayo nawakuvayo. Wathi abakhonzi bakaSolomon ngabona bonwabileyo ngenxa yokuba beve ubulumko balo kumkani, yaye wambulela uYehova ngokumenza uSolomon ukumkani. Emva koko wanika ukumkani izipho ezinexabiso eliphakamileyo, igolide iyodwa ngokwamaxabiso anamhlanje imalunga nama-R247 600 000. Naye uSolomon wampha izipho, wanika ukumkanikazi “konke awakucelayo.”—1 Kumkani 10:6-13.
it-2-E 990-991
USolomon
Emva kokuba ukumkanikazi ebone indlela eyayintle ngayo itempile nendlu kaSolomon, ebone nabantu ababelungiselela etafileni yakhe nabebathwala indebe, nesinxibo sabo nemibingelelo eyayinikelwa qho endlini kaYehova, “washiyeka emangalisiwe,” waza wathi, “Ibe jonga! khange ndixelelwe yonke into. Ukude lee ngobulumko nempumelelo kunezinto endizivileyo.” Waye wamxelela nokuba abantu ababemsebenzela bayavuya ukuba nokumkani onjengaye. Yonke le nto yenza lo kumkanikazi ukuba amdumise uYehova uThixo owaye wabonisa amaSirayeli indlela awathanda ngayo ngokuthi abeke uSolomon njengokumkani owayeza kugweba kakuhle aze enze izinto ezilungileyo.—1Ku 10:4-9; 2Kr 9:3-8.
Ubuncwane ObuseBhayibhileni
it-2-E 1097
Itrone
Kuzo zonke iitrone ezakha zenziwa ngabalawuli bakwaSirayeli, ayikho echazwa ngokweenkcukacha njengekaSolomon. (1Ku 10:18-20; 2Kr 9:17-19) Kubonakala ukuba ‘yayikwiHolo Yetrone,’ eyayisesinye sezakhiwo ezazikwiNtaba YaseMoriya eYerusalem. (1Ku 7:7) ‘Yayinetrone enkulu yophondo lwendlovu eyayalekwe ngegolide esulungekileyo enophahla olurawundi ngasemva kwetrone nendawo yokubeka iingalo.’ Nangona le trone yayisenokwenziwa ngophondo lwendlovu, indlela izinto ezazakhiwe ngayo etempileni ibonisa ukuba yayenziwe ngeplanga, yagqunywa ngegolide esulungekileyo ngaphezulu yaze yahonjiswa kakuhle ngophondo lwendlovu ngaphakathi. Kumntu owayeyijongile le trone yayinokubonakala ngathi yenziwe ngophondo lwendlovu negolide qha. Emva kokuba kuthethwe ngezitepsi eziyi-6 ezazisiya etroneni, ithi ivesi xa iqhubeka: ‘Kwakumi neengonyama ezimbini emacaleni eendawo zokubeka iingalo. Ibe kwakukho iingonyama eziyi-12 ezazimi kwezo zitepsi zintandathu, inye kweli cala nakweliya cala, kuzo zonke izitepsi.’ (2Kr 9:17-19) Ezi zitatyu zeengonyama zilimela kakuhle igunya nolawulo. (Gen 49:9, 10; ISi 5:5) Zoyi-12 ezi zitatyu kubonakala ukuba zazimela izizwe eziyi-12 zakwaSirayeli, kusenokwenzeka ukuba zazibonisa indlela eziluxhasa ngayo ulawulo lwaloo mlawuli uhleli etroneni. Kwakukho nesitulo sokubeka iinyawo etroneni esasithe nca esasenziwe ngegolide. Indlela echazwe ngayo le trone yegolide nophondo lwendlovu—ukuphakama kophahla lwayo neengonyama ezinkulu eziphambi kwayo—yogqitha neyiphi na enye itrone yelaxesha noba yebhaqiweyo ngabembi bezinto zakudala, noba yebonisiweyo kwizitatyu okanye ekwabhalwa ngayo. Njengoko umbhali wale ncwadi watshoyo: “Asikho esinye isizwe esakha senza into efana naleyo.”—2Kr 9:19.
APRILI 17-23
UBUTYEBI OBUPHUMA ELIZWINI LIKATHIXO | 2 KRONIKE 10-12
“Icebiso Lobulumko Linokukunceda”
Wayenokuhlala Ethandwa NguThixo
Inoba uRehobhoham waxakwa nokuba makathini! Ukuba uyayivuma le nto, kwakuza kufuneka yena, intsapho yakhe nabantu ababekwibhotwe lakhe bancame ubomi obutofotofo. Kanti ukuba akavumi, abantu babeza kuvukela. Wayeza kuthini? Lo kumkani mtsha waqala wabuza kumadoda amakhulu awayengabacebisi bakaSolomon. Emva koko waya kubuza koontanga bakhe. Wathatha icebiso labo waza wathi ebantwini: “Ndiya kuyongeza idyokhwe yenu. Ubawo yena, wanibetha ngezabhokhwe, kodwa mna, ndiya kunibetha ngeekatsi.”—2 Kron. 10:6-14.
Indlela Onokwenza Ngayo Izigqibo Ezilungileyo
Kwakhona uYehova wenze ilungiselelo lokuba kubekho abo baqolileyo ebandleni esinokuxubusha nabo izigqibo esizenzileyo. (Efese 4:11, 12) Noko ke, xa sibuza kwabanye, asimele silandele ikhondo labo babuza wonke umntu de ekugqibeleni bafumane umntu oza kubaxelela loo nto bafuna ukuyiva. Bandule ke balandele icebiso lakhe. Kwakhona simele sikhumbule umzekelo osisilumkiso kaRehobhoham. Xa kwafuneka enze isigqibo esibalulekileyo, wafumana icebiso elihle kumadoda amakhulu awayekhonze noyise. Noko ke, kunokuba alandele icebiso lawo, wabuza kubafana abaselula akhule nabo. Elandela icebiso labo, wenza isigqibo sobuyatha waza walahlekelwa yinxalenye enkulu yobukumkani bakhe.—1 Kumkani 12:1-17.
Xa ufuna icebiso, lifune kwabo banamava ngobomi yaye abanolwazi oluphangaleleyo ngeZibhalo yaye abayihlonela ngokunzulu imigaqo elungileyo. (IMizekeliso 1:5; 11:14; 13:20) Ukuba kunokwenzeka, thabatha ixesha ucamngca ngemigaqo ebandakanyekileyo nangolwazi oye waluqokelela. Njengoko uzibona ngokukhanya kweLizwi likaYehova izinto, siya kuzicacela isigqibo esilungileyo omele usenze.—Filipi 4:6, 7.
it-2-E 768 ¶1
Rehobhoham
Ikratshi nokuzicingela yedwa kukaRehoboham kwenza ukuba abantu abaninzi bahambe. Sisizwe sakwaYuda nesakwaBhenjamin qha esasixhasa indlu kaDavide. Ababingeleli, abaLevi bezi zizwe zimbini, nabanye abantu bezi zizwe ezilishumi ababehlala kude kunazo babeyixhasa.—1Ku 12:16, 17; 2Kr 10:16, 17; 11:13, 14, 16.
Ubuncwane ObuseBhayibhileni
it-1-E 966-967
Iidemon Ezifana Neebhokhwe
Amazwi kaYoshuwa akuYoshuwa 24:14 abonisa ukuba xa amaSirayeli ayehlala eYiputa, aye achatshazelwa kukhonzwa kwezithixo awayekubona pha ibe yena uHezekile ubonisa ukuba aqhubeka ekhonza oothixo bobuxoki nasemva kokuba emkile eYiputa. (Hez 23:8, 21) Ngenxa yesi sizathu, abanye abaphandi bathi isilumkiso esanikwa amaSirayeli endle sokuba ‘angabingeleli kwiidemon ezifana neebhokhwe’ (Lev 17:1-7) nokumisela kukaYerobhoham ababingeleli “beendawo eziphakamileyo nabeedemon ezimilise okweebhokhwe nabamathole eenkomo awayewenzile” (2Kr 11:15) kubonisa ukuba amanye amaSirayeli ayekhonza iibhokwe ibe le nto yayixhaphakile eYiputa ingakumbi emazantsi aseYiputa. UHerodotus (II, 46) uthi le ndlela kwakukhonzwa ngayo eYiputa yenza amaGrike aqala inkolo yabo yobuPan aze akholelwa nakwiisatyr ezazibonakala izizithixo ezingamadoda aneempondo, umsila neemilenze yebhokwe ibe kubonakala ukuba ayenentshiseko yesondo. Abanye bathi into yokuba kusithiwa uSathana unomsila, iimpondo, neenyawo ezinenzipho ezinde ivela kwezi zithixo zobuxoki ezinamalungu omzimba ezilwanyane, le nto yayisisithethe esasixhaphakile kwabantu ababesithi bangamaKristu kwixesha lakudala.
Ayichazwanga ukuba yayizintoni kanye kanye ezi zazibonakala “zinenwele” (seʽi·rimʹ). Nangona abanye becinga ukuba ziibhokwe zokoqobo ezi okanye zizitatyu ezinjengeebhokwe, ayichazwanga ibe nezibhalo azinabungqina baloo nto. Ibinzana elithi iidemon ezifana neebhokhwe libonisa ukuba abo babekholelwa kwezi zithixo ezingqondweni zabo babebona into emile njengebhokhwe neneenwele. Okanye, ukusetyenziswa kwegama elithi “iibhokhwe” kwezi mbhekiselo kusenokubonisa ukucaphukela yonke into enokwenza nezithixo, kwaigama lesithixo kwimibhalo emininzi lithathwe kwigama elithi “ubulongwe obuninzi” kodwa ke le nto ayithethi ukuba izithixo zazisenziwa ngobulongwe.—Lev 26:30; Dut 29:17.
APRILI 24-30
UBUTYEBI OBUPHUMA ELIZWINI LIKATHIXO | 2 KRONIKE 13–16
“Simele Sithembele Nini—NgoYehova?”
Izinto Abanokuzenza Abazalwana Abasebatsha Ukuze Bathenjwe
12 Esengumfana, uKumkani uAsa wayethobekile, enesibindi. Ngokomzekelo, emva kokusweleka kukatata wakhe uAbhiya waba ngukumkani. Watshabalalisa zonke izithixo zelo lizwe. Waxelela amaYuda ukuba “makafune uYehova uThixo wookhokho bakhe, aze awuthobele uMthetho nomyalelo.” (2 Kron. 14:1-7) Xa uZera waseTiyopiya weza kulwa namaYuda enamajoni ayi-1 000 000, uAsa wacela uYehova amncede. Wathi: “Owu Yehova, ayithethi nto kuwe into yokuba baninzi okanye abanamandla abo ubancedayo. Sincede, Yehova Thixo wethu, kuba sithembele ngawe.” La mazwi amnandi abonisa indlela uAsa awayeqiniseke ngayo ukuba uYehova uza kubasindisa. Wayemthembile uTata wakhe osezulwini. UYehova akazange amdanise, “wawoyisa amaTiyopiya.”—2 Kron. 14:8-12.
Izinto Abanokuzenza Abazalwana Abasebatsha Ukuze Bathenjwe
13 Wawunokoyika kakhulu nawe ukulwa namajoni ayi-1 000 000, kodwa kuba uAsa wayethembe uYehova, wawoyisa. Emva koko, xa wayeza kulwa enye imfazwe, zange amthembe uYehova. Weza kuhlaselwa nguKumkani uBhahasha wakwaSirayeli. Ngelo xesha wacela uncedo kuKumkani waseSiriya. Eso sigqibo samfaka engxakini enkulu. Ngomprofeti uHanani, uYehova wathi kuAsa: “Kuba uye wathembela ngokumkani waseSiriya, awathembela ngoYehova uThixo wakho, umkhosi kakumkani waseSiriya uphuncukile esandleni sakho.” Ukusuka ngelo xesha, uAsa wayehlala esilwa iimfazwe. (2 Kron. 16:7, 9; 1 Kum. 15:32) Yintoni oyifundayo kuAsa?
Izinto Abanokuzenza Abazalwana Abasebatsha Ukuze Bathenjwe
14 Hlala uthobekile, ungayeki ukumthemba uYehova. Xa wawubhaptizwa, wawubonisa ukuba unokholo futhi umthembile uYehova. NoYehova wakwamkela evuya kwintsapho yakhe. Ungayeki ukumthemba uYehova. Kusenokungabi nzima ukumthemba xa kufuneka wenze izigqibo ezibaluleke kakhulu, kodwa ngaba kusoloko kunjalo? Kubalulekile ukumthemba kuzo zonke izigqibo ozenzayo, nokuba ufuna ukwenza isigqibo ngendlela ozonwabisa ngayo, ngendawo oza kuphangela kuyo, nangezinto oza kuzenza ebomini? Sukuzithemba, khangela umgaqo weBhayibhile onokukunceda kwisigqibo ofuna ukusenza, uze wenze loo nto iBhayibhile ithi yenze. (IMize. 3:5, 6) Ukuba wenza loo nto, uza kuvuyisa uYehova, nebandla liza kukuthemba.—Funda u-1 Timoti 4:12.
Ubuncwane ObuseBhayibhileni
Khonza UYehova Ngentliziyo Epheleleyo!
7 Ngamnye kuthi ufanele ahlole intliziyo yakhe ukuba iphelele na kuThixo. Khawuzibuze, ‘Ngaba ndizimisele ukumenza avuye uYehova, ukuthethelela unqulo lwenene, nokukhusela abantu bakhe kwifuthe elibi elonakalisayo?’ Khawucinge ngendlela ekwafuneka uAsa abe nesibindi ngayo ukuze aphendulise uMahaka ‘owayelinenekazi’ elizweni! Mhlawumbi akakho umntu omaziyo owenza izinto njengoMahaka, kodwa zikhona iimeko ezinokufuna ube njengoAsa. Ngokomzekelo, uza kuthini xa ilungu lentsapho yakho okanye umhlobo wakho esona kwaye engaguquki, aze asuswe kubudlelane? Ngaba uza kucezela kude kuye? Intliziyo yakho ibiya kukuqhubela entwenini?