Iimbekiselo Zencwadi Yobomi BamaKristu Nomsebenzi Wokushumayela
© 2023 Watch Tower Bible and Tract Society of Pennsylvania
SEPTEMBA 4-10
UBUTYEBI OBUPHUMA ELIZWINI LIKATHIXO | ESTERE 1-2
“Zimisele Ukuthobeka NjengoEstere”
Unako Ukuthozama Kwanaxa Kunzima Ukwenjenjalo
11 Ukutyibelwa ngabantu besincoma nako kunokwenza kube nzima ukuthozama. Khawubone indlela uEstere awenza kakuhle ngayo xa izinto zatshintsha ngesiquphe. Wayeyinzwakazi ethi ndijonge kwaye sekuphele unyaka eqatywa izithambiso zexabiso elikhulu. Wayesoloko ehleli nezinye iintombi eziphuma kubo bonke uBukhosi BasePersi ezazincwase ukubonwa ngukumkani. Sekunjalo, waqhubeka enembeko yaye ezolile. Akazange angenwe kukuzicingela okanye kukukhukhumala kwanasemva kokuba loo kumkani ekhethe yena ukuba abe ngukumkanikazi.—Estere 2:9, 12, 15, 17.
Wamela Abantu BakaThixo
15 Lathi lakufika ixesha lokuba uEstere abonwe ngukumkani, wanikwa ilungelo lokukhetha nantoni na ayifunayo, mhlawumbi ukuze azilungise ngakumbi. Sekunjalo, wathobeka waza akafuna nto ngaphandle kwezo wayezinikwe nguHegayi. (Estere 2:15) Waqonda ukuba ubuhle bubodwa abunakumenza athandwe ngukumkani; ukuthozama nokuthobeka yayizezona mpawu zinqabileyo kwabo bafazi. Ngaba wayechanile?
Unako Ukuthozama Kwanaxa Kunzima Ukwenjenjalo
12 Ukuthozama kusinceda sinxibe, sizilungise size siziphathe ngendlela endilisekileyo nehloniphekileyo. Siyaqonda ukuba into esenza sithandeke ebantwini ayikokuqhayisa okanye ukuzitsalela amehlo, kodwa kukuba ‘nomoya ozolileyo nowobulali.’ (Funda eyoku-1 kaPetros 3:3, 4; Yer. 9:23, 24) Ukuba sifukame ukuzithanda ezintliziyweni zethu, ekugqibeleni kuza kubonakala kwizenzo zethu. Ngokomzekelo, asenokuphutshuluka emilonyeni yethu amagama abonisa ukuba sinelungelo elikhethekileyo, sinenkcazelo abangenayo abanye abantu, okanye siqhelene nomzalwana othile onembopheleleko. Sinokucacisa izinto ngohlobo lokuba kunconywe thina kuphela ngecebo okanye ngento nabanye abantu ababe negalelo kuyo. Nalapha, uYesu ungumzekelo omhle kuthi. Inkoliso yezinto awazithethayo wayezicaphula kwiZibhalo ZesiHebhere. Wayezibeka ngendlela ethozamileyo ukuze abantu abammameleyo bazi ukuba zisuka kuYehova kungekhona kwingqondo okanye kubulumko bakhe.—Yoh. 8:28.
Ubuncwane ObuseBhayibhileni
Ngaba Ubusazi?
Abaphengululi bafumana ilitye lasePersi elalibhalwe ngoonobumba abatsolo nelalithetha ngendoda eyayinguMarduka (ngesiNgesi uMordekayi). Le ndoda yayingumphathi, mhlawumbi kwindawo eyayigcina imali eShushan. UArthur Ungnad, owayeyazi kakuhle imbali yaseMpuma, uthi yayileli litye neBhayibhile qha ezazithetha ngoMordekayi ngelo xesha.
Emva kokuba u-Ungnad ethethe le nto, abaphengululi baye baguqulela izinto ezazibhalwe kumatye amaninzi asePersi. Ezinye zazikumacwecwe asePersepolis, awafunyanwa kumabhodlo eso sixeko, kwindawo eyayibizwa ngokuba yiTreasury. La macwecwe abhalwa xa kwakulawula uXerxes I. Abhalwe ngolwimi lwamaElam futhi anamagama amaninzi ekuthethwa ngawo kwincwadi kaEstere.
Amacwecwe amaninzi asePersepolis ayathetha ngendoda enguMarduka, eyayingunobhala kwikomkhulu laseShushan xa kwakulawula uXerxes I. Elinye lala macwecwe lithi lo Marduka wayengumguquleli. Le nto iyadibana nento ethethwa yiBhayibhile ngoMordekayi. Wayeligosa elalisebenza kwaKumkani uAhaswerosi (uXerxes I) nelalithetha ubuncinane iilwimi ezimbini. Wayesoloko ehleli kwigeyithi kakumkani eyayikwikomkhulu laseShushan. (Estere 2:19, 21; 3:3) Le geyithi yayisisakhiwo esikhulu awayesebenza kuso amagosa akomkhulu.
Kukho izinto ezenza umdla afana ngazo uMarduka ekuthethwa ngaye emacwecweni noMordekayi ekuthethwa ngaye eBhayibhileni. Babengamadoda awayephila ngexesha elinye, kwindawo enye, engawo namagosa awayesebenza kwindawo enye. Kubonakala ngathi zonke ezi zinto zibonisa ukuba uMarduka wayenguMordekayi.
SEPTEMBA 11-17
UBUTYEBI OBUPHUMA ELIZWINI LIKATHIXO | ESTERE 3-5
“Nceda Abanye Bazimisele Ukwenza Nangakumbi”
it-2-E 431 ¶7
UMordekayi
Akavumi Ukuqubuda KuHaman. Ngoko, uHaman umAgagi wenziwa umlawuli nguAhaswerosi, owayalela ukuba bonke ookumkani basegeyithini baqubude kuHaman kuba wayenesikhundla esitsha esiphezulu. UMordekayi zange avume tu ukuqubuda kuba wathi ungumYuda. (Est 3:1-4) Isizathu sikaMordekayi sokungaqubudi sibonisa ukuba wayeqhutywa kukuba engumYuda ozinikeleyo kuThixo wakhe uYehova. UMordekayi wayeyiqonda ukuba ukuqubuda kuHaman kuthetha okungakumbi kunokugoba nje ngamadolo, njengokuba amaSirayeli ayedla ngokwenza ngaphambili kuba lowo babequbuda kuye babemjonga njengonesikhundla esiphezulu nanjengomlawuli. (2Sa 14:4; 18:28; 1Ku 1:16) Kule imeko, uMordekayi wayenesizathu esihle sokungaguqi kuHaman. Kusenokwenzeka ukuba uHaman wayengumAmaleki ibe uYehova wayeyibeke yacaca into yokuba usemfazweni namaAmaleki “kuzo zonke izizukulwana.” (Eks 17:16; jonga indawo ethi HAMAN.) Loo nto yayithetha ukuba uMordekayi wayenyanisekile kuThixo ibe yayingenanto yokwenza nokungamthobeli kwakhe uHaman.
it-2-E 431 ¶9
UMordekayi
Wasetyenziswa Ukuze Akhulule AmaSirayeli. Emva kokuba kuphume umyalelo wokutshatyalaliswa kwamaYuda kuyo yonke indawo alawula kuyo uKumkani uAhaswerosi, uMordekayi waxelela uEstere ukuba umthembile ukuba angakwazi ukusebenzisa isikhundla sakhe sasebukhosini ukuze akhulule amaYuda. Wabonisa uEstere indlela esisikhulu ngayo iskhundla sakhe waze wathi makacenge uncedo kukumkani. Nangona le nto yayithetha ukufa nokuphila, wavuma ukuyenza.—Est 4:7–5:2.
Wamela Abantu BakaThixo
22 Kumele ukuba kwathi xhungu kuEstere esakuva ezo ndaba. Olu yayilolona vavanyo luqatha lokholo lwakhe. Wayesoyika, kwaye wayiveza loo nto xa waphendula uMordekayi. Wamkhumbuza ngomthetho kakumkani. Ukuya kukumkani engakubizanga kwakuza kuthetha ukufa. Wayenokusinda kuphela xa ukumkani emolulele intonga yobukhosi yegolide. Ngaba uEstere wayenaso isizathu sokulindela ukuba enzelwe loo nceba, emva kwento eyenzeka kuVashti ongazange avume ukuza xa ebizwa ngukumkani? UEstere waxelela uMordekayi ukuba kudlule iintsuku ezingama-30 ukumkani engambizanga! Ukungananzwa kwakhe kwayitsho ingqondo yabethabethana, ezibuza ukuba usathandwa kusini na ngukumkani.—Estere 4:9-11.
23 UMordekayi wamphendula ngokucacileyo uEstere esomeleza ukholo lwakhe. Wathi ukuba uyasilela, amaYuda aya kusindiswa ngenye indlela. Kodwa ngaba uEstere wayemele alindele ukusinda xa sele iqalisile intshutshiso? Apha uMordekayi wabonisa ukuba wayenokholo olunzulu kuYehova, ongenakuze avumele ukuba batshatyalaliswe abantu bakhe zize izithembiso zakhe zingazaliseki. (Yosh. 23:14) Emva koko uMordekayi wabuza uEstere oku: “Ngubani owaziyo enoba uye wafumana isidima sasebukhosini ngenxa yexesha elinje?” (Estere 4:12-14) Ngaba asimele simxelise uMordekayi? Kaloku wayekholose ngokupheleleyo ngoThixo wakhe, uYehova. Ngaba nathi sinjalo?—IMize. 3:5, 6.
Ubuncwane ObuseBhayibhileni
Silwela Ukunqula Ngokukhululekileyo
14 NjengoEstere noMordekayi bamandulo, namhlanje abantu bakaYehova balwela inkululeko yokumnqula ngendlela abayalele ngayo. (Estere 4:13-16) Ngaba nawe ungancedisa? Ewe. Unokuqhubeka ubathandazela abazalwana noodadewenu abasentlungwini yokuxhatshazwa ngumthetho. Imithandazo enjalo ingaluncedo kakhulu kubazalwana noodadewethu abafumana ubunzima nentshutshiso. (Funda uYakobi 5:16.) Ngaba uYehova uyayiphendula imithandazo enjalo? Uloyiso lwethu ezinkundleni bubungqina bokuba ngokwenene uyayiphulaphula!—Heb. 13:18, 19.
SEPTEMBA 18-24
UBUTYEBI OBUPHUMA ELIZWINI LIKATHIXO | ESTERE 6-8
“Isifundo Esihle Sendlela Yokuthetha”
Wenza Ngobulumko, Ngenkalipho Nangokuzincama
15 Ngenxa yokuba nomonde kukaEstere, elinde olunye usuku ukuze enze isicelo kukumkani, uHaman waba nexesha elaneleyo lokuzirhintyela. Akungebi nguYehova uThixo owabangela ukuba ukumkani aphuthelwe? (IMize. 21:1) Siyaqondakala isizathu sokuba iLizwi likaThixo lisikhuthaza ukuba sibe ‘nesimo sengqondo sokulinda’! (Funda uMika 7:7.) Xa silindela kuThixo, sinokufumanisa ukuba indlela azilungisa ngayo iingxaki zethu iyodlula lee leyo ebesinokuyisebenzisa thina.
Wathetha Ngenkalipho
16 UEstere wayengasafuni ukuvavanya umonde kakumkani kakhulu, ngoko kwisidlo sakhe sesibini, kwakuza kufuneka athethe angashiyi nto. Njani? Ukumkani wamvulela elinye ithuba, embuza ukuba siyintoni na isicelo sakhe. (Estere 7:2) ‘Ixesha lokuthetha’ kukaEstere lalifikile.
Wenza Ngobulumko, Ngenkalipho Nangokuzincama
17 Ingathi siyambona uEstere ethandaza entliziyweni kuThixo wakhe ngaphambi kokuba athethe la mazwi: “Ukuba ndikholekile emehlweni akho, kumkani, yaye ukuba kubonakala kulungile kukumkani, mandinikwe umphefumlo wam ngesibongozo sam nabantu bakowethu ngesicelo sam.” (Estere 7:3) Phawula ukuba wamqinisekisa ukumkani ukuba uyasihlonela isigwebo sakhe koko kubonakala kulungile. Hayi indlela awayehluke ngayo kuVashti, umfazi wangaphambili kakumkani, owahlazisa indoda yakhe ngabom! (Estere 1:10-12) Ngaphezu koko, uEstere akazange amgxeke ukumkani ngokuthembela ngoHaman. Kunoko, wabongoza ukumkani ukuba amkhusele.
Wenza Ngobulumko, Ngenkalipho Nangokuzincama
18 Ngokuqinisekileyo eso sicelo samchukumisa saza samothusa ukumkani. Ngubani lo wayenobuganga bokufuna ukubulala ukumkanikazi wakhe? UEstere wahlabela mgama wathi: “Sithengisiwe, mna nabantu bakowethu, ukuba sibhujiswe, sibulawe size sitshatyalaliswe. Ke kaloku ukuba besithengiselwe ukuba sibe ngamakhoboka nezicakakazi kuphela, ngendiye ndathi cwaka. Kodwa oku kubandezeleka akufanelekanga xa kuza kuba ngumonakalo kukumkani.” (Estere 7:4) Phawula ukuba uEstere akazange afihle makhuba, kodwa uthi ngewayethule ukuba babeza kwenziwa amakhoboka nje kuphela. Ukutshayelwa kohlanga kwakuza kuba ziindleko ezinkulu nakukumkani ukuba uEstere wayethule.
19 Umzekelo kaEstere usifundisa lukhulu ngobuchule bokweyisela umntu. Xa kufuneka udandalazise umbandela otyhulu kumntu omthandayo okanye kumntu osegunyeni, umzekelo wokuba nomonde, intlonelo nokuthetha phandle unokuba luncedo kakhulu.—IMize. 16:21, 23.
Ubuncwane ObuseBhayibhileni
Iimbalasane Zencwadi KaEstere
7:4—Kwakuza ‘kumenzakalisa njani ukumkani’ ukubulawa kwamaYuda? Ngobuchule wachaza ukuba amaYuda aza kuthengiswa ebukhobokeni, emva koko uEstere waphum’ egusheni wachazela ukumkani ukuba uza kungena engxakini. Iingqekembe zesilivere ezili-10,000 ezazithenjiswe nguHaman zazi zakuba lithontsi emphandeni kwingxowa kakumkani kunengeniso eyayiza kwenziwa ukuba uHaman wayewathengise ebukhobokeni amaYuda. Ukuphunyezwa kweli yelenqe lokuwabulala laliza kuthetha ukubulawa kukakumkanikazi.
SEPTEMBA 25–OKTOBHA 1
UBUTYEBI OBUPHUMA ELIZWINI LIKATHIXO | ESTERE 9-10
“Wasebenzisa Isikhundla Sakhe Ukuze Ancede Abantu”
it-2-E 432 ¶2
UMordekayi
Ngoku uMordekayi wayeza kulawula endaweni kaHaman ibe wafumana neringi kakumkani yokubeka isitampu kumaxwebhu abhaliweyo. Ekubeni ukumkani wayebeke indlu kaHaman phantsi kolawulo lukaEstere, uEstere wathi mayiphathwe nguMordekayi. UMordekayi wasebenzisa imvume awayinikwa ngukumkani ukuze akhuphe umyalelo wokunika amaYuda ilungelo elisemthethweni lokuzikhusela. KumaYuda eli yayilixesha losindiso novuyo. Abantu abaninzi ababephantsi kolawulo lwamaPersi babesithi bangamaYuda, ibe xa kwafika umhla we-13 wenyanga ka-Adare ekwakumele kwenziwe ngawo izinto ezazisemthethweni, amaYuda ayeyilungele loo nto. Iqela labalawuli lalibaxhasa ngenxa yesikhundla sikaMordekayi esasiphezulu. EShushan kongezwa olunye usuku lokulwa emfazweni. Iintshaba ezingaphezu kwe-75 000 zamaYuda akummandla wamaPersi zabulawa, kuquka oonyana abalishumi bakaHaman. (Est 8:1–9:18) UMordekayi wafumana imvume kuEstere waze wayalela ukuba nyaka ngamnye kubhiyozelwe umhla we-14 nowe-15 wenyanga enguAdare “iintsuku zePurim,” ukuze bonwabe, benze izidlo, bathumelelane ukutya baze baphe namahlwempu izipho. AmaYuda nabantwana bawo avuma ukwenza lo mbhiyozo, naye nabani na ongomnye owayesiba ngumYuda kwakufuneka awenze. Kuba uMordekayi wayengowesibini ukuba mkhulu ebukhosini, wayehlonitshwa ngamaYuda kaThixo azinikeleyo ibe waqhubeka ewasebenzela ukuze ancedakale.—Est 9:19-22, 27-32; 10:2, 3.
it-2-E 716 ¶5
IPurim
Injongo. Abanye ababhali bathi umbhiyozo wePurim awusenzelwa injongo yokukhonza njengaxa wawuqala ukwenziwa, ibe ngamanye amaxesha kuye kufakwe nezinto ezingafuneki nganto. UMordekayi noEstere bobabini babengabakhonzi boThixo wokwenene uYehova, yaye lo mbhiyozo wawusenzelwa ukunika Yena imbeko. Uzuko lokusindiswa kwamaYuda ngela xesha luya kuYehova, kuba ingxaki yavela xa uMordekayi wayebonisa ukuba uthembekile kuYehova ngokuthi akhonze yena yedwa. Kusenokwenzeka ukuba uHaman wayengumAmaleki, sizwe eso uYehova awasiqalekisayo waza wavumela ukuba sehlelwe yintlekele. UMordekayi wayesihlonipha isigqibo sikaYehova ibe zange avume ukuqubuda kuHaman. (Est 3:2, 5; Eks 17:14-16) Kwakhona amazwi kaMordekayi kuEstere (Est 4:14) abonisa ukuba ukusindiswa kwamaYuda wayekujonge kumandla aphakamileyo. Ukuzila kukaEstere ukutya ngaphambi kokuba aye kukumkani nesicelo sokummemela kwitheko sasibonisa ukuba wayefuna ukuncedwa nguThixo.—Est 4:16.
“Yibani Ngabaxelisa UThixo” Ekusebenziseni Kwenu Igunya
12 UYehova ulungiselele abaveleli abakhokelayo ebandleni lamaKristu. (Hebhere 13:17) La madoda afanelekileyo afanele asebenzise igunya lawo alinikwe nguThixo ukuze anikele kumhlambi uncedo olufunekayo. Ngaba isigxina sabadala sibenza babe negunya lokuwalawula amakholwa angoowabo? Ngokuqinisekileyo akunjalo! Abadala bafanele babe nembono elungeleleneyo neyokuthobeka ngokuphathelele indima yabo ebandleni. (1 Petros 5:2, 3) IBhayibhile ithi kubaveleli: “[Laluseni] ibandla likaThixo, elo walithenga ngegazi lowakhe uNyana.” (IZenzo 20:28) Esi sisizathu esinamandla sokuphatha lungu ngalinye lomhlambi ngokuthantamisa.
13 Sinokukuzekelisa ngolu hlobo oku. Masithi umhlobo osenyongweni ukucela ukuba umgcinele into ethile exabisekileyo. Uyazi ukuba umhlobo wakho uhlawule ixabiso elikhulu ngaloo nto. Ngaba ubungayi kuyiphatha ngononophelo nangenyameko? Ngokufanayo, uThixo uphathise abadala imbopheleleko yokunyamekela into exabiseke ngokwenene: ibandla, amalungu alo afaniswa nezimvu. (Yohane 21:16, 17) UYehova uzixabisile izimvu zakhe—eneneni, uzixabise kangangokuba wazithenga ngegazi elixabisekileyo loNyana wakhe okuphela kwamzeleyo, uYesu Kristu. Alikho ixabiso elingaphezu kwelo uYehova abenokulihlawulela izimvu zakhe. Abadala abathobekileyo bayakukhumbula oko baze bakubonakalise kwindlela abaziphatha ngayo izimvu zikaYehova.
Ubuncwane ObuseBhayibhileni
Iimbalasane Zencwadi KaEstere
9:10, 15, 16—Ekubeni lo myalelo wawukwagunyazisa ukuphangwa kwamaxhoba, kwakutheni ukuze amaYuda angaphangi? Ukwala kwawo kwenza kwacaca ukuba injongo yawo yayikukuba akhuselwe kungekhona ukuba abe zizityebi.
OKTOBHA 2-8
UBUTYEBI OBUPHUMA ELIZWINI LIKATHIXO | YOBHI 1-3
“Qhubeka Umbonisa Indlela Omthanda Ngayo UYehova”
Yiba Nokholo Kwaye Uthobele NjengoNowa, UDaniyeli NoYobhi
16 Iingxaki awayenazo uYobhi. Ubomi bukaYobhi batshintsha kakhulu. Ngaphambi kokuba avavanywe, ‘wayeyeyona ndoda inkulu kubo bonke abaseMpumalanga.’ (Yobhi 1:3) Wayesisityebi, esaziwa kwaye ehlonelwa ngabantu. (Yobhi 29:7-16) Kodwa ke kuyo yonke loo nto, uYobhi akazange azibone ebalulekile okanye acinge ukuba akamdingi uThixo. Kaloku uYehova wada wambiza ngokuba ‘ngumkhonzi wakhe,’ esithi ‘uyindoda engenakusoleka nethe tye, eyoyika uThixo nephambukayo ebubini.’—Yobhi 1:8.
17 Ubomi bukaYobhi batshintsha ngokuqhwanyaza kweliso. Wazibona sele engenanto kwaye imeko yakhe ilusizi. Yonke loo nto yayibangelwa ngumhlebi onguSathana, owaxoka ngoYobhi esithi unqula uThixo kuba ejonge izinto kuye. (Funda uYobhi 1:9, 10.) UYehova wasimamela esi sityholo singcolileyo. Wanika uYobhi ithuba lokubonisa ukuba uthembekile kuye, nokuba umnqula kuba emthanda, engajonganga nto kuye.
Hlala Uthembekile!
10 USathana uthetha into efanayo nangathi namhlanje. Udibana njani wena nento eyathethwa nguSathana ngoYobhi? Kaloku, uSathana uthi awumthandi nyhani uYehova uThixo, ungayeka ukumkhonza ukuze usindise ubomi bakho ibe awuzukuhlala uthembekile kuye! (Yobhi 2:4, 5; ISityhi. 12:10) Ikwenza uzive njani loo nto? Ayikukhathazi? Kodwa, khawucinge ngale nto: UYehova ukuthemba nyhani, kangangokuba ukunike ithuba elihle. UYehova uvumela uSathana ukuba avavanye ukuthembeka kwakho. UYehova uqinisekile ukuba unako ukuthembeka kuye uze ubonise ukuba uSathana ulixoki. Uthembisa ukuba uza kukunceda ukwazi ukuyenza loo nto. (Heb. 13:6) Kusivuyisa nyhani ukuthenjwa nguMdali wezinto zonke! Ngaba uyabona ukuba kutheni kubaluleke kangaka ukuthembeka? Kusinceda sibonise ukuba uSathana ulixoki, sithethelele igama elihle likaTata wethu size sixhase indlela alawula ngayo. Yintoni esinokuyenza ukuze sihlale sithembekile?
Ubuncwane ObuseBhayibhileni
Izinto Esizifunda Kumazwi Okugqibela KaYesu
9 Wathini uYesu? Kanye ngaphambi kokuba afe, wakhwaza esithi: “Thixo wam, Thixo wam, undishiyele ntoni na?” (Mat. 27:46) IBhayibhile ayisixeleli ukuba kwakutheni ukuze athethe ngolu hlobo. Kodwa sifunda ntoni kule nto wayithethayo? Wayethetha into eyayiprofetwe kwiNdumiso 22:1. La mazwi asenza sibone nokuba uYehova ‘wayengamkhuselanga’ lo Nyana wakhe. (Yobhi 1:10) UYesu wayesazi ukuba uTata wakhe uvumele abantu abamcaphukelayo ukuba bamenze izinto ezaziza kubonisa ukuba umthembe kangakanani uYehova. Ezo zinto babeza kuzenza de afe. Akakho umntu owakha waphathwa kabuhlungu njengaye. La mazwi asibonisa nokuba wayeza kubulawa engenzanga nto.
OKTOBHA 9-15
UBUTYEBI OBUPHUMA ELIZWINI LIKATHIXO | YOBHI 4-5
“Ziphephe Iindaba Ezingeyonyani”
it-1-E 713 ¶11
UElifazi
2. Omnye wabahlobo abathathu bakaYobhi. (Yob 2:11) WayengumTeman, ibe kusenokwenzeka ukuba ukhokho wakhe yayingunyana wokuqala kaEsawu, nto leyo eyayithetha ukuba uphuma kumnombho kaAbraham ibe wayezalana ngandlela ithile noYobhi. Yena nenzala yakhe babeqhayisa ngobulumko babo. (Yer 49:7) Kwaba bahlobo bathathu nguElifazi obonakala engoyena ubalulukileyo nothetha kuvakale, nto leyo eyayisenokuthetha ukuba wayengoyena umdala. Wayethetha kuqala kuzo zontathu ezo ngxoxo, ibe into awayeyithetha yayibande.
Zixhathise Iingcinga Eziphosakeleyo!
Ekhumbula oko wakubona embonweni, uElifazi wathi: “Kwadlula umoya ebusweni bam; ndaba namanwele. Waqalisa ukuma ngxi, kodwa andizange ndiyiqonde imbonakalo yawo; kwakukho imbonakalo phambi kwamehlo am; kwabakho inzolo, ndaza ke ndeva ilizwi.” (Yobhi 4:15, 16) Ngumoya onjani owaphembelela iingcamango zikaElifazi? Amazwi akhe okugxeka emva koko aqinisekisa ukuba loo moya wawungeyiyo enye yeengelosi zikaThixo ezilungileyo. (Yobhi 4:17, 18) Yayingumoya ongendawo. Kungenjalo, uYehova ngewayengazange amohlwaye uElifazi namaqabane akhe amabini ngokuthetha ubuxoki. (Yobhi 42:7) Ewe, uElifazi wayephenjelelwa yidemon. Amazwi akhe abonisa ukuba wayengacingi njengoThixo.
Buchase Ubuxoki Obusasazwa NguSathana
USathana wasebenzisa uElifazi, omnye wabahlobo abathathu bakaYobhi, ukuba amxelele ukuba abantu abanakukwazi ukumelana noSathana. Ebhekisela kubantu ‘njengabo bahlala ezindlwini zodongwe,’ wathi kuYobhi: ‘Iziseko zabo ziseluthulini! Batyunyuzwa ngokukhawuleza ngakumbi kunenundu. Kususela kusasa kude kube ngokuhlwa batyunyuzwa babe ziingceba; batshabalala ngonaphakade kungekho mntu ukuthabathela entliziyweni oko.’—Yobhi 4:19, 20.
Kwenye indinyana yeZibhalo, sifaniswa ‘nezitya zodongwe’ eziethe-ethe. (2 Kor. 4:7) Sibuthathaka ngenxa yesono nokungafezeki esakuzuz’ ilifa. (Roma 5:12) Ukuba besingenakuncedwa, ebenokusihlasela lula uSathana. Kodwa thina njengamaKristu sinokulufumana uncedo. Nangona sisenza iimpazamo, sibekekile emehlweni kaThixo. (Isa. 43:4) Ngaphezu koko, uYehova ubanika umoya oyingcwele abo bamcelayo. (Luka 11:13) Umoya wakhe unokusinika “amandla angaphaya koko kuqhelekileyo,” ukuze sikwazi ukumelana nazo naziphi na iinzima uSathana asithwaxa ngazo. (2 Kor. 4:7; Fil. 4:13) Ukuba sima nxamnye noMtyholi, ‘siqinile elukholweni,’ uThixo uya kusomeleza. (1 Pet. 5:8-10) Ngenxa yoko, asifanele simoyike uSathana uMtyholi.
Zilumkele Izinto Ezingeyonyani
● Cinga ukuba ezi ndaba zivelaphi ibe zithini
Into ethethwa yiBhayibhile: “Qinisekisani zonke izinto.”—1 Tesalonika 5:21.
Noba into uyive ithethwa ngabantu abaninzi okanye ezindabeni, qiniseka ukuba iyinyani ngaphambi kokuba uyikholelwe okanye uyisasaze. Ungayenza njani loo nto?
Qiniseka ngendawo okanye umntu ove ngaye. Amajelo eendaba ayakwazi ukutshintsha inyani kuba engavumelani neepolitiki okanye efuna imali. Khawuzame ukujonga ukuba le nto ithethwa ziindaba ozibonayo iyafana na nento ethethwa zezinye. Ngamanye amaxesha abahlobo baye bathumelelane izinto ezingeyonyani ngeimeyile okanye kwiiwebhsayithi zokuncokola. Ngenxa yaloo nto, sukuthemba yonke into ngaphandle kokuba uqinisekile ngayo.
Qiniseka ukuba loo nto isanda kwenzeka ibe iyinyani. Jonga ukuba yenzeke nini loo nto, ujonge nezinto eziyinyani, uze ukhangele nobungqina balonto kuthethwa ngayo. Lumka nakakhulu xa ubona ukuba into ethethwayo icaciswe lula kakhulu okanye ithethwa ngohlobo olunokukwenza uzibone sele usenza into ngayo ngenxa yendlela oziva ngayo.
Ubuncwane ObuseBhayibhileni
Qinani, Nize Niphumelele Kugqatso Lobomi
Ukuba yinxalenye yentlangano yabanquli bokwenyaniso ehlabathini lonke kunokusinceda kakhulu ukuze sizinze. Hayi indlela ekuyintsikelelo ngayo ukunxulumana nabazalwana abanothando abanjalo ehlabathini lonke! (1 Petros 2:17) Yaye sinokubanceda abazalwana bethu ukuba bazinze.
Cinga ngezenzo eziluncedo zendoda elilungisa uYobhi. Kwanomthuthuzeli wobuxoki uElifazi kwafuneka avume esithi: “Nabani na okhubekayo, amazwi akho ebemvusa; yaye amadolo agevezelayo ubuwaqinisa.” (Yobhi 4:4) Siqhuba njani kulo mba? Thina ngabanye sinembopheleleko yokunceda abazalwana noodade bethu bokomoya ukuba banyamezele kwinkonzo kaThixo. Xa sisebenzisana nabo, sinokwenza izinto ngomoya wala mazwi: “Yomelezani izandla ezibuthathaka, niwaqinise amadolo agexayo.” (Isaya 35:3) Ngoko ke kutheni ungazenzeli usukelo lokomeleza nokukhuthaza omnye okanye ababini kubazalwana bakho abangamaKristu rhoqo xa udibana nabo? (Hebhere 10:24, 25) Amazwi okuncoma nalukhuthazo nabonakalisa umbulelo ngenxa yokuhlala bezama ukukholisa uYehova kunokubanceda bahlale beqinile ukuze bakwazi ukuphumelela kugqatso lobomi.
OKTOBHA 16-22
UBUTYEBI OBUPHUMA ELIZWINI LIKATHIXO | YOBHI 6-7
“Xa Ubomi Bungapha Kwamandla Akho”
Iimbalasane Zencwadi KaYobhi
7:1; 14:14—Lithetha ukuthini ibinzana elithi ‘umsebenzi osisinyanzelo”? Ukubandezeleka kukaYobhi kwakuqatha kangangokuba wayebugqala ubomi njengomsebenzi wesinyanzelo onzima noyindinisa. (Yobhi 10:17) Ekubeni ixesha umntu alichitha eShiyol—ukususela kwixesha lokufa kwakhe ukusa ekuvusweni kwakhe—liyinto yesinyanzelo, uYobhi ulifanisa elo xesha nomsebenzi onzima wesinyanzelo.
“UYehova Ubanika Amandla Abantu Abatyhafileyo”
NGAMANYE amaxesha sisenokucinga ukuba ubomi bethu bufutshane kwaye ‘bugcwele ziinkathazo.’ (Yobhi 14:1) Loo nto ikhe isityhafise. Nabakhonzi bakaYehova abaninzi ekuthethwa ngabo eBhayibhileni babekhe batyhafe. Abanye babede bafune nokufa. (1 Kum. 19:2-4; Yobhi 3:1-3, 11; 7:15, 16) Kodwa uYehova, uThixo ababemthembile, wayesoloko ebathuthuzela aze abanike amandla. Izinto ezenzeka kubo zabhalelwa ukusithuthuzela nokusifundisa.—Roma 15:4.
Xa Ucinga Ngokuzibulala
Nangona imeko yakho isenokukhangeleka imandundu, khumbula ukuba akuwedwa yaye okubuhlungu kukuba phantse wonke umntu uneengxaki zakhe. IBhayibhile ithi: “Yonke indalo iyagcuma kwaye isentlungwini.” (Roma 8:22) Nangona kusenokubonakala ngathi le ngxaki yakho ayinakuze iphele, izinto zidla ngokutshintsha njengoko ixesha lihamba. Kodwa ke yintoni enokukunceda okwangoku?
Phalaza imbilini yakho kumhlobo wakho onamava nomthembileyo. IBhayibhile ithi: “Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.” (IMizekeliso 17:17) Xa wayeneengxaki, uYobhi indoda elilungisa echazwe eBhayibhileni, waphalaz’ imbilini yakhe kwabanye. Xa wayeziva ‘ezothekile bubomi bakhe’, wathi: “Ndiza kukukhupha ukuxhalaba kwam ngesiqu sam. Ndiza kuthetha ngobukrakra bomphefumlo wam!” (Yobhi 10:1) Ukuzityand’ igila kwabanye kunokukuthomalalisa ukukhathazeka yaye kungade kutshintshe nendlela oyibona ngayo ingxaki ojamelene nayo.
Phalaza imbilini yakho kuThixo ngomthandazo. Abanye bacinga ukuba umthandazo yindlela nje yokuthomalalisa ingqondo, kodwa iBhayibhile ithetha okwahlukileyo koko. INdumiso 65:2 ithi uYehova uThixo ‘ngumphulaphuli wemithandazo,’ yaye eyoku-1 kaPetros 5:7 ithi: ‘Ukukhathalele.’ IBhayibhile igxininisa ukubaluleka kokuthembela kuThixo. Ngokomzekelo:
“Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.”—IMIZEKELISO 3:5,6.
“[UYehova] uya kukwenza oko kunqwenelwa ngabo bamoyikayo, nokukhalela kwabo uncedo uya kukuva, yaye uya kubasindisa.”—INDUMISO 145:19.
“Sinentembelo yokuba, kungakhathaliseki ukuba yintoni na esiyicelayo ngokuvumelana nokuthanda kwakhe, uyasiva.”—1 YOHANE 5:14.
“UYehova ukude nabangendawo, kodwa umthandazo wamalungisa uyawuva.”—IMIZEKELISO 15:29.
Ukuba uyamazisa uThixo ngobunzima ojamelana nabo, ngokuqinisekileyo uya kukunceda. IBhayibhile ikukhuthaza isithi ‘kholosa ngaye ngamaxesha onke. . . Phalaza intliziyo yakho phambi kwakhe.’—INdumiso 62:8.
Ubuncwane ObuseBhayibhileni
Baphathe NjengoYehova Abazalwana Noodade
10 Sinokufana noYehova ngokuzama ukubazi abazalwana noodadewethu. Zama ukubazi bhetele abazalwana noodade. Ncokola nabo ngaphambi nasemva kweentlanganiso, shumayela nabo, ukuba kunokwenzeka, bamemele kwakho. Xa usenza loo nto uza kubona ukuba udade obucinga ukuba akanabubele uneentloni, umzalwana obucinga ukuba uthanda imali uyakuthanda ukupha, okanye umzali osoloko efika emva kwexesha kwiintlanganiso nabantwana bakhe uyachaswa. (Yobhi 6:29) Loo nto ayithethi ukuba simele ‘sizifake ezintweni zabantu.’ (1 Tim. 5:13) Kodwa kubalulekile ukubazi abazalwana noodadewethu nezinto ezakha zenzeka ebomini babo. Le nto iza kusinceda sibazi kakuhle.
OKTOBHA 23-29
UBUTYEBI OBUPHUMA ELIZWINI LIKATHIXO | YOBHI 8-10
“Uthando LukaThixo Olungagungqiyo Luyasikhusela Kubuxoki BukaSathana”
Ngaba Nyhani Singamkholisa UThixo?
UYobhi wehlelwa luthotho lwezinto ezibuhlungu ibe kwakubonakala ngathi udlelw’ indlala. Wagqiba kwelokuba uThixo akayihoyanga into yokuba unokholo kuye okanye akanalo. (Yobhi 9:20-22) UYobhi wayezibona elelona lungisa lakha lakho, kangangokuba kwabanye wayevakala ngathi uthi wogqitha noThixo lowo.—Yobhi 32:1, 2; 35:1, 2.
Kuthetha Ukuthini Ukuthandwa NguYehova Ngokungagungqiyo?
14 Uthando lukaThixo olungagungqiyo lukhusela ukholo lwethu. UDavide wathandaza kuThixo wathi: “Wena uyindawo yam yokuzifihla, uza kundikhusela xa ndisebunzimeni. Ndiza kujikelezwa yintswahla yovuyo ngenxa yokuba undisindisa. . . . Lowo uthembele ngoYehova uphahlwe luthando lwakhe olungagungqiyo.” (INdu. 32:7, 10) Ngamaxesha okubhalwa kweBhayibhile iindonga ezijikeleze isixeko zazikhusela abantu baso kwiintshaba. Uthando olungagungqiyo lukaThixo, lufana neendonga ezisikhusela kwizinto ezinokusenza siyeke ukumthanda. Enye into, olu thando lumenza asitsalele kuye.—Yer. 31:3.
Ubuncwane ObuseBhayibhileni
“Ngubani Na Oyaziyo Ingqondo KaYehova?”
19 Yintoni esiyifundileyo ‘ngengqondo kaYehova’? Sifanele sivumele iLizwi likaThixo lisincede siqonde ingqondo kaYehova. Asifanele sigwebe uYehova ngokusekelwe kwimilinganiselo yethu nendlela yethu yokucinga elinganiselweyo. UYobhi wathi: “[UThixo] akangomntu unjengam endingamphendula, ukuze sibe ndawonye ukuze sigwetyelwe.” (Yobhi 9:32) Xa siqalisa ukuqonda ingqondo kaYehova siye sivakalelwe njengoYobhi, size sithi: “Khangela! Ezi zinto yimiphetho yeendlela zakhe, yaye kukusebeza kuphela okuviweyo kuvela kuye! Kodwa ngubani onokubonisa ukuyiqonda indudumo yakhe enamandla?”—Yobhi 26:14.
20 Njengoko sifunda iZibhalo, sifanele senze ntoni xa sifunda indinyana ekunzima ukuyiqonda, ingakumbi ephathelele indlela uYehova acinga ngayo? Ukuba emva kokuba senze uphando ngaloo mbandela asikayiqondi kakuhle impendulo, oko sinokukujonga njengovavanyo lokuba sikholose kangakanani ngoYehova. Khumbula ukuba, maxa wambi ezinye iingxelo zisinika ithuba lokubonisa ukholo lwethu kwiimpawu zikaYehova. Ngokuthobeka masiyivume into yokuba asiyiqondi yonke into ayenzayo. (INtshu. 11:5) Ngenxa yoko, siya kuvumelana nala mazwi kampostile uPawulos: “Hayi ubunzulu bobutyebi nobobulumko nobolwazi lukaThixo! Hayi indlela engaphengululeki ngayo imigwebo yakhe nendlela ezingalandeki ngayo iindlela zakhe! Kuba ‘ngubani na ofikelele ekuyazini ingqondo kaYehova, okanye ngubani na oye waba ngumcebisi wakhe?’ Okanye, ‘Ngubani na oye waqala wanikela kuye, khon’ ukuze abe nokubuyekezwa?’ Ngenxa yokuba zonke izinto zivela kuye yaye zibekho ngaye kwaye zikholo yena. Kuye makubekho uzuko ngonaphakade. Amen.”—Roma 11:33-36.
OKTOBHA 30–NOVEMBA 5
UBUTYEBI OBUPHUMA ELIZWINI LIKATHIXO | YOBHI 11-12
“Iindlela Ezintathu Zokufumana Ubulumko Uze Uncedakale Bubo”
UYobhi Walizukisa Igama LikaYehova
17 Yintoni eyanceda uYobhi wahlala enengqibelelo? Ngokucacileyo, ngaphambi kokuba ehlelwe ziintlekele, wayesele akhe ulwalamano olusenyongweni noYehova. Nangona singenabungqina bokuba wayesazi ukuba uSathana wayecel’ umngeni uYehova, uYobhi wazimisela ukuhlala enyanisekile. Wathi: “Ndide ndibhubhe andiyi kuyisusa kum ingqibelelo yam!” (Yobhi 27:5) UYobhi walwakha njani olu lwalamano lusenyongweni? Ayithandabuzeki into yokuba, wayekuxabisa oko wakuvayo ngokusebenzisana kukaThixo noAbraham, uIsake noYakobi ababezizizalwana zakhe. Ngokujonga indalo, uYobhi wabona iimpawu ezininzi zikaYehova.—Funda uYobhi 12:7-9, 13, 16.
UYehova Uza Kuhlala Enawe
10 Zama ukuba nabahlobo abathanda uYehova. Ebandleni, zenzele abahlobo onokufunda izinto ezininzi kubo. Basenokuba ngabantu abadala okanye abancinci kuwe. Mhlawumbi ibe ngabazalwana noodade abathetha ulwimi olungafaniyo nolwakho. IBhayibhile ithi ubulumko bufunyanwa “kubantu abadala.” (Yobhi 12:12) Nabantu abadala banokufunda izinto ezininzi kubantu abasebancinci abamthandayo uYehova. UDavide wayemncinci kakhulu kuYonatan kodwa babengabahlobo. (1 Sam. 18:1) Bamkhonza uYehova naxa babeneengxaki kuba babekhuthazana. (1 Sam. 23:16-18) UIrina, udade oliNgqina yedwa kokwabo uthi: “Abazalwana noodade baye bafane nabazali, oosisi noobhuti bethu. Xa uYehova efuna sifumane izinto esizidingayo, usebenzisa bona.”
11 Kusenokungabi lula ukuzenzela abahlobo. Kuba nzima kakhulu xa uneentloni. Omnye udade oneentloni, uRatna, owayengazange ayeke ukufunda inyaniso naxa abanye babengafuni nokuyiva loo nto uthi: “Kwafuneka ndiqonde ukuba ndidinga uncedo lwabazalwana noodade.” Kusenokuba nzima ukuxelela omnye umntu indlela oziva ngayo, kodwa xa ukhululeka kuye, unokude abe ngumhlobo wakho. Abahlobo bakho bafuna ukukukhuthaza nokukunceda, kodwa kufuneka ubenze bayazi indlela abanokuzenza ngayo ezi zinto.
12 Enye yezona ndlela onokubafumana ngazo abahlobo kukuba kunye nabazalwana noodade entsimini. UCarol ebekukhe kwathethwa ngaye uthi: “Ukuba sentsimini nokwenza eminye imisebenzi kaYehova nabanye oodade kundenze ndanabahlobo abaninzi. Kuyo yonke le minyaka, uYehova ebesebenzisa bona xa endinceda. Kumnandi ukuba nabahlobo abamthandayo uYehova. Xa utyhafile, ubona ngathi akukho mntu ukukhathaleleyo, uYehova usebenzisa bona ukuze bakukhuthaze.—IMi 17:17.
it-2 E-1190 ¶2
Ubulumko
Ubulumko Baphezulu. Ngendlela evakalayo ubulumko bufumaneka kuYehova kuba ‘nguye yedwa osisilumko’. (Rom 16:27; ISi 7:12) Ulwazi luhlobene neenkcukacha, uYehova unguMdali “ukususela ngonaphakade ukusa ngonaphakade”. (Nd 90:1, 2) Wazi yonke into ngomhlaba, indlela owenziwe ngawo, izinto ezikuwo nezinye eziye zenzeka de kube ngoku. Ukuze abantu bakwazi ukwenza uphando nokwenza izinto ezintsha, baxhomekeke kwimithetho yendalo, imijikelo nemithetho eyenziwe nguThixo. Ngaphandle kwezi zinto akukho nto bebeza kukwazi ukuzakhela yona. (Yob 38:34-38; Nd 104:24; IMi 3:19; Yer 10:12, 13) Kucacile ukuba indlela yakhe yokuziphatha yeyona incedayo ukuze umntu azinze, enze izinto kakuhle aze aphumelele. (Dut 32:4-6; jonga indawo ethi JEHOVAH phantsi komxholo othi A God of moral standards.) Akukho nto yodlula ukuqonda kwakhe. (Isa 40:13, 14) Nangona enokuvumela izinto ezingqubanayo nokuthanda kwakhe ukuba zenzeke okwexeshana, ikamva lixhomekeke kuye yaye ukuthanda kwakhe uza kukwenza, ibe izinto ezithethwe nguye ‘ziza kuphumelela.’—Isa 55:8-11; 46:9-11.
Ubuncwane ObuseBhayibhileni
Ukunxibelelana Nabantwana Abafikisayo
‘Ngaba ndiyayiqonda eyona nto ithethwayo?’ UYobhi 12:11 uthi: “Ngaba indlebe ayiwavavanyi amazwi. Njengoko inkalakahla ingcamla ukutya?” Elo lelona xesha ekufuneka “uyazi” into ayithethayo umntwana wakho. Ulutsha olufikisayo ludla ngokuthetha ngezinto ngokungathi zinjalo. Ngokomzekelo, unyana okanye intombi yakho isenokuthi, “Undiphatha ngathi ndingumntwana” okanye usenokuthi “Awundiphulaphuli” musa ukuxambulisana naye kuba akathethi loo nto. Ngokomzekelo xa esithi “usoloko undiphatha ngathi ndingumntwana” usenokuba uthetha ukuba “ndivakalelwa kukuba awundithembi,” xa “esithi awundiphulaphuli” usenokuba uthetha ukuba “ndifuna ukukuxelela eyona ndlela ndivakalelwa ngayo.” Zama ukuqonda iimvakalelo ezihamba naloo mazwi.